ᱟᱵᱟᱜᱩᱥᱤ ᱦᱚᱲ
 | |
| ᱜᱩᱴ ᱦᱚᱲ ᱮᱞ | |
|---|---|
| ᱒,᱗᱐᱓,᱒᱓᱕ (᱒᱐᱑᱙ ᱞᱮᱠᱷᱟ ᱡᱚᱠᱷᱟ) | |
| ᱰᱷᱮᱨ ᱧᱚᱜ ᱦᱚᱲ ᱮᱞ ᱢᱮᱱᱟᱜ ᱠᱚ ᱴᱚᱴᱷᱟ | |
 Kenya | |
| ᱯᱟᱹᱨᱥᱤ ᱠᱚ | |
| ᱮᱠᱮᱜᱩᱥᱤ, ᱥᱳᱭᱟᱦᱤᱞᱤ ᱟᱨ ᱤᱝᱞᱤᱥ | |
| ᱫᱷᱚᱨᱚᱢ | |
| ᱤᱥᱟᱹᱭ ᱫᱷᱚᱨᱚᱢ, ᱦᱟᱯᱲᱟᱢ ᱯᱟᱹᱛᱭᱟᱹᱣ, ᱤᱥᱞᱟᱢ | |
| ᱥᱩᱯᱩᱨ ᱥᱟᱹᱜᱟᱹᱭᱟᱱ ᱡᱟᱹᱛ ᱠᱚ | |
| ᱟᱵᱟᱠᱩᱨᱤᱭᱟ, ᱟᱢᱮᱨᱩ, ᱮᱢᱵᱩ, ᱠᱤᱠᱩᱭᱩ, ᱢᱟᱥᱟᱭ, ᱢᱟᱨᱟᱜᱳᱞᱤ ᱟᱨ ᱮᱴᱟᱜ ᱠᱚ ᱾ |
ᱜᱩᱥᱤ ᱦᱚᱲ ᱥᱮ ᱟᱵᱟᱜᱩᱥᱤ (ᱥᱳᱭᱟᱦᱤᱞᱤ ᱛᱮ ᱫᱚ ᱠᱤᱥᱤ ᱢᱮᱱᱛᱮ ᱦᱚᱸ ᱠᱚ ᱵᱟᱰᱟᱭᱚᱜᱼᱟ) ᱫᱚ ᱢᱤᱫ ᱵᱟᱱᱴᱩ ᱯᱟᱹᱨᱥᱤ-ᱨᱚᱲ ᱡᱟᱹᱛᱤ ᱜᱟᱫᱮᱞ ᱠᱟᱱᱟ ᱠᱚ ᱾ ᱱᱩᱠᱩ ᱫᱚ ᱟᱥᱚᱠᱟᱭ ᱛᱮ ᱠᱮᱱᱭᱟ ᱨᱮᱭᱟᱜ ᱠᱤᱥᱤ ᱟᱨ ᱱᱭᱟᱢᱤᱨᱟ ᱠᱟᱣᱩᱱᱴᱤ ᱨᱮ ᱠᱚ ᱛᱟᱦᱮᱸᱱᱟ ᱾ ᱱᱚᱣᱟ ᱵᱮᱜᱚᱨ ᱦᱚᱸ ᱠᱮᱨᱤᱪᱳ ᱟᱨ ᱵᱳᱢᱮᱴ ᱠᱟᱣᱩᱱᱴᱤ ᱨᱮᱭᱟᱜ ᱠᱤᱪᱷᱩ ᱦᱤᱥ ᱨᱮᱦᱚᱸ ᱱᱩᱠᱩ ᱠᱚ ᱧᱟᱢᱚᱜᱼᱟ ᱾
ᱱᱩᱠᱩ ᱫᱚ ᱮᱠᱮᱜᱩᱥᱤ ᱛᱮ ᱠᱚ ᱨᱚᱲᱟ, ᱡᱟᱦᱟᱸ ᱫᱚ 'ᱜᱨᱮᱴ ᱞᱮᱠᱥ ᱵᱟᱱᱴᱩ' ᱯᱟᱹᱨᱥᱤ ᱜᱷᱟᱨᱚᱸᱡᱽ ᱨᱮ ᱞᱮᱠᱷᱟᱜ ᱠᱟᱱᱟ ᱾ ᱱᱟᱦᱟᱜ ᱯᱟᱲᱦᱟᱣ ᱠᱷᱚᱱ ᱵᱟᱰᱟᱭ ᱟᱠᱟᱱᱟ ᱡᱮ, ᱮᱠᱮᱜᱩᱥᱤ ᱯᱟᱹᱨᱥᱤ ᱫᱚ ᱮᱴᱟᱜ ᱵᱟᱱᱴᱩ ᱯᱟᱹᱨᱥᱤ ᱠᱚ ᱠᱷᱚᱱ ᱜᱚᱲᱦᱚᱱ ᱞᱮᱠᱟᱛᱮ ᱠᱤᱪᱷᱩ ᱵᱷᱮᱜᱟᱨ ᱜᱮᱭᱟ ᱾
ᱜᱩᱥᱤ ᱦᱚᱲ ᱫᱚ ᱟᱠᱚᱣᱟᱜ ᱥᱳᱯᱥᱴᱳᱱ ᱠᱷᱚᱫᱟ ᱠᱟᱹᱢᱤ ᱞᱟᱹᱜᱤᱫ ᱠᱚ ᱵᱟᱰᱟᱭᱚᱜᱼᱟ, ᱡᱟᱦᱟᱸ ᱫᱚ ᱩᱱᱠᱩᱣᱟᱜ ᱯᱟᱹᱨᱥᱤ ᱛᱮ 'ᱪᱤᱜᱽᱣᱟᱨᱮ' ᱠᱚ ᱢᱮᱛᱟᱜᱼᱟ ᱾
ᱧᱩᱛᱩᱢ ᱚᱢᱚᱱ (Etymology)
