ᱢᱟ.ᱡᱷᱤ ᱵᱟᱪᱷᱚᱱ

ᱣᱤᱠᱤᱯᱤᱰᱤᱭᱟ ᱠᱷᱚᱱ
Jump to navigation Jump to search

ᱤᱧ ᱢᱟ.ᱡᱷᱤ ᱵᱟᱪᱷᱚᱱ

ᱟ.ᱛᱩ ᱨᱤᱱᱤᱡ ᱦᱚᱲ ᱮ ᱦᱩᱭ ᱠᱚᱜ ᱢᱟ ᱾ ᱟᱪᱟᱨ ᱵᱤᱪᱟ.ᱨ ᱠᱟᱛᱷᱟ ᱠᱚᱭ ᱵᱟᱰᱟᱭ ᱠᱟᱜ ᱢᱟ ᱫᱤᱥᱚᱢ ᱨᱤᱱ ᱯᱮᱲᱟ ᱠᱚ ᱫᱟᱨᱟᱢ ᱫᱟᱜ ᱫᱩᱲᱩᱵ ᱛᱤᱸᱜᱩᱱ ᱴᱷᱟᱶ ᱚᱲᱟᱜ ᱠᱚ ᱛᱟᱦᱮᱸ ᱠᱚᱜ ᱛᱟᱭ ᱢᱟ ᱾ ᱫᱟᱜ ᱫᱟᱠᱟ ᱯᱮᱲᱟ ᱵᱮᱵᱷᱟᱨ ᱠᱩᱲᱟ.ᱭ ᱛᱟᱦᱮᱸᱱ ᱢᱟ ᱾ ᱱᱮᱛᱟᱨ ᱫᱚ ᱡᱩᱜᱽ ᱵᱚᱫᱚᱞ ᱮᱱᱟ ᱦᱚᱲ ᱵᱚ ᱟ.ᱨᱩ ᱪᱮᱸᱜᱷᱟ ᱮᱱᱟ ᱾ ᱚᱱᱟᱛᱮ ᱮᱴᱟᱜ ᱯᱟ.ᱨᱤᱥ ᱦᱚᱲ ᱦᱚᱸ ᱢᱟ.ᱡᱷᱤ ᱞᱮᱠᱟ ᱠᱚ ᱵᱟᱪᱷᱚᱱ ᱚᱜ ᱠᱟᱱᱟ ᱾

ᱜᱩᱱ ᱢᱟᱱᱟᱣ ᱟᱨ ᱠᱟ.ᱢᱤᱦᱚᱨᱟ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱢᱟ.ᱡᱷᱤ ᱫᱚ ᱟ.ᱛᱩ ᱨᱤᱱᱤᱡ ᱢᱟᱨᱟᱝ ᱜᱚᱢᱠᱮ ᱠᱟᱱᱟᱭ ᱾ ᱟᱨ ᱦᱚᱸ ᱢᱩᱛᱩᱞ ᱠᱷᱩᱱᱴᱤ ᱥᱮ ᱨᱟᱡᱟ ᱵᱟᱵᱟ ᱞᱮᱠᱟ ᱦᱚᱸ ᱱᱩᱭ ᱵᱟᱝ ᱠᱷᱟᱱ ᱟ.ᱛᱩᱨᱮ ᱪᱮᱫ ᱠᱟ.ᱢᱤ ᱦᱚᱸ ᱵᱟᱝ ᱦᱩᱭᱩᱜᱼᱟ ᱾ ᱱᱩᱭᱟᱜ ᱟᱸᱫᱮ ᱛᱮᱜᱮ ᱟ.ᱛᱩᱨᱮ ᱵᱚᱸᱜᱟ ᱵᱳᱨᱳ, ᱟᱪᱟᱨ ᱵᱤᱪᱟ.