ᱨᱮᱱᱩᱠᱟ ᱨᱟᱭ
ᱨᱮᱱᱩᱠᱟ ᱨᱟᱭ (᱔ ᱡᱟᱱᱩᱣᱟᱨᱤ ᱑᱙᱐᱔ – ᱑᱑ ᱮᱯᱨᱤᱞ ᱑᱙᱙᱗) ᱫᱚ ᱥᱤᱧᱚᱛ ᱨᱮᱱ ᱢᱤᱫ ᱧᱩᱛᱩᱢᱟᱱ ᱯᱷᱩᱨᱜᱟᱹᱞ ᱞᱟᱹᱲᱦᱟᱹᱭᱤᱭᱟᱹ, ᱥᱟᱶᱛᱟ ᱠᱟᱹᱢᱤᱭᱟᱹ ᱟᱨ ᱨᱟᱡᱽᱟᱹᱨᱤ ᱱᱮᱛᱟᱭ ᱛᱟᱦᱮᱸ ᱠᱟᱱᱟ ᱾
ᱩᱱᱤ ᱫᱚ ᱵᱨᱟᱦᱢᱚ ᱥᱩᱫᱷᱟᱹᱨᱤᱭᱟᱹ ᱱᱤᱵᱟᱨᱟᱱ ᱪᱚᱸᱫᱽᱨᱚ ᱢᱩᱠᱷᱟᱨᱡᱤ ᱨᱮᱱ ᱜᱷᱟᱨᱚᱸᱡᱽ ᱠᱷᱚᱱ ᱮ ᱦᱮᱡ ᱞᱮᱱᱟ, ᱟᱨ ᱥᱚᱛᱤᱥ ᱪᱚᱸᱫᱽᱨᱚ ᱢᱩᱠᱷᱟᱨᱡᱤ ᱨᱮᱱ ᱦᱚᱯᱚᱱ ᱮᱨᱟᱭ ᱛᱟᱦᱮᱸ ᱠᱟᱱᱟ, ᱩᱱᱤ ᱫᱚ ᱢᱤᱫ ICS ᱚᱯᱷᱤᱥᱚᱨ ᱮ ᱛᱟᱦᱮᱸ ᱠᱟᱱᱟ ᱟᱨ ᱪᱟᱨᱩᱞᱚᱛᱟ ᱢᱩᱠᱷᱟᱨᱡᱤ, ᱩᱱᱤ ᱫᱚ ᱢᱤᱫ ᱥᱟᱶᱛᱟ ᱠᱟᱹᱢᱤᱭᱟᱹ ᱟᱨ ᱚᱞ ᱤᱱᱰᱤᱭᱟ ᱣᱤᱢᱮᱱᱥ ᱠᱚᱱᱯᱷᱮᱨᱮᱱᱥ ᱨᱮᱱ ᱥᱚᱦᱮᱫ ᱮ ᱛᱟᱦᱮᱸ ᱠᱟᱱᱟ ᱾ ᱩᱱᱤ ᱫᱚ ᱑᱙᱘᱘ ᱥᱟᱞᱮ ᱨᱮ ᱥᱤᱧᱚᱛ ᱥᱚᱨᱠᱟᱨ ᱯᱟᱦᱴᱟ ᱠᱷᱚᱱ ᱯᱚᱫᱽᱢᱚ ᱵᱷᱩᱥᱚᱱ ᱥᱤᱨᱯᱷᱟᱹ ᱛᱮᱠᱚ ᱢᱟᱱ ᱞᱮᱫᱮᱭᱟ ᱾[᱑]
ᱮᱛᱚᱦᱚᱵ ᱡᱤᱭᱚᱱ ᱟᱨ ᱥᱮᱪᱮᱫ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱩᱱᱤ ᱫᱚ ᱜᱮᱞ ᱛᱩᱨᱩᱭ ᱥᱮᱨᱢᱟ ᱩᱢᱮᱨ ᱨᱮ ᱢᱚᱦᱟᱛᱢᱟ ᱜᱟᱱᱫᱷᱤ ᱥᱟᱞᱟᱜ ᱮ ᱧᱟᱯᱟᱢ ᱞᱮᱱᱟ ᱟᱨ ᱩᱱᱤ ᱫᱟᱨᱟᱭ ᱛᱮ ᱟᱹᱰᱤ ᱜᱮ ᱮ ᱤᱱᱥᱯᱟᱭᱟᱨ ᱞᱮᱱᱟ ᱾ ᱩᱱᱤ ᱫᱚ ᱵᱨᱤᱴᱤᱥ ᱤᱱᱰᱤᱭᱟᱱ ᱥᱮᱪᱮᱫ ᱥᱤᱥᱴᱮᱢ ᱵᱚᱭᱠᱚᱴ ᱞᱟᱹᱜᱤᱫ ᱜᱟᱱᱫᱷᱤᱡᱤ ᱣᱟᱜ ᱦᱚᱦᱚ ᱟᱸᱡᱚᱢ ᱠᱟᱛᱮ ᱠᱚᱞᱮᱡᱽ ᱮ ᱵᱟᱹᱜᱤ ᱠᱮᱫᱼᱟ ᱾ ᱮᱱᱛᱮ ᱨᱮᱦᱚᱸ, ᱛᱟᱭᱚᱢ ᱛᱮ ᱩᱱᱤᱭᱟᱜ ᱟᱭᱳ ᱵᱟᱵᱟ ᱫᱚ ᱜᱟᱱᱫᱷᱤᱡᱤ ᱴᱷᱮᱱ ᱠᱚ ᱱᱮᱦᱚᱨ ᱠᱮᱫᱮᱭᱟ ᱡᱮ ᱩᱱᱤ ᱫᱚ ᱟᱨᱦᱚᱸ ᱯᱟᱲᱦᱟᱣᱜ ᱞᱟᱹᱜᱤᱫ ᱞᱚᱱᱰᱚᱱ ᱪᱟᱞᱟᱜ ᱞᱟᱹᱜᱤᱫ ᱮ ᱢᱮᱛᱟᱭ ᱢᱟ, ᱩᱱ ᱚᱠᱛᱮ ᱩᱱᱤ ᱫᱚ ᱑᱙᱒᱑ ᱥᱟᱞᱮ ᱨᱮ ᱞᱚᱱᱰᱚᱱ ᱥᱠᱩᱞ ᱚᱯᱷ ᱤᱠᱚᱱᱚᱢᱤᱠᱥ ᱨᱮ ᱥᱮᱞᱮᱫ ᱮᱱᱟ ᱾ ᱩᱱᱤ ᱫᱚ ᱠᱚᱢ ᱩᱢᱮᱨ ᱨᱮ ᱥᱚᱛᱭᱮᱱᱫᱽᱨᱚ ᱱᱟᱛᱷ ᱨᱟᱭ ᱥᱟᱞᱟᱜ ᱮ ᱵᱟᱯᱞᱟ ᱞᱮᱱᱟ ᱾[᱒]
ᱩᱱᱤᱭᱟᱜ ᱟᱭᱳ ᱦᱟᱲᱟᱢ ᱵᱟᱵᱟ ᱫᱚ ᱩᱱᱠᱩᱣᱟᱜ ᱚᱠᱛᱚ ᱨᱮᱱ ᱟᱹᱰᱤ ᱧᱩᱛᱩᱢᱟᱱ ᱡᱩᱨᱤ ᱠᱤᱱ ᱛᱟᱦᱮᱸ ᱠᱟᱱᱟ ᱾ ᱟᱭᱳ ᱦᱟᱲᱟᱢ ᱵᱟᱵᱟ ᱯᱨᱚᱯᱷᱮᱥᱚᱨ ᱯᱤ ᱠᱮ ᱨᱚᱭ ᱫᱚ ᱚᱠᱥᱯᱷᱚᱨᱰ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱠᱷᱚᱱ ᱰᱤ ᱯᱷᱤᱞ ᱮ ᱧᱟᱢ ᱟᱠᱟᱫ ᱯᱩᱭᱞᱩ ᱥᱤᱧᱚᱛᱤᱭᱟᱹᱭ ᱛᱟᱦᱮᱸ ᱠᱟᱱᱟ ᱟᱨ ᱤᱱᱰᱤᱭᱟᱱ ᱮᱡᱩᱠᱮᱥᱚᱱ ᱥᱚᱨᱵᱷᱤᱥ ᱨᱮᱱ ᱥᱚᱦᱮᱫ ᱮ ᱛᱟᱦᱮᱸ ᱠᱟᱱᱟ ᱟᱨ ᱠᱚᱞᱠᱟᱛᱟ ᱨᱮᱱᱟᱜ ᱧᱩᱛᱩᱢᱟᱱ ᱯᱨᱮᱥᱤᱰᱮᱱᱥᱤ ᱠᱚᱞᱮᱡᱽ ᱨᱮᱱ ᱯᱩᱭᱞᱩ ᱥᱤᱧᱚᱛᱤᱭᱟᱹ ᱯᱨᱤᱱᱥᱤᱯᱟᱞ ᱮ ᱛᱟᱦᱮᱸ ᱠᱟᱱᱟ ᱾ ᱟᱭᱳ ᱦᱟᱲᱟᱢ ᱮᱸᱜᱟᱛ ᱥᱚᱨᱚᱞᱟ ᱨᱚᱭ ᱫᱚ ᱢᱤᱫ ᱧᱩᱛᱩᱢᱟᱱ ᱥᱟᱶᱛᱟ ᱠᱟᱹᱢᱤᱭᱟᱹᱭ ᱛᱟᱦᱮᱸ ᱠᱟᱱᱟ ᱡᱟᱦᱟᱸᱭ ᱫᱚ ᱛᱤᱨᱞᱟᱹ ᱠᱚᱣᱟᱜ ᱯᱷᱩᱨᱜᱟᱹᱞ ᱞᱟᱹᱜᱤᱫ ᱮ ᱠᱟᱹᱢᱤ ᱞᱮᱫᱼᱟ ᱾ ᱩᱱᱤ ᱫᱚ ᱜᱳᱠᱷᱞᱮ ᱢᱮᱢᱳᱨᱤᱭᱟᱞ ᱥᱠᱩᱞ ᱟᱨ ᱠᱚᱞᱮᱡᱽ ᱨᱮᱱ ᱵᱩᱱᱤᱭᱟᱹᱫᱤᱭᱟᱹᱭ ᱛᱟᱦᱮᱸ ᱠᱟᱱᱟ ᱟᱨ ᱠᱚᱞᱠᱟᱛᱟ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮᱱᱟᱜ ᱥᱮᱱᱮᱴ ᱨᱮᱱ ᱯᱩᱭᱞᱩ ᱥᱤᱧᱚᱛᱤᱭᱟᱹ ᱛᱤᱨᱞᱟᱹᱭ ᱛᱟᱦᱮᱸ ᱠᱟᱱᱟ ᱾ ᱥᱚᱨᱚᱞᱟ ᱨᱚᱭ ᱫᱚ ᱧᱩᱛᱩᱢᱟᱱ ᱵᱨᱟᱦᱢᱚ ᱥᱩᱫᱷᱟᱹᱨᱤᱭᱟᱹ ᱫᱩᱨᱜᱟᱢᱚᱦᱚᱱ ᱫᱟᱥ ᱨᱮᱱ ᱦᱚᱯᱚᱱ ᱮᱨᱟᱭ ᱛᱟᱦᱮᱸ ᱠᱟᱱᱟ ᱟᱨ ᱞᱮᱰᱤ ᱟᱵᱚᱞᱟ ᱵᱳᱥ ᱟᱨ ᱮᱥ ᱟᱨ ᱫᱟᱥ ᱨᱮᱱ ᱵᱚᱭᱦᱟ ᱛᱟᱦᱮᱸ ᱠᱟᱱᱟ, ᱩᱱᱤ ᱫᱚ ᱧᱩᱛᱩᱢᱟᱱ ᱫᱩᱱ ᱥᱠᱩᱞ ᱨᱮᱱ ᱵᱩᱱᱤᱭᱟᱹᱫᱤᱭᱟᱹᱭ ᱛᱟᱦᱮᱸ ᱠᱟᱱᱟ ᱟᱨ ᱫᱮᱥᱵᱟᱸᱫᱷᱩ ᱥᱤ ᱟᱨ ᱫᱟᱥ ᱨᱮᱱ ᱢᱤᱫ ᱜᱷᱟᱨᱚᱸᱡᱽ ᱨᱮᱱ ᱦᱚᱲ ᱮ ᱛᱟᱦᱮᱸ ᱠᱟᱱᱟ ᱾
ᱠᱮᱨᱤᱭᱟᱨ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱥᱤᱧᱚᱛ ᱛᱮ ᱨᱩᱣᱟᱹᱲ ᱠᱟᱛᱮ, ᱩᱱᱤ ᱫᱚ ᱚᱞ ᱤᱱᱰᱤᱭᱟ ᱣᱤᱢᱮᱱᱥ ᱠᱚᱱᱯᱷᱮᱨᱮᱱᱥ ᱨᱮ ᱥᱮᱞᱮᱫ ᱮᱱᱟ ᱟᱨ ᱛᱤᱨᱞᱟᱹ ᱠᱚᱣᱟᱜ ᱟᱹᱭᱫᱟᱹᱨᱤ ᱟᱨ ᱟᱭᱳ ᱵᱟᱵᱟ ᱦᱟᱯᱟᱴᱤᱧ ᱨᱮ ᱪᱟᱢᱯᱤᱭᱟᱱ ᱞᱟᱹᱜᱤᱫ ᱮ ᱠᱩᱨᱩᱢᱩᱴᱩ ᱠᱮᱫᱼᱟ ᱾ ᱑᱙᱓᱒ ᱥᱟᱞᱮ ᱨᱮ ᱩᱱᱤ ᱫᱚ ᱚᱞ ᱤᱱᱰᱤᱭᱟ ᱣᱤᱢᱮᱱᱥ ᱠᱚᱱᱯᱷᱮᱨᱮᱱᱥ ᱨᱮᱱ ᱯᱟᱨᱥᱮᱛ ᱮ ᱵᱮᱱᱟᱣ ᱮᱱᱟ ᱾ ᱩᱱᱤ ᱫᱚ ᱑᱙᱕᱓-᱕᱔ ᱥᱟᱞᱮ ᱨᱮᱦᱚᱸ ᱱᱚᱣᱟ ᱨᱮᱱ ᱯᱟᱨᱥᱮᱛ ᱮ ᱛᱟᱦᱮᱸ ᱠᱟᱱᱟ ᱾
᱑᱙᱔᱓ ᱥᱟᱞᱮ ᱨᱮ ᱩᱱᱤ ᱫᱚ ᱥᱤᱧᱚᱛ ᱨᱮᱱ ᱛᱤᱨᱞᱟᱹ ᱠᱚᱣᱟᱜ ᱨᱮᱯᱨᱮᱡᱮᱱᱴᱮᱴᱤᱵᱷ ᱞᱮᱠᱟᱛᱮ ᱛᱟᱞᱢᱟ ᱵᱤᱫᱷᱟᱱ ᱥᱚᱵᱷᱟ ᱨᱮ ᱠᱚ ᱵᱟᱪᱷᱟᱣ ᱵᱚᱦᱟᱞ ᱠᱮᱫᱮᱭᱟ ᱾ ᱩᱱᱤ ᱫᱚ ᱑᱙᱔᱖-᱔᱗ ᱥᱟᱞᱮ ᱨᱮ ᱥᱤᱧᱚᱛ ᱨᱮᱱᱟᱜ ᱥᱚᱝᱵᱤᱫᱷᱟᱱ ᱥᱚᱵᱷᱟ ᱨᱮᱱ ᱦᱚᱸ ᱥᱚᱦᱮᱫ ᱮ ᱛᱟᱦᱮᱸ ᱠᱟᱱᱟ ᱾
᱑᱙᱕᱒-᱕᱗ ᱥᱟᱞᱮ ᱨᱮ ᱩᱱᱤ ᱫᱚ ᱯᱚᱪᱷᱤᱢ ᱵᱟᱝᱞᱟ ᱨᱮ ᱨᱤᱞᱤᱯᱷ ᱟᱨ ᱨᱤᱦᱮᱵᱤᱞᱤᱴᱮᱥᱚᱱ ᱨᱮᱱ ᱢᱚᱱᱛᱨᱤ ᱞᱮᱠᱟᱛᱮ ᱠᱚ ᱵᱟᱦᱟᱞ ᱠᱮᱫᱮᱭᱟ ᱾ ᱩᱱᱤ ᱫᱚ ᱑᱙᱕᱗-᱑᱙᱖᱗ ᱥᱟᱞᱮ ᱨᱮ ᱢᱟᱞᱫᱟ ᱞᱳᱠ ᱥᱚᱵᱷᱟ ᱵᱟᱪᱷᱱᱟᱣ ᱴᱚᱴᱷᱟ ᱠᱷᱚᱱ ᱞᱳᱠ ᱥᱚᱵᱷᱟ ᱨᱮᱱ ᱥᱚᱦᱮᱫ ᱮ ᱛᱟᱦᱮᱸ ᱠᱟᱱᱟ ᱾ ᱑᱙᱕᱙ ᱥᱟᱞᱮ ᱨᱮ ᱩᱱᱤ ᱫᱚ ᱥᱟᱶᱛᱟ ᱵᱷᱟᱹᱞᱟᱹᱭ ᱟᱨ ᱛᱟᱭᱚᱢ ᱟᱠᱟᱱ ᱠᱞᱟᱥ ᱠᱚᱣᱟᱜ ᱵᱷᱟᱹᱞᱟᱹᱭ ᱪᱮᱛᱟᱱ ᱨᱮ ᱢᱤᱫ ᱠᱩᱢᱩᱴ ᱮ ᱪᱟᱞᱟᱣ ᱞᱮᱫᱼᱟ, ᱡᱟᱦᱟᱸ ᱫᱚ ᱨᱮᱱᱩᱠᱟ ᱨᱟᱭ ᱠᱩᱢᱩᱴ ᱧᱩᱛᱩᱢ ᱛᱮ ᱵᱟᱹᱲᱛᱤ ᱩᱯᱨᱩᱢ ᱢᱮᱱᱟᱜᱼᱟ ᱾[᱓][᱔]
