ᱫᱮᱵᱤᱠᱟ ᱨᱟᱱᱤ
| ᱫᱮᱵᱤᱠᱟ ᱨᱟᱱᱤ | |
|---|---|
.jpg) ᱫᱮᱵᱤᱠᱟ ᱨᱟᱱᱤ ᱪᱚᱣᱫᱷᱩᱨᱤ | |
| ᱡᱟᱱᱟᱢ ᱧᱩᱛᱩᱢ ᱡᱟᱱᱟᱢ ᱢᱟᱹᱦᱤᱛ ᱟᱨ ᱡᱟᱱᱟᱢ ᱴᱷᱟᱶ | ᱫᱮᱵᱤᱠᱟ ᱨᱟᱱᱤ ᱪᱚᱣᱫᱷᱩᱨᱤ ᱓᱐ ᱢᱟᱨᱪ ᱑᱙᱐᱘ ᱵᱤᱥᱟᱠᱟᱯᱟᱴᱱᱟᱢ, ᱢᱟᱫᱽᱨᱟᱥ ᱯᱨᱮᱥᱤᱰᱮᱱᱥᱤ |
| ᱜᱩᱨ | ᱙ ᱢᱟᱨᱪ ᱑᱙᱙᱔ (᱘᱕ ᱵᱚᱭᱚᱥ) ᱵᱮᱝᱞᱩᱨᱩ |
ᱫᱮᱵᱤᱠᱟ ᱨᱟᱱᱤ ᱪᱚᱣᱫᱷᱩᱨᱤ (᱓᱐ ᱢᱟᱨᱪ ᱑᱙᱐᱘ – ᱙ ᱢᱟᱨᱪ ᱑᱙᱙᱔), ᱡᱟᱦᱟᱸᱭ ᱫᱚ ᱫᱮᱵᱤᱠᱟ ᱨᱟᱱᱤ ᱧᱩᱛᱩᱢ ᱛᱮ ᱦᱚᱸ ᱵᱟᱰᱟᱭᱚᱜ ᱠᱟᱱᱟ, ᱢᱤᱫ ᱵᱷᱟᱨᱚᱛᱤᱭᱚ ᱮᱠᱴᱨᱮᱥ ᱠᱟᱱᱟᱭ ᱡᱟᱦᱟᱸᱭ ᱫᱚ ᱦᱤᱱᱫᱤ ᱯᱷᱤᱞᱢ ᱨᱮ ᱠᱟᱹᱢᱤ ᱟᱠᱟᱫᱟᱭ᱾ ᱩᱱᱤ ᱫᱚ ᱫᱟᱫᱟᱥᱟᱦᱮᱵᱽ ᱯᱷᱟᱞᱠᱮ ᱟᱣᱟᱨᱰ ᱨᱮᱱ ᱯᱩᱭᱞᱩ ᱦᱟᱢᱮᱴᱤᱡ ᱠᱟᱱᱟᱭ ᱟᱨ ᱯᱟᱫᱽᱢᱟ ᱥᱨᱤ ᱦᱚᱸ ᱠᱚ ᱮᱢᱟᱫᱮᱭᱟ᱾[᱑] ᱵᱷᱟᱨᱚᱛᱤᱭᱚ ᱥᱤᱱᱮᱢᱟ ᱨᱮᱱ ᱯᱩᱭᱞᱩ ᱛᱤᱨᱞᱟᱹ ᱞᱮᱠᱟᱛᱮ ᱵᱟᱰᱟᱭᱚᱜ ᱠᱟᱱ ᱫᱮᱵᱤᱠᱟ ᱨᱟᱱᱤ ᱫᱚ ᱟᱹᱰᱤ ᱢᱟᱨᱟᱝ ᱮᱠᱴᱨᱮᱥ ᱢᱩᱫᱽ ᱨᱮ ᱢᱤᱫᱴᱟᱹᱝ ᱢᱮᱱᱛᱮ ᱠᱚ ᱢᱟᱱᱟᱣᱮᱭᱟ᱾ ᱑᱙᱓᱐ ᱟᱨ ᱑᱙᱔᱐ ᱥᱟᱞ ᱨᱮᱱ ᱟᱹᱰᱤ ᱠᱟᱹᱣᱰᱤ ᱧᱟᱢ ᱮᱠᱴᱨᱮᱥ ᱠᱷᱚᱱ ᱢᱤᱫᱴᱟᱹᱝ ᱠᱟᱱᱟᱭ, ᱩᱱᱤ ᱫᱚ ᱵᱚᱠᱥ ᱚᱯᱷᱤᱥ ᱤᱱᱰᱤᱭᱟ ᱨᱮᱭᱟᱜ "ᱴᱚᱯ ᱮᱠᱴᱨᱮᱥ" ᱞᱤᱥᱴ ᱨᱮ ᱑᱙᱔᱐ ᱟᱨ ᱑᱙᱔᱑ ᱥᱟᱞ ᱨᱮ ᱧᱮᱞ ᱧᱟᱢ ᱞᱮᱱᱟ᱾[᱒]
ᱢᱤᱫ ᱠᱤᱥᱟᱹᱬ, ᱟᱝᱜᱽᱞᱤᱠᱟᱭᱤᱡᱽᱰ ᱵᱷᱟᱨᱚᱛᱤᱭᱚ ᱜᱷᱟᱨᱚᱸᱡᱽ ᱨᱮ ᱡᱟᱱᱟᱢ ᱠᱟᱛᱮ, ᱫᱮᱵᱤᱠᱟ ᱨᱟᱱᱤ ᱫᱚ ᱟᱨᱮ ᱥᱮᱨᱢᱟ ᱩᱢᱮᱨ ᱨᱮ ᱤᱝᱞᱮᱱᱰ ᱨᱮ ᱵᱳᱨᱰᱤᱝ ᱥᱠᱩᱞ ᱠᱚ ᱵᱷᱮᱡᱟ ᱠᱮᱫᱮᱭᱟ ᱟᱨ ᱩᱱᱤ ᱫᱚ ᱚᱱᱟ ᱫᱤᱥᱚᱢ ᱨᱮ ᱜᱮ ᱦᱟᱨᱟ ᱵᱩᱨᱩ ᱮᱱᱟ᱾ ᱑᱙᱒᱘ ᱥᱟᱞ ᱨᱮ, ᱩᱱᱤ ᱫᱚ ᱦᱤᱢᱟᱱᱥᱩ ᱨᱟᱭ ᱥᱟᱶ ᱧᱟᱯᱟᱢ ᱮᱱᱟ, ᱩᱱᱤ ᱫᱚ ᱢᱤᱫ ᱵᱷᱟᱨᱚᱛᱤᱭᱚ ᱯᱷᱤᱞᱢ ᱯᱨᱚᱰᱭᱩᱥᱚᱨ ᱠᱟᱱᱟᱭ, ᱟᱨ ᱛᱟᱭᱚᱢ ᱥᱮᱨᱢᱟ ᱨᱮ ᱵᱟᱯᱞᱟ ᱮᱱᱟᱭ᱾ ᱩᱱᱤ ᱫᱚ ᱨᱟᱭ ᱟᱜ ᱮᱠᱥᱯᱮᱨᱤᱢᱮᱱᱴᱟᱞ ᱥᱟᱭᱞᱮᱱᱴ ᱯᱷᱤᱞᱢ ᱮ ᱛᱷᱨᱳ ᱚᱯᱷ ᱰᱟᱭᱤᱥ (᱑᱙᱒᱙) ᱞᱟᱹᱜᱤᱫ ᱠᱚᱥᱴᱭᱩᱢ ᱰᱤᱡᱟᱭᱤᱱ ᱟᱨ ᱟᱨᱴ ᱰᱤᱨᱮᱠᱥᱚᱱ ᱨᱮ ᱜᱚᱲᱚ ᱞᱮᱫᱟ᱾ ᱱᱩᱠᱤᱱ ᱵᱟᱱᱟᱨ ᱜᱮ ᱛᱟᱭᱚᱢ ᱛᱮ ᱡᱟᱨᱢᱟᱱᱤ ᱪᱟᱞᱟᱣ ᱮᱱᱟ ᱟᱨ ᱵᱟᱨᱞᱤᱱ ᱨᱮ ᱭᱩᱮᱯᱷᱮ ᱥᱴᱩᱰᱤᱭᱳ ᱨᱮ ᱯᱷᱤᱞᱢ ᱵᱮᱱᱟᱣ ᱨᱮ ᱥᱮᱪᱮᱫ ᱠᱤᱱ ᱦᱟᱛᱟᱣ ᱠᱮᱫᱟ᱾ ᱨᱟᱭ ᱫᱚ ᱛᱟᱭᱚᱢ ᱛᱮ ᱟᱡ ᱜᱮ ᱦᱤᱨᱚ ᱟᱨ ᱩᱱᱤ ᱫᱚ ᱦᱤᱨᱚᱭᱤᱱ ᱞᱮᱠᱟᱛᱮ ᱟᱡᱟᱜ ᱛᱟᱭᱚᱢ ᱯᱨᱚᱰᱟᱠᱥᱚᱱ ᱨᱮ ᱫᱚᱦᱚ ᱠᱮᱫᱮᱭᱟ, ᱱᱚᱣᱟ ᱫᱚ ᱵᱟᱭᱞᱤᱝᱜᱣᱟᱞ ᱯᱷᱤᱞᱢ ᱠᱟᱨᱢᱟ ᱠᱟᱱᱟ, ᱡᱟᱦᱟᱸ ᱫᱚ ᱤᱝᱜᱽᱞᱤᱥ ᱟᱨ ᱦᱤᱱᱫᱤ ᱨᱮ ᱢᱤᱫ ᱥᱟᱶᱛᱮ ᱵᱮᱱᱟᱣ ᱞᱮᱱᱟ᱾ ᱱᱚᱣᱟ ᱯᱷᱤᱞᱢ ᱫᱚ ᱤᱝᱞᱮᱱᱰ ᱨᱮ ᱑᱙᱓᱓ ᱥᱟᱞ ᱨᱮ ᱯᱨᱤᱢᱤᱭᱟᱨ ᱞᱮᱱᱟ, ᱚᱸᱰᱮ ᱨᱮᱭᱟᱜ ᱨᱤᱭᱟᱞ-ᱞᱟᱭᱤᱯᱷ ᱡᱳᱲ ᱩᱫᱩᱜ ᱥᱚᱫᱚᱨ ᱟᱠᱟᱱ ᱟᱹᱰᱤ ᱫᱤᱱ ᱦᱟᱹᱵᱤᱡ ᱪᱩᱢᱩᱣ ᱥᱤᱱ ᱠᱷᱟᱹᱛᱤᱨ ᱚᱱᱟ ᱥᱮᱫ ᱢᱚᱱ ᱮ ᱮᱢ ᱞᱮᱫᱟ, ᱟᱨ ᱵᱷᱟᱨᱚᱛ ᱨᱮ ᱟᱹᱰᱤ ᱵᱟᱹᱲᱤᱡ ᱛᱮ ᱯᱷᱞᱚᱯ ᱞᱮᱱᱟ᱾ ᱱᱩᱠᱤᱱ ᱫᱚ ᱑᱙᱓᱔ ᱥᱟᱞ ᱨᱮ ᱵᱚᱢᱵᱮ, ᱵᱷᱟᱨᱚᱛ ᱠᱤᱱ ᱨᱩᱣᱟᱹᱲ ᱦᱮᱡ ᱮᱱᱟ, ᱡᱟᱦᱟᱸ ᱨᱮ ᱦᱤᱢᱟᱱᱥᱩ ᱨᱟᱭ ᱫᱚ ᱮᱴᱟᱜ ᱦᱚᱲ ᱥᱟᱶ ᱢᱮᱥᱟ ᱠᱟᱛᱮ ᱵᱚᱢᱵᱮ ᱴᱚᱠᱤᱡᱽ ᱧᱩᱛᱩᱢ ᱛᱮ ᱯᱨᱚᱰᱟᱠᱥᱚᱱ ᱥᱴᱩᱰᱤᱭᱳ ᱮ ᱵᱮᱱᱟᱣ ᱠᱮᱫᱟ᱾ ᱩᱱᱠᱩ ᱫᱚ ᱟᱠᱚᱣᱟᱜ ᱥᱴᱩᱰᱤᱭᱳ ᱧᱩᱛᱩᱢ ᱠᱚ ᱵᱚᱫᱚᱞ ᱠᱮᱫᱟ᱾ ᱱᱚᱣᱟ ᱥᱴᱩᱰᱤᱭᱳ ᱫᱚ ᱚᱱᱟ ᱚᱠᱛᱚ ᱨᱮ ᱛᱟᱭᱚᱢ ᱕-᱖ ᱥᱮᱨᱢᱟ ᱨᱮ ᱟᱭᱢᱟ ᱥᱟᱠᱥᱮᱥᱯᱷᱩᱞ ᱯᱷᱤᱞᱢ ᱮ ᱵᱮᱱᱟᱣ ᱠᱮᱫᱟ, ᱟᱨ ᱫᱮᱵᱤᱠᱟ ᱨᱟᱱᱤ ᱫᱚ ᱚᱱᱟ ᱨᱮ ᱟᱭᱢᱟ ᱨᱳᱞ ᱮ ᱠᱷᱮᱞ ᱠᱮᱫᱟ᱾ ᱚᱥᱳᱠ ᱠᱩᱢᱟᱨ ᱥᱟᱶ ᱩᱱᱤᱭᱟᱜ ᱚᱱ-ᱥᱠᱨᱤᱱ ᱡᱩᱲᱤ ᱫᱚ ᱵᱷᱟᱨᱚᱛ ᱨᱮ ᱧᱩᱛᱩᱢ ᱮ ᱠᱚᱢᱟᱣ ᱠᱮᱫᱟ᱾
