ᱵᱷᱟᱸᱰᱟᱱ ᱵᱤᱱᱛᱤ

ᱵᱤᱱᱛᱤ ᱫᱚ ᱟᱹᱰᱤ ᱞᱮᱠᱟᱱᱟ ᱵᱤᱱᱛᱤ ᱢᱮᱱ ᱞᱮᱠᱷᱟᱱ ᱵᱤᱥᱲᱤ ᱪᱷᱤᱢᱵᱽᱲᱤ ᱠᱟᱛᱮ ᱪᱤᱱᱦᱟᱶ ᱾ ᱱᱚᱶᱟ ᱫᱚ ᱴᱷᱟᱶ ᱠᱟᱹᱢᱤ ᱡᱟᱹᱱᱤᱡ ᱦᱩᱭᱩᱜ-ᱟ ᱾ ᱚᱱᱟ ᱠᱚ ᱫᱚ ᱪᱷᱟᱹᱴᱤᱭᱟᱹᱨ ᱵᱤᱱᱛᱤ , ᱵᱟᱯᱞᱟ ᱵᱤᱱᱛᱤ , ᱵᱷᱟᱸᱰᱟᱱ ᱵᱤᱱᱛᱤ , ᱠᱟᱨᱟᱢ ᱵᱤᱱᱛᱤ , ᱡᱚᱢᱥᱤᱢ ᱵᱤᱱᱛᱤ ᱾ ᱚᱱᱟ ᱠᱚ ᱫᱚ ᱚᱠᱛᱚ ᱟᱨ ᱴᱷᱟᱶ ᱡᱟᱹᱱᱤᱡ ᱠᱚ ᱵᱤᱱᱛᱤᱭᱟ ᱾ ᱵᱤᱱᱛᱤ ᱨᱮᱱᱟᱜ ᱡᱚᱥ ᱫᱚ ᱢᱤᱫ ᱜᱮᱭᱟ ᱥᱤᱨᱡᱚᱱ ᱥᱟᱨᱦᱟᱣ ᱟᱨ ᱱᱟᱜᱟᱢ ᱩᱭᱦᱟᱹᱨ ᱾ ᱱᱚᱶᱟ ᱞᱟᱹᱜᱤᱫ ᱫᱚ ᱵᱤᱱᱛᱤ ᱜᱩᱨᱩ ᱢᱮᱱᱟᱜ ᱠᱚᱣᱟ ᱾ ᱚᱱᱟ ᱛᱟᱨᱮ ᱱᱤᱛ ᱫᱚ ᱜᱚᱡ ᱜᱩᱨ ᱚᱠᱛᱚ ᱨᱮᱱᱟᱜ ᱵᱷᱟᱸᱰᱟᱱ ᱵᱤᱱᱛᱤ ᱵᱚ ᱧᱮᱞᱟ ᱾

ᱵᱤᱛᱤ

ᱵᱤᱥᱲᱤ,ᱪᱷᱤᱢᱵᱽᱲᱤ,ᱩᱴᱤ ᱩᱴᱤ ᱢᱟᱹᱱᱢᱤ ᱟᱨ ᱵᱚᱝᱜᱟ ᱠᱚᱨᱮᱱᱟᱜ ᱥᱟᱹᱜᱟᱹᱭ ᱛᱚᱯᱚᱞ ᱠᱟᱛᱷᱟ ᱨᱚᱲ ᱨᱟᱲᱟᱭ ᱜᱮ ᱵᱤᱱᱛᱤ ᱾ ᱵᱤᱱᱛᱤ ᱛᱮᱜᱮ ᱵᱚᱝᱜᱟ ᱵᱳᱨᱳ ᱫᱚ ᱠᱚ ᱱᱮᱣᱛᱟ ᱵᱟᱨᱛᱮ ᱠᱚᱣᱟ ᱾ ᱵᱤᱱᱛᱤ ᱮᱱᱟᱝ ᱵᱚᱝᱜᱟ ᱵᱳᱨᱳ ᱫᱚ ᱠᱚ ᱛᱷᱩᱢ ᱜᱚᱜᱲᱚᱣᱟ ᱾

ᱜᱷᱟᱴ ᱨᱟᱠᱟᱵ

ᱵᱤᱱᱛᱤ ᱫᱚ ᱨᱚᱲ ᱛᱮ ᱟᱨ ᱥᱮᱨᱮᱧ ᱟᱛᱮ ᱠᱚ ᱵᱤᱱᱛᱤᱭᱟ ᱾ ᱨᱚᱲ ᱨᱮᱭᱟᱜ ᱠᱚ ᱥᱮᱨᱮᱧᱟ ᱵᱟᱝ ᱥᱮᱨᱮᱧ ᱨᱮᱭᱟᱜ ᱠᱚ ᱨᱚᱲᱟ ᱾ ᱵᱷᱟᱸᱰᱟᱱ ᱩᱢᱨᱮ ᱜᱷᱟᱴ ᱠᱷᱚᱱ ᱨᱟᱠᱟᱵ ᱠᱟᱛᱮ ᱱᱚᱝᱠᱟ ᱠᱚ ᱨᱚᱲᱟ ᱟᱨ ᱠᱚ ᱥᱮᱨᱮᱧᱟ ᱾

ᱥᱮᱨᱮᱧ

ᱨᱚᱲᱮ , ᱛᱟᱦᱟᱸ ᱨᱮᱛᱟ ᱱᱟᱱᱟ ᱛᱟᱨᱱᱟ, ᱛᱟᱦᱟᱸ ᱨᱮᱛᱟ ᱱᱟᱱᱟ ᱡᱮ, ᱛᱟᱦᱟᱸ ᱨᱮᱛᱟ ᱱᱟᱱᱟ ᱦᱳ ᱾

ᱨᱚᱲᱮ , ᱥᱤᱧᱮ ᱥᱟᱱᱟᱢ ᱪᱟᱸᱫᱚ ᱵᱚᱝᱜᱟ, ᱢᱚᱬᱮ ᱵᱩᱨᱩ ᱢᱚᱬᱮ ᱵᱚᱝᱜᱟ, ᱡᱮᱜᱮ ᱡᱚᱛᱚ ᱡᱚᱦᱟᱨ ᱦᱟᱢ ᱠᱚ ᱡᱚᱦᱟᱨ ᱾

ᱨᱚᱲᱮ , ᱟᱹᱛᱩ ᱥᱟᱱᱟᱢ ᱢᱟᱹᱡᱷᱤ ᱵᱟᱵᱟ, ᱟᱹᱭᱩᱨ ᱥᱟᱱᱟᱢ ᱱᱟᱹᱯᱤᱛ ᱵᱟᱵᱟ, ᱡᱮᱜᱮ ᱡᱚᱛᱚ ᱡᱚᱦᱟᱨ ᱯᱮᱲᱟ ᱠᱚ ᱡᱚᱦᱟᱨ ᱾

ᱨᱚᱲᱮ , ᱛᱚᱠᱚᱭ ᱦᱚᱨ ᱞᱟᱫ ᱦᱚᱨ ᱫᱚ ᱥᱚᱝᱠᱟ, ᱛᱚᱠᱚᱭ ᱰᱟᱦᱟᱨ ᱞᱟᱫ ᱰᱟᱦᱟᱨ ᱥᱚᱝᱠᱟ, ᱛᱚᱠᱟ ᱫᱚᱵᱚ ᱯᱟᱸᱡᱟ ᱠᱮᱫ-ᱟ ᱦᱳ ᱾

