ᱫᱚᱨᱵᱟᱨ ᱟᱠᱷᱲᱟ

ᱫᱚᱨᱵᱟᱨ ᱟᱠᱷᱲᱟ Proceeding of Santals Judicial System -- ᱟᱹᱛᱩ ᱨᱮ ᱥᱩᱠ ᱥᱩᱞᱩᱠ ᱱᱤᱨᱟᱹᱭ ᱨᱮ ᱛᱟᱦᱮᱸ ᱟᱹᱥᱩᱞᱚᱜ ᱞᱟᱹᱜᱤᱫ ᱥᱟᱶ ᱥᱟᱶ ᱥᱩᱨ ᱥᱩᱯᱩᱨ ᱠᱚ ᱚᱲᱟᱜ ᱠᱟᱛᱮ ᱠᱚ ᱛᱟᱦᱮᱸᱱᱟ ᱾ ᱮᱱ ᱦᱚᱸ ᱫᱤᱱ ᱫᱚ ᱯᱚᱴᱟᱣ ᱵᱟᱝ ᱛᱟᱸᱜᱦᱮᱭᱟ ᱾ ᱦᱤᱸᱥᱟᱹ, ᱦᱤᱯᱤᱥᱟᱹ, ᱱᱮᱭᱟᱣ, ᱫᱟᱞ, ᱫᱟᱯᱟᱞ, ᱨᱮᱨᱟᱲ ᱦᱩᱭᱩᱜ ᱜᱮᱭᱟ ᱾ ᱚᱱᱟ ᱠᱚ ᱟᱞᱚ ᱦᱩᱭᱩᱜ ᱞᱟᱹᱜᱤᱫ ᱟᱨ ᱟᱨ ᱥᱚᱞᱦᱚ ᱠᱟᱛᱮ ᱡᱩᱢᱤᱫᱽ ᱜᱟᱫᱮᱞ ᱥᱚᱯᱚᱦᱚᱫ ᱛᱟᱦᱮᱸᱱ ᱜᱮ ᱵᱩᱜᱤᱭᱟ ᱾ ᱚᱱᱟ ᱛᱮᱠᱚ ᱢᱮᱱᱟ, ᱥᱚᱯᱚᱦᱚᱫ ᱜᱮ ᱥᱟᱶᱛᱟ ᱫᱚᱭ ᱫᱩᱜ ᱫᱚᱦᱚᱭᱟ ᱾ ᱱᱮᱭᱟᱣ ᱠᱚ, ᱨᱮᱨᱟᱲ ᱠᱚ ᱥᱚᱞᱦᱚ ᱠᱟᱠᱚ ᱞᱟᱹᱜᱤᱫ ᱜᱮ ᱟᱹᱛᱩ ᱨᱮ ᱢᱟᱹᱡᱷᱤ ᱜᱚᱢᱠᱮ ᱢᱮᱱᱟᱭᱟ ᱾ ᱟᱨ ᱥᱟᱶᱛᱮ ᱮᱢᱟᱱ ᱜᱚᱢᱠᱮ ᱠᱚ ᱛᱤᱸᱜᱩ ᱵᱟᱪᱷᱟᱣ ᱟᱠᱟᱫ ᱠᱚᱣᱟ ᱵᱚᱱ ᱾ ᱩᱱᱠᱩ ᱟᱛᱮ ᱜᱮ ᱟᱵᱚᱣᱟᱜ ᱫᱩᱠ ᱢᱩᱦᱤᱢ, ᱱᱮᱭᱟᱣ ᱨᱚᱯᱚᱲ ᱠᱚ ᱛᱩᱞᱟᱹᱡᱚᱠᱷᱟ ᱠᱟᱛᱮ ᱠᱚ ᱯᱮᱲᱟ ᱨᱩᱣᱟᱹᱲ ᱵᱚᱱᱟ ᱾ ᱟᱹᱛᱩ ᱨᱤᱱ ᱦᱚᱱ ᱦᱚᱯᱚᱱ ᱯᱚᱨᱡᱟ ᱫᱚ ᱢᱟᱹᱡᱷᱤ ᱨᱤᱱ ᱦᱚᱯᱚᱱ ᱠᱟᱱᱟ ᱵᱚᱱ ᱢᱮᱱᱛᱮ ᱥᱮᱫᱟᱭ ᱟᱹᱜᱤᱞ ᱦᱟᱯᱲᱟᱢ ᱠᱚᱠᱚ ᱢᱮᱱ ᱞᱟᱹᱭ ᱟᱹᱜᱩ ᱟᱠᱟᱣᱟᱫ ᱵᱚᱱᱟ ᱾ ᱚᱱᱟᱜᱮ ᱟᱪᱟᱨ ᱵᱤᱪᱟᱹᱨ ᱨᱮᱭᱟᱜ ᱦᱚᱨ ᱰᱟᱦᱟᱨ ᱟᱹᱛᱩᱨᱮ ᱢᱟᱹᱡᱷᱤ ᱜᱚᱢᱠᱮ ᱭᱟᱜ ᱟᱸᱫᱮ ᱛᱮ ᱫᱷᱚᱨᱚᱢ ᱟᱠᱷᱲᱟ ᱨᱮ ᱡᱟᱦᱟᱸᱱᱟᱜ ᱫᱚᱨᱵᱟᱨ ᱦᱩᱭᱩᱜᱼᱟ ᱾

