ᱥᱟᱭ ᱯᱟᱨᱟᱧᱡᱽᱯᱮ

ᱥᱟᱭ ᱯᱟᱨᱟᱧᱡᱽᱯᱮ (ᱡᱟᱱᱟᱢ: ᱑᱙ ᱢᱟᱨᱪ ᱑᱙᱓᱘) ᱫᱚ ᱢᱤᱫ ᱵᱷᱟᱨᱚᱛᱤᱭᱚ ᱢᱩᱵᱷᱤ ᱰᱟᱭᱨᱮᱠᱴᱚᱨ (movie director) ᱟᱨ ᱥᱠᱨᱤᱱ ᱚᱱᱚᱞᱤᱭᱟᱹ (screenwriter) ᱠᱟᱱᱟᱭ᱾ ᱩᱱᱤ ᱫᱚ ᱥᱯᱚᱨᱥ (Sparsh), ᱠᱟᱛᱷᱟ (Katha), ᱪᱟᱥᱢᱮ ᱵᱩᱰᱩᱨ (Chasme Buddoor) ᱟᱨ ᱫᱤᱥᱟ (Disha) ᱞᱮᱠᱟᱱ ᱥᱤᱨᱯᱟᱹ ᱧᱟᱢ ᱢᱩᱵᱷᱤ ᱨᱮᱱ ᱰᱟᱭᱨᱮᱠᱴᱚᱨ ᱠᱟᱱᱟᱭ᱾ ᱩᱱᱤ ᱫᱚ ᱡᱟᱥᱣᱟᱱᱫᱤ (Jaswandi), ᱥᱟᱠᱠᱷᱮ ᱥᱮᱡᱟᱨᱤ (Sakkhe Shejari), ᱟᱨ ᱟᱞᱵᱮᱞ (Albel) ᱞᱮᱠᱟᱱ ᱟᱭᱢᱟ ᱢᱟᱨᱟᱴᱷᱤ ᱜᱟᱭᱟᱱ ᱦᱚᱸᱭ ᱚᱞ ᱟᱠᱟᱫᱟ ᱟᱨ ᱰᱟᱭᱨᱮᱠᱴ ᱟᱠᱟᱫᱟ᱾

ᱩᱱᱤ ᱫᱚ ᱔ ᱜᱚᱴᱟᱝ ᱡᱟᱹᱛᱤᱭᱟᱹᱨᱤ ᱯᱷᱤᱞᱢ ᱥᱤᱨᱯᱟᱹ (National Film Awards) ᱟᱨ ᱒ ᱜᱚᱴᱟᱝ ᱯᱷᱤᱞᱢᱯᱷᱮᱭᱟᱨ ᱥᱤᱨᱯᱟᱹ (Filmfare awards) ᱮ ᱡᱤᱛᱠᱟᱹᱨ ᱟᱠᱟᱱᱟ᱾ ᱵᱷᱟᱨᱚᱛ ᱥᱚᱨᱠᱟᱨ ᱫᱚ ᱩᱱᱤᱭᱟᱜ ᱵᱟᱰᱚᱦᱤ ᱫᱟᱲᱮ ᱠᱚ ᱵᱟᱰᱟᱭ ᱠᱟᱛᱮ ᱒᱐᱐᱖ ᱥᱟᱞᱮ ᱨᱮ ᱥᱟᱭ ᱫᱚ ᱯᱟᱫᱽᱢᱟ ᱵᱷᱩᱥᱚᱬ (Padma Bhushan) ᱛᱮᱭ ᱢᱟᱱ ᱥᱟᱨᱦᱟᱣ ᱞᱮᱫᱮᱭᱟ᱾

ᱮᱛᱚᱦᱚᱵ ᱥᱮᱨᱢᱟ

ᱥᱟᱭ ᱯᱟᱨᱟᱧᱡᱽᱯᱮ ᱫᱚ ᱑᱙ ᱢᱟᱨᱪ ᱑᱙᱓᱘ ᱥᱟᱞᱮ ᱨᱮ ᱢᱩᱢᱵᱟᱭ (Mumbai) ᱨᱮ ᱨᱩᱥᱤᱭᱟᱱ ᱤᱣᱨᱟ ᱥᱞᱮᱯᱴᱡᱚᱯᱷ (Russian Youra Sleptzoff) ᱟᱨ ᱥᱟᱠᱩᱱᱛᱟᱞᱟ ᱯᱟᱨᱟᱧᱡᱽᱯᱮ (Shakuntala Paranjpye) ᱴᱷᱮᱱ ᱡᱟᱱᱟᱢ ᱞᱮᱱᱟ᱾ ᱥᱞᱮᱯᱴᱡᱚᱯᱷ ᱫᱚ ᱢᱤᱫ ᱨᱩᱥᱤᱭᱟᱱ ᱣᱟᱴᱚᱨᱠᱚᱞᱚᱨ ᱟᱨᱴᱤᱥᱴ (watercolor artist) ᱟᱨ ᱢᱤᱫ ᱨᱩᱥᱤᱭᱟᱱ ᱡᱮᱱᱮᱨᱟᱞ (Russian general) ᱨᱮᱱ ᱦᱚᱯᱚᱱ ᱮ ᱛᱟᱦᱮᱸ ᱠᱟᱱᱟ᱾ ᱥᱟᱠᱩᱱᱛᱟᱞᱟ ᱫᱚ ᱑᱙᱓᱐ ᱟᱨ ᱑᱙᱔᱐ ᱜᱮᱞᱟᱝ ᱨᱮ ᱢᱟᱨᱟᱴᱷᱤ (Marathi) ᱟᱨ ᱦᱤᱱᱫᱤ ᱯᱷᱤᱞᱢ ᱨᱮᱱ ᱮᱠᱴᱚᱨ ᱮ ᱛᱟᱦᱮᱸ ᱠᱟᱱᱟ, ᱚᱱᱟ ᱠᱚ ᱢᱩᱫᱽ ᱨᱮ ᱵᱷᱤ. ᱥᱟᱱᱛᱟᱨᱟᱢ ᱟᱜ ᱦᱤᱱᱫᱤ ᱥᱟᱶᱛᱟ ᱠᱞᱟᱥᱤᱠ, ᱫᱩᱱᱤᱭᱟ ᱱᱟ ᱢᱟᱱᱮ (Duniya Na Mane) (᱑᱙᱓᱗) ᱦᱚᱸ ᱥᱮᱞᱮᱫ ᱛᱟᱦᱮᱸ ᱠᱟᱱᱟ᱾ ᱛᱟᱭᱚᱢ ᱛᱮ ᱩᱱᱤ ᱫᱚ ᱢᱤᱫ ᱚᱱᱚᱞᱤᱭᱟᱹ (writer) ᱟᱨ ᱥᱟᱶᱛᱟ ᱥᱮᱵᱟᱭᱤᱡ (social worker) ᱮ ᱵᱮᱱᱟᱣ ᱮᱱᱟ, ᱩᱱᱤ ᱫᱚ ᱨᱟᱡᱽᱭᱚ ᱥᱚᱵᱷᱟ (Rajya Sabha) ᱨᱮ ᱧᱩᱛᱩᱢ ᱛᱟᱭ ᱚᱞ ᱞᱮᱱᱟ, ᱱᱚᱣᱟ ᱫᱚ ᱵᱷᱟᱨᱚᱛᱤᱭᱚ ᱥᱚᱝᱥᱚᱫ (Indian Parliament) ᱨᱮᱱᱟᱜ ᱪᱮᱛᱟᱱ ᱚᱲᱟᱜ (Upper House) ᱠᱟᱱᱟ ᱟᱨ ᱩᱱᱤ ᱫᱚ ᱒᱐᱐᱖ ᱥᱟᱞᱮ ᱨᱮ ᱯᱟᱫᱽᱢᱟ ᱵᱷᱩᱥᱚᱬ (Padma Bhushan) ᱥᱤᱨᱯᱟᱹ ᱠᱚ ᱪᱟᱞ ᱟᱫᱮᱭᱟ᱾

ᱥᱟᱭ ᱨᱮᱱ ᱟᱭᱳ ᱵᱟᱵᱟ ᱫᱚ ᱩᱱᱤ ᱡᱟᱱᱟᱢ ᱠᱟᱛᱮ ᱠᱤᱪᱷᱩ ᱫᱤᱱ ᱛᱟᱭᱚᱢ ᱜᱮ ᱠᱤᱱ ᱵᱟᱯᱟᱜ ᱪᱟᱵᱟ ᱞᱮᱱᱟ᱾ ᱩᱱᱤᱭᱟᱜ ᱮᱸᱜᱟᱛ ᱫᱚ ᱥᱟᱭ ᱫᱚ ᱟᱡ ᱨᱮᱱ ᱟᱯᱟᱛ ᱥᱟᱦᱟᱨ ᱟᱨ. ᱯᱤ. ᱯᱟᱨᱟᱧᱡᱽᱯᱮ ᱟᱜ ᱚᱲᱟᱜ ᱨᱮᱭ ᱦᱟᱨᱟ ᱵᱩᱨᱩ ᱠᱮᱫᱮᱭᱟ, ᱡᱟᱦᱟᱸᱭ ᱫᱚ ᱧᱩᱛᱩᱢᱟᱱ ᱮᱞᱠᱷᱟ ᱥᱟᱬᱮᱥᱤᱭᱟᱹ (mathematician) ᱟᱨ ᱥᱮᱪᱮᱫᱤᱭᱟᱹ (educationist) ᱮ ᱛᱟᱦᱮᱸ ᱠᱟᱱᱟ ᱟᱨ ᱡᱟᱦᱟᱸᱭ ᱫᱚ ᱑᱙᱔᱔ ᱠᱷᱚᱱ ᱑᱙᱔᱗ ᱥᱟᱞᱮ ᱫᱷᱟᱹᱵᱤᱡ ᱵᱷᱟᱨᱚᱛ ᱨᱮᱱ ᱚᱥᱴᱨᱮᱞᱤᱭᱟ (Australia) ᱨᱮᱱ ᱪᱮᱛᱟᱱ ᱠᱚᱢᱤᱥᱚᱱᱟᱨ (High Commissioner) ᱞᱮᱠᱟᱛᱮᱭ ᱠᱟᱹᱢᱤ ᱞᱮᱫᱟ᱾ ᱚᱱᱠᱟ ᱛᱮ ᱥᱟᱭ ᱫᱚ ᱵᱷᱟᱨᱚᱛ ᱨᱮᱱᱟᱜ ᱟᱭᱢᱟ ᱥᱚᱦᱚᱨ ᱨᱮᱭ ᱦᱟᱨᱟ ᱵᱩᱨᱩ ᱮᱱᱟ ᱟᱨ ᱥᱮᱪᱮᱫ ᱮ ᱧᱟᱢ ᱠᱮᱫᱟ, ᱚᱱᱟ ᱠᱚ ᱢᱩᱫᱽ ᱨᱮ ᱯᱩᱱᱮ (Pune) ᱦᱚᱸ ᱥᱮᱞᱮᱫ ᱛᱟᱦᱮᱸ ᱠᱟᱱᱟ, ᱟᱨ ᱠᱤᱪᱷᱩ ᱥᱮᱨᱢᱟ ᱫᱚ ᱚᱥᱴᱨᱮᱞᱤᱭᱟ ᱨᱮᱱᱟᱜ ᱠᱮᱱᱵᱮᱨᱟ (Canberra) ᱨᱮᱦᱚᱸᱭ ᱛᱟᱦᱮᱸ ᱠᱟᱱᱟ᱾ ᱜᱤᱫᱽᱨᱟᱹ ᱵᱮᱲᱟ ᱨᱮ, ᱩᱱᱤ ᱫᱚ ᱟᱡ ᱨᱮᱱ ᱠᱟᱠᱟ ᱟᱪᱭᱩᱛ ᱨᱟᱱᱟᱰᱮ ᱟᱜ ᱚᱲᱟᱜ ᱛᱮ ᱛᱟᱲᱟᱢ ᱠᱟᱛᱮᱭ ᱥᱮᱱᱚᱜ ᱠᱟᱱ ᱛᱟᱦᱮᱸᱱᱟ, ᱡᱟᱦᱟᱸᱭ ᱫᱚ ᱔᱐ ᱟᱨ ᱕᱐ ᱜᱮᱞᱟᱝ ᱨᱮᱱ ᱧᱩᱛᱩᱢᱟᱱ ᱯᱷᱤᱞᱢ ᱵᱮᱱᱟᱣᱤᱡ ᱮ ᱛᱟᱦᱮᱸ ᱠᱟᱱᱟ, ᱡᱟᱦᱟᱸᱭ ᱫᱚ ᱠᱟᱹᱦᱱᱤ ᱠᱚ ᱞᱟᱹᱭ ᱮᱫ ᱛᱟᱦᱮᱸᱱᱟ ᱡᱮᱢᱚᱱ ᱩᱱᱤ ᱫᱚ ᱥᱠᱨᱤᱱᱯᱞᱮ (screenplay) ᱮ ᱞᱟᱹᱭ ᱮᱫ ᱠᱟᱱ ᱞᱮᱠᱟ᱾ ᱥᱟᱭ ᱫᱚ ᱡᱤᱭᱚᱱ ᱨᱮ ᱮᱛᱚᱦᱚᱵ ᱨᱮᱜᱮ ᱚᱞ ᱮ ᱮᱛᱚᱦᱚᱵ ᱠᱮᱫᱟ: ᱩᱱᱤᱭᱟᱜ ᱯᱩᱭᱞᱩ ᱯᱷᱮᱭᱨᱤ ᱴᱮᱞ (fairy tale) ᱨᱮᱱᱟᱜ ᱯᱚᱛᱚᱵ – ᱢᱩᱞᱟᱸᱪᱟ ᱢᱮᱣᱟ (Mulānchā Mewā) (ᱢᱟᱨᱟᱴᱷᱤ ᱛᱮ), ᱩᱱᱤ ᱡᱚᱠᱷᱚᱱ ᱤᱨᱟᱹᱞ ᱵᱚᱪᱷᱚᱨ ᱮ ᱛᱟᱦᱮᱸ ᱠᱟᱱᱟ ᱩᱱ ᱡᱚᱠᱷᱚᱡ ᱩᱪᱷᱟᱹᱱ ᱞᱮᱱᱟ᱾

