ᱯᱷᱩᱨᱜᱟ.ᱞ ᱢᱟᱸᱦᱟ

ᱣᱤᱠᱤᱯᱤᱰᱤᱭᱟ ᱠᱷᱚᱱ
Jump to navigation Jump to search
India-0037 - Flickr - archer10 (Dennis).jpg

ᱵᱷᱟᱨᱚᱛ ᱨᱮᱭᱟᱜ ᱯᱷᱩᱨᱜᱟ.ᱞ ᱢᱟᱸᱦᱟ

ᱯᱷᱩᱨᱜᱟ.ᱞ ᱫᱚ ᱥᱟᱱᱟᱢ ᱠᱚ ᱜᱮᱠᱚ ᱥᱟ.ᱜᱩᱱ ᱫᱟᱨᱟᱢᱟ ᱾ ᱢᱤᱫ ᱦᱚᱲᱟᱜ ᱡᱤᱭᱚᱱ ᱨᱮ ᱱᱚᱶᱟ ᱨᱮᱭᱟᱜ ᱞᱟ.ᱠᱛᱤ ᱡᱟᱦᱟᱸ ᱛᱤᱱᱟ.ᱜ ᱛᱟᱦᱮᱸᱱᱟ, ᱫᱤᱥᱚᱢ ᱞᱟ.ᱜᱤᱫ ᱦᱚᱸ ᱱᱚᱶᱟ ᱫᱚ ᱚᱱᱠᱟ ᱜᱮ ᱞᱟ.ᱠᱛᱤ ᱯᱟᱲᱟᱣ ᱜᱚᱫᱚᱜᱼᱟ ᱾ ᱡᱚᱛᱚ ᱥᱮᱨᱢᱟ ᱜᱮ ᱑᱕ ᱚᱜᱚᱥᱴ ᱱᱚᱶᱟ ᱫᱚᱠᱚ ᱢᱟᱱᱟᱣᱟ ᱾ ᱑᱙᱔᱗ ᱥᱟᱞᱮᱨᱮ ᱱᱚᱶᱟ ᱢᱟᱸᱦᱟ ᱦᱤᱞᱚᱜ ᱤᱸᱜᱽᱨᱟ.ᱡᱽ ᱠᱚᱣᱟᱜ ᱜᱚᱵᱚᱞ ᱠᱷᱚᱱ ᱵᱷᱟᱨᱚᱛᱤᱭᱟ. ᱟᱨᱵᱟᱝ ᱥᱤᱧᱚᱛ ᱫᱤᱥᱩᱣᱟ. ᱠᱚ ᱨᱟᱲᱟ ᱫᱩᱜ ᱠᱟᱛᱮ ᱯᱷᱩᱨᱜᱟ.ᱞ ᱡᱤᱭᱚᱱ ᱡᱤᱣᱤᱫᱚᱜ ᱨᱮᱭᱟᱜ ᱛᱟᱠ ᱠᱚ ᱧᱟᱢ ᱞᱮᱜᱼᱟ ᱾ ᱱᱚᱶᱟ ᱫᱚ ᱵᱷᱟᱨᱚᱛ ᱨᱮᱭᱟᱜ ᱢᱤᱫ ᱫᱤᱥᱚᱢ ᱯᱟᱨᱟᱵᱽ ᱠᱟᱱᱟ ᱾ ᱡᱚᱛᱚ ᱥᱮᱨᱢᱟ ᱜᱮ ᱱᱚᱶᱟ ᱢᱟᱸᱦᱟᱨᱮ ᱵᱷᱟᱨᱚᱛ ᱨᱤᱱᱤᱡ ᱢᱟᱨᱟᱝ ᱢᱚᱱᱛᱨᱤ ᱞᱟᱞ ᱠᱤᱞᱟ ᱨᱮᱭᱟᱜ ᱵᱮᱲᱦᱟᱭ ᱠᱷᱚᱱ ᱫᱤᱥᱚᱢ ᱦᱚᱲ ᱮ ᱥᱟ.ᱜᱩᱱ ᱫᱟᱨᱟᱢ ᱥᱟᱨᱦᱟᱣ ᱠᱚᱣᱟ ᱾ ᱑᱕ ᱚᱜᱚᱥᱴ ᱑᱙᱔᱗ ᱦᱤᱞᱚᱜ ᱵᱷᱟᱨᱚᱛ ᱨᱤᱱᱤᱡ ᱯᱩᱭᱞᱩ ᱢᱟᱨᱟᱝ ᱢᱚᱱᱛᱨᱤ ᱡᱚᱵᱟᱦᱚᱨ ᱞᱟᱞ ᱱᱮᱦᱨᱩ ᱫᱚ ᱫᱤᱞᱞᱤ ᱨᱮ ᱞᱟᱞ ᱠᱤᱞᱞᱟ ᱨᱮᱭᱟᱜ ᱞᱟᱦᱚᱨ ᱜᱮᱴ ᱪᱮᱛᱟᱱ ᱨᱮ ᱵᱷᱟᱨᱚᱛᱤᱭᱟ. ᱦᱟᱜ ᱪᱤᱨ ᱮ ᱦᱤᱯᱤᱲ ᱞᱮᱜᱼᱟ ᱾ ᱢᱚᱦᱟᱛᱢᱟ ᱜᱟᱱᱫᱷᱤ ᱛᱤᱠᱤᱱᱟᱜ ᱟ.