ᱵᱤᱞᱠᱤᱥ ᱠᱷᱟᱱᱩᱢ
ᱵᱤᱞᱠᱤᱥ ᱠᱷᱟᱱᱩᱢ (ᱩᱨᱫᱩ: بلقیس خانم; ᱒᱕ ᱰᱤᱥᱮᱢᱵᱚᱨ ᱑᱙᱔᱘ – ᱒᱑ ᱰᱤᱥᱮᱢᱵᱚᱨ ᱒᱐᱒᱒) ᱫᱚ ᱢᱤᱫ ᱯᱟᱠᱤᱥᱛᱟᱱᱤ ᱠᱞᱟᱥᱤᱠᱟᱞ ᱥᱮᱨᱮᱧ ᱨᱤᱱᱤᱡ ᱥᱮᱨᱮᱧᱤᱭᱟᱹ ᱮ ᱛᱟᱦᱮᱸ ᱠᱟᱱᱟ᱾ ᱩᱱᱤ ᱫᱚ "ᱠᱩᱪᱷ ᱫᱤᱱ ᱛᱳ ᱵᱟᱥᱳ ᱢᱮᱨᱤ ᱟᱸᱠᱷᱳᱸ ᱢᱮᱸ", "ᱟᱱᱳᱠᱷᱟ ᱞᱟᱰᱞᱟ ᱠᱷᱮᱞᱚᱱ ᱠᱳ ᱢᱚᱸᱜᱮ ᱪᱟᱸᱫᱽ", ᱟᱨ "ᱢᱟᱛ ᱥᱟᱢᱡᱷᱳ ᱦᱟᱢ ᱱᱮ ᱵᱷᱩᱞᱟ ᱫᱤᱭᱟ" ᱞᱮᱠᱟᱱ ᱜᱷᱟᱡᱟᱞ ᱟᱨ ᱜᱤᱛ ᱠᱚ ᱥᱮᱨᱮᱧ ᱠᱟᱛᱮ ᱵᱟᱰᱟᱭᱚᱜ ᱠᱟᱱ ᱛᱟᱦᱮᱸᱫ᱾
ᱮᱛᱚᱦᱚᱵ ᱡᱤᱭᱚᱱ ᱟᱨ ᱜᱷᱟᱨᱚᱸᱡᱽ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱠᱷᱟᱱᱩᱢ ᱫᱚ ᱒᱕ ᱰᱤᱥᱮᱢᱵᱚᱨ ᱑᱙᱔᱘ ᱨᱮ ᱜᱟᱲᱦᱤ ᱥᱟᱦᱩ, ᱞᱟᱦᱳᱨ, ᱯᱟᱠᱤᱥᱛᱟᱱ ᱨᱮ ᱢᱤᱫ ᱛᱟᱞᱟᱼᱛᱷᱚᱠ ᱨᱤᱱ ᱜᱷᱟᱨᱚᱸᱡᱽ ᱨᱮᱭ ᱡᱟᱱᱟᱢ ᱞᱮᱱ ᱛᱟᱦᱮᱸᱫ᱾ ᱟᱡ ᱟᱭᱳ ᱫᱚ ᱚᱲᱟᱜ ᱦᱚᱲ ᱮ ᱛᱟᱦᱮᱸ ᱠᱟᱱᱟ, ᱟᱨ ᱟᱡ ᱵᱟᱵᱟ ᱟᱵᱽᱫᱩᱞ ᱦᱟᱠ ᱫᱚ ᱯᱷᱟᱨᱱᱤᱪᱟᱨ ᱮ ᱵᱮᱱᱟᱣ ᱮᱫ ᱛᱟᱦᱮᱸᱫ᱾ ᱱᱩᱠᱩᱣᱟᱜ ᱮᱭᱟᱭ ᱜᱤᱫᱽᱨᱟᱹ ᱠᱷᱚᱱ — ᱢᱚᱬᱮ ᱠᱩᱲᱤ ᱟᱨ ᱵᱟᱨᱭᱟ ᱠᱚᱲᱟ — ᱠᱷᱟᱱᱩᱢ ᱫᱚ ᱡᱚᱛᱚ ᱠᱷᱚᱱ ᱢᱟᱨᱟᱝ ᱮ ᱛᱟᱦᱮᱸ ᱠᱟᱱᱟ᱾ ᱟᱡ ᱜᱷᱟᱨᱚᱸᱡᱽ ᱨᱮᱭᱟᱜ ᱠᱟᱹᱣᱰᱤ ᱟᱱᱟᱴ ᱠᱷᱟᱹᱛᱤᱨ, ᱩᱱᱤ ᱮᱞᱤᱢᱮᱱᱴᱟᱨᱤ ᱟᱥᱲᱟ ᱠᱷᱚᱱ ᱵᱟᱹᱲᱛᱤ ᱟᱡᱟᱜ ᱟᱥᱲᱟ ᱵᱟᱭ ᱪᱟᱹᱞᱩ ᱫᱟᱲᱮᱭᱟᱫ ᱛᱟᱦᱮᱸᱫ᱾ ᱟᱡᱟᱜ ᱮᱛᱚᱦᱚᱵ ᱜᱤᱫᱽᱨᱟᱹ ᱚᱠᱛᱚ ᱫᱚ ᱯᱷᱟᱭᱥᱟᱞᱟᱵᱟᱫᱽ, ᱯᱟᱠᱤᱥᱛᱟᱱ ᱨᱮ ᱵᱤᱛᱟᱹᱣ ᱞᱮᱱ ᱛᱟᱦᱮᱸᱫ᱾ ᱩᱱᱤ ᱟᱥᱲᱟ ᱯᱷᱮᱥᱴᱤᱵᱟᱞ ᱨᱮ ᱥᱮᱨᱮᱧ ᱮ ᱯᱟᱨᱯᱷᱳᱨᱢ ᱮᱫ ᱛᱟᱦᱮᱸᱫ᱾ ᱠᱚᱢ ᱩᱢᱮᱨ ᱨᱮ, ᱩᱱᱤ ᱟᱡᱤᱡ ᱟᱭᱳ ᱟᱭᱳ ᱦᱟᱲᱟᱢ ᱤᱱᱟᱭᱟᱛ ᱟᱞᱤ ᱠᱷᱟᱱ, ᱩᱥᱛᱟᱫ ᱢᱩᱦᱟᱢᱢᱟᱫ ᱥᱟᱨᱤᱯᱷ ᱟᱨ ᱠᱟᱨᱟᱪᱤ ᱨᱤᱱᱤᱡ ᱩᱥᱛᱟᱫ ᱟᱥᱤᱠ ᱟᱞᱤ ᱠᱷᱟᱱ ᱥᱟᱶ ᱥᱮᱨᱮᱧ ᱮ ᱯᱟᱲᱦᱟᱣ ᱞᱮᱫ ᱛᱟᱦᱮᱸᱫ᱾ ᱠᱷᱟᱱᱩᱢ ᱨᱤᱱ ᱵᱚᱭᱦᱟ ᱢᱳᱦᱥᱤᱱ ᱨᱟᱡᱟ ᱦᱚᱸ ᱢᱤᱫ ᱥᱮᱨᱮᱧ ᱵᱟᱰᱚᱦᱤ ᱠᱟᱱᱟᱭ᱾
ᱠᱟᱹᱢᱤ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱠᱷᱟᱱᱩᱢ ᱫᱚ ᱑᱙᱖᱔ ᱥᱟᱞ ᱨᱮ ᱨᱮᱰᱤᱭᱳ ᱯᱟᱠᱤᱥᱛᱟᱱ ᱠᱷᱚᱱ ᱟᱡᱟᱜ ᱥᱮᱨᱮᱧ ᱠᱟᱹᱢᱤ ᱮ ᱮᱛᱚᱦᱚᱵ ᱞᱮᱫ ᱛᱟᱦᱮᱸᱫ᱾ ᱩᱱᱤ ᱫᱚ ᱑᱙᱖᱕ ᱥᱟᱞ ᱨᱮ ᱯᱤᱴᱤᱵᱷᱤ ᱨᱮᱭᱟᱜ ᱮᱛᱚᱦᱚᱵ ᱴᱮᱥᱴ ᱴᱨᱟᱱᱥᱢᱤᱥᱟᱱ ᱚᱠᱛᱚ ᱟᱯᱞᱟᱭ ᱟᱠᱟᱫ ᱵᱟᱰᱚᱦᱤ ᱠᱷᱚᱱ ᱢᱤᱫ ᱮ ᱛᱟᱦᱮᱸ ᱠᱟᱱᱟ᱾ ᱩᱱᱤ ᱫᱚ ᱑᱙᱖᱕ ᱥᱟᱞ ᱨᱮᱭᱟᱜ ᱥᱤᱧᱚᱛᱼᱯᱟᱠᱤᱥᱛᱟᱱ ᱞᱟᱹᱲᱦᱟᱹᱭ ᱚᱠᱛᱚ ᱟᱹᱰᱤ ᱜᱟᱱ ᱫᱤᱥᱚᱢ ᱫᱩᱞᱟᱹᱲ ᱥᱮᱨᱮᱧ ᱮ ᱥᱮᱨᱮᱧ ᱞᱮᱫ ᱛᱟᱦᱮᱸᱫ᱾ ᱠᱚᱵᱤ ᱦᱟᱵᱤᱵ ᱡᱟᱞᱤᱵ ᱟᱜ "ᱢᱟᱛ ᱥᱟᱢᱡᱷᱳ ᱦᱟᱢ ᱱᱮ ᱵᱷᱩᱞᱟ ᱫᱤᱭᱟ, ᱭᱮ ᱢᱤᱴᱴᱤ ᱛᱩᱢᱠᱳ ᱯᱭᱟᱨᱤ ᱛᱷᱤ, ᱤᱥ ᱢᱤᱴᱴᱤ ᱢᱮᱸ ᱦᱤ ᱥᱩᱞᱟ ᱫᱤᱭᱟ" ᱨᱮᱭᱟᱜ ᱩᱱᱤᱭᱟᱜ ᱥᱮᱨᱮᱧ ᱫᱚ ᱑᱙᱖᱕ ᱥᱟᱞ ᱨᱤᱱ ᱞᱟᱹᱲᱦᱟᱹᱭ ᱨᱤᱱ ᱵᱤᱨ ᱠᱚ ᱞᱟᱹᱜᱤᱫ ᱢᱤᱫ ᱩᱭᱦᱟᱹᱨ ᱥᱟᱨᱦᱟᱣ ᱛᱟᱦᱮᱸ ᱠᱟᱱᱟ᱾
ᱯᱟᱠᱤᱥᱛᱟᱱ ᱨᱮᱭᱟᱜ ᱢᱤᱫ ᱢᱩᱬᱩᱛ ᱠᱷᱚᱵᱚᱨ ᱠᱟᱜᱚᱡᱽ ᱞᱮᱠᱟᱛᱮ, "ᱵᱤᱞᱠᱤᱥ ᱠᱷᱟᱱᱩᱢ ᱟᱜ ᱢᱩᱬᱩᱛ ᱮᱱᱮᱢ ᱫᱚ ᱑᱙᱖᱕ ᱥᱟᱞ ᱨᱮᱭᱟᱜ ᱞᱟᱹᱲᱦᱟᱹᱭ ᱚᱠᱛᱚ ᱯᱟᱠᱤᱥᱛᱟᱱ ᱟᱨᱢᱤ ᱞᱟᱹᱜᱤᱫ ᱚᱜᱽᱨᱤᱢ ᱞᱟᱭᱤᱱ ᱨᱮ ᱜᱚᱨᱚᱡᱽ ᱛᱮ ᱥᱮᱨᱮᱧ ᱛᱟᱦᱮᱸ ᱠᱟᱱᱟ"᱾
ᱠᱷᱟᱱᱩᱢ ᱦᱚᱸ ᱠᱤᱪᱷᱩ ᱞᱳᱞᱤᱣᱩᱰ ᱯᱷᱤᱞᱢ ᱞᱟᱹᱜᱤᱫ ᱢᱤᱫ ᱯᱞᱮᱵᱮᱠ ᱥᱮᱨᱮᱧᱤᱭᱟᱹ ᱞᱮᱠᱟᱛᱮ ᱯᱟᱨᱯᱷᱳᱨᱢ ᱞᱮᱫ ᱛᱟᱦᱮᱸᱫ᱾ ᱩᱱᱤ ᱠᱷᱟᱞᱤᱞ ᱟᱦᱢᱟᱫ, ᱱᱟᱥᱦᱟᱫ, ᱡᱤ.ᱮ. ᱪᱤᱥᱛᱤ, ᱱᱤᱥᱟᱨ ᱵᱟᱡᱽᱢᱤ, ᱥᱳᱦᱟᱭᱤᱞ ᱨᱟᱱᱟ, ᱵᱟᱠᱷᱥᱤ ᱣᱟᱡᱤᱨ, ᱨᱟᱦᱢᱟᱱ ᱵᱷᱟᱨᱢᱟ, ᱥᱟᱯᱷᱫᱟᱨ ᱦᱩᱥᱮᱱ, ᱟᱨ ᱮᱴᱟᱜ ᱠᱚᱣᱟᱜ ᱥᱮᱨᱮᱧ ᱫᱤᱥᱟᱹ ᱩᱫᱩᱜ ᱛᱟᱞᱟᱛᱮ ᱥᱮᱨᱮᱧ ᱞᱮᱫ ᱛᱟᱦᱮᱸᱫ᱾ ᱟᱡᱟᱜ ᱥᱮᱨᱮᱧ ᱠᱟᱹᱢᱤ ᱫᱚ ᱔᱕ ᱥᱮᱨᱢᱟ ᱠᱷᱚᱱ ᱵᱟᱹᱲᱛᱤ ᱫᱷᱟᱹᱵᱤᱡ ᱪᱟᱹᱞᱩ ᱞᱮᱱ ᱛᱟᱦᱮᱸᱫ᱾