ᱯᱟᱨᱟᱧᱡᱽᱯᱮ ᱫᱚ ᱑᱙᱖᱓ ᱥᱟᱞᱮ ᱨᱮ ᱱᱮᱥᱱᱟᱞ ᱥᱠᱩᱞ ᱚᱯᱷ ᱰᱨᱟᱢᱟ (National School of Drama) (NSD), ᱱᱟᱣᱟ ᱫᱤᱞᱞᱤ ᱠᱷᱚᱱ ᱜᱨᱮᱡᱩᱣᱮᱴ ᱞᱮᱱᱟ᱾

ᱠᱮᱨᱤᱭᱚᱨ

ᱯᱟᱨᱟᱧᱡᱽᱯᱮ ᱫᱚ ᱟᱡᱟᱜ ᱠᱮᱨᱤᱭᱚᱨ ᱫᱚ ᱯᱩᱱᱮ, ᱢᱚᱦᱟᱨᱟᱥᱴᱨᱚ, ᱵᱷᱟᱨᱚᱛ ᱨᱮ ᱚᱞ ᱤᱱᱰᱤᱭᱟ ᱨᱮᱰᱤᱭᱳ (All India Radio) (AIR) ᱨᱮ ᱟᱱᱟᱣᱩᱱᱥᱚᱨ (announcer) ᱞᱮᱠᱟᱛᱮᱭ ᱮᱛᱚᱦᱚᱵ ᱠᱮᱫᱟ ᱟᱨ ᱩᱥᱟᱹᱨᱟ ᱜᱮ ᱮ.ᱟᱭᱤ.ᱟᱨ. ᱨᱮᱱᱟᱜ ᱜᱤᱫᱽᱨᱟᱹ ᱠᱟᱹᱢᱤᱦᱚᱨᱟ (Children's Program) ᱨᱮᱭ ᱥᱮᱞᱮᱫ ᱮᱱᱟ᱾

ᱥᱮᱨᱢᱟ ᱠᱚ ᱵᱤᱛᱟᱹᱣᱮᱱ ᱥᱟᱶ ᱥᱟᱶᱛᱮ, ᱯᱟᱨᱟᱧᱡᱽᱯᱮ ᱫᱚ ᱦᱟᱨᱟ ᱦᱚᱲ ᱟᱨ ᱜᱤᱫᱽᱨᱟᱹ ᱞᱟᱹᱜᱤᱫ ᱢᱟᱨᱟᱴᱷᱤ, ᱦᱤᱱᱫᱤ, ᱟᱨ ᱤᱝᱜᱽᱞᱤᱥ ᱛᱮ ᱜᱟᱭᱟᱱ ᱠᱚᱭ ᱚᱞ ᱟᱠᱟᱫᱟ ᱟᱨ ᱰᱟᱭᱨᱮᱠᱴ ᱟᱠᱟᱫᱟ᱾ ᱩᱱᱤ ᱫᱚ ᱛᱩᱨᱩᱭ ᱜᱚᱴᱟᱝ ᱯᱷᱤᱪᱟᱨ ᱯᱷᱤᱞᱢ (feature films), ᱵᱟᱨᱭᱟ ᱜᱤᱫᱽᱨᱟᱹ ᱯᱷᱤᱞᱢ, ᱟᱨ ᱢᱚᱬᱮ ᱜᱚᱴᱟᱝ ᱰᱚᱠᱩᱢᱮᱱᱴᱨᱤ (documentaries) ᱠᱚᱭ ᱚᱞ ᱟᱠᱟᱫᱟ ᱟᱨ ᱰᱟᱭᱨᱮᱠᱴ ᱟᱠᱟᱫᱟ᱾ ᱩᱱᱤ ᱫᱚ ᱜᱤᱫᱽᱨᱟᱹ ᱞᱟᱹᱜᱤᱫ ᱟᱭᱢᱟ ᱯᱚᱛᱚᱵ ᱮ ᱚᱞ ᱟᱠᱟᱫᱟ, ᱟᱨ ᱩᱱᱟᱹᱜ ᱢᱩᱫᱽ ᱠᱷᱚᱱ ᱛᱩᱨᱩᱭ ᱜᱚᱴᱟᱝ ᱫᱚ ᱡᱟᱹᱛᱤᱭᱟᱹᱨᱤ ᱥᱮ ᱯᱚᱱᱚᱛ ᱞᱮᱵᱮᱞ ᱨᱮ ᱥᱤᱨᱯᱟᱹ ᱠᱚ ᱡᱤᱛᱠᱟᱹᱨ ᱟᱠᱟᱱᱟ᱾

