ᱥᱟᱨᱚᱫᱟ ᱯᱨᱚᱥᱟᱫᱽ ᱠᱤᱥᱠᱩ (ᱠᱷᱮᱨᱣᱟᱞ ᱵᱟᱹᱥᱤᱭᱟᱹ)
| ᱥᱟᱨᱚᱫᱟ ᱯᱨᱚᱥᱟᱫᱽ ᱠᱤᱥᱠᱩ | |
|---|---|
.jpg) ᱥᱟᱨᱚᱫᱟ ᱯᱨᱚᱥᱟᱫᱽ ᱠᱤᱥᱠᱩ (ᱠᱷᱮᱨᱣᱟᱞ ᱵᱟᱹᱥᱤᱭᱟᱹ) | |
| ᱡᱟᱱᱟᱢ | ᱡᱟᱱᱩᱣᱟᱨᱤ ᱑᱑, ᱑᱙᱕᱙ ᱵᱟᱸᱥᱯᱟᱦᱟᱲᱤ, ᱯᱟᱪᱮ ᱢᱮᱫᱤᱱᱤᱯᱩᱨ, ᱯᱚᱪᱷᱤᱢ ᱵᱟᱝᱞᱟ, ᱥᱤᱧᱚᱛ |
| ᱵᱟᱦᱟᱱᱟ ᱧᱩᱛᱩᱢ | ᱠᱷᱮᱨᱣᱟᱲ ᱵᱟᱹᱥᱤᱭᱟᱹ, ᱱᱤᱨᱩᱯᱚᱢᱟ ᱢᱩᱨᱢᱩ, ᱠᱚᱠᱚᱨᱢᱮᱸᱫ |
| ᱠᱟᱹᱢᱤ | ᱚᱱᱚᱞᱤᱭᱟᱹ, ᱛᱚᱨᱡᱚᱢᱟᱭᱤᱡ, ᱥᱚᱨᱠᱟᱨᱤ ᱠᱟᱹᱢᱤᱭᱟᱹ |
| ᱯᱟᱹᱨᱥᱤ | ᱥᱟᱱᱛᱟᱲᱤ, ᱵᱟᱝᱞᱟ |
| ᱡᱟᱹᱛᱤᱭᱟᱹᱛ | ᱥᱤᱧᱚᱛᱤᱭᱟᱹ |
| ᱥᱮᱪᱮᱫ | ᱜᱨᱮᱡᱩᱭᱮᱴ, ᱥᱴᱮᱱᱳᱜᱽᱨᱟᱯᱷᱤ |
| ᱚᱠᱛᱚ | ᱑᱙᱗᱘ - ᱱᱤᱛ ᱫᱷᱟᱹᱵᱤᱡ |
| ᱚᱱᱚᱞ ᱛᱷᱚᱠ | ᱠᱟᱹᱦᱱᱤ, ᱚᱱᱚᱲᱦᱮᱸ, ᱜᱟᱭᱟᱱ, ᱚᱱᱚᱞ |
| ᱥᱤᱨᱯᱷᱟᱹ | ᱨᱤᱥᱤ ᱵᱚᱝᱠᱤᱢ ᱥᱤᱨᱯᱟᱹ (᱒᱐᱐᱕), ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱜᱟᱶᱛᱟ ᱥᱤᱨᱯᱟᱹ (᱑᱙᱙᱘) |
ᱥᱟᱨᱚᱫᱟ ᱯᱨᱚᱥᱟᱫᱽ ᱠᱤᱥᱠᱩ (ᱡᱟᱱᱟᱢ: ᱑᱑ ᱡᱟᱱᱩᱣᱟᱨᱤ ᱑᱙᱕᱙) ᱫᱚ ᱥᱟᱱᱛᱟᱲᱤ ᱠᱟᱛᱷᱟ ᱥᱟᱶᱦᱮᱫ ᱨᱮᱱ ᱢᱤᱫ ᱧᱩᱛᱩᱢᱟᱱ ᱰᱟᱦᱟᱨ ᱩᱫᱩᱜᱤᱡ ᱠᱟᱱᱟᱭ᱾ ᱥᱟᱶᱦᱮᱫ ᱡᱮᱜᱮᱛ ᱨᱮ ᱩᱱᱤ ᱫᱚ ᱠᱷᱮᱨᱣᱟᱞ ᱵᱟᱹᱥᱤᱭᱟᱹ ᱵᱟᱦᱱᱟ ᱧᱩᱛᱩᱢ ᱛᱮ ᱰᱷᱮᱨ ᱮ ᱩᱯᱨᱩᱢ ᱟᱠᱟᱱᱟ᱾ ᱩᱱᱤ ᱫᱚ ᱠᱟᱹᱦᱱᱤ, ᱚᱱᱚᱬᱦᱤᱭᱟᱹ ᱟᱨ ᱜᱟᱭᱟᱱ ᱚᱱᱚᱞᱤᱭᱟᱹ ᱠᱟᱱᱟᱭ᱾