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]'ᱠᱤᱥᱤ' ᱟᱹᱲᱟᱹ ᱫᱚ ᱢᱤᱫ ᱵᱟᱦᱨᱮ ᱧᱩᱛᱩᱢ ᱠᱟᱱᱟ, ᱡᱟᱦᱟᱸ ᱫᱚ ᱥᱳᱭᱟᱦᱤᱞᱤ ᱯᱟᱹᱨᱥᱤ ᱠᱷᱚᱱ ᱦᱮᱡ ᱟᱠᱟᱱᱟ ᱟᱨ ᱵᱨᱤᱴᱤᱥ ᱩᱯᱚᱱᱤᱵᱮᱥ ᱥᱟᱥᱚᱱ ᱚᱠᱛᱚ ᱨᱮ ᱥᱚᱨᱠᱟᱨᱤ ᱵᱮᱵᱷᱟᱨ ᱞᱟᱹᱜᱤᱫ ᱠᱚ ᱦᱟᱛᱟᱣ ᱞᱮᱫᱟ ᱾ ᱥᱳᱭᱟᱦᱤᱞᱤ ᱯᱟᱹᱨᱥᱤ ᱛᱮ, ᱢᱤᱫ ᱦᱚᱲ ᱫᱚ 'ᱢᱠᱤᱥᱤ' , ᱦᱚᱲ ᱠᱚᱫᱚ 'ᱣᱟᱠᱤᱥᱤ' ᱟᱨ ᱩᱱᱠᱩᱣᱟᱜ ᱯᱟᱹᱨᱥᱤ ᱫᱚ 'ᱠᱤᱠᱤᱥᱤ' ᱠᱚ ᱢᱮᱛᱟᱜᱼᱟ ᱾ ᱡᱩᱫᱤ ᱦᱚᱸ ᱱᱚᱣᱟ ᱥᱟᱶᱛᱟ ᱨᱮᱱ ᱦᱚᱲ ᱫᱚ ᱟᱠᱚ ᱛᱮ 'ᱟᱵᱟᱜᱩᱥᱤ' ᱟᱨ ᱟᱠᱚᱣᱟᱜ ᱯᱟᱹᱨᱥᱤ ᱫᱚ 'ᱮᱠᱮᱜᱩᱥᱤ' ᱠᱚ ᱢᱮᱛᱟᱜᱼᱟ, ᱮᱱᱛᱮ ᱨᱮᱦᱚᱸ ᱠᱮᱱᱭᱟ ᱨᱮ ᱱᱩᱠᱩ ᱦᱚᱲ ᱟᱨ ᱩᱱᱠᱩᱣᱟᱜ ᱦᱚᱱᱚᱛ ᱩᱨᱩᱢ ᱞᱟᱹᱜᱤᱫ 'ᱠᱤᱥᱤ' ᱟᱹᱲᱟᱹ ᱜᱮ ᱡᱟᱹᱥᱛᱤ ᱵᱮᱵᱷᱟᱨᱚᱜ ᱠᱟᱱᱟ ᱾
ᱟᱵᱟᱜᱩᱥᱤ ᱦᱚᱲ ᱠᱚ ᱢᱩᱫᱽ ᱨᱮ, 'ᱠᱤᱥᱤ' ᱧᱩᱛᱩᱢ ᱫᱚ ᱦᱚᱲ ᱵᱟᱝ ᱵᱩᱡᱷᱟᱹᱣ ᱠᱟᱛᱮ ᱢᱤᱫᱴᱟᱹᱝ ᱥᱚᱦᱚᱨ—ᱠᱤᱥᱤ ᱵᱩᱡᱷᱟᱹᱣᱚᱜᱼᱟ, ᱡᱟᱦᱟᱸ ᱫᱚ ᱴᱚᱴᱷᱟ ᱨᱮᱱ ᱦᱚᱲ 'ᱵᱳᱥᱳᱱᱜᱳ' ᱥᱮ 'ᱜᱮᱴᱮᱢᱵᱮ' ᱦᱚᱸ ᱠᱚ ᱢᱮᱛᱟᱜᱼᱟ ᱾ ᱱᱚᱣᱟ ᱫᱚ ᱟᱵᱟᱜᱩᱥᱤ ᱦᱚᱲ ᱠᱚᱣᱟᱜ ᱢᱤᱫ ᱢᱟᱨᱟᱝ ᱱᱟᱜᱟᱨ ᱠᱟᱱᱟ ᱾ 'ᱵᱳᱥᱳᱱᱜᱳ' ᱧᱩᱛᱩᱢ ᱫᱚ 'ᱟᱵᱟᱥᱳᱱᱜᱳ' ᱠᱷᱚᱱ ᱦᱮᱡ ᱟᱠᱟᱱᱟ ᱢᱮᱱᱛᱮ ᱠᱚ ᱞᱟᱹᱭᱟ, ᱡᱟᱦᱟᱸ ᱨᱮᱭᱟᱜ ᱢᱮᱱᱮᱛ ᱫᱚ ᱦᱩᱭᱩᱜ ᱠᱟᱱᱟ "ᱯᱩᱸᱰ ᱦᱚᱲ" ᱥᱮ "ᱡᱟᱦᱟᱸ ᱨᱮ ᱯᱩᱸᱰ ᱦᱚᱲ ᱠᱚ ᱛᱟᱦᱮᱸ ᱞᱮᱱᱟ", ᱡᱟᱦᱟᱸ ᱫᱚ ᱩᱯᱚᱱᱤᱵᱮᱥ ᱚᱠᱛᱚ ᱨᱮ ᱚᱱᱟ ᱥᱚᱦᱚᱨ ᱨᱮ ᱛᱟᱦᱮᱸ ᱠᱟᱱ ᱤᱭᱩᱨᱳᱯᱤᱭᱟᱱ ᱦᱚᱲ ᱠᱚ ᱵᱩᱡᱷᱟᱹᱣ ᱠᱚᱣᱟ ᱾