ᱭᱩᱨ ᱛᱮ ᱵᱷᱟᱨᱚᱛ ᱯᱷᱩᱨᱜᱟ.ᱞ ᱦᱩᱞ ᱨᱮ ᱦᱚᱲ ᱠᱚ ᱟ.ᱰᱤ ᱜᱟᱺᱦᱤᱨ ᱫᱷᱟ.ᱵᱤᱡ ᱵᱟᱝ ᱦᱤᱸᱥᱟ. ᱟᱨ ᱱᱮᱢᱚᱸᱥ ᱦᱚᱨ ᱛᱮ ᱢᱤᱪᱷᱤᱞ ᱠᱚ ᱪᱟ.ᱞᱩ ᱠᱮᱜᱼᱟ ᱾ ᱯᱷᱩᱨᱜᱟ.ᱞ ᱛᱟᱭᱚ.ᱢ ᱤᱸᱜᱽᱨᱟ.ᱡᱽ ᱠᱚ ᱵᱷᱟᱨᱚᱛ ᱫᱚ ᱫᱷᱚᱨᱚᱢ ᱫᱟᱨᱟᱭ ᱛᱮ ᱠᱚ ᱠᱮᱪᱟᱜ ᱦᱟᱴᱤᱧ ᱠᱮᱜᱼᱟ, ᱡᱟᱦᱟᱸ ᱫᱚ ᱵᱷᱟᱨᱚᱛ ᱟᱨ ᱯᱟᱠᱤᱥᱛᱟᱱ ᱞᱮᱠᱟᱛᱮ ᱥᱟᱢᱟᱝ ᱛᱮ ᱦᱮᱡ ᱮᱱᱟ ᱾ ᱦᱟ.ᱴᱤᱧ ᱮᱱ ᱛᱟᱭᱚᱢ ᱵᱟᱱᱟᱨ ᱫᱤᱥᱚᱢ ᱨᱮ ᱦᱤᱸᱥᱟ. ᱥᱩᱭᱟ. ᱨᱮᱭᱟᱜ ᱥᱮᱸᱜᱮᱞ ᱡᱩᱞ ᱨᱟᱠᱟᱵ ᱮᱱᱟ ᱟᱨ ᱱᱚᱶᱟ ᱫᱟᱨᱟᱭ ᱛᱮ ᱟ.ᱰᱤ ᱜᱟᱱ ᱵᱮᱼᱜᱷᱚᱴᱚᱱ ᱡᱟᱱᱟᱢ ᱮᱱᱟ ᱾ ᱫᱤᱥᱚᱢ ᱠᱮᱪᱟᱜ ᱦᱟ.ᱴᱤᱧ ᱮᱱ ᱠᱷᱟ.ᱛᱤᱨ ᱢᱟ.ᱱᱢᱤ ᱡᱟ.ᱛᱤᱭᱟᱜ ᱱᱟᱜᱟᱢ ᱨᱮ ᱱᱩᱱᱟ.ᱜ ᱵᱟ.ᱲᱛᱤ ᱦᱚᱲ ᱠᱚᱣᱟᱜ ᱢᱤᱫ ᱴᱷᱟᱶ ᱠᱷᱚᱱ ᱟᱨ ᱢᱤᱫ ᱴᱷᱟᱶ ᱥᱮᱱᱚᱜ ᱨᱮᱭᱟᱜ ᱫᱚ ᱛᱤᱥ ᱦᱚᱸ ᱵᱟᱝ ᱧᱮᱞ ᱟᱠᱟᱱᱟ ᱾ ᱱᱚᱶᱟ ᱮᱞᱮᱞ ᱫᱚ ᱞᱟ.ᱭ ᱞᱟᱵᱟᱲ ᱑. ᱔᱕ ᱠᱚᱨᱚᱲ ᱛᱟᱦᱮᱸ ᱠᱟᱱᱟ ᱾ ᱑᱙᱕᱑ ᱥᱟᱞ ᱨᱮᱭᱟᱜ ᱦᱚᱲ ᱦᱤᱥᱟ.ᱵᱽ ᱫᱟᱨᱟᱭ ᱛᱮ ᱵᱟᱰᱟᱭ ᱧᱟᱢᱚᱜᱼᱟ, ᱫᱤᱥᱚᱢ ᱠᱮᱪᱟᱜ ᱦᱟ.ᱴᱤᱧ ᱥᱚᱸᱜᱮ ᱗᱒,᱒᱖,᱐᱐᱐ ᱢᱩᱥᱚᱞᱢᱟᱱ ᱵᱷᱟᱨᱚᱛ ᱵᱟ.ᱜᱤ ᱠᱟᱛᱮ ᱯᱟᱠᱤᱥᱛᱟᱱ ᱠᱚ ᱥᱮᱱ ᱮᱱᱟ ᱟᱨ ᱗᱒,᱔᱙,᱐᱐᱐ ᱦᱤᱸᱫᱩ ᱟᱨ ᱥᱤᱠᱷ ᱯᱟᱠᱤᱥᱛᱟᱱ ᱵᱟ.ᱜᱤ ᱠᱟᱛᱮ ᱵᱷᱟᱨᱚᱛ ᱠᱚ ᱦᱮᱡ ᱟᱠᱟᱱᱟ ᱾

