ᱟᱣᱟᱱᱤ ᱪᱟᱛᱩᱨᱵᱮᱫᱤ

ᱥᱠᱩᱣᱟᱰᱨᱚᱱ ᱞᱤᱰᱟᱨ ᱟᱣᱟᱱᱤ ᱪᱟᱛᱩᱨᱵᱮᱫᱤ (ᱡᱟᱱᱟᱢ ᱒᱗ ᱚᱠᱴᱚᱵᱚᱨ ᱑᱙᱙᱓) ᱫᱚ ᱨᱮᱣᱟ ᱦᱚᱱᱚᱛ, ᱢᱚᱫᱷᱭᱚ ᱯᱨᱚᱫᱮᱥ ᱨᱤᱱᱤᱡ ᱢᱤᱫ ᱵᱷᱟᱨᱚᱛᱤᱭᱚ ᱯᱟᱭᱞᱚᱴ ᱠᱟᱱᱟᱭ᱾ ᱩᱱᱤ ᱫᱚ ᱵᱷᱟᱨᱚᱛ ᱨᱮ ᱯᱩᱭᱞᱩ ᱠᱩᱲᱤ ᱞᱟᱹᱲᱦᱟᱹᱭ ᱯᱟᱭᱞᱚᱴ ᱞᱮᱠᱟᱛᱮ ᱞᱟᱹᱭ ᱥᱚᱫᱚᱨ ᱦᱩᱭ ᱞᱮᱱᱟ ᱟᱡ ᱨᱤᱱ ᱵᱟᱨᱭᱟ ᱜᱟᱛᱮ ᱠᱚ ᱥᱟᱶ, ᱢᱚᱦᱟᱱᱟ ᱥᱤᱝ ᱡᱤᱛᱟᱨᱣᱟᱞ, ᱟᱨ ᱵᱷᱟᱣᱟᱱᱟ ᱠᱟᱱᱛᱷ᱾ ᱱᱩᱠᱩ ᱯᱮᱭᱟ ᱫᱚ ᱡᱩᱱ ᱒᱐᱑᱖ ᱨᱮ ᱵᱷᱟᱨᱚᱛᱤᱭᱚ ᱦᱚᱭ ᱯᱷᱟᱹᱫᱽ ᱞᱟᱹᱲᱦᱟᱹᱭ ᱥᱠᱩᱣᱟᱰᱨᱚᱱ ᱨᱮ ᱠᱚ ᱥᱮᱞᱮᱫ ᱮᱱᱟ᱾ ᱩᱱᱠᱩ ᱫᱚ ᱚᱱᱟ ᱚᱠᱛᱚ ᱨᱤᱱ ᱫᱩᱜ ᱫᱟᱨᱟᱢ ᱢᱚᱱᱛᱨᱤ ᱢᱚᱱᱚᱦᱚᱨ ᱯᱟᱨᱨᱤᱠᱟᱨ ᱦᱚᱛᱮᱛᱮ ᱑᱘ ᱡᱩᱱ ᱒᱐᱑᱖ ᱨᱮ ᱫᱤᱥᱚᱢ ᱥᱮᱵᱟ ᱞᱟᱹᱜᱤᱫ ᱚᱯᱷᱤᱥᱟᱨ ᱞᱮᱠᱟᱛᱮ ᱠᱚ ᱵᱟᱦᱟᱞ ᱠᱮᱫ ᱠᱚᱣᱟ᱾

