ᱟᱠᱷᱟ ᱦᱚᱲ

ᱟᱠᱷᱟ
	᱑᱙᱐᱐ ᱥᱮᱨᱢᱟ ᱮᱛᱚᱦᱚᱵ ᱥᱮᱫ ᱵᱚᱨᱢᱤ ᱦᱚᱛᱮᱛᱮ ᱟᱠᱷᱟ ᱠᱚᱣᱟᱜ ᱢᱤᱫ ᱪᱤᱛᱟᱹᱨ
ᱜᱩᱴ ᱦᱚᱲ ᱮᱞ
	᱖᱘᱐,᱐᱐᱐
ᱰᱷᱮᱨ ᱧᱚᱜ ᱦᱚᱲ ᱮᱞ ᱢᱮᱱᱟᱜ ᱠᱚ ᱴᱚᱴᱷᱟ
	ᱢᱩᱬᱩᱛ ᱮᱛᱚᱢᱼᱥᱟᱢᱟᱝ ᱮᱥᱤᱭᱟ ᱟᱨ ᱭᱩᱱᱱᱟᱱ (ᱪᱤᱱ)
ᱪᱤᱱ	᱒᱔᱐,᱐᱐᱐
ᱞᱟᱣᱚᱥ	᱑᱑᱒,᱙᱗᱙
ᱛᱷᱟᱭᱞᱟᱱᱰ	᱘᱐,᱐᱐᱐
ᱯᱟᱹᱨᱥᱤ ᱠᱚ
	ᱟᱠᱷᱟ ᱯᱟᱹᱨᱥᱤ, ᱞᱟᱣᱚᱥ ᱯᱟᱹᱨᱥᱤ, ᱛᱷᱟᱭ ᱯᱟᱹᱨᱥᱤ
ᱫᱷᱚᱨᱚᱢ
	ᱟᱠᱷᱟᱡᱟ (ᱡᱤᱣᱤᱣᱟᱫᱽ), ᱵᱩᱫᱫᱷᱚ ᱫᱷᱚᱨᱚᱢ, ᱤᱥᱟᱹᱭ ᱫᱷᱚᱨᱚᱢ
ᱥᱩᱯᱩᱨ ᱥᱟᱹᱜᱟᱹᱭᱟᱱ ᱡᱟᱹᱛ ᱠᱚ
	ᱦᱟᱱᱤ ᱦᱚᱲ, ᱠᱟᱨᱮᱱ ᱦᱚᱲ

ᱟᱠᱷᱟ ᱫᱚ ᱢᱤᱫ ᱡᱟᱹᱛᱤ ᱜᱟᱫᱮᱞ ᱠᱟᱱᱟ ᱠᱚ, ᱡᱟᱦᱟᱸᱭ ᱫᱚ ᱞᱟᱣᱚᱥ, ᱢᱤᱭᱟᱱᱢᱟᱨ, ᱛᱷᱟᱭᱞᱮᱱᱰ, ᱵᱷᱤᱭᱮᱛᱱᱟᱢ ᱟᱨ ᱪᱤᱱ ᱨᱮᱱᱟᱜ ᱭᱩᱱᱱᱟᱱ ᱯᱚᱱᱚᱛ ᱨᱮᱱᱟᱜ ᱩᱥᱩᱞ ᱵᱩᱨᱩ ᱴᱚᱴᱷᱟ ᱨᱮ ᱦᱩᱰᱤᱧ ᱦᱩᱰᱤᱧ ᱟᱹᱛᱩ ᱠᱚᱨᱮ ᱠᱚ ᱛᱟᱦᱮᱸᱱᱟ ᱾ ᱩᱱᱠᱩ ᱫᱚ ᱒᱐ ᱟᱱᱟᱜ ᱥᱟᱭ ᱥᱮᱨᱢᱟ ᱨᱮᱱᱟᱜ ᱮᱛᱚᱦᱚᱵ ᱥᱮᱫ ᱪᱤᱱ ᱠᱷᱚᱱ ᱮᱛᱚᱢᱼᱥᱟᱢᱟᱝ ᱮᱥᱤᱭᱟ ᱛᱮ ᱠᱚ ᱦᱮᱡ ᱞᱮᱱᱟ ᱾ ᱵᱚᱨᱢᱟ ᱟᱨ ᱞᱟᱣᱚᱥ ᱨᱮᱱᱟᱜ ᱜᱷᱟᱨᱚᱸᱡᱽ ᱞᱟᱹᱲᱦᱟᱹᱭ ᱠᱷᱟᱹᱛᱤᱨ ᱟᱭᱢᱟ ᱟᱠᱷᱟ ᱦᱚᱲ ᱛᱷᱟᱭᱞᱮᱱᱰ ᱛᱮ ᱠᱚ ᱥᱮᱱ ᱮᱱᱟ ᱟᱨ ᱱᱤᱛᱚᱜ ᱛᱷᱟᱭᱞᱮᱱᱰ ᱨᱮᱱᱟᱜ ᱠᱚᱧᱮ ᱛᱷᱟᱭᱞᱮᱱᱰ ᱨᱮᱱᱟᱜ ᱪᱤᱭᱟᱝ ᱢᱟᱭ ᱟᱨ ᱪᱤᱭᱟᱝ ᱨᱟᱭ ᱯᱚᱱᱚᱛ ᱨᱮ ᱟᱢᱫᱟᱡᱽ ᱘᱐,᱐᱐᱐ ᱦᱚᱲ ᱢᱮᱱᱟᱜ ᱠᱚᱣᱟ ᱾^[᱖]

ᱟᱠᱷᱟ ᱦᱚᱲ ᱫᱚ ᱟᱠᱷᱟ ᱯᱟᱹᱨᱥᱤ ᱛᱮ ᱠᱚ ᱨᱚᱲᱟ, ᱡᱟᱦᱟᱸ ᱫᱚ ᱛᱤᱵᱵᱚᱛᱤᱼᱵᱚᱨᱢᱤ ᱜᱷᱟᱨᱚᱸᱡᱽ ᱨᱮᱱᱟᱜ ᱞᱳᱞᱳᱭᱤᱥ (ᱭᱤ)ᱪᱟᱸᱜᱟ ᱨᱮᱱᱟᱜ ᱠᱟᱱᱟ ᱾ ᱟᱠᱷᱟ ᱯᱟᱹᱨᱥᱤ ᱫᱚ ᱞᱤᱥᱩ ᱯᱟᱹᱨᱥᱤ ᱥᱟᱶ ᱟᱹᱰᱤ ᱢᱮᱥᱟ ᱜᱮᱭᱟ ᱾ ᱢᱮᱱᱚᱜᱼᱟ ᱡᱮ ᱑᱖᱔᱔ ᱥᱮᱨᱢᱟ ᱨᱮ ᱢᱤᱝ ᱨᱟᱡᱽᱵᱚᱝᱥᱚ ᱟᱜ ᱟᱠᱨᱚᱢᱚᱱ ᱢᱟᱬᱟᱝ ᱨᱮ ᱭᱩᱱᱱᱟᱱ ᱨᱮᱱᱟᱜ ᱵᱟᱣᱥᱟᱱ ᱟᱨ ᱛᱮᱝᱪᱳᱝ ᱵᱮᱰᱟ ᱴᱚᱴᱷᱟ ᱨᱮ ᱟᱠᱷᱟ ᱦᱚᱲ ᱜᱮ ᱠᱚ ᱥᱟᱥᱚᱱ ᱮᱫ ᱛᱟᱦᱮᱸᱫ ᱾

