ᱦᱚᱨᱤᱦᱚᱨ ᱦᱟᱸᱥᱫᱟ
ᱦᱚᱨᱤᱦᱚᱨ ᱦᱟᱸᱥᱫᱟ (ᱤᱝᱞᱤᱥ: Harihar Hansda) ᱫᱚ ᱢᱤᱫ ᱧᱩᱛᱩᱢᱟᱱ ᱥᱟᱱᱛᱟᱲᱤ ᱚᱱᱚᱬᱦᱤᱭᱟᱹ ᱟᱨ ᱥᱟᱶᱦᱮᱫᱤᱭᱟᱹ ᱠᱟᱱᱟᱭ ᱾ ᱥᱟᱱᱛᱟᱲᱤ ᱚᱱᱚᱬᱦᱮ ᱥᱟᱶᱦᱮᱫ ᱨᱮᱱᱟᱜ ᱫᱷᱟᱨᱟ ᱨᱮ ᱩᱱᱤ ᱫᱚ ᱵᱷᱮᱜᱟᱨ ᱛᱮᱭ ᱩᱯᱨᱩᱢ ᱜᱟᱱᱚᱜᱼᱟ, ᱪᱮᱫᱟᱜ ᱥᱮ ᱩᱱᱤᱭᱟᱜ ᱚᱱᱚᱬᱦᱮ ᱨᱮ ᱚᱱᱚᱬᱦᱤᱭᱟᱹ ᱦᱩᱭᱩᱜ ᱨᱮᱱᱟᱜ ᱯᱩᱥᱴᱟᱹᱣ ᱩᱱᱩᱫᱩᱜ ᱢᱮᱱᱟᱜᱼᱟ᱾
ᱡᱤᱭᱚᱱ ᱟᱨ ᱥᱤᱠᱷᱱᱟᱹᱛ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱩᱱᱤᱭᱟᱜ ᱮᱛᱚᱦᱚᱵ ᱡᱤᱭᱚᱱ ᱵᱟᱵᱚᱛ ᱰᱷᱮᱨ ᱵᱟᱝ ᱵᱟᱰᱟᱭ ᱧᱟᱢ ᱟᱠᱟᱱᱟ ᱾ ᱡᱷᱟᱨᱠᱷᱚᱸᱰ ᱯᱚᱱᱚᱛ ᱨᱮᱱᱟᱜ ᱥᱟᱢᱟᱝ ᱥᱤᱝᱵᱷᱩᱢ ᱦᱚᱱᱚᱛ ᱨᱮᱱᱟᱜ ᱡᱩᱢᱟᱞ ᱟᱹᱛᱩ ᱨᱮ ᱩᱱᱤᱭᱟᱜ ᱡᱟᱱᱟᱢ ᱾ ᱩᱱᱤᱭᱟᱜ ᱮᱛᱚᱦᱚᱵ ᱥᱮᱪᱮᱫ ᱵᱟᱵᱚᱛ ᱫᱚ ᱵᱟᱝ ᱵᱟᱰᱟᱭ ᱧᱟᱢ ᱟᱠᱟᱱᱟ ᱾ ᱛᱟᱭᱚᱢ ᱛᱮ ᱵᱟᱰᱟᱭ ᱧᱟᱢ ᱟᱠᱟᱱᱟ, ᱨᱟᱺᱪᱤ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱠᱷᱚᱱ ᱥᱟᱱᱛᱟᱲᱤ ᱥᱟᱛᱟᱢ ᱛᱮ ᱢᱟᱥᱴᱟᱨ ᱰᱤᱜᱽᱨᱤ ᱞᱮᱫᱼᱟᱭ ᱟᱨ ᱜᱷᱟᱴᱥᱤᱞᱟᱹ ᱠᱚᱞᱮᱡᱽ ᱨᱮ ᱥᱟᱱᱛᱟᱲᱤ ᱥᱟᱛᱟᱢ ᱨᱤᱱᱤᱡ ᱚᱥᱛᱷᱟᱭᱤ ᱯᱨᱚᱯᱷᱮᱥᱚᱨ ᱞᱮᱠᱟᱛᱮ ᱟᱹᱰᱤ ᱫᱤᱱ ᱮ ᱠᱟᱹᱢᱤ ᱞᱮᱫᱼᱟ ᱾