(ᱮᱞ-ᱟᱨ) ᱢᱚᱦᱟᱱᱟ ᱥᱤᱝ ᱡᱤᱛᱟᱨᱣᱟᱞ, ᱟᱣᱟᱱᱤ ᱪᱟᱛᱩᱨᱵᱮᱫᱤ ᱟᱨ ᱵᱷᱟᱣᱟᱱᱟ ᱠᱟᱱᱛᱷ

ᱱᱚᱣᱟ ᱫᱚ ᱚᱠᱴᱚᱵᱚᱨ ᱒᱐᱑᱕ ᱨᱮ ᱛᱟᱦᱮᱸ ᱠᱟᱱᱟ ᱡᱚᱠᱷᱚᱱ ᱵᱷᱟᱨᱚᱛᱤᱭᱚ ᱥᱚᱨᱠᱟᱨ ᱫᱚ ᱛᱤᱨᱞᱟᱹ ᱠᱚ ᱞᱟᱹᱜᱤᱫ ᱞᱟᱹᱲᱦᱟᱹᱭ ᱫᱷᱟᱨᱟ ᱮ ᱡᱷᱤᱡ ᱠᱮᱫᱟ᱾

ᱪᱟᱛᱩᱨᱵᱮᱫᱤ ᱟᱜ ᱥᱟᱹᱠᱷᱭᱟᱹᱛ ᱫᱚ ᱵᱷᱟᱨᱚᱛ ᱫᱚ ᱱᱚᱝᱠᱟᱱ ᱫᱤᱥᱚᱢ ᱠᱚᱣᱟᱜ ᱞᱤᱥᱴᱤ ᱨᱮ ᱫᱚᱦᱚ ᱠᱮᱫᱮᱭᱟ, ᱡᱮᱞᱮᱠᱟ ᱵᱨᱤᱴᱮᱱ, ᱟᱢᱮᱨᱤᱠᱟ, ᱤᱥᱨᱟᱭᱮᱞ, ᱟᱨ ᱯᱟᱠᱤᱥᱛᱟᱱ, ᱡᱟᱦᱟᱸ ᱨᱮ ᱛᱤᱨᱞᱟᱹ ᱠᱚ ᱞᱟᱹᱲᱦᱟᱹᱭ ᱡᱮᱴ ᱠᱚ ᱩᱰᱟᱹᱣ ᱨᱮᱱᱟᱜ ᱟᱹᱭᱫᱟᱹᱨᱤ ᱢᱮᱱᱟᱜᱼᱟ᱾