ᱛᱚᱦᱚᱨ ᱛᱮᱫ

ᱱᱮᱭᱟᱣ, ᱨᱚᱯᱚᱲ, ᱦᱟᱥᱟ ᱦᱟᱹᱴᱤᱧ ᱡᱟᱦᱟᱸᱱᱟᱜ ᱱᱟᱹᱯᱤᱛ ᱜᱮ ᱢᱟᱹᱡᱷᱤ ᱴᱷᱮᱱ ᱟᱨᱫᱟᱥ ᱞᱮᱱ ᱮᱱᱟᱝ ᱫᱚᱨᱵᱟᱨ ᱫᱩᱯᱲᱩᱵ ᱫᱚ ᱦᱩᱭᱩᱜᱼᱟ ᱾ ᱚᱱᱟ ᱪᱤᱠᱟᱹ ᱢᱟᱹᱡᱷᱤ ᱴᱷᱮᱱ ᱟᱨᱫᱟᱥ ᱥᱮ ᱞᱟᱹᱞᱤᱥ ᱵᱟᱠᱷᱨᱟ ᱢᱚᱬᱮ ᱥᱤᱠᱟᱹ (᱑. ᱒᱕ ᱯᱩᱭᱥᱟᱹ) ᱴᱟᱠᱟ ᱮᱢᱚᱜ ᱦᱩᱭᱩᱜᱼᱟ ᱾ (ᱱᱮᱛᱟᱨ ᱫᱚ ᱵᱟᱹᱲᱛᱤ ᱟᱠᱟᱱᱟ ᱾)

ᱢᱟᱹᱢᱷᱤ ᱴᱷᱮᱱ ᱞᱟᱹᱞᱤᱥ ᱞᱮᱠᱷᱟᱱ ᱟᱹᱛᱩ ᱨᱤᱱᱤᱡ ᱡᱚᱜᱽ ᱢᱟᱹᱡᱷᱤ (ᱰᱟᱹᱠᱣᱟᱹ) ᱜᱚᱰᱮᱛ ᱛᱤᱠᱤᱱ ᱟᱹᱛᱩ ᱨᱮ ᱚᱲᱟᱜ ᱨᱤᱱ ᱟᱹᱥᱟᱹᱢᱤ ᱦᱚᱲ ᱧᱩᱛᱩᱢ (ᱯᱷᱟᱨᱱᱟ, ᱛᱩᱥᱠᱟᱹ) ᱢᱮᱱᱛᱮ ᱠᱩᱞᱦᱤ ᱠᱩᱞᱦᱤ ᱛᱮ ᱠᱤᱱ ᱦᱚᱦᱚᱭᱟ ᱢᱟᱹᱡᱷᱤ ᱟᱠᱷᱲᱟ ᱫᱚᱨᱵᱟᱨ ᱫᱩᱯᱲᱩᱵ ᱢᱮᱱᱛᱮ ᱾ ᱱᱚᱝᱠᱟ ᱟᱹᱛᱩ ᱨᱮᱱᱟᱜ ᱥᱟᱱᱟᱢ ᱴᱚᱞᱟ ᱦᱚᱲ ᱦᱚᱲ ᱠᱤᱱ ᱦᱚᱦᱚ ᱟᱠᱚᱣᱟ ᱾ ᱦᱚᱲ ᱠᱚ ᱡᱟᱣᱨᱟ ᱦᱮᱡ ᱪᱟᱵᱟ ᱞᱮᱱᱠᱷᱟᱱ ᱫᱚ ᱫᱚᱨᱵᱟᱨ ᱠᱟᱹᱢᱤᱦᱚᱨᱟ ᱠᱚ ᱮᱛᱚᱦᱚᱵᱼᱟ ᱾