ᱥᱤᱨᱡᱚᱱ

ᱯᱟᱹᱨᱩᱠᱷᱤᱭᱟᱹ ᱠᱚ ᱟᱠᱷᱟ ᱦᱚᱲ ᱠᱚᱣᱟᱜ ᱱᱚᱶᱟ ᱠᱟᱛᱷᱟ ᱨᱮ ᱨᱮᱵᱮᱱ ᱢᱮᱱᱟᱜ ᱠᱚᱣᱟ ᱡᱮ ᱩᱱᱠᱩᱣᱟᱜ ᱥᱤᱨᱡᱚᱱ ᱫᱚ ᱪᱤᱱ ᱨᱮ ᱦᱩᱭ ᱞᱮᱱᱟ; ᱢᱮᱱᱠᱷᱟᱱ, ᱚᱠᱟ ᱴᱷᱟᱶ ᱨᱮ ᱦᱩᱭ ᱞᱮᱱᱟ ᱚᱱᱟ ᱤᱫᱤ ᱠᱟᱛᱮ ᱵᱷᱮᱜᱟᱨ ᱵᱷᱮᱜᱟᱨ ᱢᱚᱛ ᱢᱮᱱᱟᱜᱼᱟ ᱾ ᱟᱠᱷᱟ ᱠᱚᱣᱟᱜ ᱫᱟᱹᱵᱤ ᱞᱮᱠᱟᱛᱮ ᱩᱱᱠᱩᱣᱟᱜ ᱢᱟᱨᱮ ᱚᱲᱟᱜ ᱫᱚ ᱛᱤᱵᱵᱚᱛ ᱥᱤᱢᱟᱹ ᱴᱚᱴᱷᱟ ᱨᱮ ᱛᱟᱦᱮᱸ ᱠᱟᱱᱟ, ᱢᱮᱱᱠᱷᱟᱱ ᱠᱤᱪᱷᱩ ᱦᱚᱲ ᱠᱚ ᱢᱮᱱᱟ ᱡᱮ ᱱᱚᱶᱟ ᱫᱚ ᱭᱩᱱᱱᱟᱱ ᱯᱚᱱᱚᱛ ᱨᱮᱱᱟᱜ ᱮᱛᱚᱢ ᱥᱮᱫ ᱛᱟᱦᱮᱸ ᱠᱟᱱᱟ ᱾ ᱑᱘᱖᱐ ᱥᱮᱨᱢᱟ ᱥᱮᱫ ᱠᱷᱚᱱ ᱜᱮ ᱥᱟᱢᱟᱝ ᱵᱚᱨᱢᱟ ᱨᱮ ᱟᱠᱷᱟ ᱠᱚᱣᱟᱜ ᱛᱟᱦᱮᱸᱱ ᱨᱮᱱᱟᱜ ᱯᱨᱚᱢᱟᱬ ᱧᱟᱢᱚᱜᱼᱟ ᱾ ᱒᱐ ᱟᱱᱟᱜ ᱥᱟᱭ ᱥᱮᱨᱢᱟ ᱨᱮᱱᱟᱜ ᱮᱛᱚᱦᱚᱵ ᱨᱮ ᱩᱱᱠᱩ ᱫᱚ ᱯᱩᱭᱞᱩ ᱫᱷᱟᱣ ᱵᱚᱨᱢᱟ ᱠᱷᱚᱱ ᱛᱷᱟᱭᱞᱮᱱᱰ ᱛᱮ ᱠᱚ ᱵᱚᱞᱚ ᱞᱮᱱᱟ, ᱪᱮᱫᱟᱜ ᱥᱮ ᱟᱭᱢᱟ ᱦᱚᱲ ᱵᱚᱨᱢᱟ ᱨᱮᱱᱟᱜ ᱟᱹᱰᱤ ᱫᱤᱱ ᱨᱮᱱᱟᱜ ᱜᱷᱟᱨᱚᱸᱡᱽ ᱞᱟᱹᱲᱦᱟᱹᱭ ᱠᱷᱟᱹᱛᱤᱨ ᱠᱚ ᱧᱤᱨ ᱞᱮᱱᱟ ᱾^[᱗]

ᱦᱚᱲ ᱮᱞ ᱯᱟᱥᱱᱟᱣ ᱟᱨ ᱟᱹᱫᱤᱵᱟᱹᱥᱤ ᱢᱟᱱᱚᱛ

ᱟᱠᱷᱟ ᱦᱚᱲ ᱫᱚ ᱮᱛᱚᱢᱼᱯᱟᱪᱮ ᱪᱤᱱ, ᱯᱟᱪᱮ ᱞᱟᱣᱚᱥ, ᱥᱟᱢᱟᱝ ᱢᱤᱭᱟᱱᱢᱟᱨ, ᱠᱚᱧᱮ ᱛᱷᱟᱭᱞᱮᱱᱰ ᱟᱨ ᱠᱚᱧᱮᱼᱯᱟᱪᱮ ᱵᱷᱤᱭᱮᱛᱱᱟᱢ ᱨᱮᱱᱟᱜ ᱵᱩᱨᱩ ᱟᱹᱛᱩ ᱠᱚᱨᱮ ᱠᱚ ᱛᱟᱦᱮᱸᱱᱟ ᱾ ᱱᱚᱶᱟ ᱡᱚᱛᱚ ᱫᱤᱥᱚᱢ ᱨᱮ ᱩᱱᱠᱩ ᱫᱚ ᱢᱤᱫ ᱟᱹᱰᱤ ᱠᱚᱢ ᱦᱚᱲ ᱠᱟᱱᱟ ᱠᱚ ᱾ ᱱᱤᱛᱚᱜ ᱟᱠᱷᱟ ᱠᱚᱣᱟᱜ ᱦᱚᱲ ᱮᱞ ᱫᱚ ᱟᱢᱫᱟᱡᱽ ᱔᱐᱐,᱐᱐᱐ (ᱱᱚᱶᱟ ᱫᱚ ᱢᱟᱨᱮ ᱞᱮᱠᱷᱟ, ᱤᱱᱯᱷᱳᱵᱚᱠᱥ ᱞᱮᱠᱟᱛᱮ ᱖᱘᱐,᱐᱐᱐) ᱢᱮᱱᱟᱜᱼᱟ ᱾

ᱪᱤᱱ ᱥᱚᱨᱠᱟᱨ ᱦᱚᱛᱮᱛᱮ ᱟᱠᱷᱟ ᱦᱚᱲ ᱫᱚ ᱵᱟᱹᱲᱛᱤ ᱠᱟᱭᱛᱮ ᱦᱟᱱᱤ ᱡᱟᱹᱛᱤ ᱨᱮᱱ ᱢᱤᱫ ᱦᱟᱹᱴᱤᱧ ᱞᱮᱠᱟᱛᱮ ᱠᱚ ᱞᱮᱠᱷᱟᱣᱟ, ᱡᱟᱦᱟᱸ ᱫᱚ ᱢᱤᱫ ᱥᱚᱨᱠᱟᱨᱤ ᱡᱟᱹᱛᱤᱭᱟᱹᱨᱤ ᱟᱹᱫᱤᱵᱟᱹᱥᱤ ᱠᱟᱱᱟ ᱠᱚ ᱾ ᱟᱠᱷᱟ ᱦᱚᱲ ᱫᱚ ᱦᱟᱱᱤ ᱥᱟᱶ ᱟᱹᱰᱤ ᱥᱟᱹᱜᱟᱹᱭ ᱢᱮᱱᱟᱜ ᱨᱮᱦᱚᱸ, ᱩᱱᱠᱩ ᱫᱚ ᱟᱠᱚ ᱛᱮ ᱢᱤᱫ ᱵᱷᱮᱜᱟᱨ ᱜᱟᱫᱮᱞ ᱢᱮᱱᱛᱮ ᱠᱚ ᱢᱟᱱᱟᱣᱟ ᱾^[᱘] ᱛᱷᱟᱭᱞᱮᱱᱰ ᱨᱮ, ᱩᱱᱠᱩ ᱫᱚ ᱛᱩᱨᱩᱭ ᱜᱚᱴᱟᱝ ᱵᱩᱨᱩ ᱟᱹᱫᱤᱵᱟᱹᱥᱤ ᱢᱩᱫᱽ ᱨᱮ ᱠᱚ ᱞᱮᱠᱷᱟᱣᱟ ᱾ ᱛᱷᱟᱭᱞᱮᱱᱰ ᱨᱮ ᱛᱟᱦᱮᱸᱱ ᱠᱟᱱ ᱟᱹᱰᱤ ᱠᱚᱢ ᱟᱠᱷᱟ ᱦᱚᱲ ᱴᱷᱮᱱ ᱜᱮ ᱚᱱᱟ ᱫᱤᱥᱚᱢ ᱨᱮᱱᱟᱜ ᱱᱟᱹᱜᱟᱹᱨᱤᱭᱟᱹ ᱥᱟᱠᱟᱢ ᱢᱮᱱᱟᱜᱼᱟ, ᱵᱟᱹᱲᱛᱤ ᱫᱚ ᱵᱟᱦᱨᱮ ᱦᱚᱲ ᱞᱮᱠᱟᱛᱮ ᱠᱚ ᱨᱮᱡᱤᱥᱴᱟᱨ ᱟᱠᱟᱱᱟ ᱾