ᱨ, ᱪᱷᱩᱛ ᱪᱷᱟ.ᱴᱭᱟ.ᱨ, ᱵᱟᱯᱞᱟ ᱵᱮᱦᱟ, ᱜᱩᱡᱩᱜ ᱵᱩᱨᱩᱜ, ᱵᱷᱟᱸᱰᱟᱱ ᱠᱩᱸᱰᱟ.ᱱ, ᱥᱮᱸᱫᱽᱨᱟ ᱠᱟᱨᱠᱟ, ᱯᱟᱨᱟᱵᱽ ᱯᱩᱱᱟ.ᱭ, ᱱᱮᱭᱟᱣ ᱱᱤᱯᱥᱟ. ᱨᱮ, ᱥᱚᱞᱦᱮ ᱥᱚᱡᱷᱮ ᱨᱮ, ᱫᱩᱠ ᱢᱩᱦᱤᱢ ᱨᱮ, ᱚᱛ ᱦᱟᱥᱟ ᱦᱟᱯᱟᱴᱤᱧ ᱨᱮ, ᱜᱚᱡ ᱜᱚᱯᱚᱡ ᱨᱮ, ᱟᱡᱟᱜ ᱥᱮᱞᱮᱫ ᱛᱟᱦᱮᱸ ᱞᱮᱱ ᱮᱱᱟᱝ ᱠᱟ.ᱢᱤ ᱥᱩᱥᱟ.ᱨ ᱞᱟᱦᱟᱱᱛᱤᱜᱼᱟ ᱾ ᱟᱡᱟᱜ ᱠᱟ.ᱢᱤ ᱫᱚ ᱢᱚᱬᱮ ᱦᱚᱲ ᱧᱩᱛᱩᱢ ᱛᱮᱜᱮ ᱪᱟᱞᱟᱜᱼᱟ ᱟᱨ ᱧᱩᱛᱩᱢᱚᱜᱼᱟ ᱾ ᱚᱱᱟᱛᱮ ᱠᱚ ᱢᱮᱱᱟ, "ᱟ.ᱛᱩ ᱨᱤᱱ ᱢᱟ.ᱡᱷᱤ ᱢᱚᱬᱮ ᱦᱚᱲ ᱜᱮᱠᱚ ᱟ.ᱜᱛᱩᱣᱟ ᱟᱨ ᱟ.ᱛᱩ ᱨᱤᱱ ᱩᱱᱠᱩ ᱢᱟ.ᱡᱷᱤ ᱢᱚᱬᱮ ᱦᱚᱲ ᱜᱮ ᱥᱟᱶᱛᱟ ᱨᱮᱠᱚ ᱡᱟ.ᱛᱤ ᱛᱟᱜᱞᱟ ᱦᱟ ᱾

ᱠᱷᱮᱢᱛᱟ (Power)[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱟ.ᱛᱩ ᱨᱤᱱ ᱦᱚᱲ ᱠᱚ ᱡᱟᱦᱟᱸᱭ ᱜᱮ ᱢᱟ.ᱡᱷᱤᱭ ᱟᱸᱫᱮ ᱟᱭᱟ, ᱚᱱᱟ ᱵᱟᱛᱟᱣ ᱛᱮ ᱦᱩᱭ ᱟᱭᱟ ᱾ ᱢᱟ.ᱡᱷᱤ ᱫᱚ ᱵᱟᱠᱚ ᱚᱢᱟᱱᱛᱤ ᱠᱚᱣᱟ ᱾ ᱵᱟᱝᱠᱷᱟᱱ ᱚᱢᱟᱱᱛᱤ ᱞᱮᱠᱟᱛᱮ ᱰᱟᱸᱰᱚᱢ ᱢᱮᱱᱟᱜᱼᱟ ᱾ ᱡᱟᱦᱟᱸ ᱟ.ᱛᱩ ᱨᱤᱱ ᱫᱤᱥᱚᱢ ᱯᱮᱲᱟ ᱠᱚ ᱟᱡᱟᱜ ᱚᱲᱟᱜ ᱠᱚ ᱦᱮᱡ ᱢᱟᱬᱟᱝ ᱚᱜᱼᱟ ᱟᱨ ᱩᱱᱠᱩᱭ ᱧᱮᱞ ᱩᱨᱩᱢ ᱫᱟᱨᱟᱢ ᱠᱚᱣᱟ ᱾ ᱵᱩᱜᱤ ᱵᱟ.ᱲᱤᱡ ᱠᱚ ᱵᱟᱰᱟᱭ ᱫᱟᱲᱮᱭᱟᱜᱼᱟ ᱾ ᱟᱪᱟᱨ ᱵᱤᱪᱟ.ᱨ ᱮᱴᱟᱜ ᱟ.ᱛᱩ ᱢᱟ.ᱡᱷᱤ ᱥᱟᱶᱛᱮ ᱟ.ᱛᱩ ᱨᱤᱱ ᱧᱩᱛᱩᱢᱟᱱ ᱢᱚᱬᱮ ᱦᱚᱲ ᱠᱚ ᱥᱟᱶ ᱥᱟᱶᱛᱟ ᱨᱮ ᱥᱮᱞᱮᱫ ᱫᱟᱲᱮᱭᱟᱜᱼᱟ ᱾ ᱢᱟ.ᱡᱷᱤ ᱵᱟᱝ ᱮ ᱥᱮᱱ ᱫᱟᱲᱮᱭᱟᱜ ᱠᱷᱟᱱ ᱟ.ᱛᱩ ᱨᱤᱱᱤᱡ ᱢᱟ.ᱡᱷᱤ ᱢᱚᱬᱮ ᱦᱚᱲ ᱞᱮᱠᱟᱛᱮ ᱯᱟ.ᱨᱟ.ᱱᱤᱠ, ᱜᱳᱰᱮᱛ, ᱡᱚᱜᱽ ᱢᱟ.ᱡᱷᱤ ᱡᱟᱦᱟᱸᱭ ᱠᱚ ᱜᱮ ᱠᱚ ᱪᱟᱞᱟᱣ ᱫᱟᱲᱮᱭᱟᱜᱼᱟ ᱾ ᱟᱨ ᱢᱟ.ᱡᱷᱤ ᱞᱮᱠᱟᱛᱮ ᱢᱟ.ᱱ ᱠᱚ ᱧᱟᱢᱟ ᱾ ᱟ.ᱛᱩ ᱨᱮᱭᱟᱜ ᱵᱩᱜᱤ ᱵᱟ.ᱲᱤᱡ, ᱥᱮᱪᱮᱫ ᱯᱟᱦᱴᱟ, ᱩᱛᱱᱟ.ᱣ ᱞᱟᱦᱟᱱᱛᱤ ᱠᱟ.ᱢᱤᱦᱚᱨᱟ, ᱜᱟᱯᱟᱞᱢᱟᱨᱟᱣ ᱫᱩᱯᱲᱩᱵ ᱠᱟᱛᱮ ᱥᱚᱨᱠᱟᱨ ᱥᱟᱞᱟᱜ ᱵᱟᱝᱠᱷᱟᱱ ᱮᱴᱟᱜ ᱟ.ᱛᱩ ᱠᱚ ᱥᱟᱞᱟᱜ ᱥᱩᱞᱩᱠ ᱱᱤᱨᱟ.ᱭ ᱥᱟ.ᱜᱟ.ᱭ ᱫᱚᱦᱚ ᱠᱟᱛᱮ ᱥᱟᱶᱛᱟ ᱞᱟᱦᱟᱱᱛᱤ ᱠᱟ.ᱢᱤᱦᱚᱨᱟ ᱥᱟᱵ ᱠᱟᱛᱮ ᱠᱟ.ᱢᱤ ᱠᱚ ᱩᱨᱟ.ᱞ ᱫᱟᱲᱮᱭᱟᱜᱼᱟ,