ᱡᱟᱱᱟᱢ ᱟᱨ ᱥᱮᱪᱮᱫ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱥᱟᱨᱚᱫᱟ ᱯᱨᱚᱥᱟᱫᱽ ᱠᱤᱥᱠᱩ ᱣᱟᱜ ᱡᱟᱱᱟᱢ ᱫᱚ ᱑᱑ ᱡᱟᱱᱩᱣᱟᱨᱤ ᱑᱙᱕᱙ ᱥᱟᱞᱮ ᱨᱮ ᱯᱚᱪᱷᱤᱢ ᱵᱟᱝᱞᱟ ᱯᱚᱱᱚᱛ ᱨᱮᱱᱟᱜ ᱢᱮᱫᱤᱱᱤᱯᱩᱨ (ᱱᱤᱛᱚᱜ ᱯᱟᱪᱮ ᱢᱮᱫᱤᱱᱤᱯᱩᱨ) ᱡᱮᱞᱟ ᱨᱮᱱᱟᱜ ᱵᱮᱞᱯᱟᱦᱟᱲᱤ ᱛᱷᱟᱱᱟ ᱨᱮ ᱢᱮᱱᱟᱜ ᱵᱟᱸᱥᱯᱟᱦᱟᱲᱤ ᱟᱹᱛᱩ ᱨᱮ ᱦᱩᱭ ᱞᱮᱱᱟ᱾ ᱟᱡ ᱵᱟᱵᱟ ᱫᱚ ᱩᱠᱤᱞ ᱪᱚᱸᱫᱽᱨᱚ ᱠᱤᱥᱠᱩ ᱟᱨ ᱟᱭᱳ ᱫᱚ ᱞᱚᱠᱷᱢᱤᱢᱚᱱᱤ ᱛᱟᱦᱮᱸ ᱠᱟᱱᱟᱭ᱾
ᱩᱱᱤ ᱫᱚ ᱟᱹᱛᱩ ᱨᱮᱱᱟᱜ ᱯᱨᱟᱭᱢᱟᱨᱤ ᱤᱥᱠᱩᱞ ᱠᱷᱚᱱ ᱥᱮᱪᱮᱫ ᱮ ᱮᱛᱚᱦᱚᱵ ᱞᱮᱫᱟ᱾ ᱚᱱᱟ ᱛᱟᱭᱚᱢ ᱵᱟᱸᱥᱯᱟᱦᱟᱲᱤ ᱠᱮ. ᱯᱤ. ᱮᱥ. ᱥᱤ. ᱦᱟᱭ ᱤᱥᱠᱩᱞ ᱨᱮ ᱟᱨᱮ ᱪᱟᱱᱟᱪ (Class IX) ᱦᱟᱹᱵᱤᱡ ᱮ ᱯᱟᱲᱦᱟᱣ ᱞᱮᱱᱟ᱾ ᱵᱟᱯᱞᱟ ᱟᱨ ᱜᱷᱟᱨᱚᱸᱡᱽ ᱨᱮᱱᱟᱜ ᱟᱹᱣᱰᱤ ᱟᱱᱟᱴ ᱠᱷᱟᱹᱛᱤᱨ ᱛᱮ ᱯᱟᱲᱦᱟᱣ ᱨᱮ ᱛᱷᱚᱲᱟ ᱫᱤᱱ ᱡᱤᱨᱟᱹᱣ ᱦᱟᱛᱟᱣ ᱦᱩᱭ ᱞᱮᱱ ᱛᱟᱭᱟ᱾ ᱛᱟᱭᱚᱢ ᱛᱮ ᱑᱙᱘᱑ ᱥᱟᱞᱮ ᱨᱮ ᱢᱟᱫᱷᱭᱚᱢᱤᱠ ᱟᱨ ᱑᱙᱘᱓ ᱥᱟᱞᱮ ᱨᱮ ᱦᱟᱭᱟᱨ ᱥᱮᱠᱮᱱᱰᱟᱨᱤ ᱯᱟᱥ ᱠᱟᱛᱮ ᱠᱚᱞᱠᱟᱛᱟ ᱨᱮᱱᱟᱜ ᱥᱩᱯᱷᱤ ᱠᱚᱢᱟᱨᱥᱤᱭᱟᱞ ᱠᱚᱞᱮᱡᱽ ᱠᱷᱚᱱ ᱥᱴᱮᱱᱳᱜᱽᱨᱟᱯᱷᱤ ᱟᱨ ᱴᱮᱞᱤᱯᱷᱨᱚᱱ ᱚᱯᱟᱨᱮᱴᱤᱝ ᱨᱮᱱᱟᱜ ᱴᱨᱮᱱᱤᱝ ᱮ ᱦᱟᱛᱟᱣ ᱞᱮᱫᱟ᱾
