ᱫᱚᱢᱚᱠ ᱫᱚᱝ ᱥᱮᱨᱮᱧ ᱦᱚᱸ ᱫᱚᱝ ᱟᱠᱷᱲᱟ ᱨᱮᱜᱮ ᱠᱚ ᱮᱱᱮᱡᱼᱟ ᱾ ᱫᱚᱢᱚᱠ ᱧᱚᱜ ᱠᱚ ᱞᱩᱦᱩᱠᱟ ᱾ ᱦᱟᱲᱟᱢ ᱦᱚᱲ ᱵᱩᱰᱤ ᱮᱨᱟ ᱞᱩᱦᱩᱠ ᱜᱮ ᱫᱚᱢᱚᱠ ᱫᱚᱝ ᱠᱚ ᱢᱮᱛᱟᱜ-ᱟ ᱾

ᱫᱚᱢᱚᱠ ᱫᱚᱝ ᱥᱮᱨᱮᱧ

[•] ᱤᱧ ᱢᱟᱹᱧ ᱫᱮᱡᱚᱜ ᱠᱟᱱᱟ ᱫᱟᱣᱲᱟᱹ ᱪᱮᱛᱟᱱ,

ᱟᱢ ᱢᱟ ᱠᱟᱰᱟᱢ ᱜᱩᱯᱤ ᱥᱩᱲᱩᱡ ᱥᱚᱠᱲᱟ ᱾

ᱢᱟᱫ ᱥᱟᱠᱟᱢ ᱢᱩᱨᱟᱹᱞᱤ ᱥᱟᱯᱟᱨᱚᱢ ᱛᱤᱨᱭᱟᱣ,

ᱢᱟᱥᱮ ᱱᱚᱨᱥᱝ ᱢᱮᱨᱮᱧ ᱱᱟᱡᱚᱢ ᱛᱟᱨᱟᱭ ᱾

[•] ᱵᱩᱨᱩ ᱫᱤᱥᱚᱢ ᱰᱟᱹᱰᱤ ᱠᱩᱧ ᱫᱟᱜ

ᱥᱮ ᱥᱮᱠᱮᱡ ᱥᱮᱝᱠᱮ ᱥᱮᱠᱮᱡ

ᱥᱮᱛᱮᱧ ᱟᱠᱟᱱ ᱫᱚ ᱫᱩᱞᱤ

ᱵᱟᱫᱚᱞᱤᱨᱮ ᱛᱚᱣᱟ ᱞᱮᱠᱟᱱ ᱫᱟᱜ ᱾

ᱞᱩᱻᱭᱟᱞᱟᱝ ᱵᱷᱩᱻᱨᱟᱹᱜᱟᱞᱟᱝ

ᱦᱮᱨᱢᱮᱻᱫᱟᱞᱟᱝ ᱫᱤᱯᱤᱻᱞᱟᱞᱟᱝ

ᱥᱮ ᱥᱮᱠᱮᱡ ᱥᱮᱝᱠᱮ ᱥᱮᱠᱮᱡ

ᱥᱮᱛᱮᱧ ᱟᱠᱟᱱ ᱫᱚ ᱫᱩᱞᱤ

ᱵᱟᱫᱚᱞᱤᱨᱮ ᱛᱚᱣᱟ ᱞᱮᱠᱟᱱ ᱫᱟᱜ ᱾

[•] ᱫᱟᱜ ᱫᱚ ᱨᱮ ᱫᱟᱜᱽ ᱢᱮ

ᱠᱩᱞᱦᱤ ᱫᱷᱩᱲᱤ ᱫᱚ ᱨᱮ ᱟᱞᱚᱢ ᱞᱚᱦᱚᱫ,

ᱦᱚᱞᱟ ᱥᱤᱸᱜᱟᱹᱲ ᱨᱮ

ᱠᱟᱠᱟ ᱵᱟᱞᱟᱭ ᱚᱰᱚᱠ ᱟᱠᱟᱱ

ᱦᱟᱛᱚᱢ ᱵᱟᱞᱟᱭ ᱵᱟᱦᱮᱨ ᱟᱠᱟᱱ,

ᱠᱩᱞᱦᱤ ᱫᱷᱩᱲᱤ ᱨᱮ ᱯᱟᱸᱡᱟᱞᱮ ᱧᱮᱞ ᱾

[•] ᱦᱚᱭ ᱫᱟᱜ ᱢᱟ ᱫᱟᱨᱟᱭ ᱠᱟᱱ

ᱭᱚᱦᱟᱭ ᱦᱟᱴᱟᱜ ᱛᱮ ᱟᱨᱮᱡᱽ ᱞᱮᱠᱟ,

ᱛᱟᱞᱟ ᱠᱩᱞᱦᱤ ᱨᱮ ᱵᱟᱞᱚᱠ ᱫᱚ ᱢᱮᱱᱟᱭᱟ

ᱭᱚᱦᱟᱭ ᱵᱟᱞᱚᱠ ᱫᱚᱭ ᱵᱚᱦᱮᱞᱚᱜ ᱠᱟᱱ ᱾

[•] ᱪᱟᱹᱭ ᱪᱟᱢᱯᱟ ᱪᱤᱛᱟᱹᱨ

            ᱪᱟᱸᱫᱚ ᱥᱚᱢᱟᱱ ᱪᱤᱠᱟᱹᱬ

ᱪᱟᱯᱟᱞ ᱪᱟᱹᱶᱨᱤᱡ ᱪᱟᱜ ᱮᱢ ᱨᱟᱪᱟᱜ ᱯᱚᱯᱟᱜᱽ ᱾

ᱨᱟᱪᱟ ᱡᱚᱵᱽᱨᱟ ᱞᱮᱠᱟ

             ᱰᱷᱚᱰᱟᱨᱮᱢ ᱧᱩᱨ ᱠᱤᱫᱤᱧ

ᱫᱤᱥᱚᱢ ᱦᱚᱲ ᱠᱷᱚᱱ ᱡᱟᱠᱮᱢ ᱥᱚᱫᱚᱨ ᱠᱤᱫᱤᱧ ᱾

ᱜᱷᱮᱸᱴ ᱞᱩᱜᱽᱲᱤ ᱟᱞᱚᱢ ᱨᱮᱡᱤᱧ

      ᱛᱟᱲᱟᱢ ᱦᱚᱨ ᱨᱮ ᱟᱞᱚᱢ ᱜᱟᱸᱰᱮᱜ

ᱛᱟᱨᱮᱱ ᱜᱟᱢᱪᱷᱟ ᱛᱮ ᱢᱮᱫᱫᱟᱜ ᱟᱞᱚᱢ ᱡᱚᱫᱤᱧ ᱾