ᱨᱟᱢᱮᱥᱥᱚᱨ ᱢᱩᱨᱢᱩ

ᱨᱟᱢᱮᱥᱥᱚᱨ ᱢᱩᱨᱢᱩ
ᱨᱟᱢᱮᱥᱥᱚᱨ ᱢᱩᱨᱢᱩ
ᱡᱟᱱᱟᱢ ᱧᱩᱛᱩᱢ ᱡᱟᱱᱟᱢ ᱢᱟᱹᱦᱤᱛ  ᱟᱨ  ᱡᱟᱱᱟᱢ ᱴᱷᱟᱶ	᱒᱐ ᱥᱮᱢᱴᱮᱢᱵᱚᱨ ᱑᱙᱕᱕ ᱜᱟᱺᱵᱷᱟᱹᱨᱤᱭᱟᱹ, ᱡᱟᱢᱵᱚᱱᱤ, ᱯᱟᱪᱮ ᱢᱮᱫᱤᱱᱤᱯᱩᱨ, ᱯᱚᱪᱷᱤᱢ ᱵᱟᱝᱞᱟ, ᱥᱤᱧᱚᱛ
ᱫᱤᱥᱚᱢᱤᱭᱟᱹ	ᱥᱤᱧᱚᱛᱤᱭᱟᱹ
ᱮᱴᱟᱜ ᱧᱩᱛᱩᱢ	ᱟᱹᱫᱤᱢ ᱥᱟᱱᱛᱟᱲ
ᱠᱟᱹᱢᱤ	ᱚᱱᱚᱞᱤᱭᱟᱹ

ᱨᱟᱢᱮᱥᱥᱚᱨ ᱢᱩᱨᱢᱩ ᱫᱚ ᱤᱝᱨᱮᱡᱤ ᱑᱙᱕᱕ ᱥᱟᱞ ᱨᱮᱱᱟᱜ ᱒᱐ ᱥᱮᱯᱴᱮᱢᱵᱚᱨ ᱢᱟᱹᱦᱤᱛ ᱦᱤᱞᱚᱜ ᱮ ᱡᱟᱱᱟᱢ ᱟᱠᱟᱱᱟ᱾ ᱡᱟᱱᱟᱢ ᱟᱹᱛᱩ ᱫᱚ ᱯᱚᱪᱷᱤᱢ ᱵᱟᱝᱞᱟ ᱨᱮᱱᱟᱜ ᱯᱚᱪᱷᱤᱢ ᱢᱮᱫᱤᱱᱤᱯᱩᱨ ᱨᱮᱭᱟᱜ ᱡᱟᱢᱵᱚᱱᱤ ᱛᱷᱟᱱᱟ ᱨᱮᱭᱟᱜ ᱫᱷᱟᱲᱥᱟ ᱰᱟᱠ ᱚᱲᱟᱜ ᱨᱮᱭᱟᱜ ᱜᱟᱺᱵᱷᱟᱹᱨᱤᱭᱟᱹ ᱟᱹᱛᱩ ᱨᱮ᱾ ᱟᱯᱟᱛ ᱧᱩᱛᱩᱢ ᱫᱚ ᱜᱳᱵᱚᱨᱫᱷᱚᱱ ᱢᱩᱨᱢᱩ ᱟᱨ ᱮᱸᱜᱟᱛ ᱧᱩᱛᱩᱢ ᱫᱚ ᱯᱷᱩᱞᱢᱚᱱᱤ ᱢᱩᱨᱢᱩ᱾

