ᱠᱟᱞᱞᱟᱲᱟ ᱜᱟᱰᱟ

ᱠᱟᱞᱞᱟᱲᱟ ᱜᱟᱰᱟ/ᱠᱩᱞᱟᱛᱷᱩᱯᱩᱡᱷᱟ

ᱠᱟᱞᱞᱟᱲᱟ ᱜᱟᱰᱟ ᱫᱚ ᱥᱤᱧᱚᱛ, ᱠᱮᱨᱟᱞᱟ ᱨᱮᱭᱟᱜ ᱠᱚᱞᱞᱟᱢ ᱦᱚᱱᱚᱛ ᱨᱮᱱᱟᱜ ᱡᱚᱛᱚ ᱠᱷᱚᱱ ᱡᱤᱞᱤᱧ ᱜᱟᱰᱟ ᱠᱟᱱᱟ ᱾ ᱱᱚᱶᱟ ᱜᱟᱰᱟ ᱫᱚ ᱯᱟᱪᱮ ᱜᱷᱟᱴ ᱨᱮᱱᱟᱜ ᱢᱟᱫᱟᱛᱷᱟᱨᱟ ᱠᱷᱚᱱ ᱚᱸᱰᱚᱠ ᱟᱠᱟᱱᱟ ᱟᱨ ᱯᱟᱪᱮ ᱥᱮᱫ ᱞᱤᱸᱜᱤ ᱠᱟᱛᱮ, 120 km (75 mi) ᱥᱟᱺᱜᱤᱧ ᱯᱟᱨᱚᱢ ᱛᱟᱭᱚᱢ ᱟᱨᱚᱵᱽ ᱫᱚᱨᱭᱟ ᱨᱮ ᱢᱮᱥᱟᱜ ᱠᱟᱱᱟ ᱾

ᱜᱟᱰᱟ ᱞᱤᱸᱜᱤᱱ ᱦᱚᱨ

ᱠᱟᱞᱞᱟᱲᱟ ᱫᱚ ᱠᱚᱞᱞᱟᱢ ᱦᱚᱱᱚᱛ ᱨᱮᱱᱟᱜ ᱮᱛᱚᱢ-ᱥᱟᱢᱟᱝ ᱥᱮᱦᱮᱫ ᱨᱮᱭᱟᱜ ᱥᱮᱱᱫᱩᱨᱱᱤ ᱵᱤᱨ ᱡᱤᱭᱟᱹᱞᱤ ᱨᱟᱠᱷᱟᱵᱟᱱ ᱠᱷᱚᱱ ᱟᱭᱢᱟ ᱜᱟᱰᱟ ᱱᱟᱞᱟ ᱞᱮᱠᱟᱛᱮ ᱚᱸᱰᱚᱠ ᱟᱠᱟᱱᱟ ᱾ ᱱᱚᱶᱟ ᱱᱟᱞᱟ ᱠᱚ ᱢᱩᱫᱽ ᱨᱮ ᱡᱚᱛᱚ ᱠᱷᱚᱱ ᱢᱩᱬᱩᱛᱟᱜ ᱫᱚ ᱦᱩᱭᱩᱜ ᱠᱟᱱᱟ ᱠᱟᱡᱷᱩᱛᱷᱩᱨᱩᱛᱤᱭᱟᱨᱩ, ᱡᱟᱦᱟᱸ ᱫᱚ ᱨᱳᱡᱽᱢᱟᱞᱟ ᱟᱨ ᱟᱢᱵᱟᱱᱟᱰ ᱵᱩᱨᱩ ᱠᱷᱚᱱ ᱚᱸᱰᱚᱠ ᱠᱟᱛᱮ ᱮᱛᱚᱢ ᱥᱮᱫ ᱞᱤᱸᱜᱤᱱ ᱠᱟᱱᱟ, ᱠᱩᱞᱟᱛᱷᱩᱯᱩᱡᱷᱟ ᱜᱟᱰᱟ ᱡᱟᱦᱟᱸ ᱫᱚ ᱯᱳᱱᱢᱩᱰᱤ ᱵᱩᱨᱩ ᱥᱩᱨ ᱠᱷᱚᱱ ᱟᱨ ᱚᱜᱚᱥᱛᱤᱭᱟᱢᱟᱞᱟ ᱵᱟᱭᱳᱥᱯᱷᱤᱭᱚᱨ ᱨᱤᱡᱟᱨᱵᱽ ᱨᱮᱱᱟᱜ ᱦᱚᱭ ᱥᱮᱫ ᱠᱷᱚᱱ ᱠᱚᱧᱮ ᱥᱮᱫ ᱞᱤᱸᱜᱤᱱ ᱠᱟᱱᱟ, ᱟᱨ ᱯᱟᱪᱮ ᱥᱮᱫ ᱞᱤᱸᱜᱤᱱ ᱠᱟᱱ ᱱᱟᱞᱟ ᱠᱚ ᱡᱟᱦᱟᱸ ᱫᱚ ᱠᱳᱨᱴᱟᱞᱞᱟᱢ ᱵᱩᱨᱩ ᱨᱮᱱᱟᱜ ᱦᱚᱭ ᱥᱮᱫ ᱠᱷᱚᱱ ᱚᱸᱰᱚᱠ ᱟᱠᱟᱱᱟ ᱾ ᱜᱟᱰᱟ ᱛᱮᱭᱟᱨᱮᱫ ᱱᱚᱶᱟ ᱢᱩᱬᱩᱛ ᱱᱟᱞᱟ ᱠᱚ ᱫᱚ ᱛᱷᱮᱱᱢᱟᱞᱟ ᱰᱮᱢ ᱨᱮ ᱧᱟᱯᱟᱢᱚᱜᱼᱟ ᱾

