ᱵᱷᱟᱸᱰᱟᱱ ᱵᱤᱱᱛᱤ

ᱵᱤᱱᱛᱤ ᱫᱚ ᱟᱹᱰᱤ ᱞᱮᱠᱟᱱᱟ ' ᱚᱱᱟ ᱠᱚ ᱫᱚ ᱪᱷᱟᱹᱴᱤᱭᱟᱹᱨ ᱵᱤᱱᱛᱤ , ᱵᱟᱯᱞᱟ ᱵᱤᱱᱛᱤ , ᱵᱷᱟᱸᱰᱟᱱ ᱵᱤᱱᱛᱤ , ᱠᱟᱨᱟᱢ ᱵᱤᱱᱛᱤ , ᱡᱚᱢᱥᱤᱢ ᱵᱤᱱᱛᱤ ᱾ ᱚᱱᱟᱠᱚᱫᱚ ᱚᱠᱛᱚ ᱟᱨ ᱴᱷᱟᱶ ᱡᱟᱹᱱᱤᱡ ᱠᱚ ᱵᱤᱱᱛᱤᱭᱟ ᱾ ᱱᱚᱶᱟ ᱞᱟᱹᱜᱤᱫ ᱫᱚ ᱵᱤᱛᱤ ᱜᱩᱨᱩ ᱢᱮᱱᱟᱜ ᱠᱚᱣᱟ ᱾ ᱚᱱᱟ ᱛᱟᱨᱮ ᱱᱤᱛ ᱫᱚ ᱜᱚᱡ ᱜᱩᱨ ᱚᱠᱛᱚ ᱨᱮᱱᱟᱜ ᱵᱷᱟᱸᱰᱟᱱ ᱵᱤᱱᱛᱤ ᱵᱚ ᱧᱮᱞᱟ ᱾

ᱵᱤᱛᱤ

ᱵᱤᱥᱲᱤ,ᱪᱷᱤᱢᱵᱽᱲᱤ,ᱩᱴᱤ ᱩᱴᱤ ᱢᱟᱹᱱᱢᱤ ᱟᱨ ᱵᱚᱝᱜᱟ ᱠᱚᱨᱮᱱᱟᱜ ᱥᱟᱹᱜᱟᱹᱭ ᱛᱚᱯᱚᱞ ᱠᱟᱛᱷᱟ ᱨᱚᱲ ᱨᱟᱲᱟᱭ ᱜᱮ ᱵᱤᱱᱛᱤ ᱾ ᱵᱤᱱᱛᱤ ᱛᱮᱜᱮ ᱵᱚᱝᱜᱟ ᱵᱳᱨᱳ ᱫᱚ ᱠᱚ ᱱᱮᱣᱛᱟ ᱵᱟᱨᱛᱮ ᱠᱚᱣᱟ ᱾ ᱵᱤᱱᱛᱤ ᱮᱱᱟᱝ ᱵᱚᱝᱜᱟ ᱵᱳᱨᱳ ᱫᱚ ᱠᱚ ᱛᱷᱩᱢ ᱜᱚᱜᱲᱚᱣᱟ ᱾

ᱜᱷᱟᱴ ᱨᱟᱠᱟᱵ

ᱵᱤᱱᱛᱤ ᱫᱚ ᱨᱚᱲ ᱛᱮ ᱟᱨ ᱥᱮᱨᱮᱧ ᱟᱛᱮ ᱠᱚ ᱵᱤᱱᱛᱤᱭᱟ ᱾ ᱨᱚᱲ ᱨᱮᱭᱟᱜ ᱠᱚ ᱥᱮᱨᱮᱧᱟ ᱵᱟᱝ ᱥᱮᱨᱮᱧ ᱨᱮᱭᱟᱜ ᱠᱚ ᱨᱚᱲᱟ ᱾ ᱵᱷᱟᱸᱰᱟᱱ ᱩᱢᱨᱮ ᱜᱷᱟᱴ ᱠᱷᱚᱱ ᱨᱟᱠᱟᱵ ᱠᱟᱛᱮ ᱱᱚᱝᱠᱟ ᱠᱚ ᱨᱚᱲᱟ ᱟᱨ ᱠᱚ