ᱱᱚᱶᱟ ᱫᱤᱱᱨᱮ ᱪᱤᱨ ᱦᱤᱯᱤᱲ ᱠᱟ.ᱢᱤᱦᱚᱨᱟ, ᱯᱟᱨᱮᱰ ᱟᱨ ᱛᱤᱱᱟ.ᱝ ᱜᱟᱱ ᱨᱟ.ᱥᱠᱟ. ᱨᱚᱢᱚᱡᱽ ᱥᱟᱶᱛᱮ ᱯᱩᱨᱟ. ᱵᱷᱟᱨᱚᱛ ᱫᱤᱥᱚᱢ ᱨᱮ ᱢᱟᱱᱟᱣ ᱦᱩᱭᱩᱜᱼᱟ ᱾ ᱥᱤᱧᱚᱛᱤᱭᱟ. ᱠᱚ ᱱᱤᱭᱟ. ᱫᱤᱱᱨᱮ ᱟᱠᱚᱣᱟᱜ ᱦᱚᱨᱚᱜ ᱵᱟᱸᱫᱮ, ᱥᱟᱢᱟᱱ, ᱚᱲᱟᱜ ᱟᱨ ᱜᱟ.ᱰᱤ ᱢᱚᱴᱚᱨ ᱠᱚᱨᱮ ᱫᱤᱥᱚᱢ ᱫᱩᱞᱟ.ᱲ ᱪᱤᱛᱟ.ᱨ ᱥᱚᱫᱚᱨ ᱠᱟᱛᱮ ᱱᱚᱶᱟ ᱠᱩᱥᱤ ᱨᱟ.ᱥᱠᱟ. ᱫᱤᱱ ᱠᱚ ᱢᱟᱱᱟᱣ ᱵᱟᱛᱟᱣᱟ ᱟᱨ ᱜᱷᱟᱨᱚᱸᱡᱤᱭᱟ. ᱟᱨ ᱜᱟᱛᱮ ᱠᱚ ᱥᱟᱶ ᱥᱮᱞᱮᱫ ᱠᱟᱛᱮ ᱫᱤᱥᱚᱢ ᱫᱩᱞᱟ.ᱲ ᱜᱟᱭᱟᱱ ᱠᱚ ᱧᱮᱞᱟ, ᱟᱨ ᱫᱤᱥᱚᱢ ᱫᱩᱞᱟ.ᱲ ᱥᱮᱨᱮᱧ ᱠᱚᱠᱚ ᱟᱸᱡᱚᱢᱟ ᱾

ᱪᱮᱫᱟᱜ ᱢᱟᱱᱟᱣ ᱦᱩᱭᱩᱜᱼᱟ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱯᱷᱩᱨᱜᱟᱹᱞ ᱫᱚ ᱟᱵᱚᱣᱟᱜ ᱡᱟᱱᱟᱢ ᱚᱫᱷᱤᱠᱟᱨ ᱠᱟᱱᱟ ᱾ ᱢᱟ.ᱱᱢᱤ ᱪᱤᱨᱜᱟ.ᱞ ᱡᱤᱭᱚᱱ ᱡᱤᱣᱤᱫᱚᱜ ᱮ ᱠᱷᱚᱡᱚᱜᱼᱟ ᱾ ᱡᱟᱦᱟᱸᱱᱟᱜ ᱮᱛᱮᱫ ᱠᱷᱟ.ᱛᱤᱨ ᱯᱷᱩᱨᱜᱟ.ᱞ ᱡᱤᱭᱚᱱ ᱮ ᱟᱫ ᱞᱮᱠᱷᱟᱱ, ᱟᱡᱟᱜ ᱡᱤᱭᱚᱱ ᱜᱚᱵᱚᱞ ᱨᱮ ᱛᱟᱦᱮᱸᱱᱟ ᱾ ᱯᱷᱩᱨᱜᱟ.ᱞ ᱡᱤᱭᱚᱱ ᱠᱷᱚᱱ ᱥᱟᱺᱜᱤᱧ ᱨᱮ ᱛᱟᱦᱮᱸ ᱠᱟᱛᱮ ᱩᱱᱤ ᱱᱟᱦᱟᱪᱟᱨ ᱠᱚᱪᱚᱞᱚᱸᱰ ᱛᱟᱞᱟᱨᱮ ᱡᱤᱭᱚᱱ ᱠᱷᱮᱢᱟᱣ ᱦᱩᱭ ᱟᱭᱟ ᱾ ᱯᱷᱩᱨᱜᱟᱹᱞᱚᱜ ᱞᱟ.ᱜᱤᱫ ᱩᱱᱤ ᱦᱟ.