ᱵᱮᱸᱜᱟᱲ

ᱣᱤᱠᱤᱯᱤᱰᱤᱭᱟ, ᱨᱟᱲᱟ ᱜᱮᱭᱟᱱ ᱯᱩᱛᱷᱤ ᱠᱷᱚᱱ
Jump to navigation Jump to search
ᱵᱮᱸᱜᱟᱲ ᱫᱟᱨᱮ
ᱵᱮᱸᱜᱟᱲ ᱡᱚ

ᱵᱮᱸᱜᱟᱲ (ᱤᱸᱜᱽᱞᱤᱥ - Brinjal) ᱢᱤᱫ ᱩᱛᱩ ᱡᱤᱱᱤᱥ ᱟᱨᱵᱟᱝ ᱥᱚᱵᱽᱡᱤ ᱠᱟᱱᱟ ᱾ ᱵᱮᱸᱜᱟᱲ ᱫᱚ ᱵᱷᱟᱨᱚᱛ ᱨᱮᱜᱮ ᱡᱟᱱᱟᱢ ᱟᱠᱟᱱᱟ ᱟᱨ ᱟᱹᱲᱩ ᱛᱟᱭᱚᱢ ᱫᱚ, ᱟᱨ ᱡᱚᱛᱚ ᱠᱷᱚᱱ ᱵᱟᱹᱲᱛᱤ ᱦᱚᱲ ᱠᱩᱥᱤᱭᱟᱜ ᱩᱛᱩ ᱡᱤᱱᱤᱥ ᱠᱟᱱᱟ ᱾ ᱡᱮᱜᱮᱛ ᱨᱮ ᱪᱤᱱ (᱕᱔%) ᱛᱟᱭᱚᱢ ᱵᱷᱟᱨᱚᱛ ᱜᱮ ᱡᱷᱚᱛᱚ ᱠᱷᱚᱱ ᱵᱟᱹᱲᱛᱤ ᱵᱮᱸᱜᱟᱲ ᱪᱟᱥ ᱫᱤᱥᱚᱢ ᱫᱚ ᱾ ᱱᱚᱶᱟ ᱫᱤᱥᱚᱢ ᱨᱮ ᱕.᱕ ᱜᱮᱥᱟᱥᱟᱭ ᱦᱮᱠᱴᱟᱨ ᱴᱚᱴᱷᱟ ᱨᱮ ᱨᱚᱦᱚᱭ ᱦᱩᱭᱩᱜ ᱠᱟᱱᱟ ᱾