ᱨᱚᱲᱮ , ᱦᱟᱯᱲᱟᱢ ᱠᱚ ᱦᱚᱨ ᱞᱟᱫ ᱱᱚᱝᱠᱟ, ᱦᱟᱯᱲᱟᱢ ᱠᱚ ᱰᱟᱦᱟᱨ ᱱᱚᱝᱠᱟ, ᱭᱚᱱᱟ ᱜᱮ ᱵᱚ ᱯᱟᱸᱡᱟ ᱠᱮᱫ-ᱟ ᱦᱳ ᱾

ᱨᱚᱲᱮ , ᱛᱟᱦᱟᱸ ᱨᱮᱛᱟ ᱱᱟᱱᱟ ᱛᱟᱨᱱᱟ, ᱛᱟᱦᱟ ᱨᱮᱛᱟ ᱱᱟ~ᱱᱟ~ ᱡᱮ, ᱛᱟ~ᱦᱟᱸ ᱨᱮᱛᱟ ᱱᱟᱱᱟ ᱦᱳ ᱾

ᱛᱤᱛᱮ ᱛᱤᱛᱮ ᱥᱟᱵ ᱟᱹᱜᱩ ᱵᱟᱝ ᱠᱟᱱᱟ, ᱢᱮᱫᱛᱮ ᱢᱮᱫᱛᱮ ᱧᱮᱞ ᱛᱤᱭᱩᱜ ᱵᱟᱝ ᱠᱟᱱᱟ, ᱞᱩᱛᱩᱨ ᱜᱷᱩᱪᱩ ᱨᱮ ᱨᱮᱵᱮᱫ ᱫᱚᱦᱚᱣᱜ ᱦᱳ ᱾

ᱮᱨᱮ ᱧᱟᱢᱮᱱ

ᱦᱚᱭ ᱵᱟᱯᱫᱷᱚᱱ ᱛᱤᱛᱮ ᱥᱟᱵᱟᱜ ᱢᱮᱫ ᱛᱮ ᱧᱮᱞᱟᱜ ᱫᱚ ᱵᱟᱝ ᱠᱟᱱᱟ ᱟᱸᱡᱚᱢ ᱟᱹᱜᱩᱣᱟᱜ ᱠᱟᱱᱟ ᱾ ᱥᱮᱫᱟᱭ ᱵᱩᱨᱩ ᱢᱚᱬᱮ ᱟᱹᱜᱤᱞ ᱦᱟᱯᱲᱟᱢ ᱠᱚᱣᱟᱜ ᱦᱚᱨᱟᱜ ᱰᱟᱦᱟᱨᱟᱜ ᱜᱮᱵᱚ ᱯᱟᱸᱡᱟ ᱟᱠᱟᱫ-ᱟ ᱾ ᱜᱮᱞᱵᱟᱨ ᱥᱤᱧ ᱜᱮᱞᱵᱟᱨ ᱧᱤᱫᱟᱹ ᱮᱨᱮ ᱟᱛᱱᱟᱜ ᱠᱷᱚᱫᱮ ᱢᱟᱛᱠᱚᱱ ᱞᱮᱯᱮᱡ ᱛᱤᱨᱤᱞ ᱯᱮᱴᱮᱨ ᱵᱟᱲᱮ ᱵᱩᱴᱟᱹᱨᱮ ᱵᱤᱪᱟᱹᱨ ᱞᱮᱫ-ᱟ ᱠᱚ ᱟᱪᱟᱨ ᱞᱮᱫ-ᱟ ᱠᱚ ᱠᱟᱛᱷᱟ ᱮᱨᱮ ᱞᱮᱱᱟ ᱠᱟᱛᱷᱟ ᱠᱷᱚᱫᱮ ᱞᱮᱱᱟ ᱵᱤᱪᱟᱹᱨ ᱞᱮᱯᱮᱡ ᱞᱮᱱᱟ ᱨᱚᱯᱚᱲ ᱯᱮᱴᱮᱨ ᱞᱮᱱᱟ ᱾ ᱠᱟᱛᱷᱟ ᱵᱟᱝ ᱥᱟᱹᱨᱤ ᱞᱮᱱᱛᱮ ᱫᱚᱞᱫᱩᱞᱤ ᱵᱟᱦᱟ ᱵᱟᱸᱫᱮᱞᱟᱨᱮ ᱯᱚᱨᱟᱭᱱᱤ ᱥᱟᱠᱟᱢ ᱪᱮᱛᱟᱱ ᱪᱮᱛᱟᱱ ᱛᱮ ᱥᱤᱠᱟᱹᱴ ᱛᱤᱡᱩ ᱞᱮᱠᱟ ᱴᱩᱸᱰᱟᱝ ᱴᱩᱸᱰᱟᱝ ᱛᱮ ᱯᱟᱨᱚᱢ ᱠᱟᱛᱮ ᱥᱟᱹᱨᱤ ᱥᱟᱨᱡᱚᱢ ᱫᱟᱨᱮ ᱵᱮᱲᱦᱟᱭ ᱨᱮ ᱟᱴᱮᱫ ᱟᱠᱟᱱ ᱞᱮᱧᱚᱜ ᱞᱮᱠᱟᱱ ᱡᱮᱸᱡᱮᱨ ᱫᱷᱤᱨᱤ ᱪᱮᱛᱟᱱ ᱨᱮ ᱯᱚᱨᱟᱭᱱᱤ ᱥᱟᱠᱟᱢ ᱟᱴᱮᱫ ᱠᱟᱛᱮ ᱵᱤᱪᱟᱹᱨ ᱞᱮᱫ ᱟᱪᱟᱨ ᱞᱮᱫ-ᱟ ᱠᱚ ᱾ ᱠᱟᱛᱷᱟ ᱥᱟᱹᱨᱤᱭᱮᱱᱟ , ᱦᱚᱨ ᱰᱟᱦᱟᱨ ᱠᱚ ᱧᱟᱢ ᱠᱮᱫ-ᱟ ᱾ ᱠᱟᱛᱷᱟ ᱥᱟᱹᱨᱤ ᱜᱮᱭᱟ ᱢᱮᱱᱠᱟᱛᱮ ᱵᱟᱦᱟ ᱵᱟᱸᱫᱮᱞᱟ ᱨᱮ ᱜᱩᱲᱜᱩ ᱫᱷᱤᱨᱤ ᱠᱚ ᱪᱟᱯᱟᱫ ᱞᱮᱫ-ᱟ ᱚᱱᱟ ᱫᱚ ᱪᱟᱯᱮᱭᱮᱱᱟ ᱾ ᱵᱟᱦᱟ ᱛᱩᱞᱟᱹᱢ ᱠᱚ ᱪᱟᱯᱟᱫ ᱞᱮᱫ-ᱟ ᱚᱱᱟ ᱫᱚ ᱩᱱᱩᱢᱮᱱᱟ ᱾ ᱫᱷᱚᱨᱚᱢ ᱧᱩᱢ ᱨᱮ ᱡᱚᱦᱟᱨ ᱠᱟᱛᱮ ᱟᱯᱟᱱ ᱟᱯᱤᱱ ᱜᱟᱲ ᱛᱮ ᱠᱚ ᱨᱩᱣᱟᱲ ᱮᱱᱟ ᱾

