ᱵᱟᱯᱥᱤ ᱥᱤᱫᱷᱣᱟ
ᱵᱟᱯᱥᱤ ᱥᱤᱫᱷᱣᱟ (ᱩᱨᱫᱩ: بیپسی سدھوا; ᱑᱑ ᱚᱜᱚᱥᱴ ᱑᱙᱓᱘ – ᱒᱕ ᱰᱤᱥᱮᱢᱵᱚᱨ ᱒᱐᱒᱔) ᱫᱚ ᱢᱤᱫ ᱯᱟᱠᱤᱥᱛᱟᱱᱤ ᱩᱯᱱᱭᱟᱥ ᱚᱞᱤᱡ ᱮ ᱛᱟᱦᱮᱸ ᱠᱟᱱᱟ ᱡᱟᱦᱟᱸᱭ ᱫᱚ ᱤᱝᱞᱤᱥ ᱛᱮ ᱚᱞ ᱮᱫ ᱛᱟᱦᱮᱸᱱ ᱟᱨ ᱟᱢᱮᱨᱤᱠᱟ ᱨᱮᱱᱟᱜ ᱛᱟᱦᱮᱸᱱ ᱦᱚᱲ ᱮ ᱛᱟᱦᱮᱸ ᱠᱟᱱᱟ᱾
ᱥᱤᱫᱷᱣᱟ ᱫᱚ ᱤᱱᱰᱳ-ᱠᱟᱱᱟᱰᱤᱭᱟᱱ ᱯᱷᱤᱞᱢ ᱵᱮᱱᱟᱣᱤᱡ ᱫᱤᱯᱟ ᱢᱮᱦᱛᱟ ᱥᱟᱶ ᱟᱡᱟᱜ ᱜᱚᱲᱚ ᱠᱟᱹᱢᱤ ᱞᱟᱹᱜᱤᱫ ᱟᱹᱰᱤ ᱵᱟᱰᱟᱭᱚᱜ ᱠᱟᱱ ᱛᱟᱦᱮᱸᱱᱟ: ᱥᱤᱫᱷᱣᱟ ᱫᱚ ᱑᱙᱙᱑ ᱥᱟᱞᱮ ᱨᱮᱱᱟᱜ ᱩᱯᱱᱭᱟᱥ ᱟᱭᱤᱥ ᱠᱮᱱᱰᱤ ᱢᱮᱱ ᱦᱚᱸᱭ ᱚᱞ ᱞᱮᱫᱟ ᱡᱟᱦᱟᱸ ᱫᱚ ᱢᱮᱦᱛᱟ ᱟᱜ ᱑᱙᱙᱘ ᱥᱟᱞᱮ ᱨᱮᱱᱟᱜ ᱯᱷᱤᱞᱢ ᱟᱨᱛᱷ ᱞᱟᱹᱜᱤᱫ ᱵᱮᱥ ᱞᱮᱠᱟᱛᱮ ᱠᱟᱹᱢᱤ ᱞᱮᱫᱟ ᱟᱨ ᱥᱟᱶᱛᱮ ᱒᱐᱐᱖ ᱥᱟᱞᱮ ᱨᱮᱱᱟᱜ ᱩᱯᱱᱭᱟᱥ ᱣᱟᱴᱚᱨ: ᱮ ᱱᱳᱵᱮᱞ, ᱡᱟᱦᱟᱸ ᱨᱮ ᱢᱮᱦᱛᱟ ᱟᱜ ᱒᱐᱐᱕ ᱥᱟᱞᱮ ᱨᱮᱱᱟᱜ ᱯᱷᱤᱞᱢ ᱣᱟᱴᱚᱨ ᱵᱮᱥ ᱟᱠᱟᱱᱟ᱾ ᱥᱤᱫᱷᱣᱟ ᱟᱜ ᱡᱤᱭᱚᱱ ᱵᱟᱵᱚᱛ ᱛᱮ ᱢᱤᱫ ᱰᱳᱠᱩᱢᱮᱱᱴᱟᱨᱤ ᱡᱟᱦᱟᱸ ᱫᱚ "ᱵᱟᱯᱥᱤ: ᱥᱟᱭᱤᱞᱮᱱᱥ ᱚᱯᱷ ᱢᱟᱭ ᱞᱟᱭᱤᱯᱷ" ᱧᱩᱛᱩᱢ ᱛᱮ ᱯᱟᱠᱤᱥᱛᱟᱱ ᱨᱮᱱᱟᱜ "ᱫᱟ ᱥᱤᱴᱤᱡᱚᱱᱥ ᱟᱨᱠᱟᱭᱤᱵᱷ ᱚᱯᱷ ᱯᱟᱠᱤᱥᱛᱟᱱ" ᱨᱮᱱᱟᱜ ᱚᱯᱷᱤᱥᱤᱭᱟᱞ ᱭᱩᱴᱭᱩᱵ ᱪᱮᱱᱮᱞ ᱨᱮ ᱒᱘ ᱚᱠᱴᱚᱵᱚᱨ ᱒᱐᱒᱒ ᱥᱟᱞᱮᱨᱮ "ᱯᱷᱟᱥᱴ ᱡᱮᱱᱮᱨᱮᱥᱚᱱ - ᱥᱴᱳᱨᱤᱡᱽ ᱚᱯᱷ ᱯᱟᱨᱴᱤᱥᱚᱱ: ᱵᱟᱯᱥᱤ ᱥᱤᱫᱷᱣᱟ" ᱧᱩᱛᱩᱢ ᱛᱮ ᱩᱪᱷᱟᱹᱱ ᱦᱩᱭ ᱞᱮᱱᱟ᱾[᱑][᱒]
ᱵᱮᱠᱜᱨᱟᱣᱩᱱᱰ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱥᱤᱫᱷᱣᱟ ᱫᱚ ᱯᱟᱨᱥᱤ ᱡᱳᱨᱳᱣᱟᱥᱴᱨᱤᱭᱚᱱ ᱟᱭᱳ ᱵᱟᱵᱟ ᱯᱮᱥᱳᱴᱟᱱ ᱟᱨ ᱛᱮᱦᱢᱤᱱᱟ ᱵᱷᱚᱱᱰᱟᱨᱟ ᱴᱷᱮᱱ ᱠᱟᱨᱟᱪᱤ, ᱵᱳᱢᱵᱮ ᱯᱨᱮᱥᱤᱰᱮᱱᱥᱤ ᱨᱮ ᱡᱟᱱᱟᱢ ᱞᱮᱱᱟ᱾ ᱩᱱᱤ ᱫᱚ ᱜᱩᱡᱽᱨᱟᱛᱤ ᱯᱟᱨᱥᱤ ᱡᱳᱨᱳᱣᱟᱥᱴᱨᱤᱭᱚᱱ ᱨᱤᱱᱤᱡ ᱟᱹᱜᱤᱞ ᱦᱟᱯᱲᱟᱢ ᱠᱟᱱᱟᱭ᱾[᱓]
ᱟᱡᱟᱜ ᱡᱟᱱᱟᱢ ᱠᱷᱚᱱ ᱯᱮ ᱪᱟᱸᱫᱚ ᱛᱟᱭᱚᱢ ᱩᱱᱤ ᱫᱚ ᱟᱡᱟᱜ ᱜᱷᱟᱨᱚᱸᱡᱽ ᱥᱟᱶ ᱞᱟᱦᱚᱨ, ᱯᱟᱧᱡᱟᱵᱽ ᱯᱨᱚᱵᱷᱤᱱᱥ ᱮ ᱪᱟᱞᱟᱣ ᱮᱱᱟ᱾ ᱩᱱᱤ ᱫᱚ ᱵᱟᱨ ᱥᱮᱨᱢᱟ ᱨᱤᱱᱤᱡ ᱮ ᱛᱟᱦᱮᱸ ᱠᱟᱱᱟ ᱡᱚᱠᱷᱚᱱ ᱩᱱᱤ ᱫᱚ ᱯᱳᱞᱤᱭᱳ ᱧᱟᱢ ᱠᱮᱫᱮᱭᱟ, ᱱᱟᱶᱟ ᱠᱟᱹᱴᱤᱡ ᱩᱢᱮᱨ ᱨᱮ ᱦᱟᱢᱟᱞ ᱥᱚᱨᱡᱚᱨᱤ ᱨᱮᱱᱟᱜ ᱞᱟᱹᱠᱛᱤ ᱛᱟᱦᱮᱸ ᱠᱟᱱᱟ ᱟᱨ ᱟᱡᱟᱜ ᱡᱤᱭᱚᱱ ᱵᱷᱩᱨ ᱪᱷᱟᱯᱟ ᱫᱚᱦᱚ ᱠᱮᱫᱟ᱾