ᱩᱱᱤ ᱨᱮᱱ ᱵᱚᱭᱦᱟ ᱠᱚ ᱢᱩᱫᱽ ᱨᱮ ᱥᱩᱵᱨᱚᱛᱳ ᱢᱩᱠᱷᱟᱨᱡᱤ ᱫᱚ ᱤᱱᱰᱤᱭᱟᱱ ᱮᱭᱟᱨ ᱯᱷᱳᱨᱥ ᱨᱮᱱ ᱯᱩᱭᱞᱩ ᱮᱭᱟᱨ ᱪᱤᱯᱷ ᱢᱟᱨᱥᱟᱞ ᱮ ᱛᱟᱦᱮᱸ ᱠᱟᱱᱟ ᱡᱟᱦᱟᱸᱭ ᱫᱚ ᱴᱳᱠᱤᱭᱳ ᱨᱮ ᱜᱚᱡ ᱮᱱᱟ ᱟᱨ ᱥᱟᱨᱫᱟ ᱢᱩᱠᱷᱟᱨᱡᱤ (née' ᱯᱟᱱᱰᱤᱛ) ᱥᱟᱞᱟᱜ ᱮ ᱵᱟᱯᱞᱟ ᱞᱮᱱᱟ, ᱩᱱᱤ ᱫᱚ ᱵᱤᱡᱚᱭᱟ ᱞᱚᱠᱷᱢᱤ ᱯᱟᱱᱰᱤᱛ ᱨᱮᱱ ᱵᱷᱟᱹᱜᱽᱱᱟᱹᱣ ᱮᱨᱟᱭ ᱛᱟᱦᱮᱸ ᱠᱟᱱᱟ ᱟᱨ ᱯᱨᱚᱥᱟᱱᱛᱟ ᱢᱩᱠᱷᱟᱨᱡᱤ ᱡᱟᱦᱟᱸᱭ ᱫᱚ ᱤᱱᱰᱤᱭᱟᱱ ᱨᱮᱞᱣᱮ ᱵᱳᱨᱰ ᱨᱮᱱ ᱪᱮᱭᱟᱨᱯᱟᱨᱥᱚᱱ ᱮ ᱛᱟᱦᱮᱸ ᱠᱟᱱᱟ ᱟᱨ ᱠᱮᱥᱚᱵ ᱪᱚᱸᱫᱽᱨᱚ ᱥᱮᱱ ᱨᱮᱱ ᱜᱚᱲᱚᱢ ᱠᱩᱲᱤ ᱵᱷᱟᱭᱚᱞᱮᱴ ᱥᱟᱞᱟᱜ ᱮ ᱵᱟᱯᱞᱟ ᱞᱮᱱᱟ ᱾ ᱩᱱᱤ ᱨᱮᱱ ᱦᱩᱰᱤᱧ ᱵᱚᱦᱟᱱ ᱱᱤᱛᱟ ᱥᱮᱱ ᱨᱮᱱ ᱦᱚᱯᱚᱱ ᱮᱨᱟ ᱜᱤᱛᱤ ᱥᱮᱱ ᱫᱚ ᱢᱤᱫ ᱧᱩᱛᱩᱢᱟᱱ ᱟᱨᱴ ᱱᱟᱜᱟᱢᱤᱭᱟᱹ ᱟᱨ IIC, ᱠᱣᱟᱨᱴᱚᱨᱞᱤ ᱨᱮᱱ ᱮᱰᱤᱴᱚᱨ-ᱤᱱ-ᱪᱤᱯᱷ ᱠᱟᱱᱟᱭ ᱟᱨ ᱧᱩᱛᱩᱢᱟᱱ ᱵᱳᱞᱤᱣᱩᱰ ᱯᱷᱤᱞᱢ ᱰᱟᱭᱨᱮᱠᱴᱚᱨ ᱢᱩᱡᱟᱯᱷᱚᱨ ᱟᱞᱤ ᱥᱟᱞᱟᱜ ᱮ ᱵᱟᱯᱞᱟ ᱟᱠᱟᱱᱟ ᱾
