Jump to content

ᱪᱤᱱ ᱦᱚᱲ

ᱣᱤᱠᱤᱯᱤᱰᱤᱭᱟ, ᱨᱟᱲᱟ ᱜᱮᱭᱟᱱ ᱯᱩᱛᱷᱤ ᱠᱷᱚᱱ
ᱪᱤᱱ ᱦᱚᱲ
ᱪᱤᱱ ᱛᱤᱨᱞᱟᱹ ᱟᱨ ᱜᱤᱫᱽᱨᱟᱹ ᱠᱚ
ᱜᱩᱴ ᱦᱚᱲ ᱮᱞ
᱑,᱕᱐᱐,᱐᱐᱐+ (᱒᱐᱑᱑)
ᱰᱷᱮᱨ ᱧᱚᱜ ᱦᱚᱲ ᱮᱞ ᱢᱮᱱᱟᱜ ᱠᱚ ᱴᱚᱴᱷᱟ
ᱢᱤᱭᱟᱱᱢᱟᱨ᱑,᱕᱐᱐,᱐᱐᱐[᱑]
ᱥᱤᱧᱚᱛ᱑᱐᱐,᱐᱐᱐+
          ᱢᱤᱡᱚᱨᱟᱢ᱗᱐,᱐᱐᱐–᱑᱐᱐,᱐᱐᱐ (᱒᱐᱑᱒)[᱒]
          ᱢᱚᱬᱤᱯᱩᱨ᱑᱒,᱐᱐᱐[᱓]
ᱟᱢᱮᱨᱤᱠᱟ᱗᱐,᱐᱐᱐[᱔]
ᱢᱟᱞᱮᱥᱤᱭᱟ᱑᱒,᱐᱐减[᱕]
ᱯᱟᱹᱨᱥᱤ ᱠᱚ
ᱡᱚᱲᱟᱣ ᱯᱟᱹᱨᱥᱤ:
ᱵᱚᱨᱢᱤ ᱯᱟᱹᱨᱥᱤ ᱥᱮ
ᱟᱭᱳ ᱟᱲᱟᱝ:
ᱮᱴᱟᱜ ᱠᱩᱠᱤ-ᱪᱤᱱ ᱯᱟᱹᱨᱥᱤ ᱠᱚ
ᱫᱷᱚᱨᱚᱢ
ᱵᱟᱹᱲᱛᱤ ᱠᱟᱭᱛᱮ:
ᱤᱥᱟᱹᱭ ᱫᱷᱚᱨᱚᱢ ᱘᱐%[᱖]
ᱠᱚᱢ ᱠᱟᱭᱛᱮ: ᱒᱐%[᱖]
ᱵᱩᱫᱽᱫᱷᱚ ᱫᱷᱚᱨᱚᱢ, ᱞᱟᱠᱪᱟᱨ ᱫᱷᱚᱨᱚᱢ ᱠᱚ
ᱥᱩᱯᱩᱨ ᱥᱟᱹᱜᱟᱹᱭᱟᱱ ᱡᱟᱹᱛ ᱠᱚ
ᱢᱤᱡᱳ ᱦᱚᱲ, ᱱᱟᱜᱟ ᱦᱚᱲ, ᱠᱩᱠᱤ ᱦᱚᱲ, ᱵᱟᱣᱢ ᱦᱚᱲ

ᱪᱤᱱ ᱦᱚᱲ ᱫᱚ ᱢᱤᱭᱟᱱᱢᱟᱨ ᱨᱮᱱᱟᱜ ᱪᱤᱱ ᱯᱚᱱᱚᱛ ᱨᱤᱱ ᱟᱹᱫᱤᱵᱟᱹᱥᱤ ᱜᱟᱛᱟᱠ ᱠᱟᱱᱟ ᱠᱚ ᱡᱟᱦᱟᱸᱭ ᱫᱚ ᱠᱩᱠᱤᱼᱪᱤᱱᱼᱢᱤᱡᱚ ᱯᱟᱹᱨᱥᱤ ᱛᱮ ᱠᱚ ᱨᱚᱲᱟ ᱾ ᱱᱚᱶᱟ ᱯᱟᱹᱨᱥᱤ ᱠᱚᱫᱚ ᱢᱤᱫ ᱥᱟᱶ ᱡᱩᱲᱟᱹᱭ ᱨᱮᱦᱚᱸ ᱵᱷᱮᱜᱟᱨ ᱵᱷᱮᱜᱟᱨ ᱜᱮᱭᱟ ᱾ ᱪᱤᱱ ᱩᱯᱨᱩᱢ ᱫᱚ ᱢᱤᱫ ᱱᱟᱶᱟ ᱩᱭᱦᱟᱹᱨ ᱠᱟᱱᱟ, ᱡᱟᱦᱟᱸ ᱫᱚ ᱵᱨᱤᱴᱤᱥ ᱥᱟᱥᱚᱱ ᱟᱨ ᱯᱷᱩᱨᱜᱟᱹᱞ ᱛᱟᱭᱚᱢ ᱨᱮᱱᱟᱜ ᱨᱟᱡᱽᱟᱹᱨᱤ ᱦᱚᱛᱮᱛᱮ ᱢᱟᱨᱮ ᱟᱹᱫᱤᱵᱟᱹᱥᱤ ᱟᱨ ᱴᱚᱴᱷᱟᱠᱤᱭᱟᱹ ᱩᱯᱨᱩᱢ ᱠᱚ ᱢᱮᱥᱟ ᱠᱟᱛᱮ ᱵᱮᱱᱟᱣ ᱟᱠᱟᱱᱟ ᱾

ᱧᱩᱛᱩᱢ ᱨᱮᱱᱟᱜ ᱯᱷᱮᱰᱟᱛ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱪᱤᱱ ᱫᱚ ᱢᱤᱫ ᱵᱟᱦᱨᱮ ᱧᱩᱛᱩᱢ ᱠᱟᱱᱟ, ᱡᱟᱦᱟᱸ ᱫᱚ ᱵᱚᱨᱢᱤ ᱯᱟᱹᱨᱥᱤ ᱛᱮ ᱟᱥᱳ ᱪᱤᱱ ᱟᱹᱲᱟᱹ ᱠᱷᱞᱚᱝ ᱥᱮ ᱠᱷᱟᱞᱟᱝᱜ ᱠᱷᱚᱱ ᱦᱮᱡ ᱟᱠᱟᱱᱟ, ᱡᱟᱦᱟᱸ ᱨᱮᱱᱟᱜ ᱢᱮᱱᱮᱛ ᱫᱚ "ᱢᱟᱹᱱᱢᱤ" ᱥᱮ "ᱦᱚᱲ" ᱾[᱗] ᱵᱚᱨᱢᱤ ᱨᱚᱲ ᱦᱚᱲ ᱠᱚᱫᱚ ᱟᱥᱳ ᱪᱤᱱ ᱟᱹᱲᱟᱹ ᱟᱸᱡᱚᱢ ᱠᱟᱛᱮ ᱱᱚᱶᱟ ᱧᱩᱛᱩᱢ ᱫᱚ ᱟᱨᱟᱠᱟᱱ ᱵᱩᱨᱩ ᱟᱨ ᱪᱤᱱ ᱦᱤᱞᱥ ᱨᱮ ᱛᱟᱦᱮᱸᱱ ᱠᱟᱱ ᱡᱚᱛᱚ ᱜᱟᱛᱟᱠ ᱠᱚ ᱞᱟᱹᱜᱤᱫ ᱵᱮᱵᱷᱟᱨ ᱠᱚ ᱮᱛᱚᱦᱚᱵ ᱠᱮᱫᱼᱟ ᱾[᱗] ᱵᱚᱨᱢᱤ ᱥᱟᱲᱮ ᱨᱮ ᱱᱚᱶᱟ ᱟᱹᱲᱟᱹ ᱫᱚ ᱯᱩᱭᱞᱩ ᱫᱷᱟᱣ ᱑᱑ ᱟᱱᱟᱜ ᱥᱟᱭ ᱥᱮᱨᱢᱟ ᱨᱮ ᱨᱟᱡᱟ ᱠᱭᱟᱱᱥᱤᱛᱷᱟ ᱟᱜ ᱚᱠᱛᱚ ᱨᱮᱱᱟᱜ ᱫᱷᱤᱨᱤ ᱚᱞ ᱠᱚᱨᱮ ᱧᱮᱞ ᱟᱠᱟᱱᱟ ᱾[᱘]

"ᱪᱤᱱ" ᱧᱩᱛᱩᱢ ᱫᱚ ᱪᱤᱱ ᱯᱚᱱᱚᱛ ᱨᱮ ᱛᱟᱦᱮᱸᱱ ᱠᱟᱱ ᱡᱚᱛᱚ ᱜᱟᱛᱟᱠ ᱥᱮ ᱡᱚᱛᱚ ᱠᱩᱠᱤᱼᱪᱤᱱ ᱜᱟᱛᱟᱠ ᱦᱚᱛᱮᱛᱮ ᱵᱟᱝ ᱟᱸᱜᱚᱪ ᱟᱠᱟᱱᱟ ᱾[᱗] ᱠᱚᱧᱮ ᱥᱮᱫ ᱨᱤᱱ ᱜᱟᱛᱟᱠ ᱠᱚᱫᱚ ᱟᱠᱚ ᱞᱟᱹᱜᱤᱫ "ᱡᱳ" ᱧᱩᱛᱩᱢ ᱠᱚ ᱠᱩᱥᱤᱭᱟᱜᱼᱟ, ᱡᱚᱠᱷᱚᱱ ᱥᱤᱧᱚᱛ ᱨᱮ ᱱᱚᱝᱠᱟᱱ ᱜᱟᱛᱟᱠ ᱠᱚᱫᱚ "ᱡᱳᱢᱤ" ᱥᱮ "ᱢᱤᱡᱚ" ᱧᱩᱛᱩᱢ ᱵᱮᱵᱷᱟᱨ ᱠᱚ ᱠᱩᱥᱤᱭᱟᱜᱼᱟ ᱾[᱗][᱙]