ᱮᱛᱚᱦᱚᱵ ᱡᱤᱭᱚᱱ ᱟᱨ ᱥᱮᱪᱮᱫ

ᱟᱣᱟᱱᱤ ᱫᱚ ᱒᱗ ᱚᱠᱴᱚᱵᱚᱨ ᱑᱙᱙᱓ ᱨᱮ ᱡᱟᱱᱟᱢ ᱞᱮᱱᱟᱭ᱾ ᱟᱡᱤᱡ ᱵᱟᱵᱟ, ᱫᱤᱱᱠᱟᱨ ᱪᱟᱛᱩᱨᱵᱮᱫᱤ, ᱫᱚ ᱢᱚᱫᱷᱭᱚ ᱯᱨᱚᱫᱮᱥ ᱥᱚᱨᱠᱟᱨ ᱨᱮᱱᱟᱜ ᱫᱟᱜ ᱥᱟᱹᱥᱠᱨᱤᱛᱤ ᱵᱤᱵᱷᱟᱜᱽ ᱨᱮ ᱢᱤᱫ ᱥᱩᱯᱟᱨᱤᱱᱴᱮᱱᱰᱤᱝ ᱤᱧᱡᱤᱱᱤᱭᱟᱨ ᱠᱟᱱᱟᱭ ᱟᱨ ᱟᱡᱤᱡ ᱟᱭᱳ ᱫᱚ ᱢᱤᱫ ᱚᱲᱟᱜ ᱦᱚᱲ ᱠᱟᱱᱟᱭ᱾ ᱩᱱᱤ ᱫᱚ ᱟᱡᱟᱜ ᱟᱥᱲᱟ ᱫᱚ ᱢᱚᱫᱷᱭᱚ ᱯᱨᱚᱫᱮᱥ ᱨᱮᱱᱟᱜ ᱥᱟᱦᱰᱳᱞ ᱦᱚᱱᱚᱛ ᱨᱮᱱᱟᱜ ᱢᱤᱫ ᱦᱩᱰᱤᱧ ᱵᱟᱡᱟᱨ ᱰᱮᱣᱞᱳᱸᱰ ᱠᱷᱚᱱ ᱮ ᱯᱩᱨᱟᱹᱣ ᱠᱮᱫᱟ᱾ ᱒᱐᱑᱔ ᱨᱮ ᱵᱟᱱᱟᱥᱛᱷᱟᱞᱤ ᱡᱮᱜᱮᱛ ᱵᱤᱨᱫᱟᱹᱜᱟᱲ, ᱨᱟᱡᱚᱥᱛᱷᱟᱱ ᱠᱷᱚᱱ ᱴᱮᱠᱱᱚᱞᱚᱡᱤ ᱨᱮ ᱟᱡᱟᱜ ᱵᱮᱪᱞᱟᱨᱥ ᱯᱩᱨᱟᱹᱣ ᱠᱟᱛᱮ ᱚᱸᱰᱮ ᱩᱱᱤ ᱫᱚ ᱠᱚᱞᱮᱡᱽ ᱨᱮᱱᱟᱜ ᱩᱰᱟᱹᱣ ᱠᱞᱟᱵᱽ ᱨᱮᱭ ᱥᱮᱞᱮᱫ ᱮᱱᱟ ᱡᱟᱦᱟᱸ ᱫᱚ ᱩᱱᱤ ᱩᱰᱟᱹᱣ ᱞᱟᱹᱜᱤᱫ ᱮ ᱢᱚᱦᱤᱛ ᱠᱮᱫᱮᱭᱟ᱾ ᱩᱱᱤ ᱫᱚ ᱮ.ᱮᱯᱷ.ᱥᱤ.ᱮ.ᱴᱤ. ᱮ ᱯᱟᱥ ᱠᱮᱫᱟ ᱟᱨ ᱟᱹᱰᱤ ᱞᱟᱦᱟ ᱩᱱᱤ ᱫᱚ ᱮ.ᱮᱯᱷ.ᱮᱥ.ᱵᱤ. ᱦᱚᱛᱮᱛᱮ ᱨᱮᱠᱚᱢᱮᱱᱰ ᱦᱩᱭ ᱮᱱᱟ᱾

ᱪᱟᱛᱩᱨᱵᱮᱫᱤ ᱫᱚ ᱪᱮᱥ, ᱴᱮᱵᱤᱞ ᱴᱮᱱᱤᱥ ᱠᱷᱮᱞ ᱟᱨ ᱥᱠᱮᱪᱤᱝ ᱟᱨ ᱯᱮᱭᱱᱴᱤᱝ ᱦᱚᱸᱭ ᱠᱩᱥᱤᱭᱟᱜᱼᱟ᱾

ᱟᱣᱟᱱᱤ ᱨᱤᱱᱤᱡ ᱢᱟᱨᱟᱝ ᱵᱚᱭᱦᱟ, ᱡᱟᱦᱟᱸᱭ ᱫᱚ ᱵᱷᱟᱨᱚᱛᱤᱭᱚ ᱟᱨᱢᱤ ᱨᱮ ᱢᱤᱫ ᱚᱯᱷᱤᱥᱟᱨ ᱠᱟᱱᱟᱭ, ᱩᱱᱤ ᱫᱚ ᱵᱷᱟᱨᱚᱛᱤᱭᱚ ᱦᱚᱭ ᱯᱷᱟᱹᱫᱽ ᱨᱮ ᱥᱮᱞᱮᱫ ᱞᱟᱹᱜᱤᱫ ᱮ ᱩᱫᱽᱜᱟᱹᱣ ᱠᱮᱫᱮᱭᱟ᱾ ᱩᱱᱤ ᱫᱚ ᱟᱡᱟᱜ ᱠᱚᱞᱮᱡᱽ ᱵᱟᱱᱟᱥᱛᱷᱟᱞᱤ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮᱱᱟᱜ ᱩᱰᱟᱹᱣ ᱠᱞᱟᱵᱽ ᱨᱮ ᱩᱰᱟᱹᱣ ᱨᱮᱱᱟᱜ ᱠᱤᱪᱷᱩ ᱴᱟᱲᱟᱝ ᱨᱮᱱᱟᱜ ᱮᱠᱥᱯᱮᱨᱤᱭᱮᱱᱥ ᱦᱚᱸ ᱢᱮᱱᱟᱜ ᱛᱟᱭᱟ᱾