ᱮᱴᱟᱜ ᱫᱤᱥᱚᱢ ᱨᱤᱱ ᱦᱚᱲ ᱠᱚ ᱟᱠᱷᱟ ᱦᱚᱲ ᱫᱚ ᱡᱚᱛᱚ ᱚᱠᱛᱚ ᱥᱚᱢᱟᱱ ᱵᱮᱵᱷᱟᱨ ᱵᱟᱠᱚ ᱮᱢᱟ ᱠᱚᱣᱟ ᱾ ᱢᱤᱭᱟᱱᱢᱟᱨ ᱟᱨ ᱛᱷᱟᱭᱞᱮᱱᱰ ᱨᱮ ᱛᱟᱭ ᱯᱟᱹᱨᱥᱤ ᱨᱚᱲ ᱦᱚᱲ ᱩᱱᱠᱩ "ᱜᱳ" ᱥᱮ "ᱮᱠᱟᱣ" ᱠᱚ ᱢᱮᱛᱟ ᱠᱚᱣᱟ, ᱡᱟᱦᱟᱸ ᱫᱚ ᱟᱠᱷᱟ ᱦᱚᱲ ᱠᱚ ᱞᱟᱹᱜᱤᱫ ᱢᱤᱫ ᱚᱯᱚᱢᱟᱱ ᱟᱱᱟᱜ ᱟᱹᱲᱟᱹ ᱠᱟᱱᱟ ᱾ ᱞᱟᱣᱚᱥ ᱨᱮ ᱛᱟᱭ ᱨᱚᱲ ᱦᱚᱲ ᱩᱱᱠᱩ "ᱠᱷᱳ" ᱠᱚ ᱢᱮᱛᱟ ᱠᱚᱣᱟ, ᱡᱟᱦᱟᱸ ᱨᱮᱱᱟᱜ ᱞᱟᱦᱟ ᱨᱮ "ᱠᱷᱟ" ᱟᱹᱲᱟᱹ ᱠᱚ ᱞᱟᱜᱟᱣᱟ, ᱱᱚᱶᱟ ᱨᱮᱱᱟᱜ ᱢᱮᱱᱮᱛ ᱫᱚ ᱢᱟᱨᱮ ᱚᱠᱛᱚ ᱨᱮ ᱩᱥᱩᱞ ᱴᱚᱴᱷᱟ ᱨᱤᱱ ᱦᱚᱲ (ᱵᱟᱹᱲᱛᱤ ᱠᱟᱭᱛᱮ ᱢᱚᱱᱼᱠᱷᱚᱢᱮᱨ ᱜᱟᱫᱮᱞ) ᱵᱩᱡᱷᱟᱹᱣ ᱞᱟᱹᱜᱤᱫ ᱵᱮᱵᱷᱟᱨᱚᱜ ᱠᱟᱱ ᱛᱟᱦᱮᱸᱫ ᱾

ᱯᱟᱹᱨᱥᱤ

ᱟᱠᱷᱟ ᱨᱚᱲ ᱦᱚᱲ ᱫᱚ ᱱᱚᱶᱟ "ᱟᱵᱷᱠᱟᱵᱽᱫᱟᱣ" ᱠᱚ ᱢᱮᱛᱟᱜᱼᱟ, ᱡᱟᱦᱟᱸ ᱨᱮᱱᱟᱜ ᱢᱮᱱᱮᱛ ᱫᱚ "ᱟᱠᱷᱟ ᱯᱟᱹᱨᱥᱤ" ᱠᱟᱱᱟ ᱾ ᱱᱚᱶᱟ ᱫᱚ ᱥᱤᱱᱳᱼᱛᱤᱵᱵᱚᱛᱤ ᱜᱷᱟᱨᱚᱸᱡᱽ ᱨᱮᱱᱟᱜ ᱞᱳᱞᱳ/ᱭᱤ ᱪᱟᱸᱜᱟ ᱨᱮᱱᱟᱜ ᱢᱤᱫ ᱴᱳᱱᱟᱞ ᱯᱟᱹᱨᱥᱤ ᱠᱟᱱᱟ ᱾ ᱵᱟᱹᱲᱛᱤ ᱜᱟᱱ ᱟᱠᱷᱟ ᱨᱚᱲ ᱦᱚᱲ ᱫᱚ 'ᱡᱤᱣ ᱜᱚ' ᱪᱟᱸᱜᱟ ᱯᱟᱹᱨᱥᱤ ᱠᱚ ᱵᱩᱡᱷᱟᱹᱣ ᱫᱟᱲᱮᱭᱟᱜᱼᱟ, ᱡᱟᱦᱟᱸ ᱫᱚ ᱮᱛᱚᱢ ᱪᱤᱱ, ᱛᱷᱟᱭᱞᱮᱱᱰ ᱟᱨ ᱢᱤᱭᱟᱱᱢᱟᱨ ᱨᱮ ᱠᱚ ᱨᱚᱲᱟ ᱾^[᱗] ᱟᱠᱷᱟ ᱦᱚᱲ ᱠᱚᱣᱟᱜ ᱟᱠᱚᱣᱟᱜ ᱡᱟᱦᱟᱸᱱ ᱚᱞ ᱪᱤᱠᱤ ᱫᱚ ᱵᱟᱹᱱᱩᱜᱼᱟ, ᱢᱮᱱᱠᱷᱟᱱ ᱤᱥᱟᱹᱭ ᱫᱷᱚᱨᱚᱢ ᱯᱟᱥᱱᱟᱣᱤᱭᱟᱹ ᱟᱨ ᱮᱴᱟᱜ ᱵᱟᱦᱨᱮ ᱦᱚᱲ ᱠᱚ ᱦᱚᱛᱮᱛᱮ ᱛᱮᱭᱟᱨ ᱟᱠᱟᱱ ᱠᱤᱪᱷᱩ ᱪᱤᱠᱤ ᱠᱚ ᱵᱮᱵᱷᱟᱨᱚᱜ ᱠᱟᱱᱟ ᱾^[᱘]

ᱟᱠᱷᱟ ᱟᱹᱛᱩ ᱟᱨ ᱞᱟᱠᱪᱟᱨ

ᱟᱠᱷᱟ ᱦᱚᱲ ᱠᱚ ᱛᱟᱦᱮᱸᱱ ᱠᱟᱱ ᱴᱚᱴᱷᱟ ᱨᱮ ᱥᱟᱶᱛᱟ ᱟᱨ ᱠᱟᱹᱣᱰᱤ ᱟᱹᱨᱤ ᱨᱮᱱᱟᱜ ᱞᱟᱜᱮ ᱵᱚᱫᱚᱞ ᱠᱷᱟᱹᱛᱤᱨ, ᱟᱥᱚᱠᱟᱭ ᱛᱮ ᱯᱟᱪᱮ ᱫᱤᱥᱚᱢ ᱨᱮᱱᱟᱜ ᱯᱩᱸᱡᱤᱵᱟᱫᱽ ᱵᱚᱞᱚ ᱠᱷᱟᱹᱛᱤᱨ, ᱟᱠᱷᱟ ᱠᱚᱣᱟᱜ ᱟᱹᱨᱤᱪᱟᱹᱞᱤ ᱡᱤᱭᱚᱱ ᱫᱚᱦᱚ ᱫᱚ ᱟᱹᱰᱤ ᱢᱩᱥᱠᱤᱞ ᱤᱫᱤ ᱠᱟᱱᱟ ᱾ ᱱᱚᱝᱠᱟᱱ ᱮᱴᱠᱮᱴᱚᱬᱮ ᱨᱮᱦᱚᱸ, ᱟᱠᱷᱟ ᱦᱚᱲ ᱠᱚ ᱟᱠᱚᱣᱟᱜ ᱞᱟᱠᱪᱟᱨ ᱨᱮᱱᱟᱜ ᱟᱭᱢᱟ ᱦᱟᱹᱴᱤᱧ ᱠᱚ ᱵᱟᱧᱪᱟᱣ ᱫᱚᱦᱚ ᱟᱠᱟᱫᱼᱟ ᱾

ᱟᱠᱷᱟ ᱥᱟᱶᱛᱟ ᱨᱮ ᱫᱚ ᱡᱟᱦᱟᱸᱱ ᱠᱤᱥᱟᱹᱬᱼᱨᱮᱸᱜᱮᱡ ᱥᱮ ᱩᱥᱩᱞᱼᱞᱟᱛᱟᱨ ᱵᱷᱮᱜᱮᱫ ᱫᱚ ᱵᱟᱹᱱᱩᱜᱼᱟ, ᱱᱚᱶᱟ ᱫᱚ ᱢᱤᱫ ᱥᱚᱢᱟᱱ ᱢᱟᱱᱚᱛᱟᱱ ᱥᱟᱶᱛᱟ ᱠᱟᱱᱟ ᱾ ᱵᱟᱹᱲᱛᱤ ᱠᱟᱭᱛᱮ ᱩᱢᱮᱨ ᱟᱨ ᱟᱹᱭᱫᱟᱹᱨᱤ ᱞᱮᱠᱟᱛᱮ ᱢᱟᱱᱚᱛ ᱠᱚ ᱮᱢᱟ ᱠᱚᱣᱟ ᱾ ᱟᱠᱷᱟ ᱦᱚᱲ ᱫᱚ ᱵᱩᱨᱩ ᱨᱮᱱᱟᱜ ᱩᱥᱩᱞ ᱴᱷᱟᱶ ᱨᱮ ᱟᱹᱛᱩ ᱠᱚ ᱵᱮᱱᱟᱣᱟ ᱾^[᱙]