ᱥᱤᱫᱷᱣᱟ ᱦᱟᱹᱴᱤᱧ ᱚᱠᱛᱚ ᱨᱮ ᱵᱚᱛᱚᱨᱟᱱ ᱜᱷᱚᱴᱱᱟ ᱠᱷᱚᱱ ᱯᱟᱨᱚᱢ ᱦᱩᱭ ᱠᱟᱛᱮ ᱦᱟᱨᱟ ᱮᱱᱟ, ᱩᱱᱤ ᱫᱚ ᱱᱚᱝᱠᱟᱱ ᱟᱹᱭᱠᱟᱹᱣ ᱠᱚᱭ ᱵᱮᱱᱟᱣ ᱠᱮᱫᱟ ᱡᱟᱦᱟᱸ ᱫᱚ ᱫᱟᱨᱟᱭ ᱠᱟᱱ ᱚᱠᱛᱚ ᱨᱮ ᱟᱡᱟᱜ ᱚᱞ ᱨᱩᱯ ᱮ ᱮᱢᱟᱫᱮᱭᱟ᱾ ᱡᱮᱞᱮᱠᱟ ᱢᱤᱫ ᱡᱩᱣᱟᱹᱱ ᱥᱤᱫᱷᱣᱟ ᱫᱚ ᱦᱟᱹᱴᱤᱧ ᱢᱟᱬᱟᱝ ᱠᱤᱪᱷᱩ ᱪᱟᱸᱫᱚ ᱞᱟᱦᱟ ᱟᱡᱤᱡ ᱵᱟᱜᱟᱱ ᱠᱟᱹᱢᱤᱭᱟᱹ ᱥᱟᱶ ᱮ ᱪᱟᱞᱟᱜ ᱠᱟᱱ ᱛᱟᱦᱮᱸᱱᱟ ᱡᱚᱠᱷᱚᱱ ᱩᱱᱠᱩ ᱫᱚ ᱢᱤᱫ ᱜᱩᱱᱤ ᱵᱳᱨᱟ ᱠᱚ ᱧᱟᱢ ᱠᱮᱫᱟ, ᱡᱟᱦᱟᱸ ᱨᱮ ᱢᱤᱫ ᱡᱩᱣᱟᱹᱱ ᱦᱚᱲ ᱟᱜ ᱜᱚᱡ ᱦᱚᱲᱢᱚ ᱩᱠᱩ ᱫᱚᱦᱚ ᱟᱠᱟᱱ ᱛᱟᱦᱮᱸᱱᱟ᱾ ᱵᱤᱥᱮᱥ ᱠᱟᱛᱮ ᱱᱚᱣᱟ ᱟᱹᱭᱠᱟᱹᱣ ᱟᱡᱟᱜ ᱩᱯᱱᱭᱟᱥ ᱠᱨᱮᱠᱤᱝ ᱤᱱᱰᱤᱭᱟ ᱨᱮ ᱩᱫᱩᱜ ᱥᱚᱫᱚᱨ ᱟᱠᱟᱱᱟ, ᱚᱱᱟ ᱥᱟᱶᱛᱮ ᱢᱮᱦᱛᱟ ᱟᱜ ᱟᱨᱛᱷ ᱨᱮ ᱦᱚᱸ ᱥᱚᱫᱚᱨ ᱟᱠᱟᱱᱟ᱾ ᱥᱤᱫᱷᱣᱟ ᱦᱟᱹᱴᱤᱧ ᱠᱷᱚᱱ ᱯᱟᱨᱚᱢ ᱠᱟᱛᱮ ᱟᱡᱟᱜ ᱛᱟᱦᱮᱸᱱ ᱨᱮᱱᱟᱜ ᱟᱹᱭᱠᱟᱹᱣ ᱫᱚ ᱩᱯᱱᱭᱟᱥ ᱞᱟᱹᱜᱤᱫ ᱢᱤᱫ ᱵᱮᱠᱜᱨᱟᱣᱩᱱᱰ ᱞᱮᱠᱟᱛᱮ ᱟᱨ ᱢᱩᱬᱩᱛ ᱪᱟᱨᱤᱛᱨᱚ ᱞᱮᱱᱤ ᱵᱮᱱᱟᱣ ᱞᱟᱹᱜᱤᱫ ᱮ ᱵᱮᱵᱷᱟᱨ ᱟᱠᱟᱫᱟ᱾
ᱥᱤᱫᱷᱣᱟ ᱫᱚ ᱑᱙᱕᱗ ᱥᱟᱞᱮᱨᱮ ᱞᱟᱦᱚᱨ, ᱯᱟᱠᱤᱥᱛᱟᱱ ᱨᱮ ᱠᱤᱱᱮᱭᱨᱰ ᱠᱚᱞᱮᱡᱽ ᱯᱷᱳᱨ ᱣᱩᱢᱮᱱ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱠᱷᱚᱱ ᱟᱡᱟᱜ ᱵᱤᱮ ᱮ ᱧᱟᱢ ᱠᱮᱫᱟ᱾ ᱜᱨᱮᱡᱩᱣᱮᱴ ᱛᱟᱭᱚᱢ ᱜᱮ ᱩᱱᱤ ᱫᱚ ᱑᱙ ᱥᱮᱨᱢᱟ ᱩᱢᱮᱨ ᱨᱮ ᱵᱟᱯᱞᱟ ᱮᱱᱟ ᱟᱨ ᱵᱳᱢᱵᱮ ᱮ ᱪᱟᱞᱟᱣ ᱮᱱᱟ, ᱢᱤᱫ ᱥᱤᱱ ᱵᱚᱫᱚᱞ ᱡᱟᱦᱟᱸ ᱫᱚ ᱩᱱᱤ ᱫᱚ ᱮᱛᱚᱦᱚᱵ ᱨᱮ ᱢᱤᱫ ᱟᱪᱚᱢᱠᱟ ᱜᱮ ᱵᱩᱡᱷᱟᱹᱣ ᱮᱱᱟ ᱡᱟᱦᱟᱸ ᱫᱚ ᱟᱨ ᱢᱤᱫ ᱡᱳᱨᱳᱣᱟᱥᱴᱨᱤᱭᱚᱱ ᱠᱚ ᱥᱟᱶᱛᱮ ᱠᱟᱹᱢᱤ ᱨᱮ ᱥᱮᱞᱮᱫ ᱠᱟᱛᱮ ᱱᱟᱥᱮ ᱠᱚᱢ ᱫᱚᱦᱚ ᱠᱮᱫᱟ᱾ ᱥᱤᱫᱷᱣᱟ ᱨᱤᱱ ᱢᱤᱫ ᱠᱩᱲᱤ ᱟᱨ ᱢᱤᱫ ᱠᱚᱲᱟ ᱜᱤᱫᱽᱨᱟᱹ ᱠᱤᱱ ᱛᱟᱦᱮᱸ ᱠᱟᱱᱟ, ᱢᱮᱱᱠᱷᱟᱱ ᱩᱱᱤᱭᱟᱜ ᱵᱟᱯᱞᱟ ᱫᱚ ᱢᱚᱬᱮ ᱥᱮᱨᱢᱟ ᱛᱟᱭᱚᱢ ᱢᱩᱪᱟᱹᱫ ᱮᱱᱟ, ᱟᱨ ᱩᱱᱤ ᱫᱚ ᱫᱩᱦᱲᱟᱹ ᱞᱟᱦᱚᱨ ᱮ ᱨᱩᱣᱟᱹᱲ ᱮᱱᱟ᱾ ᱟᱡᱤᱡ ᱠᱚᱲᱟ ᱫᱚ ᱟᱡ ᱵᱟᱵᱟ ᱦᱟᱜ ᱜᱷᱟᱨᱚᱸᱡᱽ ᱥᱟᱶ ᱢᱩᱢᱵᱟᱭ ᱨᱮ ᱜᱮ ᱛᱟᱦᱮᱸ ᱮᱱᱟ, ᱟᱨ ᱥᱤᱫᱷᱣᱟ ᱫᱚ ᱥᱤᱢᱟ ᱨᱮᱱᱟᱜ ᱵᱟᱹᱲᱛᱤ ᱥᱚᱠᱛᱤ ᱠᱷᱟᱹᱛᱤᱨ ᱩᱱᱤ ᱧᱮᱞ ᱵᱟᱭ ᱧᱟᱢ ᱞᱮᱫᱮᱭᱟ᱾
ᱥᱤᱫᱷᱣᱟ ᱫᱚ ᱢᱩᱪᱟᱹᱫ ᱨᱮ ᱞᱟᱦᱚᱨ ᱨᱮ ᱟᱡᱤᱡ ᱡᱟᱶᱟᱭ ᱱᱳᱥᱦᱤᱨ ᱥᱟᱶ ᱫᱩᱦᱲᱟᱹ ᱵᱟᱯᱞᱟ ᱮᱱᱟ, ᱡᱟᱦᱟᱸᱭ ᱫᱚ ᱢᱤᱫ ᱡᱳᱨᱳᱣᱟᱥᱴᱨᱤᱭᱚᱱ ᱦᱚᱸ ᱠᱟᱱᱟᱭ᱾ ᱩᱱᱤ ᱫᱚ ᱯᱮᱭᱟ ᱵᱟᱹᱲᱛᱤ ᱜᱤᱫᱽᱨᱟᱹ ᱠᱚ ᱦᱩᱭ ᱮᱱ ᱛᱟᱭᱟ ᱟᱨ ᱢᱤᱫ ᱚᱱᱚᱞᱤᱭᱟᱹ ᱞᱮᱠᱟᱛᱮ ᱟᱡᱟᱜ ᱠᱟᱹᱢᱤ ᱮ ᱮᱛᱚᱦᱚᱵ ᱠᱮᱫᱟ᱾ ᱟᱡ ᱨᱤᱱ ᱜᱤᱫᱽᱨᱟᱹ ᱠᱷᱚᱱ ᱢᱤᱫ ᱦᱚᱲ ᱢᱳᱦᱩᱨ ᱥᱤᱫᱷᱣᱟ ᱫᱚ ᱮᱨᱤᱡᱳᱱᱟ ᱨᱮ ᱯᱚᱱᱚᱛ ᱨᱤᱯᱨᱮᱡᱮᱱᱴᱮᱴᱤᱵᱷ ᱞᱟᱹᱜᱤᱫ ᱢᱤᱫ ᱠᱟᱱᱰᱤᱰᱮᱴ ᱠᱟᱱᱟᱭ᱾