ᱵᱟᱯ ᱨᱮ ᱫᱷᱚᱱ ᱨᱮ , ᱨᱩᱣᱟᱲ ᱦᱚᱨ ᱨᱮ ᱥᱩᱦᱤ ᱢᱩᱦᱤᱢ ᱧᱮᱞᱚᱜ-ᱟ ᱾ ᱚᱠᱟᱨᱮ ᱪᱚ ᱨᱚᱦᱚᱲ ᱫᱟᱨᱮ ᱥᱟᱜᱮᱱ ᱟᱠᱟᱱᱟ ᱾ ᱟᱹᱰᱤ ᱠᱚ ᱨᱟᱹᱥᱠᱟᱹ ᱡᱚᱝ ᱠᱟᱱᱟ ᱾ ᱚᱠᱟ ᱨᱮᱪᱚ ᱨᱚᱦᱚᱲ ᱫᱟᱨᱮ ᱵᱷᱤᱸᱫᱟᱹᱲ ᱟᱠᱟᱣᱟᱫ ᱠᱚᱣᱟ ᱨᱟᱜ ᱡᱚᱝ ᱠᱟᱱᱟ ᱠᱚ ᱾ ᱛᱮᱦᱮᱧ ᱚᱱᱟ ᱦᱚᱨ ᱚᱱᱟ ᱰᱟᱦᱟᱨ ᱨᱮᱜᱮ ᱵᱚ ᱛᱤᱸᱜᱩ ᱟᱠᱟᱱᱟ ᱾ ᱨᱟᱜ ᱡᱚᱝ ᱦᱚᱲ ᱵᱚ ᱧᱟᱢ ᱟᱠᱟᱫᱮᱭᱟ ᱾

ᱨᱚᱲᱮ , ᱛᱟᱦᱟᱸ ᱨᱮᱛᱟ ᱱᱟᱱᱟ ᱛᱟᱨᱱᱟ, ᱛᱟᱦᱟᱸ ᱨᱮᱛᱟ ᱱᱟᱱᱟ ᱡᱮ, ᱛᱟᱦᱟ ᱨᱮᱛᱟ ᱱᱟᱱᱟ ᱦᱳ ᱾

ᱨᱚᱲᱮ , ᱛᱚᱠᱚᱭ ᱨᱟᱜᱮ ᱪᱮᱛᱮ ᱞᱟᱹᱜᱤᱫ, ᱛᱚᱠᱚᱭ ᱜᱚᱝ ᱮ ᱪᱤᱠᱟᱹᱭ ᱞᱟᱹᱜᱤᱫ, ᱛᱚᱠᱚᱭ ᱫᱩᱲᱩᱵ ᱚᱠᱟ ᱞᱟᱹᱜᱤᱫ ᱦᱳ ᱾

ᱯᱷᱟᱨᱱᱟ ᱨᱟᱜᱮ ᱥᱟᱨᱪᱟᱜ ᱞᱟᱹᱜᱤᱫ, ᱢᱟᱹᱡᱷᱤ ᱜᱚᱝ ᱮ ᱧᱮᱞᱠᱟᱭ ᱞᱟᱹᱜᱤᱫ, ᱟᱨ ᱠᱚ ᱫᱩᱲᱩᱵ ᱵᱟᱨᱛᱮ ᱞᱟᱹᱜᱤᱫ ᱦᱳ ᱾

ᱦᱚᱭ ᱵᱟᱯ ᱨᱮ ᱫᱷᱚᱱ ᱨᱮ ᱯᱷᱟᱨᱱᱟ [ᱟᱹᱛᱩ ᱧᱩᱛᱩᱢ] ᱟᱹᱛᱩ ᱢᱟᱹᱡᱷᱤ ᱦᱚᱯᱚᱱ ᱯᱷᱟᱨᱱᱟ [ᱯᱟᱹᱨᱤᱥ ᱧᱩᱛᱩᱢ] ᱦᱚᱲᱮ ᱨᱟᱜ ᱡᱚᱝ ᱠᱟᱱ ᱛᱟᱦᱮᱸᱫ ᱾ ᱜᱮᱞ ᱥᱮᱨᱢᱟ ᱢᱟᱲᱟᱝ ᱨᱮ ᱪᱚ ᱜᱮᱞ ᱵᱟᱨ ᱥᱮᱨᱢᱟ ᱢᱟᱲᱟᱝ ᱨᱮ ᱪᱚ , ᱜᱮᱞ ᱪᱟᱸᱫᱚ ᱢᱟᱲᱟᱝ ᱨᱮ ᱪᱚ ᱜᱮᱞ ᱵᱟᱨ ᱪᱟᱸᱫᱚ ᱢᱟᱲᱟᱲ ᱨᱮ ᱪᱚ , ᱜᱮᱞ ᱢᱟᱦᱟ ᱢᱟᱲᱟᱝ ᱨᱮ ᱪᱚ ᱜᱮᱞ ᱵᱟᱨ ᱢᱟᱦᱟ ᱢᱟᱲᱟᱝ ᱨᱮ ᱪᱚ ᱜᱚᱡ ᱞᱮᱱᱟ ᱠᱚ ᱜᱩᱨ ᱞᱮᱱᱟ ᱠᱚ ᱾ ᱚᱱᱟᱛᱮ ᱵᱟᱯ ᱨᱮ ᱫᱷᱚᱱ ᱨᱮ ᱱᱩᱠᱩ ᱫᱚ ᱫᱩᱠ ᱮᱱᱟ ᱠᱚ ᱦᱩᱠ ᱮᱱᱟ ᱠᱚ , ᱪᱷᱩᱛ ᱮᱱᱟ ᱠᱚ ᱵᱩᱠᱩᱛ ᱮᱱᱟ ᱠᱚ , ᱥᱚ ᱭᱮᱱᱟ ᱠᱚ ᱥᱤᱸᱲᱤᱡ ᱮᱱᱟ ᱠᱚ , ᱵᱚᱦᱚᱜ ᱯᱮᱨᱮᱡ ᱡᱚᱵᱽᱨᱟ , ᱞᱩᱛᱩᱨ ᱯᱮᱨᱮᱡ ᱢᱟᱸᱭᱟᱢ , ᱫᱮᱭᱟ ᱯᱮᱨᱮᱡ ᱛᱚᱨᱚᱡ ᱞᱟᱴᱷᱟᱦᱟᱫ ᱠᱚᱣᱟ ᱾

ᱟᱹᱛᱩ ᱦᱚᱲ ᱫᱤᱥᱚᱢ ᱦᱚᱲ ᱟᱨ ᱵᱚᱝᱜᱟ ᱵᱳᱨᱳ ᱠᱚ ᱥᱟᱦᱟ ᱵᱟᱹᱜᱤᱭᱟᱫ ᱠᱚᱣᱟ ᱾ ᱟᱹᱰᱤ ᱫᱩᱠ ᱥᱟᱥᱮᱛ ᱨᱚᱠᱚ ᱛᱟᱦᱮᱸ ᱭᱮᱱᱟ ᱾