ᱵᱨᱤᱴᱤᱥ ᱠᱚ ᱟᱵᱟᱜᱩᱥᱤ ᱦᱚᱲ ᱠᱚ ᱞᱟᱹᱜᱤᱫ ᱮᱴᱟᱜ ᱧᱩᱛᱩᱢ 'ᱠᱳᱥᱳᱵᱷᱟ' ᱠᱚ ᱵᱮᱵᱷᱟᱨ ᱮᱫ ᱛᱟᱦᱮᱸᱫ, ᱡᱟᱦᱟᱸ ᱫᱚ ᱮᱠᱮᱜᱩᱥᱤ ᱟᱹᱲᱟᱹ "ᱤᱱᱠᱟ ᱥᱳᱵᱳ" ᱠᱷᱚᱱ ᱦᱮᱡ ᱟᱠᱟᱱᱟ, ᱡᱟᱦᱟᱸ ᱨᱮᱭᱟᱜ ᱢᱮᱱᱮᱛ ᱫᱚ ᱦᱩᱭᱩᱜ ᱠᱟᱱᱟ "ᱩᱱᱠᱩᱣᱟᱜ ᱚᱲᱟᱜ" ᱾ ᱱᱚᱣᱟ ᱨᱮᱭᱟᱜ ᱟᱨ ᱢᱤᱫᱴᱟᱹᱝ ᱚᱢᱚᱱ ᱫᱚ ᱦᱩᱭ ᱫᱟᱲᱮᱭᱟᱜᱼᱟ ᱠᱤᱯᱥᱤᱜᱤᱥ ᱦᱚᱲ ᱠᱚ ᱟᱵᱟᱜᱩᱥᱤ ᱦᱚᱲ ᱠᱚ "ᱜᱳᱥᱳᱵᱮ" ᱢᱮᱱᱛᱮ ᱠᱚ ᱦᱚᱦᱚ ᱟᱠᱚ ᱠᱟᱱ ᱛᱟᱦᱮᱸᱫ ᱾ ᱟᱠᱚᱣᱟᱜ ᱱᱤᱡᱮᱨᱟᱜ ᱧᱩᱛᱩᱢ ᱫᱚ ᱦᱩᱭᱩᱜ ᱠᱟᱱᱟ 'ᱟᱵᱟᱜᱩᱥᱤ' (ᱜᱚᱴᱟ ᱞᱮᱠᱷᱟ) ᱟᱨ 'ᱳᱢᱳᱜᱩᱥᱤ' (ᱢᱤᱫ ᱞᱮᱠᱷᱟ); ᱩᱱᱠᱩᱣᱟᱜ ᱯᱟᱹᱨᱥᱤ ᱫᱚ 'ᱮᱠᱮᱜᱩᱥᱤ' ᱠᱟᱱᱟ ᱾ 'ᱜᱩᱥᱤ' ᱟᱹᱲᱟᱹ ᱫᱚ ᱥᱟᱶᱛᱟ ᱨᱮᱱ ᱵᱩᱱᱤᱭᱟᱹᱫᱤᱭᱟᱹ 'ᱢᱳᱜᱩᱥᱤ' ᱣᱟᱜ ᱧᱩᱛᱩᱢ ᱠᱷᱚᱱ ᱦᱮᱡ ᱟᱠᱟᱱᱟ ᱢᱮᱱᱛᱮ ᱢᱟᱱᱟᱣ ᱢᱮᱱᱟᱜᱼᱟ ᱾ 'ᱟᱵᱟᱜᱩᱥᱤ' ᱨᱮᱭᱟᱜ ᱢᱮᱱᱮᱛ ᱫᱚ ᱦᱩᱭᱩᱜ ᱠᱟᱱᱟ "ᱢᱳᱜᱩᱥᱤ ᱨᱮᱱ ᱦᱚᱲ" ᱾
ᱱᱟᱜᱟᱢ (History)
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
ᱚᱢᱚᱱ (Origins)
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱟᱵᱟᱜᱩᱥᱤ ᱦᱚᱲ ᱫᱚ ᱮᱠᱮᱜᱩᱥᱤ ᱛᱮ ᱠᱚ ᱨᱚᱲᱟ, ᱡᱟᱦᱟᱸ ᱫᱚ ᱢᱤᱫ ᱜᱨᱮᱴ ᱞᱮᱠᱥ ᱵᱟᱱᱴᱩ ᱯᱟᱹᱨᱥᱤ ᱠᱟᱱᱟ ᱾ ᱠᱮᱱᱭᱟ ᱨᱮ ᱵᱟᱱᱴᱩ ᱯᱟᱹᱨᱥᱤ ᱜᱷᱟᱨᱚᱸᱡᱽ ᱫᱚ ᱡᱚᱛᱚ ᱠᱷᱚᱱ ᱢᱟᱨᱟᱝ ᱜᱷᱟᱨᱚᱸᱡᱽ ᱠᱟᱱᱟ ᱾ ᱜᱩᱥᱤ ᱯᱟᱹᱨᱥᱤ ᱫᱚ ᱠᱮᱱᱭᱟ ᱨᱮᱭᱟᱜ ᱯᱟᱪᱮ ᱵᱟᱱᱴᱩ ᱯᱟᱹᱨᱥᱤ ᱨᱮᱭᱟᱜ ᱢᱤᱫ ᱵᱷᱮᱜᱟᱨ ᱪᱟᱸᱜᱟ ᱠᱟᱱᱟ, ᱟᱨ ᱱᱚᱣᱟ ᱨᱚᱲ-ᱦᱚᱲ ᱫᱚ ᱟᱥᱚᱠᱟᱭ ᱛᱮ ᱥᱟᱢᱟᱝ ᱩᱜᱟᱱᱰᱟ ᱥᱮᱫ ᱠᱷᱚᱱ ᱠᱚ ᱦᱮᱡ ᱟᱠᱟᱱᱟ ᱾ ᱮᱴᱟᱜ ᱯᱟᱹᱱᱰᱤᱛ ᱠᱚᱣᱟᱜ ᱢᱮᱱ ᱞᱮᱠᱟᱛᱮ, ᱜᱩᱥᱤ ᱦᱚᱲ ᱫᱚ ᱛᱟᱱᱡᱟᱱᱤᱭᱟ ᱨᱮᱭᱟᱜ ᱢᱟᱨᱟ ᱴᱚᱴᱷᱟ ᱥᱮᱫ ᱠᱷᱚᱱ ᱠᱚ ᱦᱮᱡ ᱟᱠᱟᱱᱟ ᱾
