ᱥᱟᱵᱤᱛᱨᱤ ᱫᱮᱵᱤ

ᱥᱟᱵᱤᱛᱨᱤ ᱫᱮᱵᱤ ᱢᱩᱠᱷᱟᱨᱡᱤ (30 ᱥᱮᱯᱴᱮᱢᱵᱚᱨ 1905 - 22 ᱚᱠᱴᱚᱵᱚᱨ 1982) ᱫᱚ ᱜᱽᱨᱤᱠ-ᱯᱷᱨᱟᱱᱥᱤᱥᱤ ᱚᱱᱚᱞᱤᱭᱟᱹ ᱢᱟᱠᱥᱤᱢᱤᱭᱟᱱ ᱯᱳᱨᱴᱟᱥ (ᱡᱟᱦᱟᱸᱭ ᱫᱚ ᱢᱭᱟᱠᱥᱤᱢᱤᱱ ᱯᱳᱨᱴᱟ ᱦᱚᱸ ᱠᱚ ᱢᱮᱛᱟᱭᱟ) ᱟᱜ ᱵᱟᱭᱱᱟ ᱧᱩᱛᱩᱢ ᱠᱟᱱᱟ ᱾ ᱩᱱᱤ ᱫᱚ ᱯᱨᱚᱯᱷᱮᱥᱚᱱ ᱞᱮᱠᱟᱛᱮ ᱡᱤᱭᱟᱹᱞᱤ ᱟᱹᱭᱫᱟᱹᱨ ᱟᱨ ᱱᱟᱡᱤᱵᱟᱫᱽ ᱨᱤᱱᱤᱡ ᱧᱩᱛᱩᱢᱟᱱ ᱥᱟᱨᱦᱟᱣᱤᱭᱟᱹ ᱛᱟᱦᱮᱸ ᱠᱟᱱᱟᱭ ᱾ ᱫᱚᱥᱟᱨ ᱡᱮᱜᱮᱛ ᱞᱟᱹᱲᱦᱟᱹᱭ ᱚᱠᱛᱚᱨᱮ ᱮᱠᱥᱤᱥ ᱯᱟᱣᱟᱨ (Axis Power) ᱫᱤᱥᱚᱢ ᱠᱚ ᱞᱟᱹᱜᱤᱫ ᱵᱽᱨᱤᱴᱤᱥ ᱥᱤᱧᱚᱛ ᱨᱮ ᱜᱟᱛᱮ ᱫᱟᱲᱮ ᱠᱚ ᱵᱤᱨᱩᱫᱷ ᱨᱮ ᱥᱯᱟᱭ (spy) ᱞᱮᱠᱟᱛᱮ ᱠᱟᱹᱢᱤ ᱠᱟᱱ ᱛᱟᱦᱮᱸᱫ ᱾ ᱩᱱᱤ ᱫᱚ ᱡᱤᱭᱟᱹᱞᱤ ᱟᱹᱭᱫᱟᱹᱨ ᱦᱩᱞᱥᱟᱹᱭ ᱵᱟᱵᱚᱫᱽ ᱛᱮ ᱚᱞ ᱞᱮᱫ ᱛᱟᱦᱮᱸᱫ ᱟᱨ 1960 ᱫᱚᱥᱚᱠ ᱨᱮ ᱱᱟᱡᱤ ᱥᱯᱟᱭ (spy) ᱜᱟᱶᱛᱟ ᱨᱤᱱᱤᱡ ᱥᱚᱦᱮᱫ ᱦᱚᱸᱭ ᱛᱟᱦᱮᱸ ᱠᱟᱱᱟ ᱾

ᱦᱤᱱᱫᱩ ᱫᱷᱚᱨᱚᱢ ᱟᱨ ᱱᱟᱡᱤᱵᱟᱫᱽ ᱱᱚᱶᱟ ᱵᱟᱨᱭᱟ ᱨᱮᱱᱟᱜ ᱥᱚᱦᱚᱫ ᱠᱟᱛᱷᱟ ᱯᱟᱨᱪᱟᱣ ᱟᱨ ᱯᱟᱥᱱᱟᱣ ᱞᱟᱹᱜᱤᱫ ᱮ ᱨᱤᱠᱟᱹ ᱞᱮᱫ ᱛᱟᱦᱮᱸᱫ ᱾ ᱟᱡᱟᱜ ᱩᱭᱦᱟᱹᱨ ᱛᱮ ᱟᱰᱚᱞᱯᱷ ᱦᱤᱴᱞᱚᱨ ᱫᱚ ᱵᱚᱝᱜᱟ ᱵᱤᱥᱱᱩ ᱭᱤᱡ ᱚᱵᱚᱛᱟᱨ ᱛᱟᱦᱮᱸ ᱠᱟᱱᱟᱭ ᱟᱨ ᱚᱱᱟ ᱚᱵᱚᱛᱟᱨ ᱛᱮ ᱤᱦᱩᱫᱤ ᱠᱚᱣᱟᱜ ᱦᱚᱛᱮᱛᱮ ᱵᱮᱱᱟᱣ ᱟᱠᱟᱱ ᱠᱚᱲᱤ ᱡᱩᱜᱽ ᱨᱮᱱᱟᱜ ᱢᱩᱪᱟᱹᱫ ᱞᱟᱹᱜᱤᱫ ᱚᱵᱚᱛᱟᱨ ᱮ ᱦᱟᱛᱟᱣ ᱟᱠᱟᱫᱼᱟ ᱾