ᱫᱚᱨᱵᱟᱨ ᱠᱩᱯᱩᱞᱤ ᱛᱚᱦᱚᱨ ᱛᱮᱫ

ᱫᱚᱨᱵᱟᱨ ᱫᱩᱯᱲᱩᱵ ᱫᱚ ᱦᱩᱭᱩᱜᱼᱟ ᱟᱹᱭᱩᱵ/ᱥᱮᱛᱟᱜ/ᱛᱤᱠᱤᱱ ᱵᱮᱲᱟ ᱜᱮ) ᱢᱟᱹᱡᱷᱤ ᱢᱟᱬᱟᱝ ᱟᱹᱛᱩ ᱨᱤᱱᱤᱡ ᱢᱤᱫ ᱦᱚᱲ ᱮ ᱠᱩᱞᱤ ᱮᱭᱟ ᱾

ᱠᱩᱯᱩᱞᱤᱭᱟᱠᱚ ᱱᱚᱝᱠᱟ

ᱮ ᱡᱚᱜᱽ ᱢᱟᱹᱡᱷᱤ ᱵᱟᱹᱵᱩ, ᱢᱟᱥᱮ ᱛᱚᱵᱮ ᱪᱮᱫ ᱱᱟᱹᱯᱤᱛ ᱵᱤᱱ ᱫᱩ ᱫᱮᱞᱟ ᱟᱫ ᱵᱚᱱᱟ ᱪᱮᱛᱟᱱ ᱠᱩᱞᱦᱤ ᱴᱚᱞᱟ, ᱞᱟᱛᱟᱨ ᱠᱩᱞᱦᱤ ᱴᱚᱞᱟ ᱾ ᱩᱱ ᱫᱤᱱ ᱢᱟ ᱱᱚᱝᱠᱟ ᱡᱩᱢᱤᱫᱽ ᱢᱟ ᱟᱹᱛᱩ ᱨᱤᱱ ᱡᱟᱠ ᱦᱚᱲ ᱵᱟᱵᱚᱱ ᱫᱲᱩᱲᱩᱵ ᱵᱷᱤᱲᱟᱹᱣᱜᱼᱟ ᱾ ᱵᱟᱞᱮ ᱛᱷᱤᱛ ᱨᱤᱠᱟᱹ ᱵᱟᱰᱟᱭ ᱫᱟᱲᱮᱭᱟᱜ ᱠᱟᱱᱟ ᱾ ᱚᱱᱟᱛᱮ ᱦᱩᱱᱟᱹᱝ ᱞᱮ ᱠᱩᱞᱤ ᱧᱚᱜᱮᱫ ᱵᱤᱱᱟ ᱾ ᱞᱟᱹᱭ ᱥᱟᱰᱮ ᱧᱚᱜ ᱟᱞᱮ ᱵᱤᱱ?

ᱡᱚᱜᱽ ᱢᱟᱹᱡᱷᱤ

ᱵᱤᱪᱟᱹᱨ ᱜᱮ ᱵᱟᱯ ᱫᱷᱚᱱ ᱾ ᱚᱱᱟ ᱫᱚ ᱢᱟᱹᱡᱷᱤ ᱜᱚᱢᱠᱮ ᱛᱤᱠᱤᱱᱟᱜ ᱟᱸᱫᱮ ᱛᱮᱜᱮ ᱜᱚᱴᱟ ᱴᱚᱞᱟ ᱦᱚᱲ ᱞᱤᱧ ᱦᱚᱦᱚ (ᱫᱩ ᱫᱮᱞᱟ) ᱟᱠᱟᱣᱟᱫ ᱵᱚᱱᱟ ᱾ ᱩᱱᱠᱤᱱ ᱜᱮᱠᱤᱱ ᱞᱟᱹᱭ ᱫᱟᱲᱮᱭᱟᱜᱼᱟ ᱾ ᱪᱮᱫ ᱱᱟᱹᱯᱤᱛ ᱢᱮᱱᱛᱮ ᱫᱚ?