ᱟᱠᱷᱟ ᱠᱚᱣᱟᱜ ᱚᱲᱟᱜ ᱫᱚ ᱟᱹᱨᱤᱪᱟᱹᱞᱤ ᱞᱮᱠᱟᱛᱮ ᱠᱟᱴ, ᱢᱟᱫ ᱟᱨ ᱥᱟᱣᱲᱤ ᱛᱮ ᱛᱮᱭᱟᱨᱚᱜᱼᱟ ᱾ ᱱᱚᱶᱟ ᱫᱚ ᱵᱟᱨ ᱞᱮᱠᱟᱱᱟ: "ᱞᱟᱛᱟᱨ ᱚᱲᱟᱜ", ᱡᱟᱦᱟᱸ ᱫᱚ ᱦᱟᱥᱟ ᱪᱮᱛᱟᱱ ᱨᱮ ᱵᱮᱱᱟᱣᱚᱜᱼᱟ, ᱟᱨ "ᱩᱥᱩᱞ ᱚᱲᱟᱜ", ᱡᱟᱦᱟᱸ ᱫᱚ ᱠᱷᱩᱱᱴᱤ ᱪᱮᱛᱟᱱ ᱨᱮ ᱵᱮᱱᱟᱣᱚᱜᱼᱟ ᱾ ᱱᱩᱠᱩ ᱫᱚ ᱢᱤᱫ ᱴᱷᱟᱶ ᱨᱮ ᱛᱷᱤᱨ ᱠᱟᱛᱮ ᱵᱟᱠᱚ ᱛᱟᱦᱮᱸᱱ ᱠᱷᱟᱹᱛᱤᱨ ᱟᱠᱚᱣᱟᱜ ᱚᱲᱟᱜ ᱫᱚ ᱟᱹᱰᱤ ᱫᱤᱱ ᱞᱟᱹᱜᱤᱫ ᱵᱟᱠᱚ ᱵᱮᱱᱟᱣᱟ ᱟᱨ ᱟᱹᱛᱩ ᱠᱚ ᱵᱚᱫᱚᱞ ᱛᱟᱦᱮᱸᱱᱟ ᱾

ᱡᱚᱛᱚ ᱟᱠᱷᱟ ᱟᱹᱛᱩ ᱨᱮᱱᱟᱜ ᱵᱚᱞᱚᱱ ᱦᱚᱨ ᱨᱮ ᱢᱤᱫᱴᱟᱹᱝ ᱠᱟᱴ ᱨᱮᱱᱟᱜ ᱫᱩᱣᱟᱹᱨ ᱛᱟᱦᱮᱸᱱᱟ, ᱡᱟᱦᱟᱸᱨᱮ ᱟᱭᱢᱟ ᱪᱤᱛᱟᱹᱨ ᱠᱷᱳᱫᱟ ᱛᱟᱦᱮᱸᱱᱟ ᱾ ᱱᱚᱶᱟ ᱫᱚ "ᱵᱚᱸᱜᱟ ᱫᱩᱣᱟᱹᱨ" ᱠᱚ ᱢᱮᱛᱟᱜᱼᱟ ᱾ ᱱᱚᱶᱟ ᱫᱩᱣᱟᱹᱨ ᱫᱚ ᱟᱹᱛᱩ ᱵᱷᱤᱛᱨᱤ (ᱢᱟᱹᱱᱢᱤ ᱟᱨ ᱚᱲᱟᱜ ᱡᱟᱱᱣᱟᱨ ᱠᱚᱣᱟᱜ ᱴᱷᱟᱶ) ᱟᱨ ᱟᱹᱛᱩ ᱵᱟᱦᱨᱮ (ᱵᱚᱸᱜᱟ ᱟᱨ ᱵᱤᱨ ᱡᱟᱱᱣᱟᱨ ᱠᱚᱣᱟᱜ ᱴᱷᱟᱶ) ᱛᱟᱞᱟ ᱨᱮ ᱥᱤᱢᱟᱹ ᱞᱮᱠᱟᱛᱮ ᱠᱟᱹᱢᱤᱭᱟ ᱾ ᱱᱚᱶᱟ ᱫᱩᱣᱟᱹᱨ ᱫᱚ ᱵᱟᱹᱲᱤᱡ ᱵᱚᱸᱜᱟ ᱠᱚ ᱞᱟᱜᱟ ᱠᱚ ᱞᱟᱹᱜᱤᱫ ᱠᱚ ᱵᱮᱱᱟᱣᱟ ᱾

ᱟᱠᱷᱟ ᱟᱹᱛᱩ ᱨᱮᱱᱟᱜ ᱟᱨ ᱢᱤᱫᱴᱟᱹᱝ ᱞᱟᱹᱠᱛᱤᱭᱟᱱ ᱡᱤᱱᱤᱥ ᱫᱚ ᱦᱩᱭᱩᱜ ᱠᱟᱱᱟ ᱢᱤᱫ ᱩᱥᱩᱞ ᱡᱷᱩᱞᱟᱹ ᱡᱟᱦᱟᱸ ᱫᱚ ᱥᱮᱨᱢᱟᱠᱤᱭᱟᱹ ᱦᱟᱯᱲᱟᱢ ᱠᱚ ᱵᱚᱸᱜᱟ ᱚᱠᱛᱚ ᱨᱮ ᱠᱚ ᱵᱮᱵᱷᱟᱨᱟ ᱾ ᱱᱚᱶᱟ ᱡᱷᱩᱞᱟᱹ ᱫᱚ ᱦᱳᱲᱳ ᱪᱟᱥ ᱨᱮᱱᱟᱜ ᱱᱟᱯᱟᱭ ᱞᱟᱹᱜᱤᱫ ᱠᱚ ᱵᱮᱱᱟᱣᱟ ᱾

ᱛᱷᱟᱭᱞᱮᱱᱰ ᱨᱮᱱᱟᱜ ᱢᱤᱫ "ᱵᱚᱸᱜᱟ ᱫᱩᱣᱟᱹᱨ"
ᱟᱠᱷᱟ ᱠᱩᱸᱵᱽᱲᱤ
ᱟᱠᱷᱟ ᱦᱟᱹᱠᱩ ᱜᱚᱡ
ᱟᱠᱷᱟ, ᱪᱤᱭᱟᱝ ᱨᱟᱭ ᱯᱚᱱᱚᱛ
ᱠᱚᱸᱭᱮ ᱛᱷᱟᱭᱞᱮᱱᱰ ᱨᱮᱱᱟᱜ ᱢᱤᱫ ᱟᱠᱷᱟ ᱟᱹᱛᱩ
ᱟᱠᱷᱟ ᱠᱚᱣᱟᱜ ᱵᱷᱟᱸᱰᱟᱱ ᱠᱟᱹᱢᱤ

ᱟᱹᱨᱤᱪᱟᱹᱞᱤ ᱠᱟᱹᱣᱰᱤ ᱟᱹᱨᱤ

ᱟᱠᱷᱟ ᱦᱚᱲ ᱠᱚᱣᱟᱜ ᱢᱩᱲᱩᱛ ᱟᱹᱥᱩᱞᱚᱜ ᱦᱚᱨ ᱫᱚ ᱪᱟᱥ ᱵᱟᱥ ᱠᱟᱱᱟ ᱾ ᱩᱱᱠᱩ ᱫᱚ ᱥᱚᱭᱟᱵᱤᱱ ᱟᱨ ᱟᱭᱢᱟ ᱞᱮᱠᱟᱱ ᱟᱲᱟᱜ ᱥᱟᱠᱟᱢ ᱠᱚ ᱪᱟᱥᱟ ᱾ ᱦᱳᱲᱳ ᱫᱚ ᱩᱱᱠᱩᱣᱟᱜ ᱡᱚᱛᱚ ᱠᱷᱚᱱ ᱞᱟᱹᱠᱛᱤᱭᱟᱱ ᱪᱟᱥ ᱠᱟᱱᱟ ᱾ ᱱᱟᱜᱟᱢ ᱞᱮᱠᱟᱛᱮ, ᱠᱤᱪᱷᱩ ᱟᱠᱷᱟ ᱟᱹᱛᱩ ᱨᱮ ᱟᱯᱷᱤᱢ ᱦᱚᱸ ᱠᱚ ᱪᱟᱥᱮᱫ ᱛᱟᱦᱮᱸᱫ, ᱢᱮᱱᱠᱷᱟᱱ ᱛᱷᱟᱭ ᱥᱚᱨᱠᱟᱨ ᱱᱚᱶᱟ ᱵᱟᱨᱚᱱ ᱠᱮᱫ ᱛᱟᱭᱚᱢ ᱱᱚᱶᱟ ᱫᱚ ᱠᱚᱢ ᱟᱠᱟᱱᱟ ᱾^[᱑᱐]