ᱵᱨᱤᱴᱤᱥ ᱥᱟᱥᱚᱱ ᱚᱠᱛᱚ ᱨᱮ, ᱩᱯᱱᱤᱵᱮᱥᱤ ᱥᱚᱨᱠᱟᱨ ᱫᱚ ᱠᱩᱠᱤᱥ ᱯᱟᱹᱨᱥᱤ ᱨᱚᱲ ᱦᱚᱲ ᱠᱚ ᱞᱟᱹᱜᱤᱫ 'ᱪᱤᱱᱼᱠᱩᱠᱤᱼᱢᱤᱡᱚ' ᱧᱩᱛᱩᱢ ᱮ ᱵᱮᱵᱷᱟᱨ ᱞᱮᱫᱼᱟ, ᱟᱨ ᱥᱤᱧᱚᱛ ᱥᱚᱨᱠᱟᱨ ᱦᱚᱸ ᱱᱚᱶᱟ ᱧᱩᱛᱩᱢ ᱜᱮᱭ ᱟᱸᱜᱚᱪ ᱠᱮᱫᱼᱟ ᱾[᱑᱐][᱑᱑][᱑᱒] ᱢᱤᱭᱟᱱᱢᱟᱨ ᱥᱚᱨᱠᱟᱨ ᱫᱚ ᱪᱤᱱ ᱦᱚᱲ ᱠᱚ ᱢᱤᱫ "ᱡᱟᱹᱛᱤᱭᱟᱹᱨᱤ ᱜᱟᱛᱟᱠ" ᱞᱮᱠᱟᱛᱮ ᱠᱚ ᱞᱮᱠᱷᱟ ᱠᱚᱣᱟ, ᱡᱟᱦᱟᱸ ᱨᱮ ᱕᱓ ᱜᱚᱴᱟᱝ ᱪᱟᱸᱜᱟ ᱜᱟᱛᱟᱠ ᱢᱮᱱᱟᱜ ᱠᱚᱣᱟ ᱾[᱑᱓]

ᱪᱟᱸᱜᱟ ᱜᱟᱫᱮᱞ ᱠᱚ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱮᱯᱷ. ᱠᱮ. ᱞᱮᱦᱢᱮᱱ ᱞᱮᱠᱟᱛᱮ, ᱪᱤᱱ ᱦᱚᱲ ᱠᱚᱫᱚ ᱚᱛᱱᱚᱜ ᱟᱨ ᱞᱟᱠᱪᱟᱨ ᱞᱮᱠᱟᱛᱮ ᱵᱟᱨ ᱴᱷᱮᱱ ᱠᱚ ᱦᱟᱹᱴᱤᱧ ᱟᱠᱟᱱᱟ ᱼ ᱠᱚᱧᱮ ᱪᱤᱱ ᱟᱨ ᱮᱛᱚᱢ ᱪᱤᱱ ᱾ ᱠᱚᱧᱮ ᱪᱤᱱ ᱦᱚᱲ ᱠᱚᱫᱚ "ᱵᱩᱨᱩ ᱪᱤᱱ" ᱢᱮᱱᱛᱮ ᱦᱚᱸ ᱠᱚ ᱵᱟᱰᱟᱭᱚᱜᱼᱟ ᱾[᱑᱔] ᱠᱚᱧᱮ ᱟᱨ ᱮᱛᱚᱢ ᱪᱤᱱ ᱨᱮᱱᱟᱜ ᱥᱤᱢᱟᱹ ᱫᱚ ᱒᱑°᱔᱕'N ᱨᱮ ᱢᱮᱱᱟᱜᱼᱟ ᱾ ᱞᱮᱦᱢᱮᱱ ᱮ ᱞᱟᱹᱭᱟ ᱡᱮ ᱠᱚᱧᱮ ᱛᱩᱞᱟᱹᱡ ᱨᱮ ᱮᱛᱚᱢ ᱪᱤᱱ ᱦᱚᱲ ᱠᱚᱣᱟᱜ ᱞᱟᱠᱪᱟᱨ ᱫᱚ ᱩᱱᱟᱹᱜ ᱠᱤᱥᱟᱹᱬ ᱫᱚ ᱵᱟᱹᱱᱩᱜᱼᱟ ᱾[᱑᱕][᱑᱖]

ᱠᱚᱧᱮ ᱪᱤᱱ ᱦᱤᱞᱥ ᱨᱮ, ᱱᱩᱠᱩ ᱫᱚ ᱯᱮᱭᱟ ᱴᱚᱴᱷᱟ ᱨᱮᱠᱚ ᱦᱟᱹᱴᱤᱧ ᱟᱠᱟᱱᱟ ᱼ ᱛᱮᱫᱤᱢ, ᱯᱷᱟᱞᱟᱢ ᱟᱨ ᱦᱟᱠᱟ᱾ ᱛᱮᱫᱤᱢ ᱴᱚᱴᱷᱟ ᱨᱮ ᱥᱩᱠᱛᱮ, ᱠᱟᱢᱦᱟᱣ ᱟᱨ ᱥᱤᱡᱟᱝ ᱜᱟᱛᱟᱠ ᱢᱮᱱᱟᱜ ᱠᱚᱣᱟ ᱾ ᱱᱩᱠᱩ ᱫᱚ ᱟᱨᱦᱚᱸ ᱦᱩᱰᱤᱧ ᱪᱟᱸᱜᱟ ᱜᱟᱛᱟᱠ ᱡᱮᱞᱮᱠᱟ ᱼ ᱫᱤᱢ, ᱠᱷᱩᱣᱟᱱᱳ, ᱦᱩᱣᱟᱞᱱᱜᱳ, ᱥᱤᱡᱟᱝ, ᱛᱮᱫᱤᱢ, ᱥᱟᱭᱡᱟᱝ, ᱛᱷᱟᱰᱳ, ᱛᱮᱭᱡᱟᱝ, ᱵᱷᱟᱝᱛᱮ, ᱜᱩᱭᱛᱮ, ᱵᱟᱭᱯᱷᱮᱭ ᱟᱨ ᱡᱳᱣ ᱨᱮᱠᱚ ᱦᱟᱹᱴᱤᱧ ᱟᱠᱟᱱᱟ ᱾ ᱱᱩᱠᱩ ᱜᱟᱫᱮᱞ ᱫᱚ ᱟᱠᱚ ᱛᱮ ᱡᱳᱢᱤ ᱢᱮᱱᱛᱮ ᱠᱚ ᱞᱟᱹᱭᱚᱜᱼᱟ ᱾ ᱯᱷᱟᱞᱟᱢ ᱴᱚᱴᱷᱟ ᱨᱮ ᱥᱩᱱᱛᱷᱞᱟ, ᱡᱟᱦᱟᱣ, ᱦᱩᱣᱟᱞᱱᱜᱳ, ᱠᱷᱩᱣᱟᱞᱥᱤᱢ, ᱛᱟᱣᱭᱟᱱ, ᱡᱟᱱᱱᱤᱭᱟᱛ, ᱱᱜᱟᱣᱱ, ᱞᱟᱭᱡᱳ ᱟᱨ ᱠᱷᱩᱣᱟᱝᱞᱤ ᱟᱹᱫᱤᱵᱟᱹᱥᱤ ᱠᱚ ᱟᱹᱰᱤ ᱵᱟᱹᱲᱛᱤ ᱢᱮᱱᱟᱜ ᱠᱚᱣᱟ, ᱡᱟᱦᱟᱸᱭ ᱫᱚ ᱚᱠᱟ ᱚᱠᱟ ᱡᱚᱠᱷᱚᱡ ᱯᱟᱣᱤ ᱢᱮᱱᱛᱮ ᱠᱚ ᱢᱮᱛᱟ ᱠᱚᱣᱟ ᱾ ᱱᱟᱜᱟᱢ ᱞᱮᱠᱟᱛᱮ, ᱵᱨᱤᱴᱤᱥ ᱠᱚᱫᱚ ᱱᱩᱠᱩ 'ᱛᱟᱥᱳᱱ' ᱢᱮᱱᱛᱮ ᱠᱚ ᱚᱞ ᱟᱠᱟᱫ ᱠᱚᱣᱟ ᱾[᱑᱔] ᱦᱟᱠᱟ ᱴᱚᱴᱷᱟ ᱨᱮ ᱫᱚ ᱦᱟᱠᱟ, ᱛᱷᱟᱱᱛᱞᱟᱝ, ᱡᱳᱠᱷᱩᱣᱟ, ᱛᱷᱮᱛᱴᱟᱥ ᱟᱨ ᱠᱟᱯᱤᱥ ᱦᱚᱲ ᱢᱮᱱᱟᱜ ᱠᱚᱣᱟ ᱾ ᱱᱩᱠᱩ ᱫᱚ ᱟᱠᱚ ᱛᱮ ᱞᱟᱭᱢᱤ ᱠᱚ ᱢᱮᱱᱚᱜᱼᱟ ᱾ ᱦᱟᱠᱟ ᱴᱚᱴᱷᱟ ᱨᱤᱱ ᱦᱚᱲ ᱠᱚᱣᱟᱜ ᱟᱹᱨᱤᱪᱟᱹᱞᱤ ᱫᱚ ᱢᱟᱨᱟ ᱦᱚᱲ ᱠᱚ ᱥᱟᱶ ᱢᱮᱥᱟ ᱜᱮᱭᱟ ᱾[᱑᱕]

ᱮᱛᱚᱢ ᱪᱤᱱ ᱨᱮ ᱫᱚ ᱵᱟᱹᱲᱛᱤ ᱠᱟᱭᱛᱮ ᱵᱮᱰᱟ ᱥᱮ ᱥᱚᱢᱟᱱ ᱴᱚᱴᱷᱟ ᱨᱤᱱ ᱪᱤᱱ ᱦᱚᱲ ᱢᱮᱱᱟᱜ ᱠᱚᱣᱟ ᱾ ᱩᱱᱠᱩᱣᱟᱜ ᱞᱟᱠᱪᱟᱨ ᱫᱚ ᱠᱚᱧᱮ ᱦᱚᱲ ᱠᱷᱚᱱ ᱵᱷᱮᱜᱟᱨ ᱜᱮᱭᱟ, ᱡᱮᱞᱮᱠᱟ ᱼ ᱜᱚᱡ ᱦᱚᱲ ᱫᱟᱦᱚᱱ ᱟᱨ ᱢᱮᱫᱦᱟ ᱨᱮ ᱠᱷᱳᱫᱟ ᱾ ᱮᱛᱚᱢ ᱪᱤᱱ ᱨᱮ ᱪᱤᱱᱢᱮ, ᱣᱮᱞᱟᱣᱩᱝ, ᱪᱤᱱᱵᱳᱠ, ᱭᱤᱱᱫᱩ, ᱪᱤᱱᱵᱳᱱ, ᱠᱷᱭᱟᱝ, ᱥᱳ, ᱟᱥᱳ, ᱪᱳ, ᱠᱷᱟᱢᱤ, ᱢᱨᱳ ᱟᱨ ᱠᱤᱪᱷᱩ ᱵᱚᱨᱢᱤ ᱜᱟᱛᱟᱠ ᱡᱮᱞᱮᱠᱟ ᱼ ᱟᱱᱩ, ᱠᱩᱱ, ᱯᱟᱞᱞᱟᱭᱤᱝ ᱟᱨ ᱥᱟᱠ/ᱛᱷᱮᱛ ᱠᱚ ᱢᱮᱱᱟᱜ ᱠᱚᱣᱟ ᱾[᱑᱕]

ᱚᱛᱱᱚᱜ ᱯᱟᱥᱱᱟᱣ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱢᱤᱭᱟᱱᱢᱟᱨ ᱨᱮ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱪᱤᱱ ᱦᱚᱲ ᱠᱚᱫᱚ ᱵᱟᱹᱲᱛᱤ ᱠᱟᱭᱛᱮ ᱢᱤᱭᱟᱱᱢᱟᱨ ᱨᱮᱱᱟᱜ ᱯᱟᱪᱮ ᱦᱟᱹᱴᱤᱧ ᱨᱮ ᱠᱚ ᱛᱟᱦᱮᱸᱱᱟ, ᱡᱟᱦᱟᱸ ᱫᱚ ᱥᱤᱝᱜᱩ ᱯᱞᱮᱴᱳ ᱠᱷᱚᱱ ᱟᱨᱟᱠᱟᱱ ᱵᱩᱨᱩ ᱫᱷᱟᱹᱵᱤᱡ ᱯᱟᱥᱱᱟᱣ ᱟᱠᱟᱱᱟ ᱾ ᱱᱚᱶᱟ ᱨᱮ ᱪᱤᱱ ᱟᱨ ᱨᱟᱠᱷᱟᱭᱤᱱ ᱯᱚᱱᱚᱛ, ᱵᱟᱜᱳ, ᱢᱟᱜᱽᱣᱮ ᱟᱨ ᱥᱟᱜᱟᱭᱤᱝ ᱴᱚᱴᱷᱟ ᱠᱚ ᱥᱮᱞᱮᱫ ᱢᱮᱱᱟᱜᱼᱟ ᱾[᱙] ᱭᱟᱝᱜᱩᱱ ᱟᱨ ᱢᱟᱱᱰᱟᱞᱟᱭ ᱞᱮᱠᱟᱱ ᱢᱟᱨᱟᱝ ᱵᱟᱡᱟᱨ ᱠᱚᱨᱮ ᱦᱚᱸ ᱟᱭᱢᱟ ᱪᱤᱱ ᱦᱚᱲ ᱢᱮᱱᱟᱜ ᱠᱚᱣᱟ ᱾[᱗] ᱨᱟᱠᱷᱟᱭᱤᱱ ᱯᱚᱱᱚᱛ ᱨᱮ ᱛᱟᱦᱮᱸᱱ ᱠᱟᱱ ᱪᱤᱱ ᱦᱚᱲ ᱠᱚᱫᱚ ᱵᱟᱹᱲᱛᱤ ᱠᱟᱭᱛᱮ ᱠᱩᱢᱛᱩ, ᱟᱥᱳ, ᱠᱚᱝᱛᱩ ᱟᱨ ᱞᱟᱭᱛᱩ ᱜᱟᱛᱟᱠ ᱨᱤᱱ ᱠᱟᱱᱟ ᱠᱚ ᱾

ᱪᱤᱱ ᱯᱚᱱᱚᱛ ᱨᱮᱱᱟᱜ ᱢᱤᱫ ᱟᱹᱛᱩ ᱨᱮ ᱪᱤᱱ ᱜᱟᱛᱟᱠ

ᱵᱟᱦᱨᱮ ᱫᱤᱥᱚᱢ ᱨᱮ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱢᱤᱭᱟᱱᱢᱟᱨ ᱨᱮᱱᱟᱜ ᱨᱟᱡᱽᱟᱹᱨᱤ ᱟᱱᱟᱴ ᱠᱷᱟᱹᱛᱤᱨ ᱟᱭᱢᱟ ᱪᱤᱱ ᱦᱚᱲ ᱵᱟᱝᱞᱟᱫᱮᱥ, ᱥᱤᱧᱚᱛ, ᱛᱷᱟᱭᱞᱮᱱᱰ, ᱢᱟᱞᱮᱥᱤᱭᱟ ᱟᱨ ᱟᱢᱮᱨᱤᱠᱟ ᱛᱮ ᱥᱮᱱ ᱟᱠᱟᱱᱟ ᱾[᱙][᱑᱗] ᱟᱢᱮᱨᱤᱠᱟᱱ ᱵᱮᱯᱴᱤᱥᱴ, ᱵᱨᱤᱴᱤᱥ ᱟᱨ ᱥᱣᱤᱰᱤᱥ ᱞᱩᱛᱷᱮᱨᱟᱱ ᱪᱟᱨᱪ ᱜᱟᱫᱮᱞ ᱠᱚ ᱟᱭᱢᱟ ᱪᱤᱱ ᱦᱚᱲ ᱮᱴᱟᱜ ᱴᱷᱟᱶ ᱨᱮ ᱵᱟᱥᱟ ᱞᱟᱹᱜᱤᱫ ᱠᱚ ᱜᱚᱲᱚ ᱟᱠᱟᱫ ᱠᱚᱣᱟ ᱾ ᱢᱟᱞᱮᱥᱤᱭᱟ ᱨᱮ ᱟᱢᱫᱟᱡᱽ ᱒᱐,᱐᱐᱐ ᱪᱤᱱ ᱦᱚᱲ ᱥᱚᱨᱚᱱᱟᱨᱛᱷᱤ ᱞᱮᱠᱟᱛᱮ ᱢᱮᱱᱟᱜ ᱠᱚᱣᱟ ᱾ ᱱᱚᱶᱟ ᱵᱮᱜᱚᱨ ᱠᱚᱧᱮ ᱟᱢᱮᱨᱤᱠᱟ, ᱤᱣᱨᱳᱯ, ᱚᱥᱴᱨᱮᱞᱤᱭᱟ ᱟᱨ ᱱᱤᱣᱡᱤᱞᱮᱱᱰ ᱨᱮ ᱦᱚᱸ ᱟᱭᱢᱟ ᱦᱚᱲ ᱢᱮᱱᱟᱜ ᱠᱚᱣᱟ ᱾[᱑᱘]

ᱵᱚᱨᱢᱟ ᱠᱷᱚᱱ ᱧᱤᱨ ᱦᱮᱡ ᱟᱠᱟᱱ ᱪᱤᱱ ᱦᱚᱲ ᱠᱚᱫᱚ ᱵᱟᱹᱲᱛᱤ ᱠᱟᱭᱛᱮ ᱛᱷᱟᱭᱞᱮᱱᱰ, ᱢᱟᱞᱮᱥᱤᱭᱟ ᱟᱨ ᱥᱤᱧᱚᱛ ᱵᱚᱞᱚ ᱠᱟᱛᱮ ᱥᱚᱡᱷᱮ ᱟᱢᱮᱨᱤᱠᱟ ᱠᱚ ᱪᱟᱞᱟᱜᱼᱟ ᱾ ᱢᱤᱭᱟᱱᱢᱟᱨ ᱵᱟᱹᱜᱤ ᱠᱟᱛᱮ ᱥᱮᱱᱚᱜ ᱫᱚ ᱟᱹᱰᱤ ᱵᱚᱛᱚᱨᱟᱱ ᱟᱨ ᱠᱟᱹᱣᱰᱤ ᱠᱷᱚᱨᱚᱪ ᱟᱱᱟᱜ ᱠᱟᱹᱢᱤ ᱠᱟᱱᱟ ᱾ ᱨᱮᱸᱜᱮᱡ ᱦᱚᱲ ᱫᱚ ᱞᱟᱹᱣᱠᱟᱹ, ᱜᱟᱹᱰᱤ ᱥᱮ ᱛᱟᱲᱟᱢ ᱛᱮᱠᱚ ᱧᱤᱨᱟ, ᱡᱚᱠᱷᱚᱱ ᱠᱤᱥᱟᱹᱬ ᱦᱚᱲ ᱫᱚ ᱩᱰᱟᱹᱱ ᱜᱟᱹᱰᱤ ᱛᱮᱠᱚ ᱥᱮᱱᱚᱜᱼᱟ ᱾[᱑᱙] ᱥᱤᱢᱟᱹ ᱯᱟᱨᱚᱢ ᱞᱟᱹᱜᱤᱫ ᱫᱟᱞᱟᱞ ᱠᱚᱫᱚ ᱦᱚᱲ ᱯᱤᱪᱷᱤ ᱑,᱐᱐᱐ ᱟᱢᱮᱨᱤᱠᱟᱱ ᱰᱚᱞᱟᱨ ᱠᱚ ᱦᱟᱛᱟᱣᱟ ᱾ ᱡᱩᱫᱤ ᱵᱚᱨᱢᱤ ᱥᱮ ᱵᱟᱦᱨᱮ ᱫᱤᱥᱚᱢ ᱨᱤᱱ ᱯᱩᱞᱤᱥ ᱴᱷᱮᱱ ᱠᱚ ᱥᱟᱵᱚᱜᱼᱟ, ᱩᱱᱠᱩ ᱫᱚ ᱡᱮᱦᱮᱞ ᱟᱨ ᱱᱟᱦᱟᱪᱟᱨ ᱠᱚᱣᱟ ᱠᱚ ᱾

