ᱞᱟᱜᱽᱬᱮ ᱥᱮᱨᱮᱧ

[*]-ᱚᱛᱮᱛ ᱫᱷᱟᱹᱨᱛᱤ ᱪᱮᱛᱟᱱᱨᱮ, ᱥᱤᱧᱚᱛ ᱫᱤᱥᱚᱢ ᱛᱟᱞᱟᱨᱮ, ᱟᱵᱚ ᱢᱮᱱᱟᱜ ᱵᱚᱱᱟ ᱵᱚᱭᱦᱟ, ᱟᱹᱰᱤ ᱥᱟᱸᱜᱮ ᱜᱮ ᱾ ᱫᱩᱞᱟᱹᱲ ᱵᱟᱹᱱᱩᱜ ᱫᱷᱚᱨᱚᱢᱨᱮ, ᱜᱚᱨᱚᱡᱽ ᱵᱟᱹᱱᱩᱜ ᱡᱟᱹᱛᱤᱨᱮ, ᱠᱩᱲᱤ ᱠᱚᱲᱟ ᱩᱭᱦᱟᱹᱨ ᱵᱟᱹᱱᱩᱜ, ᱡᱟᱹᱛᱤ ᱫᱷᱚᱨᱚᱢᱨᱮ ᱾

[*] ᱪᱟᱸᱫᱚᱭ ᱨᱟᱠᱟᱵ ᱵᱟᱨᱟᱝ ᱵᱟᱨᱟᱝ, ᱥᱟᱹᱜᱤᱧ ᱥᱮᱨᱢᱟ ᱠᱷᱚᱱᱟᱜ, ᱟᱢ ᱛᱟᱸᱜᱤ ᱨᱮᱜᱮ ᱜᱟᱛᱮ, ᱢᱮᱢᱟᱹᱧ ᱧᱩᱛᱟᱹᱛ ᱨᱮ ᱾ ᱧᱮᱯᱮᱞ ᱛᱮᱢᱟ ᱥᱮᱨᱢᱟ ᱥᱟᱹᱜᱤᱧ, ᱨᱚᱯᱚᱲ ᱛᱮᱢᱟ ᱤᱨᱟᱹᱞ ᱵᱩᱨᱩ ᱯᱟᱨᱚᱢ, ᱪᱤᱴᱷᱤ ᱛᱮᱞᱟᱝ ᱨᱚᱯᱚᱲ ᱜᱟᱛᱮ, ᱚᱞᱤᱧ ᱵᱟᱰᱟᱭ ᱦᱩᱱᱟᱹᱝ ᱾

[*] ᱮ ᱜᱟᱛᱮ ᱢᱟᱨᱮ ᱜᱟᱛᱮ, ᱠᱩᱞᱤ ᱜᱮᱞᱟᱧ ᱢᱮᱨᱮ ᱜᱟᱛᱮᱧ, ᱨᱚᱲ ᱟᱥᱮ ᱵᱟᱝ ᱟ ᱾ ᱞᱮᱸᱜᱟᱛᱤᱨᱮ ᱯᱟᱣᱨᱟᱹ ᱵᱩᱛᱩᱞ, ᱡᱚᱡᱚᱢ ᱛᱤᱨᱮ ᱡᱤᱞ ᱪᱟᱠᱷᱱᱟ, ᱠᱩᱞᱤ ᱜᱮᱞᱟᱧ ᱢᱮᱨᱚ ᱜᱟᱛᱮ, ᱡᱚᱢ ᱟᱥᱮ ᱵᱟᱝ ᱟ ᱾

[*] ᱠᱩᱞ ᱠᱚᱪᱟ ᱵᱤᱨ ᱫᱚᱭᱚ, ᱥᱟᱦᱟᱱ ᱵᱟᱝ ᱧᱟᱢᱚᱫ ᱫᱚᱭᱳ, ᱥᱟᱠᱟᱢ ᱵᱟᱝ ᱧᱟᱢᱚᱫ ᱾ ᱟᱹᱜᱩᱭ ᱞᱟᱝ ᱦᱟᱹᱨᱠᱤᱬ, ᱡᱮᱨᱮᱫ ᱞᱟᱝ ᱵᱟᱹᱛᱤ. ᱥᱟᱨᱟᱣᱱᱟ ᱵᱤᱨ ᱫᱚᱥᱟᱝ, ᱫᱟᱬᱟ ᱛᱟᱠᱟᱭ ᱾

[*] ᱡᱟᱱᱟᱢ ᱟᱹᱛᱩ ᱡᱟᱱᱟᱢ ᱫᱤᱥᱚᱢ, ᱨᱟᱹᱥᱠᱟ ᱞᱟᱞᱮ ᱪᱟᱯᱮ, ᱡᱟᱱᱟᱢ ᱟᱭᱳ ᱵᱟᱵᱟ ᱠᱚᱞᱮ, ᱫᱩᱞᱟᱹᱲ ᱞᱟᱞᱮ ᱪᱟᱯᱮ ᱾ ᱦᱚᱭ ᱥᱤᱛᱩᱝ ᱨᱟᱵᱟᱝ ᱡᱟᱹᱯᱩᱫ, ᱨᱮᱸᱜᱮᱡ ᱛᱮᱛᱟᱝ ᱡᱟᱞᱟ, ᱛᱚᱣᱟ ᱫᱟᱨᱮ ᱜᱚᱢᱦᱮᱲ ᱩᱢᱩᱞ, ᱛᱟᱦᱮᱱ ᱨᱤᱞᱟᱹ ᱢᱟᱞᱟ ᱾