ᱪᱟᱪᱚ ᱪᱷᱟᱹᱴᱤᱭᱟᱹᱨ
ᱪᱟᱪᱚ ᱪᱷᱟᱹᱴᱤᱭᱟᱹᱨ > ᱫᱚ ᱢᱟᱹᱢᱤ ᱡᱟᱱᱟᱢ ᱨᱮᱱᱟᱜ ᱢᱤᱫ ᱟᱹᱰᱤ ᱢᱟᱨᱟᱝ ᱠᱟᱹᱢᱤ ᱠᱟᱱᱟ ᱾ ᱡᱟᱦᱟᱸ ᱠᱟᱹᱢᱤ ᱞᱟᱹᱜᱤᱫ ᱢᱟᱹᱱᱢᱤ ᱡᱟᱱᱟᱢ ᱟᱛᱨᱟ ᱞᱮᱠᱟ ᱜᱮ ᱟᱴᱠᱟ ᱨᱚᱜ-ᱟ ᱾ ᱪᱟᱪᱚ ᱪᱷᱟᱹᱴᱤᱭᱟᱹᱨ ᱵᱟᱝ ᱠᱟᱹᱢᱤ ᱞᱮᱠᱷᱟᱱ ᱪᱮᱬᱮ ᱪᱤᱯᱨᱩᱡ ᱡᱤᱣᱤ ᱡᱟᱹᱱᱤ ᱥᱟᱞᱟᱜ ᱵᱟᱨᱟᱠ ᱜᱮᱭᱟ ᱾ ᱜᱤᱫᱽᱨᱟᱹ ᱡᱟᱱᱟᱢ ᱠᱟᱛᱮ ᱟᱛᱱᱟᱜ ᱥᱟᱠᱟᱢ ᱨᱮ ᱟᱛᱟᱝ ᱠᱟᱛᱮ ᱫᱚ ᱵᱚ ᱢᱤᱫ ᱯᱟᱹᱨᱤᱥ ᱛᱟᱞᱟᱭᱮᱭᱟ ᱾ ᱚᱱᱟ ᱛᱟᱭᱚᱢ ᱦᱚᱭᱚ ᱨᱩᱣᱟᱹᱲ / ᱯᱩᱨ ᱠᱩᱴᱟᱹᱢ ᱠᱟᱛᱮ ᱫᱚ ᱧᱩᱛᱩᱢ ᱮᱢ ᱠᱟᱛᱮ ᱵᱚ ᱢᱟᱹᱱᱢᱤ ᱡᱟᱹᱛᱤ ᱛᱟᱞᱟᱭᱮᱭᱟ ᱾ ᱱᱚᱶᱟ ᱫᱚ ᱡᱟᱱᱟᱢ ᱪᱷᱟᱹᱴᱤᱭᱟᱹᱨ ᱥᱮ ᱧᱩᱢ ᱪᱷᱟᱹᱴᱤᱭᱟᱹᱨ ᱦᱚᱸᱵᱚ ᱢᱮᱛᱟᱜ-ᱟ ᱾
ᱪᱟᱪᱚ ᱪᱷᱟᱹᱴᱤᱭᱟᱹᱨ > ᱫᱚ ᱜᱤᱫᱽᱨᱟᱹ ᱨᱚᱲ ᱪᱮᱫ ᱠᱟᱛᱮ ᱟᱭᱳ ᱵᱟᱵᱟ ᱥᱟᱶ ᱮᱴᱟᱜ ᱥᱟᱹᱜᱟᱭ ᱠᱚ ᱦᱚᱦᱚᱭ ᱪᱮᱫ ᱡᱚᱠᱷᱟᱜ ᱠᱟᱹᱢᱤ ᱦᱩᱭᱩᱜ-ᱟ ᱾ ᱜᱤᱫᱽᱨᱟᱹ ᱨᱤᱱ ᱟᱭᱳ ᱵᱟᱵᱟ ᱢᱟᱹᱡᱷᱤ ᱢᱟᱯᱟᱧᱡᱤ ᱠᱚ ᱞᱟᱹᱭ ᱥᱟᱶᱛᱮ ᱯᱮᱲᱟ ᱯᱟᱹᱦᱬᱟ ᱠᱚ ᱦᱚᱸ ᱠᱤᱱ ᱞᱟᱹᱭ ᱟᱠᱚᱣᱟ ᱾ ᱯᱮ ᱯᱟᱹᱴᱤ ᱯᱟᱹᱴᱭᱟ ᱨᱮ ᱫᱩᱲᱩᱵ ᱠᱟᱛᱮ ᱮᱸᱜᱟᱛ ᱛᱮᱫ ᱥᱩᱱᱩᱢ ᱥᱟᱥᱟᱝ ᱮ ᱚᱡᱚᱜ ᱮᱭᱟ ᱾ ᱚᱡᱚᱜ ᱛᱟᱭᱚᱢ ᱡᱚᱜᱽ ᱢᱟᱺᱡᱷᱤ ᱵᱩᱰᱷᱤ ᱟᱨ ᱢᱟᱡᱷᱤ ᱵᱩᱰᱷᱤ ᱠᱤᱱ ᱚᱡᱚᱜ ᱮᱭᱟ ᱾ ᱢᱟᱹᱡᱷᱤ ᱵᱩᱰᱷᱤ ᱚᱡᱚᱜ ᱦᱩᱭ ᱠᱟᱛᱮ ᱟᱡ ᱵᱟᱵᱟ ᱟᱹᱜᱩ ᱟᱠᱟᱫ ᱢᱟᱞᱟ ᱰᱚᱨᱟ ᱟᱨ ᱥᱩᱛᱟᱹᱢ ᱠᱚ ᱦᱚᱨᱚᱜ ᱮ ᱛᱮ ᱠᱚ ᱵᱮᱨᱮᱫ ᱫᱟᱨᱟ ᱭᱮᱭᱟ ᱾ ᱟᱫᱚ ᱜᱤᱫᱽᱨᱟᱹ , ᱟᱭᱳ , ᱵᱟᱵᱟ , ᱡᱚᱜᱽ ᱢᱟᱹᱡᱷᱤ ᱵᱩᱰᱷᱤ ᱥᱟᱶ ᱵᱚᱝᱜᱟ ᱨᱟᱠᱟᱵ ᱥᱮᱫ ᱥᱟᱢᱟᱝ ᱠᱟᱛᱮ ᱢᱟᱹᱡᱷᱤ ᱵᱩᱰᱷᱤᱭ ᱪᱷᱟᱹᱴᱤᱭᱟᱹᱨᱟ ᱱᱩᱭ ᱫᱚ ᱯᱷᱟᱨᱱᱟ ᱦᱟᱲᱟᱢ ᱯᱷᱟᱨᱱᱟ ᱵᱩᱰᱷᱤ ᱦᱚᱯᱚᱱ/ᱦᱚᱯᱚᱱ ᱮᱨᱟ ᱠᱟᱱᱟᱭ ᱾ ᱱᱩᱭ ᱜᱮᱵᱚᱱ ᱯᱟᱹᱨᱤᱥ ᱛᱟᱞᱟ ᱞᱮᱫᱮᱭᱟ ᱟᱨ ᱵᱚ ᱡᱟᱹᱛᱤ ᱛᱟᱞᱟ ᱞᱮᱫᱮᱭᱟ ᱾ ᱛᱮᱦᱮᱧ ᱫᱚ ᱱᱩᱭ ᱫᱚ ᱯᱤᱞᱪᱩ ᱜᱟᱬᱟ ᱢᱟᱹᱢᱤ ᱫᱷᱚᱨᱚᱢ ᱨᱤᱱ ᱵᱚᱝᱜᱟ ᱵᱳᱨᱳ ᱛᱟᱞᱟ ᱠᱮᱫᱮᱭᱟ ᱾ ᱛᱮᱦᱮᱧ ᱠᱷᱚᱱ ᱱᱩᱸᱭᱟᱜ ᱛᱤᱛᱮ ᱫᱟᱜ ᱫᱟᱠᱟ ᱫᱟᱝ ᱫᱟᱬᱮ ᱵᱚ ᱟᱛᱟᱝ ᱟ , ᱵᱚᱝᱜᱟ ᱵᱳᱨᱳ ᱠᱚᱦᱚᱸ ᱠᱚ ᱯᱮᱨᱮᱡᱚᱜ-ᱟ ᱾
ᱥᱟᱨᱮᱡ ᱠᱟᱛᱷᱟ > ᱥᱮᱨᱣᱟ ᱞᱮᱠᱟᱛᱮ ᱡᱟᱦᱟᱸᱭ ᱦᱚᱲᱟᱜ ᱪᱟᱪᱚ ᱪᱷᱟᱹᱴᱤᱭᱟᱨ ᱵᱟᱝ ᱦᱩᱭ ᱟᱠᱟᱱᱟ ᱩᱱᱤ ᱫᱚ ᱵᱚᱝᱜᱟ ᱵᱳᱨᱳ ᱴᱷᱟᱶ ᱨᱮ ᱵᱟᱭ ᱥᱮᱞᱮᱫ ᱫᱟᱲᱮᱭᱟᱜ-ᱟ , ᱵᱟᱯᱞᱟ ᱵᱟᱝ ᱦᱩᱭᱩᱜ ᱛᱟᱭᱟ , ᱜᱚᱡ ᱜᱩᱨ ᱞᱮᱱ ᱠᱷᱟᱱᱮ ᱵᱟᱠᱚ ᱛᱮᱱ ᱢᱟᱦᱟᱱ ᱵᱷᱟᱸᱰᱟᱱ ᱮᱭᱟ ᱾ ᱪᱮᱫᱟᱜ ᱥᱮ , ᱩᱱᱤᱫᱚ ᱫᱷᱚᱨᱚᱢ ᱨᱤᱱ ᱵᱚᱝᱜᱟ ᱵᱳᱨᱳ ᱥᱟᱞᱟᱜ ᱟᱹᱣᱨᱤ ᱥᱮᱞᱮᱫᱚᱜ-ᱟᱭ ᱾