ᱥᱮᱨᱮᱧ

ᱫᱩᱠ ᱫᱚ ᱫᱷᱩᱶᱟ ᱞᱮᱠᱟ ᱠᱩᱦᱲᱟᱹ ᱜᱮ , ᱫᱩᱠ ᱫᱚ ᱫᱷᱩᱲᱤ ᱞᱮᱠᱟ ᱞᱟᱴᱷᱟᱜ ᱜᱮ , ᱫᱩᱠ ᱫᱚ ᱦᱚᱭᱟᱛᱮ ᱫᱟᱜ-ᱮᱱᱟ ᱵᱚᱦᱮᱞᱚᱜ ᱫᱚ ᱾ ᱫᱩᱠ ᱫᱚ ᱞᱟᱴᱷᱮ ᱞᱮᱠᱟ ᱛᱟᱦᱮᱸᱠᱟᱱ , ᱫᱩᱠ ᱫᱚ ᱞᱟᱴᱷᱟ ᱞᱮᱠᱟ ᱞᱟᱴᱷᱟᱭᱮᱱ , ᱫᱩᱠ ᱫᱚ ᱱᱟᱯᱟᱭ ᱵᱩᱰᱭᱟᱹᱢ ᱛᱟᱦᱮᱸᱠᱟᱱ , ᱫᱩᱠ ᱫᱩᱧ ᱠᱩᱴᱟᱹᱢ ᱪᱷᱟᱰᱟᱣ ᱾

ᱚᱱᱟᱛᱮ ᱱᱩᱠᱩ ᱦᱚᱲ ᱫᱚ ᱱᱤᱨᱟᱹᱭ ᱨᱮ ᱵᱟᱠᱚ ᱛᱟᱦᱮᱸ ᱫᱟᱲᱮᱭᱟᱜ-ᱟ ᱾ ᱧᱤᱫᱟᱹ ᱚᱲᱟᱜ ᱥᱟᱰᱮᱭᱮᱱᱟ , ᱥᱤᱢ ᱠᱚ ᱪᱚᱨ ᱪᱚᱨ ᱮᱱᱟ , ᱪᱟᱜᱟᱢ ᱪᱟᱜᱟᱢ ᱛᱟᱲᱟᱢ ᱠᱚ ᱟᱸᱡᱚᱢ ᱠᱮᱫ-ᱟ ᱥᱚᱝ ᱦᱩᱲᱩ ᱵᱟᱝ ᱥᱟᱦᱟᱨ ᱞᱮᱱᱟ , ᱥᱟᱸᱵᱟᱜ ᱵᱷᱩᱨᱟᱹᱜ ᱠᱚ ᱠᱩᱠᱢᱩ ᱠᱮᱫ-ᱟ ᱾

ᱟᱫᱚ ᱢᱟᱹᱡᱷᱤ ᱵᱟᱵᱟ ᱴᱷᱮᱱ ᱠᱩᱞᱤ ᱡᱚᱝ ᱮ ᱥᱮᱱ ᱮᱱᱟ ᱟᱨ ᱱᱚᱶᱟ ᱠᱚ ᱠᱟᱛᱷᱟᱭ ᱞᱟᱹᱭ ᱟᱫᱮᱭᱟ ᱾ ᱢᱟᱹᱡᱷᱤ ᱵᱟᱵᱟ ᱦᱚᱸᱭ ᱞᱟᱹᱭ ᱨᱩᱣᱟᱲ ᱟᱫᱮᱭᱟ ᱾ ᱵᱟᱯᱫᱷᱚᱱ ᱟᱯᱮ ᱢᱟ ᱜᱚᱡ ᱜᱩᱨ ᱨᱮᱱᱟᱜ ᱵᱷᱟᱸᱰᱟᱱ ᱠᱟᱹᱢᱤ ᱥᱟᱨᱮᱡ ᱟᱠᱟᱱ ᱛᱟᱯᱮᱭᱟ ᱾ ᱚᱱᱟᱛᱮ ᱱᱚᱝᱠᱟ ᱮᱨᱮ ᱫᱚᱢ ᱟᱹᱭᱠᱟᱣ ᱮᱫ-ᱟ ᱾ ᱢᱟ ᱥᱚᱡᱚᱜ ᱯᱮ ᱵᱷᱟᱸᱰᱟᱱ ᱵᱚ ᱩᱢ ᱯᱷᱟᱨᱪᱟ ᱠᱟᱯᱮᱭᱟ ᱾ ᱜᱚᱰᱮᱛ ᱤᱧ ᱞᱟᱹᱭ ᱟᱭᱟ ᱟᱹᱛᱩᱨᱮ ᱦᱚᱦᱚᱭᱟᱭ ᱾