ᱥᱟ.ᱜᱟ.ᱲᱤᱭᱟ. ᱦᱚᱨ ᱰᱟᱦᱟᱨ, ᱧᱩ ᱫᱟᱜ, ᱡᱟᱦᱮᱨ ᱜᱟᱲ, ᱵᱚᱸᱜᱟ ᱛᱷᱟ.ᱱ ᱠᱟ.ᱢᱤ ᱥᱩᱥᱟ.ᱨ, ᱡᱟᱨᱟ ᱠᱤᱨᱥᱤ ᱫᱟᱨᱮ ᱟᱠᱚᱴ, ᱠᱷᱚᱣᱟᱲ ᱮᱢᱟᱱ ᱠᱚ ᱾ 

ᱢᱟ.ᱡᱷᱤ ᱟᱪᱟᱨ ᱵᱤᱪᱟ.ᱨ ᱦᱚᱪᱚᱭ ᱞᱟ.ᱜᱤᱫ ᱟᱡᱟᱜ ᱪᱷᱟᱴᱠᱟ ᱨᱮ ᱟᱠᱷᱲᱟ ᱛᱟᱦᱮᱸᱱᱟ ᱾ ᱚᱱᱟ ᱫᱷᱚᱨᱚᱢ ᱟᱠᱷᱲᱟ ᱨᱮᱜᱮ ᱵᱤᱪᱟ.ᱨ ᱢᱟᱰᱣᱟ ᱫᱚ ᱥᱮᱫᱟᱭ ᱠᱷᱚᱱ ᱦᱮᱡ ᱟ.ᱜᱩ ᱟᱠᱟᱱᱟ ᱾ ᱟᱨ ᱵᱟᱝ ᱠᱷᱟᱱ ᱫᱷᱚᱨᱚᱢ ᱡᱟᱦᱮᱨ ᱜᱟᱲ ᱨᱮᱦᱚᱸ ᱟᱪᱟᱨ ᱵᱤᱪᱟ.ᱨ ᱫᱚ ᱫᱩᱯᱲᱩᱵᱚᱜᱼᱟ ᱾

ᱟ.ᱛᱩᱨᱮ ᱯᱟᱨᱟᱵᱽ ᱯᱩᱱᱟ.ᱭ ᱨᱟ.ᱥᱠᱟ. ᱨᱚᱢᱚᱡᱽ ᱞᱟ.ᱜᱤᱫ ᱢᱟ.ᱡᱷᱤ ᱜᱚᱢᱠᱮ ᱴᱷᱮᱱ ᱵᱟᱨᱭᱟ ᱡᱚᱲᱟ ᱛᱩᱢᱫᱟᱜ ᱛᱟᱦᱮᱸᱱᱟ ᱾ ᱚᱱᱟ ᱥᱟᱶᱛᱮ ᱢᱟ.ᱡᱷᱤ ᱫᱚ ᱟᱡᱟᱜ ᱪᱷᱟᱴᱠᱟ ᱨᱮᱜᱮ ᱜᱚᱥᱟᱬᱮ ᱦᱚᱸ ᱛᱟᱦᱮᱸᱱᱟ ᱾ ᱚᱸᱰᱮ ᱜᱮ ᱟᱡ ᱫᱚ ᱥᱩᱱᱩᱢ ᱥᱤᱸᱫᱩᱨ ᱮ ᱟᱬᱜᱚᱭᱟ ᱾ ᱟᱨ ᱱᱟᱭᱠᱮ ᱦᱚᱸᱭ ᱵᱚᱸᱜᱟᱭᱟ ᱾

ᱠᱩᱲᱟ.ᱭ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱥᱮᱫᱟᱭ ᱦᱟᱯᱲᱟᱢ ᱠᱚᱫᱚ ᱟ.ᱛᱩ ᱨᱮ ᱢᱟ.ᱡᱷᱤ ᱫᱚ ᱢᱩᱛᱩᱞ ᱠᱷᱩᱱᱴᱤ ᱞᱮᱠᱟᱛᱮ ᱠᱟ.ᱢᱤᱦᱚᱨᱟ ᱧᱮᱞ ᱛᱚᱨᱟᱣ ᱞᱟ.