ᱱᱚᱣᱟ ᱜᱟᱰᱟ ᱫᱚ ᱠᱩᱞᱟᱛᱷᱩᱯᱩᱡᱷᱟ, ᱛᱷᱮᱱᱢᱟᱞᱟ, ᱳᱴᱴᱟᱠᱠᱟᱞ, ᱟᱭᱤᱨᱟᱱᱟᱞᱞᱩᱨ, ᱮᱰᱟᱢᱳᱱ, ᱯᱩᱱᱟᱞᱩᱨ, ᱱᱮᱰᱩᱢᱠᱟᱭᱟᱢ, ᱠᱟᱢᱩᱠᱩᱢᱪᱮᱨᱤ ᱟᱨ ᱯᱟᱛᱷᱟᱱᱟᱯᱩᱨᱟᱢ ᱥᱚᱦᱚᱨ ᱥᱮᱫ ᱛᱮ ᱞᱤᱸᱜᱤᱱᱟ ᱾ ᱚᱱᱟ ᱛᱟᱭᱚᱢ ᱱᱚᱶᱟ ᱫᱚ ᱥᱚᱢᱟᱱ ᱴᱚᱴᱷᱟ ᱨᱮ ᱵᱚᱞᱚᱱᱟ, ᱡᱟᱦᱟᱸ ᱨᱮ ᱱᱚᱶᱟ ᱫᱚ ᱯᱟᱴᱴᱟᱡᱷᱤ, ᱮᱱᱟᱛᱷᱩ, ᱢᱟᱱᱱᱟᱰᱤ, ᱠᱩᱱᱱᱟᱛᱷᱩᱨ, ᱤᱵᱷᱮᱨᱠᱟᱞᱟ ᱯᱩᱛᱷᱩᱨ, ᱯᱟᱵᱷᱤᱛᱷᱨᱮᱥᱣᱟᱨᱟᱢ, ᱥᱟᱢᱟᱝ ᱠᱟᱞᱞᱟᱰᱟ, ᱢᱩᱱᱨᱳ ᱫᱤᱯ ᱟᱨ ᱯᱟᱪᱮ ᱠᱟᱞᱞᱟᱰᱟ ᱟᱲᱮ ᱛᱮ ᱞᱤᱸᱜᱤᱱᱟ ᱾ ᱱᱚᱶᱟ ᱜᱟᱰᱟ ᱨᱮᱱᱟᱜ ᱢᱚᱪᱟ ᱫᱚ ᱯᱟᱪᱮ ᱠᱟᱞᱞᱟᱰᱟ ᱥᱩᱨ ᱨᱮ ᱢᱮᱱᱟᱜᱼᱟ, ᱡᱟᱦᱟᱸ ᱨᱮ ᱱᱚᱶᱟ ᱫᱚ ᱚᱥᱴᱟᱢᱩᱰᱤ ᱞᱮᱠ (ᱫᱚᱨᱭᱟ) ᱟᱨ ᱚᱸᱰᱮ ᱠᱷᱚᱱ ᱟᱨᱚᱵᱽ ᱫᱚᱨᱭᱟ ᱨᱮ ᱢᱮᱥᱟᱜᱼᱟ ᱾

