ᱟᱢᱨᱤᱛ ᱦᱟᱸᱥᱫᱟ
ᱟᱢᱨᱤᱛ ᱦᱟᱸᱥᱫᱟ (ᱤᱝᱨᱮᱡᱤ: Amrit Hansda), ᱡᱟᱦᱟᱸᱭ ᱫᱚ ᱟᱡᱟᱜ ᱵᱟᱦᱱᱟ ᱧᱩᱛᱩᱢ ᱫᱟᱵᱟᱱᱚᱞ ᱦᱟᱸᱥᱫᱟᱧᱩᱛᱩᱢ ᱛᱮ ᱦᱚᱸᱭ ᱵᱟᱰᱟᱭᱚᱜᱼᱟ, ᱫᱚ ᱥᱟᱱᱛᱟᱲᱤ ᱥᱟᱶᱦᱮᱫ ᱨᱤᱱᱤᱡ ᱢᱤᱫ ᱧᱩᱛᱩᱢᱟᱱ ᱚᱱᱚᱬᱦᱤᱭᱟᱹ, ᱚᱱᱚᱞᱤᱭᱟᱹ, ᱛᱚᱨᱡᱚᱢᱟᱭᱤᱡ ᱟᱨ ᱥᱟᱥᱟᱯᱲᱟᱣᱤᱡ ᱮ ᱛᱟᱦᱮᱸ ᱠᱟᱱᱟ᱾
ᱡᱟᱱᱟᱢ ᱟᱨ ᱜᱷᱟᱨᱚᱸᱡᱽ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱟᱢᱨᱤᱛ ᱦᱟᱸᱥᱫᱟ ᱫᱚ ᱑᱑ ᱡᱩᱞᱟᱭ ᱑᱙᱔᱕ ᱥᱟᱞᱮ ᱨᱮ ᱯᱚᱪᱷᱤᱢ ᱵᱟᱝᱞᱟ ᱯᱚᱱᱚᱛ, ᱯᱚᱪᱷᱤᱢ ᱢᱮᱫᱤᱱᱤᱯᱩᱨ (ᱱᱤᱛᱚᱜ ᱡᱷᱟᱲᱜᱨᱟᱢ) ᱦᱚᱱᱚᱛ ᱨᱮᱭᱟᱜ ᱡᱷᱟᱲᱜᱨᱟᱢ ᱛᱷᱟᱱᱟ ᱛᱟᱹᱨᱤ ᱨᱮ ᱢᱮᱱᱟᱜ 'ᱠᱟᱹᱥᱤᱭᱟᱹ' ᱟᱹᱛᱩ ᱨᱮᱭ ᱡᱟᱱᱟᱢ ᱞᱮᱱᱟ ᱾ ᱟᱡᱟᱜ ᱡᱟᱱᱟᱢ ᱫᱚ ᱟᱡ ᱢᱟᱢᱚ ᱚᱲᱟᱜ 'ᱵᱩᱲᱤᱥᱳᱞ' ᱟᱹᱛᱩ ᱨᱮ ᱦᱩᱭ ᱞᱮᱱᱟ᱾[᱑][᱒] ᱟᱡ ᱵᱟᱵᱟᱦᱟᱜ ᱧᱩᱛᱩᱢ ᱫᱚ ᱞᱚᱠᱷᱤᱨᱟᱢ ᱦᱟᱸᱥᱫᱟ (ᱦᱤᱱᱫᱤ ᱯᱚᱛᱚᱵ ᱨᱮᱫᱚ 'ᱞᱚᱠᱷᱤᱨᱟᱢ ᱢᱩᱨᱢᱩ' ᱢᱮᱱᱛᱮ ᱚᱞ ᱢᱮᱱᱟᱜᱼᱟ) ᱟᱨ ᱟᱭᱳᱣᱟᱜ ᱧᱩᱛᱩᱢ ᱫᱚ ᱵᱩᱫᱷᱩᱢᱚᱬᱤ ᱛᱟᱦᱮᱸ ᱠᱟᱱᱟ ᱾[᱑][᱒]