ᱥᱤᱧᱚᱛ ᱨᱮ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱯᱨᱟᱭ ᱖᱐,᱐᱐᱐ ᱠᱷᱚᱱ ᱑᱐᱐,᱐᱐᱐ ᱜᱟᱱ ᱪᱤᱱ ᱥᱚᱨᱚᱱᱟᱨᱛᱷᱤ ᱥᱤᱧᱚᱛ ᱨᱮ ᱠᱚ ᱛᱟᱦᱮᱸᱱᱟ, ᱟᱥᱚᱠᱟᱭ ᱛᱮ ᱢᱤᱡᱚᱨᱟᱢ ᱨᱮ ᱾ SPDC ᱦᱚᱛᱮᱛᱮ ᱦᱚᱲ ᱠᱚᱣᱟᱜ ᱥᱮᱱᱚᱜᱼᱦᱤᱡᱩᱜ ᱨᱮᱱᱟᱜ ᱯᱷᱩᱨᱜᱟᱹᱞ ᱪᱮᱛᱟᱱ ᱨᱮ ᱵᱟᱨᱚᱱ ᱠᱷᱟᱹᱛᱤᱨ, ᱟᱭᱢᱟ ᱦᱚᱲ ᱵᱤᱱᱟᱹ ᱥᱤᱫᱽ ᱥᱟᱠᱟᱢ ᱛᱮ ᱢᱤᱭᱟᱱᱢᱟᱨ ᱠᱷᱚᱱ ᱧᱤᱨ ᱦᱮᱡ ᱠᱟᱛᱮ ᱥᱤᱢᱟᱹ ᱯᱟᱨᱚᱢ ᱨᱮ ᱟᱥᱨᱟ ᱠᱚ ᱯᱟᱸᱡᱟᱭᱟ ᱾[᱒᱐][᱒᱑] ᱮᱛᱚᱦᱚᱵ ᱨᱮ ᱢᱤᱡᱚᱨᱟᱢ ᱨᱤᱱ ᱦᱚᱲ ᱪᱤᱱ ᱠᱚ ᱟᱛᱟᱝ ᱫᱟᱨᱟᱢ ᱞᱮᱫ ᱠᱚᱣᱟ, ᱢᱮᱱᱠᱷᱟᱱ ᱦᱚᱲ ᱮᱞ ᱰᱷᱮᱨ ᱤᱫᱤᱭᱮᱱ ᱠᱷᱟᱱ ᱴᱚᱴᱷᱟᱠᱤᱭᱟᱹ ᱢᱤᱡᱚ ᱦᱚᱲ ᱠᱚ ᱢᱩᱫᱽ ᱨᱮ ᱵᱤᱨᱩᱫᱷ ᱟᱨ ᱫᱤᱥᱚᱢ ᱠᱷᱚᱱ ᱞᱟᱜᱟ ᱨᱮᱱᱟᱜ ᱠᱟᱹᱢᱤ ᱦᱚᱸ ᱦᱩᱭ ᱮᱱᱟ ᱾ ᱭᱩᱛᱷ ᱢᱤᱡᱚ ᱟᱥᱚᱥᱤᱭᱮᱥᱚᱱ,ᱡᱟᱦᱟᱸ ᱫᱚ ᱢᱤᱡᱚ ᱩᱯᱨᱩᱢ ᱞᱟᱦᱟᱱᱛᱤ ᱞᱟᱹᱜᱤᱫ ᱮ ᱠᱟᱹᱢᱤᱭᱟ, ᱩᱱᱠᱩ ᱫᱚ ᱞᱟᱦᱟ ᱛᱮ ᱪᱤᱱ ᱥᱚᱨᱚᱱᱟᱨᱛᱷᱤ ᱠᱚ ᱢᱤᱡᱚᱨᱟᱢ ᱵᱟᱹᱜᱤ ᱞᱟᱹᱜᱤᱫ ᱠᱚ ᱟᱫᱮᱥ ᱞᱮᱫ ᱠᱚᱣᱟ ᱟᱨ ᱡᱩᱨᱼᱡᱚᱵᱚᱨ ᱞᱟᱜᱟ ᱩᱰᱩᱠ ᱨᱮ ᱯᱩᱞᱤᱥ ᱠᱚ ᱜᱚᱲᱚ ᱞᱮᱫ ᱠᱚᱣᱟ ᱼ ᱡᱟᱦᱟᱸ ᱫᱚ ᱵᱟᱝ ᱞᱟᱜᱟ ᱟᱹᱨᱤ ᱨᱮᱱᱟᱜ ᱵᱤᱨᱩᱫᱷ ᱠᱟᱱᱟ ᱾[᱒᱒][᱒᱓] ᱢᱤᱡᱚᱨᱟᱢ ᱨᱮ ᱪᱤᱱ ᱦᱚᱲ ᱠᱚᱫᱚ ᱡᱟᱦᱟᱸᱱᱟᱜ ᱠᱟᱹᱱᱩᱱᱤ ᱢᱟᱱᱚᱛ ᱵᱟᱹᱱᱩᱜ ᱛᱮ ᱛᱟᱦᱮᱸᱱ ᱦᱩᱭ ᱟᱠᱚ ᱠᱟᱱᱟ, ᱡᱟᱦᱟᱸ ᱠᱷᱟᱹᱛᱤᱨ ᱩᱱᱠᱩ ᱥᱟᱵ ᱦᱚᱪᱚᱜ, ᱡᱮᱦᱮᱞ ᱥᱮᱱᱚᱜ ᱟᱨ ᱱᱟᱦᱟᱪᱟᱨ ᱨᱮᱱᱟᱜ ᱵᱚᱛᱚᱨ ᱨᱮ ᱠᱚ ᱛᱟᱦᱮᱸᱱᱟ ᱾ ᱩᱱᱠᱩ ᱫᱚ ᱟᱥᱩᱞᱚᱜ, ᱦᱚᱲᱢᱚ ᱥᱟᱶᱟᱨ ᱟᱨ ᱛᱟᱦᱮᱸᱱ ᱞᱟᱹᱜᱤᱫ ᱴᱷᱟᱶ ᱧᱟᱢ ᱨᱮ ᱟᱹᱰᱤ ᱟᱱᱟᱴ ᱠᱚ ᱥᱟᱢᱟᱝ ᱮᱫᱼᱟ ᱾[᱒᱔][᱒᱕]

ᱱᱟᱜᱟᱢ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱥᱤᱨᱡᱚᱱ ᱪᱤᱱ ᱦᱚᱲ ᱠᱚᱣᱟᱜ ᱦᱟᱯᱲᱟᱢ ᱠᱚᱫᱚ ᱠᱚᱧᱮᱼᱯᱟᱪᱮ ᱪᱤᱱ ᱨᱮᱱᱟᱜ ᱭᱟᱝᱡᱮ ᱟᱨ ᱭᱮᱞᱳ ᱨᱤᱵᱷᱟᱨ ᱛᱟᱞᱟ ᱠᱷᱚᱱ ᱠᱚ ᱦᱮᱡ ᱟᱠᱟᱱᱟ ᱢᱮᱱᱛᱮ ᱯᱟᱹᱛᱭᱟᱹᱣ ᱢᱮᱱᱟᱜᱼᱟ ᱾[᱙] ᱪᱤᱱ ᱦᱚᱲ ᱠᱚᱫᱚ ᱪᱤᱱᱞᱩᱝ ᱧᱩᱛᱩᱢᱟᱱ ᱢᱤᱫ ᱥᱤᱨᱡᱚᱱ ᱴᱷᱟᱶ ᱠᱚ ᱢᱟᱱᱟᱣᱟ ᱾ ᱞᱟᱭ ᱞᱟᱹᱠᱷᱟ ᱱᱟᱜᱟᱢ ᱠᱷᱟᱹᱛᱤᱨ ᱪᱤᱱᱞᱩᱝ ᱨᱮᱱᱟᱜ ᱴᱷᱟᱶ ᱯᱟᱸᱡᱟ ᱧᱟᱢ ᱫᱚ ᱢᱩᱥᱠᱤᱞ ᱜᱮᱭᱟ, ᱢᱮᱱᱠᱷᱟᱱ ᱟᱭᱢᱟ ᱩᱭᱦᱟᱹᱨ ᱥᱚᱫᱚᱨ ᱟᱠᱟᱱᱟ ᱾ ᱡᱟᱣᱞᱟ ᱧᱩᱛᱩᱢᱟᱱ ᱢᱤᱫ ᱢᱤᱡᱚ ᱱᱟᱜᱟᱢᱤᱭᱟᱹ ᱞᱮᱠᱟᱛᱮ, ᱪᱤᱱ ᱦᱚᱲ ᱫᱚ ᱠᱤᱱ ᱥᱤ ᱦᱩᱣᱟᱝ ᱟᱜ ᱥᱟᱥᱚᱱ ᱚᱠᱛᱚ ᱨᱮ ᱪᱤᱱᱞᱩᱝ ᱠᱚ ᱵᱟᱹᱜᱤ ᱞᱮᱫᱼᱟ ᱾ ᱥᱤᱝ ᱠᱷᱟᱣ ᱠᱷᱟᱭ ᱟᱨ ᱪᱟᱣᱩᱱ ᱠᱤᱭᱳ ᱵᱟᱱᱟ ᱦᱚᱲ ᱠᱤᱱ ᱢᱮᱱᱟ ᱡᱮ ᱪᱤᱱ ᱦᱚᱲ ᱫᱚ ᱛᱤᱵᱵᱚᱛᱤᱼᱵᱚᱨᱢᱤ ᱱᱟᱜᱟᱢᱤᱭᱟᱹ ᱠᱤᱭᱟᱝ ᱦᱚᱲ ᱠᱚᱣᱟᱜ ᱵᱚᱝᱥᱚ ᱠᱟᱱᱟ ᱠᱚ ᱾ ᱱᱚᱶᱟ ᱞᱮᱠᱟᱛᱮ, ᱪᱤᱱ ᱦᱚᱲ ᱠᱚᱣᱟᱜ ᱥᱤᱨᱡᱚᱱ ᱫᱚ ᱜᱟᱱᱥᱩᱼᱛᱤᱵᱵᱚᱛ ᱥᱤᱢᱟᱹ ᱨᱮ ᱦᱩᱭ ᱞᱮᱱᱟ ᱾[᱒᱖]

