ᱱᱮᱦᱟ ᱟᱦᱩᱡᱟ

ᱱᱮᱦᱟ ᱟᱦᱩᱡᱟ (ᱡᱟᱱᱟᱢ ᱥᱮᱯᱴᱮᱢᱵᱚᱨ ᱒᱗, ᱑᱙᱘᱑) ᱫᱚ ᱢᱤᱫ ᱵᱷᱟᱨᱚᱛᱤᱭᱚ ᱢᱟᱨᱮ ᱮᱞᱯᱟᱭᱤᱱ ᱥᱠᱤᱭᱚᱨ ᱠᱟᱱᱟᱭ ᱡᱟᱦᱟᱸᱭ ᱤᱴᱟᱞᱤ ᱨᱮᱱᱟᱜ ᱴᱩᱨᱤᱱᱳ ᱨᱮ ᱦᱩᱭ ᱟᱠᱟᱱ ᱒᱐᱐᱖ ᱣᱤᱱᱴᱟᱨ ᱚᱞᱤᱢᱯᱤᱠᱥ ᱨᱮ ᱵᱷᱟᱨᱚᱛ ᱮ ᱨᱮᱯᱨᱮᱡᱮᱱᱴ ᱞᱮᱫᱟ᱾ ᱟᱦᱩᱡᱟ ᱫᱚ ᱮᱛᱚᱦᱚᱵ ᱟᱨ ᱢᱩᱪᱟᱹᱫ ᱨᱮᱱᱟᱜ ᱥᱮᱨᱮᱢᱚᱱᱤ ᱨᱮ ᱯᱷᱞᱮᱜᱽ ᱵᱮᱭᱨᱟᱨ ᱦᱚᱸᱭ ᱛᱟᱦᱮᱸ ᱠᱟᱱᱟ᱾ ᱩᱱᱤ ᱵᱷᱟᱨᱚᱛ ᱞᱟᱹᱜᱤᱫ ᱥᱠᱤᱭᱤᱝ ᱨᱮ ᱟᱹᱰᱤ ᱜᱟᱱ ᱢᱟᱭᱤᱞᱥᱴᱳᱱ ᱮ ᱧᱟᱢ ᱟᱠᱟᱫᱟ᱾ ᱩᱱᱤ ᱫᱚ ᱣᱤᱱᱴᱟᱨ ᱚᱞᱤᱢᱯᱤᱠᱥ ᱞᱟᱹᱜᱤᱫ ᱠᱣᱟᱞᱤᱯᱷᱟᱭ ᱟᱠᱟᱱ ᱯᱩᱭᱞᱩ ᱵᱷᱟᱨᱚᱛᱤᱭᱚ ᱛᱤᱨᱞᱟᱹ ᱠᱟᱱᱟᱭ᱾ ᱩᱱᱤ ᱚᱞᱤᱢᱯᱤᱠᱥ ᱨᱮ ᱥᱞᱟᱞᱚᱢ ᱟᱨ ᱡᱟᱭᱮᱸᱴ ᱥᱞᱟᱞᱚᱢ ᱵᱟᱱᱟᱨ ᱤᱵᱷᱮᱸᱴ ᱞᱟᱹᱜᱤᱫ ᱠᱣᱟᱞᱤᱯᱷᱟᱭ ᱟᱠᱟᱱ ᱯᱩᱭᱞᱩ ᱛᱤᱨᱞᱟᱹ ᱦᱚᱸ ᱠᱟᱱᱟᱭ᱾ ᱟᱦᱩᱡᱟ ᱫᱚ ᱒᱐᱐᱖ ᱥᱟᱞ ᱨᱮ ᱴᱩᱨᱤᱱ ᱨᱮ ᱦᱩᱭ ᱞᱮᱱ ᱣᱤᱱᱴᱟᱨ ᱚᱞᱤᱢᱯᱤᱠᱥ ᱨᱮ ᱦᱮᱯᱨᱟᱣ ᱟᱠᱟᱱ ᱯᱩᱱᱭᱟᱹ ᱵᱷᱟᱨᱚᱛᱤᱭᱚ ᱠᱚ ᱢᱩᱫᱽ ᱨᱮ ᱢᱤᱫ ᱦᱚᱲ ᱮ ᱛᱟᱦᱮᱸ ᱠᱟᱱᱟ᱾ ᱩᱱᱤ ᱥᱞᱟᱞᱚᱢ (ᱮᱥ.ᱮᱞ) ᱨᱮ ᱕᱑ ᱟᱱᱟᱜ ᱟᱨ ᱡᱟᱭᱮᱸᱴ ᱥᱞᱟᱞᱚᱢ (ᱡᱤ.ᱮᱥ) ᱤᱵᱷᱮᱸᱴ ᱨᱮ ᱔᱒ ᱟᱱᱟᱜ ᱴᱷᱟᱶ ᱮ ᱟᱢᱮᱴ ᱞᱮᱫᱟ᱾ ᱩᱱᱤᱨᱮᱱ ᱢᱟᱨᱟᱝ ᱵᱚᱭᱦᱟ ᱥᱮᱯᱷᱟᱞᱤ ᱟᱦᱩᱡᱟ ᱪᱤᱱ ᱨᱮᱱᱟᱜ ᱦᱟᱨᱵᱤᱱ ᱨᱮ ᱦᱩᱭ ᱟᱠᱟᱱ ᱓ ᱟᱱᱟᱜ ᱣᱤᱱᱴᱟᱨ ᱮᱥᱤᱭᱟᱱ ᱜᱮᱢᱥ ᱨᱮ ᱵᱷᱟᱨᱚᱛ ᱮ ᱨᱮᱯᱨᱮᱡᱮᱱᱴ ᱞᱮᱫᱟ, ᱟᱨ ᱩᱱᱤᱨᱮᱱ ᱦᱩᱰᱤᱧ ᱵᱚᱭᱦᱟ ᱥᱣᱟᱛᱤ ᱟᱦᱩᱡᱟ ᱮᱢ.ᱴᱤ.ᱵᱷᱤ ᱨᱳᱰᱤᱥ ᱨᱮᱱᱟᱜ ᱯᱩᱱ ᱟᱱᱟᱜ ᱥᱤᱡᱚᱱ ᱨᱮ ᱥᱮᱞᱮᱫ ᱞᱮᱱᱟᱭ᱾