ᱠᱟᱹᱢᱤ ᱡᱤᱭᱚᱱ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]᱑᱙᱘᱗ ᱥᱟᱞᱮ ᱨᱮ ᱩᱱᱤ ᱫᱚ ᱥᱤᱧᱚᱛ ᱥᱚᱨᱠᱟᱨ ᱟᱜ ᱟᱭᱠᱚᱨ ᱵᱤᱵᱷᱟᱜᱽ (Income Tax Department) ᱨᱮ ᱠᱟᱹᱢᱤ ᱨᱮᱭ ᱵᱚᱞᱚ ᱞᱮᱱᱟ ᱟᱨ ᱱᱤᱛ ᱦᱚᱸ ᱚᱸᱰᱮ ᱜᱮ ᱠᱟᱹᱢᱤ ᱠᱟᱱᱟᱭ᱾
ᱥᱟᱶᱦᱮᱫ ᱪᱟᱨᱪᱟ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱥᱟᱨᱚᱫᱟ ᱯᱨᱚᱥᱟᱫᱽ ᱠᱤᱥᱠᱩ ᱫᱚ ᱑᱙᱗᱘ ᱥᱟᱞᱮ ᱨᱮ ᱵᱷᱚᱫᱽᱨᱚᱠᱟᱞᱤ ᱦᱟᱭ ᱤᱥᱠᱩᱞ ᱨᱮᱱᱟᱜ ᱢᱮᱜᱟᱡᱤᱱ ᱨᱮ "ᱡᱟᱱᱟᱢ ᱟᱭᱳ" ᱧᱩᱛᱩᱢᱟᱱ ᱚᱱᱚᱲᱦᱮ ᱚᱞ ᱠᱟᱛᱮ ᱥᱟᱶᱦᱮᱫ ᱡᱟᱜᱟᱛ ᱨᱮᱭ ᱵᱚᱞᱚ ᱞᱮᱱᱟ᱾ ᱩᱱᱤ ᱫᱚ ᱟᱡᱟᱜ ᱚᱞ ᱠᱚᱨᱮ ᱵᱷᱮᱜᱟᱨ ᱵᱷᱮᱜᱟᱨ ᱵᱟᱦᱱᱟ ᱧᱩᱛᱩᱢ ᱮ ᱵᱮᱵᱷᱟᱨᱟ:
- ᱠᱷᱮᱨᱣᱟᱞ ᱵᱟᱹᱥᱤᱭᱟᱹ: ᱠᱟᱹᱦᱱᱤ ᱟᱨ ᱚᱱᱚᱞ ᱞᱟᱹᱜᱤᱫ᱾
- ᱱᱤᱨᱩᱯᱚᱢᱟ ᱢᱩᱨᱢᱩ: ᱚᱱᱚᱲᱦᱮ ᱞᱟᱹᱜᱤᱫ᱾
- ᱠᱚᱠᱚᱨᱢᱮᱸᱫ: ᱨᱟᱹᱥᱠᱟᱹ (ᱞᱟᱸᱫᱟᱣᱟᱱᱟᱜ) ᱚᱞ ᱞᱟᱹᱜᱤᱫ᱾[᱑]
ᱩᱱᱤᱭᱟᱜ ᱚᱞ ᱠᱚ ᱫᱚ ᱦᱚᱲ ᱥᱚᱢᱵᱟᱫᱽ, ᱛᱮᱛᱨᱮ, ᱥᱤᱞᱤ, ᱯᱚᱪᱷᱤᱢᱵᱟᱝᱞᱟ ᱟᱨ ᱟᱹᱨᱥᱤ ᱮᱢᱟᱱ ᱯᱟᱛᱷᱟᱢ ᱠᱚᱨᱮ ᱩᱪᱷᱟᱹᱱ ᱟᱠᱟᱱᱟ᱾ ᱩᱱᱤᱭᱟᱜ ᱜᱟᱭᱟᱱ "ᱠᱷᱤᱡᱽᱞᱟᱣ" (᱑᱙᱘᱓) ᱫᱚ ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮᱱᱟᱜ ᱯᱩᱭᱞᱩ "ᱠᱚᱲᱟ ᱵᱟᱹᱱᱩᱜ" (Male-free) ᱜᱟᱭᱟᱱ ᱢᱮᱱᱛᱮ ᱞᱮᱠᱷᱟᱜᱼᱟ᱾