ᱜᱚᱨᱰᱚᱱ ᱞᱩᱥ ᱮ ᱢᱮᱱᱟ ᱡᱮ ᱪᱤᱱᱤ ᱠᱚᱣᱟᱜ ᱮᱴᱠᱮᱴᱚᱬᱮ ᱠᱷᱟᱹᱛᱤᱨ ᱠᱤᱭᱟᱝ ᱦᱚᱲ ᱫᱚ ᱮᱛᱚᱢ ᱥᱮᱫ ᱠᱚ ᱥᱮᱱ ᱞᱮᱱᱟ ᱾ ᱛᱤᱵᱵᱚᱛᱤᱼᱵᱚᱨᱢᱤ ᱜᱟᱛᱟᱠ ᱫᱚ ᱯᱮ ᱫᱷᱟᱣ ᱨᱮ ᱠᱚ ᱦᱮᱡ ᱞᱮᱱᱟ ᱼ ᱯᱩᱭᱞᱩ ᱫᱚ ᱪᱤᱱᱼᱠᱟᱪᱤᱱᱼᱱᱟᱜᱟ ᱜᱟᱫᱮᱞ, ᱚᱱᱟ ᱛᱟᱭᱚᱢ ᱵᱚᱨᱢᱤ ᱟᱨ ᱞᱳᱞᱳ ᱦᱚᱲ ᱾[᱒᱗] ᱢᱮᱱᱠᱷᱟᱱ, ᱢᱟᱹᱱᱢᱤᱼᱥᱟᱬᱮᱥᱤᱭᱟᱹ ᱠᱚᱫᱚ ᱛᱤᱵᱵᱚᱛᱤᱼᱵᱚᱨᱢᱤ ᱜᱟᱛᱟᱠ ᱥᱟᱶ ᱢᱟᱨᱮ ᱪᱤᱱ ᱨᱮᱱᱟᱜ ᱥᱟᱹᱜᱟᱹᱭ ᱫᱚ ᱵᱟᱠᱚ ᱟᱸᱜᱚᱪᱟ ᱾ ᱮᱯᱷ. ᱠᱮ. ᱞᱮᱦᱢᱮᱱ ᱮ ᱢᱮᱱᱟ ᱡᱮ ᱪᱤᱱ ᱟᱨ ᱵᱚᱨᱢᱤ ᱦᱚᱲ ᱠᱚᱣᱟᱜ ᱦᱟᱯᱲᱟᱢ ᱠᱚᱫᱚ ᱵᱚᱨᱢᱟ ᱵᱚᱞᱚᱱ ᱢᱟᱬᱟᱝ ᱨᱮᱜᱮ ᱵᱷᱮᱜᱟᱨ ᱜᱮ ᱠᱚ ᱛᱟᱦᱮᱸ ᱠᱟᱱᱟ ᱾[᱒᱘] ᱩᱱᱤᱭᱟᱜ ᱞᱟᱹᱭ ᱞᱮᱠᱟᱛᱮ, ᱪᱤᱱ ᱱᱟᱜᱟᱢ ᱫᱚ ᱗᱕᱐ A.D. ᱥᱮᱨᱢᱟ ᱠᱷᱚᱱ ᱮᱛᱚᱦᱚᱵ ᱟᱠᱟᱱᱟ, ᱡᱚᱠᱷᱚᱱ ᱵᱚᱨᱢᱤ ᱥᱚᱥᱱᱚᱜ ᱨᱮᱱᱟᱜ ᱞᱟᱦᱟᱱᱛᱤ ᱦᱩᱭ ᱮᱱᱟ ᱟᱨ ᱪᱤᱱ ᱦᱚᱲ ᱠᱚ ᱥᱟᱶ ᱥᱟᱹᱜᱟᱹᱭ ᱛᱮᱭᱟᱨ ᱮᱱᱟ ᱾[᱒᱘]

ᱟᱹᱫᱤᱵᱟᱹᱥᱤ ᱟᱨ ᱵᱚᱝᱥᱚ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱪᱤᱱ ᱦᱚᱲ ᱠᱚᱫᱚ ᱛᱩᱨᱩᱭ ᱜᱚᱴᱟᱝ ᱢᱩᱲᱩᱛ ᱟᱹᱫᱤᱵᱟᱹᱥᱤ ᱜᱟᱛᱟᱠ ᱨᱮᱠᱚ ᱦᱟᱹᱴᱤᱧ ᱟᱠᱟᱱᱟ, ᱚᱱᱟ ᱠᱚᱫᱚ ᱦᱩᱭᱩᱜ ᱠᱟᱱᱟ: ᱟᱥᱳ, ᱪᱳ, ᱠᱷᱩᱢᱤ, ᱞᱟᱭᱢᱤ ᱟᱨ ᱡᱳᱢᱤ ᱾ ᱱᱩᱠᱩ ᱫᱚ ᱟᱨᱦᱚᱸ ᱠᱚᱢ ᱠᱷᱚᱱ ᱠᱚᱢ ᱖᱐ ᱜᱚᱴᱟᱝ ᱪᱟᱸᱜᱟᱼᱟᱹᱫᱤᱵᱟᱹᱥᱤ ᱨᱮᱠᱚ ᱦᱟᱹᱴᱤᱧ ᱟᱠᱟᱱᱟ ᱾[᱒᱙] ᱪᱤᱱ ᱦᱚᱲ ᱠᱚᱫᱚ ᱟᱠᱚᱣᱟᱜ ᱦᱟᱯᱲᱟᱢ ᱠᱚᱣᱟᱜ ᱧᱩᱛᱩᱢ ᱛᱮ ᱵᱚᱝᱥᱚ ᱧᱩᱛᱩᱢ ᱠᱚ ᱫᱚᱦᱚ ᱟᱠᱟᱫᱼᱟ; ᱡᱮᱞᱮᱠᱟ ᱥᱤᱡᱟᱝ ᱦᱚᱲ ᱠᱚᱫᱚ ᱥᱤᱭᱤᱱ ᱧᱩᱛᱩᱢᱟᱱ ᱢᱤᱫ ᱥᱟᱫᱷᱟᱨᱚᱱ ᱵᱚᱝᱥᱚ ᱧᱩᱛᱩᱢ ᱠᱚ ᱵᱮᱵᱷᱟᱨᱟ ᱾[᱙] ᱪᱤᱱ ᱨᱟᱡᱽᱟᱹᱨᱤ ᱟᱨ ᱥᱟᱶᱛᱟ ᱫᱚ ᱱᱤᱛᱚᱜ ᱦᱚᱸ ᱟᱹᱫᱤᱵᱟᱹᱥᱤ ᱥᱟᱹᱜᱟᱹᱭ ᱪᱮᱛᱟᱱ ᱨᱮᱜᱮ ᱰᱷᱮᱨ ᱛᱮ ᱛᱤᱸᱜᱩ ᱟᱠᱟᱱᱟ ᱾[᱑᱓]

ᱞᱟᱠᱪᱟᱨ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
ᱪᱤᱱ ᱛᱤᱨᱞᱟᱹ ᱡᱟᱦᱟᱸᱭᱟᱜ ᱢᱮᱫᱦᱟ ᱨᱮ ᱠᱷᱳᱫᱟ ᱢᱮᱱᱟᱜᱼᱟ

ᱡᱚᱢᱼᱧᱩ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱪᱤᱱ ᱡᱚᱢᱟᱜ ᱨᱮ ᱫᱚ ᱥᱟᱠᱟᱢ ᱟᱲᱟᱜ ᱟᱨ ᱩᱛᱩ ᱡᱤᱱᱤᱥ ᱵᱟᱹᱲᱛᱤ ᱠᱚ ᱵᱮᱵᱷᱟᱨᱟ, ᱟᱨ ᱡᱤᱞ ᱫᱚ ᱵᱟᱹᱲᱛᱤ ᱠᱟᱭᱛᱮ ᱛᱤᱠᱤ ᱠᱟᱛᱮ ᱟᱲᱟᱜ ᱥᱟᱶ ᱠᱚ ᱡᱚᱢᱟ ᱾[᱙] ᱫᱟᱠᱟ, ᱡᱚᱱᱚᱲ ᱟᱨ ᱢᱟᱹᱱᱰᱤᱭᱟᱹ ᱫᱚ ᱩᱱᱠᱩᱣᱟᱜ ᱢᱩᱲᱩᱛ ᱡᱚᱢᱟᱜ ᱠᱟᱱᱟ ᱾[᱙] ᱪᱤᱱ ᱦᱚᱲ ᱠᱚᱫᱚ ᱢᱟᱣᱛᱟᱢ ᱧᱩᱛᱩᱢᱟᱱ ᱢᱤᱫ ᱥᱟᱶᱛᱟ ᱟᱹᱨᱤ ᱟᱱᱟᱴ ᱠᱷᱟᱹᱛᱤᱨ ᱟᱹᱰᱤ ᱵᱟᱹᱲᱤᱡ ᱟᱠᱟᱞ ᱦᱚᱸ ᱠᱚ ᱥᱟᱢᱟᱝ ᱟᱠᱟᱫᱼᱟ ᱾[᱙] ᱪᱤᱱ ᱦᱚᱲ ᱫᱚ ᱚᱲᱟᱜ ᱨᱮ ᱛᱮᱭᱟᱨ ᱟᱠᱟᱱ 'ᱡᱩ' ᱧᱩᱛᱩᱢᱟᱱ ᱯᱟᱹᱣᱨᱟᱹ ᱠᱚ ᱧᱩᱭᱟ, ᱡᱟᱦᱟᱸ ᱫᱚ ᱩᱱᱠᱩᱣᱟᱜ ᱞᱟᱠᱪᱟᱨ ᱨᱮ ᱢᱤᱫ ᱞᱟᱹᱠᱛᱤᱭᱟᱱ ᱴᱷᱟᱶ ᱮ ᱟᱢᱮᱴ ᱟᱠᱟᱫᱼᱟ ᱾[᱓᱐] ᱪᱤᱱ ᱦᱟᱲᱟᱢ ᱠᱚᱫᱚ 'ᱛᱷᱤᱵᱩᱨ' ᱧᱩᱛᱩᱢᱟᱱ ᱱᱤᱠᱳᱴᱤᱱ ᱨᱟᱥᱟ ᱠᱚ ᱵᱮᱵᱷᱟᱨᱟ, ᱡᱟᱦᱟᱸ ᱫᱚ ᱦᱩᱰᱤᱧ ᱛᱷᱚᱠᱱᱟ ᱨᱮᱠᱚ ᱫᱚᱦᱚᱭᱟ ᱾[᱓᱐]