ᱜᱤᱫ ᱢᱟ.ᱱ ᱚᱛ ᱦᱟᱥᱟ ᱠᱚ ᱞᱮᱵᱮᱫ ᱟᱫ ᱠᱚ ᱛᱟᱦᱮᱸᱫ ᱾ ᱦᱚᱲ ᱵᱚ ᱥᱟᱸᱜᱮ ᱮᱱᱟ ᱡᱩᱜᱽ ᱦᱚᱸ ᱵᱚᱫᱚᱞ ᱤᱫᱤ ᱮᱱᱟ ᱚᱱᱟ ᱢᱟ.ᱡᱷᱤ ᱢᱟᱯᱟᱧᱡᱤ ᱢᱟ.ᱱ ᱚᱛ ᱦᱟᱥᱟ ᱠᱚᱫᱚ ᱩᱱᱠᱩ ᱟ.ᱛᱩ ᱨᱤᱱ ᱜᱮ ᱢᱟ.ᱡᱷᱤ ᱜᱩᱥᱴᱤ ᱥᱮ ᱵᱚᱝᱥᱚ ᱠᱚᱜᱮ ᱚᱛ ᱦᱟᱥᱟ ᱫᱚ ᱟᱠᱚᱣᱟᱜ ᱧᱩᱛᱩᱢ ᱨᱮᱠᱚ ᱴᱤᱠᱚᱥ ᱠᱮᱜᱼᱟ ᱾ ᱦᱟᱥᱟ ᱢᱟ ᱵᱟᱝ ᱵᱟ.ᱲᱛᱤᱜ ᱠᱟᱱᱟ ᱾ ᱟᱫᱚ ᱱᱮᱛᱟᱨ ᱫᱚ ᱢᱟ.ᱱ ᱞᱮᱠᱟᱛᱮ ᱵᱚᱸᱜᱟ ᱵᱳᱨᱼ, ᱯᱟᱨᱟᱵᱽ ᱯᱩᱱᱟ.ᱭ, ᱵᱷᱟᱸᱰᱟᱱ ᱠᱩᱸᱰᱟ.ᱱ ᱠᱚᱨᱮ ᱵᱟ.ᱲᱛᱤ ᱦᱳᱲᱳ ᱵᱷᱟᱜᱽ ᱠᱚ ᱧᱟᱢᱮᱜᱼᱟ ᱾ ᱵᱟᱯᱞᱟ ᱵᱮᱦᱟ ᱨᱮ ᱢᱤᱫ ᱢᱟ.ᱡᱷᱤ ᱢᱟᱰᱣᱟ ᱫᱟ.ᱲᱤ ᱠᱚ ᱮᱱᱟ ᱠᱚ ᱠᱟᱱᱟ ᱾ ᱯᱟᱨᱟᱵᱽ ᱯᱩᱱᱟ.ᱭ ᱮᱢᱟᱱ ᱠᱚᱨᱮ ᱢᱟ.ᱱ ᱞᱮᱠᱟᱛᱮ ᱢᱟ.ᱱ ᱢᱟ.ᱪᱤ ᱠᱚ ᱵᱤᱞ ᱟᱠᱚ ᱠᱟᱱᱟ ᱾ ᱟᱨ ᱢᱤᱫ ᱵᱟᱨ ᱯᱷᱩᱲᱩᱜ ᱛᱟᱝ ᱦᱟᱺᱰᱤ ᱟᱨ ᱪᱟᱠᱷᱱᱟ ᱠᱚ ᱮᱢᱟ᱾ᱠᱤᱱᱟ ᱾ ᱢᱟ.ᱡᱷᱤ ᱜᱚᱢᱠᱮ ᱞᱮᱠᱟᱛᱮ ᱢᱟ.ᱡᱷᱤ ᱵᱩᱰᱷᱤ ᱪᱮ ᱮᱨᱟ ᱦᱚᱸ ᱢᱟ.ᱱ ᱠᱚ ᱮᱢᱟᱭᱟ ᱾

ᱵᱟᱪᱷᱚᱱ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱥᱟᱱᱛᱟᱲ ᱦᱚᱯᱚᱱ ᱠᱚᱣᱟᱜ ᱫᱚ ᱢᱟᱜᱽ ᱵᱚᱸᱜᱟᱨᱮ ᱥᱮᱨᱢᱟ ᱮᱛᱚᱦᱚᱵᱚᱜᱼᱟ ᱟᱨ ᱯᱩᱥ ᱵᱚᱸᱜᱟᱨᱮ ᱢᱩᱪᱟ.ᱫ ᱥᱮᱨᱢᱟ ᱯᱩᱨᱟ.ᱣᱜᱼᱟ ᱾ ᱚᱱᱠᱟ ᱞᱮᱠᱟ ᱜᱮ ᱟ.ᱛᱩ ᱨᱤᱱ ᱢᱟ.ᱡᱷᱤ ᱜᱚᱢᱞᱮ ᱛᱤᱠᱤᱱᱟᱜ ᱦᱚᱸ ᱚᱱᱟ ᱢᱟᱜᱽ ᱵᱚᱸᱜᱟ ᱨᱮᱜᱮ ᱟ.ᱛᱩ ᱨᱤᱱ ᱦᱚᱲ ᱠᱚ ᱦᱚᱛᱮᱛᱮ ᱚᱠᱚᱭ ᱜᱮᱠᱚ ᱠᱩᱥᱤ ᱟᱭᱟ ᱢᱟ.ᱡᱷᱤ ᱜᱩᱥᱴᱤ ᱯᱟ.ᱨᱤᱥ ᱨᱤᱱᱤᱡ ᱩᱱᱤ ᱜᱮ ᱢᱟ.ᱡᱷᱤ ᱞᱮᱠᱟ ᱛᱮᱠᱚ ᱵᱟᱪᱷᱚᱱ ᱮᱭᱟ ᱾

ᱟ.ᱛᱩ ᱨᱤᱱ ᱢᱟ.ᱡᱷᱤ, ᱯᱟᱨᱟᱱᱤᱠ, ᱡᱚᱜᱽ ᱢᱟ.ᱡᱷᱤ, ᱜᱚᱰᱮᱛ ᱮᱢᱟᱱ ᱠᱚ ᱱᱚᱝᱠᱟ ᱜᱮ᱾ᱟ.ᱛᱩ ᱨᱤᱱ ᱦᱚᱲ ᱟᱛᱮ ᱠᱚ ᱵᱟᱪᱷᱚᱱ ᱠᱚᱣᱟ ᱾ ᱥᱮᱨᱢᱟ ᱯᱤᱪᱷᱤ ᱵᱩᱪᱷᱨᱤ ᱜᱮ ᱾ ᱟ.ᱛᱩ ᱦᱚᱲ ᱪᱮᱛᱟᱱ ᱨᱮᱠᱚ ᱫᱚᱦᱚ ᱠᱚᱣᱟ ᱟᱨ ᱠᱚ ᱵᱟᱪᱷᱟᱣ ᱠᱚᱣᱟ ᱾

ᱫᱚᱨᱵᱟᱨ ᱟᱠᱷᱲᱟ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱟ.ᱛᱩ ᱨᱮᱱᱟᱜ ᱞᱚᱲᱟ ᱯᱟᱲᱟᱣᱜ ᱡᱚᱦᱚᱜ ᱢᱟ.ᱡᱷᱤᱭᱟᱜ ᱟᱸᱫᱮᱛᱮ ᱟ.ᱛᱩ ᱨᱮ ᱡᱚᱜᱽ ᱢᱟ.ᱡᱷᱤ ᱟ.ᱛᱩ ᱦᱚᱲ ᱠᱚᱭ ᱡᱟᱣᱨᱟ ᱦᱚᱫᱚ ᱠᱚᱣᱟ ᱾ ᱚᱸᱰᱮ ᱢᱟ.