ᱜᱳᱨᱟᱪᱟᱸᱫᱽ ᱴᱩᱰᱩ

ᱣᱤᱠᱤᱯᱤᱰᱤᱭᱟ, ᱨᱟᱲᱟ ᱜᱮᱭᱟᱱ ᱯᱩᱛᱷᱤ ᱠᱷᱚᱱ

ᱜᱳᱨᱟᱪᱟᱸᱫᱽ ᱴᱩᱰᱩ

ᱥᱟᱱᱛᱟᱲᱤ ᱥᱟᱶᱦᱮᱫ ᱥᱮᱨᱢᱟ ᱨᱤᱱ ᱡᱩᱞᱩᱜ ᱤᱯᱤᱞ ᱟᱹᱰᱤ ᱢᱟᱱᱚᱛᱟᱱ ᱢᱟᱹᱱ ᱜᱳᱨᱟᱪᱟᱸᱫᱽ ᱴᱩᱰᱩ ᱫᱚ ᱡᱟᱭᱡᱩᱜᱽ ᱡᱤᱣᱤᱫ ᱮ ᱛᱟᱦᱮᱸᱱᱟ ᱟᱵᱚ ᱠᱚ ᱛᱟᱞᱟᱨᱮ ᱾[᱑] ᱟᱡᱟᱜ ᱜᱚᱱᱚᱝ ᱟᱱ ᱮᱱᱮᱢ ᱨᱮᱭᱟᱜ ᱛᱳᱞᱚᱱ ᱵᱟᱹᱱᱩᱜᱼᱟ ᱾ ᱛᱮᱞᱟ ᱵᱟᱹᱱᱩᱜᱼᱟ ᱾ ᱟᱹᱰᱤ ᱜᱟᱺᱦᱤᱨ ᱚᱱᱚᱬᱦᱤᱭᱟᱹ ᱢᱮᱱᱛᱮᱭ ᱧᱩᱢ ᱦᱟᱞᱟᱝ ᱟᱠᱟᱱᱟ ᱩᱱᱤ ᱫᱚ ᱾ ᱟᱡᱟᱜ ᱢᱚᱱᱮ ᱚᱱᱛᱚᱨ ᱨᱮ ᱢᱟᱹᱱᱢᱤ ᱫᱩᱞᱟᱹᱲ ᱢᱟ ᱢᱮᱱᱟᱜ ᱜᱮᱭᱟ, ᱚᱱᱟ ᱥᱟᱶᱛᱮ ᱫᱤᱥᱚᱢ ᱫᱩᱞᱟᱹᱲ, ᱥᱟᱶᱛᱟ, ᱥᱟᱶᱦᱮᱫ ᱟᱨ ᱡᱤᱣᱤ ᱟᱱ ᱠᱚ ᱞᱟᱹᱜᱤᱫ ᱚᱥᱚᱢᱵᱷᱟᱲ ᱫᱩᱞᱟᱹᱲ ᱥᱚᱫᱚᱨ ᱚᱴᱚ ᱠᱟᱛᱮ ᱟᱡ ᱫᱚ ᱟᱵᱚ ᱠᱚ ᱛᱟᱞᱟᱨᱮ ᱡᱩᱜᱽ ᱡᱤᱭᱟᱹᱛ ᱮ ᱛᱟᱦᱮᱸ ᱫᱚᱦᱚ ᱮᱱᱟ ᱾ ᱱᱚᱝᱠᱟᱱ ᱢᱚᱱ ᱚᱱᱛᱚᱨ ᱩᱭᱦᱟᱹᱨᱟᱱ ᱦᱚᱲ ᱠᱚᱣᱟᱜ ᱞᱮᱠᱷᱟ ᱫᱚ ᱥᱟᱶᱛᱟ ᱨᱮ ᱟᱹᱰᱤ ᱠᱚᱢ ᱜᱮᱭᱟ ᱾