ᱮᱛᱚᱦᱚᱵ ᱡᱤᱭᱚᱱ

ᱟᱦᱩᱡᱟ ᱫᱚ ᱱᱟᱣᱟ ᱫᱤᱞᱞᱤ ᱨᱮ ᱟᱱᱤᱛᱟ ᱟᱦᱩᱡᱟ (ᱡᱟᱱᱟᱢ ᱣᱟᱫᱷᱣᱟ) ᱟᱨ ᱠᱳᱢᱰᱴ. ᱮᱥ.ᱯᱤ. ᱟᱦᱩᱡᱟ ᱴᱷᱮᱱ ᱡᱟᱱᱟᱢ ᱞᱮᱱᱟ, ᱡᱟᱦᱟᱸᱭ ᱵᱷᱟᱨᱚᱛᱤᱭᱚ ᱵᱚᱨᱰᱚᱨ ᱥᱤᱠᱭᱩᱨᱤᱴᱤ ᱯᱷᱳᱨᱥ (ᱵᱤ.ᱮᱥ.ᱮᱯᱷ) ᱨᱮᱱ ᱚᱯᱷᱤᱥᱟᱨ ᱮ ᱛᱟᱦᱮᱸ ᱠᱟᱱᱟ᱾ ᱟᱦᱩᱡᱟ ᱨᱮᱱ ᱵᱟᱵᱟ ᱜᱩᱞᱢᱟᱨᱜ ᱨᱮ ᱣᱤᱱᱴᱟᱨ ᱥᱯᱳᱨᱴᱥ ᱨᱮᱱᱤᱡ ᱦᱚᱸ ᱰᱟᱭᱨᱮᱠᱴᱚᱨ ᱮ ᱛᱟᱦᱮᱸ ᱠᱟᱱᱟ ᱟᱨ ᱩᱱᱤ ᱤᱱᱰᱤᱭᱟᱱ ᱤᱱᱥᱴᱤᱴᱭᱩᱴ ᱚᱯᱷ ᱥᱠᱤᱭᱤᱝ ᱮᱸᱰ ᱢᱟᱣᱩᱱᱴᱮᱱᱤᱭᱟᱨᱤᱝ ᱨᱮᱱᱤᱡ ᱯᱨᱤᱱᱥᱤᱯᱟᱞ ᱮ ᱛᱟᱦᱮᱸ ᱠᱟᱱᱟ᱾ ᱯᱩᱱ ᱥᱮᱨᱢᱟ ᱩᱢᱮᱨ ᱨᱮ, ᱟᱦᱩᱡᱟ ᱟᱨ ᱩᱱᱤᱨᱮᱱ ᱜᱷᱟᱨᱚᱸᱡᱽ ᱟᱡ ᱵᱟᱵᱟ ᱟᱜ ᱯᱳᱥᱴᱤᱝ ᱠᱷᱟᱹᱛᱤᱨ ᱠᱟᱥᱢᱤᱨ ᱠᱚ ᱩᱪᱟᱹᱲ ᱮᱱᱟ, ᱟᱨ ᱩᱱ ᱡᱚᱠᱷᱟᱜ ᱜᱮ ᱩᱱᱤ ᱯᱩᱭᱞᱩ ᱫᱷᱟᱣ ᱥᱠᱤᱭᱤᱝ ᱮ ᱪᱮᱫ ᱞᱮᱫᱟ᱾