ᱵᱮᱸᱜᱟᱲ ᱫᱟᱨᱮ ᱫᱚ ᱒ ᱠᱷᱚᱱ ᱓ ᱯᱷᱩᱴ ᱩᱥᱩᱞ ᱫᱟᱨᱮᱜ-ᱟ ᱾ ᱡᱚ ᱫᱚ ᱱᱟᱥᱮ ᱦᱮᱸᱫᱮ ᱥᱮ ᱦᱟᱹᱨᱭᱟᱹᱲ ᱨᱚᱝ ᱟᱨᱵᱟᱝ ᱥᱟᱥᱟᱝ ᱨᱚᱝ ᱢᱮᱥᱟ ᱥᱮ ᱯᱩᱸᱰ ᱨᱚᱝ ᱛᱟᱦᱮᱸᱱᱟ ᱾ ᱟᱨ ᱛᱤᱱᱟᱹᱜ ᱞᱮᱠᱟᱱ ᱜᱚᱲᱦᱚᱱ ᱜᱩᱞ, ᱵᱤᱞᱤ ᱞᱮᱠᱟ, ᱥᱮᱣ ᱞᱮᱠᱟᱱ ᱟᱨᱵᱟᱝ ᱡᱷᱟᱞ ᱥᱮ ᱢᱟᱨᱟᱝ ᱠᱷᱚᱱ ᱢᱟᱨᱟᱝ ᱯᱷᱩᱴᱵᱚᱞ ᱞᱮᱠᱟ ᱦᱩᱭ ᱫᱟᱲᱮᱭᱟᱜ-ᱟ ᱾ ᱡᱤᱞᱤᱧ ᱨᱮ ᱢᱤᱫ ᱯᱷᱩᱴ ᱫᱷᱟᱹᱵᱤᱡ ᱦᱚᱸ ᱦᱩᱭ ᱫᱟᱲᱮᱭᱟᱜ-ᱟ ᱾ ᱵᱮᱸᱜᱟᱲᱟᱜ ᱫᱚ ᱵᱷᱟᱨᱚᱛ ᱫᱤᱥᱚᱢ ᱥᱟᱶ ᱜᱟᱹᱦᱤᱨ ᱥᱟᱹᱜᱟᱹᱭ ᱢᱮᱱᱟᱜ-ᱟ ᱾ ᱯᱟᱹᱦᱤᱞ ᱠᱷᱚᱱ ᱵᱷᱟᱨᱚᱛ ᱫᱤᱥᱚᱢ ᱨᱮ ᱱᱚᱶᱟ ᱫᱚ ᱪᱟᱥ ᱵᱟᱥ ᱠᱟᱛᱮ ᱦᱮᱡ ᱟᱹᱜᱩ ᱟᱠᱟᱱᱟ ᱾ ᱵᱷᱟᱨᱚᱛ ᱨᱮᱭᱟᱜ ᱩᱥᱩᱞ ᱵᱷᱟᱜᱽ ᱴᱚᱴᱷᱟ ᱵᱟᱹᱜᱤ ᱠᱟᱛᱮ ᱜᱚᱴᱟᱯᱟᱲᱟ ᱜᱮ ᱪᱟᱥ ᱦᱩᱭᱩᱜ-ᱟ ᱾

ᱩᱯᱨᱩᱢ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱵᱮᱸᱜᱟᱲ ᱫᱚ ᱦᱮᱸᱫᱮ ᱢᱟᱹᱴᱭᱟᱹᱲ ᱠᱷᱟᱨᱟ ᱦᱟᱥᱟᱨᱮ ᱱᱟᱯᱟᱭ ᱪᱟᱥ ᱜᱟᱱᱚᱜ-ᱟ ᱾ ᱱᱚᱶᱟ ᱨᱚᱦᱚᱭ ᱢᱟᱬᱟᱝ ᱨᱮ ᱰᱟᱺᱜᱽᱨᱤ ᱜᱩᱨᱤᱡ ᱠᱷᱚᱛ ᱟᱨᱵᱟᱝ ᱮᱢᱚᱱᱤᱭᱚᱢ ᱥᱚᱞᱯᱷᱮᱴ ᱦᱟᱥᱟᱨᱮ ᱱᱟᱯᱟᱭ ᱥᱟᱹᱦᱤᱸᱡ ᱢᱮᱥᱟ ᱠᱟᱛᱮ ᱠᱷᱩᱛᱣᱟᱹ ᱵᱮᱱᱟᱣ ᱦᱩᱭᱩᱜ-ᱟ ᱾ ᱢᱤᱢᱤᱫ ᱮᱠᱚᱨ ᱦᱟᱥᱟ ᱨᱮ ᱯᱩᱱ ᱜᱟᱹᱰᱤ ᱠᱟᱛᱮ ᱟᱛᱟᱨ ᱛᱚᱨᱚᱡ ᱜᱤᱰᱤ ᱠᱷᱟᱱ ᱟᱨ ᱦᱚᱸ ᱱᱟᱯᱟᱭᱚᱜ-ᱟ ᱾ ᱵᱮᱸᱜᱟᱲ ᱫᱚ ᱚᱠᱛᱚ ᱡᱟᱹᱱᱤ ᱪᱟᱥ ᱜᱮ ᱱᱟᱯᱟᱭ ᱦᱩᱭᱩᱜ-ᱟ, ᱦᱚᱭ ᱦᱤᱥᱤᱫ ᱯᱟᱨᱚᱢ ᱠᱟᱛᱮ ᱨᱚᱦᱚᱭ ᱞᱮᱠᱷᱟᱱ ᱱᱟᱯᱟᱭ ᱪᱟᱥ ᱵᱟᱝ ᱦᱩᱭᱩᱜ-ᱟ ᱾