ᱛᱭᱟ.ᱨ ᱟᱯᱱᱟᱨ ᱦᱩᱭ ᱟᱭᱟ ᱾ ᱫᱤᱥᱚᱢ ᱨᱮᱭᱟᱜ ᱱᱚᱝᱠᱟᱱ ᱟᱱᱟᱴ ᱚᱠᱛᱚᱨᱮ ᱚᱯᱮᱞᱚᱜᱼᱟ ᱠᱚ ᱢᱤᱼᱢᱤᱫᱴᱟ.ᱝ ᱵᱤᱨ ᱵᱷᱟᱱᱴᱟ ᱾ ᱯᱷᱩᱨᱜᱟ.ᱞ ᱡᱤᱭᱚᱱ ᱞᱟ.ᱜᱤᱫ ᱩᱱᱠᱩ ᱫᱤᱥᱩᱣᱟ. ᱠᱚ ᱪᱤᱨᱜᱟ.ᱞ ᱠᱚᱣᱟ ᱾ ᱯᱷᱩᱨᱜᱟ.ᱞ ᱟᱢᱮᱴ ᱞᱟ.ᱜᱤᱫ ᱟ.ᱰᱤᱼᱟ.ᱰᱤ ᱫᱤᱥᱚᱢ ᱫᱩᱞᱟ.ᱲᱤᱭᱟ. ᱡᱤᱣᱤ ᱠᱚ ᱟᱞᱟᱭ ᱛᱟᱠᱚᱣᱟ ᱾ ᱯᱷᱩᱨᱜᱟ.ᱞ ᱢᱤᱪᱷᱤᱞ ᱨᱮ ᱥᱮᱞᱮᱫ ᱠᱟᱛᱮ ᱟᱭᱢᱟ ᱵᱤᱨ ᱵᱷᱟᱱᱴᱟ ᱫᱤᱥᱚᱢ ᱞᱟ.ᱜᱤᱫ ᱠᱚ ᱫᱟᱬᱮᱜᱼᱟ ᱾ ᱩᱱᱠᱩᱣᱟᱜ ᱛᱩᱯᱤᱥᱟ, ᱟᱞᱟᱭ ᱟᱨ ᱥᱚᱱᱚᱛ ᱡᱤᱭᱚᱱ ᱩᱭᱦᱟ.ᱨ ᱠᱟᱛᱮ ᱜᱮ ᱟᱵᱚ ᱯᱷᱩᱨᱜᱟ.ᱞ ᱢᱟᱦᱟᱸ ᱫᱚᱵᱚᱱ ᱢᱟᱱᱟᱣ ᱵᱟᱛᱟᱣᱟ ᱾ ᱯᱷᱩᱨᱜᱟ.ᱞ ᱦᱩᱞ ᱨᱮᱭᱟᱜ ᱱᱟᱜᱟᱢ, ᱧᱟᱢ ᱟᱠᱟᱱ ᱯᱷᱩᱨᱜᱟ.ᱞ ᱨᱮᱭᱟᱜ ᱯᱟᱨᱟᱝᱜᱚᱛ, ᱟᱨ ᱫᱤᱥᱚᱢ ᱪᱤᱨ ᱨᱮᱭᱟᱜ ᱢᱟ.ᱱ ᱵᱟ.ᱲᱛᱤ ᱦᱚᱪᱚᱭ ᱨᱮᱭᱟᱜ ᱩᱭᱦᱟ.ᱨ ᱪᱮᱛᱟᱱ ᱨᱮ ᱯᱷᱩᱨᱜᱟ.ᱞ ᱢᱟᱦᱟᱸ ᱛᱟᱠ ᱮ ᱮᱢᱚᱜᱼᱟ ᱾ ᱫᱤᱥᱚᱢ ᱟᱨ ᱫᱤᱥᱚᱢ ᱨᱮᱭᱟᱜ ᱥᱟᱱᱟᱢ ᱯᱟᱲᱟ ᱠᱷᱚᱱ ᱱᱟᱯᱟᱭ ᱞᱟ.ᱜᱤᱫ ᱥᱟᱱᱟᱢ ᱫᱤᱥᱚᱢ ᱦᱚᱲ ᱠᱤᱨᱤᱭᱟ. ᱛᱮᱠᱚ ᱛᱚᱞ ᱨᱩᱣᱟ.ᱲᱚᱜᱼᱟ ᱾

ᱯᱷᱩᱨᱜᱟ.ᱞ ᱢᱤᱪᱷᱤᱞ ᱨᱮᱭᱟᱜ ᱠᱷᱟᱴᱚ ᱢᱟᱪᱷᱟ ᱱᱟᱜᱟᱢ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱟ.ᱰᱤ ᱥᱮᱨᱢᱟ ᱫᱷᱟ.ᱵᱤᱡ ᱮᱴᱟᱜ ᱫᱤᱥᱚᱢ ᱨᱤᱱ ᱜᱚᱵᱚᱞᱤᱭᱟ. ᱵᱷᱟᱨᱚᱛ ᱨᱮᱠᱚ ᱛᱟᱦᱮᱸᱭᱮᱱ ᱠᱷᱟ.