ᱥᱮᱨᱮᱧ

ᱨᱚᱲᱮ , ᱛᱟᱦᱟᱸ ᱨᱮᱛᱟ ᱱᱟᱱᱟ ᱛᱟᱨᱱᱟ, ᱛᱟᱦᱟᱸ ᱨᱮᱛᱟ ᱱᱟᱱᱟ ᱡᱮ, ᱛᱟᱦᱟᱸ ᱨᱮᱛᱟ ᱱᱟᱱᱟ ᱦᱳ ᱾

ᱨᱚᱲᱮ , ᱥᱤᱧᱮ ᱥᱟᱱᱟᱢ ᱪᱟᱢᱫᱚ ᱵᱚᱝᱜᱟ, ᱢᱚᱬᱮ ᱵᱩᱨᱩ ᱢᱚᱬᱮ ᱵᱚᱝᱜᱟ, ᱡᱮᱜᱮ ᱡᱚᱛᱚ ᱡᱚᱦᱟᱨ ᱦᱟᱢ ᱠᱚ ᱡᱚᱦᱟᱨ ᱾

ᱨᱚᱲᱮ , ᱟᱹᱛᱩ ᱥᱟᱱᱟᱢ ᱢᱟᱹᱡᱷᱤ ᱵᱟᱵᱟ, ᱟᱹᱭᱩᱨ ᱥᱟᱱᱟᱢ ᱱᱟᱹᱯᱤᱛ ᱵᱟᱵᱟ, ᱡᱮᱜᱮ ᱡᱚᱛᱚ ᱡᱚᱦᱟᱨ ᱯᱮᱲᱟ ᱠᱚ ᱡᱚᱦᱟᱨ ᱾

ᱨᱚᱲᱮ , ᱛᱚᱠᱚᱭ ᱦᱚᱨ ᱞᱟᱫ ᱦᱚᱨ ᱫᱚ ᱥᱚᱝᱠᱟ, ᱛᱚᱠᱚᱭ ᱰᱟᱦᱟᱨ ᱞᱟᱫ ᱰᱟᱦᱟᱨ ᱥᱚᱝᱠᱟ, ᱛᱚᱠᱟ ᱫᱚᱵᱚ ᱯᱟᱸᱡᱟ ᱠᱮᱫ-ᱟ ᱦᱳ ᱾

ᱨᱚᱲᱮ , ᱦᱟᱯᱲᱟᱢ ᱠᱚ ᱦᱚᱨ ᱞᱟᱫ ᱱᱚᱝᱠᱟ, ᱦᱟᱯᱲᱟᱢ ᱠᱚ ᱰᱟᱦᱟᱨ ᱱᱚᱝᱠᱟ, ᱭᱚᱱᱟ ᱜᱮ ᱵᱚ ᱯᱟᱸᱡᱟ ᱠᱮᱫ-ᱟ ᱦᱳ ᱾

ᱨᱚᱲᱮ , ᱛᱟᱦᱟᱸ ᱨᱮᱛᱟ ᱱᱟᱱᱟ ᱛᱟᱨᱱᱟ, ᱛᱟᱦᱟ ᱨᱮᱛᱟ ᱱᱟ~ᱱᱟ~ ᱡᱮ, ᱛᱟ~ᱦᱟᱸ ᱨᱮᱛᱟ ᱱᱟᱱᱟ ᱦᱳ ᱾

ᱛᱤᱛᱮ ᱛᱤᱛᱮ ᱥᱟᱵ ᱟᱹᱜᱩ ᱵᱟᱝ ᱠᱟᱱᱟ, ᱢᱮᱫᱛᱮ ᱢᱮᱫᱛᱮ ᱧᱮᱞ ᱛᱤᱭᱩᱜ ᱵᱟᱝ ᱠᱟᱱᱟ, ᱞᱩᱛᱩᱨ ᱜᱷᱩᱪᱩ ᱨᱮᱵᱮᱫ ᱫᱚᱦᱚᱣᱜ ᱦᱳ ᱾

ᱮᱨᱮ ᱧᱟᱢᱮᱱ

ᱦᱚᱭ ᱵᱟᱯᱫᱷᱚᱱ ᱛᱤᱛᱮ ᱥᱟᱵᱟᱜ ᱢᱮᱫ ᱛᱮ ᱧᱮᱞᱟᱜ ᱫᱚ ᱵᱟᱝ ᱠᱟᱱᱟ ᱟᱸᱡᱚᱢ ᱟᱹᱜᱩᱣᱟᱜ ᱠᱟᱱᱟ ᱾ ᱥᱮᱫᱟᱭ ᱵᱩᱨᱩ ᱢᱚᱬᱮ ᱟᱹᱜᱤᱞ ᱦᱟᱯᱲᱟᱢ ᱠᱚᱣᱟᱜ ᱦᱚᱨᱟᱜ ᱰᱟᱦᱟᱨᱟᱜ ᱜᱮᱵᱚ ᱯᱟᱸᱡᱟ ᱟᱠᱟᱫ-ᱟ ᱾ ᱜᱮᱞᱵᱟᱨ ᱥᱤᱧ ᱜᱮᱞᱵᱟᱨ ᱧᱤᱫᱟᱹ ᱮᱨᱮ ᱟᱛᱱᱟᱜ ᱠᱷᱚᱫᱮ ᱢᱟᱛᱠᱚᱱ ᱞᱮᱯᱮᱡ ᱛᱤᱨᱤᱞ ᱯᱮᱴᱮᱨ ᱵᱟᱲᱮ ᱵᱩᱴᱟᱹᱨᱮ ᱵᱤᱪᱟᱹᱨ ᱞᱮᱫ-ᱟ ᱠᱚ ᱟᱪᱟᱨ ᱞᱮᱫ-ᱟ ᱠᱚ ᱠᱟᱛᱷᱟ ᱮᱨᱮ ᱞᱮᱱᱟ ᱠᱟᱛᱷᱟ ᱠᱷᱚᱫᱮ ᱞᱮᱱᱟ ᱵᱤᱪᱟᱹᱨ ᱞᱮᱯᱮᱡ ᱞᱮᱱᱟ ᱨᱚᱯᱚᱲ ᱯᱮᱴᱮᱨ ᱞᱮᱱᱟ ᱾ ᱠᱟᱛᱷᱟ ᱵᱟᱝ ᱥᱟᱹᱨᱤ ᱞᱮᱱᱛᱮ ᱫᱚᱞᱫᱩᱞᱤ ᱵᱟᱦᱟ ᱵᱟᱸᱫᱮᱞᱟᱨᱮ ᱯᱚᱨᱟᱭᱱᱤ ᱥᱟᱠᱟᱢ ᱪᱮᱛᱟᱱ ᱛᱤᱡᱩ ᱞᱮᱠᱟ ᱴᱩᱸᱰᱟᱝ ᱴᱩᱸᱰᱟᱝ ᱛᱮ ᱯᱟᱨᱚᱢ ᱠᱟᱛᱮ ᱥᱟᱹᱨᱤ ᱥᱟᱨᱡᱚᱢ ᱫᱟᱨᱮ ᱵᱮᱲᱦᱟᱭ ᱨᱮ ᱟᱴᱮᱫ ᱟᱠᱟᱱ ᱞᱮᱧᱚᱜ ᱞᱮᱠᱟᱱ ᱫᱷᱤᱨᱤ ᱪᱮᱛᱟᱱ ᱨᱮ ᱯᱚᱨᱟᱭᱱᱤ ᱥᱟᱠᱟᱢ ᱟᱴᱮᱫ ᱠᱟᱛᱮ ᱵᱤᱪᱟᱹᱨ ᱞᱮᱫ ᱟᱪᱟᱨ ᱞᱮᱫ-ᱟ ᱠᱚ ᱾ ᱠᱟᱛᱷᱟ ᱥᱟᱹᱨᱤᱭᱮ , ᱦᱚᱨ ᱰᱟᱦᱟᱨ ᱠᱚ ᱧᱟᱢ ᱠᱮᱫ-ᱟ ᱾ ᱠᱟᱛᱷᱟ ᱥᱟᱹᱨᱤ ᱜᱮᱭᱟ ᱢᱮᱱᱠᱟᱛᱮ ᱵᱟᱦᱟ ᱵᱟᱸᱫᱮᱞᱟ ᱜᱩᱲᱜᱩ ᱫᱷᱤᱨᱤ ᱠᱚ ᱪᱟᱯᱟᱫ ᱞᱮᱫ-ᱟ ᱚᱱᱟ ᱫᱚ ᱪᱟᱯᱮᱭᱮᱱᱟ ᱾ ᱵᱟᱦᱟ ᱛᱩᱞᱟᱹᱢ ᱠᱚ ᱪᱟᱯᱟᱫ ᱞᱮᱫ-ᱟ ᱚᱱᱟ ᱫᱚ ᱩᱱᱩᱢᱮᱱᱟ ᱾ ᱫᱷᱚᱨᱚᱢ ᱧᱩᱢ ᱨᱮ ᱡᱚᱦᱟᱨ ᱠᱟᱛᱮ ᱟᱯᱟᱱ ᱟᱯᱤᱱ ᱠᱚ ᱨᱩᱣᱟᱲ ᱮᱱᱟ ᱾