ᱦᱚᱨᱚᱜᱼᱵᱟᱱᱫᱮ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱪᱤᱱ ᱦᱚᱲ ᱠᱚᱣᱟᱜ ᱟᱭᱢᱟ ᱟᱹᱨᱤᱪᱟᱹᱞᱤ ᱞᱤᱵᱟᱥ ᱢᱮᱱᱟᱜᱼᱟ, ᱡᱮᱞᱮᱠᱟ ᱼ ᱢᱟᱛᱩ, ᱯᱷᱟᱞᱟᱢ, ᱛᱮᱫᱤᱢ, ᱡᱳ, ᱛᱟᱯᱳᱝ, ᱡᱳᱛᱩᱝ, ᱢᱤᱱᱫᱟᱛ, ᱢᱟᱨᱟ ᱮᱢᱟᱱ ᱾ ᱱᱚᱶᱟ ᱠᱚᱨᱮ ᱵᱟᱹᱲᱛᱤ ᱠᱟᱭᱛᱮ ᱟᱨᱟᱜ, ᱦᱟᱹᱨᱤᱭᱟᱹᱲ ᱟᱨ ᱦᱮᱸᱫᱮ ᱨᱚᱝ ᱵᱮᱵᱷᱟᱨᱚᱜᱼᱟ ᱾ ᱥᱟᱠᱚᱢ, ᱢᱟᱞᱟ ᱟᱨ ᱟᱸᱜᱚᱯᱟᱱ ᱞᱮᱠᱟᱱ ᱜᱚᱦᱱᱟ ᱠᱚᱦᱚᱸ ᱦᱚᱨᱚᱜᱼᱵᱟᱱᱫᱮ ᱨᱮ ᱟᱹᱰᱤ ᱞᱟᱹᱠᱛᱤᱭᱟᱱ ᱠᱟᱱᱟ ᱾ ᱪᱤᱱ ᱦᱚᱲ ᱫᱚ ᱱᱚᱶᱟ ᱠᱚ ᱫᱤᱱᱟᱹᱢ ᱫᱚ ᱵᱟᱠᱚ ᱦᱚᱨᱚᱜᱟ; ᱵᱟᱹᱲᱛᱤ ᱠᱟᱭᱛᱮ ᱥᱤᱸᱜᱮ ᱢᱟᱦᱟᱸ ᱵᱟᱯᱞᱟ, ᱪᱤᱱ ᱡᱟᱹᱛᱤᱭᱟᱹᱨᱤ ᱢᱟᱦᱟᱸ ᱟᱨ ᱮᱴᱟᱜ ᱞᱟᱹᱠᱛᱤᱭᱟᱱ ᱚᱠᱛᱚ ᱨᱮᱠᱚ ᱦᱚᱨᱚᱜᱟ ᱾[᱓᱑]

ᱯᱟᱨᱟᱵᱽ ᱯᱩᱱᱟᱹᱭ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱪᱤᱱ ᱦᱚᱲ ᱫᱚ ᱤᱥᱟᱹᱭ ᱫᱷᱚᱨᱚᱢ ᱨᱮᱱᱟᱜ ᱯᱟᱨᱟᱵᱽ ᱠᱚ ᱡᱮᱞᱮᱠᱟ ᱤᱥᱴᱟᱨᱟᱨ ᱠᱤᱨᱤᱥᱢᱟᱥ ᱠᱚ ᱢᱟᱱᱟᱣᱟ ᱾[᱙]

ᱪᱤᱱ ᱡᱟᱹᱛᱤᱭᱟᱹᱨᱤ ᱢᱟᱦᱟᱸ ᱫᱚ ᱥᱮᱨᱢᱟ ᱨᱮᱱᱟᱜ ᱒᱐ ᱯᱷᱮᱵᱽᱨᱩᱣᱟᱨᱤ ᱦᱤᱞᱚᱜ ᱠᱚ ᱢᱟᱱᱟᱣᱟ, ᱡᱟᱦᱟᱸ ᱦᱤᱞᱚᱜ ᱪᱤᱱ ᱦᱚᱲ ᱠᱚᱫᱚ ᱜᱳᱞᱟᱢ ᱟᱹᱨᱤ ᱠᱚ ᱪᱟᱵᱟ ᱞᱮᱫᱼᱟ ᱾ ᱯᱩᱭᱞᱩ ᱪᱤᱱ ᱡᱟᱹᱛᱤᱭᱟᱹᱨᱤ ᱢᱟᱦᱟᱸ ᱫᱚ ᱑᱙᱑ ᱥᱮᱨᱢᱟ ᱨᱮ ᱢᱤᱱᱫᱟᱛ ᱨᱮ ᱢᱟᱱᱟᱣ ᱞᱮᱱᱟ ᱾[᱓᱒] ᱱᱚᱶᱟ ᱦᱤᱞᱚᱜ ᱦᱚᱲ ᱠᱚᱫᱚ ᱢᱟᱫ ᱮᱱᱮᱡ, 'ᱥᱟᱨᱞᱟᱢᱠᱟᱭ', 'ᱠᱷᱩᱣᱟᱝᱪᱟᱣᱤ' ᱟᱨ 'ᱨᱩᱣᱟᱠᱷᱟᱛᱞᱟᱠ' ᱞᱮᱠᱟᱱ ᱟᱹᱨᱤᱪᱟᱹᱞᱤ ᱮᱱᱮᱡ ᱠᱚ ᱩᱫᱩᱜᱟ ᱾ ᱱᱚᱶᱟ ᱢᱟᱦᱟᱸ ᱨᱮᱱᱟᱜ ᱢᱤᱫ ᱢᱟᱨᱟᱝ ᱦᱮᱯᱨᱟᱣ ᱫᱚ ᱦᱩᱭᱩᱜ ᱠᱟᱱᱟ ᱟᱹᱨᱤᱪᱟᱹᱞᱤ ᱞᱟᱹᱲᱦᱟᱹᱭ ᱥᱮ ᱠᱩᱥᱛᱤ ('ᱞᱟᱭ ᱯᱟᱭᱦ' ) ᱾[᱓᱓] ᱚᱱᱟ ᱥᱟᱶᱛᱮ ᱢᱤᱥ ᱦᱮᱯᱨᱟᱣ, ᱯᱷᱮᱥᱚᱱ ᱥᱳ ᱟᱨ ᱥᱮᱨᱮᱧ ᱟᱠᱷᱲᱟ ᱠᱚᱦᱚᱸ ᱦᱩᱭᱩᱜᱼᱟ ᱾ ᱱᱚᱶᱟ ᱚᱠᱛᱚ ᱨᱮ 'ᱥᱟᱵᱩᱛᱤ' ᱟᱨ 'ᱪᱟᱝ' ᱞᱮᱠᱟᱱ ᱟᱹᱨᱤᱪᱟᱹᱞᱤ ᱡᱚᱢᱟᱜ ᱠᱚ ᱥᱟᱡᱟᱣᱟ ᱾

ᱮᱱᱮᱡᱼᱥᱮᱨᱮᱧ ᱟᱨ ᱠᱷᱮᱞᱚᱸᱰ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱠᱩᱥᱛᱤ ᱫᱚ ᱪᱤᱱ ᱦᱚᱲ ᱠᱚᱣᱟᱜ ᱟᱹᱨᱤᱪᱟᱹᱞᱤ ᱠᱷᱮᱞᱚᱸᱰ ᱨᱮᱱᱟᱜ ᱢᱤᱫ ᱢᱩᱲᱩᱛ ᱦᱟᱹᱴᱤᱧ ᱠᱟᱱᱟ ᱾[᱓᱔]

ᱪᱤᱱ ᱭᱩᱱᱤᱴᱮᱰ ᱮᱯ.ᱥᱤ ᱫᱚ ᱵᱚᱨᱢᱤ ᱯᱷᱩᱴᱵᱚᱞ ᱨᱮ ᱪᱤᱱ ᱦᱚᱲ ᱠᱚᱣᱟᱜ ᱨᱩᱯ ᱮ ᱥᱚᱫᱚᱨᱟ ᱾ ᱱᱚᱶᱟ ᱠᱞᱚᱵᱽ ᱫᱚ ᱢᱤᱭᱟᱱᱢᱟᱨ ᱱᱮᱥᱱᱟᱞ ᱞᱤᱜᱽ ᱨᱮ ᱠᱚ ᱮᱱᱮᱡᱼᱟ ᱾

ᱯᱟᱹᱨᱥᱤ ᱠᱚ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱪᱤᱱ ᱦᱚᱲ ᱠᱚᱫᱚ ᱟᱭᱢᱟ ᱞᱮᱠᱟᱱ ᱠᱩᱠᱤᱼᱪᱤᱱ ᱯᱟᱹᱨᱥᱤ ᱛᱮ ᱠᱚ ᱨᱚᱲᱟ, ᱡᱟᱦᱟᱸ ᱫᱚ ᱢᱤᱫ ᱥᱟᱶ ᱡᱩᱲᱟᱹᱭ ᱨᱮᱦᱚᱸ ᱵᱷᱮᱜᱟᱨ ᱵᱷᱮᱜᱟᱨ ᱜᱮᱭᱟ ᱾ ᱱᱚᱶᱟ ᱯᱟᱹᱨᱥᱤ ᱠᱚᱨᱮ ᱯᱨᱳᱴᱳᱼᱛᱤᱵᱵᱚᱛᱤᱼᱵᱚᱨᱢᱤ ᱨᱟᱦᱟ ᱟᱹᱰᱤ ᱱᱟᱯᱟᱭ ᱛᱮ ᱵᱟᱧᱪᱟᱣ ᱢᱮᱱᱟᱜᱼᱟ ᱾[᱗] ᱟᱭᱢᱟ ᱪᱤᱱ ᱯᱟᱹᱨᱥᱤ ᱠᱚ ᱟᱫᱚᱜ ᱰᱟᱦᱟᱨ ᱨᱮ ᱢᱮᱱᱟᱜᱼᱟ, ᱡᱮᱞᱮᱠᱟ ᱼ ᱞᱟᱢᱛᱩᱠ, ᱡᱟᱦᱟᱸ ᱫᱚ ᱦᱟᱠᱷᱟ ᱪᱤᱱ ᱟᱨ ᱵᱚᱨᱢᱤ ᱯᱟᱹᱨᱥᱤ ᱨᱮᱱᱟᱜ ᱯᱮᱨᱮᱡ ᱛᱮ ᱟᱫᱚᱜ ᱠᱟᱱᱟ ᱾[᱗] ᱪᱤᱱ ᱦᱚᱲ ᱠᱚ ᱢᱩᱫᱽ ᱨᱮ ᱟᱭᱢᱟ ᱯᱟᱹᱨᱥᱤ ᱵᱟᱰᱟᱭ ᱫᱚ ᱢᱤᱫ ᱥᱟᱫᱷᱟᱨᱚᱱ ᱠᱟᱛᱷᱟ ᱠᱟᱱᱟ, ᱩᱱᱠᱩ ᱫᱚ ᱟᱠᱚᱣᱟᱜ ᱟᱭᱳ ᱟᱲᱟᱝ ᱥᱟᱶᱛᱮ ᱟᱰᱮᱯᱟᱥᱮ ᱨᱮᱱᱟᱜ ᱞᱚᱠᱟᱞ ᱯᱟᱹᱨᱥᱤ ᱟᱨ ᱡᱟᱹᱛᱤᱭᱟᱹᱨᱤ ᱯᱟᱹᱨᱥᱤ ᱵᱚᱨᱢᱤ ᱦᱚᱸ ᱠᱚ ᱨᱚᱲ ᱫᱟᱲᱮᱭᱟᱜᱼᱟ ᱾[᱗][᱙]