ᱛᱤᱨ ᱵᱷᱟᱨᱚᱛᱤᱭᱟ. ᱠᱚ ᱱᱟᱦᱟᱪᱟᱨ, ᱠᱚᱪᱚᱞᱚᱸᱰ ᱟᱨ ᱚᱱᱦᱮᱲᱟ ᱨᱮᱠᱚ ᱛᱟᱦᱮᱸ ᱠᱟᱱᱟ ᱾ ᱑᱘᱕᱗ ᱥᱟᱞᱮᱨᱮ ᱵᱷᱟᱨᱚᱛᱤᱭᱟ. ᱯᱟᱭᱠᱚ ᱠᱚᱫᱚ ᱤᱸᱜᱽᱨᱟ.ᱡᱽ ᱥᱚᱨᱠᱟᱨ ᱵᱤᱨᱩᱫᱷᱨᱮ ᱢᱤᱪᱷᱤᱞ ᱮ ᱫᱚᱦᱚ ᱠᱮᱜᱼᱟ ᱾ ᱵᱷᱟᱨᱚᱛᱤᱭᱟ. ᱠᱚᱣᱟᱜ ᱢᱚᱱᱮᱨᱮ ᱯᱷᱩᱨᱜᱟ.ᱞ ᱞᱟ.ᱜᱤᱫ ᱪᱤᱨᱜᱟ.ᱞᱚᱜ ᱨᱮᱭᱟᱜ ᱧᱮᱞ ᱧᱟᱢᱮᱱᱟ ᱾ ᱠᱚᱸᱜᱽᱨᱮᱥ ᱠᱚᱣᱟᱜ ᱯᱩᱭᱞᱩ ᱫᱩᱯᱲᱩᱵ ᱑᱘᱘᱕ ᱥᱟᱞᱮᱨᱮ ᱵᱚᱢᱵᱮ ᱨᱮ ᱛᱚᱨᱟᱣ ᱦᱩᱭ ᱮᱱᱟ ᱾ ᱜᱳᱯᱟᱞ ᱠᱨᱩᱥᱱᱚ ᱜᱳᱠᱷᱞᱮ, ᱵᱟᱞ ᱜᱚᱝᱜᱟᱫᱷᱚᱨ ᱛᱤᱞᱚᱠ, ᱫᱟᱫᱟᱵᱷᱟᱭᱤ ᱱᱟᱨᱳᱡᱤ ᱟ.ᱰᱤ ᱦᱚᱲ ᱱᱚᱶᱟ ᱢᱤᱪᱷᱤᱞ ᱨᱮ ᱞᱟ.ᱠᱛᱤᱭᱟᱱ ᱴᱷᱟᱶ ᱠᱚ ᱦᱟᱛᱟᱣ ᱠᱮᱜᱼᱟ ᱾ ᱑᱙᱑᱙ ᱥᱟᱞᱨᱮ ᱡᱟᱞᱤᱭᱟᱱᱟᱣᱟᱞᱟᱵᱟᱜᱽ ᱨᱮ ᱡᱟᱦᱟᱸ ᱢᱤᱫ ᱚᱜᱷᱚᱴᱚᱱ ᱜᱚᱯᱚᱡ ᱦᱩᱭ ᱞᱮᱱᱟ, ᱚᱱᱟᱨᱮ ᱟ.ᱰᱤᱜᱟᱱ ᱢᱟᱥᱩᱢ, ᱵᱤᱱ-ᱦᱟ.ᱛᱭᱟ.ᱨ ᱠᱩᱲᱤᱼᱠᱚᱲᱟ ᱟᱨ ᱜᱤᱫᱽᱨᱟ.-ᱯᱤᱫᱽᱨᱟ. ᱠᱚᱣᱟᱜ ᱡᱤᱭᱚᱱ ᱢᱩᱪᱟ.ᱫ ᱞᱮᱱᱟ ᱾ ᱱᱚᱝᱠᱟᱱ ᱜᱷᱚᱴᱚᱱ ᱠᱷᱚᱱ ᱫᱩᱜ ᱛᱟᱦᱮᱸᱱ ᱞᱟ.ᱜᱤᱫ ᱵᱷᱟᱨᱚᱛᱤᱭᱟ. ᱠᱚᱣᱟᱜ ᱦᱩᱞ ᱩᱭᱦᱟ.ᱨ ᱫᱚ ᱟᱨᱦᱚᱸᱭ ᱨᱤᱦᱤᱴ ᱠᱮᱜᱼᱟ ᱾ ᱢᱚᱦᱟᱛᱢᱟ ᱜᱟᱱᱫᱷᱤ ᱭᱟᱜ ᱧᱮᱞᱼᱟ.ᱭᱩᱨ ᱛᱮ ᱱᱚᱶᱟ ᱫᱩᱜᱚᱜ ᱦᱩᱞ ᱫᱚ ᱞᱟᱦᱟ ᱤᱫᱤᱭᱮᱱᱟ ᱾ ᱑᱙᱒᱑ ᱥᱟᱞᱮᱨᱮ ᱵᱷᱟᱨᱚᱛᱤᱭᱟ. ᱠᱚ ᱵᱟᱝᱼᱥᱚᱦᱚᱫ ᱢᱤᱪᱷᱤᱞ ᱨᱮ ᱥᱮᱞᱮᱫ ᱠᱟᱛᱮ ᱵᱷᱟᱨᱚᱛ ᱨᱮ ᱤᱸᱜᱽᱨᱟ.