ᱵᱟᱯ ᱨᱮ ᱫᱷᱚᱱ ᱨᱮ , ᱨᱩᱣᱟᱲ ᱦᱚᱨ ᱨᱮ ᱥᱩᱦᱤ ᱢᱩᱦᱤᱢ ᱧᱮᱞᱚᱜ-ᱟ ᱾ ᱚᱠᱟᱨᱮ ᱪᱚ ᱨᱚᱦᱚᱲ ᱫᱟᱨᱮ ᱥᱟᱜᱮᱱ ᱟᱠᱟᱱᱟ ᱾ ᱟᱹᱰᱤ ᱠᱚ ᱨᱟᱹᱥᱠᱟᱹ ᱡᱚᱝ ᱠᱟᱱᱟ ᱾ ᱨᱚᱦᱚᱲ ᱫᱟᱨᱮ ᱵᱷᱤᱸᱫᱟᱹᱲ ᱟᱠᱟᱣᱟᱫ ᱚᱣᱟ ᱨᱟᱜ ᱡᱚᱝ ᱠᱟᱱᱟ ᱠᱚ ᱾ ᱛᱮᱦᱮᱧ ᱚᱱᱟ ᱦᱚᱨ ᱚᱱᱟ ᱰᱟᱦᱟᱨ ᱨᱮᱜᱮ ᱵᱚ ᱛᱤᱸᱜᱩ ᱟᱠᱟᱱᱟ ᱾ ᱨᱟᱜ ᱡᱚᱝ ᱦᱚᱲ ᱵᱚ ᱧᱟᱢ ᱟᱠᱟᱫᱮᱭᱟ ᱾

ᱨᱚᱲᱮ , ᱛᱟᱦᱟᱸ ᱨᱮᱛᱟ ᱱᱟᱱᱟ ᱛᱟᱨᱱᱟ, ᱛᱟᱦᱟᱸ ᱨᱮᱛᱟ ᱱᱟᱱᱟ ᱡᱮ, ᱛᱟᱦᱟ ᱨᱮᱛᱟ ᱱᱟᱱᱟ ᱦᱳ ᱾

ᱨᱚᱲᱮ , ᱛᱚᱠᱚᱭ ᱨᱟᱜᱮ ᱪᱮᱛᱮ ᱞᱟᱹᱜᱤᱫ, ᱛᱚᱠᱚᱭ ᱜᱚᱝ ᱮ ᱪᱤᱠᱟᱹᱭ ᱞᱟᱹᱜᱤᱫ, ᱛᱚᱠᱚᱭ ᱫᱩᱲᱩᱵ ᱚᱠᱟ ᱞᱟᱹᱜᱤᱫ ᱦᱳ ᱾

ᱯᱷᱟᱨᱱᱟ ᱨᱟᱜᱮ ᱥᱟᱨᱪᱟᱜ ᱞᱟᱹᱜᱤᱫ, ᱢᱟᱹᱡᱷᱤ ᱜᱚᱝ ᱮ ᱧᱮᱞᱠᱟᱭ ᱞᱟᱹᱜᱤᱫ, ᱟᱨ ᱠᱚ ᱫᱩᱲᱩᱵ ᱵᱟᱨᱛᱮ ᱞᱟᱹᱜᱤᱫ ᱦᱳ ᱾

ᱦᱚᱭ ᱵᱟᱯ ᱨᱮ ᱫᱷᱚᱱ ᱨᱮ ᱯᱷᱟᱨᱱᱟ [ᱟᱹᱛᱩ ᱧᱩᱛᱩᱢ] ᱟᱹᱛᱩ ᱢᱟᱹᱡᱷᱤ ᱦᱚᱯᱚᱱ ᱯᱷᱟᱨᱱᱟ [ᱯᱟᱹᱨᱤᱥ ᱧᱩᱛᱩᱢ] ᱦᱚᱲ ᱜᱮᱞ ᱥᱮᱨᱢᱟ ᱢᱟᱲᱟᱝ ᱨᱮ ᱪᱚ ᱜᱮᱞ ᱵᱟᱨ ᱥᱮᱨᱢᱟ ᱢᱟᱲᱟᱝ ᱨᱮ ᱪᱚ , ᱜᱮᱞ ᱪᱟᱸᱫᱚ ᱢᱟᱲᱟᱝ ᱨᱮ ᱪᱚ ᱜᱮᱞ ᱵᱟᱨ ᱪᱟᱸᱫᱚ ᱢᱟᱲᱟᱲ ᱨᱮ ᱪᱚ , ᱜᱮᱞ ᱢᱟᱦᱟ ᱢᱟᱲᱟᱝ ᱨᱮ ᱪᱚ ᱜᱮᱞ ᱵᱟᱨ ᱢᱟᱦᱟ ᱢᱟᱲᱟᱝ ᱨᱮ ᱪᱚ ᱜᱚᱡ ᱞᱮᱱᱟ ᱠᱚ ᱜᱩᱨ ᱞᱮᱱᱟ ᱠᱚ ᱾ ᱚᱱᱟᱛᱮ ᱵᱟᱯ ᱨᱮ ᱫᱷᱚᱱ ᱨᱮ ᱱᱩᱠᱩ ᱫᱚ ᱫᱩᱠ ᱮᱱᱟ ᱠᱚ ᱦᱩᱠ ᱮᱱᱟ ᱠᱚ , ᱪᱷᱩᱛ ᱮᱱᱟ ᱠᱚ ᱵᱩᱠᱩᱛ ᱮᱱᱟ ᱠᱚ , ᱥᱚ ᱭᱮᱱᱟ ᱠᱚ ᱥᱤᱸᱲᱤᱡ ᱮᱱᱟ ᱠᱚ , ᱵᱚᱦᱚᱜ ᱯᱮᱨᱮᱡ ᱡᱚᱵᱽᱨᱟ , ᱞᱩᱛᱩᱨ ᱯᱮᱨᱮᱡ ᱢᱟᱸᱭᱟᱢ , ᱫᱮᱭᱟ ᱯᱮᱨᱮᱡ ᱛᱚᱨᱚᱡ ᱞᱟᱴᱷᱟᱣᱟᱫ ᱠᱚᱣᱟ ᱾

ᱟᱹᱛᱩ ᱦᱚᱲ ᱫᱤᱥᱚᱢ ᱦᱚᱲ ᱟᱨ ᱵᱚᱝᱜᱟ ᱵᱳᱨᱳ ᱠᱚ ᱥᱟᱦᱟ ᱵᱟᱹᱜᱤᱭᱟᱫ ᱠᱚᱣᱟ ᱾ ᱟᱹᱰᱤ ᱫᱩᱠ ᱥᱟᱥᱮᱛ ᱨᱚᱠᱚ ᱛᱟᱦᱮᱸ ᱭᱮᱱᱟ ᱾

ᱥᱮᱨᱮᱧ

ᱚᱛ ᱡᱟᱱᱟᱢ ᱞᱮᱱᱟ ᱫᱷᱩᱵᱤ ᱜᱟᱥ ᱡᱟᱱᱟᱢ ᱞᱮᱱᱟ, ᱢᱟᱹᱢᱤ ᱡᱟᱱᱟᱢ ᱞᱮᱱᱟ ᱫᱩᱠ ᱦᱚᱸ ᱡᱱᱟᱢ ᱾ ᱠᱟᱸᱥᱟ ᱯᱤᱛᱚᱞ ᱡᱟᱱᱟᱢ ᱞᱮᱱᱟ ᱟᱹᱪᱩᱨ ᱵᱤᱦᱩᱨ ᱡᱟᱱᱟᱢ ᱞᱮᱱᱟ , ᱢᱟᱹᱱᱢᱤ ᱡᱟᱱᱟᱢ ᱞᱮᱱᱟ ᱫᱩᱠ ᱦᱚᱸ ᱡᱟᱱᱟᱢ ᱾

ᱚᱱᱟᱛᱮ ᱱᱩᱠᱩ ᱦᱚᱲ ᱫᱚ ᱱᱤᱨᱟᱹᱭ ᱨᱮ ᱵᱟᱠᱚ ᱛᱟᱦᱮᱸ ᱫᱟᱲᱮᱭᱟᱜ-ᱟ ᱾ ᱧᱤᱫᱟᱹ ᱚᱲᱟᱜ ᱥᱟᱰᱮᱭᱮᱱᱟ , ᱥᱤᱢ ᱠᱚ ᱪᱚᱨ ᱪᱚᱨ ᱮᱱᱟ , ᱪᱟᱜᱟᱢ ᱪᱟᱜᱟᱢ ᱛᱟᱲᱟᱢ ᱠᱚ ᱟᱸᱡᱚᱢ ᱠᱮᱫ-ᱟ ᱥᱚᱝ ᱦᱩᱲᱩ ᱵᱟᱝ ᱥᱟᱦᱟᱨ ᱞᱮᱱᱟ , ᱥᱟᱸᱵᱟᱜ ᱵᱷᱩᱨᱟᱹᱜ ᱠᱚ ᱠᱩᱠᱢᱩ ᱠᱮᱫ-ᱟ ᱾

ᱟᱫᱚ ᱢᱟᱹᱡᱷᱤ ᱵᱟᱵᱟ ᱴᱷᱮᱱ ᱠᱩᱞᱤ ᱡᱚᱝ ᱮ ᱥᱮᱱ ᱮᱱᱟ ᱟᱨ ᱱᱚᱶᱟ ᱠᱚ ᱠᱟᱛᱷᱟᱭ ᱞᱟᱹᱭ ᱟᱫᱮᱭᱟ ᱾ ᱢᱟᱹᱡᱷᱤ ᱵᱟᱵᱟ ᱦᱚᱸᱭ ᱞᱟᱹᱭ ᱨᱩᱣᱟᱲ ᱟᱫᱮᱭᱟ ᱾ ᱵᱟᱯᱫᱷᱚᱱ ᱟᱯᱮ ᱢᱟ ᱜᱚᱡ ᱜᱩᱨ ᱨᱮᱱᱟᱜ ᱵᱷᱟᱸᱰᱟᱱ ᱠᱟᱹᱢᱤ ᱥᱟᱨᱮᱡ ᱟᱠᱟᱱ ᱛᱟᱯᱮᱭᱟ ᱾ ᱚᱱᱟᱛᱮ ᱱᱚᱝᱠᱟ ᱮᱨᱮ ᱫᱚᱢ ᱟᱹᱭᱠᱟᱣ ᱮᱫ-ᱟ ᱾ ᱢᱟ ᱥᱚᱡᱚᱜ ᱯᱮ ᱵᱷᱟᱸᱰᱟᱱ ᱵᱚ ᱩᱢ ᱯᱷᱟᱨᱪᱟ ᱠᱟᱯᱮᱭᱟ ᱾ ᱜᱚᱰᱮᱛ ᱤᱧ ᱞᱟᱹᱭ ᱟᱭᱟ ᱟᱹᱛᱩᱨᱮ ᱦᱚᱦᱚᱭᱟᱭ ᱾