ᱵᱟᱱᱴᱩ ᱯᱟᱹᱨᱥᱤ ᱫᱚ ᱮᱛᱚᱦᱚᱵ ᱨᱮ ᱱᱟᱭᱡᱮᱨᱤᱭᱟ ᱟᱨ ᱠᱮᱢᱮᱨᱩᱱ ᱥᱤᱢᱟᱹ ᱴᱚᱴᱷᱟ ᱠᱷᱚᱱ ᱚᱢᱚᱱ ᱟᱠᱟᱱᱟ ᱢᱮᱱᱛᱮ ᱠᱚ ᱢᱟᱱᱟᱣᱟ ᱾ ᱵᱟᱱᱴᱩ ᱯᱟᱥᱱᱟᱣ ᱫᱚ ᱥᱩᱢᱩᱝ ᱯᱟᱹᱨᱥᱤ ᱥᱮ ᱟᱹᱨᱤᱪᱟᱹᱞᱤ ᱯᱟᱥᱱᱟᱣ ᱫᱚ ᱵᱟᱝ ᱠᱟᱱᱟ, ᱵᱚᱨᱚᱢ ᱱᱚᱣᱟ ᱫᱚ ᱦᱚᱲ ᱠᱚᱣᱟᱜ ᱢᱤᱫ ᱢᱟᱨᱟᱝ ᱩᱪᱟᱹᱲ ᱠᱟᱱᱟ ᱾ ᱱᱩᱠᱩ ᱫᱚ ᱟᱯᱷᱨᱤᱠᱟ ᱨᱮᱭᱟᱜ ᱮᱛᱚᱢ ᱟᱨ ᱥᱟᱢᱟᱝ ᱥᱮᱫ ᱠᱚ ᱩᱪᱟᱹᱲ ᱞᱮᱱᱟ, ᱢᱮᱱᱠᱷᱟᱱ ᱚᱱᱟ ᱴᱚᱴᱷᱟ ᱨᱮ ᱢᱟᱨᱮ ᱠᱷᱚᱱ ᱛᱟᱦᱮᱸ ᱠᱟᱱ ᱦᱚᱲ ᱠᱚᱫᱚ ᱵᱟᱠᱚ ᱪᱟᱵᱟ ᱞᱮᱫ ᱠᱚᱣᱟ, ᱵᱚᱨᱚᱢ ᱩᱱᱠᱩ ᱥᱟᱶ ᱠᱚ ᱢᱮᱥᱟ ᱞᱮᱱᱟ ᱾
ᱮᱱᱛᱮ ᱨᱮᱦᱚᱸ, ᱟᱵᱟᱜᱩᱥᱤ ᱦᱚᱲ ᱠᱚᱣᱟᱜ ᱟᱠᱚᱣᱟᱜ ᱢᱤᱫ ᱢᱚᱪᱟ-ᱱᱟᱜᱟᱢ ᱢᱮᱱᱟᱜᱼᱟ, ᱡᱟᱦᱟᱸ ᱫᱚ "ᱢᱤᱥᱨᱤ" ᱚᱢᱚᱱ ᱠᱚ ᱢᱮᱛᱟᱜᱼᱟ ᱾ ᱱᱚᱣᱟ ᱞᱮᱠᱟᱛᱮ ᱩᱱᱠᱩ ᱫᱚ ᱢᱤᱥᱚᱨ (Egypt) ᱠᱷᱚᱱ ᱠᱚ ᱦᱮᱡ ᱟᱠᱟᱱᱟ ᱢᱮᱱᱛᱮ ᱠᱚ ᱞᱟᱹᱭᱟ ᱾ ᱱᱚᱣᱟ ᱱᱟᱜᱟᱢ ᱞᱮᱠᱟᱛᱮ ᱜᱩᱥᱤ ᱡᱟᱹᱛᱤ ᱨᱮᱭᱟᱜ ᱛᱩᱨᱩᱭ ᱜᱚᱴᱟᱝ ᱢᱟᱨᱟᱝ ᱜᱷᱟᱨᱚᱸᱡᱽ ᱢᱮᱱᱟᱜᱼᱟ: ᱟᱵᱟᱜᱮᱛᱩᱛᱩ, ᱟᱵᱟᱱᱭᱟᱨᱤᱵᱟᱨᱤ, ᱟᱵᱟᱜᱤᱨᱟᱱᱜᱳ, ᱟᱵᱟᱱᱪᱟᱨᱤ, ᱟᱵᱟᱢᱟᱪᱳᱜᱮ, ᱟᱨ ᱟᱵᱟᱵᱟᱥᱤ ᱾ ᱱᱟᱜᱟᱢᱤᱭᱟᱹ ᱠᱚᱣᱟᱜ ᱢᱮᱱ ᱞᱮᱠᱟᱛᱮ ᱱᱚᱣᱟ "ᱢᱤᱥᱨᱤ" ᱠᱟᱹᱦᱱᱤ ᱫᱚ ᱠᱟᱞᱮᱱᱡᱤᱱ ᱜᱟᱫᱮᱞ, ᱟᱥᱚᱠᱟᱭ ᱛᱮ ᱠᱤᱯᱥᱤᱜᱤᱥ ᱠᱚ ᱥᱟᱶ ᱜᱟᱹᱦᱤᱨ ᱥᱟᱹᱜᱟᱹᱭ ᱠᱷᱟᱹᱛᱤᱨ ᱦᱮᱡ ᱟᱠᱟᱱᱟ, ᱡᱟᱦᱟᱸᱭ ᱫᱚ ᱱᱚᱣᱟ ᱠᱟᱹᱦᱱᱤ ᱜᱩᱥᱤ ᱱᱟᱜᱟᱢ ᱥᱟᱶ ᱠᱚ ᱢᱮᱥᱟ ᱞᱮᱫᱟ ᱾