᱑᱙᱙᱔ ᱥᱟᱞ ᱨᱮ, ᱩᱱᱤ ᱠᱟᱯᱨᱩᱱ, ᱚᱥᱴᱨᱤᱭᱟ ᱨᱮ ᱛᱷᱮᱭᱟᱨ ᱨᱮᱥᱤᱝ ᱠᱞᱟᱵᱽ ᱨᱮ ᱚᱴᱴᱳ ᱥᱟᱸᱴᱱᱟᱨ ᱟᱨ ᱯᱤᱴᱟᱨ ᱥᱟᱸᱴᱱᱟᱨ ᱩᱢᱩᱞ ᱨᱮ ᱵᱟᱨ ᱦᱟᱯᱛᱟ ᱨᱮᱱᱟᱜ ᱴᱨᱮᱱᱤᱝ ᱠᱮᱢᱯ ᱨᱮ ᱥᱮᱞᱮᱫ ᱞᱮᱱᱟ, ᱡᱟᱦᱟᱸ ᱫᱚ ᱩᱱᱤ ᱢᱤᱫ ᱥᱠᱤᱭᱚᱨ ᱞᱮᱠᱟᱛᱮ ᱟᱡᱟᱜ ᱠᱮᱨᱤᱭᱟᱨ ᱫᱚᱦᱚᱭ ᱞᱟᱹᱜᱤᱫ ᱩᱫᱽᱜᱟᱹᱣ ᱮᱢᱟᱫᱮ ᱛᱟᱦᱮᱸᱱᱟ᱾ ᱟᱹᱰᱤ ᱞᱚᱜᱚᱱ ᱛᱟᱭᱚᱢ, ᱩᱱᱤ ᱠᱟᱡᱩᱳ ᱥᱟᱴᱳ ᱩᱢᱩᱞ ᱨᱮ ᱑᱙᱙᱖ ᱡᱩᱱᱤᱭᱚᱨ ᱮᱥᱤᱭᱟᱱ ᱣᱤᱱᱴᱟᱨ ᱜᱮᱢᱥ ᱨᱮ ᱥᱮᱞᱮᱫᱚᱜ ᱞᱟᱹᱜᱤᱫ ᱴᱨᱮᱱᱤᱝ ᱮᱦᱚᱵ ᱠᱮᱫᱟ ᱡᱟᱦᱟᱸ ᱫᱚ ᱡᱟᱯᱟᱱ ᱨᱮ ᱦᱩᱭᱩᱜ ᱠᱟᱱ ᱛᱟᱦᱮᱸᱱᱟ᱾ ᱑᱖ ᱥᱮᱨᱢᱟ ᱩᱢᱮᱨ ᱨᱮ, ᱟᱦᱩᱡᱟ ᱣᱟᱭᱤᱞ, ᱠᱚᱞᱳᱨᱟᱰᱳ ᱮ ᱩᱪᱟᱹᱲ ᱮᱱᱟ ᱟᱨ ᱥᱚᱞᱴ ᱞᱮᱠ ᱥᱤᱴᱤ, ᱭᱩᱴᱟᱦ ᱨᱮ ᱒᱐᱐᱒ ᱣᱤᱱᱴᱟᱨ ᱚᱞᱤᱢᱯᱤᱠᱥ ᱞᱟᱹᱜᱤᱫ ᱣᱟᱭᱤᱞ ᱢᱟᱣᱩᱱᱴᱮᱱ ᱤᱥᱠᱩᱞ ᱨᱮ ᱴᱨᱮᱱᱤᱝ ᱠᱚᱨᱟᱣ ᱠᱮᱫᱟ᱾ ᱚᱱᱟ ᱥᱮᱨᱢᱟ ᱴᱨᱮᱱᱤᱝ ᱚᱠᱛᱚ ᱨᱮ ᱢᱤᱫ ᱡᱟᱝᱜᱟ ᱦᱟᱹᱥᱩ ᱦᱩᱭ ᱛᱟᱭᱚᱢ, ᱩᱱᱤ ᱛᱩᱨᱩᱭ ᱪᱟᱸᱫᱚ ᱫᱷᱟᱹᱵᱤᱡ ᱯᱷᱤᱡᱤᱠᱟᱞ ᱮᱠᱴᱤᱵᱷᱤᱴᱤ ᱵᱟᱭ ᱠᱚᱨᱟᱣ ᱫᱟᱲᱮᱭᱟᱫᱟ᱾ ᱚᱱᱟ ᱠᱷᱟᱹᱛᱤᱨ, ᱩᱱᱤ ᱥᱚᱞᱴ ᱞᱮᱠ ᱥᱤᱴᱤ ᱣᱤᱱᱴᱟᱨ ᱚᱞᱤᱢᱯᱤᱠᱥ ᱨᱮ ᱵᱟᱭ ᱥᱮᱞᱮᱫ ᱫᱟᱲᱮᱭᱟᱫᱟ᱾ ᱢᱤᱫ ᱥᱮᱨᱢᱟ ᱛᱟᱭᱚᱢ, ᱩᱱᱤ ᱣᱤᱱᱴᱟᱨ ᱮᱥᱤᱭᱟᱱ ᱜᱮᱢᱥ (᱒᱐᱐᱓) ᱨᱮ ᱦᱮᱯᱨᱟᱣ ᱠᱮᱫᱟ᱾

ᱛᱟᱭᱚᱢ ᱛᱮ ᱩᱱᱤ ᱒᱐᱐᱖ ᱣᱤᱱᱴᱟᱨ ᱚᱞᱤᱢᱯᱤᱠᱥ ᱞᱟᱹᱜᱤᱫ ᱵᱟᱨᱴᱥᱪ ᱨᱮᱥ ᱮᱠᱟᱰᱮᱢᱤ, ᱯᱤᱴᱡᱟᱞ, ᱚᱥᱴᱨᱤᱭᱟ ᱨᱮ ᱰᱤᱭᱮᱴᱢᱟᱨ ᱛᱷᱳᱱᱤ ᱩᱢᱩᱞ ᱨᱮ ᱴᱨᱮᱱᱤᱝ ᱠᱮᱫᱟ᱾

᱑᱙᱙᱙ ᱥᱟᱞ ᱨᱮ, ᱩᱱᱤ ᱮᱭᱟᱨ ᱯᱷᱳᱨᱥ ᱵᱟᱞ ᱵᱷᱟᱨᱛᱤ ᱠᱷᱚᱱ ᱮ ᱜᱨᱮᱡᱩᱮᱴ ᱮᱱᱟ, ᱟᱨ ᱒᱐᱐᱓ ᱥᱟᱞ ᱨᱮ ᱩᱱᱤ ᱭᱩᱱᱤᱵᱷᱚᱨᱥᱤᱴᱤ ᱚᱯᱷ ᱠᱚᱞᱳᱨᱟᱰᱳ ᱵᱳᱞᱰᱟᱨ ᱠᱷᱚᱱ ᱮ ᱜᱨᱮᱡᱩᱮᱴ ᱮᱱᱟ᱾ ᱱᱚᱣᱟ ᱥᱟᱶᱛᱮ, ᱩᱱᱤ ᱢᱤᱫ ᱦᱮᱯᱨᱟᱣ ᱟᱱ ᱥᱩᱭᱢᱟᱨ ᱦᱚᱸᱭ ᱛᱟᱦᱮᱸ ᱠᱟᱱᱟ ᱟᱨ ᱫᱤᱞᱞᱤ ᱯᱚᱱᱚᱛ ᱛᱷᱚᱠ ᱨᱮᱭ ᱥᱩᱭᱢ ᱞᱮᱫᱟ᱾ ᱩᱱᱤ ᱢᱤᱫ ᱡᱟᱹᱛᱤᱭᱟᱹᱨᱤ ᱛᱷᱚᱠ ᱰᱟᱭᱵᱟᱨ ᱦᱚᱸᱭ ᱛᱟᱦᱮᱸ ᱠᱟᱱᱟ᱾

ᱯᱟᱨᱥᱚᱱᱟᱞ ᱡᱤᱭᱚᱱ

ᱟᱦᱩᱡᱟ ᱨᱮᱱ ᱵᱟᱨᱭᱟ ᱠᱚᱲᱟ ᱢᱮᱱᱟᱜ ᱠᱤᱱᱟ᱾ ᱩᱱᱤ ᱱᱮᱛᱟᱨ ᱢᱤᱫ ᱢᱟᱨᱟᱝ ᱯᱷᱚᱨᱢ ᱨᱮ ᱢᱤᱫ ᱥᱴᱨᱮᱴᱮᱡᱤ ᱠᱚᱱᱥᱟᱞᱴᱮᱸᱴ ᱞᱮᱠᱟᱛᱮ ᱠᱟᱹᱢᱤᱭᱟ᱾ ᱩᱱᱤ ᱱᱮᱛᱟᱨ ᱴᱮᱱᱤᱥ ᱮ ᱠᱷᱮᱞᱟ ᱟᱨ ᱨᱤᱠᱨᱤᱭᱮᱥᱱᱟᱞᱤ ᱥᱠᱤᱭᱤᱝ ᱮ ᱠᱚᱨᱟᱣᱟ᱾