ᱟᱠᱷᱟ ᱦᱚᱲ ᱫᱚ ᱟᱹᱨᱤᱪᱟᱹᱞᱤ ᱞᱮᱠᱟᱛᱮ ᱡᱷᱩᱢ ᱪᱟᱥ ᱠᱚ ᱠᱟᱹᱢᱤᱭᱟ, ᱡᱟᱦᱟᱸ ᱨᱮ ᱵᱤᱨ ᱡᱮᱨᱮᱫ ᱠᱟᱛᱮ ᱱᱟᱶᱟ ᱪᱟᱥ ᱵᱟᱹᱫᱽ ᱠᱚ ᱛᱮᱭᱟᱨᱟ ᱾ ᱛᱷᱟᱭ ᱥᱚᱨᱠᱟᱨ ᱱᱚᱶᱟ ᱦᱚᱨᱟ ᱫᱚ ᱵᱟᱨᱚᱱ ᱟᱠᱟᱫᱼᱟ ᱾ ᱪᱟᱥ ᱥᱟᱶᱛᱮ, ᱟᱠᱷᱟ ᱦᱚᱲ ᱫᱚ ᱥᱩᱠᱨᱤ, ᱥᱤᱢ, ᱜᱮᱰᱮ, ᱢᱮᱨᱚᱢ ᱟᱨ ᱰᱟᱝᱜᱽᱨᱟ ᱠᱚ ᱟᱹᱥᱩᱞ ᱠᱚᱣᱟ ᱾ ᱛᱤᱨᱞᱟᱹ ᱠᱚᱫᱚ ᱵᱤᱨ ᱠᱷᱚᱱ ᱟᱭᱢᱟ ᱡᱚᱢᱟᱜ ᱟᱨ ᱨᱟᱱ ᱢᱩᱨᱜᱟᱹᱱ ᱞᱟᱹᱜᱤᱫ ᱥᱟᱠᱟᱢ ᱠᱚ ᱛᱩᱢᱟᱹᱞᱟ ᱾ ᱦᱚᱲ ᱫᱚ ᱟᱹᱰᱤ ᱯᱟᱹᱨᱩᱠᱷᱤᱭᱟᱹ ᱥᱮᱸᱫᱽᱨᱟ ᱦᱚᱲ ᱠᱟᱱᱟ ᱠᱚ ᱾ ᱥᱮᱸᱫᱽᱨᱟ ᱫᱚ ᱠᱚᱲᱟ ᱠᱚᱣᱟᱜ ᱠᱟᱹᱢᱤ ᱠᱟᱱᱟ ᱾ ᱩᱱᱠᱩ ᱫᱚ ᱟᱹᱰᱤ ᱜᱮ ᱥᱮᱸᱫᱽᱨᱟ ᱠᱚ ᱠᱩᱥᱤᱭᱟᱜᱼᱟ ᱾ ᱞᱟᱦᱟ ᱛᱮ ᱩᱱᱠᱩ ᱫᱚ ᱟᱜᱼᱥᱟᱨ ᱛᱮ ᱠᱚ ᱥᱮᱸᱫᱽᱨᱟᱭᱮᱫ ᱛᱟᱦᱮᱸᱫ, ᱢᱮᱱᱠᱷᱟᱱ ᱱᱤᱛᱚᱜ ᱫᱚ ᱵᱟᱹᱱᱫᱩᱠ ᱨᱮᱱᱟᱜ ᱵᱮᱵᱷᱟᱨ ᱦᱚᱸ ᱮᱛᱚᱦᱚᱵ ᱟᱠᱟᱱᱟ ᱾^[᱑᱑]

ᱫᱷᱚᱨᱚᱢ ᱟᱨ ᱯᱟᱹᱛᱭᱟᱹᱣ

ᱟᱠᱷᱟ ᱫᱷᱚᱨᱚᱢ ᱡᱟᱵᱷ ᱫᱚ ᱵᱟᱹᱲᱛᱤ ᱠᱟᱭᱛᱮ ᱡᱤᱣᱤᱣᱟᱫᱽ ᱟᱨ ᱦᱟᱯᱲᱟᱢ ᱠᱚ ᱵᱚᱸᱜᱟ ᱟᱜ ᱢᱤᱫ ᱢᱮᱥᱟ ᱨᱩᱯ ᱠᱟᱱᱟ, ᱡᱟᱦᱟᱸ ᱫᱚ ᱦᱟᱥᱟ ᱟᱨ ᱥᱤᱨᱡᱚᱱ ᱥᱟᱶ ᱟᱠᱷᱟ ᱠᱚᱣᱟᱜ ᱥᱟᱹᱜᱟᱹᱭ ᱮ ᱥᱚᱫᱚᱨᱟ ᱾ ᱟᱠᱷᱟ ᱦᱚᱲ ᱫᱚ ᱟᱠᱚᱣᱟᱜ ᱡᱟᱹᱛᱤ ᱟᱨ ᱫᱷᱚᱨᱚᱢ ᱫᱚ ᱟᱹᱰᱤ ᱜᱟᱹᱦᱤᱨ ᱛᱮ ᱡᱚᱲᱟᱣ ᱢᱮᱱᱟᱜ ᱠᱚᱣᱟ ᱢᱮᱱᱛᱮ ᱠᱚ ᱢᱟᱱᱟᱣᱟ ᱾ ᱮᱴᱟᱜ ᱟᱠᱷᱟ ᱠᱚ ᱞᱟᱹᱜᱤᱫ ᱢᱤᱫ ᱟᱠᱷᱟ ᱦᱚᱲ ᱦᱩᱭᱩᱜ ᱨᱮᱱᱟᱜ ᱢᱮᱱᱮᱛ ᱫᱚ ᱦᱩᱭᱩᱜ ᱠᱟᱱᱟ ᱟᱠᱷᱟ ᱫᱷᱚᱨᱚᱢ ᱢᱟᱱᱟᱣ ᱾^[᱑᱒]

ᱥᱮᱨᱢᱟᱠᱤᱭᱟᱹ ᱵᱚᱸᱜᱟ ᱵᱩᱨᱩ ᱨᱮ ᱙ ᱥᱮ ᱑᱒ ᱜᱚᱴᱟᱝ ᱦᱟᱯᱲᱟᱢ ᱵᱚᱸᱜᱟ, ᱦᱳᱲᱳ ᱵᱚᱸᱜᱟ ᱟᱨ ᱟᱹᱛᱩ ᱫᱩᱣᱟᱹᱨ ᱵᱮᱱᱟᱣ ᱞᱮᱠᱟᱱ ᱠᱟᱹᱢᱤ ᱦᱚᱨᱟ ᱠᱚ ᱛᱟᱦᱮᱸᱱᱟ ᱾ ᱟᱭᱢᱟ ᱟᱠᱷᱟ ᱯᱟᱨᱟᱵᱽ ᱨᱮ ᱦᱟᱯᱲᱟᱢ ᱠᱚ ᱴᱷᱮᱱ ᱠᱷᱚᱱ "ᱛᱷᱩᱢ" ᱠᱚ ᱠᱚᱭᱟ ᱡᱟᱦᱟᱸ ᱫᱚ ᱦᱚᱲ, ᱦᱳᱲᱳ ᱟᱨ ᱚᱲᱟᱜ ᱡᱟᱱᱣᱟᱨ ᱠᱚᱣᱟᱜ ᱦᱚᱲᱢᱚ ᱥᱟᱶᱟᱨ ᱟᱨ ᱰᱷᱮᱨ ᱪᱟᱥ ᱞᱟᱹᱜᱤᱫ ᱦᱩᱭᱩᱜᱼᱟ ᱾^[᱗]^[᱑᱓] ᱟᱠᱷᱟ ᱦᱚᱲ ᱠᱚᱣᱟᱜ ᱯᱟᱹᱛᱭᱟᱹᱣ ᱞᱮᱠᱟᱛᱮ, ᱵᱚᱸᱜᱟ ᱟᱨ ᱢᱟᱹᱱᱢᱤ ᱫᱚ ᱢᱤᱫᱴᱟᱹᱝ ᱟᱭᱳ ᱦᱚᱛᱮᱛᱮ ᱠᱚ ᱡᱟᱱᱟᱢ ᱞᱮᱱᱟ ᱟᱨ ᱢᱤᱫ ᱥᱟᱶ ᱠᱚ ᱛᱟᱦᱮᱸ ᱠᱟᱱᱟ, ᱢᱮᱱᱠᱷᱟᱱ ᱡᱷᱚᱜᱽᱲᱟ ᱠᱷᱟᱹᱛᱤᱨ ᱵᱚᱸᱜᱟ ᱫᱚ ᱵᱤᱨ ᱛᱮ ᱠᱚ ᱥᱮᱱ ᱮᱱᱟ ᱟᱨ ᱢᱟᱹᱱᱢᱤ ᱫᱚ ᱟᱹᱛᱩ ᱨᱮ ᱠᱚ ᱛᱟᱦᱮᱸ ᱮᱱᱟ ᱾ ᱩᱱ ᱠᱷᱚᱱ ᱜᱮ ᱵᱚᱸᱜᱟ ᱠᱚᱫᱚ ᱨᱩᱣᱟᱹ ᱦᱟᱹᱥᱩ ᱟᱨ ᱮᱴᱟᱜ ᱟᱱᱟᱴ ᱠᱚ ᱟᱹᱜᱩᱭᱟ ᱢᱮᱱᱛᱮ ᱠᱚ ᱢᱟᱱᱟᱣᱟ ᱾ ᱟᱠᱷᱟ ᱥᱮᱨᱢᱟ ᱫᱚ ᱢᱟᱹᱱᱢᱤ ᱨᱤᱛᱩ (ᱨᱚᱦᱚᱲ) ᱟᱨ ᱵᱚᱸᱜᱟ ᱨᱤᱛᱩ (ᱞᱚᱦᱚᱫ) ᱨᱮ ᱦᱟᱹᱴᱤᱧ ᱟᱠᱟᱱᱟ ᱾ ᱦᱚᱲ ᱟᱨ ᱦᱳᱲᱳ ᱵᱟᱱᱟᱨ ᱨᱮᱜᱮ "ᱡᱤᱣᱤ" ᱢᱮᱱᱟᱜᱼᱟ ᱢᱮᱱᱛᱮ ᱠᱚ ᱢᱟᱱᱟᱣᱟ, ᱟᱨ ᱱᱚᱶᱟ ᱡᱤᱣᱤ ᱚᱰᱚᱠ ᱞᱮᱱ ᱠᱷᱟᱱ ᱜᱮ ᱨᱩᱣᱟᱹ ᱦᱟᱹᱥᱩ ᱦᱩᱭᱩᱜᱼᱟ ᱾^[᱑᱓]