ᱯᱟᱨᱟᱧᱡᱽᱯᱮ ᱫᱚ ᱫᱤᱞᱞᱤ ᱨᱮ ᱫᱩᱨᱫᱚᱨᱥᱚᱱ ᱴᱮᱞᱤᱵᱤᱡᱚᱱ ᱥᱟᱶ ᱰᱟᱭᱨᱮᱠᱴᱚᱨ ᱥᱮ ᱵᱮᱱᱟᱣᱤᱡ ᱞᱮᱠᱟᱛᱮ ᱟᱭᱢᱟ ᱥᱮᱨᱢᱟ ᱠᱟᱹᱢᱤ ᱟᱠᱟᱫᱟ᱾ ᱩᱱᱤᱭᱟᱜ ᱯᱩᱭᱞᱩ ᱴᱤᱵᱷᱤ ᱞᱟᱹᱜᱤᱫ ᱵᱮᱱᱟᱣ ᱟᱠᱟᱱ ᱢᱩᱵᱷᱤ – ᱫᱟ ᱞᱤᱴᱤᱞ ᱴᱤ ᱥᱚᱯ (The Little Tea Shop) (᱑᱙᱗᱒), ᱤᱨᱟᱱ ᱨᱮᱱᱟᱜ ᱛᱮᱦᱮᱨᱟᱱ (Teheran) ᱨᱮ ᱮᱥᱤᱭᱟᱱ ᱵᱨᱚᱰᱠᱟᱥᱴᱤᱝ ᱤᱭᱩᱱᱤᱭᱚᱱ ᱥᱤᱨᱯᱟᱹ ᱮ ᱡᱤᱛᱠᱟᱹᱨ ᱮᱱᱟ᱾ ᱚᱱᱟ ᱥᱮᱨᱢᱟ ᱜᱮ, ᱩᱱᱤ ᱫᱚ ᱵᱚᱢᱵᱮ (ᱢᱩᱢᱵᱟᱭ) ᱫᱩᱨᱫᱚᱨᱥᱚᱱ ᱨᱮᱱᱟᱜ ᱩᱰᱟᱹᱣ ᱠᱟᱹᱢᱤᱦᱚᱨᱟ (inaugural program) ᱵᱮᱱᱟᱣ ᱞᱟᱹᱜᱤᱫ ᱮ ᱵᱟᱪᱷᱟᱣ ᱮᱱᱟ᱾

᱑᱙᱗᱐ ᱜᱮᱞᱟᱝ ᱨᱮ, ᱯᱟᱨᱟᱧᱡᱽᱯᱮ ᱫᱚ ᱵᱟᱨ ᱫᱷᱟᱣ ᱵᱷᱟᱨᱚᱛ ᱨᱮᱱᱟᱜ ᱪᱤᱞᱰᱨᱮᱱᱥ ᱯᱷᱤᱞᱢ ᱥᱚᱥᱟᱭᱤᱴᱤ ᱚᱯᱷ ᱤᱱᱰᱤᱭᱟ (Children's Film Society of India) (CFSI) ᱨᱮᱱ ᱪᱮᱭᱟᱨᱯᱟᱨᱥᱚᱱ (Chairperson) ᱞᱮᱠᱟᱛᱮᱭ ᱠᱟᱹᱢᱤ ᱞᱮᱫᱟ, ᱡᱟᱦᱟᱸ ᱫᱚ ᱵᱷᱟᱨᱚᱛ ᱥᱚᱨᱠᱟᱨ ᱨᱮᱱᱟᱜ ᱜᱤᱫᱽᱨᱟᱹ ᱠᱚ ᱞᱟᱹᱜᱤᱫ ᱜᱚᱱᱚᱝ ᱵᱷᱤᱛᱤᱨ ᱛᱮ ᱛᱚᱨᱚᱡ ᱵᱷᱩᱨ ᱠᱟᱹᱢᱤ ᱞᱟᱹᱜᱤᱫ ᱦᱟᱛᱟᱣ ᱟᱠᱟᱱᱟ᱾ ᱩᱱᱤ ᱫᱚ ᱥᱤ.ᱮᱯᱷ.ᱮᱥ.ᱟᱭᱤ. ᱞᱟᱹᱜᱤᱫ ᱯᱩᱱᱭᱟᱹ ᱜᱤᱫᱽᱨᱟᱹ ᱯᱷᱤᱞᱢ ᱮ ᱵᱮᱱᱟᱣ ᱠᱮᱫᱟ, ᱚᱱᱟ ᱠᱚ ᱢᱩᱫᱽ ᱨᱮ ᱥᱤᱨᱯᱟᱹ ᱧᱟᱢ ᱡᱟᱹᱫᱩ ᱠᱟ ᱥᱟᱝᱠᱷ (Jādoo Kā Shankh) (᱑᱙᱗᱔) ᱟᱨ ᱥᱤᱠᱟᱱᱫᱟᱨ (Sikandar) (᱑᱙᱗᱖) ᱦᱚᱸ ᱥᱮᱞᱮᱫ ᱛᱟᱦᱮᱸ ᱠᱟᱱᱟ᱾