ᱡᱽ ᱥᱚᱨᱠᱟᱨᱟᱜ ᱜᱚᱵᱚᱞ ᱠᱚ ᱵᱷᱟᱺᱰᱩᱣᱟ.ᱭ ᱨᱮᱭᱟᱜ ᱠᱚ ᱠᱩᱨᱩᱢᱩᱴᱩ ᱠᱮᱜᱼᱟ ᱾ ᱫᱤᱥᱩᱣᱟ. ᱠᱚ ᱵᱟᱦᱨᱮ ᱫᱤᱥᱚᱢ ᱨᱮᱭᱟᱜ ᱡᱤᱱᱤᱥ ᱠᱚ ᱵᱟᱠᱚ ᱦᱟᱛᱟᱣ ᱞᱮᱜᱼᱟ ᱾ ᱫᱤᱥᱚᱢᱨᱮ ᱥᱚᱛᱭᱟᱜᱨᱚᱦᱚ ᱢᱤᱪᱷᱤᱞ ᱟᱨ ᱦᱚᱸ ᱨᱤᱦᱤᱴ ᱛᱮ ᱞᱟᱦᱟ ᱤᱫᱤᱭᱮᱱᱟ ᱾ ᱢᱚᱦᱚᱛᱢᱟ ᱜᱟᱱᱫᱷᱤ ᱵᱤᱱᱼᱦᱤᱸᱥᱟ. ᱰᱟᱦᱟᱨ ᱛᱮ ᱢᱤᱪᱷᱤᱞ ᱮ ᱞᱟᱦᱟ ᱤᱫᱤ ᱠᱮᱜᱼᱟ ᱾ ᱵᱷᱟᱨᱚᱛ ᱵᱟ.ᱜᱤ ᱢᱤᱪᱷᱤᱞ ᱨᱮᱭᱟᱜ ᱠᱟ.ᱠᱞᱟ. ᱮᱢ ᱥᱟᱶᱛᱮ ᱤᱸᱜᱽᱨᱟ.ᱡᱽ ᱥᱚᱨᱠᱟᱨ ᱵᱷᱟᱨᱚᱛ ᱠᱷᱚᱱ ᱞᱟᱜᱟ ᱠᱚ ᱨᱮᱭᱟᱜ ᱠᱩᱨᱩᱢᱩᱴᱩ ᱛᱚᱸᱜᱮ ᱛᱟᱦᱮᱸᱭᱮᱱᱟ ᱾ ᱯᱚᱸᱰᱤᱛ ᱡᱚᱵᱟᱦᱚᱨ ᱞᱟᱞ ᱱᱮᱦᱨᱩ, ᱥᱚᱨᱫᱟᱨ ᱵᱚᱞᱞᱚᱵᱷᱵᱷᱟᱭᱤ ᱯᱚᱴᱮᱞ, ᱱᱮᱛᱟᱡᱤ ᱥᱩᱵᱷᱟᱥ ᱪᱚᱸᱫᱽᱨᱚ ᱵᱳᱥ, ᱟᱨ ᱜᱟᱱᱫᱷᱤᱡᱤ ᱱᱚᱝᱠᱟ ᱜᱮ ᱟ.ᱰᱤᱜᱟᱱ ᱱᱮᱛᱟ ᱫᱟᱨᱟᱭ ᱛᱮ ᱵᱷᱟᱨᱚᱛ ᱯᱷᱩᱨᱜᱟ.ᱞ ᱨᱮᱭᱟᱜ ᱵᱟᱝ ᱛᱷᱤᱨ ᱠᱩᱨᱩᱢᱩᱴᱩ ᱞᱟᱦᱟ ᱤᱫᱤᱭᱮᱱᱟ ᱾ ᱢᱚᱦᱟᱛᱢᱟ ᱜᱟᱱᱫᱷᱤ ᱵᱟᱝᱼᱦᱤᱸᱥᱟ. ᱦᱚᱨᱛᱮᱭ ᱛᱟᱲᱟᱢ ᱟᱠᱟᱫ ᱵᱮᱲᱟᱨᱮ ᱱᱮᱛᱟᱡᱤ ᱢᱤᱫ ᱟᱡᱟᱫᱽᱼᱦᱤᱸᱫᱽ ᱯᱟᱭᱠᱚ ᱜᱟᱫᱮᱞ ᱮ ᱛᱤᱸᱜᱩ ᱠᱮᱜᱼᱟ ᱾ ᱡᱚᱛᱚ ᱦᱩᱞᱜᱟ.ᱨᱤᱭᱟ. ᱦᱟᱜ ᱜᱮ ᱢᱤᱫᱴᱟ.ᱝ ᱡᱚᱥ ᱛᱟᱦᱮᱸ ᱠᱟᱱᱟ ᱵᱷᱟᱨᱚᱛ ᱯᱷᱩᱨᱜᱟᱹᱞ ᱾ ᱢᱚᱦᱟᱛᱢᱟ ᱜᱟᱱᱫᱷᱤ ᱭᱟᱜ ᱧᱮᱞ ᱟ.