ᱵᱟᱰᱷᱟ ᱵᱮᱥᱨᱟ
| ᱵᱟᱰᱷᱟ ᱵᱮᱥᱨᱟ | |
|---|---|
 ᱵᱟᱰᱷᱟ ᱵᱮᱥᱨᱟ | |
| ᱡᱟᱱᱟᱢ ᱧᱩᱛᱩᱢ ᱡᱟᱱᱟᱢ ᱢᱟᱹᱦᱤᱛ ᱟᱨ ᱡᱟᱱᱟᱢ ᱴᱷᱟᱶ | ᱑ ᱯᱷᱮᱵᱽᱣᱟᱨᱤ ᱑᱙᱒᱔ ᱪᱚᱱᱰᱤᱫᱟ, ᱠᱩᱢᱩᱫᱟᱥᱳᱞ, ᱢᱚᱭᱩᱨᱵᱷᱚᱸᱡᱽ ᱦᱚᱱᱚᱛ |
| ᱠᱟᱹᱢᱤ | ᱚᱱᱚᱞᱤᱭᱟᱹ, ᱥᱟᱶᱛᱟ ᱠᱟᱹᱢᱤᱭᱟᱹ |
| ᱧᱩᱢᱦᱟᱞᱟᱝ ᱠᱟᱹᱢᱤ | 'ᱪᱟᱹᱥᱤ ᱨᱩᱢᱩᱞ', 'ᱵᱷᱚᱸᱡᱽ ᱟᱲᱟᱝ ᱮᱛᱠᱟ ᱯᱚᱴᱚᱢ', 'ᱦᱚᱲ ᱦᱚᱯᱚᱱ', 'ᱛᱤᱞᱠᱟᱹ ᱢᱟᱡᱷᱤ' |
ᱵᱟᱰᱷᱟ ᱵᱮᱥᱨᱟ. ᱫᱚ ᱥᱟᱱᱛᱟᱲ ᱥᱟᱶᱛᱟ ᱟᱨ ᱟᱹᱨᱤᱪᱟᱹᱞᱤ ᱨᱮᱱ ᱜᱟᱹᱠᱷᱩᱲᱤᱭᱟᱹ ᱟᱨ ᱚᱱᱚᱞᱤᱭᱟᱹ ᱛᱟᱦᱮ ᱠᱟᱱᱟᱭ᱾ ᱑᱙᱒᱔ ᱥᱮᱨᱢᱟ ᱨᱮᱭᱟᱜ ᱑ ᱯᱷᱮᱵᱽᱣᱟᱨᱤ ᱦᱤᱞᱳᱜ ᱩᱱᱤ ᱫᱚ ᱳᱰᱤᱥᱟ ᱨᱮᱭᱟᱜ ᱢᱚᱭᱩᱨᱵᱷᱚᱸᱡᱽ ᱦᱚᱱᱚᱛ ᱨᱮᱱᱟᱜ ᱠᱩᱢᱩᱫᱟᱥᱳᱞ ᱰᱟᱠ ᱚᱲᱟᱜ ᱛᱟᱹᱨᱤ ᱨᱮ ᱢᱮᱱᱟᱜ ᱪᱚᱱᱰᱤᱫᱟ ᱟᱛᱳ ᱨᱮᱭ ᱡᱟᱱᱟᱢ ᱞᱮᱱᱟ᱾ ᱟᱯᱟᱛ ᱧᱩᱛᱩᱢ ᱫᱚ ᱫᱷᱟᱥᱩ ᱵᱮᱥᱨᱟ ᱟᱨ ᱟᱭᱳ ᱫᱚ ᱢᱟᱞᱦᱟ ᱵᱮᱥᱨᱟ᱾
ᱚᱞᱚᱜ ᱯᱟᱲᱦᱟᱣ ᱟᱨ ᱠᱟᱹᱢᱤ ᱡᱤᱭᱚᱱ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱟᱛᱳ ᱟᱥᱲᱟ ᱠᱷᱚᱱ ᱟᱡᱟᱜ ᱮᱛᱚᱦᱚᱵ ᱥᱮᱪᱮᱫ ᱫᱚ ᱮᱦᱚᱵ ᱟᱠᱟᱱ ᱛᱟᱭᱟ᱾ ᱚᱱᱟ ᱛᱟᱭᱚᱢ ᱨᱟᱭᱨᱚᱝᱯᱩᱨ ᱨᱮᱭᱟᱜ ᱮᱢ.ᱤ ᱟᱥᱲᱟ ᱠᱷᱚᱱ ᱑᱙᱓᱗ ᱥᱮᱨᱢᱟ ᱨᱮ ᱮᱢ.ᱤ ᱯᱟᱥ ᱞᱮᱫᱟᱭ᱾
ᱟᱡᱟᱜ ᱠᱟᱹᱢᱤ ᱡᱤᱭᱚᱱ ᱫᱚ ᱨᱟᱭᱨᱚᱝᱯᱩᱨ ᱠᱳᱴ ᱨᱮ ᱮᱦᱚᱵ ᱞᱮᱱᱟ᱾ ᱚᱸᱰᱮ ᱜᱮ ᱩᱱᱤ ᱫᱚ 'ᱯᱤᱴᱤᱥᱟ. ᱚᱱᱚᱞᱤᱭᱟᱹ' ᱞᱮᱠᱟᱛᱮᱭ ᱠᱟᱹᱢᱤ ᱟᱠᱟᱫᱟ᱾