ᱟᱠᱷᱟ ᱫᱷᱚᱨᱚᱢ ᱠᱟᱹᱢᱤ ᱨᱮ ᱟᱹᱛᱩ ᱢᱩᱠᱷᱤᱭᱟᱹᱣᱟᱜ ᱴᱷᱟᱶ ᱫᱚ ᱡᱚᱛᱚ ᱠᱷᱚᱱ ᱢᱟᱨᱟᱝᱼᱟ ᱾ ᱩᱱᱤ ᱫᱚ ᱟᱹᱛᱩ ᱫᱩᱣᱟᱹᱨ ᱟᱨ ᱡᱷᱩᱞᱟᱹ ᱵᱮᱱᱟᱣ ᱨᱮᱱᱟᱜ ᱠᱟᱹᱢᱤ ᱮᱛᱚᱦᱚᱵᱟ ᱟᱨ ᱟᱹᱛᱩ ᱨᱮᱱᱟᱜ ᱵᱤᱪᱟᱹᱨ ᱠᱚ ᱦᱚᱸᱭ ᱥᱟᱢᱵᱽᱲᱟᱣᱟ ᱾ ᱟᱹᱛᱩ ᱨᱮ ᱠᱟᱢᱟᱨ ᱟᱜ ᱴᱷᱟᱶ ᱫᱚ ᱫᱚᱥᱟᱨ ᱢᱟᱨᱟᱝ ᱴᱷᱟᱶ ᱠᱟᱱᱟ ᱾

ᱟᱠᱷᱟ ᱠᱚᱣᱟᱜ ᱡᱚᱛᱚ ᱠᱷᱚᱱ ᱢᱟᱨᱟᱝ ᱯᱟᱨᱟᱵᱽ ᱫᱚ ᱦᱩᱭᱩᱜ ᱠᱟᱱᱟ "ᱡᱷᱩᱞᱟᱹ ᱯᱟᱨᱟᱵᱽ"᱾ ᱱᱚᱶᱟ ᱫᱚ ᱚᱜᱚᱥᱴ ᱪᱟᱸᱫᱳ ᱨᱮᱱᱟᱜ ᱢᱩᱪᱟᱹᱫ ᱥᱮᱫ ᱦᱩᱭᱩᱜᱼᱟ, ᱦᱳᱲᱳ ᱮᱨ ᱨᱮᱱᱟᱜ ᱑᱒᱐ ᱢᱟᱦᱟᱸ ᱛᱟᱭᱚᱢ ᱾ ᱟᱠᱷᱟ ᱦᱚᱲ ᱱᱚᱶᱟ ᱫᱚ ᱭᱮᱦᱠᱩᱡᱟ ᱠᱚ ᱢᱮᱛᱟᱜᱼᱟ, ᱡᱟᱦᱟᱸ ᱨᱮᱱᱟᱜ ᱢᱮᱱᱮᱛ ᱫᱚ "ᱦᱟᱫ ᱦᱳᱲᱳ ᱡᱚᱢ" ᱾ ᱱᱚᱶᱟ ᱯᱟᱨᱟᱵᱽ ᱨᱮ ᱦᱟᱯᱲᱟᱢ ᱠᱚ ᱵᱚᱸᱜᱟ ᱟᱠᱚᱣᱟ ᱾ ᱱᱚᱶᱟ ᱯᱟᱨᱟᱵᱽ ᱫᱚ ᱟᱥᱚᱠᱟᱭ ᱛᱮ ᱛᱤᱨᱞᱟᱹ ᱠᱚ ᱞᱟᱹᱜᱤᱫ ᱟᱹᱰᱤ ᱞᱟᱹᱠᱛᱤᱭᱟᱱ ᱠᱟᱱᱟ, ᱪᱮᱫᱟᱜ ᱥᱮ ᱩᱱᱠᱩ ᱥᱮᱨᱢᱟ ᱯᱩᱨᱟᱹᱣ ᱛᱮᱭᱟᱨ ᱟᱠᱟᱫ ᱱᱟᱶᱟ ᱞᱤᱵᱟᱥ ᱟᱨ ᱜᱚᱦᱱᱟ ᱠᱚ ᱦᱚᱨᱚᱜ ᱠᱟᱛᱮ ᱮᱱᱮᱡᱼᱥᱮᱨᱮᱧ ᱠᱚ ᱩᱫᱩᱜᱟ ᱾ ᱚᱱᱟᱛᱮ ᱱᱚᱶᱟ ᱫᱚ "ᱛᱤᱨᱞᱟᱹ ᱠᱚᱣᱟᱜ ᱱᱟᱶᱟ ᱥᱮᱨᱢᱟ" ᱦᱚᱸ ᱠᱚ ᱢᱮᱛᱟᱜᱼᱟ ᱾ ᱰᱤᱥᱮᱢᱵᱚᱨ ᱪᱟᱸᱫᱳ ᱨᱮ ᱦᱩᱭᱩᱜ ᱠᱟᱱ ᱟᱹᱨᱤᱪᱟᱹᱞᱤ ᱱᱟᱶᱟ ᱥᱮᱨᱢᱟ ᱫᱚ "ᱠᱚᱲᱟ ᱠᱚᱣᱟᱜ ᱱᱟᱶᱟ ᱥᱮᱨᱢᱟ" ᱠᱚ ᱢᱮᱛᱟᱜᱼᱟ ᱾^[᱑᱔]

ᱦᱚᱨᱚᱜᱼᱵᱟᱱᱫᱮ

ᱟᱠᱷᱟ ᱦᱚᱲ ᱠᱚᱫᱚ ᱟᱠᱚᱣᱟᱜ ᱵᱷᱮᱜᱟᱨ ᱦᱚᱨᱚᱜᱼᱵᱟᱱᱫᱮ ᱞᱟᱹᱜᱤᱫ ᱠᱚ ᱵᱟᱰᱟᱭᱚᱜᱼᱟ ᱾ ᱟᱠᱷᱟ ᱛᱤᱨᱞᱟᱹ ᱠᱚᱫᱚ ᱛᱤ ᱛᱮ ᱥᱩᱛᱟᱹᱢ ᱠᱚ ᱩᱬᱤᱭᱟ ᱟᱨ ᱡᱟᱸᱜᱟ ᱛᱮ ᱪᱟᱞᱟᱣᱚᱜ ᱛᱮᱧ ᱡᱚᱱᱛᱨᱚ ᱛᱮ ᱞᱩᱜᱽᱨᱤ ᱠᱚ ᱛᱮᱧᱟ ᱾ ᱱᱚᱶᱟ ᱞᱩᱜᱽᱨᱤ ᱫᱚ ᱱᱤᱞ ᱨᱚᱝ ᱛᱮ ᱠᱚ ᱞᱚᱦᱚᱫᱟ ᱾ ᱛᱤᱨᱞᱟᱹ ᱠᱚᱫᱚ ᱦᱟᱢᱟᱞ ᱞᱮᱜᱤᱝᱥ, ᱢᱤᱫᱴᱟᱹᱝ ᱠᱷᱟᱴᱚ ᱦᱮᱸᱫᱮ ᱥᱟᱭᱟ, ᱟᱨ ᱢᱤᱫᱴᱟᱹᱝ ᱦᱮᱸᱫᱮ ᱠᱩᱨᱛᱟᱹ ᱠᱚ ᱦᱚᱨᱚᱜᱟ ᱡᱟᱦᱟᱸ ᱨᱮ ᱟᱹᱰᱤ ᱱᱟᱯᱟᱭ ᱛᱮ ᱛᱤ ᱛᱮ ᱯᱩᱛᱷᱤ ᱟᱨ ᱥᱩᱛᱟᱹᱢ ᱨᱮᱱᱟᱜ ᱠᱷᱳᱫᱟ ᱛᱟᱦᱮᱸᱱᱟ ᱾ ᱟᱠᱷᱟ ᱛᱤᱨᱞᱟᱹ ᱠᱚᱫᱚ ᱛᱤ ᱛᱮ ᱱᱟᱯᱟᱭ ᱱᱟᱯᱟᱭ ᱱᱚᱠᱥᱟ ᱵᱮᱱᱟᱣ ᱨᱮ ᱟᱹᱰᱤ ᱠᱚ ᱯᱟᱹᱨᱩᱠᱷᱤᱭᱟᱹ ᱜᱮᱭᱟ ᱾