ᱢᱚᱬᱮ ᱦᱚᱲ ᱠᱚ

ᱵᱤᱪᱟᱹᱨ ᱜᱮ ᱵᱟᱵᱟ ᱾ ᱮᱱᱠᱷᱟᱱ ᱢᱟᱹᱡᱷᱤ ᱜᱚᱢᱠᱮ ᱛᱤᱠᱤᱱ ᱵᱚᱱ ᱠᱩᱞᱤ ᱞᱮ ᱠᱤᱱ ᱜᱮ ᱾ (ᱢᱟᱹᱡᱷᱤ ᱠᱚ ᱠᱩᱞᱤ ᱮ ᱠᱟᱱᱟ) ᱦᱮᱸᱫᱟ ᱢᱟᱹᱡᱷᱤ ᱵᱟᱵᱟ, ᱢᱟᱥᱮ ᱛᱚᱵᱮ, ᱡᱚᱜᱽ ᱢᱟᱹᱡᱷᱤ ᱵᱟᱹᱵᱩ ᱢᱟᱭ ᱞᱟᱹᱭ ᱠᱮᱜᱼᱟ, ᱟᱹᱵᱤᱱ ᱜᱮ ᱪᱮᱫ ᱱᱟᱹᱯᱤᱛ ᱵᱤᱱ ᱦᱚᱦᱚ ᱡᱟᱣᱨᱟ ᱦᱚᱪᱚ ᱟᱠᱟᱫ ᱠᱤᱱᱟ?

ᱢᱟᱹᱡᱷᱤ

ᱦᱚᱭ ᱵᱟᱯ ᱫᱷᱚᱱ!! ᱟᱹᱞᱤᱧ ᱜᱮ ᱞᱤᱧ ᱦᱚᱦᱚ ᱡᱟᱣᱨᱟ ᱦᱚᱪᱚ ᱟᱠᱟᱫ ᱠᱤᱱᱟ ᱾

ᱠᱟᱛᱷᱟ ᱫᱚ ᱱᱚᱶᱟ ᱠᱟᱱᱟ (ᱯᱷᱟᱨᱱᱟ) ᱜᱮ ᱫᱚᱨᱵᱟᱨ ᱦᱚᱪᱚᱭ ᱱᱟᱹᱯᱤᱛ ᱤᱧ ᱴᱷᱮᱱ ᱮ ᱟᱨᱫᱟᱥ ᱟᱠᱟᱜᱼᱟ ᱾ ᱚᱱᱟᱜᱮ ᱟᱡᱟᱜ ᱢᱚᱪᱟ ᱠᱷᱚᱱ ᱡᱚᱵᱟᱵᱽ ᱠᱷᱚᱱ ᱵᱚᱱ ᱟᱸᱡᱚᱢ ᱞᱮᱜᱮ ᱾ ᱪᱮᱫ ᱪᱮᱫ ᱦᱩᱭ ᱟᱠᱟᱱᱟ?

'''ᱢᱚᱬᱮ ᱦᱚᱲ ᱠᱚ''' :-- ᱵᱤᱪᱟᱹᱨ ᱜᱮ ᱵᱟᱵᱟ ᱾ (ᱛᱟᱭᱚᱢ ᱞᱟᱹᱞᱤᱥ ᱟᱠᱟᱫ ᱦᱚᱲ ᱠᱚ ᱠᱩᱞᱤ ᱤᱡᱷᱟᱨ ᱮᱭᱟ ᱥᱟᱹᱜᱟᱹᱭ ᱦᱚᱦᱚ ᱟᱛᱮ)

ᱦᱮᱸᱫᱟ ᱢᱟᱹᱭ/ᱵᱟᱹᱵᱩ/ᱯᱷᱟᱨᱱᱟ, ᱟᱹᱵᱤᱱ ᱦᱚᱸ ᱵᱟᱝ ᱠᱩᱞᱤ ᱞᱮᱵᱤᱱ ᱠᱷᱟᱱ ᱪᱤᱠᱟᱹᱛᱮ ᱟᱞᱮ ᱦᱚᱸ ᱵᱤᱱ ᱵᱟᱰᱟᱭ ᱫᱟᱲᱮ ᱦᱚᱪᱚ ᱞᱮᱭᱟ ᱾ ᱚᱱᱟ ᱜᱮ ᱦᱩᱱᱟᱹᱝ ᱟᱹᱵᱤᱱᱟᱜ ᱢᱚᱪᱟ ᱠᱷᱚᱱ ᱡᱚᱵᱟᱵᱽ ᱟᱸᱡᱚᱢ ᱴᱷᱟᱹᱣᱠᱟᱹ ᱥᱟᱱᱟ ᱮᱫ ᱞᱮᱭᱟ ᱾