ᱯᱟᱨᱟᱧᱡᱽᱯᱮ ᱭᱟᱜ ᱯᱩᱭᱞᱩ ᱯᱷᱤᱪᱟᱨ ᱯᱷᱤᱞᱢ ᱥᱯᱚᱨᱥ (Sparsh) (ᱫᱟ ᱴᱚᱪ - The Touch), ᱑᱙᱘᱐ ᱥᱟᱞᱮ ᱨᱮ ᱨᱤᱞᱤᱡᱽ ᱞᱮᱱᱟ᱾ ᱱᱚᱣᱟ ᱫᱚ ᱡᱟᱹᱛᱤᱭᱟᱹᱨᱤ ᱯᱷᱤᱞᱢ ᱥᱤᱨᱯᱟᱹ ᱥᱟᱶ ᱢᱚᱬᱮ ᱜᱚᱴᱟᱝ ᱯᱷᱤᱞᱢ ᱥᱤᱨᱯᱟᱹ ᱮ ᱡᱤᱛᱠᱟᱹᱨ ᱮᱱᱟ᱾ ᱥᱯᱚᱨᱥ ᱛᱟᱭᱚᱢ ᱠᱚᱢᱮᱰᱤ ᱪᱟᱥᱢᱮ ᱵᱩᱰᱩᱨ (Chashme Buddoor) (᱑᱙᱘᱑) ᱟᱨ ᱠᱟᱛᱷᱟ (Kathā) (᱑᱙᱘᱒) ᱦᱮᱡ ᱮᱱᱟ᱾ ᱠᱟᱛᱷᱟ ᱫᱚ ᱦᱟᱨᱮ (hare) ᱟᱨ ᱴᱚᱨᱴᱚᱭᱤᱥ (tortoise) ᱟᱜ ᱠᱟᱹᱦᱱᱤ ᱪᱮᱛᱟᱱ ᱨᱮ ᱵᱮᱱᱟᱣ ᱟᱠᱟᱱ ᱢᱤᱫ ᱥᱮᱨᱮᱧ ᱛᱟᱦᱟᱸ ᱠᱟᱱᱟ᱾ ᱚᱱᱟ ᱛᱟᱭᱚᱢ ᱩᱱᱤ ᱫᱚ ᱴᱤᱵᱷᱤ ᱥᱤᱨᱤᱭᱟᱞ ᱮᱰᱚᱥ ᱯᱚᱰᱚᱥ (Ados Pados) (᱑᱙᱘᱔) ᱟᱨ ᱪᱷᱚᱴᱮ ᱵᱟᱰᱮ (Chhote Bade) (᱑᱙᱘᱕) ᱮ ᱵᱮᱱᱟᱣ ᱠᱮᱫᱟ᱾ ᱯᱟᱨᱟᱧᱡᱽᱯᱮ ᱫᱚ ᱢᱟᱨᱟᱴᱷᱤ ᱜᱟᱭᱟᱱ ᱢᱟᱡᱟ ᱠᱷᱮᱞ ᱢᱟᱱᱰᱩ ᱫᱮ ᱞᱟᱹᱜᱤᱫ ᱰᱟᱭᱨᱮᱠᱴᱚᱨ, ᱚᱱᱚᱞᱤᱭᱟᱹ ᱟᱨ ᱞᱟᱹᱭ ᱟᱸᱡᱚᱢᱤᱡ ᱞᱮᱠᱟᱛᱮᱭ ᱠᱟᱹᱢᱤ ᱞᱮᱫᱟ᱾ ᱱᱚᱣᱟ ᱫᱚ ᱒᱗ ᱥᱮᱯᱴᱮᱢᱵᱚᱨ ᱑᱙᱘᱖ ᱥᱟᱞᱮ ᱨᱮ ᱜᱟᱰᱠᱟᱨᱤ ᱨᱟᱝᱜᱟᱭᱟᱛᱟᱱ, ᱴᱷᱟᱱᱮ ᱨᱮ ᱠᱚ ᱩᱫᱩᱜ ᱞᱮᱫᱟ᱾

ᱯᱟᱨᱟᱧᱡᱽᱯᱮ ᱭᱟᱜ ᱛᱟᱭᱚᱢ ᱢᱩᱵᱷᱤ ᱠᱚ ᱢᱩᱫᱽ ᱨᱮ ᱚᱝᱜᱩᱴᱟ ᱪᱷᱟᱯ (Angoothā Chhāp) (᱑᱙᱘᱘) ᱫᱚ ᱡᱟᱹᱛᱤᱭᱟᱹᱨᱤ ᱥᱮᱪᱮᱫ ᱢᱤᱥᱚᱱ (National Literacy Mission) ᱵᱟᱵᱚᱛ ᱛᱮ ᱛᱟᱦᱮᱸ ᱠᱟᱱᱟ; ᱫᱤᱥᱟ (Disha) (᱑᱙᱙᱐) ᱫᱚ ᱤᱢᱤᱜᱽᱨᱮᱱᱴ ᱠᱟᱹᱢᱤᱭᱟᱹ (immigrant workers) ᱠᱚᱣᱟᱜ ᱵᱟᱹᱲᱤᱡ ᱦᱟᱞᱚᱛ ᱵᱟᱵᱚᱛ ᱛᱮ ᱛᱟᱦᱮᱸ ᱠᱟᱱᱟ; ᱯᱟᱯᱤᱦᱟ (ᱯᱷᱚᱨᱮᱥᱴ ᱞᱚᱵᱽ ᱵᱟᱨᱰ) (Papeeha (Forest Love Bird)) (᱑᱙᱙᱓); ᱥᱟᱡᱽ (Saaz) (᱑᱙᱙᱗) (ᱥᱚᱢᱵᱷᱚᱵ ᱞᱮᱠᱟᱛᱮ ᱵᱷᱟᱨᱚᱛᱤᱭᱚ ᱯᱞᱮᱵᱮᱠ ᱥᱮᱨᱮᱧ ᱵᱚᱭᱦᱟ ᱢᱤᱥᱨᱟ ᱠᱚ, ᱞᱟᱛᱟ ᱢᱟᱝᱜᱮᱥᱠᱚᱨ (Lata Mangeshkar) ᱟᱨ ᱟᱥᱟ ᱵᱷᱚᱥᱞᱮ (Asha Bhosle) ᱠᱚᱣᱟᱜ ᱡᱤᱭᱚᱱ ᱠᱷᱚᱱ ᱦᱟᱛᱟᱣ ᱟᱠᱟᱱᱟ); ᱟᱨ ᱪᱟᱠᱟ ᱪᱟᱠ (Chakā Chak) (᱒᱐᱐᱕), ᱱᱚᱣᱟ ᱫᱚ ᱥᱟᱹᱢᱩᱸᱫᱽ ᱦᱚᱭ ᱫᱩᱥᱤᱛ ᱵᱟᱵᱚᱛ ᱛᱮ ᱦᱚᱲ ᱠᱚ ᱵᱟᱰᱟᱭ ᱪᱤᱱᱦᱟᱹᱣ ᱞᱟᱹᱜᱤᱫ ᱵᱮᱱᱟᱣ ᱟᱠᱟᱱᱟ᱾

ᱩᱱᱤ ᱫᱚ ᱦᱚᱢ ᱯᱟᱸᱪᱷᱤ ᱮᱠ ᱪᱟᱣᱩᱞ ᱠᱮ, ᱯᱟᱨᱴᱤᱭᱟᱱᱟ ᱟᱨ ᱵᱮᱦᱱᱟ ᱞᱮᱠᱟᱱ ᱥᱤᱨᱤᱭᱟᱞ ᱦᱚᱸᱭ ᱵᱮᱱᱟᱣ ᱠᱮᱫᱟ᱾ ᱥᱨᱤᱫᱷᱚᱨ ᱨᱟᱝᱜᱟᱭᱟᱱ ᱫᱚ ᱩᱱᱤ ᱯᱷᱤᱞᱢ ᱯᱟᱯᱤᱦᱟ ᱟᱨ ᱥᱤᱨᱤᱭᱟᱞ ᱦᱚᱢ ᱯᱟᱸᱪᱷᱤ ᱮᱠ ᱪᱟᱣᱩᱞ ᱠᱮ ᱟᱨ ᱯᱟᱨᱴᱤᱭᱟᱱᱟ ᱨᱮ ᱜᱚᱲᱚ ᱟᱫᱮ ᱛᱟᱦᱮᱸᱱᱟ᱾