ᱭᱩᱨ ᱛᱮ ᱫᱤᱥᱚᱢ ᱫᱤᱥᱩᱣᱟ. ᱯᱷᱩᱨᱜᱟᱹᱞ ᱢᱤᱪᱷᱤᱞ ᱨᱮᱠᱚ ᱥᱮᱞᱮᱫ ᱮᱱᱟ ᱾ ᱜᱟᱱᱫᱷᱤᱡᱤ ᱭᱟᱜ ᱵᱟᱝᱼᱦᱤᱸᱥᱟ. ᱦᱟ.ᱛᱭᱟ.ᱨ ᱵᱮᱵᱷᱟᱨ ᱯᱷᱩᱨᱜᱟᱹᱞ ᱞᱟ.ᱜᱤᱫ ᱟ.ᱰᱤᱜᱟᱱ ᱜᱚᱲᱚ ᱥᱚᱦᱚᱫ ᱦᱩᱭ ᱮᱱᱟ ᱾

ᱪᱮᱫ ᱞᱮᱠᱟ ᱢᱟᱱᱟᱣᱼᱵᱟᱛᱟᱣ ᱦᱩᱭᱩᱜᱼᱟ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱯᱩᱨᱟ. ᱡᱮᱜᱮᱛ ᱨᱮ ᱵᱷᱟᱨᱚᱛᱤᱭᱟ. ᱠᱚ ᱫᱟᱨᱟᱭ ᱛᱮ ᱱᱚᱶᱟ ᱥᱟ.ᱜᱩᱱ ᱢᱟᱸᱦᱟ ᱢᱟᱱᱟᱣ ᱵᱟᱛᱟᱣ ᱦᱩᱭᱩᱜᱼᱟ ᱾ᱞᱟᱠᱷᱭᱟᱫᱤᱯ, ᱟᱱᱰᱟᱢᱟᱱ ᱟᱨ ᱱᱤᱠᱳᱵᱚᱨ ᱰᱷᱤᱯ ᱨᱮᱦᱚᱸ ᱱᱚᱶᱟ ᱢᱟᱦᱟᱸ ᱫᱚ ᱢᱟᱱᱟᱣ ᱵᱟᱛᱟᱣ ᱦᱩᱭᱩᱜᱼᱟ ᱾ ᱵᱟᱦᱨᱮ ᱫᱤᱥᱚᱢ ᱨᱮᱠᱚ ᱛᱟᱦᱮᱸᱱ ᱠᱟᱱ ᱵᱷᱟᱨᱚᱛᱤᱭᱟ. ᱠᱚᱦᱚᱸ ᱯᱷᱩᱨᱜᱟ.ᱞ ᱢᱟᱦᱟᱸ ᱫᱚᱠᱚ ᱢᱟᱱᱟᱣ ᱵᱟᱛᱟᱣ ᱜᱮᱭᱟ ᱾ ᱟᱥᱲᱟ, ᱵᱤᱨᱫᱟ.ᱜᱟᱲ ᱟᱨᱵᱟᱝ ᱞᱮᱠᱟᱱ ᱞᱮᱠᱟᱱ ᱥᱚᱨᱠᱟᱨᱤ ᱵᱟᱝᱼᱥᱚᱨᱠᱟᱨᱤ ᱜᱟᱶᱛᱟ ᱠᱚᱦᱚᱸ ᱯᱷᱩᱨᱜᱟ.ᱞ ᱢᱟᱦᱟᱸ ᱵᱟᱵᱚᱫᱽ ᱥᱟᱡᱟᱣ ᱥᱟᱯᱲᱟᱣ ᱦᱩᱭ ᱠᱚᱜᱼᱟ ᱾

ᱢᱟᱱᱟᱣ ᱨᱮᱭᱟᱜ ᱨᱟ.ᱥᱠᱟ.[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱞᱮᱠᱟᱱᱼᱞᱮᱠᱟᱱ ᱨᱚᱝ ᱠᱟᱜᱚᱡᱽ, ᱵᱟᱦᱟ, ᱟᱨ ᱵᱤᱡᱽᱞᱤ ᱢᱟᱨᱥᱟᱞ ᱛᱮ ᱥᱟᱡᱟᱣ ᱟᱠᱟᱱᱟᱜ ᱟ.ᱰᱤ ᱞᱟ~ᱥᱟᱬᱦᱮᱫ ᱜᱮ ᱧᱮᱞᱚᱜᱼᱟ ᱾ ᱪᱮᱛᱮᱫᱤᱭᱟ. ᱠᱚ ᱟᱥᱲᱟ ᱫᱚᱛᱚᱼᱯᱮᱸᱴ ᱦᱚᱨᱚᱜ ᱠᱟᱛᱮ ᱟᱥᱲᱟ ᱵᱟ.