'''ᱟᱹᱥᱟᱹᱢᱤ (ᱞᱟᱹᱞᱤᱥᱤᱭᱟᱹ)''' :-- ᱵᱤᱪᱟᱹᱨ ᱜᱮ ᱵᱟᱵᱟ ᱾ ᱦᱚᱭ ᱵᱟᱵᱟ ᱟᱯᱮ ᱯᱮ ᱠᱩᱞᱤ ᱠᱤᱫᱤᱧ ᱠᱷᱟᱱ ᱤᱧ ᱞᱟᱹᱭᱟ ᱾ ᱤᱧ ᱦᱚᱸ ᱵᱟᱹᱧ ᱞᱟᱹᱭ ᱞᱮᱠᱷᱟᱱ ᱪᱤᱠᱟᱹᱛᱮ ᱯᱮ ᱵᱟᱰᱟᱭ ᱠᱮᱭᱟ ᱾ ᱪᱮᱫ ᱪᱤᱠᱟᱹ ᱟᱠᱟᱱᱟ ᱢᱮᱱᱛᱮ ᱫᱚ ᱾ ᱚᱱᱟ ᱜᱮ ᱴᱷᱟᱹᱣᱠᱟᱹ ᱥᱟᱺᱦᱤᱡ ᱤᱧ ᱞᱟᱹᱭ ᱵᱩᱴᱟᱹᱭᱮᱜᱼᱟ ᱾

'''ᱢᱚᱬᱮ ᱦᱚᱲ ᱠᱚ''' :-- ᱵᱤᱪᱟᱹᱨ ᱜᱮ ᱵᱟᱵᱟ ᱾ ᱢᱟ ᱛᱚᱵᱮ ᱵᱤᱪᱟᱹᱨ ᱮᱛᱚᱦᱚᱵ ᱛᱟᱵᱚᱱ ᱢᱮ ᱾

'''ᱟᱹᱥᱟᱹᱢᱤ (ᱞᱟᱹᱞᱤᱥᱤᱭᱟᱹ)''' :-- ᱦᱚᱭ ᱵᱟᱵᱟ, ᱮᱱᱠᱷᱟᱱ ᱤᱧ ᱞᱟᱹᱭᱮᱜᱼᱟ ᱾ ᱠᱟᱛᱷᱟ ᱫᱚ ᱦᱩᱭᱩᱜ ᱠᱟᱱᱟ, ᱡᱟᱦᱟᱸ ᱜᱮ ᱱᱮᱭᱟᱣ ᱱᱤᱯᱥᱟᱹ, ᱨᱚᱯᱚᱲ ᱟᱠᱟᱱ ᱜᱷᱚᱴᱚᱱ ᱠᱚ/ᱦᱟᱥᱟ ᱮᱢᱟᱱ ᱦᱟᱹᱯᱟᱹᱴᱤᱧ ᱠᱚ ᱚᱱᱠᱟ ᱜᱮ ᱥᱟᱶᱛᱮ ᱟᱹᱛᱩ ᱫᱤᱥᱚᱢ ᱨᱮ ᱦᱩᱭᱩᱜ ᱜᱷᱚᱴᱚᱱ ᱜᱮᱠᱚ ᱟᱨᱫᱟᱥ ᱵᱤᱪᱟᱹᱨ ᱫᱚᱨᱵᱟᱨ ᱛᱚᱯᱟᱜᱟ ᱾ ᱱᱮᱭᱟᱣ ᱟᱸᱡᱚᱢ ᱟᱠᱟᱫ ᱠᱚᱫᱚ ᱥᱟᱹᱠᱷᱤ ᱠᱚ ᱤᱡᱷᱟᱹᱨ, ᱠᱩᱞᱤ ᱛᱚᱞᱟᱥ ᱠᱚᱣᱟ, ᱠᱷᱟᱹᱞᱤ ᱪᱮ ᱥᱟᱹᱨᱤ ᱠᱟᱛᱷᱟ ᱢᱮᱱᱛᱮ ᱾ ᱡᱚᱜᱽ ᱢᱟᱹᱡᱷᱤ ᱟᱱᱛᱮ ᱾ ᱩᱱᱤ ᱛᱟᱦᱮᱸ ᱟᱠᱟᱱ ᱨᱚᱯᱚᱲ ᱠᱚ ᱟᱸᱡᱚᱢ ᱤᱡ ᱠᱚ ᱥᱟᱹᱨᱤ ᱥᱚᱛᱚ ᱠᱟᱛᱷᱟ ᱫᱷᱚᱨᱚᱢ ᱨᱮᱱᱟᱜ ᱠᱚ ᱠᱩᱞᱤ ᱛᱚᱞᱟᱥ ᱠᱟᱛᱷᱟ ᱮᱭᱟ ᱾ ᱛᱟᱭᱚᱢ ᱛᱮ ᱤᱡᱷᱟᱹᱨ ᱪᱟᱵᱟ ᱠᱟᱛᱮ ᱟᱹᱛᱩ ᱨᱤᱱ ᱢᱚᱬᱮ ᱦᱚᱲ ᱠᱚ ᱠᱟᱛᱷᱟ ᱠᱚ ᱛᱩᱞᱟᱹ ᱥᱚᱝ ᱯᱟᱹᱭᱞᱟᱹᱭᱟ ᱾ ᱚᱠᱚᱭ ᱯᱟᱦᱴᱟ ᱫᱚᱥ ᱵᱟᱹᱲᱛᱤ ᱧᱟᱢᱚᱜ ᱠᱟᱱᱟ ᱾ ᱚᱱᱟ ᱞᱮᱠᱟ ᱫᱚᱨᱵᱟᱨ ᱨᱮ ᱥᱮᱞᱮᱫ ᱟᱠᱟᱱ ᱵᱤᱪᱟᱹᱨᱤᱭᱟᱹ ᱢᱤᱢᱤᱫ ᱦᱚᱲ ᱛᱮᱠᱚ ᱨᱟᱭ ᱵᱤᱪᱟᱹᱨ ᱠᱚ ᱛᱩᱞᱟᱹᱡᱚᱠᱷᱟ, ᱨᱚᱲ ᱟᱲᱟᱝ ᱫᱟᱣ ᱠᱚ ᱮᱢᱟ ᱠᱚᱭᱟ ᱾ ᱟᱸᱡᱚᱢ ᱪᱟᱵᱟ ᱠᱟᱛᱮ ᱫᱚᱥ ᱞᱮᱞᱟᱛᱮ ᱢᱟᱹᱡᱷᱤ ᱜᱚᱢᱠᱮ ᱟᱸᱡᱚᱢ ᱥᱟᱰᱮ ᱟᱠᱚᱣᱟ ᱾ ᱟᱨ ᱨᱟᱭ ᱮ ᱮᱢᱟ ᱠᱚᱣᱟ ᱾ ᱱᱩᱭ ᱢᱮᱱᱛᱮ ᱫᱩᱥᱤ ᱜᱩᱱᱦᱟᱹᱠᱟᱹᱨᱤ ᱫᱚ ᱾