᱑᱙᱔᱐ ᱥᱟᱞ ᱨᱮ ᱨᱟᱭ ᱟᱜ ᱜᱩᱨ ᱛᱟᱭᱚᱢ, ᱫᱮᱵᱤᱠᱟ ᱨᱟᱱᱤ ᱫᱚ ᱥᱴᱩᱰᱤᱭᱳ ᱨᱮᱭᱟᱜ ᱫᱟᱭᱤᱛᱣᱟ ᱮ ᱦᱟᱛᱟᱣ ᱠᱮᱫᱟ ᱟᱨ ᱟᱡᱤᱡ ᱵᱟᱹᱦᱩ ᱟᱜ ᱵᱚᱸᱜᱟ ᱛᱟᱞᱟ ᱮᱱ ᱥᱚᱦᱮᱫ ᱥᱟᱥᱟᱫᱷᱟᱨ ᱢᱩᱠᱷᱚᱨᱡᱤ ᱟᱨ ᱚᱥᱳᱠ ᱠᱩᱢᱟᱨ ᱥᱟᱶ ᱢᱮᱥᱟ ᱠᱟᱛᱮ ᱟᱨᱦᱚᱸ ᱠᱤᱪᱷᱩ ᱯᱷᱤᱞᱢ ᱮ ᱵᱮᱱᱟᱣ ᱠᱮᱫᱟ᱾ ᱡᱮᱞᱮᱠᱟ ᱩᱱᱤ ᱟᱡᱟᱜ ᱢᱮᱱᱮᱡᱽ ᱩᱢᱮᱨ ᱨᱮ ᱩᱭᱦᱟᱹᱨ ᱫᱚᱦᱚᱭ ᱞᱟᱹᱜᱤᱫ ᱛᱟᱦᱮᱸ ᱠᱟᱱᱟ, ᱡᱟᱦᱟᱸ ᱯᱷᱤᱞᱢ ᱨᱮ ᱩᱱᱤ ᱧᱮᱞ ᱫᱚᱦᱚ ᱠᱟᱱ ᱛᱟᱦᱮᱸᱱᱟ ᱚᱱᱟ ᱫᱚ ᱯᱷᱞᱚᱯ ᱥᱮ ᱮᱵᱷᱨᱮᱡᱽ ᱦᱤᱴ ᱵᱮᱱᱟᱣ ᱠᱟᱱ ᱛᱟᱦᱮᱸᱱᱟ, ᱟᱨ ᱡᱟᱦᱟᱸ ᱯᱷᱤᱞᱢ ᱨᱮ ᱥᱚᱦᱮᱫ ᱧᱮᱞ ᱫᱚᱦᱚ ᱠᱟᱱ ᱛᱟᱦᱮᱸᱱᱟ ᱚᱱᱟ ᱫᱚ ᱦᱤᱴ ᱵᱮᱱᱟᱣ ᱠᱟᱱ ᱛᱟᱦᱮᱸᱱᱟ᱾ ᱑᱙᱔᱕ ᱥᱟᱞ ᱨᱮ, ᱩᱱᱤ ᱯᱷᱤᱞᱢ ᱠᱷᱚᱱ ᱨᱤᱴᱟᱭᱟᱨ ᱮᱱᱟᱭ, ᱨᱩᱥᱤᱭᱟᱱ ᱪᱤᱛᱟᱹᱨᱠᱟᱹᱨ ᱥᱵᱷᱮᱛᱳᱥᱞᱟᱵᱽ ᱨᱩᱣᱟᱨᱤᱪ ᱮ ᱵᱟᱯᱞᱟ ᱮᱱᱟᱭ ᱟᱨ ᱵᱟᱝᱜᱟᱞᱳᱨ ᱨᱮᱭᱟᱜ ᱵᱟᱦᱨᱮ ᱥᱮᱫ ᱟᱡᱟᱜ ᱡᱟᱭᱫᱟᱫ ᱨᱮ ᱩᱪᱟᱹᱲ ᱮᱱᱟᱭ, ᱚᱱᱟ ᱛᱟᱭᱚᱢ ᱯᱟᱪᱮ ᱜᱮᱞ ᱥᱮᱨᱢᱟ ᱫᱷᱟᱹᱵᱤᱡ ᱟᱹᱰᱤ ᱥᱟᱦᱟ ᱨᱮᱭᱟᱜ ᱡᱤᱭᱚᱱ ᱮ ᱠᱷᱚᱸᱰᱟᱣ ᱠᱮᱫᱟ᱾ ᱩᱱᱤᱭᱟᱜ ᱯᱚᱨᱥᱳᱱᱟ ᱠᱚ ᱥᱟᱶᱛᱟ ᱞᱮᱠᱟᱛᱮ ᱵᱟᱝ ᱢᱟᱱᱟᱣ ᱵᱟᱛᱟᱣ ᱞᱮᱠᱟᱛᱮ ᱵᱩᱡᱷᱟᱹᱣ ᱠᱮᱫᱟ᱾ ᱩᱱᱤᱭᱟᱜ ᱥᱤᱨᱯᱷᱟᱹ ᱨᱮ ᱯᱟᱫᱽᱢᱟ ᱥᱨᱤ (᱑᱙᱕᱘), ᱫᱟᱫᱟᱥᱟᱦᱮᱵᱽ ᱯᱷᱟᱞᱠᱮ ᱟᱣᱟᱨᱰ (᱑᱙᱖᱙) ᱟᱨ ᱥᱳᱵᱷᱤᱭᱮᱛ ᱞᱮᱱᱰ ᱱᱮᱦᱨᱩ ᱟᱣᱟᱨᱰ (᱑᱙᱙᱐) ᱥᱮᱞᱮᱫ ᱢᱮᱱᱟᱜᱼᱟ᱾
ᱥᱟᱹᱠᱷᱭᱟᱹᱛ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]- ↑ "Top heroines of Bollywood". India Today. Archived from the original on 28 November 2020. Retrieved 24 August 2020.
- ↑ "Top Actresses". Box Office India. Archived from the original on 27 December 2012. Retrieved 25 March 2016.
ᱵᱟᱦᱨᱮ ᱡᱚᱱᱚᱲ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ] |
ᱣᱤᱠᱤᱢᱤᱰᱤᱭᱟ ᱠᱚᱢᱚᱱᱥ ᱨᱮ ᱫᱮᱵᱤᱠᱟ ᱨᱟᱱᱤ ᱵᱟᱵᱚᱛᱫᱽ ᱛᱮ ᱨᱮᱫ ᱢᱮᱱᱟᱜᱼᱟ ᱾. |
- Devika Rani (ᱤᱱᱴᱚᱨᱱᱮᱴ ᱢᱩᱵᱷᱤ ᱰᱟᱴᱟᱵᱮᱥ ᱨᱮ)