ᱢᱟᱹᱡᱷᱤ ᱵᱟᱵᱟ ᱜᱚᱰᱮᱛᱮ ᱞᱟᱹᱭ ᱟᱫᱮᱭᱟ ᱢᱚᱬᱮ ᱢᱟᱦᱟ ᱛᱟᱭᱚᱢ ᱾ ᱜᱚᱰᱮᱛ ᱫᱚ ᱟᱹᱛᱩᱨᱮ ᱚᱲᱟᱜ ᱚᱲᱟᱜ ᱮ ᱦᱚᱦᱚ ᱠᱮᱫ-ᱟ ᱾ ᱢᱤᱫ ᱦᱟᱲᱟᱢ ᱢᱤᱫ ᱵᱩᱰᱷᱤ ᱯᱷᱟᱨᱱᱟ ᱚᱲᱟᱜ ᱪᱟᱞᱟᱜ ᱞᱟᱹᱜᱤᱫ ᱾ ᱡᱚᱛᱚ ᱦᱚᱲ ᱠᱚ ᱥᱮᱴᱮᱨ ᱮᱱᱟ ᱾ ᱚᱲᱟᱜ ᱢᱩᱱᱤᱵ ᱫᱚ ᱯᱟᱨᱠᱚᱢ ᱠᱚ ᱯᱟᱹᱴᱭᱟᱹ ᱠᱚ ᱜᱟᱸᱰᱚ ᱠᱚ ᱫᱩᱲᱩᱵ ᱞᱟᱹᱜᱤᱫ-ᱮ ᱵᱤᱞᱟᱫ ᱠᱚᱣᱟ ᱾ ᱫᱩᱲᱩᱵ ᱮᱱᱟ ᱠᱚ , ᱟᱫᱚ ᱢᱤᱢᱤᱫ ᱯᱷᱩᱲᱩᱜ ᱛᱟᱝ ᱦᱟᱺᱰᱤ ᱦᱚᱸ ᱜᱷᱟᱹᱨᱱᱤᱭ ᱮᱢᱟᱫ ᱠᱚᱣᱟ ᱾ ᱧᱩ ᱵᱟᱲᱟ ᱠᱟᱛᱮ ᱟᱫᱚ ᱦᱚᱯᱚᱱ ᱠᱚ ᱠᱚ ᱢᱮᱱᱮᱫ-ᱟ ᱾ ᱵᱟᱯᱫᱷᱚᱱ ᱱᱚᱶᱟ ᱫᱚ ᱪᱮᱫ ᱦᱟᱺᱰᱤᱢ ᱮᱢᱟᱫ ᱞᱮᱭᱟ ᱢᱮᱨᱟ ᱜᱮ ᱵᱟᱞᱮ ᱧᱟᱢ ᱞᱮᱫ ᱫᱚ ᱾ ᱜᱟᱨᱡᱚᱱᱮ ᱢᱮᱱ ᱠᱮᱫ-ᱟ , ᱢᱚᱬᱮ ᱢᱟᱦᱟ ᱢᱟᱬᱟᱝ ᱨᱮ ᱨᱚᱞ ᱡᱟᱝ ᱪᱟᱣᱞᱮᱡᱟᱝ ᱛᱮᱫ ᱫᱚ ᱢᱟᱹᱡᱷᱤ ᱵᱟᱵᱟ ᱚᱲᱟᱜ ᱞᱮ ᱤᱫᱤ ᱦᱚᱴᱚ ᱟᱠᱟᱫ-ᱟ ᱾ ᱟᱠᱚ ᱚᱲᱟᱜ ᱨᱟᱹᱱᱩ ᱛᱮᱜᱮ ᱦᱟᱺᱰᱤ ᱞᱮ ᱦᱟᱹᱨ ᱟᱠᱟᱫ-ᱟ , ᱢᱮᱨᱟ ᱛᱮᱫ ᱫᱚ ᱢᱟᱹᱡᱷᱤ ᱵᱟᱵᱟ ᱚᱲᱟᱜ ᱨᱮᱜᱮ ᱢᱮᱱᱟᱜ-ᱟ ᱾ ᱟᱹᱠᱤᱱ ᱜᱮ ᱠᱤᱱ ᱞᱟᱹᱭ ᱢᱟ ᱪᱮᱫ ᱞᱮᱠᱟᱱ ᱢᱮᱨᱟ ᱠᱟᱱᱟ ᱾ ᱟᱫᱚ ᱢᱟᱹᱡᱷᱤ ᱵᱟᱵᱟᱭ ᱞᱟᱹᱭ ᱠᱮᱫ-ᱟ ᱾ ᱦᱚᱭ ᱵᱟᱯᱫᱷᱚᱱ ᱱᱚᱶᱟ ᱫᱚ ᱢᱩᱪᱩ ᱨᱮᱠᱚ ᱪᱟᱞᱟ ᱟᱠᱟᱫ-ᱟ ᱾ ᱚᱱᱟᱛᱮ ᱢᱮᱨᱟ ᱫᱚ ᱵᱟᱹᱱᱩᱜ ᱟᱱᱟ , ᱱᱟᱹᱨᱲᱤ ᱨᱮᱦᱚᱸ ᱵᱟᱝ ᱰᱷᱟᱝ ᱚᱜ ᱠᱟᱱᱟ ᱾ ᱢᱟᱹᱡᱷᱤ ᱵᱟᱵᱟᱭ ᱢᱮᱱᱟ , ᱦᱚᱭ ᱵᱟᱯᱫᱷᱚᱱ ᱢᱮᱨᱟ ᱵᱟᱝ ᱰᱷᱟᱝ ᱚᱜ-ᱟ , ᱯᱷᱟᱨᱱᱟ ᱚᱲᱟᱜ ᱨᱤᱱ ᱢᱟᱨᱮ ᱦᱟᱯᱲᱟᱢ ᱠᱚ ᱜᱮ ᱯᱟᱞᱮ ᱠᱚ ᱰᱷᱟᱝ ᱚᱜ ᱠᱟᱱᱟ ᱾ ᱚᱱᱟᱛᱮ ᱵᱟᱝ ᱰᱷᱟᱝ ᱚᱜ ᱞᱟᱹᱜᱤᱫ , ᱵᱟᱝ ᱰᱷᱟᱝ ᱠᱟᱹᱢᱤ ᱵᱚ ᱠᱟᱹᱢᱤ ᱛᱟᱠᱚ ᱨᱮᱱᱟᱜ ᱦᱮᱲᱮ ᱦᱩᱲᱩ ᱵᱚ ᱥᱚᱝ ᱟ ᱾ ᱢᱟ ᱪᱮᱫ ᱯᱮ ᱢᱮᱱᱮᱫ-ᱟ ?

ᱦᱚᱭ ᱛᱚᱵᱮ ᱵᱟᱯᱫᱷᱚᱱ ᱚᱱᱟ ᱫᱚ ᱵᱚ ᱠᱟᱹᱢᱤ ᱠᱟᱜ ᱜᱮᱭᱟ ᱾ ᱫᱮ ᱥᱚᱡᱽ ᱠᱚ ᱥᱟᱢᱟᱝ ᱯᱮ ᱾ ᱟᱫᱚ ᱜᱟᱨᱡᱚᱱ ᱫᱚ ᱦᱩᱲᱩ ᱜᱩᱦᱬᱤ ᱥᱟᱠᱟᱢ ᱪᱟᱨᱮᱡ ᱥᱟᱥᱟᱝ ᱥᱩᱛᱟᱹᱢ ᱫᱩᱵᱤᱜᱟᱥ ᱟᱫᱽᱣᱟ ᱪᱟᱣᱞᱮᱭ ᱧᱟᱢ ᱚᱰᱚᱠ ᱠᱮᱫ-ᱟ ᱾

ᱯᱮ ᱴᱩᱠᱩᱡ ᱦᱟᱺᱰᱤ ᱨᱮᱱᱟᱜ ᱦᱩᱲᱩ ᱠᱚ ᱥᱚᱝ ᱠᱮᱫ-ᱟ , ᱢᱤᱫ ᱴᱩᱠᱩᱡ ᱨᱮ ᱜᱮᱞ ᱵᱟᱨ ᱠᱟᱴᱷᱟ ᱠᱟᱛᱮ ᱾ ᱯᱮ ᱴᱩᱠᱩᱡ ᱫᱚ ᱢᱟᱨᱟᱝ ᱵᱳᱨᱳ ᱦᱟᱯᱲᱟᱢ ᱠᱚ ᱟᱨ ᱜᱚᱡ ᱜᱩᱨ ᱟᱠᱟᱱ ᱦᱚᱲ ᱞᱟᱹᱜᱤᱫ ᱾

ᱜᱤᱨᱟᱹ ᱠᱚ ᱛᱚᱞ ᱠᱮᱫ-ᱟ , ᱥᱟᱥᱟᱝ ᱥᱩᱛᱟᱹᱢ ᱛᱩᱠᱟᱹ ᱛᱟᱥᱟᱫ ᱛᱚᱣᱟ ᱵᱟᱞᱮ ᱛᱮ ᱾ ᱪᱟᱞ ᱟᱠᱚᱣᱟ ᱠᱚ ᱦᱚᱯᱚᱱ ᱮᱨᱟ ᱢᱤᱥᱨᱟ ᱦᱟᱛᱚᱢ ᱠᱟᱹᱠᱤ ᱯᱷᱩᱞ ᱨᱟᱹᱱᱤ ᱯᱮᱲᱟ ᱾