ᱥᱟᱶᱦᱮᱫ ᱪᱚᱨᱪᱟ ᱟᱨ ᱚᱞ ᱜᱩᱱ ᱠᱚ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱥᱟᱱᱛᱟᱲᱤ ᱥᱟᱛᱟᱢ ᱨᱤᱱᱤᱡ ᱯᱟᱹᱴᱷᱩᱣᱟᱹ ᱦᱩᱭᱩᱜ ᱠᱷᱟᱹᱛᱤᱨ ᱦᱚᱨᱤᱦᱚᱨ, ᱥᱮᱨᱮᱧ ᱟᱨ ᱚᱱᱚᱬᱦᱮ ᱛᱟᱞᱟ ᱨᱮᱱᱟᱜ ᱯᱷᱚᱨᱚᱠ ᱮ ᱵᱩᱡᱷᱟᱹᱣ ᱧᱟᱢ ᱞᱮᱫᱼᱟ ᱾ ᱚᱱᱟᱛᱮ ᱧᱮᱞᱚᱜᱼᱟ, ᱩᱱᱤᱭᱟᱜ ᱚᱱᱚᱬᱦᱮ ᱨᱮ ᱨᱟᱦᱟ ᱨᱮᱱᱟᱜ ᱚᱨᱥᱚᱝ ᱫᱚ ᱵᱟᱹᱱᱩᱜᱼᱟ ᱾ ᱱᱤᱴᱚᱞ ᱚᱱᱚᱬᱦᱮᱭ ᱚᱞ ᱟᱠᱟᱫᱼᱟ ᱾ ᱯᱟᱹᱴᱷᱩᱣᱟᱹ ᱡᱤᱭᱚᱱ ᱠᱷᱚᱱ ᱜᱮ ᱥᱟᱱᱛᱟᱲᱤ ᱥᱟᱶᱦᱮᱫ ᱥᱟᱞᱟᱜ ᱩᱱᱤᱭᱟᱜ ᱜᱟᱹᱦᱤᱨ ᱥᱟᱹᱜᱟᱹᱭ ᱛᱟᱦᱮᱸ ᱠᱟᱱᱟ ᱾ ᱢᱮᱱᱠᱷᱟᱱ ᱱᱚᱣᱟ ᱠᱟᱛᱷᱟ ᱫᱚ ᱴᱷᱤᱠ ᱜᱮᱭᱟ, ᱥᱟᱱᱛᱟᱲᱟᱜ ᱡᱤᱭᱚᱱ ᱨᱮ ᱦᱟᱨᱟᱵᱩᱨᱩ ᱟᱠᱟᱱ ᱠᱷᱟᱹᱛᱤᱨ ᱥᱟᱶᱛᱟ ᱟᱹᱨᱤᱪᱟᱹᱞᱤ ᱫᱚ ᱜᱟᱹᱦᱤᱨ ᱥᱟᱹᱦᱤᱸᱡ ᱮ ᱪᱤᱱᱦᱟᱹᱣ ᱟᱠᱟᱫ ᱛᱟᱦᱮᱸᱫ ᱾ ᱥᱮᱨᱮᱧ ᱵᱟᱵᱚᱛ ᱛᱮᱦᱚᱸ ᱩᱱᱤᱭᱟᱜ ᱫᱚᱠᱷᱚᱞ ᱛᱟᱦᱮᱸ ᱠᱟᱱᱟ ᱾ ᱩᱱᱤᱭᱟᱜ ᱯᱩᱭᱞᱩ ᱥᱮᱫᱟᱜ ᱚᱞᱼᱵᱮᱞ ᱫᱚ ᱚᱱᱟᱛᱮ ᱥᱮᱨᱮᱧ ᱦᱩᱭᱩᱜ ᱜᱮ ᱥᱟᱵᱷᱟᱵᱤᱠ ᱛᱟᱦᱮᱸ ᱠᱟᱱᱟ ᱾ ᱫᱚᱥᱚᱠ ᱨᱮᱱᱟᱜ ᱜᱩᱱ ᱩᱱᱤ ᱛᱟᱞᱟ ᱨᱮ ᱛᱟᱦᱮᱸ ᱨᱮᱦᱚᱸ ᱚᱥᱟᱫᱷᱟᱨᱚᱱ ᱱᱟᱯᱟᱭ ᱛᱮ ᱚᱱᱟ ᱜᱩᱱ ᱥᱟᱦᱟ ᱠᱟᱛᱮ ᱟᱫᱷᱩᱱᱤᱠ ᱦᱩᱭᱩᱜ ᱨᱮᱱᱟᱜ ᱮ ᱪᱮᱥᱴᱟ ᱟᱠᱟᱫᱼᱟ ᱾ ᱡᱩᱣᱟᱹᱱ ᱚᱠᱛᱚ ᱨᱮ ‘ᱦᱚᱲ ᱥᱚᱢᱵᱟᱫᱽ’ ᱯᱟᱛᱷᱟᱢ ᱦᱚᱨᱤᱦᱚᱨ ᱴᱷᱮᱱ ᱜᱟᱹᱦᱤᱨ ᱚᱨᱥᱚᱝ ᱮ ᱫᱚᱦᱚ ᱞᱮᱫᱼᱟ ᱾ ᱟᱭᱢᱟ ᱧᱩᱛᱩᱢᱟᱱ ᱚᱱᱚᱬᱦᱤᱭᱟᱹ ᱠᱚᱣᱟᱜ ᱚᱱᱚᱬᱦᱮ ᱩᱱᱤ ᱚᱱᱚᱬᱮ ᱪᱟᱨᱪᱟ ᱞᱟᱹᱜᱤᱫ ᱨᱟᱹᱥᱠᱟᱹᱭ ᱮᱢ ᱟᱠᱟᱣ ᱫᱮᱭᱟ᱾
ᱚᱞ ᱟᱠᱟᱫ ᱯᱩᱛᱷᱤ ᱠᱚ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱩᱱᱤᱭᱟᱜ ᱪᱷᱟᱯᱟ ᱟᱠᱟᱱ ᱯᱩᱛᱷᱤ ᱠᱚ ᱫᱚ ᱦᱩᱭᱩᱜ ᱠᱟᱱᱟ:
- ᱛᱤᱨᱭᱚ ᱛᱮᱛᱟᱝ (᱑᱙᱗᱙): ᱱᱚᱣᱟ ᱫᱚ ᱩᱱᱤᱭᱟᱜ ᱯᱩᱭᱞᱩ ᱚᱱᱚᱬᱦᱮ ᱯᱩᱛᱷᱤ ᱠᱟᱱᱟ ᱾ ᱱᱚᱣᱟ ᱫᱚ ᱑᱙᱗᱙ ᱥᱟᱞ ᱨᱮ ᱪᱷᱟᱯᱟ ᱥᱚᱫᱚᱨ ᱞᱮᱱᱟ ᱾ ᱥᱮᱨᱮᱧ ᱥᱟᱶᱛᱮ ᱚᱱᱚᱬᱦᱮ ᱨᱮᱱᱟᱜ ᱛᱩᱢᱟᱹᱞ ᱠᱟᱱ ᱨᱮᱦᱚᱸ ᱜᱩᱱ ᱞᱮᱠᱟᱛᱮ ᱥᱮᱨᱮᱧ ᱟᱨ ᱚᱱᱚᱬᱦᱮ ᱫᱚ ᱵᱷᱮᱜᱟᱨ ᱛᱮ ᱪᱤᱱᱦᱟᱹ ᱢᱮᱱᱟᱜᱼᱟ ᱾