ᱥᱟᱶᱛᱟ ᱠᱟᱹᱢᱤ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱨᱮᱱ ᱯᱟᱸᱡᱟᱭᱤᱡ ᱵᱟᱰᱷᱟ ᱵᱮᱥᱨᱟ ᱫᱚ ᱜᱩᱸᱰᱩᱨᱤᱭᱟᱹ ᱦᱩᱞ ᱥᱩᱨ ᱠᱷᱚᱱᱮ ᱧᱮᱞ ᱞᱮᱫ ᱛᱮ ᱟᱯᱱᱟᱨ ᱡᱟᱹᱛᱤ ᱟᱨ ᱯᱟᱹᱨᱥᱤ ᱪᱮᱛᱟᱱ ᱫᱩᱞᱟᱹᱲ ᱥᱟᱨᱥᱟᱣ ᱞᱮᱱ ᱛᱟᱭᱟ᱾ ᱩᱱᱤᱭ ᱵᱮᱡᱷᱟᱹᱣ ᱧᱟᱢ ᱞᱮᱫᱟ ᱡᱮ ᱥᱟᱱᱟᱛᱟᱲ ᱥᱟᱶᱛᱟ ᱵᱟᱧᱪᱟᱣ ᱫᱚᱦᱚ ᱞᱟᱹᱜᱤᱫ ᱛᱮᱫᱚ ᱥᱟᱶᱛᱟ ᱵᱟᱵᱮᱨ ᱠᱮᱴᱮᱡ ᱞᱟᱹᱠᱛᱤ ᱠᱟᱱᱟ ᱟᱨ ᱚᱱᱟ ᱞᱟᱹᱜᱤᱫ ᱛᱮ ᱟᱯᱱᱟᱨᱟᱜ ᱟᱹᱨᱤᱪᱟᱹᱞᱤ ᱥᱟᱱᱟᱢ ᱠᱚ ᱥᱟᱢᱟᱝ ᱥᱚᱫᱚᱨ ᱨᱮ ᱟᱹᱜᱩ ᱦᱩᱭᱩᱜᱼᱟ᱾ ᱱᱚᱣᱟ ᱦᱩᱫᱤᱥ ᱠᱟᱛᱮ ᱜᱮ ᱩᱱᱤ ᱫᱚ ᱡᱤᱭᱚᱱ ᱵᱷᱩᱨ ᱮ ᱠᱟᱹᱢᱤ ᱟᱠᱟᱫᱟ᱾
ᱥᱟᱶᱦᱮᱫ ᱪᱟᱨᱪᱟ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱡᱩᱣᱟᱹᱱ ᱩᱢᱮᱨ ᱠᱷᱚᱱ ᱜᱮ ᱩᱱᱤ ᱫᱚ ᱥᱟᱶᱦᱮᱫ ᱠᱟᱹᱢᱤ ᱨᱮᱭ ᱪᱷᱩᱴᱟᱹᱣ ᱞᱮᱱᱟ᱾ ᱩᱱᱼᱚᱠᱛᱚ ᱳᱰᱤᱭᱟ ᱪᱤᱠᱤ ᱛᱮᱦᱚᱸ ᱥᱟᱱᱛᱟᱲᱤ ᱯᱟᱛᱷᱟ ᱠᱚ ᱵᱟᱝ ᱛᱟᱦᱮ ᱠᱟᱱᱟ ᱟᱨ ᱚᱞ ᱪᱤᱠᱤ ᱨᱮᱭᱟᱜ ᱦᱚᱸ ᱩᱱᱟᱹᱜ ᱪᱚᱞ ᱵᱟᱝ ᱛᱟᱦᱮ ᱠᱟᱱᱟ, ᱚᱱᱟᱛᱮ ᱮᱴᱟᱜ ᱠᱚ ᱞᱮᱠᱟ ᱵᱟᱰᱷᱟ ᱵᱮᱥᱨᱟ ᱦᱚᱸ ᱛᱤ ᱛᱮ ᱚᱞ ᱠᱟᱛᱮ ᱮ ᱫᱚᱦᱚ ᱟᱠᱟᱫ ᱛᱟᱦᱮᱱᱟ᱾ ᱟᱡᱟᱜ ᱢᱤᱫᱼᱵᱟᱨ ᱚᱞ ᱠᱚ ᱥᱟᱜᱮᱱ ᱥᱟᱠᱟᱢ, ᱵᱷᱚᱸᱡᱽ ᱯᱚᱨᱟᱭᱱᱤ, ᱫᱩᱛ ᱞᱮᱠᱟᱱ ᱯᱟᱛᱷᱟᱢ ᱨᱮ ᱪᱷᱟᱯᱟ ᱟᱠᱟᱱ ᱛᱟᱭᱟ᱾
ᱚᱞ ᱯᱩᱛᱷᱤ ᱠᱚ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]- ᱪᱟᱹᱥᱤ ᱨᱩᱢᱩᱞ - ᱑᱙᱕᱔
- ᱵᱷᱚᱸᱡᱽ ᱟᱲᱟᱝ ᱮᱛᱠᱟ ᱯᱚᱴᱚᱢ - ᱑᱙᱕᱘
- ᱦᱚᱲ ᱦᱚᱯᱚᱱ - ᱑᱙᱗᱘ (ᱥᱟᱶᱛᱟ ᱵᱟᱵᱚᱛ ᱯᱩᱛᱷᱤ)
- ᱛᱤᱞᱠᱟᱹ ᱢᱟᱺᱡᱷᱤ - ᱑᱙᱗᱘