ᱯᱩᱱᱟᱞᱩᱨ ᱨᱮ, ᱑᱘᱗᱗ ᱥᱟᱞᱮ ᱨᱮ ᱛᱨᱟᱵᱷᱟᱱᱠᱳᱨ ᱨᱟᱡᱚᱥᱴᱷᱤ ᱦᱚᱛᱮᱛᱮ ᱵᱨᱤᱴᱤᱥ ᱰᱷᱟᱸᱪᱟ ᱛᱮ ᱱᱚᱶᱟ ᱜᱟᱰᱟ ᱪᱮᱛᱟᱱ ᱨᱮ ᱯᱩᱱᱟᱞᱩᱨ ᱥᱟᱥᱯᱮᱱᱥᱚᱱ ᱵᱨᱤᱡᱽ ᱵᱮᱱᱟᱣ ᱞᱮᱱᱟ ᱾ ᱠᱟᱞᱞᱟᱰᱟ ᱞᱟᱹᱣᱠᱟᱹ ᱦᱮᱯᱨᱟᱣ (ᱠᱟᱞᱞᱟᱰᱟ ᱡᱚᱞᱳᱛᱥᱚᱵᱚᱢ) ᱫᱚ ᱯᱚᱱᱚᱛ ᱨᱮ ᱥᱟᱯᱲᱟᱣᱜ ᱠᱟᱱ ᱡᱚᱛᱚ ᱠᱷᱚᱱ ᱧᱩᱛᱩᱢᱟᱱ ᱞᱟᱹᱣᱠᱟᱹ ᱦᱮᱯᱨᱟᱣ ᱠᱷᱚᱱ ᱢᱤᱫᱴᱟᱹᱝ ᱠᱟᱱᱟ ᱾ ᱱᱚᱶᱟ ᱞᱟᱹᱣᱠᱟᱹ ᱦᱮᱯᱨᱟᱣ ᱫᱚ ᱢᱤᱫ ᱥᱮᱨᱢᱟᱠᱤᱭᱟᱹ ᱟᱠᱷᱲᱟ ᱠᱟᱱᱟ, ᱡᱟᱦᱟᱸ ᱫᱚ ᱳᱱᱟᱢ ᱨᱮᱱᱟᱜ ᱒᱘ ᱟᱱᱟᱜ ᱢᱟᱦᱟᱸ ᱨᱮ ᱦᱩᱭᱩᱜᱼᱟ ᱾ ᱱᱚᱶᱟ ᱫᱚ ᱜᱟᱰᱟ ᱞᱤᱸᱜᱤᱱ ᱦᱚᱨ ᱨᱮᱱᱟᱜ "ᱢᱩᱛᱷᱤᱨᱟ ᱯᱟᱨᱟᱢᱵᱩ - ᱠᱟᱨᱩᱵᱷᱟᱛᱷᱨᱟ ᱠᱟᱰᱟᱵᱷᱩ" ᱨᱮ ᱥᱟᱯᱲᱟᱣᱜᱼᱟ ᱾ ᱥᱟᱥᱛᱷᱟᱢᱠᱳᱴᱴᱟ ᱞᱮᱠ ᱫᱚ ᱠᱮᱨᱟᱞᱟ ᱨᱮᱱᱟᱜ ᱡᱚᱛᱚ ᱠᱷᱚᱱ ᱢᱟᱨᱟᱝ ᱯᱷᱨᱮᱥ ᱫᱟᱜ (ᱦᱮᱲᱮᱢ ᱫᱟᱜ) ᱞᱮᱠ ᱠᱟᱱᱟ ᱟᱨ ᱠᱚᱞᱞᱟᱢ ᱦᱚᱱᱚᱛ ᱨᱮᱱᱟᱜ ᱵᱟᱹᱲᱛᱤ ᱜᱟᱱ ᱴᱚᱴᱷᱟ ᱞᱟᱹᱜᱤᱫ ᱧᱩ ᱫᱟᱜ ᱮ ᱮᱢᱚᱜᱼᱟ ᱾ ᱠᱟᱞᱞᱟᱰᱟ ᱜᱟᱰᱟ ᱨᱮᱱᱟᱜ ᱜᱤᱛᱤᱞ ᱴᱟᱺᱰᱤ ᱥᱤᱢᱟᱹ ᱨᱮ, ᱮᱛᱚᱢ ᱯᱟᱦᱴᱟ ᱨᱮ ᱦᱩᱲᱩ ᱠᱷᱮᱛ ᱠᱷᱚᱱ ᱞᱮᱠ ᱵᱷᱮᱜᱟᱨᱮᱫ 1.5 km (0.93 mi) ᱡᱤᱞᱤᱧ ᱢᱤᱫᱴᱟᱝ ᱦᱟᱥᱟ ᱨᱮᱱᱟᱜ ᱵᱟᱸᱫᱷ ᱵᱟᱹᱜᱤ ᱠᱟᱛᱮ, ᱞᱮᱠ ᱨᱮᱱᱟᱜ ᱮᱴᱟᱜ ᱡᱚᱛᱚ ᱯᱟᱦᱴᱟ ᱜᱮ ᱠᱷᱟᱲᱟ ᱵᱩᱨᱩ ᱛᱮ ᱮᱥᱮᱫ ᱟᱠᱟᱱᱟ ᱾