ᱱᱤᱡᱮᱨᱟᱜ ᱡᱤᱭᱚᱱ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱵᱤᱞᱠᱤᱥ ᱠᱷᱟᱱᱩᱢ ᱫᱚ ᱑᱙᱗᱘ ᱥᱟᱞ ᱨᱮ ᱠᱟᱨᱟᱪᱤ ᱨᱮ ᱥᱤᱧᱚᱛ ᱨᱤᱱᱤᱡ ᱢᱮᱣᱟᱛᱤ ᱜᱷᱟᱨᱟᱱᱟ ᱨᱤᱱᱤᱡ ᱧᱩᱛᱩᱢᱟᱱ ᱥᱤᱛᱟᱨ ᱯᱞᱮᱭᱟᱨ ᱩᱥᱛᱟᱫ ᱨᱟᱭᱤᱥ ᱠᱷᱟᱱ ᱥᱟᱶ ᱮ ᱧᱟᱯᱟᱢ ᱞᱮᱱ ᱛᱟᱦᱮᱸᱫ᱾ ᱚᱱᱟ ᱚᱠᱛᱚ ᱨᱮ ᱩᱱᱤ ᱢᱤᱫ ᱠᱚᱱᱥᱚᱨᱴ ᱞᱟᱹᱜᱤᱫ ᱯᱟᱠᱤᱥᱛᱟᱱ ᱮ ᱥᱮᱱ ᱞᱮᱱ ᱛᱟᱦᱮᱸᱫ᱾ ᱱᱩᱠᱩᱣᱟᱜ ᱠᱤᱪᱷᱩ ᱜᱟᱱ ᱧᱟᱯᱟᱢ ᱫᱚ ᱞᱚᱜᱚᱱ ᱜᱮ "ᱫᱩᱞᱟᱹᱲ ᱨᱮᱭ ᱵᱚᱫᱚᱞ ᱮᱱᱟ"᱾
᱑᱙᱘᱐ ᱥᱟᱞ ᱨᱮ, ᱠᱷᱟᱱᱩᱢ ᱫᱚ ᱥᱤᱧᱚᱛᱤᱭᱟᱹ ᱠᱞᱟᱥᱤᱠᱟᱞ ᱥᱮᱨᱮᱧ ᱥᱤᱛᱟᱨᱤᱥᱴ ᱩᱥᱛᱟᱫ ᱨᱟᱭᱤᱥ ᱠᱷᱟᱱ (᱑᱙᱓᱙ - ᱒᱐᱑᱗) ᱥᱟᱶ ᱮ ᱵᱟᱯᱞᱟ ᱞᱮᱱ ᱛᱟᱦᱮᱸᱫ, ᱡᱟᱦᱟᱸᱭ ᱛᱟᱭᱚᱢ ᱛᱮ ᱯᱟᱠᱤᱥᱛᱟᱱᱤ ᱱᱮᱥᱱᱟᱞᱤᱴᱤ ᱧᱟᱢ ᱠᱮᱫᱟ ᱟᱨ ᱟᱡᱤᱡ ᱯᱩᱱᱭᱟᱹ ᱮᱨᱟ ᱠᱷᱟᱱᱩᱢ ᱥᱟᱶ ᱑᱙᱘᱖ ᱥᱟᱞ ᱨᱮ ᱠᱟᱨᱟᱪᱤ ᱨᱮᱭ ᱵᱟᱥᱟ ᱮᱱᱟ᱾[᱑][᱒]
ᱵᱤᱞᱠᱤᱥ ᱠᱷᱟᱱᱩᱢ ᱟᱨ ᱩᱥᱛᱟᱫ ᱨᱟᱭᱤᱥ ᱠᱷᱟᱱ ᱨᱤᱱ ᱵᱟᱨᱭᱟ ᱠᱚᱲᱟ ᱜᱤᱫᱽᱨᱟᱹ ᱯᱷᱟᱨᱦᱟᱱ ᱨᱟᱭᱤᱥ ᱠᱷᱟᱱ ᱟᱨ ᱦᱟᱡᱩᱨ ᱦᱟᱥᱱᱟᱭᱤᱱ ᱨᱟᱭᱤᱥ ᱠᱷᱟᱱ ᱛᱟᱦᱮᱸ ᱠᱟᱱᱟ᱾ ᱱᱩᱠᱤᱱ ᱵᱟᱱᱟᱨ ᱜᱮ ᱟᱠᱚ ᱵᱟᱵᱟ ᱞᱮᱠᱟ ᱥᱤᱛᱟᱨ ᱯᱞᱮᱭᱟᱨ ᱠᱟᱱᱟ ᱠᱤᱱ ᱟᱨ ᱯᱟᱠᱤᱥᱛᱟᱱ ᱨᱮᱠᱤᱱ ᱛᱟᱦᱮᱸᱱ ᱠᱟᱱᱟ᱾