ᱯᱟᱨᱟᱧᱡᱽᱯᱮ ᱫᱚ ᱢᱟᱡᱟ ᱠᱷᱮᱞ ᱢᱟᱱᱰᱩ ᱫᱮ, ᱡᱟᱥᱣᱟᱱᱫᱤ ᱟᱨ ᱥᱟᱠᱷᱮ ᱥᱮᱡᱟᱨᱤ ᱞᱮᱠᱟᱱ ᱜᱟᱭᱟᱱ ᱠᱚ ᱦᱚᱸᱭ ᱚᱞ ᱟᱠᱟᱫᱟ ᱟᱨ ᱥᱴᱮᱡ ᱨᱮᱭ ᱩᱫᱩᱜ ᱟᱠᱟᱫᱟ᱾

ᱯᱟᱨᱟᱧᱡᱽᱯᱮ ᱫᱚ ᱦᱮᱞᱯᱤᱝ ᱦᱮᱱᱰ (ᱞᱚᱱᱰᱚᱱ), ᱴᱚᱠᱤᱝ ᱵᱩᱠᱥ, ᱠᱮᱯᱴᱚᱱ ᱞᱚᱠᱷᱢᱤ, ᱣᱟᱨᱱᱟ ᱚᱨᱠᱮᱥᱴᱨᱟ, ᱟᱨ ᱯᱚᱝᱠᱚᱡ ᱢᱩᱞᱞᱤᱠ ᱞᱮᱠᱟᱱ ᱟᱭᱢᱟ ᱰᱚᱠᱩᱢᱮᱱᱴᱨᱤ ᱢᱩᱵᱷᱤ ᱦᱚᱸᱭ ᱰᱟᱭᱨᱮᱠᱴ ᱟᱠᱟᱫᱟ᱾ ᱩᱱᱤᱭᱟᱜ ᱑᱙᱙᱓ ᱥᱟᱞᱮ ᱨᱮ ᱵᱮᱱᱟᱣ ᱟᱠᱟᱱ ᱰᱚᱠᱩᱢᱮᱱᱴᱨᱤ ᱪᱩᱰᱤᱭᱟᱸ, ᱡᱟᱦᱟᱸ ᱫᱚ ᱯᱷᱤᱞᱢ ᱰᱤᱵᱷᱤᱡᱚᱱ ᱞᱟᱹᱜᱤᱫ ᱢᱚᱦᱟᱨᱟᱥᱴᱨᱚ ᱟᱹᱛᱩ ᱨᱮ ᱵᱮᱱᱟᱣ ᱟᱠᱟᱱ ᱮᱱᱴᱤ ᱞᱤᱠᱟᱨ ᱮᱡᱤᱴᱮᱥᱚᱱ ᱪᱮᱛᱟᱱ ᱨᱮ ᱵᱮᱱᱟᱣ ᱟᱠᱟᱱᱟ, ᱱᱚᱣᱟ ᱫᱚ ᱥᱟᱶᱛᱟ ᱥᱟᱛᱟᱢ ᱪᱮᱛᱟᱱ ᱨᱮ ᱵᱮᱱᱟᱣ ᱟᱠᱟᱱ ᱱᱟᱯᱟᱭ ᱯᱷᱤᱞᱢ ᱠᱷᱟᱹᱛᱤᱨ ᱡᱟᱹᱛᱤᱭᱟᱹᱨᱤ ᱯᱷᱤᱞᱢ ᱥᱤᱨᱯᱟᱹ ᱮ ᱧᱟᱢ ᱠᱮᱫᱟ᱾

᱒᱐᱐᱑ ᱥᱟᱞᱮ ᱨᱮ, ᱯᱟᱨᱟᱧᱡᱽᱯᱮ ᱫᱚ ᱜᱤᱫᱽᱨᱟᱹ ᱞᱟᱹᱜᱤᱫ ᱵᱷᱟᱜᱳ ᱵᱷᱩᱛ ᱢᱩᱵᱷᱤ ᱮ ᱵᱮᱱᱟᱣ ᱠᱮᱫᱟ᱾ ᱒᱐᱐᱕ ᱥᱟᱞᱮ ᱨᱮ ᱜᱳᱣᱟ ᱨᱮ ᱦᱩᱭ ᱞᱮᱱ ᱯᱩᱭᱞᱩ ᱵᱷᱟᱨᱚᱛᱤᱭᱚ ᱡᱮᱜᱮᱛᱟᱹᱨᱤ ᱛᱤᱨᱞᱟᱹ ᱯᱷᱤᱞᱢ ᱯᱚᱨᱚᱵᱽ ᱨᱮ, ᱩᱱᱤᱭᱟᱜ ᱱᱟᱯᱟᱭ ᱢᱩᱵᱷᱤ ᱠᱚ ᱥᱟᱶᱛᱮ ᱩᱱᱤᱭᱟᱜ ᱢᱩᱵᱷᱤ ᱨᱮᱭᱟᱜ ᱨᱤᱵᱷᱤᱭᱩ ᱦᱩᱭ ᱞᱮᱱᱟ᱾ ᱩᱱᱤ ᱫᱚ ᱒᱐᱐᱗ ᱥᱟᱞᱮ ᱨᱮ ᱕᱕ ᱟᱜ ᱡᱟᱹᱛᱤᱭᱟᱹᱨᱤ ᱯᱷᱤᱞᱢ ᱥᱤᱨᱯᱟᱹ ᱞᱟᱹᱜᱤᱫ ᱵᱟᱪᱷᱟᱣ ᱠᱟᱹᱢᱤ ᱨᱮᱱᱟᱜ ᱢᱩᱬ ᱮ ᱛᱩᱞᱟᱹᱣ ᱞᱮᱫᱟ᱾

