ᱟᱢᱵᱟᱞᱤᱠᱟ ᱫᱮᱵᱤ

ᱟᱢᱵᱟᱞᱤᱠᱟ ᱫᱮᱵᱤ (ᱱᱮᱯᱟᱞᱤ: अम्बालिकादेवी; ᱑᱘᱙᱔–᱑᱙᱓᱖) ᱫᱚ ᱢᱤᱫ ᱱᱮᱯᱟᱞᱤ ᱚᱱᱚᱞᱤᱭᱟᱹ ᱟᱨ ᱚᱱᱚᱬᱦᱤᱭᱟᱹ ᱠᱟᱱᱟᱭ ᱾ ᱩᱱᱤᱫᱚ ᱯᱩᱭᱞᱩ ᱱᱮᱯᱟᱞᱤ ᱛᱤᱨᱞᱟᱹ ᱩᱯᱟᱹᱱᱟᱥᱤᱭᱟᱹ ᱢᱮᱱᱛᱮ ᱠᱚ ᱢᱟᱱᱟᱣᱮᱭᱟ ᱾ ᱩᱱᱤᱭᱟᱜ ᱩᱯᱟᱹᱱᱟᱥ 'ᱨᱟᱡᱽᱯᱩᱛ ᱨᱟᱢᱟᱱᱤ' ᱫᱚ ᱑᱙᱓᱒ ᱥᱟᱞᱮ ᱨᱮ ᱪᱷᱟᱯᱟ ᱞᱮᱱᱟ ᱾

ᱡᱤᱭᱚᱱ ᱠᱟᱛᱷᱟ

ᱩᱱᱤᱫᱚ ᱒᱐ ᱢᱮ ᱑᱘᱙᱔ (᱘ ᱡᱮᱥᱴᱷᱟ ᱑᱙᱕᱑ ᱵᱤ.ᱥ.) ᱨᱮ ᱠᱟᱴᱷᱢᱟᱱᱰᱩ, ᱱᱮᱯᱟᱞ ᱨᱮᱱᱟᱜ ᱢᱟᱠᱷᱟᱱ ᱴᱚᱞ ᱨᱮ ᱟᱡ ᱵᱟᱵᱟ ᱮᱠᱠᱨᱤᱥᱱᱟ ᱱᱮᱯᱟᱞ ᱟᱨ ᱟᱭᱳ ᱨᱚᱛᱱᱚ ᱠᱩᱢᱟᱨᱤ ᱴᱷᱮᱱᱮ ᱡᱟᱱᱟᱢ ᱞᱮᱱᱟ ᱾ ᱩᱱᱤᱫᱚ ᱢᱤᱫ ᱠᱤᱥᱟᱹᱬ ᱜᱷᱟᱨᱚᱸᱡᱽ ᱠᱷᱚᱱ ᱦᱮᱡ ᱞᱮᱱᱟᱭ ᱾ ᱟᱡ ᱵᱟᱵᱟ ᱫᱚ ᱨᱟᱬᱟ ᱥᱚᱨᱠᱟᱨ ᱨᱮ ᱥᱩᱵᱽᱵᱟ (ᱚᱯᱷᱤᱥᱟᱨ) ᱮ ᱛᱟᱦᱮᱸ ᱠᱟᱱᱟ ᱾ ᱟᱡᱤᱡ ᱜᱚᱲᱚᱢ ᱦᱟᱲᱟᱢ ᱮᱱᱮᱡ ᱠᱩᱢᱟᱨᱤ ᱠᱚᱭᱤᱨᱟᱞᱟ ᱫᱚ ᱨᱟᱡᱟ ᱯᱨᱤᱛᱷᱵᱤ ᱵᱤᱨ ᱵᱤᱠᱨᱚᱢ ᱥᱟᱦᱟᱭᱤᱡ ᱡᱚᱴᱤᱧ ᱮᱸᱜᱟᱛ ᱮ ᱛᱟᱦᱮᱸ ᱠᱟᱱᱟ ᱾ ᱩᱱᱤᱫᱚ ᱟᱡᱟᱜ ᱜᱤᱫᱽᱨᱟᱹ ᱵᱮᱲᱟ ᱨᱮ ᱯᱩᱛᱟᱞᱤ (ᱛᱚᱨᱡᱚᱢᱟ: ᱯᱤᱯᱤᱞᱤ) ᱠᱚ ᱢᱮᱛᱟᱭ ᱛᱟᱦᱮᱸᱫ ᱾

᱗ ᱵᱚᱪᱷᱚᱨ ᱩᱢᱮᱨ ᱨᱮ ᱟᱢᱵᱤᱠᱟ ᱯᱨᱚᱥᱟᱫᱽ ᱩᱯᱟᱫᱷᱭᱟᱭ ᱥᱟᱶ ᱮ ᱵᱟᱯᱞᱟ ᱮᱱ ᱛᱟᱭᱚᱢ, ᱩᱱ ᱚᱠᱛᱚ ᱨᱮᱱᱟᱜ ᱪᱚᱞᱚᱱ ᱞᱮᱠᱟᱛᱮ ᱟᱡᱟᱜ ᱧᱩᱛᱩᱢ ᱫᱚ ᱟᱢᱵᱟᱞᱤᱠᱟ ᱫᱮᱵᱤ ᱠᱚ ᱫᱚᱦᱚ ᱠᱮᱫᱼᱟ ᱾ ᱩᱱᱤᱫᱚ ᱟᱡ ᱡᱟᱶᱟᱭ ᱚᱲᱟᱜ ᱯᱟᱴᱱᱟ ᱛᱮ ᱪᱟᱞᱟᱣ ᱮᱱᱟᱭ ᱾ ᱚᱲᱟᱜ ᱨᱮ ᱢᱟᱪᱮᱫ ᱠᱚ ᱴᱷᱮᱱ ᱠᱷᱚᱱ ᱜᱮᱭ ᱯᱟᱲᱦᱟᱣ ᱞᱮᱱᱟ ᱾ ᱩᱱᱤᱫᱚ ᱤᱝᱞᱤᱥ ᱛᱮᱭ ᱥᱮᱪᱮᱫ ᱞᱮᱱᱟ ᱾

᱑᱙᱓᱒ ᱥᱟᱞᱮ ᱨᱮ, ᱩᱱᱤᱫᱚ 'ᱨᱟᱡᱽᱯᱩᱛ ᱨᱟᱢᱟᱱᱤ' ᱯᱩᱛᱷᱤᱭ ᱪᱷᱟᱯᱟ ᱠᱮᱫᱼᱟ ᱾ ᱱᱚᱣᱟ ᱯᱩᱛᱷᱤ ᱫᱚ ᱑ ᱢᱮ ᱑᱙᱓᱒ (᱑᱙ ᱵᱟᱭᱥᱟᱠᱷ ᱑᱙᱘᱙ ᱵᱤ.ᱥ.) ᱨᱮ ᱯᱩᱨᱟᱹᱣ ᱞᱮᱱ ᱛᱟᱦᱮᱸᱫ ᱟᱨ ᱥᱮᱯᱴᱮᱢᱵᱚᱨ ᱑᱙᱓᱒ ᱨᱮ ᱡᱮᱱᱮᱨᱟᱞ ᱴᱨᱮᱰᱤᱝ ᱠᱚᱢᱯᱟᱱᱤ, ᱵᱟᱨᱟᱬᱟᱥᱤ ᱯᱟᱦᱴᱟ ᱠᱷᱚᱱ ᱪᱷᱟᱯᱟ ᱞᱮᱱᱟ ᱾ ᱱᱚᱣᱟ ᱫᱚ ᱢᱤᱫ ᱛᱤᱨᱞᱟᱹ ᱚᱱᱚᱞᱤᱭᱟᱹ ᱦᱚᱛᱮᱛᱮ ᱱᱮᱯᱟᱞᱤ ᱯᱟᱹᱨᱥᱤ ᱛᱮ ᱚᱞ ᱟᱠᱟᱱ ᱯᱩᱭᱞᱩ ᱩᱯᱟᱹᱱᱟᱥ ᱠᱟᱱᱟ ᱾

ᱱᱤᱡᱮᱨ ᱡᱤᱭᱚᱱ ᱟᱨ ᱜᱩᱨ

᱑᱙᱐᱑ ᱥᱟᱞᱮ ᱨᱮ, ᱗ ᱵᱚᱪᱷᱚᱨ ᱩᱢᱮᱨ ᱨᱮ, ᱩᱱᱤᱫᱚ ᱱᱟᱜᱟᱢᱤᱭᱟᱹ ᱟᱢᱵᱤᱠᱟ ᱯᱨᱚᱥᱟᱫᱽ ᱩᱯᱟᱫᱷᱭᱟᱭ ᱥᱟᱶ ᱮ ᱵᱟᱯᱞᱟ ᱮᱱᱟ ᱾ ᱩᱱᱠᱤᱱ ᱨᱮᱱ ᱫᱚ ᱟᱯᱱᱟᱨ ᱜᱤᱫᱽᱨᱟᱹ ᱵᱟᱠᱚ ᱛᱟᱦᱮᱸ ᱠᱟᱱᱟ, ᱚᱱᱟᱛᱮ ᱩᱱᱠᱤᱱ ᱫᱚ ᱟᱢᱵᱤᱠᱟ ᱯᱨᱚᱥᱟᱫᱽ ᱩᱯᱟᱫᱷᱭᱟᱭ ᱨᱮᱱ ᱦᱩᱰᱤᱧ ᱵᱚᱭᱦᱟ ᱥᱟᱨᱚᱫᱟ ᱯᱨᱚᱥᱟᱫᱽ ᱩᱯᱟᱫᱷᱭᱟᱭ ᱨᱮᱱ ᱦᱚᱯᱚᱱ ᱨᱟᱡᱮᱥᱣᱚᱨ ᱯᱨᱚᱥᱟᱫᱽ ᱫᱷᱚᱨᱚᱢᱯᱩᱛᱨᱚ (ᱢᱤᱫ ᱫᱷᱚᱨᱚᱢ ᱦᱚᱯᱚᱱ) ᱞᱮᱠᱟᱛᱮ ᱠᱤᱱ ᱟᱹᱜᱩ ᱠᱮᱫᱮᱭᱟ ᱾ ᱦᱤᱱᱫᱩ ᱫᱷᱚᱨᱚᱢ ᱨᱮᱱᱟᱜ ᱨᱤᱛᱤ ᱞᱮᱠᱟᱛᱮ ᱩᱱᱤ ᱫᱚ ᱠᱚ ᱟᱹᱜᱩ ᱞᱮᱫᱮᱭᱟ ᱾ ᱫᱮᱵᱤ ᱫᱚ ᱑᱕ ᱰᱤᱥᱮᱢᱵᱚᱨ ᱑᱙᱓᱖ (᱑ ᱯᱳᱣᱥ ᱑᱙᱙᱓ ᱵᱤ.ᱥ.) ᱨᱮ ᱯᱟᱴᱱᱟ ᱨᱮᱭ ᱜᱚᱡ ᱮᱱᱟ ᱾

ᱵᱟᱦᱨᱮ ᱡᱚᱱᱚᱲ

• "Ambalika Devi". Nai Prakashan (in ᱱᱮᱯᱟᱞᱤ). Archived from the original on 9 November 2011. Retrieved 25 October 2021.