ᱡᱟᱱᱟᱢ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱢᱟᱹᱱ ᱜᱳᱨᱟᱪᱟᱸᱫᱽ ᱴᱩᱰᱩ ᱫᱚ ᱡᱩᱞᱟᱹᱭ ᱑᱙᱑᱘ ᱥᱟᱞᱮᱨᱮᱭ ᱡᱟᱱᱟᱢ ᱞᱮᱱᱟ ᱾ ᱥᱟᱱᱛᱟᱲᱤ ᱯᱟᱨᱜᱟᱱᱟ ᱨᱮᱭᱟᱜ ᱯᱟᱠᱩᱲ ᱛᱷᱟᱱᱟᱨᱮ ᱢᱮᱱᱟᱜ ᱪᱳᱞᱠᱟᱴᱟ ᱥᱟᱞᱜᱟ ᱯᱟᱲᱟ ᱟᱹᱛᱩᱨᱮ ᱾ ᱟᱡ ᱡᱟᱱᱟᱢ ᱵᱟᱵᱟᱦᱟᱜ ᱧᱩᱛᱩᱢ ᱫᱚ ᱢᱟᱹᱱ ᱞᱚᱠᱷᱚᱱ ᱴᱩᱰᱩ ᱟᱨ ᱟᱭᱳ ᱫᱚ ᱨᱟᱹᱱᱤ ᱴᱩᱰᱩ ᱢᱮᱱᱛᱮ ᱛᱟᱦᱮᱸ ᱠᱟᱱᱟ ᱾

ᱚᱞᱚᱜ ᱯᱟᱲᱦᱟᱣ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱟᱡᱟᱜ ᱚᱞᱚᱜ ᱯᱟᱲᱦᱟᱣ ᱫᱚ ᱠᱟᱭᱨᱟᱵᱚᱱᱤ ᱢᱤᱥᱚᱱ ᱟᱥᱲᱟ ᱨᱮ ᱮᱛᱚᱦᱚᱵ ᱞᱮᱱᱟ ᱾ ᱤᱱᱟᱹ ᱛᱟᱭᱚᱢ ᱦᱟᱡᱟᱨᱤ ᱵᱟᱜᱽ ᱨᱮᱭᱟᱜ ᱥᱮᱱᱴ ᱠᱚᱞᱚᱢᱵᱟᱥ ᱠᱚᱞᱤᱡᱤᱭᱮᱴ ᱟᱥᱲᱟ ᱠᱷᱚᱱ ᱯᱨᱚᱵᱮᱥᱤᱠᱟ ᱵᱤᱱᱤᱰ ᱮ ᱯᱟᱥ ᱞᱮᱜᱼᱟ ᱾ ᱦᱟᱡᱟᱨᱤᱵᱟᱜᱽ ᱨᱮᱭᱟᱜ ᱥᱮᱱᱴ ᱠᱚᱞᱚᱢᱵᱟᱥ ᱠᱚᱞᱮᱡᱽ ᱨᱮ ᱪᱮᱛᱟᱱ ᱛᱟᱱᱟᱞᱟ ᱞᱟᱹᱜᱤᱫ ᱵᱟᱨ ᱥᱮᱨᱢᱟᱭ ᱯᱟᱲᱦᱟᱣ ᱞᱮᱱᱟ ᱾ ᱢᱮᱱᱠᱷᱟᱱ ᱨᱮᱸᱜᱮᱡ ᱡᱟᱞᱟᱛᱮ ᱵᱤᱱᱤᱰ ᱫᱚ ᱵᱟᱭ ᱮᱢ ᱫᱟᱲᱮᱭᱟᱫ ᱛᱮ ᱚᱞᱚᱜ ᱫᱚᱭ ᱵᱟᱹᱜᱤ ᱠᱮᱜᱼᱟ ᱾ ᱤᱱᱟᱹ ᱛᱟᱭᱚᱢ ᱑᱙᱔᱓ ᱨᱮ ᱵᱷᱟᱜᱚᱞᱯᱩᱨ ᱢᱟᱪᱮᱛ ᱴᱨᱮᱱᱤᱝ ᱵᱤᱨᱫᱟᱹᱜᱟᱲ ᱠᱷᱚᱱ ᱥᱤᱠᱷᱱᱟᱹᱛ ᱵᱟᱠᱷᱨᱟ ᱥᱤᱫ ᱥᱟᱠᱟᱢ ᱧᱟᱢ ᱠᱟᱛᱮ ᱴᱩᱰᱩ ᱜᱚᱢᱠᱮ ᱫᱚ ᱠᱟᱭᱨᱟᱵᱚᱱᱤ ᱥᱟᱱᱛᱟᱲ ᱩᱱᱩᱥᱩᱞ ᱟᱥᱲᱟ ᱨᱮ ᱥᱚᱦᱮᱫ ᱢᱟᱪᱮᱛ ᱨᱮᱭ ᱵᱟᱦᱟᱞ ᱞᱮᱱᱟ ᱾ ᱚᱸᱰᱮ ᱠᱟᱹᱢᱤ ᱠᱟᱹᱢᱤ ᱛᱮᱜᱮ ᱑᱙᱖᱑ ᱨᱮ ᱥᱚᱱᱮᱨ ᱮ ᱥᱟᱹᱛ ᱞᱮᱜᱼᱟ ᱾ ᱑᱙᱖᱒ ᱫᱷᱟᱹᱵᱤᱡ ᱥᱚᱦᱮᱛ ᱢᱟᱪᱮᱛ ᱞᱮᱠᱟ ᱛᱟᱦᱮᱸ ᱠᱟᱛᱮ ᱑᱙᱖᱓ ᱨᱮ ᱟᱡ ᱫᱚ ᱠᱟᱭᱨᱟᱵᱚᱱᱤ ᱟᱥᱲᱟ ᱨᱤᱱᱤᱡ ᱢᱟᱨᱟᱝ ᱢᱟᱪᱮᱛ ᱮ ᱦᱩᱭ ᱮᱱᱟ ᱾