ᱠᱷᱩᱞ ᱨᱮᱠᱚ ᱥᱮᱴᱮᱨ ᱢᱤᱫᱩᱜᱼᱟ ᱾ ᱪᱮᱛᱮᱫᱤᱭᱟ. ᱠᱚᱣᱟᱜ ᱟᱲᱟᱝ ᱠᱷᱚᱱ ᱵᱚᱸᱫᱮ ᱢᱟᱛᱚᱨᱚᱢ, ᱯᱷᱩᱨᱜᱟ.ᱞ ᱵᱷᱟᱨᱚᱛ ᱨᱮᱭᱟᱜ ᱡᱤᱛᱠᱟ.ᱨ, ᱟᱨ ᱢᱚᱦᱟᱛᱢᱟ ᱜᱟᱱᱫᱷᱤᱭᱟᱜ ᱡᱤᱛᱠᱟ.ᱨ ᱟᱲᱟᱝ ᱛᱟᱨᱠᱚ ᱠᱟᱛᱮ ᱚᱛᱼᱥᱮᱨᱢᱟ ᱨᱮ ᱛᱟ.ᱠᱤᱡ ᱢᱤᱫᱩᱜᱼᱟ ᱟᱨ ᱥᱩᱨ ᱥᱩᱯᱩᱨ ᱨᱮ ᱢᱮᱱᱟᱜ ᱠᱚ ᱦᱚᱲ ᱦᱚᱯᱚᱱ ᱠᱚᱣᱟᱜ ᱨᱟ.ᱥᱠᱟ. ᱥᱟᱨᱥᱟᱣᱜᱼᱟ ᱾ ᱮᱱ. ᱥᱤ. ᱥᱤ., ᱥᱠᱟᱣᱴ, ᱟᱨ ᱨᱮᱰ ᱠᱨᱚᱥ ᱜᱤᱫᱽᱨᱟ. ᱠᱚᱣᱟᱜ ᱫᱚ ᱢᱚᱱᱮ ᱨᱤᱡᱷᱟ.ᱣ ᱜᱚᱫᱚᱜ ᱞᱮᱠᱟᱱ ᱯᱟᱨᱮᱰ ᱦᱚᱸ ᱦᱩᱭᱩᱜᱼᱟ ᱾ ᱱᱮᱣᱛᱟ ᱟᱠᱟᱱ ᱢᱟᱨᱟᱝ ᱯᱮᱲᱟ ᱠᱚ ᱫᱟᱨᱟᱭ ᱛᱮ ᱪᱤᱨ ᱦᱤᱯᱤᱲ ᱦᱩᱭᱩᱜᱼᱟ ᱾ ᱪᱮᱛᱮᱫᱤᱭᱟ. ᱠᱚᱣᱟᱜ ᱟᱲᱟᱝ ᱨᱟᱦᱟ ᱠᱷᱚᱱ ᱟᱸᱡᱚᱢ ᱦᱮᱡ ᱜᱚᱫᱚᱜᱼᱟ, " ᱡᱚᱱᱚ ᱜᱚᱬᱚ ᱢᱚᱱᱚ ᱚᱫᱷᱤᱱᱟᱭᱚᱠᱚ ᱡᱚᱭᱚ ᱦᱮ ᱵᱷᱟᱨᱚᱛᱚ ᱵᱷᱟᱜᱽᱭᱚ ᱵᱤᱫᱷᱟᱛᱟ " ᱾ ᱤᱱᱟ. ᱛᱟᱭᱚᱢ ᱥᱮᱴᱮᱨ ᱟᱠᱟᱱ ᱢᱟᱨᱟᱝ ᱯᱮᱲᱟ ᱠᱚ ᱯᱷᱩᱨᱜᱟ.ᱞ ᱢᱟᱦᱟᱸ ᱵᱟᱵᱚᱫᱽ ᱜᱟᱞᱚᱪ ᱠᱚ ᱮᱢ ᱵᱟᱲᱟ ᱠᱟᱛᱮ ᱞᱮᱠᱟᱱᱼᱞᱮᱠᱟᱱ ᱠᱟ.ᱢᱤᱦᱚᱨᱟ ᱨᱮ ᱡᱤᱛᱠᱟ.ᱨ ᱟᱠᱟᱱ ᱪᱮᱛᱮᱫᱤᱭᱟ. ᱠᱚ ᱥᱤᱨᱯᱷᱟ. ᱪᱟᱯᱟᱞ ᱦᱩᱭᱩᱜᱼᱟ ᱾

ᱵᱟᱨᱦᱮ ᱡᱚᱱᱚᱲ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

https://en.m.wikipedia.org/wiki/Independence_Day_(India)