ᱢᱟᱹᱡᱷᱤ ᱵᱟᱵᱟ ᱜᱚᱰᱮᱛᱮ ᱞᱟᱹᱭ ᱟᱫᱮᱭᱟ ᱢᱚᱬᱮ ᱢᱟᱦᱟ ᱛᱟᱭᱚᱢ ᱾ ᱜᱚᱰᱮᱛ ᱫᱚ ᱟᱹᱛᱩᱨᱮ ᱚᱲᱟᱜ ᱚᱲᱟᱜ ᱮ ᱦᱚᱦᱚ ᱠᱮᱫ-ᱟ ᱾ ᱢᱤᱫ ᱦᱟᱲᱟᱢ ᱢᱤᱫ ᱵᱩᱰᱷᱤ ᱜᱚᱰᱮᱛ ᱚᱲᱟᱜ ᱪᱟᱞᱟᱜ ᱞᱟᱹᱜᱤᱫ ᱾ ᱡᱚᱛᱚ ᱦᱚᱲ ᱠᱚ ᱥᱮᱴᱮᱨ ᱮᱱᱟ ᱾ ᱚᱲᱟᱜ ᱢᱩᱱᱤᱵ ᱫᱚ ᱯᱟᱨᱠᱚᱢ ᱠᱚ ᱯᱟᱹᱴᱭᱟᱹ ᱠᱚ ᱜᱟᱸᱰᱚ ᱠᱚ ᱫᱩᱲᱩᱵ ᱞᱟᱹᱜᱤᱫ-ᱮ ᱵᱤᱞᱟᱫ ᱠᱚᱣᱟ ᱾ ᱫᱩᱲᱩᱵ ᱮᱱᱟ ᱠᱚ , ᱟᱫᱚ ᱢᱤᱢᱤᱫ ᱯᱷᱩᱲᱩᱜ ᱛᱟᱝ ᱦᱟᱺᱰᱤ ᱦᱚᱸ ᱜᱷᱟᱹᱨᱱᱤᱭ ᱮᱢᱟᱫ ᱠᱚᱣᱟ ᱾ ᱧᱩ ᱵᱟᱲᱟ ᱠᱟᱛᱮ ᱟᱫᱚ ᱦᱚᱯᱚᱱ ᱠᱚ ᱠᱚ ᱢᱮᱱᱮᱫ-ᱟ ᱾ ᱵᱟᱯᱫᱷᱚᱱ ᱱᱚᱶᱟ ᱫᱚ ᱪᱮᱫ ᱦᱟᱺᱤᱢ ᱮᱢᱟᱫ ᱞᱮᱭᱟ ᱢᱮᱨᱟ ᱜᱮ ᱵᱟᱞᱮ ᱧᱟᱢᱮᱡ ᱫᱚ ᱾ ᱜᱟᱨᱡᱚᱱᱮ ᱢᱮᱱ ᱠᱮᱫ-ᱟ , ᱢᱚᱬᱮ ᱢᱟᱦᱟ ᱢᱟᱬᱟᱝ ᱨᱮ ᱨᱚᱞᱡᱟᱝ ᱪᱟᱣᱞᱮᱡᱟᱝ ᱛᱮᱫ ᱫᱚ ᱢᱟᱹᱡᱷᱤ ᱵᱟᱵᱟ ᱚᱲᱟᱜ ᱞᱮ ᱤᱫᱤ ᱦᱚᱴᱚ ᱟᱠᱟᱫ-ᱟ ᱾ ᱟᱠᱚ ᱚᱲᱟᱜ ᱨᱟᱹᱱᱩ ᱛᱮᱜᱮ ᱦᱟᱺᱰᱤ ᱞᱮ ᱦᱟᱹᱨ ᱟᱠᱟᱫ-ᱟ , ᱢᱮᱨᱟ ᱛᱮᱫ ᱫᱚ ᱢᱟᱹᱡᱷᱤ ᱵᱟᱵᱟ ᱚᱲᱟᱜ ᱨᱮᱜᱮ ᱢᱮᱱᱟᱜ-ᱟ ᱾ ᱟᱹᱠᱤᱱ ᱜᱮ ᱠᱤᱱ ᱞᱟᱹᱭ ᱢᱟ ᱪᱮᱫ ᱞᱮᱠᱟᱱ ᱢᱮᱨᱟ ᱠᱟᱱᱟ ᱾ ᱟᱫᱚ ᱢᱟᱹᱡᱷᱤ ᱵᱟᱵᱟᱭ ᱞᱟᱹᱭ ᱠᱮᱫ-ᱟ ᱾ ᱦᱚᱭ ᱵᱟᱯᱫᱷᱚᱱ ᱱᱚᱶᱟ ᱫᱚ ᱢᱩᱪᱩᱪᱟᱞᱟ ᱨᱮᱠᱚ ᱪᱟᱞᱟ ᱟᱠᱟᱫ-ᱟ ᱾ ᱚᱱᱟᱛᱮ ᱢᱮᱨᱟ ᱫᱚ ᱵᱟᱹᱱᱩᱜ ᱟᱱᱟ , ᱱᱟᱹᱨᱲᱤ ᱨᱮᱦᱚᱸ ᱵᱟᱝ ᱰᱷᱟᱝ ᱚᱜ ᱠᱟᱱᱟ ᱾ ᱯᱷᱟᱨᱱᱟ ᱚᱲᱟᱜ ᱨᱤᱱ ᱦᱟᱯᱲᱟᱢ ᱠᱚ ᱜᱮ ᱠᱚ ᱰᱷᱟᱝ ᱚᱜ ᱠᱟᱱᱟ ᱾ ᱚᱱᱟᱛᱮ ᱵᱟᱝ ᱰᱷᱟᱝ ᱚᱜ ᱞᱟᱹᱜᱤᱫ , ᱵᱟᱝ ᱰᱷᱟᱝ ᱠᱟᱹᱢᱤ ᱵᱚ ᱠᱟᱹᱢᱤ ᱛᱟᱠᱚ ᱨᱮᱱᱟᱜ ᱦᱮᱲᱮ ᱦᱩᱲᱩ ᱵᱚ ᱥᱚᱝ ᱟ ᱾ ᱢᱟ ᱪᱮᱫ ᱯᱮ ᱢᱮᱱᱮᱫ-ᱟ ?

