ᱜᱩᱨᱡᱤᱛ ᱠᱳᱣᱨ
ᱜᱩᱨᱡᱤᱛ ᱠᱳᱣᱨ (ᱡᱟᱱᱟᱢ: ᱒᱕ ᱚᱠᱴᱚᱵᱚᱨ ᱑᱙᱙᱕) ᱫᱚ ᱢᱤᱫ ᱵᱷᱟᱨᱚᱛᱤᱭᱚ ᱛᱤᱨᱞᱟᱹ ᱯᱷᱤᱞᱰ ᱦᱚᱠᱤ ᱠᱷᱮᱞᱚᱸᱰᱤᱭᱟᱹ ᱠᱟᱱᱟᱭ ᱾ ᱩᱱᱤ ᱫᱚ ᱢᱤᱫ ᱨᱩᱠᱷᱤᱭᱟᱹ (defender) ᱞᱮᱠᱟᱛᱮ ᱠᱷᱮᱞᱚᱸᱰ ᱮᱫᱟ ᱟᱨ ᱩᱱᱤ ᱫᱚ ᱫᱚᱞ ᱨᱮᱱᱟᱜ ᱴᱷᱟᱹᱣᱠᱟᱹ ᱟᱠᱟᱫ ᱰᱨᱮᱜᱽ ᱯᱷᱤᱞᱠᱟᱹᱨ ᱦᱚᱸ ᱠᱟᱱᱟᱭ ᱾ ᱩᱱᱤ ᱫᱚ ᱡᱮᱜᱮᱛᱟᱹᱨᱤ ᱞᱮᱵᱮᱞ ᱨᱮ ᱵᱷᱟᱨᱚᱛ ᱮ ᱩᱫᱩᱜ ᱥᱚᱫᱚᱨ ᱟᱠᱟᱫᱟ, ᱱᱤᱛ ᱵᱷᱟᱹᱜᱤ ᱦᱚᱠᱤ ᱡᱮᱜᱮᱛ ᱠᱟᱯ ᱒᱐᱑᱘ ᱨᱮ ᱾ ᱩᱱᱤ ᱫᱚ ᱵᱷᱟᱨᱚᱛ ᱨᱮᱱᱟᱜ ᱮᱥᱤᱭᱟ ᱠᱟᱯ ᱨᱮ ᱡᱤᱛᱠᱟᱹᱨ ᱚᱠᱛᱮ ᱡᱚᱛᱚ ᱠᱷᱚᱱ ᱵᱟᱹᱲᱛᱤ ᱜᱳᱞ ᱟᱛᱟᱝ ᱠᱟᱛᱮ ᱡᱤᱛᱠᱟᱹᱨᱤᱭᱟᱹ ᱮ ᱛᱟᱦᱮᱸ ᱠᱟᱱᱟ, ᱡᱟᱦᱟᱸ ᱨᱮ ᱘ ᱜᱚᱴᱟᱝ ᱜᱳᱞ ᱮ ᱠᱚᱨᱟᱣ ᱞᱮᱫᱼᱟ ᱾ ᱡᱩᱞᱟᱭ ᱒᱐᱑᱘ ᱦᱟᱹᱵᱤᱡ ᱛᱮ ᱩᱱᱤ ᱕᱓ ᱜᱚᱴᱟᱝ ᱡᱮᱜᱮᱛᱟᱹᱨᱤ ᱢᱮᱪ ᱮ ᱠᱷᱮᱞ ᱟᱠᱟᱫᱟ ᱾ ᱩᱱᱤ ᱫᱚ ᱥᱮᱨᱢᱟ ᱒᱐᱒᱐-᱒᱑ ᱞᱟᱹᱜᱤᱫ ᱮᱯᱷᱟᱭᱤᱮᱪ ᱯᱞᱮᱭᱟᱨ ᱚᱯᱷ ᱫᱟ ᱤᱭᱟᱨ ᱥᱤᱨᱯᱷᱟᱹ ᱨᱮ ᱛᱤᱨᱞᱟᱹ ᱠᱷᱮᱞᱚᱸᱰᱤᱭᱟᱹ ᱧᱩᱛᱩᱢ ᱛᱮ ᱵᱟᱪᱷᱚᱱ ᱞᱮᱱᱟ ᱾ ᱩᱱᱤ ᱫᱚ ᱢᱟᱨᱟᱝ ᱵᱷᱟᱨᱚᱛᱤᱭᱚ ᱠᱷᱮᱞᱚᱸᱰᱤᱭᱟᱹ ᱛᱟᱦᱮᱸ ᱠᱟᱱᱟᱭ ᱡᱟᱦᱟᱸᱭ ᱫᱚ ᱯᱚᱧᱡᱟᱵᱽ ᱟᱨ ᱵᱷᱟᱨᱚᱛ ᱡᱟᱹᱛᱤᱭᱟᱹᱨᱤ ᱛᱷᱚᱠ ᱨᱮ ᱩᱫᱩᱜ ᱥᱚᱫᱚᱨ ᱟᱠᱟᱫᱟ ᱾
ᱮᱛᱚᱦᱚᱵ ᱡᱤᱭᱚᱱ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱜᱩᱨᱡᱤᱛ ᱠᱳᱣᱨ ᱫᱚ ᱒᱕ ᱚᱠᱴᱚᱵᱚᱨ ᱑᱙᱙᱕ ᱨᱮ ᱯᱚᱧᱡᱟᱵᱽ ᱨᱮᱱᱟᱜ ᱟᱢᱨᱤᱛᱥᱟᱨ ᱨᱮ ᱢᱤᱭᱟᱰᱤ ᱠᱟᱞᱟᱱ ᱟᱹᱛᱩ ᱨᱮ ᱡᱟᱱᱟᱢ ᱞᱮᱱᱟ ᱾ ᱩᱱᱤ ᱥᱟᱛᱱᱟᱢ ᱥᱤᱝ ᱟᱨ ᱦᱚᱨᱡᱤᱱᱫᱟᱨ ᱠᱳᱣᱨ ᱴᱷᱮᱱ ᱢᱤᱫ ᱪᱟᱹᱥᱤ ᱜᱷᱟᱨᱚᱸᱡᱽ ᱨᱮ ᱡᱟᱱᱟᱢ ᱞᱮᱱᱟ ᱾ ᱩᱱᱤ ᱨᱤᱱ ᱢᱤᱫ ᱢᱟᱨᱟᱝ ᱵᱚᱭᱦᱟ ᱠᱩᱲᱤ ᱯᱨᱚᱫᱤᱯ ᱠᱳᱣᱨ ᱢᱮᱱᱟᱭᱟ ᱾ ᱱᱚᱣᱟ ᱟᱡ ᱟᱭᱳ-ᱵᱟᱵᱟ ᱞᱟᱹᱜᱤᱫ ᱢᱩᱬ ᱠᱟᱛᱷᱟ ᱛᱟᱦᱮᱸ ᱠᱟᱱᱟ ᱡᱮ ᱟᱡ ᱟᱨ ᱟᱡ ᱵᱚᱭᱦᱟ ᱠᱩᱲᱤ ᱠᱚ ᱢᱤᱫ ᱱᱟᱯᱟᱭ ᱥᱮᱪᱮᱫ ᱠᱚ ᱧᱟᱢ ᱢᱟ, ᱚᱱᱟ ᱞᱟᱹᱜᱤᱫ ᱩᱱᱠᱩ ᱟᱹᱛᱩ ᱨᱮ ᱴᱚᱴᱷᱟᱣᱟᱨᱤ ᱥᱚᱨᱠᱟᱨᱤ ᱟᱥᱲᱟ ᱵᱚᱫᱚᱞ ᱛᱮ ᱟᱡᱱᱟᱞᱟ ᱨᱮ ᱢᱮᱱᱟᱜ ᱢᱤᱫ ᱯᱨᱟᱭᱵᱮᱴ ᱟᱥᱲᱟ ᱨᱮ ᱟᱠᱚᱣᱟᱜ ᱵᱟᱨᱭᱟ ᱦᱚᱯᱚᱱ ᱮᱨᱟ ᱠᱚ ᱵᱷᱮᱡᱟ ᱠᱮᱫ ᱠᱚᱣᱟ, ᱡᱟᱦᱟᱸ ᱫᱚ ᱑᱓ ᱠᱤᱞᱳᱢᱤᱴᱟᱨ ᱠᱷᱚᱱ ᱵᱟᱹᱲᱛᱤ ᱥᱟᱹᱜᱤᱧ ᱨᱮ ᱢᱮᱱᱟᱜᱼᱟ ᱾ ᱜᱩᱨᱡᱤᱛ ᱨᱤᱱ ᱵᱟᱵᱟ ᱥᱟᱛᱱᱟᱢ ᱥᱤᱝ ᱟᱡ ᱨᱤᱱ ᱦᱚᱯᱚᱱ ᱮᱨᱟ ᱠᱚ ᱟᱡᱟᱜ ᱥᱟᱭᱠᱤᱞ ᱨᱮ ᱵᱟᱦᱮᱞᱮᱫ ᱠᱚ ᱛᱟᱦᱮᱸᱱᱟ ᱟᱨ ᱟᱥᱲᱟᱭ ᱤᱫᱤ ᱠᱚ ᱛᱟᱦᱮᱸᱱᱟ, ᱟᱨ ᱡᱚᱛᱚ ᱫᱤᱱ ᱮ ᱛᱟᱹᱜᱤ ᱠᱚ ᱛᱟᱦᱮᱸᱱᱟ ᱛᱤᱱ ᱦᱟᱹᱵᱤᱡ ᱟᱠᱚᱣᱟᱜ ᱟᱥᱲᱟ ᱵᱟᱝ ᱪᱟᱵᱟᱜ ᱠᱟᱱᱟ ᱩᱱ ᱦᱟᱹᱵᱤᱡ ᱛᱟᱭᱚᱢ ᱛᱮ ᱫᱟᱲᱟ ᱨᱩᱣᱟᱹᱲ ᱠᱟᱛᱮ ᱤᱫᱤ ᱠᱚ ᱞᱟᱹᱜᱤᱫ ᱾
ᱪᱮᱫᱟᱜ ᱥᱮ ᱱᱚᱣᱟ ᱫᱚ ᱢᱤᱫ ᱪᱚᱞᱚᱛ ᱥᱟᱹᱜᱟᱹᱭ ᱵᱟᱝ ᱛᱟᱦᱮᱸ ᱠᱟᱱᱟ, ᱚᱱᱟ ᱞᱟᱹᱜᱤᱫ ᱟᱡ ᱟᱭᱳ-ᱵᱟᱵᱟ ᱢᱩᱪᱟᱹᱫ ᱨᱮ ᱒᱐᱐᱖ ᱨᱮ ᱯᱚᱧᱡᱟᱵᱽ ᱨᱮᱱᱟᱜ ᱛᱟᱨᱱ ᱛᱟᱨᱟᱱ ᱦᱚᱱᱚᱛ ᱨᱮ ᱢᱮᱱᱟᱜ ᱠᱟᱭᱨᱚᱱ ᱨᱮ ᱗᱐ ᱠᱤᱞᱳᱢᱤᱴᱟᱨ ᱠᱷᱚᱱ ᱵᱟᱹᱲᱛᱤ ᱥᱟᱹᱜᱤᱧ ᱨᱮ ᱢᱮᱱᱟᱜ ᱢᱤᱫ ᱵᱳᱨᱰᱤᱝ ᱟᱥᱲᱟ ᱨᱮ ᱟᱠᱚᱣᱟᱜ ᱵᱟᱨᱭᱟ ᱦᱚᱯᱚᱱ ᱮᱨᱟ ᱠᱚ ᱵᱷᱮᱡᱟ ᱠᱮᱫ ᱠᱚᱣᱟ ᱾ ᱠᱟᱭᱨᱚᱱ ᱫᱚ ᱡᱚᱛᱚ ᱠᱷᱚᱱ ᱢᱟᱨᱮ ᱟᱨ ᱡᱚᱛᱚ ᱠᱷᱚᱱ ᱧᱩᱛᱩᱢᱟᱱ ᱛᱤᱨᱞᱟᱹ ᱦᱚᱠᱤ ᱱᱟᱨᱥᱟᱨᱤ ᱠᱚ ᱢᱩᱫᱽ ᱨᱮ ᱢᱤᱫ ᱛᱟᱦᱮᱸ ᱠᱟᱱᱟ ᱟᱨ ᱱᱚᱣᱟ ᱴᱷᱟᱶ ᱨᱮ ᱜᱮ ᱵᱟᱱᱟᱨ ᱵᱚᱭᱦᱟ ᱠᱩᱲᱤ ᱠᱷᱮᱞ ᱞᱟᱹᱜᱤᱫ ᱟᱠᱚᱣᱟᱜ ᱨᱟᱹᱥᱠᱟᱹ ᱠᱚ ᱧᱟᱢ ᱠᱮᱫᱼᱟ ᱾ ᱦᱚᱠᱤ ᱨᱮ ᱟᱠᱚᱣᱟᱜ ᱵᱷᱟᱹᱜᱤ ᱫᱚ ᱩᱱᱠᱩ ᱟᱥᱲᱟ ᱨᱮᱱᱟᱜ ᱥᱚᱨᱠᱟᱨᱤ ᱣᱤᱝ ᱨᱮ ᱢᱤᱫ ᱴᱷᱟᱶ ᱮ ᱠᱟᱢᱟᱣ ᱚᱪᱚ ᱠᱮᱫ ᱠᱚᱣᱟ, ᱡᱟᱦᱟᱸ ᱫᱚ ᱩᱱᱠᱩ ᱢᱟᱜᱽᱱᱟ ᱥᱮᱪᱮᱫ ᱟᱨ ᱡᱚᱢᱟᱜ ᱮᱢ ᱠᱮᱫ ᱠᱚᱣᱟ, ᱡᱟᱦᱟᱸ ᱫᱚ ᱵᱚᱭᱦᱟ ᱠᱩᱲᱤ ᱨᱤᱱ ᱴᱟᱠᱟ ᱠᱚᱢ ᱟᱭᱳ-ᱵᱟᱵᱟ ᱞᱟᱹᱜᱤᱫ ᱢᱤᱫ ᱨᱟᱦᱟᱛ ᱞᱮᱠᱟᱛᱮ ᱦᱮᱡ ᱮᱱᱟ ᱾
ᱜᱩᱨᱡᱤᱛ ᱠᱳᱣᱨ ᱒᱐᱑᱑ ᱫᱷᱟᱹᱵᱤᱡ ᱠᱟᱭᱨᱚᱱ ᱨᱮ ᱟᱡᱟᱜ ᱥᱮᱪᱮᱫ ᱮ ᱪᱟᱹᱞᱩ ᱫᱚᱦᱚ ᱠᱮᱫᱼᱟ, ᱚᱱᱟ ᱛᱟᱭᱚᱢ ᱩᱱᱤ ᱟᱡᱟᱜ ᱥᱮᱪᱮᱫ ᱟᱨ ᱟᱡᱟᱜ ᱴᱨᱮᱱᱤᱝ ᱪᱟᱹᱞᱩ ᱫᱚᱦᱚᱭ ᱞᱟᱹᱜᱤᱫ ᱡᱟᱞᱟᱱᱫᱷᱟᱨ ᱨᱮᱱᱟᱜ ᱞᱟᱭᱟᱞᱯᱩᱨ ᱠᱷᱟᱞᱥᱟ ᱠᱚᱞᱮᱡᱽ ᱯᱷᱳᱨ ᱣᱤᱢᱮᱱ ᱨᱮᱭ ᱪᱟᱞᱟᱣ ᱮᱱᱟ - ᱡᱟᱦᱟᱸ ᱫᱚ ᱴᱷᱟᱶ ᱨᱮ ᱩᱱᱤ ᱰᱨᱮᱜᱽ-ᱯᱷᱤᱞᱠᱤᱝ ᱨᱮ ᱥᱤᱨᱤᱭᱟᱥ ᱮ ᱦᱟᱛᱟᱣ ᱠᱮᱫᱼᱟ ᱾ ᱱᱚᱣᱟ ᱛᱟᱭᱚᱢ ᱩᱱᱤ ᱟᱞᱟᱦᱟᱵᱟᱫᱽ ᱨᱮ ᱢᱤᱫ ᱡᱩᱱᱤᱭᱚᱨ ᱠᱞᱟᱨᱠ ᱞᱮᱠᱟᱛᱮ ᱵᱷᱟᱨᱚᱛᱤᱭᱚ ᱨᱮᱞᱣᱮ ᱨᱮᱭ ᱵᱟᱦᱟᱞ ᱮᱱᱟ ᱾
ᱠᱟᱹᱢᱤ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱜᱩᱨᱡᱤᱛ ᱠᱳᱣᱨ ᱫᱚ ᱫᱤᱥᱚᱢ ᱞᱟᱹᱜᱤᱫ ᱠᱷᱮᱞ ᱨᱮᱱᱟᱜ ᱟᱡᱟᱜ ᱯᱩᱭᱞᱩ ᱫᱟᱣ ᱮ ᱧᱟᱢ ᱠᱮᱫᱼᱟ, ᱡᱚᱠᱷᱚᱱ ᱩᱱᱤ ᱒᱐᱑᱔ ᱨᱮ ᱥᱤᱱᱤᱭᱚᱨ ᱡᱟᱹᱛᱤᱭᱟᱹᱨᱤ ᱠᱮᱢᱯ ᱞᱟᱹᱜᱤᱫ ᱮ ᱦᱚᱦᱚ ᱮᱱᱟ ᱾ ᱢᱮᱱᱠᱷᱟᱱ ᱩᱱᱤ ᱫᱚ ᱫᱚᱞ ᱨᱮ ᱢᱤᱫ ᱴᱷᱟᱶ ᱵᱟᱭ ᱴᱷᱟᱹᱣᱠᱟᱹ ᱫᱟᱲᱮᱭᱟᱫᱼᱟ ᱾ ᱱᱚᱣᱟ ᱫᱚ ᱒᱐᱑᱗ ᱨᱮ ᱜᱮ ᱦᱩᱭ ᱞᱮᱱᱟ ᱡᱚᱠᱷᱚᱱ ᱩᱱᱤ ᱵᱷᱟᱨᱚᱛᱤᱭᱚ ᱛᱤᱨᱞᱟᱹ ᱦᱚᱠᱤ ᱫᱚᱞ ᱨᱤᱱᱤᱡ ᱢᱤᱫ ᱪᱤᱨᱟᱹᱜᱤᱞ ᱥᱚᱦᱮᱫ ᱮ ᱵᱮᱱᱟᱣ ᱮᱱᱟ ᱾ ᱜᱩᱨᱡᱤᱛ ᱠᱳᱣᱨ ᱫᱚ ᱛᱟᱭᱚᱢ ᱛᱮ ᱢᱟᱨᱪ ᱒᱐᱑᱗ ᱨᱮ ᱠᱟᱱᱟᱰᱟ ᱨᱮ ᱴᱮᱥᱴ ᱥᱤᱨᱤᱡᱽ, ᱮᱯᱨᱤᱞ ᱒᱐᱑᱗ ᱨᱮ ᱦᱚᱠᱤ ᱡᱮᱜᱮᱛ ᱞᱤᱜᱽ ᱨᱟᱣᱩᱱᱰ ᱒ ᱟᱨ ᱡᱩᱞᱟᱭ ᱒᱐᱑᱗ ᱨᱮ ᱦᱚᱠᱤ ᱡᱮᱜᱮᱛ ᱞᱤᱜᱽ ᱥᱮᱢᱤᱯᱷᱟᱭᱱᱟᱞ ᱨᱮᱭ ᱠᱷᱮᱞ ᱞᱮᱫᱼᱟ ᱾