᱒᱐᱑᱙ ᱥᱮᱨᱢᱟ ᱨᱮ, ᱪᱤᱱ ᱯᱚᱱᱚᱛ ᱥᱚᱨᱠᱟᱨ ᱫᱚ ᱢᱚᱬᱮ ᱜᱚᱴᱟᱝ ᱪᱤᱱ ᱯᱟᱹᱨᱥᱤ ᱥᱚᱨᱠᱟᱨᱤ ᱤᱛᱩᱱ ᱟᱥᱲᱟ ᱠᱚᱨᱮ ᱟᱭᱳ ᱟᱲᱟᱝ ᱞᱮᱠᱟᱛᱮ ᱯᱟᱲᱦᱟᱣ ᱞᱟᱹᱜᱤᱫ ᱮ ᱩᱭᱦᱟᱹᱨ ᱞᱮᱫᱼᱟ ᱾ ᱚᱱᱟ ᱯᱟᱹᱨᱥᱤ ᱠᱚᱫᱚ ᱦᱩᱭᱩᱜ ᱠᱟᱱᱟ ᱼ ᱡᱳᱞᱟᱭ, ᱞᱟᱭᱡᱳ, ᱞᱟᱭ, ᱠᱷᱩᱢᱤ, ᱟᱨ ᱠᱪᱳ᱾[᱓᱕]

ᱮᱛᱷᱱᱚᱞᱚᱜᱽ ᱞᱮᱠᱟᱛᱮ ᱱᱚᱶᱟ ᱜᱟᱫᱮᱞ ᱨᱮ ᱔᱙ ᱜᱚᱴᱟᱝ ᱯᱟᱹᱨᱥᱤ ᱢᱮᱱᱟᱜᱼᱟ, ᱡᱟᱦᱟᱸ ᱨᱮ ᱒᱐ ᱜᱚᱴᱟᱝ ᱯᱟᱹᱨᱥᱤ ᱨᱮᱱᱟᱜ ᱧᱩᱛᱩᱢ ᱨᱮ "ᱪᱤᱱ" ᱟᱹᱲᱟᱹ ᱢᱮᱱᱟᱜᱼᱟ ᱾ ᱞᱟᱛᱟᱨ ᱨᱮ ᱠᱤᱪᱷᱩ ᱢᱩᱲᱩᱛ ᱪᱤᱱ ᱯᱟᱹᱨᱥᱤ ᱠᱚᱣᱟᱜ ᱧᱩᱛᱩᱢ ᱮᱢ ᱮᱱᱟ:

  • ᱛᱮᱫᱤᱢ ᱪᱤᱱ, ᱟᱢᱫᱟᱡᱽ ᱔᱑᱑,᱐᱐᱐ ᱨᱚᱲ ᱦᱚᱲ ᱾
  • ᱛᱷᱟᱰᱳ ᱪᱤᱱ, ᱟᱢᱫᱟᱡᱽ ᱓᱔᱖,᱑᱐᱐ ᱨᱚᱲ ᱦᱚᱲ ᱾
  • ᱦᱟᱠᱷᱟ ᱪᱤᱱ, ᱟᱢᱫᱟᱡᱽ ᱒᱑᱐,᱔᱑᱐ ᱨᱚᱲ ᱦᱚᱲ ᱾
  • ᱯᱷᱟᱞᱟᱢ ᱪᱤᱱ, ᱟᱢᱫᱟᱡᱽ ᱑᱐᱗,᱙᱐᱐ ᱨᱚᱲ ᱦᱚᱲ ᱾
  • ᱟᱥᱳ ᱪᱤᱱ, ᱟᱢᱫᱟᱡᱽ ᱑᱗᱔,᱐᱐᱐ ᱨᱚᱲ ᱦᱚᱲ ᱾
  • ᱠᱷᱩᱢᱤ ᱪᱤᱱ, ᱟᱢᱫᱟᱡᱽ ᱖᱔,᱐᱐᱐ ᱨᱚᱲ ᱦᱚᱲ ᱾
  • ᱢᱟᱨᱟ ᱪᱤᱱ, ᱟᱢᱫᱟᱡᱽ ᱖᱒,᱔᱐᱐ ᱨᱚᱲ ᱦᱚᱲ ᱾
  • ᱡᱳᱛᱩᱝ ᱪᱤᱱ, ᱟᱢᱫᱟᱡᱽ ᱔᱐,᱐᱐᱐ ᱨᱚᱲ ᱦᱚᱲ ᱾
  • ᱢᱟᱛᱩ ᱪᱤᱱ, ᱟᱢᱫᱟᱡᱽ ᱔᱐,᱐᱐᱐ ᱨᱚᱲ ᱦᱚᱲ ᱾
  • ᱫᱟᱭ ᱪᱤᱱ, ᱟᱢᱫᱟᱡᱽ ᱔᱐,᱐᱐᱐ ᱠᱷᱚᱱ ᱕᱐,᱐᱐᱐ ᱨᱚᱲ ᱦᱚᱲ ᱾

ᱫᱷᱚᱨᱚᱢ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱱᱟᱜᱟᱢ ᱞᱮᱠᱟᱛᱮ, ᱪᱤᱱ ᱦᱚᱲ ᱠᱚᱫᱚ ᱡᱤᱣᱤᱣᱟᱫᱽ ᱠᱚ ᱛᱟᱦᱮᱸ ᱠᱟᱱᱟ, ᱩᱱᱠᱩ ᱫᱚ ᱠᱩᱲᱤᱼᱵᱟᱹᱲᱤᱡ ᱵᱚᱸᱜᱟ ᱵᱩᱨᱩ ᱠᱚ ᱪᱮᱛᱟᱱ ᱨᱮ ᱯᱟᱹᱛᱭᱟᱹᱣ ᱠᱚ ᱫᱚᱦᱚᱭ ᱛᱟᱦᱮᱸᱫ ᱾[᱙] ᱪᱤᱱ ᱦᱚᱲ ᱠᱚᱫᱚ ᱢᱤᱫ ᱫᱟᱲᱮᱭᱟᱱ ᱢᱟᱨᱟᱝ ᱵᱚᱸᱜᱟ 'ᱯᱟᱛᱷᱤᱭᱟᱱ' ᱦᱚᱸ ᱠᱚ ᱢᱟᱱᱟᱣᱮ ᱛᱟᱦᱮᱸᱫ, ᱡᱟᱦᱟᱸᱭ ᱫᱚ ᱱᱚᱶᱟ ᱫᱷᱟᱹᱨᱛᱤ ᱨᱤᱱᱤᱡ ᱥᱤᱨᱡᱚᱱᱤᱭᱟᱹ ᱠᱟᱱᱟᱭ ᱢᱮᱱᱛᱮ ᱠᱚ ᱢᱟᱱᱟᱣᱟ ᱾[᱙] ᱫᱷᱚᱨᱚᱢ ᱠᱟᱹᱢᱤ ᱦᱚᱨᱟ ᱠᱚᱨᱮ ᱜᱟᱭᱟᱞ ᱠᱚ ᱵᱚᱸᱜᱟ ᱠᱚ ᱫᱚ ᱢᱤᱫ ᱥᱟᱫᱷᱟᱨᱚᱱ ᱠᱟᱛᱷᱟ ᱛᱟᱦᱮᱸ ᱠᱟᱱᱟ ᱾[᱙]

᱑᱘᱐᱐ ᱥᱟᱭ ᱥᱮᱨᱢᱟ ᱨᱮᱱᱟᱜ ᱢᱩᱪᱟᱹᱫ ᱥᱮᱫ, ᱯᱩᱭᱞᱩ ᱤᱥᱟᱹᱭ ᱫᱷᱚᱨᱚᱢ ᱯᱟᱥᱱᱟᱣᱤᱭᱟᱹ ᱠᱚ ᱪᱤᱱ ᱯᱚᱱᱚᱛ ᱛᱮ ᱠᱚ ᱦᱮᱡ ᱞᱮᱱᱟ ᱟᱨ ᱪᱤᱱ ᱦᱚᱲ ᱠᱚ ᱤᱥᱟᱹᱭ ᱫᱷᱚᱨᱚᱢ ᱛᱮ ᱵᱚᱫᱚᱞ ᱠᱚ ᱮᱛᱚᱦᱚᱵ ᱠᱮᱫᱼᱟ ᱾[᱑᱗] ᱟᱨᱛᱷᱟᱨ ᱤ. ᱠᱟᱨᱥᱚᱱᱟᱜ ᱠᱩᱨᱩᱢᱩᱴᱩ ᱛᱮ ᱱᱚᱶᱟ ᱠᱟᱹᱢᱤ ᱫᱚ ᱟᱹᱰᱤ ᱱᱟᱯᱟᱭ ᱛᱮ ᱞᱟᱦᱟ ᱮᱱᱟ, ᱟᱨ ᱛᱮᱦᱮᱧ ᱪᱤᱱ ᱦᱚᱲ ᱠᱚ ᱢᱩᱫᱽ ᱨᱮ ᱟᱹᱰᱤ ᱵᱟᱹᱲᱛᱤ ᱫᱚ ᱤᱥᱟᱹᱭ ᱫᱷᱚᱨᱚᱢ ᱨᱤᱱ ᱠᱟᱱᱟ ᱠᱚ ᱾[᱓᱖] ᱤᱥᱟᱹᱭ ᱫᱷᱚᱨᱚᱢ ᱫᱚ ᱑᱙᱖᱖ ᱨᱮ ᱓᱕% ᱠᱷᱚᱱ ᱰᱷᱮᱨ ᱠᱟᱛᱮ ᱒᱐᱑᱐ ᱨᱮ ᱙᱐% ᱦᱩᱭ ᱟᱠᱟᱱᱟ ᱾[᱓᱗] ᱵᱩᱫᱫᱷᱚ ᱫᱷᱚᱨᱚᱢ ᱟᱱᱟᱜ ᱢᱤᱭᱟᱱᱢᱟᱨ ᱨᱮ ᱤᱥᱟᱹᱭ ᱪᱤᱱ ᱦᱚᱲ ᱠᱚᱫᱚ ᱢᱤᱞᱤᱴᱟᱨᱤ ᱥᱚᱨᱠᱟᱨ ᱦᱚᱛᱮᱛᱮ ᱫᱷᱚᱨᱚᱢ ᱱᱟᱦᱟᱪᱟᱨ ᱦᱚᱸ ᱠᱚ ᱥᱟᱢᱟᱝ ᱟᱠᱟᱫᱼᱟ ᱾[᱓᱘]

