ᱫᱤᱯ ᱜᱽᱨᱮᱥ ᱮᱠᱠᱟ
ᱫᱤᱯ ᱜᱽᱨᱮᱥ ᱮᱠᱠᱟ (ᱡᱟᱱᱟᱢ ᱓ ᱡᱩᱱ ᱑᱙᱙᱔) ᱫᱚ ᱢᱤᱫ ᱥᱤᱧᱚᱛᱤᱭᱟᱹ ᱢᱟᱨᱮ ᱯᱷᱤᱞᱰ ᱦᱚᱠᱤ ᱠᱷᱮᱞᱚᱸᱰᱤᱭᱟᱹ ᱠᱟᱱᱟᱭ, ᱡᱟᱦᱟᱸᱭ ᱫᱚ ᱥᱤᱧᱚᱛ ᱡᱟᱹᱛᱤᱭᱟᱹᱨᱤ ᱯᱷᱤᱞᱰ ᱦᱚᱠᱤ ᱴᱤᱢ ᱮ ᱨᱮᱯᱨᱮᱡᱮᱱᱴ ᱟᱠᱟᱫᱼᱟ᱾ ᱩᱱᱤ ᱫᱚ ᱒᱐᱒᱒ ᱨᱮ ᱟᱨᱡᱩᱱᱟ ᱥᱤᱨᱯᱷᱟᱹ ᱞᱟᱹᱜᱤᱫ ᱮ ᱵᱟᱪᱷᱟᱣ ᱟᱠᱟᱱᱟ᱾
ᱮᱛᱚᱦᱚᱵ ᱡᱤᱭᱚᱱ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱫᱤᱯ ᱜᱽᱨᱮᱥ ᱮᱠᱠᱟ ᱫᱚ ᱓ ᱡᱩᱱ ᱑᱙᱙᱔ ᱨᱮ ᱳᱰᱤᱥᱟ ᱨᱮᱱᱟᱜ ᱥᱩᱱᱫᱚᱨᱜᱚᱰ ᱦᱚᱱᱚᱛ ᱨᱮ ᱞᱩᱞᱠᱤᱰᱤ ᱧᱩᱛᱩᱢᱟᱱ ᱢᱤᱫ ᱦᱩᱰᱤᱧ ᱟᱹᱛᱩ ᱨᱮᱭ ᱡᱟᱱᱟᱢ ᱞᱮᱱᱟ᱾ ᱩᱱᱤ ᱫᱚ ᱪᱟᱨᱞᱥ ᱟᱨ ᱡᱟᱭᱟᱢᱚᱱᱤ ᱮᱠᱠᱟ ᱨᱤᱱᱤᱡ ᱠᱩᱲᱤ ᱜᱤᱫᱽᱨᱟᱹ ᱠᱟᱱᱟᱭ᱾
ᱩᱱᱤ ᱫᱚ ᱟᱥᱲᱟ ᱨᱮ ᱦᱚᱠᱤ ᱮᱱᱮᱡ ᱮ ᱮᱛᱚᱦᱚᱵ ᱞᱮᱫᱼᱟ ᱟᱨ ᱛᱮᱡᱽ ᱠᱩᱢᱟᱨ ᱠᱷᱮᱥ ᱴᱷᱮᱱ ᱠᱳᱪ ᱦᱩᱭ ᱞᱮᱱᱟ (᱒᱐᱐᱕–᱐᱖)᱾ ᱟᱡᱟᱜ ᱟᱥᱲᱟ ᱨᱮ ᱦᱚᱠᱤ ᱵᱟᱪᱷᱟᱣ ᱨᱮᱱᱟᱜ ᱢᱤᱫ ᱨᱟᱣᱩᱱᱰ ᱚᱠᱛᱚ, ᱩᱱᱤ ᱫᱚ ᱥᱮᱯᱴᱮᱢᱵᱚᱨ ᱒᱐᱐᱗ ᱨᱮ ᱥᱯᱳᱨᱴᱥ ᱚᱛᱷᱳᱨᱤᱴᱤ ᱚᱯᱷ ᱤᱱᱰᱤᱭᱟ ᱨᱮᱱᱟᱜ ᱮᱥ ᱮ ᱟᱭᱤᱼᱮᱥ ᱮ ᱡᱤ ᱥᱮᱱᱴᱟᱨ ᱨᱮ ᱥᱮᱞᱮᱫᱚᱜ ᱞᱟᱹᱜᱤᱫ ᱮ ᱵᱟᱪᱷᱟᱣ ᱮᱱᱟ ᱟᱨ ᱑᱓ ᱥᱮᱨᱢᱟ ᱩᱢᱮᱨ ᱨᱮ ᱯᱚᱱᱚᱛ ᱞᱮᱵᱮᱞ ᱨᱮ ᱮᱱᱮᱡ ᱮ ᱮᱛᱚᱦᱚᱵ ᱠᱮᱫᱼᱟ᱾ ᱩᱱᱤ ᱫᱚ ᱞᱩᱥᱮᱞᱟ ᱮᱠᱠᱟ ᱟᱨ ᱥᱚᱨᱳᱡᱽ ᱢᱳᱦᱟᱱᱛᱤ ᱴᱷᱮᱱ ᱠᱳᱪ ᱦᱩᱭ ᱮᱛᱚᱦᱚᱵ ᱮᱱᱟ᱾ ᱑᱖ ᱥᱮᱨᱢᱟ ᱩᱢᱮᱨ ᱨᱮ, ᱩᱱᱤ ᱫᱚ ᱥᱳᱱᱮᱯᱚᱛ ᱨᱮ ᱥᱤᱱᱤᱭᱟᱨ ᱱᱮᱥᱱᱟᱞᱥ ᱨᱮ ᱮᱱᱮᱡ ᱠᱮᱫᱼᱟ᱾
᱒᱐᱑᱑ ᱨᱮ, ᱩᱱᱤ ᱫᱚ ᱨᱟᱺᱪᱤ ᱨᱮ ᱱᱮᱥᱱᱟᱞ ᱜᱮᱢᱥ ᱨᱮ ᱮᱱᱮᱡ ᱠᱮᱫᱼᱟ᱾ ᱩᱱᱤ ᱫᱚ ᱡᱩᱱᱤᱭᱟᱨ ᱱᱮᱥᱱᱟᱞ ᱠᱮᱢᱯ ᱞᱟᱹᱜᱤᱫ ᱦᱚᱸ ᱮ ᱵᱟᱪᱷᱟᱣ ᱮᱱᱟ ᱟᱨ ᱡᱩᱱᱤᱭᱟᱨ ᱮᱥᱤᱭᱟ ᱠᱟᱯ ᱞᱟᱹᱜᱤᱫ ᱵᱮᱸᱠᱠᱚᱠ ᱮ ᱥᱟᱸᱜᱷᱟᱨ ᱠᱮᱫᱼᱟ᱾
ᱩᱱᱤ ᱫᱚ ᱢᱤᱫ ᱰᱤᱯᱷᱮᱱᱰᱟᱨ ᱞᱮᱠᱟᱛᱮ ᱮᱛᱚᱦᱚᱵ ᱠᱮᱫᱼᱟ, ᱢᱮᱱᱠᱷᱟᱱ ᱟᱡᱟᱜ ᱠᱩᱠᱢᱩ ᱫᱚ ᱢᱤᱫ ᱜᱳᱞᱠᱤᱯᱚᱨ ᱵᱮᱱᱟᱣ ᱛᱟᱦᱮᱸ ᱠᱟᱱᱟ ᱪᱮᱫᱟᱜ ᱥᱮ ᱟᱡᱤᱡ ᱵᱚᱭᱦᱟ ᱟᱨ ᱩᱱᱤ ᱫᱚ ᱛᱤᱱ ᱡᱚᱠᱷᱚᱡ ᱮᱱᱮᱡ ᱠᱤᱱ ᱠᱚᱨᱟᱣ ᱮᱫ ᱛᱟᱦᱮᱸᱫ ᱢᱮᱱᱠᱷᱟᱱ ᱟᱡᱤᱡ ᱠᱟᱠᱟ, ᱡᱟᱦᱟᱸᱭ ᱫᱚ ᱟᱡᱤᱡ ᱠᱳᱪ ᱮ ᱛᱟᱦᱮᱸ ᱠᱟᱱᱟ, ᱩᱱᱤ ᱫᱚ ᱢᱤᱫ ᱜᱳᱞᱠᱤᱯᱚᱨ ᱞᱮᱠᱟᱛᱮ ᱥᱟᱸᱜᱮ ᱤᱫᱤ ᱥᱮ ᱯᱨᱮᱠᱴᱤᱥ ᱞᱟᱹᱜᱤᱫ ᱵᱟᱭ ᱢᱟᱱᱟᱣ ᱟᱫᱮᱭᱟ, ᱚᱱᱟᱛᱮ ᱪᱮᱫ ᱦᱚᱸ ᱵᱟᱪᱷᱟᱣ ᱵᱟᱝ ᱛᱟᱦᱮᱸ ᱠᱟᱱ ᱠᱷᱟᱹᱛᱤᱨ ᱩᱱᱤ ᱫᱚ ᱢᱤᱫ ᱰᱤᱯᱷᱮᱱᱰᱟᱨ ᱮ ᱵᱮᱱᱟᱣ ᱮᱱᱟ᱾