ᱦᱚᱭ ᱛᱚᱵᱮ ᱵᱟᱯᱫᱷᱚᱱ ᱚᱱᱟ ᱫᱚ ᱵᱚ ᱠᱟᱹᱢᱤ ᱠᱟᱜ ᱜᱮᱭᱟ ᱾ ᱫᱮ ᱥᱚᱡᱽ ᱠᱚ ᱥᱟᱢᱟᱝ ᱯᱮ ᱾ ᱟᱫᱚ ᱜᱟᱨᱡᱚᱱ ᱫᱚ ᱦᱩᱲᱩ ᱜᱩᱦᱬᱤ ᱥᱟᱠᱟᱢ ᱪᱟᱨᱮᱡ ᱥᱟᱥᱟᱝ ᱥᱩᱛᱟᱹᱢ ᱫᱩᱵᱤᱜᱟᱥ ᱟᱫᱽᱞᱟ ᱪᱟᱣᱞᱮᱭ ᱧᱟᱢ ᱚᱰᱚᱠ ᱠᱮᱫ-ᱟ ᱾

ᱯᱮ ᱴᱩᱠᱩᱡ ᱦᱟᱺᱰᱤ ᱨᱮᱱᱟᱜ ᱦᱩᱲᱩ ᱠᱚ ᱥᱚᱝ ᱠᱮᱫ-ᱟ , ᱢᱤᱫ ᱴᱩᱠᱩᱡ ᱨᱮ ᱜᱮᱞ ᱵᱟᱨ ᱠᱟᱴᱷᱟ ᱠᱟᱛᱮ ᱾ ᱯᱮ ᱴᱩᱠᱩᱡ ᱫᱚ ᱢᱟᱨᱟᱝ ᱵᱳᱨᱳ ᱦᱟᱯᱲᱟᱢ ᱠᱚ ᱟᱨ ᱜᱚᱡ ᱜᱩᱨ ᱟᱠᱟᱱ ᱦᱚᱲ ᱞᱟᱹᱜᱤᱫ ᱾