᱑. ᱡᱩᱱ ᱡᱩᱞᱟᱭ ᱨᱮ ᱵᱮᱸᱜᱟᱲ ᱡᱟᱝ ᱛᱚᱲᱟ ᱜᱤᱰᱤ ᱜᱟᱱᱚᱜ-ᱟ ᱾ ᱯᱚᱦᱟ ᱫᱟᱨᱮ ᱖ ᱤᱸᱪ ᱦᱟᱨᱟ ᱞᱮᱱ ᱠᱷᱟᱱ ᱜᱮ ᱛᱩᱫ ᱠᱟᱛᱮ ᱨᱚᱦᱚᱭ ᱜᱟᱱᱚᱜ-ᱟ ᱾ ᱑᱑᱔ ᱠᱷᱚᱱ ᱑᱒᱐ ᱢᱟᱦᱟ ᱵᱷᱤᱛᱨᱤ ᱨᱮᱜᱮ ᱫᱟᱨᱮ ᱨᱮ ᱡᱚ ᱡᱟᱹᱞᱤ ᱥᱟᱵ ᱜᱚᱫᱚᱜ-ᱟ ᱾ ᱰᱟᱹᱨ ᱨᱮ ᱡᱚ ᱥᱟᱵᱚᱜ ᱠᱚᱢ ᱤᱫᱤ ᱞᱮᱱ ᱠᱷᱟᱱ ᱰᱟᱹᱨ ᱜᱮᱫ ᱜᱤᱰᱤ ᱠᱟᱛᱮ ᱫᱩᱥᱨᱟᱹ ᱥᱟᱜᱮᱱ ᱛᱩᱫᱚᱜ ᱰᱟᱹᱨ ᱨᱮ ᱟᱨ ᱦᱚᱸ ᱱᱟᱶᱟ ᱟᱨ ᱵᱟᱹᱲᱛᱤ ᱡᱚ ᱥᱟᱵᱚᱜ-ᱟ ᱾

᱒. ᱯᱷᱮᱵᱨᱩᱣᱟᱨᱤ ᱨᱮ ᱡᱟᱝ ᱛᱚᱲᱟ ᱞᱮᱠᱷᱟᱱ ᱡᱟᱹᱯᱩᱫ ᱨᱩᱛᱤ ᱛᱮᱜᱮ ᱫᱟᱨᱮ ᱨᱮ ᱡᱚ ᱥᱟᱵᱚᱜ ᱮᱛᱚᱦᱚᱵᱚᱜ-ᱟ ᱾

᱓. ᱱᱚᱵᱷᱮᱢᱵᱚᱨ ᱨᱮ ᱵᱮᱸᱜᱟᱲ ᱫᱟᱨᱮ ᱨᱚᱦᱚᱭ ᱞᱮᱠᱷᱟᱱ ᱯᱷᱮᱵᱨᱩᱣᱟᱨᱤ ᱛᱮᱜᱮ ᱫᱟᱨᱮ ᱨᱮ ᱡᱚ ᱥᱟᱵᱚᱜ-ᱟ ᱾ ᱨᱟᱵᱟᱝ ᱫᱤᱱ ᱫᱚ ᱫᱟᱨᱮ ᱦᱟᱨᱟᱜ ᱱᱟᱥᱮ ᱠᱚᱢ ᱧᱚᱜᱚᱜ-ᱟ ᱾

ᱥᱟᱹᱠᱷᱭᱟᱹᱛ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

https://en.m.wikipedia.org/wiki/Eggplant