ᱠᱟᱹᱢᱤ ᱠᱟᱹᱥᱱᱤ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

᱑᱙᱘᱐ ᱨᱮ ᱠᱟᱹᱢᱤ ᱯᱩᱨᱟᱹᱣ ᱛᱟᱭᱚᱢ ᱦᱚᱸ ᱚᱱᱟ ᱠᱚ ᱜᱟᱶᱛᱟ ᱨᱤᱱ ᱥᱩᱛᱨᱮᱛ ᱞᱮᱠᱟᱛᱮ ᱠᱟᱹᱢᱤ ᱨᱮᱭᱟᱜ ᱟᱺᱜᱤᱵᱷᱟᱨ ᱠᱚ ᱮᱢᱟ ᱫᱮ ᱛᱟᱦᱮᱸᱱ ᱾ ᱟᱡᱟᱜ ᱩᱫᱩᱜ ᱞᱮᱠᱟᱛᱮ ᱠᱟᱭᱨᱟᱵᱚᱱᱤ ᱥᱟᱱᱛᱟᱲ ᱠᱮᱨᱮᱥᱛᱟᱱ ᱧᱩᱛᱩᱢ ᱞᱮᱠᱟᱛᱮ ᱵᱤᱨᱫᱟᱹᱜᱟᱲ ᱦᱚᱸ ᱵᱮᱨᱮᱫ ᱟᱠᱟᱱᱟ ᱾ ᱚᱱᱟ ᱨᱤᱱᱤᱡ ᱩᱱᱤ ᱫᱚ ᱵᱩᱱᱭᱟᱹᱫᱤᱭᱟᱹ ᱥᱩᱛᱨᱮᱛ ᱞᱮᱠᱟᱛᱮ ᱦᱚᱸᱭ ᱛᱟᱦᱮᱸ ᱠᱟᱱᱟ ᱾ ᱜᱳᱨᱟᱪᱟᱸᱫᱽ ᱫᱚ ᱠᱮᱨᱮᱥᱛᱟᱱ ᱫᱷᱚᱨᱚᱢ ᱮ ᱢᱟᱱᱟᱣ ᱞᱮᱫ ᱨᱮᱦᱚᱸ ᱟᱯᱱᱟᱨᱟᱜ ᱫᱷᱚᱨᱚᱢ ᱪᱮᱛᱟᱱ ᱨᱮᱦᱚᱸ ᱟᱹᱰᱤ ᱜᱮ ᱯᱟᱹᱛᱭᱟᱹᱣ ᱛᱟᱭ ᱛᱟᱦᱮᱸ ᱠᱟᱱᱟ ᱾ ᱚᱱᱟᱛᱮ ᱩᱱᱤ ᱫᱚ ᱵᱟᱦᱨᱮ ᱫᱤᱥᱚᱢ ᱦᱚᱸ ᱟᱹᱰᱤ ᱫᱷᱟᱣ ᱫᱟᱬᱟᱱ ᱮ ᱪᱟᱞᱟᱣ ᱞᱮᱱᱟ ᱾ ᱡᱤᱭᱚᱱ ᱨᱮᱭᱟᱜ ᱡᱚᱛᱚ ᱯᱟᱦᱴᱟ ᱨᱮᱜᱮ ᱵᱚᱨᱟᱵᱚᱨ ᱵᱟᱰᱟᱭ ᱨᱮᱭᱟᱜ ᱥᱟᱱᱟᱭ ᱥᱚᱫᱚᱨ ᱟᱠᱟᱜᱼᱟ ᱾ ᱠᱟᱭᱨᱟᱵᱚᱱᱤ ᱟᱥᱲᱟ ᱨᱤᱱᱤᱡ ᱢᱟᱪᱮᱛ ᱛᱟᱦᱮᱸᱱ ᱚᱠᱛᱮ ᱠᱷᱮᱞᱚᱸᱰ ᱠᱚᱨᱮ ᱟᱨ ᱦᱚᱥᱴᱮᱞ ᱜᱤᱫᱽᱨᱟᱹ ᱠᱚ ᱧᱮᱞ ᱵᱟᱲᱟᱨᱮ ᱟᱺᱜᱤᱵᱷᱟᱨ ᱮ ᱜᱚᱜ ᱞᱮᱜᱼᱟ ᱾ ᱠᱚᱲᱟ ᱵᱤᱫᱟᱹᱞ ᱨᱮ ᱦᱟᱹᱠᱩ ᱥᱟᱵ, ᱵᱤᱨ ᱵᱩᱨᱩ ᱫᱟᱬᱟᱱ ᱯᱷᱳᱴᱳ ᱨᱟᱠᱟᱵ, ᱯᱟᱭᱨᱟᱜ ᱮᱢᱟᱱ ᱮ ᱠᱩᱥᱤᱭᱟᱜ ᱠᱟᱱ ᱛᱟᱦᱮᱸᱱ ᱾