ᱚᱞ ᱟᱠᱟᱫ ᱯᱩᱛᱷᱤ ᱠᱚ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]- ᱠᱷᱤᱡᱽᱞᱟᱣ (᱑᱙᱘᱓) - ᱜᱟᱭᱟᱱ᱾
- ᱢᱚᱲᱮᱠᱚ ᱛᱩᱨᱩᱭᱠᱚ (᱑᱙᱙᱓) - ᱠᱟᱹᱦᱱᱤ ᱛᱩᱢᱟᱹᱞ᱾
- ᱥᱟᱯᱟᱵ (᱑᱙᱙᱘) - ᱠᱟᱹᱦᱱᱤ ᱛᱩᱢᱟᱹᱞ᱾
- ᱵᱚᱨᱚᱱᱤᱭᱚ ᱟᱹᱫᱤᱵᱟᱹᱥᱤ ᱪᱚᱨᱤᱛᱢᱟᱞᱟ (᱒᱐᱐᱒)᱾
- ᱟᱹᱭᱠᱟᱹᱣ (᱒᱐᱐᱓) - ᱚᱱᱚᱲᱦᱮ ᱛᱩᱢᱟᱹᱞ᱾
- ᱠᱷᱮᱨᱣᱟᱲ ᱵᱚᱝᱥᱟ ᱫᱷᱚᱨᱚᱢ ᱯᱩᱛᱷᱤ (᱒᱐᱐᱔) - ᱨᱟᱢᱫᱟᱥ ᱴᱩᱰᱩ 'ᱨᱮᱥᱠᱟ' ᱣᱟᱜ ᱯᱩᱛᱷᱤ ᱨᱮᱱᱟᱜ ᱵᱟᱝᱞᱟ ᱛᱚᱨᱡᱚᱢᱟ (ᱥᱩᱠᱩᱢᱟᱨ ᱥᱤᱠᱫᱟᱨ ᱥᱟᱶ ᱢᱮᱥᱟ ᱠᱟᱛᱮ)᱾[᱑]
ᱥᱤᱨᱯᱟᱹ ᱟᱨ ᱢᱟᱹᱱ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]- ᱑᱙᱘᱖: ᱡᱷᱟᱲᱜᱨᱟᱢ ᱭᱩᱵᱚ ᱠᱚᱞᱭᱟᱱ ᱫᱚᱯᱛᱚᱨ ᱯᱟᱦᱴᱟ ᱠᱷᱚᱱ ᱥᱤᱨᱯᱟᱹ᱾
- ᱑᱙᱙᱑: 'ᱨᱩᱥᱤᱠᱟ ᱢᱟᱰᱣᱟ' (ᱩᱛᱛᱚᱨᱯᱟᱲᱟ) ᱯᱟᱦᱴᱟ ᱠᱷᱚᱱ ᱥᱚᱨᱮᱥ ᱠᱟᱹᱦᱱᱤᱭᱟᱹ ᱥᱤᱨᱯᱟᱹ᱾
- ᱑᱙᱙᱒: ᱯᱚᱪᱷᱤᱢ ᱵᱟᱝᱞᱟ ᱥᱚᱨᱠᱟᱨ ᱯᱟᱦᱴᱟ ᱠᱷᱚᱱ 'ᱟᱹᱫᱤᱵᱟᱹᱥᱤ ᱜᱩᱱᱤᱡᱚᱱ' ᱢᱟᱹᱱ᱾
- ᱑᱙᱙᱘: ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱯᱟᱦᱴᱟ ᱠᱷᱚᱱ ᱥᱚᱨᱮᱥ ᱠᱟᱹᱦᱱᱤᱭᱟᱹ ᱥᱤᱨᱯᱟᱹ (ᱥᱟᱯᱟᱵ ᱯᱩᱛᱷᱤ ᱞᱟᱹᱜᱤᱫ)᱾
- ᱒᱐᱐᱕: 'ᱚᱵᱷᱤᱫᱷᱟ' ᱥᱚᱸᱥᱛᱷᱟ ᱯᱟᱦᱴᱟ ᱠᱷᱚᱱ 'ᱨᱤᱥᱤ ᱵᱚᱝᱠᱤᱢ ᱥᱤᱨᱯᱟᱹ'᱾