ᱡᱷᱤ ᱟᱠᱷᱲᱟ ᱨᱮᱜᱮ ᱟᱪᱟᱨ ᱵᱤᱪᱟ.ᱨ, ᱯᱟᱨᱟᱵᱽ ᱯᱩᱱᱟ.ᱭ, ᱱᱮᱰᱟ ᱵᱟᱨᱛᱮ ᱦᱩᱭᱩᱜᱼᱟ ᱾ ᱯᱟᱨᱟᱵᱽ ᱯᱩᱱᱟ.ᱭ ᱵᱚᱸᱜᱟ ᱵᱳᱨᱳ ᱑᱒ (ᱜᱮᱵᱟᱨ) ᱢᱟᱦᱟᱸ ᱢᱟᱬᱟᱝ ᱨᱮ ᱾ ᱮᱱ ᱮᱱᱟᱝ ᱟ.ᱛᱩᱨᱮ ᱱᱤᱴ ᱜᱚᱞᱟᱴ ᱟᱠᱟᱱ ᱫᱤᱱ ᱢᱟᱦᱟᱸᱨᱮ ᱯᱮᱲᱟ ᱯᱩᱨᱵᱷᱩ, ᱫᱮᱼᱵᱷᱟ.ᱜᱤᱱ ᱠᱚ ᱱᱮᱣᱛᱟ ᱵᱟᱨᱛᱮ ᱟ.ᱜᱩ ᱠᱚᱣᱟ ᱾ ᱡᱟᱦᱟᱸᱱᱟᱜ ᱫᱚᱨᱵᱟᱨ ᱦᱚᱪᱚᱭ ᱠᱷᱟᱱ ᱢᱟ.ᱡᱷᱤ ᱜᱚᱢᱠᱮ ᱴᱷᱮᱱ ᱢᱚᱬᱮ ᱥᱤᱠᱟ. (᱑. ᱒᱕) ᱯᱩᱭᱥᱟ. ᱟᱨᱫᱟᱥ ᱜᱚᱱᱚᱝ ᱞᱟᱜᱟᱣᱜᱼᱟ ᱾ ᱮᱱ ᱠᱟᱛᱮ ᱮᱱᱟᱝ ᱢᱟ.ᱡᱷᱤ ᱫᱚᱨᱵᱟᱨ ᱮ ᱦᱚᱦᱚ ᱚᱪᱚᱭᱟ ᱾ ᱟ.ᱛᱩᱨᱮ ᱢᱟ.ᱡᱷᱤ ᱚᱲᱟᱜ ᱠᱚ ᱱᱮᱭᱟᱣ ᱱᱤᱯᱥᱟ. ᱡᱚᱦᱚᱜ ᱩᱥᱟ.ᱫ ᱡᱤᱣᱤ ᱨᱟᱲᱮᱡ ᱠᱚ ᱥᱮᱱᱚᱜᱼᱟ ᱾ ᱩᱱᱠᱩ ᱱᱮᱭᱟᱣ ᱦᱚᱲ ᱠᱚ ᱜᱟᱞ ᱠᱟᱛᱷᱟ ᱛᱮ ᱵᱟᱨ ᱯᱮ ᱦᱚᱲ ᱚᱲᱟᱜ ᱛᱮ ᱤᱫᱤ ᱠᱟᱛᱮ ᱥᱚᱞᱦᱟᱼᱱᱟᱢᱟ ᱠᱟᱠᱚᱣᱟ ᱾ ᱵᱟᱠᱚ ᱨᱮᱵᱮᱱ ᱠᱷᱟᱱ ᱢᱟ.ᱡᱷᱤ ᱟᱡᱟᱜ ᱚᱲᱟᱜ ᱨᱮ ᱡᱚᱢᱼᱧᱩ ᱫᱚᱦᱚ ᱠᱟᱛᱮ ᱠᱩᱲᱤ ᱟᱯᱟᱵᱟᱨᱮ ᱚᱲᱟᱜ ᱛᱮ ᱢᱚᱬᱮ ᱦᱚᱲ ᱟᱛᱮ ᱤᱫᱤ ᱥᱮᱴᱮᱨ ᱦᱚᱴᱚ ᱠᱟᱭᱟ ᱠᱚ ᱾ ᱟᱨ ᱟᱯᱟᱵᱟᱨᱮᱛ ᱟᱛᱮ ᱠᱚ ᱟ.ᱜᱩ ᱦᱚᱴᱚ ᱠᱟᱭᱟ ᱾ ᱟᱨ ᱠᱚ ᱵᱤᱪᱟᱹᱨ ᱫᱚᱨᱵᱟᱨ ᱢᱟᱵᱽᱞᱟᱭᱟ ᱾