ᱜᱟᱰᱟ ᱟᱲᱮ ᱨᱮᱱᱟᱜ ᱠᱟᱹᱨᱠᱷᱟᱱᱟ ᱠᱚ

ᱵᱨᱤᱴᱤᱥ ᱚᱠᱛᱚ ᱨᱮ ᱠᱟᱞᱞᱟᱲᱟ ᱜᱟᱰᱟ ᱟᱲᱮ ᱨᱮ ᱟᱭᱢᱟ ᱠᱟᱹᱨᱠᱷᱟᱱᱟ ᱠᱚ ᱵᱮᱨᱮᱫ ᱞᱮᱱᱟ᱾ ᱑᱘᱗᱕ ᱥᱟᱞᱮ ᱨᱮ ᱵᱮᱱᱟᱣ ᱟᱠᱟᱱ, ᱯᱩᱱᱟᱞᱩᱨ ᱯᱮᱯᱟᱨ ᱢᱤᱞᱥ ᱫᱚ ᱚᱱᱠᱟᱱ ᱢᱤᱫ ᱢᱟᱨᱟᱝ ᱠᱚᱢᱯᱟᱹᱱᱤ ᱠᱟᱱᱟ ᱾ ᱑᱙᱐᱐ ᱥᱮᱨᱢᱟ ᱨᱮᱱᱟᱜ ᱛᱟᱞᱟ ᱥᱮᱫ, ᱢᱤᱞ ᱠᱷᱚᱱ ᱜᱟᱰᱟ ᱨᱮ ᱟᱲᱟᱜᱚᱜ ᱠᱟᱱ ᱢᱟᱹᱭᱞᱟᱹ ᱫᱟᱜ ᱠᱷᱟᱹᱛᱤᱨ ᱯᱷᱤᱡᱤᱭᱳᱠᱮᱢᱤᱠᱟᱞ ᱜᱩᱱ ᱠᱚ ᱵᱚᱫᱚᱞ ᱞᱮᱱᱟ ᱢᱮᱱᱛᱮ ᱵᱟᱰᱟᱭ ᱧᱟᱢ ᱞᱮᱱᱟ, ᱡᱟᱦᱟᱸ ᱠᱷᱟᱹᱛᱤᱨ ᱯᱞᱟᱝᱴᱚᱱ ᱨᱮᱱᱟᱜ ᱯᱨᱚᱰᱚᱠᱥᱚᱱ ᱦᱩᱭ ᱞᱮᱱᱟ ᱾ ᱱᱚᱶᱟ ᱢᱤᱞ ᱨᱮ ᱠᱟᱹᱢᱤᱭᱟᱹ ᱠᱚᱣᱟᱜ ᱮᱴᱠᱮᱴᱚᱬᱮ ᱦᱩᱭ ᱞᱮᱱᱟ, ᱟᱨ ᱑᱙᱘᱗ ᱥᱟᱞᱮ ᱨᱮ ᱵᱚᱸᱫᱽ ᱞᱮᱱᱟ ᱾ ᱟᱹᱱᱟᱹᱨᱤ ᱞᱮᱠᱟᱛᱮ ᱥᱚᱞᱦᱮ ᱛᱟᱭᱚᱢ, ᱒᱐᱑᱕ ᱥᱟᱞᱮ ᱨᱮ ᱱᱚᱶᱟ ᱫᱚ ᱟᱨᱦᱚᱸ ᱡᱷᱤᱡ ᱨᱩᱣᱟᱹᱲ ᱮᱱᱟ ᱾