ᱥᱮᱪᱮᱫ

ᱨᱟᱢᱮᱥᱥᱚᱨ ᱢᱩᱨᱢᱩ ᱟᱜ ᱯᱟᱹᱴᱷᱩᱣᱟᱹ ᱡᱤᱭᱚᱱ ᱵᱟᱵᱚᱛ ᱡᱟᱹᱥᱛᱤ ᱠᱟᱛᱷᱟ ᱵᱟᱝ ᱵᱟᱲᱟᱭ ᱟᱠᱟᱱᱟ᱾ ᱠᱷᱟᱹᱞᱤ ᱵᱟᱲᱟᱭ ᱟᱠᱟᱱᱟ, ᱯᱨᱤ-ᱭᱩᱱᱤᱵᱷᱟᱨᱥᱤᱴᱤ (ᱡᱮᱜᱮᱛ ᱵᱤᱨᱫᱟᱹᱜᱟᱲ ᱢᱟᱲᱟᱝ) ᱦᱟᱹᱵᱤᱫ ᱯᱟᱲᱦᱟᱣ ᱠᱟᱛᱮ ᱜᱮᱭ ᱵᱟᱹᱜᱤ ᱟᱠᱟᱫᱟ᱾

'ᱡᱟᱦᱮᱨ ᱵᱚᱸᱜᱟ ᱥᱟᱱᱛᱟᱲ ᱠᱚ' ᱯᱩᱛᱷᱤ ᱠᱷᱚᱱ ᱨᱟᱢᱮᱥᱥᱚᱨ ᱢᱩᱨᱢᱩ ᱟᱜ ᱪᱤᱛᱟᱹᱨ

ᱠᱟᱹᱢᱤ

ᱮᱞ.ᱟᱭ.ᱥᱤ.ᱟᱭ ᱨᱮᱱᱤᱡ ᱢᱤᱫ ᱠᱟᱹᱢᱤᱭᱟᱹ ᱞᱮᱠᱟᱛᱮ ᱠᱳᱞᱠᱟᱛᱟ ᱡᱚᱦᱚᱲ ᱢᱮᱱᱟᱜ ᱟᱠᱟᱫᱮᱭᱟ᱾

ᱚᱞ ᱵᱮᱞ

ᱤᱝᱨᱮᱡᱤ ᱑᱙᱗᱕ ᱥᱮᱨᱢᱟ ᱠᱷᱚᱱ ᱚᱞᱵᱮᱞ ᱨᱮᱱᱟᱜ ᱮᱛᱚᱦᱚᱵ ᱫᱚ᱾ ᱟᱨᱮ ᱜᱮᱞ ᱫᱚᱥᱚᱠ ᱠᱷᱚᱱ ᱚᱱᱚᱞᱤᱭᱟᱹ ᱞᱮᱠᱟᱛᱮ ᱩᱯᱨᱩᱢ ᱮ ᱧᱟᱢ ᱟᱠᱟᱫᱟ᱾ ᱟᱹᱰᱤᱜᱟᱱ ᱚᱱᱚᱞ ᱟᱨ ᱜᱟᱭᱟᱱ ᱯᱩᱛᱷᱤ ᱠᱚᱭ ᱚᱞ ᱟᱠᱟᱫᱟ᱾ ᱞᱟᱠᱪᱟᱨ-ᱟᱹᱨᱤᱪᱟᱹᱞᱤ ᱜᱮ ᱟᱡᱟᱜ ᱚᱞ ᱨᱮᱭᱟᱜ ᱢᱩᱬᱩᱛ ᱥᱟᱛᱟᱢ ᱫᱚ ᱠᱟᱱ ᱛᱟᱭᱟ᱾ ᱥᱮᱫᱟᱭ ᱢᱚᱪᱟ ᱢᱚᱪᱟ ᱛᱮ ᱞᱟᱹᱭ ᱟᱹᱜᱩ ᱟᱠᱟᱱ ᱥᱮᱨᱣᱟ ᱟᱹᱨᱤᱪᱟᱹᱞᱤ, ᱞᱟᱭ ᱞᱟᱠᱪᱟᱨ ᱨᱮᱭᱟᱜ ᱠᱟᱛᱷᱟ ᱠᱚ ᱟᱹᱰᱤ ᱱᱟᱯᱟᱭ ᱥᱟᱺᱦᱤᱡ ᱛᱮᱭ ᱚᱞ ᱛᱚᱞ ᱟᱠᱟᱫᱟ᱾