ᱜᱳᱨᱟᱪᱟᱸᱫᱽ ᱴᱩᱰᱩ ᱜᱚᱢᱠᱮ ᱭᱟᱜ ᱡᱩᱣᱟᱹᱱ ᱩᱢᱮᱨ ᱚᱠᱛᱚ, ᱩᱱ ᱵᱮᱲᱟᱨᱮ ᱵᱟᱦᱟ, ᱥᱚᱦᱨᱟᱭ, ᱵᱟᱯᱞᱟ, ᱵᱮᱦᱟ ᱠᱚᱨᱮᱱᱟᱜ ᱥᱮᱨᱮᱧ ᱠᱚ ᱦᱟᱹᱨ ᱥᱟᱢᱴᱟᱣ ᱠᱟᱛᱮ ᱟᱡ ᱦᱚᱸ ᱢᱤᱫ ᱥᱮᱨᱮᱧ ᱵᱟᱰᱚᱦᱤ ᱞᱮᱠᱟᱛᱮᱭ ᱥᱚᱫᱚᱨ ᱮᱱᱟ ᱾ ᱤᱱᱟᱹ ᱛᱟᱭᱚᱢ ᱵᱟᱹᱭ ᱵᱟᱹᱭ ᱛᱮ ᱚᱱᱚᱬᱦᱮ ᱚᱞ ᱮ ᱮᱛᱚᱦᱚᱵ ᱠᱮᱜᱼᱟ ᱾ ᱚᱱᱚᱬᱦᱮ ᱚᱞ ᱚᱞᱛᱮ ᱜᱮᱞ ᱥᱮᱨᱢᱟ ᱜᱟᱱ ᱛᱟᱭᱚᱢ ᱠᱷᱚᱱ ᱫᱚ ᱚᱱᱚᱞ, ᱠᱟᱹᱦᱱᱤ ᱠᱚ ᱚᱞ ᱮ ᱮᱛᱚᱦᱚᱵ ᱠᱮᱜᱼᱟ ᱾ ᱱᱚᱶᱟ ᱚᱠᱛᱚ ᱠᱷᱚᱱ ᱥᱟᱱᱛᱟᱲᱟᱜ ᱞᱟᱹᱭ ᱞᱟᱠᱪᱟᱨ ᱟᱛᱮ ᱟᱥᱲᱟ ᱜᱤᱫᱽᱨᱟᱹ ᱠᱚ ᱞᱟᱹᱜᱤᱫ ᱠᱟᱹᱴᱤᱡ ᱜᱟᱭᱟᱱ ᱚᱞ ᱮ ᱪᱷᱩᱴᱟᱹᱣ ᱮᱱᱟ ᱾ ᱚᱱᱚᱬᱦᱮ ᱚᱞ ᱨᱮᱭᱟᱜ ᱫᱟᱲᱮ ᱫᱚ ᱥᱟᱱᱛᱟᱲᱤ ᱥᱮᱨᱮᱧ ᱟᱨ ᱚᱱᱚᱬᱦᱮ ᱠᱚᱨᱮ ᱠᱷᱚᱱ ᱜᱮᱭ ᱧᱟᱢ ᱞᱮᱜᱼᱟ ᱾ ᱥᱟᱱᱛᱟᱲᱤ ᱯᱟᱹᱨᱥᱤ ᱟᱨ ᱥᱟᱱᱛᱟᱲ ᱡᱟᱹᱛᱤ ᱪᱮᱛᱟᱱ ᱨᱮ ᱟᱡᱟᱜ ᱜᱟᱺᱦᱤᱨ ᱫᱩᱞᱟᱹᱲ ᱛᱟᱦᱮᱸ ᱠᱟᱱ ᱠᱷᱟᱹᱛᱤᱨ ᱜᱮ ᱡᱤᱣᱤᱫ ᱵᱷᱩᱨ ᱨᱮ ᱱᱚᱶᱟ ᱠᱚ ᱠᱟᱛᱷᱟᱭ ᱩᱭᱦᱟᱹᱨ ᱦᱚᱴᱚ ᱠᱟᱣᱟᱫ ᱵᱚᱱᱟ ᱾ ᱟᱹᱠᱤᱱᱟᱜ ᱩᱪᱷᱟᱹᱱ ᱟᱠᱟᱱ ᱯᱩᱛᱷᱤ ᱠᱚ ᱨᱮᱭᱟᱜ ᱞᱮᱠᱷᱟ :