ᱥᱮᱪᱮᱫ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱟᱡᱟᱜ ᱮᱛᱚᱦᱚᱵ ᱥᱮᱪᱮᱫ ᱫᱚ ᱫᱩᱵᱽᱨᱟᱡᱽᱯᱩᱨ ᱯᱨᱟᱭᱢᱟᱨᱤ ᱟᱥᱲᱟ ᱠᱷᱚᱱ ᱮᱛᱚᱦᱚᱵ ᱞᱮᱱᱟ ᱾ ᱚᱱᱟ ᱛᱟᱭᱚᱢ ᱑᱙᱕᱗ ᱥᱟᱞᱮ ᱨᱮ ᱡᱷᱟᱲᱜᱨᱟᱢ ᱨᱮᱭᱟᱜ ᱠᱩᱢᱩᱫᱽᱠᱩᱢᱟᱨᱤ ᱤᱱᱥᱴᱤᱴᱤᱭᱩᱥᱚᱱ ᱠᱷᱚᱱ ᱢᱮᱴᱨᱤᱠ ᱮ ᱯᱟᱥ ᱞᱮᱫᱟ᱾ ᱑᱙۶᱗ (᱑᱙᱖᱗) ᱥᱟᱞᱮ ᱨᱮ ᱡᱷᱟᱲᱜᱨᱟᱢ ᱨᱟᱡᱽ ᱠᱚᱞᱮᱡᱽ ᱠᱷᱚᱱ ᱵᱤ. ᱮ. ᱮ ᱯᱟᱥ ᱞᱮᱫᱟ᱾ ᱜᱷᱟᱨᱚᱸᱡᱽ ᱨᱮᱱᱟᱜ ᱮᱴᱠᱮᱴᱚᱬᱮ ᱠᱷᱟᱹᱛᱤᱨ ᱚᱱᱟ ᱛᱟᱭᱚᱢ ᱫᱚ ᱵᱟᱭ ᱯᱟᱲᱦᱟᱣ ᱫᱟᱲᱮᱭᱟᱫᱼᱟ᱾[᱑]
ᱠᱟᱹᱢᱤ ᱡᱤᱭᱚᱱ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱟᱡᱟᱜ ᱠᱟᱹᱢᱤ ᱡᱤᱭᱚᱱ ᱫᱚ ᱵᱤ. ᱰᱤ. ᱳ. ᱚᱯᱷᱤᱥ ᱨᱮ ᱴᱟᱭᱯᱤᱥᱴ ᱠᱞᱟᱨᱠ (Typist Clerk) ᱞᱮᱠᱟᱛᱮ ᱮᱛᱚᱦᱚᱵ ᱞᱮᱱᱟ ᱾ ᱛᱟᱭᱚᱢ ᱛᱮ ᱟᱡᱟᱜ ᱠᱩᱨᱩᱢᱩᱴᱩ ᱛᱮ ᱩᱱᱤ ᱫᱚ ᱵᱤ. ᱰᱤ. ᱳ.ᱞᱮᱠᱟᱛᱮᱭ ᱯᱨᱚᱢᱳᱥᱚᱱ ᱮᱱᱟ᱾ ᱡᱟᱢᱵᱚᱱᱤ ᱵᱞᱚᱠ ᱥᱟᱶᱛᱮ ᱵᱟᱸᱠᱩᱲᱟ ᱦᱚᱱᱚᱛ ᱨᱮᱱᱟᱜ ᱟᱭᱢᱟ ᱵᱞᱚᱠ ᱠᱚᱨᱮᱭ ᱠᱟᱹᱢᱤ ᱞᱮᱫᱟ ᱾ ᱒᱐᱐᱕ ᱥᱟᱞᱮ ᱨᱮ ᱵᱤ. ᱰᱤ. ᱳ. ᱯᱚᱫᱽ ᱠᱷᱚᱱ ᱜᱮ ᱠᱟᱹᱢᱤ ᱠᱷᱚᱱ ᱮ ᱡᱤᱨᱟᱹᱣ ᱞᱮᱱᱟ᱾ ᱚᱱᱟ ᱛᱟᱭᱚᱢ ᱡᱷᱟᱲᱜᱨᱟᱢ ᱨᱮᱭᱟᱜ ᱨᱚᱜᱷᱩᱱᱟᱛᱷᱯᱩᱨ, ᱢᱚᱫᱷᱩᱵᱚᱱ ᱨᱮ ᱛᱷᱟᱹᱭ ᱮ ᱜᱟᱰᱟᱣ ᱠᱮᱫᱟ᱾[᱑][᱒]
ᱥᱟᱶᱦᱮᱫ ᱮᱱᱮᱢ ᱟᱨ ᱛᱚᱨᱡᱚᱢᱟ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱠᱚᱞᱮᱡᱽ ᱡᱤᱭᱚᱱ ᱠᱷᱚᱱ ᱜᱮ ᱩᱱᱤ ᱫᱚ ᱥᱟᱱᱛᱟᱲᱤ ᱟᱨ ᱵᱟᱝᱞᱟ ᱵᱟᱱᱟᱨ ᱯᱟᱹᱨᱥᱤ ᱛᱮ ᱥᱟᱶᱦᱮᱫ ᱪᱟᱨᱪᱟᱭ ᱮᱛᱚᱦᱚᱵ ᱞᱮᱫᱟ᱾ ᱑᱙᱙᱓ ᱥᱟᱞᱮ ᱨᱮᱱᱟᱜ ᱚᱠᱴᱚᱵᱚᱨ ᱪᱟᱸᱫᱚ ᱠᱷᱚᱱ "ᱤᱯᱤᱞ"ᱧᱩᱛᱩᱢᱟᱱ ᱢᱤᱫ ᱯᱮᱼᱪᱟᱸᱫᱚᱠᱤᱭᱟᱹ ᱯᱟᱛᱷᱟᱢ ᱮ ᱯᱟᱨᱥᱟᱞ ᱟᱨ ᱥᱟᱯᱲᱟᱣᱮᱫ ᱛᱟᱦᱮᱸᱫ᱾ ᱱᱚᱶᱟ ᱵᱮᱜᱚᱨ ᱨᱤᱢᱤᱞ, ᱮᱵᱷᱮᱱ, ᱥᱤᱞᱤ ᱟᱨ ᱯᱚᱪᱷᱤᱢ ᱵᱟᱝᱞᱟ ᱯᱟᱛᱷᱟᱢ ᱠᱚᱨᱮ ᱟᱡᱟᱜ ᱚᱱᱚᱞ ᱠᱚ ᱯᱟᱨᱥᱟᱞ ᱟᱠᱟᱱᱟ ᱾
ᱛᱚᱨᱡᱚᱢᱟ ᱠᱟᱹᱢᱤ ᱨᱮ ᱟᱡᱟᱜ ᱟᱹᱰᱤ ᱢᱟᱨᱟᱝ ᱮᱱᱮᱢ ᱢᱮᱱᱟᱜᱼᱟ᱾ ᱵᱟᱝᱞᱟ ᱨᱤᱱᱤᱡ ᱧᱩᱛᱩᱢᱟᱱ ᱚᱱᱚᱬᱦᱤᱭᱟᱹ ᱡᱤᱵᱚᱱᱟᱱᱚᱱᱫᱚ ᱫᱟᱥᱼᱟᱜ ᱚᱱᱚᱬᱦᱮ, ᱢᱚᱦᱟᱥᱣᱮᱛᱟ ᱫᱮᱵᱤᱭᱟᱜ 'ᱚᱨᱚᱱᱭᱮᱨ ᱚᱫᱷᱤᱠᱟᱨ' ᱟᱨ ᱥᱚᱢᱚᱨᱮᱥ ᱵᱚᱥᱩᱣᱟᱜ 'ᱯᱨᱚᱡᱟᱯᱚᱛᱤ' ᱥᱟᱱᱛᱟᱲᱤ ᱛᱮᱭ ᱛᱚᱨᱡᱚᱢᱟ ᱞᱮᱫᱟ ᱾ ᱚᱱᱠᱟ ᱜᱮ ᱢᱚᱝᱜᱚᱞ ᱪᱚᱸᱫᱽᱨᱚ ᱴᱩᱰᱩᱣᱟᱜ ᱥᱟᱱᱛᱟᱲᱤ ᱯᱚᱛᱚᱵ 'ᱞᱤᱴᱟᱹ' ᱫᱚ ᱵᱟᱝᱞᱟ ᱛᱮᱭ ᱛᱚᱨᱡᱚᱢᱟ ᱟᱠᱟᱫᱟ᱾[᱑]