ᱟᱹᱨᱤᱪᱟᱹᱞᱤ (Culture)
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
ᱦᱟᱨᱟ-ᱵᱩᱨᱩ ᱟᱹᱨᱤ (Coming-of-age rituals)
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱟᱵᱟᱜᱩᱥᱤ ᱦᱚᱲ ᱠᱚ ᱢᱩᱫᱽ ᱨᱮ, ᱠᱚᱲᱟ ᱜᱤᱫᱽᱨᱟᱹ ᱠᱚ ᱑᱐ ᱥᱮᱨᱢᱟ ᱩᱢᱮᱨ ᱨᱮ ᱵᱤᱱᱟᱹᱨᱟᱱ ᱛᱮ ᱥᱩᱱᱱᱚᱛ ᱵᱮᱱᱟᱣ ᱫᱚ ᱢᱤᱫ ᱟᱹᱰᱤ ᱢᱟᱨᱟᱝ ᱟᱹᱨᱤᱪᱟᱹᱞᱤ ᱠᱟᱱᱟ ᱾[᱑] ᱟᱹᱨᱤᱪᱟᱹᱞᱤ ᱞᱮᱠᱟᱛᱮ, ᱟᱵᱟᱜᱩᱥᱤ ᱦᱚᱲ ᱫᱚ ᱚᱱᱠᱟᱱ ᱡᱟᱹᱛᱤ ᱠᱚ ᱥᱟᱶ ᱵᱟᱯᱞᱟ ᱥᱟᱹᱜᱟᱹᱭ ᱵᱟᱠᱚ ᱡᱚᱲᱟᱣ ᱮᱫ ᱛᱟᱦᱮᱸᱫ ᱡᱟᱦᱟᱸᱭ ᱴᱷᱮᱱ ᱥᱩᱱᱱᱚᱛ ᱟᱹᱨᱤ ᱵᱟᱹᱱᱩᱜᱼᱟ, ᱮᱱᱛᱮ ᱨᱮᱦᱚᱸ ᱱᱚᱣᱟ ᱟᱹᱨᱤ ᱫᱚ ᱱᱟᱦᱟᱜ ᱯᱤᱲᱦᱤ ᱨᱮ ᱠᱤᱪᱷᱩ ᱠᱚᱢ ᱟᱠᱟᱱᱟ ᱾[᱒]
ᱱᱚᱣᱟ ᱟᱹᱨᱤ ᱫᱚ ᱥᱮᱨᱢᱟ ᱜᱮ ᱱᱚᱵᱷᱮᱢᱵᱚᱨ ᱟᱨ ᱰᱤᱥᱮᱢᱵᱚᱨ ᱪᱟᱸᱫᱚ ᱨᱮ ᱦᱩᱭᱩᱜᱼᱟ, ᱡᱟᱦᱟᱸ ᱛᱟᱭᱚᱢ ᱠᱚᱲᱟ ᱜᱤᱫᱽᱨᱟᱹ ᱠᱚᱫᱚ ᱠᱤᱪᱷᱩ ᱫᱤᱱ ᱞᱟᱹᱜᱤᱫ ᱵᱷᱮᱜᱟᱨ ᱛᱮ ᱠᱚ ᱫᱚᱦᱚ ᱠᱚᱣᱟ ᱾ ᱚᱱᱟ ᱚᱠᱛᱚ ᱨᱮ ᱥᱮᱬᱟ ᱠᱚᱲᱟ ᱠᱚ ᱩᱱᱠᱩ ᱫᱚ ᱟᱭᱢᱟ ᱞᱮᱠᱟᱱ ᱠᱟᱹᱢᱤ ᱠᱚ ᱥᱮᱪᱮᱫ ᱠᱚᱣᱟ ᱾ ᱱᱚᱣᱟ ᱚᱠᱛᱚ ᱨᱮ ᱥᱩᱢᱩᱝ ᱥᱮᱬᱟ ᱥᱩᱱᱱᱚᱛ ᱟᱠᱟᱱ ᱠᱚᱲᱟ ᱠᱚ ᱜᱮ ᱩᱱᱠᱩ ᱥᱟᱶ ᱧᱟᱯᱟᱢ ᱨᱮᱭᱟᱜ ᱪᱷᱩᱴ ᱢᱮᱱᱟᱜ ᱛᱟᱠᱚᱣᱟ ᱾ ᱮᱴᱟᱜ ᱡᱟᱦᱟᱸᱭ ᱜᱮ ᱩᱱᱠᱩ ᱥᱟᱶ ᱧᱟᱯᱟᱢ ᱫᱚ ᱵᱟᱹᱲᱤᱡ ᱢᱮᱱᱛᱮ ᱠᱚ ᱢᱟᱱᱟᱣᱟ ᱾
ᱱᱚᱣᱟ ᱵᱷᱮᱜᱟᱨ ᱛᱮ ᱛᱟᱦᱮᱸᱱ ᱚᱠᱛᱚ ᱨᱮ, ᱡᱚᱣᱟᱱ ᱠᱚᱲᱟ ᱠᱚ ᱥᱟᱶᱛᱟ ᱨᱮ ᱟᱠᱚᱣᱟᱜ ᱮᱱᱮᱢ, ᱟᱨ ᱢᱤᱫ ᱥᱩᱱᱱᱚᱛ ᱟᱠᱟᱱ ᱦᱚᱲᱟᱜ ᱵᱮᱵᱷᱟᱨ ᱟᱹᱨᱤ ᱠᱚ ᱥᱮᱪᱮᱫ ᱠᱚᱣᱟ ᱾ ᱩᱱᱠᱩ ᱫᱚ ᱞᱟᱡᱽ ᱥᱚᱨᱚᱢ ᱨᱮᱭᱟᱜ ᱟᱹᱨᱤ ᱟᱨ ᱢᱟᱱᱚᱛ ᱮᱢᱚᱜ ᱨᱮᱭᱟᱜ ᱟᱹᱨᱤ ᱦᱚᱸ ᱠᱚ ᱥᱮᱪᱮᱫ ᱠᱚᱣᱟ ᱾[᱑][᱒] ᱱᱚᱣᱟ ᱫᱚ ᱜᱷᱟᱨᱚᱸᱡᱽ ᱟᱨ ᱜᱚᱴᱟ ᱥᱟᱶᱛᱟ ᱞᱟᱹᱜᱤᱫ ᱢᱤᱫ ᱨᱟᱹᱥᱠᱟᱹ ᱨᱮᱭᱟᱜ ᱚᱠᱛᱚ ᱠᱟᱱᱟ ᱾ ᱜᱷᱟᱨᱚᱸᱡᱽ ᱨᱮᱱ ᱯᱮᱲᱟ, ᱜᱟᱛᱮ ᱟᱨ ᱯᱟᱲᱟ-ᱯᱚᱲᱥᱤ ᱠᱚ ᱱᱚᱣᱟ ᱨᱟᱹᱥᱠᱟᱹ ᱨᱮ ᱥᱮᱞᱮᱫᱚᱜ ᱞᱟᱹᱜᱤᱫ ᱞᱟᱦᱟ ᱨᱮᱜᱮ ᱠᱚ ᱱᱮᱣᱛᱟ ᱠᱚᱣᱟ ᱾
ᱮᱱᱮᱡ-ᱥᱮᱨᱮᱧ (Music)
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
ᱟᱵᱟᱜᱩᱥᱤ ᱦᱚᱲ ᱫᱚ ᱟᱹᱨᱤᱪᱟᱹᱞᱤ ᱞᱮᱠᱟᱛᱮ ᱤᱨᱟᱹᱞ ᱜᱚᱴᱟᱝ ᱛᱟᱨ ᱟᱱᱟᱜ ᱢᱤᱫ ᱢᱟᱨᱟᱝ ᱵᱮᱥ ᱞᱟᱭᱟᱨ ᱠᱚ ᱨᱩᱭᱟ, ᱡᱟᱦᱟᱸ ᱫᱚ 'ᱳᱵᱳᱠᱟᱱᱳ' ᱠᱚ ᱢᱮᱛᱟᱜᱼᱟ ᱾ ᱱᱚᱣᱟ ᱫᱚ ᱠᱮᱱᱭᱟ ᱨᱮᱭᱟᱜ ᱡᱚᱛᱚ ᱠᱷᱚᱱ ᱢᱟᱨᱟᱝ ᱞᱟᱭᱟᱨ ᱠᱟᱱᱟ ᱟᱨ ᱱᱚᱣᱟ ᱨᱮᱭᱟᱜ ᱩᱥᱩᱞ ᱫᱚ ᱛᱩᱨᱩᱭ ᱯᱷᱩᱴ ᱦᱟᱹᱵᱤᱡ ᱦᱩᱭ ᱫᱟᱲᱮᱭᱟᱜᱼᱟ ᱾ ᱱᱚᱣᱟ ᱫᱚ ᱥᱮᱨᱮᱧ ᱟᱨ ᱮᱱᱮᱡ ᱥᱟᱶᱛᱮ ᱠᱚ ᱨᱩᱭᱟ, ᱪᱮᱫᱟᱜ ᱥᱮ ᱜᱩᱥᱤ ᱥᱮᱨᱮᱧ ᱫᱚ ᱟᱥᱚᱠᱟᱭ ᱛᱮ ᱨᱚᱲ-ᱥᱮᱨᱮᱧ ᱜᱮ ᱛᱟᱦᱮᱸᱱᱟ ᱾ ᱡᱚᱠᱷᱚᱱ ᱱᱚᱣᱟ ᱮᱠᱞᱟ ᱛᱮ ᱠᱚ ᱨᱩᱭᱟ, ᱩᱱ ᱡᱚᱠᱷᱚᱡ ᱫᱚ ᱥᱮᱨᱮᱧ ᱮᱛᱚᱦᱚᱵ ᱞᱟᱹᱜᱤᱫ ᱠᱚ ᱵᱮᱵᱷᱟᱨᱟ ᱾[᱓]
ᱱᱚᱣᱟ ᱵᱟᱡᱽᱱᱟ ᱫᱚ ᱟᱥᱚᱠᱟᱭ ᱛᱮ ᱜᱩᱥᱤ ᱥᱟᱶᱛᱟ ᱨᱮᱱ ᱠᱚᱲᱟ ᱠᱚ ᱞᱟᱹᱜᱤᱫ ᱜᱮ ᱨᱟᱠᱷᱟ ᱫᱚᱦᱚ ᱢᱮᱱᱟᱜᱼᱟ, ᱢᱮᱱᱠᱷᱟᱱ ᱥᱩᱱᱱᱚᱛ (circumcision) ᱟᱹᱨᱤ ᱚᱠᱛᱚ ᱨᱮ ᱠᱩᱲᱤ ᱦᱚᱯᱚᱱ ᱠᱚᱫᱚ 'ᱮᱠᱳᱱᱩ' ᱧᱩᱛᱩᱢᱟᱱ ᱛᱟᱢᱟᱠ ᱟᱨ ᱡᱷᱩᱱᱠᱟᱹ ᱠᱚ ᱨᱩ ᱫᱟᱲᱮᱭᱟᱜᱼᱟ ᱾ ᱮᱴᱟᱜ ᱟᱹᱨᱤᱪᱟᱹᱞᱤ ᱵᱟᱡᱽᱱᱟ ᱠᱚ ᱢᱩᱫᱽ ᱨᱮ ᱛᱤᱨᱭᱳ ᱦᱚᱸ ᱢᱮᱱᱟᱜᱼᱟ ᱾