ᱢᱩᱪᱟᱹᱫ ᱪᱟᱨ ᱧᱩ ᱠᱟᱛᱮ ᱟᱹᱛᱩ ᱦᱚᱲ ᱥᱮᱨᱮᱧ ᱡᱚᱝ ᱠᱟᱱᱟ -

ᱥᱮᱨᱮᱧ

ᱛᱟᱦᱟᱸ ᱨᱮᱛᱟ ᱱᱟᱱᱟ ᱛᱟᱨᱱᱟ , ᱛᱟᱦᱟᱸ ᱨᱮᱛᱟ ᱱᱟᱱᱟ ᱦᱳ , ᱛᱟᱦᱟᱸ ᱨᱮᱛᱟ ᱱᱟᱱᱟ ᱡᱮ ᱾ ᱛᱚᱠᱚᱭ ᱠᱚᱫᱚ ᱠᱚ ᱜᱤᱨᱟᱹ ᱭᱮᱱᱟ ᱦᱳ , ᱥᱟᱥᱟᱝ ᱥᱩᱛᱟᱹᱢ ᱛᱩᱠᱟᱹ ᱛᱟᱥᱟᱫ , ᱛᱚᱣᱟ ᱵᱟᱞᱮ ᱦᱟᱭ ᱨᱮ ᱨᱟ~ᱨᱟᱜ ᱫᱚ , ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱦᱤᱨᱞᱟᱹ ᱾

ᱛᱚᱠᱚᱭ ᱠᱚᱫᱚ ᱠᱚ ᱜᱤᱨᱟᱹ ᱭᱮᱱᱟ ᱦᱳ, ᱥᱟᱥᱟᱝ ᱥᱩᱛᱟᱹᱢ ᱛᱩᱠᱟᱹ ᱛᱟᱥᱟᱫ , ᱛᱚᱣᱟ ᱵᱟᱞᱮ ᱦᱟᱭ ᱨᱮ ᱦᱚᱜᱢᱚᱨ ᱫᱚ , ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱦᱤᱨᱞᱟᱹ ᱾

ᱦᱚᱯᱚᱱ ᱮᱨᱟ ᱢᱤᱥᱨᱟ ᱦᱟᱛᱚᱢ ᱠᱟᱹᱠᱤ ᱯᱷᱩᱞ ᱯᱮᱲᱟ ᱜᱤᱨᱟᱹ ᱭᱮᱱᱟᱦᱚ , ᱥᱟᱥᱟᱝ ᱥᱩᱛᱟᱹᱢ ᱛᱩᱠᱟᱹ ᱛᱟᱥᱟᱫ , ᱛᱚᱣᱟ ᱵᱟᱞᱮ ᱦᱟᱭ ᱨᱮ ᱨᱟ~ᱨᱟᱜ ᱫᱚ , ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱦᱤᱨᱞᱟᱹ ᱾

ᱵᱟᱞᱟ ᱥᱟᱠᱟ ᱠᱚ ᱜᱤᱨᱟᱹ ᱭᱮᱱᱟ ᱦᱳ , ᱥᱟᱥᱟᱝ ᱥᱩᱛᱟᱹᱛ ᱛᱩᱠᱟᱹ ᱛᱟᱥᱟᱥ ᱛᱚᱣᱟ ᱵᱟᱞᱮ ᱦᱟᱭ ᱨ ᱦᱚᱜᱢᱚᱨ ᱫᱚ , ᱦᱤᱨᱞᱟᱹ ᱢᱟᱨᱟᱝ ᱵᱩᱨᱩ ᱦᱤᱨᱞᱟᱹ ᱾

ᱱᱚᱝᱠᱟ ᱜᱤᱨᱟᱹ ᱠᱚ ᱛᱚᱞ ᱵᱟᱲᱟ ᱠᱟᱛᱮ ᱜᱟᱛᱮ ᱜᱟᱛᱮ ᱦᱟᱹᱴᱤᱧ ᱵᱟᱲᱟ ᱟᱱ ᱛᱮ ᱠᱚ ᱟᱯᱟᱱ ᱟᱹᱯᱤᱱ ᱚᱲᱟᱜ ᱠᱚ ᱨᱩᱣᱟᱲ ᱮᱱᱟ ᱾ ᱫᱚᱥᱟᱨ ᱦᱤᱞᱚᱜ ᱠᱷᱚᱱ ᱜᱤᱨᱟᱹ ᱞᱟᱹᱭ ᱠᱚ ᱫᱟᱬᱟ ᱠᱮᱫ-ᱟ ᱾

ᱥᱮᱨᱮᱧ

ᱮᱛᱚᱢ ᱠᱚᱧᱮ ᱥᱟᱢᱟᱝ ᱯᱟᱪᱮ , ᱵᱮᱲᱟ ᱨᱟᱠᱟᱵ ᱵᱮᱲᱟ ᱠᱚᱪᱮ , ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱦᱤᱨᱞᱟᱹ ᱾

ᱫᱟ~ᱟᱜ ᱛᱮᱛᱟᱝ ᱫᱟᱠᱟ ᱨᱮᱸᱜᱮᱡ , ᱜᱚ~ᱚᱰ ᱡᱚᱦᱟᱨ ᱞᱮᱜᱮᱡ ᱞᱮᱜᱮᱡ , ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱦᱤᱨᱞᱟᱹ ᱾

ᱫᱟ~ᱬᱟ ᱠᱮᱫ-ᱟ ᱠᱚ ᱡᱚᱲᱟ ᱡᱚᱲᱟ , ᱱᱮ~ᱶᱛᱟ ᱠᱚᱣᱟ ᱠᱚ ᱡᱚᱛᱚ ᱯᱮᱲᱟ , ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱦᱤᱨᱞᱟᱹ ᱾

ᱯᱟ~ᱨᱚᱢ ᱮᱱᱟ ᱜᱮᱭᱟᱨ ᱢᱟᱦᱟ , ᱥᱮ~ᱴᱮᱨ ᱮᱱᱟ ᱱᱮᱸᱰᱟ ᱢᱟᱦᱟ , ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱦᱤᱨᱞᱟᱹ ᱾