ᱟᱡᱟᱜ ᱯᱟᱨᱥᱟᱞ ᱟᱠᱟᱱ ᱯᱩᱛᱷᱤ ᱠᱚᱫᱚ ᱦᱩᱭᱩᱜ ᱠᱟᱱᱟ:
- ᱫᱷᱤᱨᱤ ᱪᱟᱴᱟᱱᱤ : ᱵᱟᱝᱞᱟ ᱟᱨ ᱥᱟᱱᱛᱟᱲᱤ ᱚᱱᱚᱬᱦᱮ ᱯᱩᱛᱷᱤ (᱑᱙᱘᱓/᱑᱙᱘᱘) ᱾[᱑][᱒]
- ᱫᱩᱞᱟᱹᱲ ᱥᱟᱶᱛᱟ : ᱚᱱᱚᱞ ᱯᱩᱛᱷᱤ (᱑᱙᱙᱐)᱾[᱑][᱒]
- ᱫᱮᱱ ᱥᱮ ᱛᱤᱧ ᱛᱤᱨᱤᱭᱳ ᱵᱟᱱᱟᱢ : ᱚᱱᱚᱬᱦᱮ ᱯᱩᱛᱷᱤ (᱑᱙᱙᱐) ᱾[᱑]
- ᱫᱩᱞᱟᱹᱲ ᱜᱟᱛᱮᱧ : ᱚᱱᱚᱬᱦᱮ ᱯᱩᱛᱷᱤ (᱑᱙᱙᱑) ᱾[᱑][᱒]
- ᱦᱟᱨᱟᱛᱚᱨᱟ: ᱚᱱᱚᱬᱦᱮ ᱯᱩᱛᱷᱤ (᱑᱙᱙᱑/᱑᱙᱙᱒)᱾[᱑][᱒]
- ᱡᱚᱨ ᱵᱟᱲᱮ: (᱑᱙᱙᱙) ᱾[᱑]
- ᱵᱚᱱᱞᱚᱛᱟ ᱥᱮᱱ: ᱡᱤᱵᱚᱱᱟᱱᱚᱱᱫᱚ ᱫᱟᱥᱼᱟᱜ ᱚᱱᱚᱬᱦᱮ ᱨᱮᱱᱟᱜ ᱥᱟᱱᱛᱟᱲᱤ ᱛᱚᱨᱡᱚᱢᱟ (᱑᱙᱙᱙)᱾[᱑]
ᱢᱟᱹᱱ ᱟᱨ ᱥᱤᱨᱯᱷᱟᱹ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮ ᱟᱡᱟᱜ ᱮᱱᱮᱢ ᱠᱷᱟᱹᱛᱤᱨ ᱒᱐᱐᱐ ᱥᱟᱞᱮ ᱨᱮ ᱟᱭᱥᱣᱟ ᱯᱟᱦᱴᱟ ᱠᱷᱚᱱ ᱩᱱᱤ ᱫᱚ "Award of Honour" (ᱮᱣᱟᱨᱰ ᱚᱯᱷ ᱚᱱᱚᱨ) ᱛᱮᱠᱚ ᱢᱟᱹᱱ ᱥᱟᱨᱦᱟᱣ ᱞᱮᱫᱮᱭᱟ ᱾[᱑]