ᱵᱷᱟᱸᱰᱟᱱ ᱵᱤᱱᱛᱤ

ᱵᱤᱱᱛᱤ ᱫᱚ ᱟᱹᱰᱤ ᱞᱮᱠᱟᱱᱟ ' ᱚᱱᱟ ᱠᱚ ᱫᱚ ᱪᱷᱟᱹᱴᱤᱭᱟᱹᱨ ᱵᱤᱱᱛᱤ , ᱵᱟᱯᱞᱟ ᱵᱤᱱᱛᱤ , ᱵᱷᱟᱸᱰᱟᱱ ᱵᱤᱱᱛᱤ , ᱠᱟᱨᱟᱢ ᱵᱤᱱᱛᱤ , ᱡᱚᱢᱥᱤᱢ ᱵᱤᱱᱛᱤ ᱾ ᱚᱱᱟᱠᱚᱫᱚ ᱚᱠᱛᱚ ᱟᱨ ᱴᱷᱟᱶ ᱡᱟᱹᱱᱤᱡ ᱠᱚ ᱵᱤᱱᱛᱤᱭᱟ ᱾ ᱱᱚᱶᱟ ᱞᱟᱹᱜᱤᱫ ᱫᱚ ᱵᱤᱛᱤ ᱜᱩᱨᱩ ᱢᱮᱱᱟᱜ ᱠᱚᱣᱟ ᱾ ᱚᱱᱟ ᱛᱟᱨᱮ ᱱᱤᱛ ᱫᱚ ᱜᱚᱡ ᱜᱩᱨ ᱚᱠᱛᱚ ᱨᱮᱱᱟᱜ ᱵᱷᱟᱸᱰᱟᱱ ᱵᱤᱱᱛᱤ ᱵᱚ ᱧᱮᱞᱟ ᱾

ᱵᱤᱛᱤ

ᱵᱤᱥᱲᱤ,ᱪᱷᱤᱢᱵᱽᱲᱤ,ᱩᱴᱤ ᱩᱴᱤ ᱢᱟᱹᱱᱢᱤ ᱟᱨ ᱵᱚᱝᱜᱟ ᱠᱚᱨᱮᱱᱟᱜ ᱥᱟᱹᱜᱟᱹᱭ ᱛᱚᱯᱚᱞ ᱠᱟᱛᱷᱟ ᱨᱚᱲ ᱨᱟᱲᱟᱭ ᱜᱮ ᱵᱤᱱᱛᱤ ᱾ ᱵᱤᱱᱛᱤ ᱛᱮᱜᱮ ᱵᱚᱝᱜᱟ ᱵᱳᱨᱳ ᱫᱚ ᱠᱚ ᱱᱮᱣᱛᱟ ᱵᱟᱨᱛᱮ ᱠᱚᱣᱟ ᱾ ᱵᱤᱱᱛᱤ ᱮᱱᱟᱝ ᱵᱚᱝᱜᱟ ᱵᱳᱨᱳ ᱫᱚ ᱠᱚ ᱛᱷᱩᱢ ᱜᱚᱜᱲᱚᱣᱟ ᱾

ᱜᱷᱟᱴ ᱨᱟᱠᱟᱵ

ᱵᱤᱱᱛᱤ ᱫᱚ ᱨᱚᱲ ᱛᱮ ᱟᱨ ᱥᱮᱨᱮᱧ ᱟᱛᱮ ᱠᱚ ᱵᱤᱱᱛᱤᱭᱟ ᱾ ᱨᱚᱲ ᱨᱮᱭᱟᱜ ᱠᱚ ᱥᱮᱨᱮᱧᱟ ᱵᱟᱝ ᱥᱮᱨᱮᱧ ᱨᱮᱭᱟᱜ ᱠᱚ ᱨᱚᱲᱟ ᱾ ᱵᱷᱟᱸᱰᱟᱱ ᱩᱢᱨᱮ ᱜᱷᱟᱴ ᱠᱷᱚᱱ ᱨᱟᱠᱟᱵ ᱠᱟᱛᱮ ᱱᱚᱝᱠᱟ ᱠᱚ ᱨᱚᱲᱟ ᱟᱨ ᱠᱚ ᱥᱮᱨᱮᱧᱟ -

ᱨᱚᱲᱮ , ᱛᱟᱦᱟᱸ ᱨᱮᱛᱟ ᱱᱟᱱᱟ ᱛᱟᱨᱱᱟ, ᱛᱟᱦᱟᱸ ᱨᱮᱛᱟ ᱱᱟᱱᱟ ᱡᱮ, ᱛᱟᱦᱟᱸ ᱨᱮᱛᱟ ᱱᱟᱱᱟ ᱦᱳ ᱾

ᱨᱚᱲᱮ , ᱥᱤᱧᱮ ᱥᱟᱱᱟᱢ ᱪᱟᱢᱫᱚ ᱵᱚᱝᱜᱟ, ᱢᱚᱬᱮ ᱵᱩᱨᱩ ᱢᱚᱬᱮ ᱵᱚᱝᱜᱟ, ᱡᱮᱜᱮ ᱡᱚᱛᱚ ᱡᱚᱦᱟᱨ ᱦᱟᱢ ᱠᱚ ᱡᱚᱦᱟᱨ ᱾

ᱨᱚᱲᱮ , ᱟᱹᱛᱩ ᱥᱟᱱᱟᱢ ᱢᱟᱹᱡᱷᱤ ᱵᱟᱵᱟ, ᱟᱹᱭᱩᱨ ᱥᱟᱱᱟᱢ ᱱᱟᱹᱯᱤᱛ ᱵᱟᱵᱟ, ᱡᱮᱜᱮ ᱡᱚᱛᱚ ᱡᱚᱦᱟᱨ ᱯᱮᱲᱟ ᱠᱚ ᱡᱚᱦᱟᱨ ᱾

ᱨᱚᱲᱮ , ᱛᱚᱠᱚᱭ ᱦᱚᱨ ᱞᱟᱫ ᱦᱚᱨ ᱫᱚ ᱥᱚᱝᱠᱟ, ᱛᱚᱠᱚᱭ ᱰᱟᱦᱟᱨ ᱞᱟᱫ ᱰᱟᱦᱟᱨ ᱥᱚᱝᱠᱟ, ᱛᱚᱠᱟ ᱫᱚᱵᱚ ᱯᱟᱸᱡᱟ ᱠᱮᱫ-ᱟ ᱦᱳ ᱾

ᱨᱚᱲᱮ , ᱦᱟᱯᱲᱟᱢ ᱠᱚ ᱦᱚᱨ ᱞᱟᱫ ᱱᱚᱝᱠᱟ, ᱦᱟᱯᱲᱟᱢ ᱠᱚ ᱰᱟᱦᱟᱨ ᱱᱚᱝᱠᱟ, ᱭᱚᱱᱟ ᱜᱮ ᱵᱚ ᱯᱟᱸᱡᱟ ᱠᱮᱫ-ᱟ ᱦᱳ ᱾