ᱵᱤᱱᱛᱤ

ᱥᱮᱴᱮᱨ ᱮᱱᱟ ᱠᱚ ᱯᱮᱲᱟ ᱯᱟᱹᱦᱬᱟ , ᱠᱩᱞᱦᱤ ᱢᱩᱪᱟᱹᱫ ᱫᱚᱵᱟᱹᱴᱤ ᱠᱷᱚᱱᱟᱜ ᱜᱮᱠᱚ ᱨᱟᱜ ᱦᱚᱢᱚᱨ ᱟᱹᱜᱩ ᱠᱮᱫ-ᱟ ᱾ ᱠᱚᱭᱚᱜ ᱫᱟᱨᱟᱢ ᱠᱮᱫ ᱠᱚᱣᱟ ᱠᱚ ᱟᱹᱛᱩ ᱢᱟᱸᱯᱟᱧᱡᱤ ᱵᱩᱰᱤ ᱮᱨᱟ ᱟᱨ ᱚᱲᱟᱜ ᱦᱚᱲ ᱥᱟᱶᱛᱮ ᱾ ᱦᱚᱭᱚ ᱢᱩᱰᱨᱟᱹ ᱵᱟᱲᱟᱭᱮᱱᱟ ᱠᱚ ᱾ ᱱᱟᱹᱯᱤᱛ ᱵᱟᱵᱟ ᱡᱚᱛᱚ ᱜᱟᱬᱟᱭ ᱦᱚᱭᱚ ᱯᱩᱨᱟᱣ ᱠᱮᱫ ᱠᱚᱣᱟ ᱾ ᱢᱩᱪᱟᱫ ᱩᱛᱟᱹᱨ ᱨᱮ ᱫᱚ ᱠᱤᱥᱟᱹᱬ ᱟᱨ ᱱᱟᱹᱯᱤᱛ ᱠᱤᱱ ᱦᱚᱯᱚᱭᱚ ᱭᱮᱱᱟ ᱾ ᱚᱱᱟ ᱛᱟᱭᱚᱢ ᱠᱤᱥᱟᱹᱬ ᱟᱨ ᱱᱟᱹᱯᱤᱛ ᱚᱲᱟᱜ ᱠᱤᱱ ᱵᱚᱞᱚ ᱭᱮᱱᱟ ᱾ ᱚᱲᱟᱜ ᱠᱷᱚᱱ ᱡᱟᱹᱴᱤ ᱦᱟᱥᱟ ᱠᱟᱲᱮ ᱥᱩᱱᱩᱢ ᱥᱟᱨᱡᱚᱢ ᱥᱟᱠᱟᱢ ᱫᱟᱹᱛᱟᱹᱱᱤ ᱥᱟᱵ ᱥᱮᱯᱮᱧ ᱠᱟᱛᱮ ᱠᱤᱱ ᱚᱰᱚᱠ ᱮᱱᱟ ᱾ ᱱᱟᱹᱯᱤᱛ ᱵᱟᱵᱟ ᱛᱩᱯᱩᱱᱟᱺᱭ ᱜᱷᱟᱴ ᱥᱮᱫ-ᱮ ᱟᱹᱭᱩᱨ ᱠᱮᱫ ᱠᱚᱣᱟ ᱾

ᱥᱮᱨᱮᱧ

ᱨᱚᱲᱮ , ᱛᱟᱦᱟᱸ ᱨᱮᱛᱟ ᱱᱟᱱᱟ ᱛᱟᱨᱱᱟ , ᱛᱟᱦᱟᱸ ᱨᱮᱛᱟ ᱱᱟᱱᱟ ᱦᱳ . ᱛᱟᱦᱟᱸ ᱨᱮᱛᱟ ᱱᱟᱱᱟ ᱡᱮ ᱾

ᱫᱟᱬᱟ ᱫᱟᱬᱟ ᱪᱤᱭᱟᱹ ᱭᱟᱹᱠᱤᱱ ᱥᱟᱹᱨᱤ ᱫᱟᱜ, ᱯᱟᱸᱡᱟ ᱯᱟᱸᱡᱟ ᱯᱟᱱᱛᱮ ᱭᱟᱹᱠᱤᱱ ᱥᱟᱹᱛᱤᱧ ᱫᱟᱜ , ᱱᱟᱭ ᱱᱟᱹᱯᱤᱛ ᱵᱟᱵᱟᱭ ᱱᱟᱺᱜᱭᱩᱨ ᱦᱳ ᱾ ᱹᱹᱹᱹᱹᱹᱹᱹᱹ ᱱᱚᱝᱠᱟ ᱱᱟᱺᱭ ᱫᱟᱜ ᱯᱟᱱᱛᱮ ᱨᱮᱱᱟᱜ ᱚᱡᱮ ᱫᱚ ᱦᱟᱯᱮᱱ ᱦᱟ ᱨᱮ ᱱᱚᱶᱟ ᱡᱤᱣᱤ ᱡᱟᱱᱟᱢ ᱨᱩᱣᱟᱲᱚᱜ ᱨᱮᱱᱟᱜ ᱯᱟᱹᱛᱭᱟᱣ ᱢᱮᱱᱟᱜ-ᱟ ᱾ ᱚᱱᱟᱛᱮ ᱥᱟᱹᱨᱤ ᱫᱟᱜ ᱥᱚᱱᱚᱛ ᱜᱷᱟᱴ ᱨᱮ ᱛᱩᱯᱩ ᱞᱮᱱᱠᱷᱟᱱ ᱢᱟᱹᱢᱤ ᱡᱟᱱᱟᱢ ᱧᱟᱢᱚᱜ-ᱟ ᱾ ᱵᱟᱝ ᱠᱷᱟᱱ ᱡᱟᱹᱡᱟᱱᱟᱢ ᱮᱴᱟᱜᱚᱜ-ᱟ ᱾ ᱥᱮᱫᱟᱭ ᱟᱹᱜᱤᱞ ᱢᱟᱨᱮ ᱯᱩᱭᱞᱩ ᱦᱟᱯᱲᱟᱢ ᱠᱤᱱ ᱪᱮᱬᱮ ᱠᱟᱱ ᱛᱟᱦᱮᱫ , ᱩᱱ ᱠᱤᱱ ᱜᱚᱴᱟ ᱚᱜᱚᱢ ᱫᱚᱨᱭᱟ ᱵᱤᱡ [ᱵᱤᱞᱤ] ᱠᱤᱱ ᱵᱮᱡ ᱞᱮᱫ-ᱟ ᱾ ᱫᱟᱜ ᱯᱤᱪᱷᱤ ᱜᱮ ᱡᱩᱫᱟᱹ ᱡᱩᱫᱟᱹ ᱡᱟᱹᱱᱤ ᱠᱚ ᱵᱩᱥᱟᱹᱲ ᱞᱮᱱᱟ ᱾ ᱯᱩᱭᱞᱩ ᱫᱚ ᱢᱤᱫ ᱠᱩᱪᱤ ᱩᱱᱠᱩ ᱫᱚ ᱵᱟᱠᱚ ᱦᱚᱯᱚᱱᱚᱜ-ᱟ ᱦᱚᱲᱢᱚ ᱜᱮᱠᱚ ᱠᱮᱪᱟᱜᱚᱜ-ᱟ ᱾ ᱤᱱᱟᱹ ᱛᱟᱭᱚᱢ ᱵᱤᱱ ᱵᱤᱥᱤ ᱡᱟᱝ ᱟᱱᱠᱚ ᱠᱚ , ᱩᱱᱛᱩ ᱫᱚ ᱵᱤᱞᱤ ᱠᱟᱛᱮ ᱠᱚ ᱵᱩᱥᱟᱹᱲᱚᱜ-ᱟ ᱾ ᱤᱱᱟᱹ ᱛᱟᱭᱚᱢ ᱵᱤᱥᱤ ᱡᱟᱝ ᱟᱱ ᱠᱚ ᱵᱟᱨ ᱡᱟᱸᱜᱟ ᱯᱩᱱ ᱡᱟᱸᱜᱟ ᱥᱟᱸᱜᱮ ᱡᱟᱜᱟ ᱟᱱᱠᱚ ᱵᱤᱞᱤ ᱠᱷᱚᱱ ᱠᱚ ᱵᱩᱥᱟᱹᱲ ᱞᱮᱱᱟ ᱾ ᱫᱟᱬᱟ ᱫᱟᱬᱟ ᱟᱹᱛᱤᱧ ᱟᱹᱛᱤᱧ ᱱᱚᱝᱠᱟᱱ ᱫᱟᱜ ᱠᱤᱱ ᱧᱟᱢ ᱠᱮᱫ-ᱟ ᱚᱱᱟ ᱨᱮ ᱟᱹᱛᱤᱧ ᱠᱟᱛᱮ ᱠᱟᱨᱟᱢ ᱫᱟᱨᱮ ᱨᱮ ᱠᱤᱱ ᱵᱤᱡ ᱠᱮᱫ-ᱟ , ᱚᱱᱟ ᱠᱷᱚᱱ ᱢᱟᱹᱱᱢᱤ ᱠᱤᱱ ᱵᱩᱥᱟᱹᱲ ᱞᱮᱱᱟ ᱾ ᱛᱮᱦᱮᱧ ᱚᱱᱠᱟᱱ ᱫᱟᱜ ᱴᱟᱹᱴᱤ ᱡᱷᱟᱹᱨᱤ ᱥᱟᱥᱟᱝ ᱫᱟᱨᱦᱟ ᱥᱚᱱᱟ ᱛᱚᱞ ᱥᱚᱱᱚᱛ ᱢᱮᱨᱟᱞ ᱜᱷᱟᱴ ᱨᱮ ᱱᱩᱠᱩ ᱯᱷᱟᱨᱱᱟ ᱯᱟᱹᱨᱤᱥ ᱦᱚᱲ ᱫᱚ ᱱᱟᱹᱭ ᱫᱟᱜ ᱡᱟᱹᱴᱤ ᱦᱟᱥᱟ ᱛᱮ ᱩᱢ ᱠᱮᱫ ᱱᱟᱲᱠᱟ ᱠᱮᱫ ᱠᱚᱛᱮ ᱵᱚ ᱥᱚᱱᱮᱨ ᱥᱤᱫᱷᱚ ᱠᱮᱫ ᱠᱚᱣᱟ ᱾