ᱜᱩᱨ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱟᱹᱰᱤ ᱫᱤᱱ ᱦᱟᱹᱵᱤᱡ ᱟᱡᱟᱨ ᱛᱟᱦᱮᱸ ᱠᱟᱛᱮ ᱠᱷᱟᱱᱩᱢ ᱫᱚ ᱒᱑ ᱰᱤᱥᱮᱢᱵᱚᱨ ᱒᱐᱒᱒ ᱨᱮ ᱠᱟᱨᱟᱪᱤ ᱨᱮᱭ ᱵᱚᱸᱜᱟ ᱛᱟᱞᱟᱭᱮᱱᱟ᱾[᱓] ᱯᱟᱠᱤᱥᱛᱟᱱ ᱨᱤᱱᱤᱡ ᱯᱨᱟᱭᱤᱢ ᱢᱤᱱᱤᱥᱴᱟᱨ ᱥᱮᱦᱵᱟᱡ ᱥᱟᱨᱤᱯᱷ ᱟᱡᱟᱜ ᱜᱩᱨ ᱨᱮ ᱥᱳᱠ ᱮ ᱥᱚᱫᱚᱨ ᱠᱮᱫᱟ ᱟᱨ ᱥᱮᱨᱮᱧ ᱫᱩᱱᱤᱭᱟᱹ ᱞᱟᱹᱜᱤᱫ ᱟᱡᱟᱜ ᱥᱮᱵᱟ ᱠᱚᱭ ᱢᱟᱱᱟᱣ ᱠᱮᱫᱟ᱾[᱔]
ᱥᱟᱹᱠᱷᱭᱟᱹᱛ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]- ↑ "Bilqees Khanum's plight". Dawn newspaper (in ᱟᱝᱜᱽᱨᱮᱡᱤ). 2014-01-05. Retrieved 2023-06-19.
- ↑ "Singer Bilqees Khanum passes away". The News International newspaper. 21 December 2022. Retrieved 19 June 2023.
- ↑ "Renowned singer Balqis Khanum passes away in Karachi". The Express Tribune newspaper. 21 December 2022. Archived from the original on 23 May 2024. Retrieved 21 November 2024.
- ↑ "PM grieved over renowned singer Bilqees Khanum's demise". Daily Dunya News. 22 December 2022.