ᱛᱤᱨᱞᱟᱹ ᱠᱚᱣᱟᱜ ᱵᱚᱦᱚᱜ ᱨᱮᱱᱟᱜ ᱴᱩᱯᱨᱤ ᱥᱮ ᱜᱚᱦᱱᱟ ᱫᱚ ᱟᱠᱷᱟ ᱦᱚᱨᱚᱜᱼᱵᱟᱱᱫᱮ ᱨᱮᱱᱟᱜ ᱡᱚᱛᱚ ᱠᱷᱚᱱ ᱪᱚᱨᱚᱠ ᱡᱤᱱᱤᱥ ᱠᱟᱱᱟ ᱾ ᱟᱠᱷᱟ ᱛᱤᱨᱞᱟᱹ ᱠᱚᱫᱚ ᱟᱠᱚᱣᱟᱜ ᱩᱢᱮᱨ ᱟᱨ ᱵᱟᱯᱞᱟ ᱟᱠᱟᱱ ᱚᱵᱚᱥᱛᱟ ᱞᱮᱠᱟᱛᱮ ᱵᱷᱮᱜᱟᱨ ᱵᱷᱮᱜᱟᱨ ᱴᱩᱯᱨᱤ ᱠᱚ ᱦᱚᱨᱚᱜᱟ ᱾ ᱟᱢᱫᱟᱡᱽ ᱑᱒ ᱥᱮᱨᱢᱟ ᱩᱢᱮᱨ ᱨᱮ, ᱢᱤᱫ ᱟᱠᱷᱟ ᱠᱩᱲᱤ ᱫᱚ ᱜᱤᱫᱽᱨᱟᱹ ᱚᱠᱛᱚ ᱨᱮᱱᱟᱜ ᱴᱩᱯᱨᱤ ᱵᱚᱫᱚᱞ ᱛᱮ ᱡᱩᱣᱟᱹᱱ ᱠᱩᱲᱤᱭᱟᱜ ᱴᱩᱯᱨᱤ ᱦᱚᱨᱚᱜ ᱮ ᱮᱛᱚᱦᱚᱵᱟ ᱾ ᱱᱚᱶᱟ ᱴᱩᱯᱨᱤ ᱠᱚᱨᱮ ᱨᱩᱯᱟᱹ ᱥᱤᱠᱠᱟᱹ, ᱜᱟᱹᱭ ᱥᱮ ᱥᱤᱢ ᱤᱞ ᱟᱨ ᱟᱭᱢᱟ ᱞᱮᱠᱟᱱ ᱯᱩᱛᱷᱤ ᱞᱟᱜᱟᱣ ᱛᱟᱦᱮᱸᱱᱟ ᱾ ᱡᱚᱛᱚ ᱟᱠᱷᱟ ᱪᱟᱸᱜᱟ ᱜᱟᱫᱮᱞ ᱨᱮᱱᱟᱜ ᱴᱩᱯᱨᱤ ᱫᱚ ᱵᱷᱮᱜᱟᱨ ᱵᱷᱮᱜᱟᱨ ᱜᱮᱭᱟ ᱾ ᱡᱮᱞᱮᱠᱟ:

"ᱩᱞᱳ ᱟᱠᱷᱟ ᱠᱚᱣᱟᱜ ᱴᱩᱯᱨᱤ ᱫᱚ ᱢᱟᱫ ᱛᱮ ᱵᱮᱱᱟᱣ ᱠᱳᱱ ᱞᱮᱠᱟ ᱛᱟᱦᱮᱸᱱᱟ, ᱡᱟᱦᱟᱸ ᱨᱮ ᱯᱩᱛᱷᱤ, ᱨᱩᱯᱟᱹ ᱟᱨ ᱥᱤᱢ ᱤᱞ ᱨᱮᱱᱟᱜ ᱡᱷᱟᱹᱞᱚᱨ ᱛᱟᱦᱮᱸᱱᱟ ᱾ ᱯᱟᱢᱤ ᱟᱠᱷᱟ ᱠᱚᱫᱚ ᱨᱩᱯᱟᱹ ᱥᱤᱠᱠᱟᱹ ᱟᱨ ᱨᱩᱯᱟᱹ ᱨᱤᱝ ᱛᱮ ᱥᱟᱡᱟᱣ ᱟᱠᱟᱱ ᱴᱩᱯᱨᱤ ᱠᱚ ᱦᱚᱨᱚᱜᱟ ᱾ ᱞᱳᱢᱤ ᱟᱠᱷᱟ ᱠᱚᱫᱚ ᱨᱩᱯᱟᱹ ᱵᱚᱞ ᱛᱮ ᱜᱷᱮᱨᱟᱣ ᱟᱠᱟᱱ ᱜᱳᱞ ᱴᱩᱯᱨᱤ ᱠᱚ ᱦᱚᱨᱚᱜᱟ ᱾"^[᱑᱕]

ᱢᱤᱭᱟᱱᱢᱟᱨ ᱨᱮ
ᱞᱟᱣᱚᱥ ᱨᱮ
ᱞᱟᱣᱚᱥ ᱨᱮ
ᱞᱟᱣᱚᱥ ᱨᱮ
ᱛᱷᱟᱭᱞᱮᱱᱰ ᱨᱮ
ᱛᱷᱟᱭᱞᱮᱱᱰ ᱨᱮ
ᱛᱷᱟᱭᱞᱮᱱᱰ ᱨᱮᱱ ᱢᱤᱫ ᱟᱠᱷᱟ ᱠᱚᱲᱟ

ᱡᱚᱢᱟᱜ

ᱟᱠᱷᱟ ᱡᱚᱢᱟᱜ ᱨᱮᱱᱟᱜ ᱢᱩᱲᱩᱛ ᱦᱟᱹᱴᱤᱧ ᱫᱚ ᱦᱩᱭᱩᱜ ᱠᱟᱱᱟ ᱩᱥᱩᱞ ᱵᱩᱨᱩ ᱴᱚᱴᱷᱟ ᱨᱮᱱᱟᱜ ᱦᱳᱲᱳ,ᱰᱟᱝᱜᱽᱨᱟ, ᱥᱩᱠᱨᱤ ᱟᱨ ᱥᱤᱢ ᱟᱹᱥᱩᱞ ᱥᱟᱶᱛᱮ ᱦᱳᱲᱳ, ᱡᱚᱱᱚᱲ, ᱟᱭᱢᱟ ᱞᱮᱠᱟᱱ ᱟᱲᱟᱜ ᱥᱟᱠᱟᱢ, ᱢᱟᱹᱨᱤᱪ ᱟᱨ ᱢᱚᱥᱞᱟ ᱪᱟᱥ ᱵᱟᱥ ᱠᱟᱛᱮ ᱩᱱᱠᱩ ᱫᱚ ᱟᱠᱚᱣᱟᱜ ᱡᱚᱢᱟᱜ ᱠᱚ ᱥᱟᱡᱟᱣᱟ ᱾ ᱱᱚᱶᱟ ᱵᱮᱜᱚᱨ ᱦᱚᱸ ᱵᱤᱨ ᱠᱷᱚᱱ ᱛᱩᱢᱟᱹᱞ ᱟᱠᱟᱱ ᱥᱟᱠᱟᱢ ᱟᱨ ᱥᱮᱸᱫᱽᱨᱟ ᱟᱠᱟᱱ ᱡᱤᱞ ᱦᱚᱸ ᱩᱱᱠᱩᱣᱟᱜ ᱡᱚᱢᱟᱜ ᱨᱮᱱᱟᱜ ᱢᱤᱫ ᱢᱟᱨᱟᱝ ᱦᱟᱹᱴᱤᱧ ᱠᱟᱱᱟ ᱾^[᱑᱖]