ᱢᱩᱪᱟᱹᱫ

ᱛᱮᱦᱮᱧ ᱠᱷᱚᱱ ᱱᱩᱠᱩ ᱯᱷᱟᱨᱱᱟ ᱯᱟᱹᱨᱤᱥ ᱦᱚᱲ ᱫᱚ ᱥᱮᱸᱫᱽᱨᱟ ᱨᱮ ᱠᱟᱨᱠᱟ ᱨᱮ ᱵᱚᱝᱜᱟᱜ ᱨᱮ ᱵᱩᱨᱩᱜ ᱨᱮ ᱦᱟᱺᱰᱤ ᱵᱚᱰᱚᱡ ᱫᱟᱜ ᱜᱚᱜ ᱡᱚᱛᱚᱣᱟᱜ ᱨᱮᱜᱮ ᱵᱚ ᱫᱩ ᱫᱮᱞᱟ ᱟᱠᱚᱣᱟ ᱾ ᱚᱱᱟ ᱛᱮᱠᱚ ᱞᱟᱹᱭᱟ ᱱᱟᱦᱮᱞ ᱜᱟᱰᱠᱮ ᱫᱚ ᱠᱚ ᱠᱚᱞᱥᱟᱭᱟ ᱠᱟᱛᱷᱟ ᱜᱟᱸᱠᱮ ᱫᱚ ᱵᱟᱠᱚ ᱫᱚᱱ ᱯᱟᱨᱚᱢᱟ ᱾ ᱦᱩᱰᱤᱧᱟᱜ ᱦᱚᱸ ᱥᱟᱨᱡᱚᱢ ᱜᱮ ᱢᱟᱨᱟᱝ ᱟᱜ ᱦᱚᱸ ᱥᱟᱨᱡᱚᱢ ᱜᱮ ᱡᱚᱦᱟᱨ ᱾

ᱥᱮᱨᱮᱧ

ᱱᱟᱭ ᱯᱮᱲᱟ ᱱᱟᱯᱟᱭ ᱯᱮᱲᱟ , ᱛᱚᱠᱚᱭ ᱠᱚᱫᱚ ᱯᱮᱲᱟ ᱪᱷᱟᱢᱰᱟ ᱞᱟᱛᱟᱨ ? ᱛᱚᱠᱚᱭ ᱠᱚᱫᱚ ᱯᱮᱲᱟ ᱡᱷᱟᱹᱴᱤ ᱴᱟᱹᱴᱤ ᱵᱟᱵᱚ ᱵᱚᱞᱟ , ᱛᱚᱠᱚᱭ ᱠᱚᱫᱚ ᱯᱮᱲᱟ ᱫᱚᱵᱟᱹᱴᱤ ᱨᱮ ᱾

ᱱᱟᱭ ᱯᱮᱲᱟ ᱱᱟᱯᱟᱭ ᱯᱮᱲᱟ , ᱦᱚᱯᱚᱱ ᱮᱨᱟ ᱢᱤᱥᱨᱟ , ᱦᱟᱛᱚᱢ ᱠᱟᱹᱠᱤ ᱯᱷᱩᱞ ᱯᱮᱲᱟ , ᱱᱩᱠᱩ ᱠᱚᱫᱚ ᱯᱮᱲᱟ ᱪᱷᱟᱢᱰᱟ ᱞᱟᱛᱟᱨ , ᱵᱟᱞᱟ ᱯᱮᱲᱟ ᱠᱚᱫᱚ ᱫᱚᱵᱟᱹᱴᱤ ᱨᱮ ᱾

ᱱᱟᱭ ᱯᱮᱲᱟ ᱱᱟᱯᱟᱭ ᱯᱮᱲᱟ , ᱛᱚᱠᱚᱭ ᱠᱚ ᱫᱚ ᱯᱮᱲᱟ , ᱦᱟᱺᱰᱤ ᱵᱷᱟᱹᱴᱤ ᱫᱟᱜ ᱜᱚᱜ , ᱛᱚᱠᱚᱭ ᱠᱚᱫᱚ ᱯᱮᱲᱟ ᱥᱤᱥᱤᱨ ᱰᱚᱞᱟᱣ ᱾

ᱱᱟᱭ ᱯᱮᱲᱟ ᱱᱟᱯᱟᱭ ᱯᱮᱲᱟ , ᱟᱛᱩ ᱢᱟᱯᱟᱧᱡᱤ ᱠᱚ ᱦᱟᱺᱰᱤ ᱵᱷᱟᱹᱴᱤ ᱫᱟᱜ ᱜᱚᱜ , ᱠᱩᱢᱟᱝ ᱡᱟᱶᱟᱭ ᱠᱚ ᱫᱚ ᱥᱤᱥᱤᱨ ᱰᱚᱞᱟᱣ ᱾

ᱱᱟᱭ ᱯᱮᱲᱟ ᱱᱟᱯᱟᱭ ᱯᱮᱲᱟ , ᱦᱟᱺᱰᱤ ᱵᱷᱟᱹᱴᱤ ᱫᱟᱜ ᱜᱚᱜ , ᱯᱟᱭ ᱠᱩᱲᱟᱹᱭ ᱪᱷᱟᱢᱰᱟ ᱦᱟᱺᱰᱤ , ᱥᱤᱥᱤᱨ ᱰᱚᱞᱟᱣ ᱠᱚ ᱫᱚ ᱥᱤᱥᱤᱨ ᱦᱟᱺᱰᱤ , ᱨᱟᱢᱟ ᱨᱮᱰᱮᱫ ᱨᱮᱫᱚ ᱥᱟᱢᱮᱞᱟᱭ ᱜᱮ ᱾