ᱠᱟᱹᱢᱤ

ᱩᱱᱤ ᱫᱚ ᱦᱚᱭ ᱯᱷᱟᱹᱫᱽ ᱮᱠᱟᱰᱮᱢᱤ ᱨᱮ ᱴᱨᱮᱱᱤᱝ ᱞᱟᱹᱜᱤᱫ ᱵᱟᱪᱷᱟᱣ ᱦᱩᱭ ᱞᱮᱱᱟ ᱟᱨ ᱒᱕ ᱥᱮᱨᱢᱟ ᱩᱢᱮᱨ ᱨᱮ ᱴᱨᱮᱱᱤᱝ ᱮ ᱯᱩᱨᱟᱹᱣ ᱠᱮᱫᱟ᱾ ᱟᱨᱦᱚᱸ ᱴᱨᱮᱱᱤᱝ ᱛᱟᱭᱚᱢ, ᱪᱟᱛᱩᱨᱵᱮᱫᱤ ᱫᱚ ᱡᱩᱱ ᱒᱐᱑᱖ ᱨᱮ ᱢᱤᱫ ᱞᱟᱹᱲᱦᱟᱹᱭ ᱯᱟᱭᱞᱚᱴ ᱮ ᱵᱮᱱᱟᱣ ᱮᱱᱟ᱾ ᱚᱯᱷᱤᱥ ᱵᱟᱦᱟᱞ ᱛᱟᱭᱚᱢ, ᱟᱡᱟᱜ ᱯᱩᱭᱞᱩ ᱯᱳᱥᱴᱤᱝ ᱮ.ᱮᱯᱷ.ᱮᱥ. ᱵᱤᱫᱟᱨ ᱨᱮ ᱛᱟᱦᱮᱸ ᱠᱟᱱᱟ ᱡᱟᱦᱟᱸ ᱨᱮ ᱩᱱᱤ ᱫᱚ ᱦᱚᱠ ᱮᱰᱵᱷᱟᱱᱥᱰ ᱡᱮᱴ ᱴᱨᱮᱱᱟᱨ ᱮ ᱩᱰᱟᱹᱣ ᱠᱮᱫᱟ᱾