- ᱜᱟᱛᱤᱧ ᱛᱤᱨᱭᱚ: ᱱᱚᱣᱟ ᱚᱱᱚᱬᱦᱮ ᱯᱩᱛᱷᱤ ᱨᱮᱱᱟᱜ ᱪᱷᱟᱯᱟ ᱥᱟᱞ ᱫᱚ ᱵᱟᱝ ᱵᱟᱰᱟᱭ ᱧᱟᱢ ᱟᱠᱟᱱᱟ ᱾ ᱫᱩᱞᱟᱹᱲ ᱨᱮᱱᱟᱜ ᱟᱵᱮᱜᱽ, ᱨᱟᱹᱥᱠᱟᱹ-ᱡᱚᱞᱚᱱ ᱫᱚ ᱥᱤᱞᱯᱤ ᱭᱟᱜ ᱱᱚᱡᱚᱨ ᱛᱮ ᱯᱷᱩᱴᱟᱹᱣ ᱨᱟᱠᱟᱵ ᱟᱠᱟᱫᱼᱟ ᱾ ᱫᱩᱞᱟᱹᱲ ᱨᱟᱥᱟ ᱨᱮᱱᱟᱜ ᱡᱚᱴᱮᱫ ᱯᱩᱛᱷᱤ ᱨᱮ ᱡᱚᱛᱚ ᱴᱷᱮᱱ ᱜᱮ ᱟᱹᱭᱠᱟᱹᱣ ᱧᱟᱢᱚᱜᱼᱟ ᱾
- ᱛᱤᱨᱤ: ᱱᱚᱣᱟ ᱚᱱᱚᱬᱦᱮ ᱯᱩᱛᱷᱤ ᱨᱮᱱᱟᱜ ᱦᱚᱸ ᱪᱷᱟᱯᱟ ᱥᱟᱞ ᱫᱚ ᱵᱟᱝ ᱵᱟᱰᱟᱭ ᱧᱟᱢ ᱟᱠᱟᱱᱟ ᱾ ᱥᱟᱱᱛᱟᱲ ᱥᱟᱶᱛᱟ ᱟᱹᱨᱤᱪᱟᱹᱞᱤ ᱨᱮᱱᱟᱜ ᱯᱟᱹᱪᱷᱞᱟᱹ ᱨᱮ ᱡᱤᱭᱚᱱ ᱨᱮᱱᱟᱜ ᱴᱟᱱᱟ-ᱴᱟᱹᱱᱤ, ᱫᱩᱠᱷ ᱦᱟᱨᱠᱮᱛ, ᱜᱷᱟᱹᱲᱤᱡᱽ ᱥᱩᱠᱷ ᱨᱮᱱᱟᱜ ᱦᱤᱡᱩᱜ ᱥᱮᱱᱚᱜ ᱮᱢᱟᱱ ᱥᱟᱛᱟᱢ ᱠᱚ ᱟᱹᱰᱤ ᱱᱟᱯᱟᱭ ᱛᱮ ᱯᱷᱩᱴᱟᱹᱣ ᱨᱟᱠᱟᱵ ᱟᱠᱟᱫᱼᱟᱭ᱾ ᱡᱤᱭᱚᱱ ᱨᱮᱱᱟᱜ ᱱᱟᱱᱟ ᱦᱩᱱᱟᱹᱨ ᱨᱚᱝ ᱮ ᱥᱚᱫᱚᱨ ᱟᱠᱟᱫᱼᱟ ᱾
- ᱥᱟᱱᱛᱟᱞᱤ ᱞᱚᱠᱜᱤᱛᱳᱸ ᱠᱟ ᱥᱚᱝᱜᱽᱨᱚᱦ: ᱥᱟᱱᱛᱟᱲ ᱥᱚᱢᱟᱡᱽ ᱨᱮ ᱪᱟᱞᱟᱜ ᱫᱷᱟᱨᱟ ᱨᱮᱱᱟᱜ ᱵᱷᱮᱜᱟᱨ ᱵᱷᱮᱜᱟᱨ ᱥᱮᱨᱮᱧ ᱠᱚ ᱡᱟᱣᱨᱟ ᱠᱟᱛᱮ, ᱚᱱᱟ ᱨᱮᱱᱟᱜ ᱦᱤᱱᱫᱤ ᱵᱮᱠᱷᱭᱟ ᱵᱟᱝᱢᱟ ᱵᱤᱪᱷᱱᱟᱹᱣ ᱥᱟᱶᱛᱮ ᱱᱚᱣᱟ ᱯᱩᱛᱷᱤ ᱨᱮ ᱚᱞᱼᱛᱚᱞ ᱟᱠᱟᱱᱟ᱾ ᱱᱚᱣᱟ ᱫᱟᱢᱟᱱ ᱠᱟᱹᱢᱤ ᱫᱚ ᱵᱤᱨᱵᱚᱞ ᱦᱮᱢᱵᱽᱨᱚᱢ ᱥᱟᱶ ᱢᱤᱫ ᱛᱮᱭ ᱠᱚᱨᱟᱣ ᱟᱠᱟᱫᱼᱟ ᱾ ᱯᱩᱛᱷᱤ ᱫᱚ ᱯᱟᱞᱮᱱ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮᱱᱟᱜ ᱥᱟᱱᱛᱟᱲᱤ ᱥᱟᱛᱟᱢ ᱨᱮᱱᱟᱜ ᱯᱟᱲᱦᱟᱣ ᱞᱟᱹᱜᱤᱫ ᱚᱞ ᱟᱠᱟᱱᱟ᱾
ᱩᱯᱩᱨᱩᱢ (Legacy)
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱦᱚᱨᱤᱦᱚᱨ ᱱᱤᱴᱚᱞ ᱚᱱᱚᱬᱦᱮ ᱥᱤᱨᱡᱚᱱ ᱨᱮᱦᱚᱸ, ᱟᱫᱷᱩᱱᱤᱠᱚᱛᱟ ᱨᱮᱱᱟᱜ ᱤᱥᱟᱹᱨᱟ ᱚᱱᱟ ᱨᱮ ᱛᱟᱦᱮᱸ ᱨᱮᱦᱚᱸ ᱯᱨᱚᱠᱟᱥ ᱵᱷᱚᱝᱜᱤ ᱨᱮ ᱞᱮᱛᱟᱲᱟᱱᱟᱜ ᱛᱟᱞᱟ ᱨᱮᱜᱮ ᱛᱟᱦᱮᱸ ᱟᱠᱟᱱᱟᱭ ᱾ ᱢᱟᱲᱟᱝ ᱨᱤᱱ ᱠᱚ ᱠᱷᱚᱱ ᱮᱴᱟᱜ ᱞᱮᱠᱟ ᱛᱮ ᱵᱟᱭ ᱪᱤᱱᱦᱟᱹ ᱫᱟᱲᱮ ᱟᱠᱟᱣᱟᱫᱼᱟ᱾
ᱥᱟᱹᱠᱷᱭᱟᱹᱛ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]᱑. ᱦᱮᱢᱨᱚᱢ, ᱯᱚᱨᱤᱢᱚᱞ. ᱥᱟᱶᱛᱟᱞᱤ ᱥᱟᱦᱤᱛᱭᱮᱨ ᱤᱛᱤᱦᱟᱥ. ᱕ ᱟᱱᱟᱜ ᱪᱷᱟᱯᱟ, ᱱᱤᱨᱢᱚᱞ ᱵᱩᱠ ᱮᱡᱮᱱᱥᱤ, ᱥᱟᱠᱟᱢ - ᱒᱘᱑.