ᱱᱩᱭ ᱯᱷᱩᱭᱮᱝ ᱛᱡᱩᱭᱮᱼᱡᱮ: ᱪᱟᱣᱞᱮ ᱥᱟᱶ ᱡᱚᱢ ᱞᱟᱹᱜᱤᱫ ᱢᱤᱫ ᱪᱟᱹᱴᱱᱤ, ᱡᱟᱦᱟᱸ ᱫᱚ ᱵᱟᱫᱟᱢ, ᱢᱚᱥᱞᱟ ᱟᱨ ᱨᱚᱦᱚᱲ ᱢᱟᱹᱨᱤᱪ ᱛᱮ ᱛᱮᱭᱟᱨᱚᱜᱼᱟ ᱾
ᱥᱟᱯᱤ ᱛᱷᱚᱝᱼᱩᱭᱮ: ᱵᱤᱞᱟᱹᱛᱤ, ᱵᱮᱨᱮᱞ ᱢᱟᱹᱨᱤᱪ, ᱨᱟᱹᱥᱩᱬ, ᱯᱮᱭᱟᱡᱽ ᱥᱟᱠᱟᱢ ᱟᱨ ᱫᱷᱟᱹᱱᱤᱭᱟᱹ ᱥᱟᱠᱟᱢ ᱛᱮ ᱛᱮᱭᱟᱨ ᱢᱤᱫ ᱥᱤᱵᱤᱞ ᱪᱟᱹᱴᱱᱤ ᱾
ᱢᱟᱱᱳ ᱞᱩᱭᱮᱼᱩᱭᱮ: ᱥᱩᱠᱨᱤ ᱡᱤᱞ ᱟᱨ ᱨᱟᱹᱥᱩᱬ ᱥᱟᱶ ᱵᱷᱟᱹᱡᱤ ᱟᱠᱟᱱ ᱥᱠᱣᱟᱥ ᱾
ᱦᱳᱼᱯᱟ ᱪᱟᱼᱩᱭᱮ: ᱠᱟᱭᱼᱞᱟᱱ ᱟᱲᱟᱜ ᱟᱨ ᱥᱩᱠᱨᱤ ᱡᱤᱞ ᱨᱮᱱᱟᱜ ᱢᱤᱫ ᱥᱩᱨᱩᱣᱟᱹ ᱡᱚᱢᱟᱜ ᱾
ᱦᱳᱼᱯᱟ ᱪᱮ ᱞᱩᱭᱮᱼᱩᱭᱮ: ᱛᱮᱣ ᱟᱠᱟᱱ ᱟᱨ ᱥᱤᱯᱤ ᱟᱠᱟᱱ ᱨᱟᱹᱭ ᱟᱲᱟᱜ ᱾
ᱜᱩᱪᱤ ᱪᱮ: ᱢᱤᱫ ᱞᱮᱠᱟᱱ ᱯᱮᱭᱟᱡᱽ ᱨᱮᱱᱟᱜ ᱨᱮᱦᱮᱫ ᱵᱷᱟᱹᱡᱤ ᱾
ᱢᱳᱪᱩᱭᱮ ᱪᱟᱼᱞᱩ: ᱟᱹᱞᱩ ᱟᱨ ᱥᱩᱠᱨᱤ ᱡᱤᱞ ᱨᱮᱱᱟᱜ ᱢᱤᱫ ᱥᱴᱤᱣ᱾

ᱠᱟᱹᱣᱰᱤᱟᱹᱨᱤ

ᱟᱠᱷᱟ ᱦᱚᱲ ᱫᱚ ᱟᱹᱥᱩᱞᱚᱜ ᱞᱟᱹᱜᱤᱫ ᱪᱟᱥ ᱵᱟᱥ ᱨᱮ ᱵᱷᱚᱨᱥᱟ ᱠᱚ ᱛᱟᱦᱮᱸᱱ ᱨᱮᱦᱚᱸ, ᱩᱱᱠᱩ ᱫᱚ ᱟᱹᱰᱤ ᱫᱤᱱ ᱠᱷᱚᱱ ᱵᱮᱯᱟᱨ ᱵᱟᱹᱱᱤᱡ ᱥᱟᱶ ᱦᱚᱸ ᱡᱚᱲᱟᱣ ᱢᱮᱱᱟᱜ ᱠᱚᱣᱟ ᱾ ᱯᱟᱞᱮ ᱢᱤᱫ ᱥᱟᱭ ᱥᱮᱨᱢᱟ ᱢᱟᱬᱟᱝ ᱨᱮ, ᱥᱩᱛᱟᱹᱢ ᱟᱨ ᱟᱯᱷᱤᱢ ᱫᱚ ᱩᱱᱠᱩᱣᱟᱜ ᱢᱩᱲᱩᱛ ᱵᱮᱯᱟᱨᱤᱭᱟᱹ ᱪᱟᱥ ᱛᱟᱦᱮᱸ ᱠᱟᱱᱟ ᱾ ᱱᱮᱛᱟᱨᱟᱜ ᱚᱠᱛᱚ ᱨᱮ ᱩᱱᱠᱩ ᱫᱚ ᱢᱟᱹᱨᱤᱪ, ᱥᱚᱭᱟᱵᱤᱱ, ᱯᱚᱴᱚᱢ ᱠᱚᱵᱤ ᱟᱨ ᱵᱤᱞᱟᱹᱛᱤ ᱠᱚ ᱪᱟᱥ ᱮᱫᱼᱟ ᱾ ᱟᱹᱛᱩ ᱨᱮᱱᱟᱜ ᱠᱤᱪᱷᱩ ᱚᱲᱟᱜ ᱨᱮ ᱦᱩᱰᱤᱧ ᱫᱚᱠᱟᱱ ᱦᱚᱸ ᱛᱟᱦᱮᱸᱱᱟ ᱡᱟᱦᱟᱸ ᱨᱮ ᱥᱤᱜᱽᱨᱮᱴ ᱟᱨ ᱜᱷᱟᱹᱥᱩᱧ ᱥᱩᱱᱩᱢ ᱞᱮᱠᱟᱱ ᱡᱤᱱᱤᱥ ᱠᱚ ᱟᱹᱠᱷᱨᱤᱧᱟ ᱾^[᱗]

ᱥᱟᱹᱠᱷᱭᱟᱹᱛ

↑ "Akha". Ethnologue (Free All). Ethnologue. Retrieved December 26, 2023.
↑ "Results of Population and Housing Census 2015" (PDF). Lao Statistics Bureau. Retrieved 1 May 2020.
↑ "The hill tribe with Chinese roots: Akha tribe, Chiang Rai". 3 January 2018.
↑ The Akha Heritage Foundation
↑ "Christian conversion threatens hill tribe culture", Asia Times
↑ Chiang Mai's Hill Peoples in: Forbes, Andrew, and Henley, David, Ancient Chiang Mai Volume 3. Chiang Mai, Cognoscenti Books, 2012.
1 2 3 4 Kammerer, Cornelia Ann (1996). "GALE search". Gle Rubin Virtual Reference Library. East and South East Asia. 5: 11–13. {{cite journal}}: |access-date= requires |url= (help)
1 2 "The Akha". HillTribe.org. Retrieved 3 May 2012.
↑ "An Overview of the Akha". Retrieved 29 April 2012.
↑ Goodman, Jim (1996). Meet the Akha. White Lotus Co Ltd. p. 113. ISBN 9748496562.
↑ "Akha". The Hilltribes of Thailand. Thailand Online. Retrieved 3 May 2012.
↑ Tooker, Deborah (1992). "Identity Systems of Highland Burma: 'Belief', Akha Zan, and a Critique of Interiorized Notions of Ethno-Religious Identity". Royal Anthropological Institute of Great Britain and Ireland. 27 (4): 799–819.
1 2 "The Akha Belief and Life System". Retrieved 4 May 2012.
↑ Goodman, Jim (September 2003). "The Akha Swing Festival". Chiang Mai City Life. Retrieved 3 May 2012.
↑ "High Fashion, Hill Style". Archived from the original on 29 June 2017. Retrieved 3 May 2012.
↑ "An Overview of the Akha". The Akha Heritage Foundation.

[1] "Akha". Ethnologue (Free All). Ethnologue. Retrieved December 26, 2023.

[Census2015-2] "Results of Population and Housing Census 2015" (PDF). Lao Statistics Bureau. Retrieved 1 May 2020.

[3] "The hill tribe with Chinese roots: Akha tribe, Chiang Rai". 3 January 2018.

[4] The Akha Heritage Foundation

[5] "Christian conversion threatens hill tribe culture", Asia Times

[6] Chiang Mai's Hill Peoples in: Forbes, Andrew, and Henley, David, Ancient Chiang Mai Volume 3. Chiang Mai, Cognoscenti Books, 2012.

[Kammerer-7] 1 2 3 4 Kammerer, Cornelia Ann (1996). "GALE search". Gle Rubin Virtual Reference Library. East and South East Asia. 5: 11–13. {{cite journal}}: |access-date= requires |url= (help)

[Hilltribe-8] 1 2 "The Akha". HillTribe.org. Retrieved 3 May 2012.

[Akha-9] "An Overview of the Akha". Retrieved 29 April 2012.

[Goodman-1996-10] Goodman, Jim (1996). Meet the Akha. White Lotus Co Ltd. p. 113. ISBN 9748496562.

[Thailine-11] "Akha". The Hilltribes of Thailand. Thailand Online. Retrieved 3 May 2012.

[Tooker-12] Tooker, Deborah (1992). "Identity Systems of Highland Burma: 'Belief', Akha Zan, and a Critique of Interiorized Notions of Ethno-Religious Identity". Royal Anthropological Institute of Great Britain and Ireland. 27 (4): 799–819.

[Belief-13] 1 2 "The Akha Belief and Life System". Retrieved 4 May 2012.

[14] Goodman, Jim (September 2003). "The Akha Swing Festival". Chiang Mai City Life. Retrieved 3 May 2012.

[15] "High Fashion, Hill Style". Archived from the original on 29 June 2017. Retrieved 3 May 2012.

[16] "An Overview of the Akha". The Akha Heritage Foundation.

[᱑]

[᱒]

[᱓]

[᱔]

[᱕]

[᱖]

[᱗]

[᱘]

[᱙]

[᱑᱐]

[᱑᱑]

[᱑᱒]

[᱑᱓]

[᱑᱔]

[᱑᱕]

[᱑᱖]