ᱠᱷᱟᱴᱚ ᱡᱤᱭᱚᱱ

ᱟᱡᱟᱜ ᱡᱟᱱᱟᱢ ᱫᱚ 1905 ᱥᱟᱹᱦᱤᱛ ᱨᱮ ᱯᱷᱨᱟᱱᱥ ᱨᱮᱱᱟᱜ ᱞᱤᱭᱚᱱ ᱱᱟᱜᱟᱨ ᱨᱮ ᱦᱩᱭ ᱞᱮᱱ ᱛᱟᱦᱮᱸᱫ ᱾ ᱟᱡᱤᱡ ᱟᱯᱟᱛ ᱢᱟᱠᱥᱤᱢ ᱯᱳᱨᱴᱟᱥ ᱯᱷᱨᱟᱱᱥ ᱛᱟᱦᱮᱸᱱ ᱠᱟᱱ ᱢᱤᱫ ᱤᱴᱟᱞᱤ-ᱜᱽᱨᱤᱠ ᱱᱟᱹᱜᱟᱹᱨᱤᱭᱟᱹ ᱛᱟᱦᱮᱸ ᱠᱟᱱᱟᱭ ᱟᱨ ᱟᱡᱤᱡ ᱮᱸᱜᱟᱛ ᱡᱩᱞᱤᱭᱟ ᱯᱳᱨᱴᱟᱥ ᱫᱚ ᱢᱤᱫ ᱤᱝᱨᱮᱡᱽ ᱠᱩᱲᱤ ᱛᱟᱦᱮᱸ ᱠᱟᱱᱟ ᱾ ᱜᱤᱫᱽᱨᱟᱹ ᱵᱮᱲᱟ ᱠᱷᱚᱱ ᱜᱮ ᱡᱤᱭᱟᱹᱞᱤ ᱠᱚᱣᱟᱜ ᱟᱹᱭᱫᱟᱹᱨᱤ ᱤᱫᱤ ᱠᱟᱛᱮ ᱫᱟᱭᱟ ᱫᱩᱞᱟᱹᱲ ᱛᱟᱦᱮᱸ ᱠᱟᱱᱟ ᱾ ᱱᱟᱡᱤᱵᱟᱫᱽ ᱤᱫᱤ ᱠᱟᱛᱮ ᱟᱡᱟᱜ ᱟᱹᱰᱤ ᱜᱮ ᱜᱚᱨᱚᱡᱽ ᱛᱟᱦᱮᱸ ᱠᱟᱱᱟ ᱾ ᱯᱩᱭᱞᱩ ᱡᱮᱜᱮᱛ ᱞᱟᱹᱲᱦᱟᱹᱭ ᱨᱮ ᱡᱚᱨᱢᱟᱱᱤ ᱦᱮᱨᱟᱣᱜ ᱞᱟᱹᱜᱤᱫ ᱤᱦᱩᱫᱤ ᱠᱚᱭ ᱫᱚᱥ ᱞᱮᱫ ᱠᱚ ᱛᱟᱦᱮᱸᱫ ᱾

1940 ᱥᱟᱹᱦᱤᱛ ᱨᱮ ᱥᱟᱵᱤᱛᱨᱤ ᱫᱮᱵᱤ ᱫᱚ ᱵᱟᱹᱝᱜᱟᱹᱞᱤ ᱱᱟᱡᱤ ᱥᱟᱨᱦᱟᱣᱤᱭᱟᱹ ᱚᱥᱤᱛ ᱠᱨᱩᱥᱱᱚ ᱢᱩᱠᱷᱟᱨᱡᱤ ᱥᱟᱶ ᱵᱟᱯᱞᱟ ᱞᱮᱱ ᱛᱟᱦᱮᱸᱫ ᱾

ᱱᱟᱡᱤᱵᱟᱫᱽ

1932 ᱨᱮ ᱩᱱᱤ ᱫᱚ "ᱟᱨᱡᱽᱭᱚ" ᱡᱤᱭᱚᱱ ᱰᱟᱦᱟᱨ ᱯᱟᱸᱡᱟᱭ ᱞᱟᱹᱜᱤᱫ ᱥᱤᱧᱚᱛ ᱮ ᱦᱮᱡ ᱞᱮᱱ ᱛᱟᱦᱮᱸᱫ ᱾ ᱟᱡ ᱚᱞᱟᱜ A Warning to Hindus ᱯᱚᱛᱚᱵ ᱨᱮ ᱥᱤᱧᱚᱛ ᱨᱮ ᱠᱤᱨᱤᱥᱛᱟᱱ ᱟᱨ ᱤᱥᱞᱟᱢ ᱯᱟᱥᱱᱟᱣ ᱨᱮᱱᱟᱜ ᱵᱤᱯᱚᱫᱽ ᱵᱟᱵᱚᱫᱽ ᱛᱮ ᱪᱤᱨᱜᱟᱹᱞ ᱞᱮᱫ ᱛᱟᱦᱮᱸᱫ ᱾ 1930 ᱫᱚᱥᱚᱠ ᱨᱮ ᱩᱱᱤ ᱱᱟᱡᱤᱵᱟᱫᱽ ᱯᱟᱥᱱᱟᱣ ᱥᱟᱠᱟᱢ ᱮ ᱦᱟᱹᱴᱤᱧ ᱞᱮᱫ ᱛᱟᱦᱮᱸᱫ ᱾ ᱩᱱᱤ ᱜᱮ ᱥᱩᱵᱟᱥ ᱪᱚᱱᱫᱽᱨᱚ ᱵᱳᱥ ᱫᱚ ᱯᱷᱟᱥᱤᱵᱟᱫᱤ ᱡᱟᱯᱟᱱ ᱥᱟᱢᱨᱟᱡᱽ ᱥᱟᱶ ᱥᱟᱹᱜᱟᱹᱭ ᱡᱚᱲᱟᱣ ᱨᱮ ᱜᱚᱲᱚ ᱟᱫᱮ ᱛᱟᱦᱮᱸᱫ ᱾