ᱟᱥᱳ ᱪᱤᱱ ᱥᱟᱶᱛᱮ ᱠᱤᱪᱷᱩ ᱪᱤᱱ ᱟᱹᱫᱤᱵᱟᱹᱥᱤ ᱫᱚ ᱵᱟᱹᱲᱛᱤ ᱠᱟᱭᱛᱮ ᱵᱩᱫᱫᱷᱚ ᱫᱷᱚᱨᱚᱢ ᱨᱤᱱ ᱠᱟᱱᱟ ᱠᱚ ᱾[᱓᱙] ᱮᱴᱟᱜ ᱠᱩᱠᱤᱼᱪᱤᱱ ᱯᱟᱹᱨᱥᱤ ᱨᱚᱲ ᱦᱚᱲ ᱡᱮᱞᱮᱠᱟ ᱢᱟᱜᱽᱣᱮ ᱴᱚᱴᱷᱟ ᱨᱤᱱ ᱛᱟᱣᱩᱝᱛᱷᱟ ᱦᱚᱲ ᱫᱚ ᱟᱠᱚ ᱛᱮ ᱪᱤᱱ ᱢᱮᱱᱛᱮ ᱵᱟᱠᱚ ᱞᱟᱹᱭᱚᱜᱼᱟ ᱾

᱒᱐ ᱟᱱᱟᱜ ᱥᱟᱭ ᱥᱮᱨᱢᱟ ᱨᱮᱱᱟᱜ ᱢᱩᱪᱟᱹᱫ ᱥᱮᱫ, ᱪᱤᱱ, ᱠᱩᱠᱤ ᱟᱨ ᱢᱤᱡᱚ ᱦᱚᱲ ᱠᱚᱣᱟᱜ ᱢᱤᱫ ᱜᱟᱫᱮᱞ ᱟᱠᱚ ᱫᱚ 'ᱵᱽᱱᱮᱭ ᱢᱟᱱᱟᱥᱮ' ᱥᱮ ᱤᱥᱨᱟᱭᱮᱞ ᱨᱮᱱᱟᱜ ᱟᱫ ᱟᱠᱟᱱ ᱜᱮᱞ ᱜᱚᱴᱟᱝ ᱵᱚᱝᱥᱚ ᱢᱩᱫᱽ ᱨᱮ ᱢᱤᱫᱴᱟᱹᱝ ᱠᱟᱱᱟ ᱠᱚ ᱢᱮᱱᱛᱮ ᱠᱚ ᱫᱟᱹᱵᱤ ᱠᱮᱫᱼᱟ ᱟᱨ ᱤᱦᱩᱫᱤ ᱫᱷᱚᱨᱚᱢ ᱠᱚ ᱟᱸᱜᱚᱪ ᱠᱮᱫᱼᱟ ᱾[᱔᱐]

ᱥᱟᱹᱠᱷᱭᱟᱹᱛ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
  1. ↑ "Chin State Among Priority Regions Needing and Receiving Minimal Humanitarian Aid".
  2. ↑ "Census planned for Chins in Mizoram State – Myanmar | ReliefWeb". 18 May 2012.
  3. ↑ "Manipur, Mizoram differ on Myanmar 'refugees'". The Hindu. 28 September 2023.
  4. ↑ McKean, Carrie (29 November 2021). "How Refugees from Myanmar Have Embraced Midland—and Its Conservative Politics". Texas Monthly.
  5. ↑ "Malaysia: Burmese Chin refugees on the run – Myanmar | ReliefWeb". 29 March 2005.
  6. 1 2 "Chin". Minority Rights Group. 19 June 2015.
  7. 1 2 3 4 5 6 7 8 Bik, Kenneth Van (2021), "19 Typological profile of Kuki-Chin languages", The Languages and Linguistics of Mainland Southeast Asia (in ᱟᱝᱜᱽᱨᱮᱡᱤ), De Gruyter Mouton, pp. 369–402, doi:10.1515/9783110558142-019, ISBN 978-3-11-055814-2, S2CID 238716745
  8. ↑ "THE ORIGIN OF THE CHIN". Chin Human Rights Organization (in ᱟᱢᱮᱨᱤᱠᱟᱱ ᱟᱝᱜᱽᱨᱮᱡᱤ). Retrieved 8 May 2025.
  9. 1 2 3 4 5 6 7 8 9 10 11 12 13 Gall, Timothy L.; Gale Research Inc, eds. (1998). "Chins". Worldmark encyclopedia of cultures and daily life. Detroit: Gale. ISBN 978-0-7876-0552-0.
  10. ↑ Violence and identity in North-east India: Naga-Kuki conflict – Page 201 S. R. Tohring – 2010 "... for these tribes including • the Kuki/ speaking tribe such as: 'Chin', 'Mizo', 'Chin-Kuki-Mizo', 'CHIKIM', 'Zomi', 'Zou', 'Zo'. ... During the British era, the British rulers used the term 'Chin-Kuki-Mizo' and the Government of India seemed to follow ..."
  11. ↑ Amy Alexander Burma: "we are Like Forgotten People" : the Chin People of Burma Page 16 2009 "... within Chin State, Chin nationalist leaders popularized the term "Chin" following Burma's independence from Britain."
  12. ↑ Gougin, T. (1984). History of Zomi. Churachandpur, Manipur: T. Gougin. OCLC 556461464. In Burma the people like to renounce the term Chin in favour of Zomi. Chin is becoming more and ...
  13. 1 2 "Disquiet on the Western Front: A Divided Resistance in Myanmar's Chin State". Crisis Group (in ᱟᱝᱜᱽᱨᱮᱡᱤ). 19 March 2025. Retrieved 8 May 2025.
  14. 1 2 Pau 2020, p. 15.
  15. 1 2 3 Pau 2020, p. 16.
  16. ↑ Lehman 1963, p. 14.
  17. 1 2 Scarlis, Christine Anne (2 June 2010). "Chin Cultural Profile". EthnoMed. Retrieved 17 May 2016.
  18. ↑ Chin Human Rights Organization, 2010.
  19. ↑ Graceffo, Antonio (26 July 2010). "Chin Refugees in Malaysia (Part 1)". Foreign Policy Journal.
  20. ↑ Threats to our Existence: Persecution of ethnic Chins in Burma, page 14.
  21. ↑ Seeking Refuge Archived ᱔ ᱡᱩᱱ ᱒᱐᱑᱖ at the Wayback Machine., page 15.
  22. ↑ "Young Mizo Association: Mizoram". mizoram.nic.in. Retrieved 5 April 2023.
  23. ↑ Human Rights Watch interview with S.A., Saiha, Mizoram, India, 7 March 2008.
  24. ↑ Refugees, United Nations High Commissioner for. "Protracted Refugee Situations". UNHCR.
  25. ↑ Seeking Refuge Archived ᱑᱙ ᱡᱟᱱᱩᱣᱟᱨᱤ ᱒᱐᱒᱑ at the Wayback Machine., pages 81–82.
  26. ↑ Sakhong 2003, p. 8.
  27. ↑ Sakhong 2003, p. 9.
  28. 1 2 Sakhong 2003, p. 10.
  29. ↑ Khai, Khen Suan (2023), Takeda, Makiko; Yamahata, Chosein (eds.), "A Threatened Identity in Chinland of Burma/Myanmar: A Glimpse of Freedom of Religion and Belief", Myanmar's Changing Political Landscape: Old and New Struggles (in ᱟᱝᱜᱽᱨᱮᱡᱤ), Singapore: Springer Nature, pp. 77–91, doi:10.1007/978-981-19-9357-2_5, ISBN 978-981-19-9357-2, retrieved 8 May 2025
  30. 1 2 ᱛᱩᱢᱟᱹᱞ ᱦᱩᱲᱟᱹᱜ:Invalid <ref> tag; no text was provided for refs named ethomed12
  31. ↑ Peacock, Andrew. "The Chin". Clover Sites.
  32. ↑ "UNPO: Celebration Of 65th Chin National Day". unpo.org. 2 November 2009. Retrieved 3 April 2019.
  33. ↑ "BUNGKUNG BLOG: Khuang Cawi ( Lifting of decorative Bamboo Litter)". 19 September 2016.
  34. ↑ "Wrestling with culture: Melbourne's Chin community celebrates Chin National Day". SBS (in ᱟᱝᱜᱽᱨᱮᱡᱤ). Retrieved 22 October 2020.
  35. ↑ Lian, Salai Van Cung; Salem-Gervais, Nicolas (November 2020). "How Many Chin Languages Should Be Taught in Government Schools?". Parami Journal of Education. 1 (1).
  36. ↑ "Chin". Retrieved 5 April 2023.
  37. ↑ Mang, Pum Za (July 2016). "Buddhist Nationalism and Burmese Christianity". Studies in World Christianity. 22 (2): 148–167.
  38. ↑ "Chin Christians Persecuted". Radio Free Asia. 5 September 2012.
  39. ↑ "Chin, Asho in Myanmar (Burma)". Joshua Project.
  40. ↑ Weil, Shalva. "Lost Israelites from North-East India", The Anthropologist, 2004. 6(3): 219–233.

ᱯᱷᱮᱰᱟᱛ ᱠᱚ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
  • Sakhong, Lian H. (2003). In Search of Chin Identity. Denmark: NIAS Press. ISBN 87-91114-15-2.
  • Khai, Sing Khaw (1995). Zo People and Their Culture. Manipur: Khampu Hatzaw.
  • Lehman, F.K. (1963). The structure of Chin society. Illinois Studies in Anthropology.
  • Pau, Pum Khan (2020). Indo-Burma Frontier and the Making of the Chin Hills. London: Routeledge. ISBN 978-0-429-32470-3.

ᱵᱟᱦᱨᱮ ᱡᱚᱱᱚᱲ

[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

Media related to ᱪᱤᱱ ᱦᱚᱲ at Wikimedia Commons

ᱪᱷᱟᱸᱪ:Kuki-Chin-Mizo tribes ᱪᱷᱟᱸᱪ:Ethnic groups in Burma

"https://sat.wikipedia.org/w/index.php?title=ᱪᱤᱱ_ᱦᱚᱲ&oldid=189550" ᱠᱷᱚᱱ ᱧᱟᱢ ᱟᱹᱜᱩᱭ