ᱡᱩᱞᱟᱭ ᱒᱐᱐᱙ ᱥᱟᱞᱮ ᱨᱮ, ᱯᱟᱨᱟᱧᱡᱽᱯᱮ ᱭᱟᱜ ᱰᱚᱠᱩᱢᱮᱱᱴᱨᱤ ᱯᱷᱤᱞᱢ ᱥᱩᱭ (Suee) ᱨᱤᱞᱤᱡᱽ ᱮᱱᱟ, ᱱᱚᱣᱟ ᱫᱚ ᱥᱟᱣᱛᱷ ᱮᱥᱤᱭᱟ ᱨᱤᱡᱤᱭᱚᱱ ᱰᱮᱵᱷᱮᱞᱚᱯᱢᱮᱱᱴ ᱢᱟᱨᱠᱮᱴᱯᱞᱮᱥ (South Asia Region Development Marketplace) (SAR DM) ᱠᱷᱚᱱ ᱚᱰᱚᱠ ᱮᱱᱟ, ᱱᱚᱣᱟ ᱫᱚ ᱣᱚᱨᱞᱰ ᱵᱮᱝᱠ (World Bank) ᱦᱚᱛᱮᱛᱮ ᱵᱟᱲᱦᱟᱣ ᱟᱠᱟᱱ ᱢᱤᱫ ᱮᱛᱚᱦᱚᱵ ᱛᱟᱦᱮᱸ ᱠᱟᱱᱟ᱾ ᱥᱩᱭ ᱫᱚ ᱴᱨᱤᱴᱢᱮᱱᱴ (treatment), ᱠᱮᱭᱟᱨ (care), ᱯᱤᱭᱟᱨ (peer) ᱟᱨ ᱥᱟᱶᱛᱟ ᱜᱚᱲᱚ, ᱨᱤᱦᱮᱵᱤᱞᱤᱴᱮᱥᱚᱱ (rehabilitation) ᱟᱨ ᱠᱟᱹᱢᱤ ᱴᱷᱟᱶ ᱥᱟᱶᱛᱮ ᱤᱱᱡᱮᱠᱴᱤᱝ ᱰᱨᱚᱜᱽ ᱵᱮᱵᱷᱟᱨᱤᱡ ᱠᱚᱣᱟᱜ ᱡᱤᱭᱚᱱ ᱨᱮ ᱟᱭᱢᱟ ᱴᱚᱴᱷᱟᱭ ᱯᱟᱱᱛᱮ ᱧᱟᱢ ᱠᱮᱫᱟ, ᱟᱨ ᱱᱚᱣᱟ ᱫᱚ ᱢᱩᱢᱵᱟᱭ ᱵᱮᱥᱰ ᱮᱱ.ᱡᱤ.ᱳ. ᱥᱚᱝᱠᱚᱞᱯ ᱨᱤᱦᱮᱵᱤᱞᱤᱴᱮᱥᱚᱱ ᱴᱨᱚᱥᱴ ᱥᱟᱶ ᱜᱟᱛᱮ ᱠᱟᱛᱮ ᱠᱚ ᱵᱮᱱᱟᱣ ᱞᱮᱫᱟ᱾ ᱒᱙ ᱴᱤᱯᱤᱡ ᱨᱮᱱᱟᱜ ᱯᱷᱤᱞᱢ ᱫᱚ ᱣᱚᱨᱞᱰ ᱮᱭᱰᱥ ᱰᱮ (World AIDS Day), ᱑ ᱰᱤᱥᱮᱢᱵᱚᱨ ᱒᱐᱐᱙ ᱦᱤᱞᱚᱜ ᱫᱩᱨᱫᱚᱨᱥᱚᱱ ᱨᱮ ᱩᱫᱩᱜ ᱥᱚᱫᱚᱨ ᱞᱮᱱᱟ᱾

᱒᱐᱑᱖ ᱥᱟᱞᱮ ᱨᱮ, ᱩᱱᱤ ᱫᱚ ᱢᱟᱨᱟᱴᱷᱤ ᱛᱮ ᱚᱞ ᱟᱠᱟᱱ ᱟᱡᱟᱜ ᱟᱴᱚᱵᱟᱭᱚᱜᱽᱨᱟᱯᱷᱤ (autobiography), ᱥᱟᱭᱟ: ᱢᱟᱡᱷᱟ ᱠᱟᱞᱟᱯᱨᱚᱵᱷᱟᱥ ᱮ ᱨᱤᱞᱤᱡᱽ ᱠᱮᱫᱟ᱾ ᱱᱚᱣᱟ ᱫᱚ ᱢᱤᱫ ᱵᱮᱥᱴᱥᱮᱞᱟᱨ ᱛᱟᱦᱮᱸ ᱠᱟᱱᱟ ᱟᱨ ᱒᱐᱒᱐ ᱥᱟᱞᱮ ᱨᱮ ᱱᱚᱣᱟ ᱫᱚ ᱢᱚᱬᱮ ᱫᱷᱟᱣ ᱯᱟᱨᱥᱟᱞ ᱥᱚᱫᱚᱨ ᱞᱮᱱᱟ᱾ ᱚᱱᱟ ᱛᱟᱭᱚᱢ ᱩᱱᱤ ᱫᱚ ᱮ ᱯᱮᱪᱣᱟᱨᱠ ᱠᱣᱤᱞᱴ – ᱮ ᱠᱚᱞᱮᱡ ᱚᱯᱷ ᱢᱟᱭ ᱠᱨᱤᱭᱮᱴᱤᱵᱽ ᱞᱟᱭᱤᱯᱷ, ᱟᱡᱟᱜ ᱟᱴᱚᱵᱟᱭᱚᱜᱽᱨᱟᱯᱷᱤ ᱨᱮᱱᱟᱜ ᱤᱝᱜᱽᱞᱤᱥ ᱵᱷᱚᱨᱥᱚᱱ ᱨᱤᱞᱤᱡᱽ ᱠᱮᱫᱟ, ᱡᱟᱦᱟᱸ ᱨᱮ ᱠᱤᱪᱷᱩ ᱪᱮᱯᱴᱚᱨ ᱫᱚ ᱨᱤᱨᱟᱭᱤᱴ ᱦᱩᱭ ᱟᱠᱟᱱᱟ᱾