ᱜᱟᱰᱟ ᱟᱲᱮ ᱨᱮ ᱜᱤᱛᱤᱞ ᱞᱟ ᱫᱚ ᱢᱤᱫ ᱪᱤᱱᱛᱟᱹ ᱨᱮᱱᱟᱜ ᱥᱟᱛᱟᱢ ᱠᱟᱱᱟ, ᱪᱮᱫᱟᱜ ᱥᱮ ᱱᱚᱣᱟ ᱠᱷᱟᱹᱛᱤᱨ ᱦᱟᱥᱟ ᱫᱷᱟᱥᱟᱣᱜ ᱟᱨ ᱰᱩᱵᱟᱹ ᱨᱮᱱᱟᱜ ᱵᱚᱛᱚᱨ ᱵᱟᱹᱲᱛᱤᱜᱼᱟ ᱾

ᱠᱟᱞᱞᱟᱲᱟ ᱫᱟᱜ ᱯᱟᱴᱟᱣ ᱯᱨᱚᱡᱮᱠᱴ

ᱠᱟᱞᱞᱟᱲᱟ ᱫᱟᱜ ᱯᱟᱴᱟᱣ ᱯᱨᱚᱡᱮᱠᱴ (KIP) ᱫᱚ ᱠᱮᱨᱟᱞᱟ ᱨᱮᱱᱟᱜ ᱡᱚᱛᱚ ᱠᱷᱚᱱ ᱢᱟᱨᱟᱝ ᱫᱟᱜ ᱯᱟᱴᱟᱣ ᱯᱨᱚᱡᱮᱠᱴ ᱠᱟᱱᱟ ᱾ ᱱᱚᱣᱟ ᱯᱨᱚᱡᱮᱠᱴ ᱨᱮᱱᱟᱜ ᱠᱚᱢᱟᱱᱰ ᱮᱨᱤᱭᱟ (ᱴᱚᱴᱷᱟ) ᱫᱚ ᱠᱚᱞᱞᱟᱢ, ᱯᱟᱴᱷᱟᱱᱟᱢᱛᱷᱤᱴᱴᱟ ᱦᱚᱱᱚᱛ ᱟᱨ ᱟᱞᱟᱯᱯᱩᱡᱷᱟ ᱦᱚᱱᱚᱛ ᱨᱮ ᱯᱟᱥᱱᱟᱣ ᱟᱠᱟᱱᱟ ᱟᱨ ᱱᱚᱶᱟ ᱨᱮ ᱯᱩᱱᱟᱞᱩᱨ, ᱯᱟᱛᱷᱟᱱᱟᱯᱩᱨᱟᱢ, ᱠᱚᱴᱴᱟᱨᱟᱠᱠᱟᱨᱟ, ᱠᱚᱞᱞᱟᱢ, ᱠᱩᱱᱱᱟᱛᱷᱩᱨ, ᱠᱟᱨᱩᱱᱟᱜᱟᱯᱯᱟᱞᱞᱤ, ᱟᱰᱩᱨ, ᱢᱟᱵᱷᱮᱞᱤᱠᱠᱟᱨᱟ ᱟᱨ ᱠᱟᱨᱛᱷᱤᱠᱟᱯᱯᱟᱞᱞᱤ ᱛᱟᱞᱩᱠ ᱠᱚ ᱥᱮᱞᱮᱫ ᱟᱠᱟᱱᱟ ᱾