᱑. ᱪᱟᱸᱫᱽ ᱢᱟᱞᱟ (ᱚᱱᱚᱬᱦᱮ ᱯᱩᱛᱷᱤ - ᱑᱙᱕᱗),

᱒. ᱢᱤᱫᱴᱮᱱ ᱠᱩᱲᱤ ᱤᱧ ᱫᱩᱞᱟᱹᱲ ᱠᱮᱫᱮᱭᱟ (ᱜᱟᱢᱟᱢ ᱯᱩᱛᱷᱤ - ᱑᱙᱖᱗)

᱓. ᱵᱟᱠᱷᱨᱟ (ᱚᱱᱚᱬᱦᱮ ᱯᱩᱛᱷᱤ - ᱑᱙᱘᱖) ᱥᱟᱞ ᱨᱮ ᱾

ᱱᱚᱶᱟ ᱠᱚ ᱯᱩᱛᱷᱤ ᱩᱪᱷᱟᱹᱱ ᱞᱟᱦᱟ ᱨᱮ ᱟᱡᱟᱜ ᱟᱭᱢᱟ ᱚᱞ ᱠᱚ ᱜᱮ ᱯᱮᱲᱟ ᱦᱚᱲ, ᱟᱲᱟᱝ, ᱥᱟᱨ ᱥᱟᱫᱽᱞᱮ, ᱡᱩᱜᱽ ᱥᱤᱨᱤᱡᱤᱭᱟᱹ ᱮᱢᱟᱱ ᱥᱟᱶᱦᱮᱫ ᱯᱟᱛᱷᱟᱢ ᱠᱚ ᱛᱟᱞᱟ ᱯᱟᱨᱥᱟᱞ ᱟᱠᱟᱱ ᱛᱟᱭᱟ ᱾ ᱥᱟᱶᱦᱮᱫᱤᱭᱟᱹ ᱞᱮᱠᱟᱛᱮ ᱟᱹᱰᱤ ᱵᱮᱲᱟ ᱨᱮᱜᱮ ᱢᱟᱹᱱ ᱦᱟᱞᱟᱝ ᱟᱠᱟᱱᱟ ᱠᱤᱱ ᱾ ᱦᱟᱲᱟᱢ ᱵᱤᱫᱩᱹᱞ ᱨᱮ ᱟᱹᱰᱤ ᱫᱩᱠ ᱦᱟᱨᱠᱮᱛ ᱛᱟᱞᱟᱛᱮ ᱡᱤᱭᱚᱱ ᱫᱚ ᱵᱤᱛᱟᱹᱣ ᱞᱮᱱ ᱛᱟᱭᱟ ᱾ ᱠᱟᱹᱢᱤ ᱠᱷᱚᱱ ᱡᱤᱨᱟᱹᱣ ᱢᱟᱲᱟᱝ ᱨᱮᱜᱮ ᱟᱡᱤᱡ ᱢᱤᱫᱴᱟᱹᱝ ᱦᱚᱯᱚᱱ ᱮ ᱟᱫ ᱠᱮᱫᱮ ᱛᱟᱭᱟ ᱾ ᱤᱱᱟᱹ ᱛᱟᱭᱚᱢ ᱟᱡᱟᱜ ᱠᱟᱹᱢᱤ ᱠᱷᱚᱱ ᱡᱤᱨᱟᱹᱣ ᱵᱟᱲᱟᱜ ᱛᱮᱜᱮ ᱟᱡᱤᱡ ᱡᱤᱣᱤ ᱡᱩᱨᱤ ᱦᱚᱸᱭ ᱵᱚᱸᱜᱟ ᱫᱤᱥᱚᱢ ᱮᱱᱟ ᱾ ᱚᱱᱟᱛᱮ ᱟᱡ ᱫᱚᱭ ᱮᱠᱞᱟ ᱩᱛᱟᱹᱨᱞᱮᱱᱟ ᱾ ᱮᱱ ᱨᱮᱦᱚᱸ ᱴᱩᱰᱩ ᱜᱚᱢᱠᱮ ᱫᱚ ᱥᱟᱱᱛᱟᱲᱤ ᱥᱟᱶᱦᱮᱫ ᱦᱟᱨᱟ ᱵᱩᱨᱩ ᱵᱟᱠᱷᱨᱟ ᱥᱤᱧ ᱧᱤᱫᱟᱹᱭ ᱠᱩᱨᱩᱢᱩᱴᱩ ᱞᱮᱜᱼᱟ ᱾ ᱟᱵᱚ ᱠᱚ ᱫᱤᱥᱟᱹ ᱛᱮ ᱟᱹᱰᱤ ᱞᱮᱠᱟᱱ ᱫᱟᱢᱟᱱ ᱥᱚᱢᱯᱚᱛᱤ ᱜᱮᱭ ᱵᱮᱱᱟᱣ ᱦᱚᱴᱚ ᱠᱟᱣᱟᱫ ᱵᱚᱱᱟ ᱾


ᱧᱩᱛᱩᱢ ᱟᱱ ᱚᱱᱚᱬᱦᱤᱭᱟᱹ, ᱚᱱᱚᱞᱤᱭᱟᱹ ᱢᱟᱹᱱ ᱜᱳᱨᱟᱪᱟᱸᱫᱽ ᱴᱩᱰᱩ ᱫᱚ ᱒᱔ ᱢᱟᱨᱪ ᱒᱐᱐᱓ ᱨᱮᱭ ᱵᱚᱸᱜᱟ ᱛᱟᱞᱟ ᱮᱱᱟ ᱾ ᱮᱱ ᱦᱚᱸ ᱟᱡᱟᱜ ᱠᱟᱹᱢᱤ ᱠᱟᱹᱨᱫᱷᱟᱹᱱᱤ ᱛᱟᱞᱟᱛᱮ ᱟᱵᱚ ᱠᱚ ᱛᱟᱞᱟᱨᱮ ᱡᱟᱭ ᱡᱩᱜᱽ ᱞᱟᱹᱜᱤᱫ ᱡᱤᱭᱟᱹᱛ ᱮ ᱛᱟᱦᱮᱸ ᱫᱚᱦᱚ ᱮᱱᱟ ᱾

ᱥᱟᱹᱠᱷᱭᱟᱹᱛ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]