ᱦᱩᱱᱟᱹᱨ (Art)
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱟᱵᱟᱜᱩᱥᱤ ᱦᱚᱲ ᱫᱚ ᱫᱩᱱᱤᱭᱟᱹ ᱡᱟᱠᱟᱛ ᱨᱮ ᱧᱩᱛᱩᱢᱟᱱ ᱥᱳᱯᱥᱴᱳᱱ ᱠᱷᱚᱫᱟ ᱠᱟᱹᱢᱤ ᱞᱟᱹᱜᱤᱫ ᱠᱚ ᱵᱟᱰᱟᱭᱚᱜᱼᱟ, ᱡᱟᱦᱟᱸ ᱫᱚ ᱩᱱᱠᱩᱣᱟᱜ ᱯᱟᱹᱨᱥᱤ ᱛᱮ "ᱪᱤᱜᱽᱣᱟᱨᱮ" ᱠᱚ ᱢᱮᱛᱟᱜᱼᱟ ᱾ ᱱᱚᱣᱟ ᱠᱟᱹᱢᱤ ᱫᱚ ᱟᱥᱚᱠᱟᱭ ᱛᱮ ᱠᱤᱥᱤ ᱠᱟᱣᱩᱱᱴᱤ ᱨᱮᱭᱟᱜ ᱮᱛᱚᱢ ᱦᱤᱥ, ᱛᱟᱵᱟᱠᱟ ᱥᱚᱦᱚᱨ ᱟᱨᱮ ᱯᱟᱥᱮ ᱡᱟᱹᱥᱛᱤ ᱧᱮᱞᱚᱜᱼᱟ ᱾[᱑]
ᱫᱷᱚᱨᱚᱢ (Religion)
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱟᱯᱷᱨᱤᱠᱟ ᱨᱮ ᱤᱥᱟᱹᱭ ᱟᱨ ᱤᱥᱞᱟᱢ ᱫᱷᱚᱨᱚᱢ ᱦᱮᱡ ᱞᱟᱦᱟ ᱨᱮ, ᱟᱵᱟᱜᱩᱥᱤ ᱦᱚᱲ ᱫᱚ ᱢᱤᱫ ᱵᱚᱝᱜᱟ ᱯᱟᱹᱛᱤᱭᱟᱹᱣ ᱠᱚ ᱛᱟᱦᱮᱸ ᱠᱟᱱᱟ ᱾ ᱩᱱᱠᱩ ᱫᱚ ᱢᱤᱫ ᱡᱚᱛᱚ ᱠᱷᱚᱱ ᱢᱟᱨᱟᱝ ᱵᱚᱝᱜᱟ ᱠᱚ ᱢᱟᱱᱟᱣᱮ ᱛᱟᱦᱮᱸᱫ, ᱡᱟᱦᱟᱸᱭᱟᱜ ᱧᱩᱛᱩᱢ ᱫᱚ "ᱮᱱᱜᱳᱨᱳ" ᱠᱟᱱᱟ ᱾ ᱱᱩᱭ ᱤᱥᱥᱚᱨ ᱫᱚ ᱟᱵᱟᱜᱩᱥᱤ ᱠᱚ ᱢᱩᱫᱽ ᱨᱮ "ᱱᱭᱟᱥᱟᱭ" ᱢᱮᱱᱛᱮ ᱦᱚᱸ ᱠᱚ ᱢᱮᱛᱟᱭᱟ, ᱡᱟᱦᱟᱸ ᱫᱚ ᱫᱷᱳᱞᱩᱣᱳ ᱯᱟᱹᱨᱥᱤ ᱠᱷᱚᱱ ᱦᱮᱡ ᱟᱠᱟᱱ ᱢᱤᱫ ᱟᱹᱲᱟᱹ ᱠᱟᱱᱟ ᱾ ᱟᱵᱟᱜᱩᱥᱤ ᱠᱚᱣᱟᱜ ᱯᱟᱹᱛᱭᱟᱹᱣ ᱢᱮᱱᱟᱜᱼᱟ ᱡᱮ ᱮᱱᱜᱳᱨᱳ ᱜᱮ ᱱᱚᱣᱟ ᱫᱷᱟᱹᱨᱛᱤ ᱫᱚᱭ ᱥᱤᱨᱡᱟᱹᱣ ᱟᱠᱟᱫᱟ ᱟᱨ ᱩᱱᱤ ᱜᱮ ᱡᱚᱛᱚ ᱡᱤᱣᱤ ᱨᱮᱱ ᱡᱷᱟᱨᱱᱟ ᱠᱟᱱᱟᱭ ᱾ ᱜᱩᱥᱤ ᱫᱷᱚᱨᱚᱢ ᱨᱮ ᱵᱮᱲᱟ "ᱨᱤᱥᱟᱥᱮ" ᱟᱨ ᱤᱯᱤᱞ ᱠᱚᱣᱟᱜ ᱟᱹᱰᱤ ᱢᱟᱨᱟᱝ ᱢᱟᱱᱚᱛ ᱢᱮᱱᱟᱜᱼᱟ ᱾ ᱜᱩᱨ, ᱨᱩᱣᱟᱹ-ᱦᱟᱥᱩ, ᱟᱨ ᱪᱟᱥ-ᱵᱟᱥ ᱥᱮ ᱜᱟᱹᱭ-ᱰᱟᱝᱜᱽᱨᱟ ᱠᱚᱣᱟᱜ ᱞᱚᱥᱚᱫᱚᱜ ᱫᱚ ᱵᱟᱹᱲᱤᱡ ᱟᱛᱢᱟ, ᱵᱟᱹᱲᱤᱡ ᱠᱚᱯᱟᱲ, ᱰᱟᱹᱱ-ᱡᱩᱜᱤᱱ ᱥᱮ ᱦᱟᱯᱲᱟᱢ ᱠᱚᱣᱟᱜ ᱚᱥᱟᱱᱛᱤ ᱠᱷᱟᱹᱛᱤᱨ ᱦᱩᱭᱩᱜ ᱠᱟᱱᱟ ᱢᱮᱱᱛᱮ ᱠᱚ ᱢᱟᱱᱟᱣᱟ ᱾[᱑] ᱟᱵᱟᱜᱩᱥᱤ ᱦᱚᱲ ᱫᱚ ᱨᱟᱱ-ᱢᱩᱨᱜᱟᱹᱱ ᱵᱟᱰᱟᱭ ᱦᱚᱲ ᱠᱚ ᱟᱹᱰᱤ ᱠᱚ ᱢᱟᱱᱟᱣ ᱠᱚᱣᱟ ᱟᱨ ᱦᱟᱯᱲᱟᱢ ᱠᱚᱣᱟᱜ ᱥᱮᱣᱟ-ᱫᱮᱣᱟ ᱠᱚ ᱠᱚᱨᱟᱣᱟ, ᱡᱟᱦᱟᱸᱭ ᱫᱚ ᱩᱱᱠᱩᱣᱟᱜ ᱯᱟᱹᱨᱥᱤ ᱛᱮ "ᱮᱵᱤᱨᱮᱪᱟ" ᱠᱚ ᱢᱮᱛᱟ ᱠᱚᱣᱟ ᱾
ᱱᱟᱦᱟᱜ ᱚᱠᱛᱚ ᱨᱮ, ᱡᱟᱹᱥᱛᱤ ᱜᱟᱱ ᱟᱵᱟᱜᱩᱥᱤ ᱦᱚᱲ ᱜᱮ ᱤᱥᱟᱹᱭ ᱫᱷᱚᱨᱚᱢ ᱠᱚ ᱢᱟᱱᱟᱣᱮᱫᱟ ᱾ ᱱᱚᱣᱟ ᱨᱮᱭᱟᱜ ᱯᱩᱱᱭᱟᱹ ᱢᱟᱨᱟᱝ ᱦᱟᱹᱴᱤᱧ ᱫᱚ ᱦᱩᱭᱩᱜ ᱠᱟᱱᱟ: ᱠᱮᱛᱷᱚᱞᱤᱠ, ᱥᱮᱵᱷᱮᱱᱛᱷ-ᱰᱮ ᱮᱰᱵᱷᱮᱱᱴᱤᱥᱴ, ᱥᱣᱤᱰᱤᱥ ᱞᱩᱛᱷᱮᱨᱟᱱ, ᱟᱨ ᱯᱮᱱᱴᱮᱠᱳᱥᱴᱟᱞ ᱟᱥᱮᱢᱵᱞᱤᱡᱽ ᱚᱯᱷ ᱜᱚᱰ ᱾ ᱟᱹᱰᱤ ᱠᱚᱢ ᱜᱟᱱ ᱟᱵᱟᱜᱩᱥᱤ ᱦᱚᱲ ᱱᱤᱛᱚᱜ ᱦᱚᱸ ᱟᱠᱚᱣᱟᱜ ᱦᱟᱯᱲᱟᱢ ᱫᱷᱚᱨᱚᱢ ᱠᱚ ᱢᱟᱱᱟᱣᱮᱫᱟ, ᱟᱨ ᱠᱤᱪᱷᱩ ᱫᱚ ᱦᱟᱯᱲᱟᱢ ᱫᱷᱚᱨᱚᱢ ᱟᱨ ᱤᱥᱟᱹᱭ ᱫᱷᱚᱨᱚᱢ ᱢᱮᱥᱟ ᱠᱟᱛᱮ ᱠᱚ ᱢᱟᱱᱟᱣᱟ ᱾ ᱟᱭᱢᱟ ᱦᱚᱲ ᱱᱤᱛᱚᱜ ᱦᱚᱸ ᱢᱤᱫ ᱫᱷᱚᱨᱚᱢ-ᱜᱩᱨᱩ "ᱳᱢᱳᱨᱟᱜᱳᱨᱤ" ᱴᱷᱮᱱ ᱠᱚ ᱥᱮᱱᱚᱜᱼᱟ, ᱡᱟᱦᱟᱸᱭ ᱫᱚ ᱚᱠᱚᱭ ᱦᱟᱯᱲᱟᱢ ᱟᱛᱢᱟ ᱠᱚ ᱚᱥᱟᱱᱛᱤ ᱟᱠᱟᱱᱟ ᱚᱱᱟᱭ ᱞᱟᱹᱭ ᱫᱟᱲᱮᱭᱟᱜᱼᱟ ᱟᱨ ᱩᱱᱠᱩ ᱥᱟᱱᱛᱤ ᱠᱚ ᱞᱟᱹᱜᱤᱫ ᱩᱯᱟᱹᱭ ᱮ ᱞᱟᱹᱭᱟ ᱾[᱑]
᱑᱙᱑᱖–᱑᱙᱓᱘ ᱥᱮᱨᱢᱟ ᱨᱮ ᱮᱴᱟᱜ ᱜᱩᱥᱤ ᱦᱚᱲ ᱠᱚ ᱥᱟᱶ ᱢᱤᱫ ᱤᱥᱟᱹᱭ ᱜᱩᱥᱤ ᱠᱚᱲᱟ
᱑᱙᱑᱖–᱑᱙᱓᱘ ᱥᱮᱨᱢᱟ ᱨᱮ ᱮᱰᱵᱷᱮᱱᱴᱤᱥᱴ ᱤᱛᱩᱱ ᱟᱥᱲᱟ ᱨᱮ ᱜᱩᱥᱤ ᱯᱟᱹᱴᱷᱩᱣᱟᱹ ᱠᱚ