ᱠᱟᱹᱢᱤ ᱠᱚ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱩᱱᱤ ᱫᱚ ᱢᱟᱭ ᱨᱤᱢᱤᱱᱤᱥᱮᱱᱥ: ᱥᱳᱥᱤᱭᱟᱞ ᱰᱮᱵᱷᱮᱞᱳᱯᱢᱮᱱᱴ ᱰᱭᱩᱨᱤᱝ ᱫᱟ ᱜᱟᱱᱫᱷᱤᱭᱟᱱ ᱮᱨᱟ ᱮᱸᱰ ᱟᱯᱷᱴᱟᱨ ᱯᱩᱛᱷᱤ ᱨᱮᱱ ᱚᱱᱚᱞᱤᱭᱟᱹ ᱠᱟᱱᱟᱭ ᱾
ᱥᱟᱹᱠᱷᱭᱟᱹᱛ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]- ↑ "Padma Awards Directory (1954-2009)" (PDF). Ministry of Home Affairs. Archived from the original (PDF) on 10 ᱢᱮ 2013.
- ↑ "RENUKA RAY (1904–1997)". Retrieved 22 June 2012.
- ↑ Shukla, Kamla Shanker; Verma, B. M. (1993). Development of scheduled castes and administration by Kamla Shanker Shukla, B. M. Verma, Indian Institute of Public Administration. Uppal Publishing House. p. 29. ISBN 9788185565354.
- ↑ Prasad, Rajeshwar (1982). Social administration: an analytical study of a state. pp. 47, 52, 53.