ᱱᱤᱡᱮᱨ ᱡᱤᱭᱚᱱ

ᱥᱟᱭ ᱫᱚ ᱛᱷᱤᱭᱮᱴᱚᱨ ᱟᱨᱴᱤᱥᱴ ᱚᱨᱩᱬ ᱡᱳᱜᱽᱞᱮᱠᱟᱨ ᱥᱟᱶ ᱮ ᱵᱟᱯᱞᱟ ᱞᱮᱱᱟ; ᱩᱱᱠᱤᱱ ᱨᱮᱱ ᱜᱳᱣᱛᱚᱢ ᱟᱨ ᱣᱤᱱᱤ ᱧᱩᱛᱩᱢ ᱟᱹᱱᱤᱡ ᱵᱟᱨᱭᱟ ᱜᱤᱫᱽᱨᱟᱹ ᱠᱤᱱ ᱛᱟᱦᱮᱸ ᱠᱟᱱᱟ᱾ ᱵᱟᱯᱞᱟ ᱠᱟᱛᱮ ᱵᱟᱨ ᱥᱮᱨᱢᱟ ᱛᱟᱭᱚᱢ ᱥᱟᱭ ᱟᱨ ᱚᱨᱩᱬ ᱠᱤᱱ ᱵᱷᱮᱜᱟᱨ ᱮᱱᱟ᱾ ᱩᱱᱠᱤᱱ ᱫᱚ ᱚᱨᱩᱬ ᱑᱙᱙᱒ ᱥᱟᱞᱮ ᱨᱮ ᱵᱚᱸᱜᱟ ᱛᱟᱞᱟᱜ ᱫᱷᱟᱹᱵᱤᱡ ᱜᱟᱛᱮ ᱜᱮ ᱠᱤᱱ ᱛᱟᱦᱮᱸ ᱠᱟᱱᱟ᱾ ᱵᱷᱮᱜᱟᱨ ᱠᱟᱛᱮ ᱛᱟᱭᱚᱢ, ᱚᱨᱩᱬ ᱫᱚ ᱥᱟᱭᱟᱜ ᱥᱯᱚᱨᱥ (᱑᱙᱘᱐) ᱟᱨ ᱠᱟᱛᱷᱟ (᱑᱙᱘᱓) ᱨᱮ ᱠᱟᱹᱢᱤ ᱞᱮᱫᱟ᱾ ᱩᱱᱠᱤᱱ ᱨᱮᱱ ᱦᱚᱯᱚᱱ ᱜᱳᱣᱛᱚᱢ ᱡᱳᱜᱽᱞᱮᱠᱟᱨ ᱫᱚ ᱢᱟᱨᱟᱴᱷᱤ ᱯᱷᱤᱞᱢ ᱨᱮᱱ ᱰᱟᱭᱨᱮᱠᱴᱚᱨ ᱠᱟᱱᱟᱭ (ᱯᱟᱠ ᱯᱟᱠ ᱯᱟᱠᱟᱠ, ᱡᱚᱭ ᱡᱚᱭ ᱢᱚᱦᱟᱨᱟᱥᱴᱨᱚ ᱢᱟᱡᱟ) ᱟᱨ ᱢᱤᱫ ᱯᱨᱚᱯᱷᱮᱥᱚᱱᱟᱞ ᱠᱮᱢᱮᱨᱟᱢᱮᱱ (professional cameraman) ᱦᱚᱸ ᱠᱟᱱᱟᱭ, ᱟᱨ ᱩᱱᱠᱤᱱ ᱨᱮᱱ ᱠᱩᱲᱤ ᱜᱤᱫᱽᱨᱟᱹ ᱣᱤᱱᱤ ᱯᱟᱨᱟᱧᱡᱽᱯᱮ ᱡᱳᱜᱽᱞᱮᱠᱟᱨ ᱫᱚ ᱢᱤᱫ ᱥᱮᱪᱮᱫᱤᱭᱟᱹ ᱟᱨ ᱚᱲᱟᱜ ᱵᱷᱤᱛᱨᱤ ᱨᱮ ᱠᱟᱹᱢᱤ ᱠᱟᱱ ᱦᱚᱲ ᱠᱟᱱᱟᱭ᱾ ᱣᱤᱱᱤ ᱫᱚ ᱑᱙᱘᱐ ᱥᱟᱞᱮ ᱨᱮ ᱥᱟᱭᱟᱜ ᱟᱭᱢᱟ ᱢᱩᱵᱷᱤ, ᱜᱟᱭᱟᱱ ᱟᱨ ᱴᱤᱵᱷᱤ ᱥᱤᱨᱤᱭᱟᱞ ᱠᱚᱨᱮ ᱠᱟᱹᱢᱤ ᱟᱠᱟᱫᱟ᱾ ᱣᱤᱱᱤ ᱟᱨ ᱩᱱᱤ ᱨᱮᱱ ᱡᱟᱶᱟᱭ, ᱡᱟᱦᱟᱸᱭ ᱱᱤᱛ ᱵᱟᱹᱱᱩᱜ ᱮᱭᱟ, ᱨᱮᱱ ᱟᱵᱤᱨ ᱟᱨ ᱟᱱᱥᱩᱱᱤ ᱧᱩᱛᱩᱢ ᱟᱹᱱᱤᱡ ᱵᱟᱨᱭᱟ ᱜᱤᱫᱽᱨᱟᱹ ᱢᱮᱱᱟᱜ ᱠᱤᱱᱟ᱾ ᱜᱳᱣᱛᱚᱢ ᱫᱚ ᱱᱟᱱᱟ ᱯᱟᱴᱮᱠᱟᱨ ᱟᱜ ᱰᱟᱭᱨᱮᱠᱥᱚᱱ ᱦᱚᱛᱮᱛᱮ ᱵᱮᱱᱟᱣ ᱟᱠᱟᱱ ᱯᱨᱟᱦᱟᱨ ᱨᱮ ᱠᱚᱲᱟ ᱞᱤᱰ ᱞᱮᱠᱟᱛᱮ ᱟᱨ ᱢᱟᱫᱷᱩᱨᱤ ᱫᱤᱠᱥᱤᱛ ᱠᱩᱲᱤ ᱞᱤᱰ ᱞᱮᱠᱟᱛᱮ ᱠᱤᱱ ᱠᱟᱹᱢᱤ ᱟᱠᱟᱫᱟ᱾

ᱵᱟᱦᱨᱮ ᱡᱚᱱᱚᱲ

• ᱥᱟᱭ ᱯᱟᱨᱟᱧᱡᱽᱯᱮ (ᱤᱱᱴᱚᱨᱱᱮᱴ ᱢᱩᱵᱷᱤ ᱰᱟᱴᱟᱵᱮᱥ ᱨᱮ)