ᱩᱱᱤ ᱫᱚ ᱭᱩᱮᱥ ᱨᱮ ᱦᱭᱩᱥᱴᱳᱱ ᱨᱮ ᱛᱟᱦᱮᱸᱱ ᱠᱟᱱ ᱛᱟᱦᱮᱸᱱᱟ᱾ ᱩᱱᱤ ᱫᱚ ᱟᱡ ᱛᱮ ᱢᱤᱫ "ᱯᱟᱧᱡᱟᱵᱤ-ᱯᱟᱨᱥᱤ" ᱞᱮᱠᱟᱛᱮ ᱵᱚᱨᱱᱚᱱ ᱟᱠᱟᱫᱟ᱾ ᱟᱡᱟᱜ ᱯᱩᱭᱞᱩ ᱯᱟᱹᱨᱥᱤ ᱫᱚ ᱜᱩᱡᱽᱨᱟᱛᱤ ᱛᱟᱦᱮᱸ ᱠᱟᱱᱟ, ᱟᱡᱟᱜ ᱫᱚᱥᱟᱨ ᱯᱟᱹᱨᱥᱤ ᱫᱚ ᱩᱨᱫᱩ ᱛᱟᱦᱮᱸ ᱠᱟᱱᱟ, ᱟᱨ ᱟᱡᱟᱜ ᱛᱮᱥᱟᱨ ᱯᱟᱹᱨᱥᱤ ᱫᱚ ᱤᱝᱞᱤᱥ ᱛᱟᱦᱮᱸ ᱠᱟᱱᱟ᱾ ᱩᱱᱤ ᱫᱚ ᱤᱝᱞᱤᱥ ᱛᱮ ᱵᱷᱟᱹᱜᱤ ᱞᱮᱠᱟᱛᱮ ᱚᱞ ᱟᱨ ᱯᱟᱲᱦᱟᱣ ᱫᱟᱲᱮᱭᱟᱜ ᱠᱟᱱ ᱛᱟᱦᱮᱸᱱᱟ, ᱢᱮᱱᱠᱷᱟᱱ ᱩᱱᱤ ᱫᱚ ᱜᱩᱡᱽᱨᱟᱛᱤ ᱥᱮ ᱩᱨᱫᱩ ᱛᱮ ᱠᱟᱛᱷᱟ ᱨᱮ ᱱᱟᱥᱮ ᱵᱷᱟᱹᱜᱤ ᱵᱩᱡᱷᱟᱹᱣᱮᱫ ᱛᱟᱦᱮᱸᱱᱟ ᱟᱨ ᱟᱭᱢᱟ ᱚᱠᱛᱚ ᱨᱮ ᱜᱩᱡᱽᱨᱟᱛᱤ ᱥᱮ ᱩᱨᱫᱩ ᱠᱷᱚᱱ ᱤᱝᱞᱤᱥ ᱛᱮ ᱞᱤᱴᱨᱟᱞᱤ ᱛᱚᱨᱡᱚᱢᱟᱭᱮᱫ ᱛᱟᱦᱮᱸᱱᱟ᱾
ᱥᱤᱫᱷᱣᱟ ᱫᱚ ᱒᱕ ᱰᱤᱥᱮᱢᱵᱚᱨ ᱒᱐᱒᱔ ᱥᱟᱞᱮᱨᱮ ᱦᱭᱩᱥᱴᱳᱱ, ᱴᱮᱠᱥᱟᱥ ᱨᱮ ᱘᱖ ᱥᱮᱨᱢᱟ ᱩᱢᱮᱨ ᱨᱮ ᱜᱩᱨ ᱮᱱᱟ᱾[᱔]
ᱪᱮᱪᱮᱫ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱦᱟᱨᱵᱟᱨᱰ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮ ᱢᱤᱫ ᱯᱷᱮᱞᱳᱥᱤᱯ ᱨᱮ ᱥᱮᱞᱮᱫ ᱠᱟᱛᱮ ᱥᱤᱫᱷᱣᱟ ᱫᱚ ᱠᱳᱞᱚᱢᱵᱤᱭᱟ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮ ᱟᱡᱟᱜ ᱯᱩᱭᱞᱩ ᱪᱮᱪᱮᱫ ᱠᱟᱹᱢᱤᱭᱮ ᱮᱛᱚᱦᱚᱵ ᱠᱮᱫᱟ᱾ ᱜᱨᱮᱡᱩᱣᱮᱴ ᱪᱟᱹᱨᱪᱟᱹ ᱠᱚ ᱚᱞ ᱪᱮᱫ ᱠᱟᱛᱮ ᱥᱤᱫᱷᱣᱟ ᱫᱚ ᱮᱛᱚᱦᱚᱵ ᱨᱮ ᱟᱹᱭᱠᱟᱹᱣ ᱠᱮᱫᱟ ᱡᱮ ᱠᱟᱹᱢᱤ ᱨᱮ ᱵᱟᱝ ᱛᱟᱦᱮᱸ ᱠᱷᱟᱹᱛᱤᱨ ᱪᱮᱪᱮᱫ ᱮᱫ ᱟᱭ ᱟᱭᱢᱟ ᱚᱠᱛᱚ ᱨᱮ ᱟᱡᱟᱜ ᱞᱮᱠᱪᱟᱨ ᱢᱟᱬᱟᱝ ᱵᱚᱛᱚᱨ ᱦᱚᱸᱭ ᱟᱹᱭᱠᱟᱹᱣᱮᱫ ᱛᱟᱦᱮᱸᱱᱟ᱾
ᱥᱤᱫᱷᱣᱟ ᱫᱚ ᱢᱤᱫ ᱮᱠᱮᱰᱮᱢᱤᱠ ᱴᱟᱨᱢ ᱛᱟᱭᱚᱢ ᱠᱳᱞᱚᱢᱵᱤᱭᱟ ᱮ ᱵᱟᱹᱜᱤ ᱠᱮᱫᱟ ᱟᱨ ᱦᱭᱩᱥᱴᱳᱱ ᱨᱮ ᱛᱟᱦᱮᱸ ᱮᱛᱚᱦᱚᱵ ᱠᱮᱫᱟ, ᱢᱩᱪᱟᱹᱫ ᱨᱮ ᱨᱟᱭᱤᱥ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮᱱᱟᱜ ᱥᱠᱩᱞ ᱚᱯᱷ ᱠᱚᱱᱴᱤᱱᱭᱩᱤᱝ ᱥᱴᱟᱰᱤᱡᱽ ᱨᱮ ᱪᱮᱪᱮᱫ ᱢᱟᱬᱟᱝ ᱥᱮᱱᱴ ᱛᱳᱢᱟᱥ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮᱭ ᱪᱮᱪᱮᱫ ᱠᱮᱫᱟ᱾ ᱥᱤᱫᱷᱣᱟ ᱫᱚ ᱦᱭᱩᱥᱴᱳᱱ ᱡᱮᱜᱮᱛ ᱵᱤᱨᱫᱟᱹᱜᱟᱲ, ᱢᱟᱣᱩᱱᱴ ᱦᱳᱞᱤᱳᱠ ᱠᱚᱞᱮᱡᱽ, ᱟᱨ ᱵᱨᱟᱱᱰᱟᱭᱤᱥ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮ ᱦᱚᱸᱭ ᱪᱮᱪᱮᱫ ᱟᱠᱟᱫᱟ᱾
ᱥᱟᱹᱠᱷᱭᱟᱹᱛ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]- ↑ "Bapsi Sidhwa (profile)". ExploreTheirStories.org website. Retrieved 3 November 2021.
- ↑ Shashi Tharoor (6 October 1991). "Life With Electric-aunt and Slavesister (A review of Bapsi Sidhwa's book)". The New York Times. Retrieved 3 November 2021.
- ↑ Sharma, Pranay (2 June 2014). "Those Nights In Nairobi". Outlook (India magazine). Retrieved 3 November 2021.
- ↑ Renowned author Bapsi Sidhwa is no more
ᱵᱟᱦᱨᱮ ᱡᱚᱱᱚᱲ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]- Literary Encyclopedia
- Bapsi Sidhwa (ᱤᱱᱴᱚᱨᱱᱮᱴ ᱢᱩᱵᱷᱤ ᱰᱟᱴᱟᱵᱮᱥ ᱨᱮ)
- Sense of the City: Lahore (BBC Online article by Bapsi Sidhwa