ᱫᱚᱨᱵᱟᱨ ᱨᱮ ᱟ.ᱛᱩ ᱨᱤᱱ ᱢᱚᱬᱮ ᱦᱚᱲ ᱠᱚ ᱵᱮᱨᱮᱫ ᱠᱚ ᱞᱟ.ᱜᱤᱫ ᱞᱟᱡ ᱫᱟᱠᱟ ᱫᱟᱜ ᱢᱟ.ᱰᱤ ᱞᱮᱠᱟ ᱟ.ᱫᱟ.ᱭ ᱦᱩᱭᱩᱜᱼᱟ ᱵᱟᱱᱟᱨ ᱟ.ᱥᱟ.ᱢᱤ ᱫᱚᱨᱵᱟᱨ ᱦᱚᱪᱚ ᱠᱤᱱ ᱾ ᱟᱨ ᱫᱩᱥᱤ ᱧᱟᱢ ᱤᱡ ᱫᱚ ᱵᱟ.ᱲᱛᱤ ᱜᱮ ᱜᱩᱱᱦᱟ. ᱡᱟ.ᱱᱤ ᱵᱤᱪᱟᱹᱨ ᱰᱟᱸᱰᱚᱢ ᱮᱢᱚᱜ ᱦᱩᱭᱩᱜ ᱛᱟᱭᱟ ᱾ ᱫᱚᱨᱵᱟᱨ ᱰᱟᱸᱰᱚᱢ ᱴᱟᱠᱟ ᱫᱚ ᱢᱟ.ᱡᱷᱤ ᱜᱚᱢᱠᱮ ᱵᱟᱨ ᱵᱷᱟᱜᱽ ᱦᱩᱸᱰᱟ. ᱡᱩᱲᱩ ᱯᱟᱲᱟᱣᱜᱼᱟ ᱾ ᱟᱵᱚ ᱥᱟᱱᱛᱟᱲ ᱦᱚᱯᱚᱱ ᱫᱚ ᱥᱮᱸᱫᱽᱨᱟ ᱠᱟᱨᱠᱟ, ᱵᱤᱪᱟ.ᱨ ᱟᱪᱟᱨ, ᱜᱤᱫᱽᱨᱟᱹ ᱪᱮ ᱦᱟᱲᱟᱢ ᱦᱚᱲ ᱡᱚᱛᱚ ᱜᱮ ᱵᱟᱨᱟᱵᱟ.ᱨᱤ ᱞᱮᱜᱽ ᱵᱷᱟᱜᱽ ᱠᱚ ᱧᱟᱢᱟ ᱾ ᱟᱨ ᱟᱪᱟᱨ ᱵᱤᱪᱟᱹᱨ ᱨᱮ ᱨᱚᱲ ᱨᱮᱱᱟᱜ ᱫᱟᱣ ᱡᱚᱛᱚ ᱦᱚᱲ ᱜᱮᱠᱚ ᱨᱚᱲ ᱫᱟᱲᱮᱭᱟᱜᱼᱟ ᱾ ᱤᱠᱷᱟ.ᱱ ᱦᱟᱺᱰᱤ ᱯᱟ.ᱨᱩᱣᱟ. ᱧᱩ ᱵᱩᱞ ᱠᱟᱛᱮ ᱫᱚᱨᱵᱟᱨ ᱨᱮ ᱨᱚᱲ ᱫᱚ ᱢᱟᱱᱟ ᱜᱮᱭᱟ ᱾ ᱫᱚᱨᱵᱟᱨ ᱛᱟᱞᱟᱨᱮ ᱩᱫᱩᱜ ᱪᱮ ᱠᱚᱲᱟᱢ ᱫᱟᱞ ᱠᱟᱛᱮ ᱜᱟᱯᱟᱞ ᱢᱟᱨᱟᱣ ᱦᱚᱸ ᱢᱟᱱᱟ ᱜᱮᱭᱟ ᱾