᱒᱐᱑᱘ ᱨᱮ, ᱪᱟᱛᱩᱨᱵᱮᱫᱤ ᱫᱚ ᱢᱤᱜᱽ-᱒᱑ ᱨᱮ ᱮᱠᱞᱟ ᱩᱰᱟᱹᱣ ᱮᱫ ᱯᱩᱭᱞᱩ ᱵᱷᱟᱨᱚᱛᱤᱭᱚ ᱠᱩᱲᱤ ᱯᱟᱭᱞᱚᱴ ᱮ ᱵᱮᱱᱟᱣ ᱮᱱᱟ᱾ ᱒᱐᱑᱘ ᱨᱮ ᱟᱣᱟᱱᱤ ᱫᱚ ᱯᱷᱞᱟᱭᱤᱴ ᱞᱤᱰᱟᱨ ᱨᱮᱱᱟᱜ ᱨᱮᱝᱠ ᱨᱮ ᱯᱨᱚᱢᱳᱴ ᱦᱩᱭ ᱞᱮᱱᱟ᱾ ᱒᱐᱒᱓ ᱨᱮ, ᱩᱱᱤ ᱫᱚ ᱵᱟᱦᱨᱮ ᱫᱤᱥᱚᱢ ᱨᱮ ᱢᱤᱫ ᱟᱹᱭᱟᱨᱤᱭᱟᱹᱞ ᱣᱟᱨᱜᱮᱢ ᱨᱮ ᱦᱟᱹᱴᱤᱧ ᱮᱢᱟ ᱯᱩᱭᱞᱩ ᱵᱷᱟᱨᱚᱛᱤᱭᱚ ᱦᱚᱭ ᱯᱷᱟᱹᱫᱽ ᱨᱤᱱ ᱞᱟᱹᱲᱦᱟᱹᱭ ᱯᱟᱭᱞᱚᱴ ᱮ ᱵᱮᱱᱟᱣ ᱮᱱᱟ, ᱡᱟᱦᱟᱸ ᱫᱚ ᱩᱱᱤ ᱡᱟᱯᱟᱱ ᱨᱮᱭ ᱠᱚᱨᱟᱣ ᱠᱮᱫᱟ᱾

ᱪᱟᱛᱩᱨᱵᱮᱫᱤ ᱫᱚ ᱥᱩᱨᱚᱛᱜᱚᱲ, ᱨᱟᱡᱚᱥᱛᱷᱟᱱ ᱨᱮ ᱵᱷᱟᱨᱚᱛᱤᱭᱚ ᱦᱚᱭ ᱯᱷᱟᱹᱫᱽ ᱮᱞ ᱒᱓ ᱥᱠᱩᱣᱟᱰᱨᱚᱱ ᱯᱟᱱᱛᱷᱟᱨᱥ ᱨᱮ ᱯᱳᱥᱴ ᱢᱮᱱᱟᱭᱟ᱾

ᱥᱤᱨᱯᱷᱟᱹ ᱟᱨ ᱩᱯᱨᱩᱢ

᱒᱐᱑᱘ ᱨᱮ, ᱩᱱᱤ ᱫᱚ ᱵᱟᱱᱟᱥᱛᱷᱟᱞᱤ ᱵᱤᱫᱽᱭᱟᱯᱤᱴᱷ ᱠᱷᱚᱱ ᱰᱚᱠᱴᱚᱨᱮᱴ ᱰᱤᱜᱽᱨᱤ ᱛᱮ ᱢᱟᱱ ᱮᱢ ᱦᱩᱭ ᱞᱮᱱᱟ᱾

᱙ ᱢᱟᱨᱪ ᱒᱐᱒᱐ ᱨᱮ, ᱪᱟᱛᱩᱨᱵᱮᱫᱤ ᱫᱚ ᱫᱤᱥᱚᱢ ᱜᱚᱢᱠᱮ ᱨᱟᱢ ᱱᱟᱛᱷ ᱠᱳᱵᱤᱱᱫᱽ ᱦᱚᱛᱮᱛᱮ ᱱᱟᱨᱤ ᱥᱟᱠᱛᱤ ᱯᱩᱨᱚᱥᱠᱟᱨ ᱛᱮ ᱥᱤᱨᱯᱷᱟᱹ ᱮ ᱧᱟᱢ ᱠᱮᱫᱟ᱾

ᱟᱯᱱᱟᱨ ᱡᱤᱭᱚᱱ

ᱟᱣᱟᱱᱤ ᱪᱟᱛᱩᱨᱵᱮᱫᱤ ᱫᱚ ᱱᱚᱵᱷᱮᱢᱵᱚᱨ ᱒᱐᱑᱙ ᱨᱮ ᱯᱷᱞᱟᱭᱤᱴ ᱞᱤᱰᱟᱨ ᱵᱤᱱᱤᱛ ᱪᱤᱠᱟᱨᱟ ᱥᱟᱶ ᱮ ᱵᱟᱯᱞᱟ ᱮᱱᱟ᱾