ᱰᱟᱸᱰᱚᱢ

ᱫᱚᱨᱵᱟᱨ ᱢᱚᱬᱮ ᱦᱚᱲ ᱠᱚ ᱫᱩᱲᱩᱵ ᱟᱠᱟᱱ ᱟᱪᱟᱨ ᱵᱤᱪᱟᱹᱨ ᱩᱱᱠᱩ ᱛᱤᱸᱜᱩ ᱵᱮᱨᱮᱫ ᱠᱚ ᱞᱟᱹᱜᱤᱫ ᱞᱟᱹᱞᱤᱥ ᱟᱨᱫᱟᱥ ᱟᱠᱟᱫ ᱦᱚᱲ ᱫᱚ ᱞᱟᱡ ᱫᱟᱜ ᱢᱟᱹᱰᱤ ᱞᱮᱠᱟᱛᱮ ᱜᱮᱞ ᱴᱟᱠᱟ ᱠᱟᱹᱣᱰᱤ ᱠᱤᱱ ᱮᱢᱚᱜᱼᱟ ᱾ ᱟᱨ ᱜᱩᱱᱦᱟᱹᱠᱟᱹᱨᱤ ᱫᱚ ᱫᱩᱥᱤ ᱞᱮᱠᱟᱛᱮ ᱴᱟᱠᱟ ᱒᱐/᱒᱕/᱕᱐/᱑᱐᱐/᱕᱐᱐ ᱚᱱᱠᱟᱜᱮ ᱵᱤᱪᱟᱹᱨ ᱜᱩᱱᱦᱟᱹ ᱤᱫᱤ ᱠᱟᱛᱮ ᱾ ᱤᱠᱷᱟᱹᱱ ᱵᱤᱪᱟᱹᱨ ᱫᱚ ᱢᱤᱫ ᱫᱤᱱ ᱨᱮᱜᱮ ᱛᱚᱯᱟᱜ ᱪᱷᱤᱸᱰᱟᱹᱣᱜᱼᱟ ᱾ ᱚᱱᱟ ᱰᱟᱸᱰᱚᱢ ᱫᱚᱨᱵᱟᱨ ᱴᱟᱠᱟ ᱫᱚ ᱜᱚᱰᱮᱛ/ᱡᱚᱜᱽ ᱢᱟᱹᱡᱷᱤ ᱴᱷᱮᱱ ᱠᱚ ᱮᱢᱟ ᱾ ᱚᱱᱟ ᱰᱟᱸᱰᱚᱢ ᱴᱟᱠᱟ ᱫᱚ ᱟᱹᱛᱩ ᱨᱤᱱ ᱢᱩᱬ ᱠᱷᱩᱱᱴᱤ ᱢᱟᱹᱡᱷᱤ ᱢᱟᱯᱟᱧᱡᱤ ᱠᱚᱫᱚ ᱵᱟᱨ ᱵᱷᱟᱜᱽ ᱟᱨ ᱢᱚᱬᱮ ᱦᱚᱲ ᱢᱮᱥᱟ ᱟᱠᱟᱱ ᱡᱚᱛᱚ ᱦᱚᱲ ᱜᱮ ᱵᱟᱨᱟ ᱵᱟᱹᱨᱤ ᱵᱷᱟᱜᱽ ᱠᱚ ᱧᱟᱢᱟ ᱾

ᱩᱱᱠᱩ ᱢᱟᱹᱡᱷᱤ ᱫᱚᱨᱵᱟᱨ ᱟᱠᱷᱲᱟ ᱛᱟᱞᱟ ᱨᱮᱜᱮ ᱢᱚᱬᱮ ᱦᱚᱲ ᱟᱛᱮ ᱟᱨ ᱢᱟᱹᱠᱷᱤᱭᱟᱜ ᱛᱷᱩᱢ ᱠᱟᱛᱷᱟ ᱛᱮ ᱠᱚ ᱯᱮᱲᱟ ᱥᱚᱞᱦᱚ ᱠᱟᱹᱠᱤᱱᱟ ᱾ ᱟᱨ ᱛᱤᱥ ᱦᱚᱸ ᱱᱚᱝᱠᱟ ᱱᱮᱭᱟᱣ ᱱᱤᱯᱥᱟᱹ, ᱨᱮᱨᱟᱲ ᱨᱟᱜᱽᱫᱷᱚ ᱢᱚᱱᱮ ᱟᱞᱚ ᱵᱤᱱ ᱫᱚᱦᱚᱭᱟ ᱾ ᱡᱟᱦᱟᱸ ᱛᱤᱥ ᱟᱹᱵᱤᱱᱟᱜ ᱱᱚᱣᱟ ᱤᱫᱤ ᱠᱟᱛᱮ ᱫᱚᱨᱵᱟᱨ ᱫᱩᱯᱲᱩᱵ ᱠᱷᱟᱱ ᱵᱟᱹᱲᱛᱤ ᱞᱮ ᱰᱟᱸᱰᱚᱢ ᱵᱤᱱᱟ ᱚᱱᱠᱟ ᱠᱚ ᱞᱟᱹᱭ ᱥᱚᱫᱚᱨ ᱟᱹᱠᱤᱱᱟ ᱾ ᱟᱨ ᱵᱩᱜᱤ ᱫᱤᱥᱟᱹ ᱦᱚᱨ ᱠᱚ ᱩᱫᱩᱜ ᱟᱠᱚᱣᱟ ᱾