ᱱᱚᱶᱟ ᱯᱨᱚᱡᱮᱠᱴ ᱫᱚ 61,630 ha (152,300 acres) ᱪᱟᱥ ᱠᱟᱹᱢᱤ ᱴᱚᱴᱷᱟ ᱨᱮ ᱫᱟᱜ ᱯᱟᱴᱟᱣ ᱞᱟᱹᱜᱤᱫ ᱯᱞᱟᱱ ᱞᱮᱱᱟ ᱾ ᱠᱟᱹᱢᱤ ᱦᱚᱨᱟ ᱪᱟᱞᱟᱜ ᱚᱠᱛᱚ ᱨᱮ, ᱠᱟᱭᱟᱢᱠᱩᱞᱟᱢ ᱪᱟᱸᱜᱟ ᱠᱮᱱᱟᱞ ᱥᱟᱶᱛᱮ ᱟᱫᱚᱢ ᱠᱮᱱᱟᱞ ᱠᱚ ᱫᱚ ᱵᱟᱹᱜᱤᱭᱟᱫᱼᱟ, ᱟᱨ ᱱᱤᱛᱚᱜ ᱱᱚᱶᱟ ᱯᱨᱚᱡᱮᱠᱴ ᱠᱷᱚᱱ ᱙᱒ ᱜᱚᱴᱟᱝ ᱟᱹᱛᱩ ᱨᱮᱱᱟᱜ ᱥᱩᱢᱩᱝ 53,514 ha (132,240 acres) ᱪᱟᱥ ᱴᱚᱴᱷᱟ ᱞᱟᱵᱷ ᱮ ᱧᱟᱢᱮᱫᱼᱟ ᱾ ᱢᱩᱬᱩᱛ ᱠᱟᱹᱢᱤ ᱫᱚ ᱑᱙᱘᱖ ᱥᱟᱞᱮ ᱨᱮ ᱯᱩᱨᱟᱹᱣ ᱞᱮᱱᱟ ᱾ ᱱᱤᱛᱚᱜ ᱱᱚᱶᱟ ᱫᱚ ᱯᱩᱨᱟᱹᱯᱩᱨᱤ ᱪᱟᱹᱞᱩ ᱟᱠᱟᱱᱟ, ᱡᱚᱡᱚᱢ ᱟᱲᱮ ᱢᱩᱬᱩᱛ ᱠᱮᱱᱟᱞ ᱫᱚ ᱑᱙᱘᱖ ᱥᱟᱞᱮ ᱨᱮ ᱟᱫᱷᱟ ᱪᱟᱹᱞᱩ ᱞᱮᱱᱟ ᱟᱨ ᱞᱮᱸᱜᱟ ᱟᱲᱮ ᱢᱩᱬᱩᱛ ᱠᱮᱱᱟᱞ ᱫᱚ ᱑᱙᱙᱒ ᱥᱟᱞᱮ ᱨᱮ ᱪᱟᱹᱞᱩ ᱞᱮᱱᱟ ᱾

ᱞᱮᱸᱜᱟ ᱟᱲᱮ ᱢᱩᱬᱩᱛ ᱠᱮᱱᱟᱞ ᱨᱮᱱᱟᱜ ᱡᱤᱞᱤᱧ ᱫᱚ 56.016 km (34.807 mi) ᱟᱨ ᱡᱚᱡᱚᱢ ᱟᱲᱮ ᱢᱩᱬᱩᱛ ᱠᱮᱱᱟᱞ ᱨᱮᱱᱟᱜ ᱡᱤᱞᱤᱧ ᱫᱚ 69.752 km (43.342 mi) ᱠᱟᱱᱟ ᱾ ᱞᱮᱸᱜᱟ ᱟᱲᱮ ᱠᱮᱱᱟᱞ ᱨᱮᱱᱟᱜ ᱪᱟᱸᱜᱟ ᱠᱮᱱᱟᱞ ᱫᱚ 61.692 km (38.334 mi) ᱡᱤᱞᱤᱧᱟ ᱟᱨ ᱡᱚᱡᱚᱢ ᱪᱟᱸᱜᱟ ᱠᱮᱱᱟᱞ ᱨᱮᱱᱟᱜ ᱫᱚ 47.573 km (29.560 mi) ᱡᱤᱞᱤᱧᱟ ᱾ ᱠᱮᱱᱟᱞ ᱠᱚ ᱫᱚ ᱛᱷᱮᱱᱢᱟᱞᱟ ᱥᱩᱨ ᱨᱮ ᱢᱮᱱᱟᱜ ᱳᱴᱴᱟᱠᱠᱟᱞ ᱞᱩᱠᱟᱣᱩᱴ ᱠᱷᱚᱱ ᱮᱦᱚᱵ ᱟᱠᱟᱱᱟ ᱾

ᱵᱟᱦᱨᱮ ᱡᱚᱱᱚᱲ ᱠᱚ

• ᱠᱟᱞᱞᱟᱰᱟ ᱨᱮ ᱜᱤᱛᱤᱞ ᱠᱷᱟᱹᱛᱤᱨ ᱦᱩᱭᱩᱜ ᱠᱟᱱ ᱠᱷᱚᱛᱤ ᱤᱫᱤ ᱠᱟᱛᱮ ᱫᱤ ᱦᱤᱱᱫᱩ ᱨᱮᱱᱟᱜ ᱠᱷᱚᱵᱚᱨ