ᱪᱷᱟᱯᱟ ᱟᱠᱟᱱ ᱯᱚᱛᱚᱵ ᱠᱚ

1. "ᱦᱟᱯᱲᱟᱢ ᱠᱚᱠᱚ ᱞᱟᱹᱭ ᱦᱚᱴᱚ ᱟᱠᱟᱫ"
2. "ᱵᱚᱸᱜᱟ ᱵᱟᱸᱠᱷᱮᱬ"
3. "ᱡᱟᱦᱮᱨ ᱵᱚᱸᱜᱟ ᱥᱟᱱᱛᱟᱲ ᱠᱚ"

ᱵᱟᱝ ᱪᱷᱟᱯᱟ ᱟᱠᱟᱱ ᱯᱚᱛᱚᱵ ᱠᱚ

1. "ᱥᱚᱢᱟᱡᱽ ᱵᱟᱹᱭᱨᱤ"
2. "ᱱᱟᱦᱟᱪᱟᱨ"
3. "ᱯᱚᱥᱛᱟᱣ ᱟᱲᱟᱝ"
4. "ᱪᱮᱫᱟᱜ ᱱᱚᱝᱠᱟ"
5. "ᱥᱚᱥᱱᱚᱜ ᱫᱟᱱᱟᱝ ᱨᱮ"
6. "ᱥᱚᱥᱟᱱ ᱴᱟᱺᱰᱤᱨᱮ ᱥᱟᱹᱜᱩᱱ ᱛᱟᱨᱟᱥ"
7. "ᱟᱠᱟᱞ ᱟᱦᱟᱞᱟ"᱾

ᱟᱡᱟᱜ ᱟᱭᱢᱟ ᱜᱟᱭᱟᱱ ᱠᱚ ᱢᱩᱸᱫᱽ ᱨᱮ "ᱠᱟᱥᱛᱟᱣ ᱟᱲᱟᱝ" ᱜᱟᱭᱟᱱ ᱫᱚ ᱥᱮᱨᱢᱟ ᱟᱲᱟᱝ (ᱟᱠᱟᱥᱵᱟᱱᱤ) ᱠᱳᱞᱠᱟᱛᱟ ᱨᱮᱭᱟᱜ ᱥᱟᱱᱛᱟᱲᱤ ᱟᱠᱷᱲᱟ ᱨᱮ ᱩᱪᱷᱟᱹᱱ ᱞᱮᱱᱟ᱾

ᱥᱟᱶᱛᱟ ᱥᱩᱥᱟᱹᱨ ᱠᱟᱹᱢᱤ ᱨᱮ

ᱤᱝᱨᱮᱡᱤ ᱑᱙᱗᱕ ᱥᱮᱨᱢᱟ ᱠᱷᱚᱱ ᱜᱮ ᱥᱟᱶᱛᱟ ᱥᱩᱥᱟᱹᱨ ᱚᱱᱠᱟᱱᱟᱜ ᱠᱟᱹᱢᱤ ᱦᱚᱨᱟ ᱠᱚ ᱥᱟᱶ ᱡᱚᱯᱲᱟᱣ ᱢᱮᱱᱟᱜ ᱟᱠᱟᱫᱮᱭᱟ᱾ ᱑᱙᱗᱕ ᱥᱟᱞ ᱠᱷᱚᱱ ᱑᱙᱘᱖ ᱦᱟᱹᱵᱤᱡ ᱵᱮᱸᱜᱚᱞ ᱟᱹᱫᱤᱵᱟᱹᱥᱤ ᱟᱨᱪᱟᱨᱤ ᱮᱛᱷᱞᱤᱴᱤᱠᱥ ᱮᱱᱰ ᱞᱟᱠᱪᱟᱨᱟᱞ ᱥᱳᱥᱟᱭᱴᱤ ᱨᱮᱱᱤᱡ ᱢᱟᱬᱛᱮ ᱥᱩᱛᱨᱮᱛ (ᱡᱮᱱᱟᱨᱮᱞ ᱥᱮᱠᱨᱮᱴᱟᱨ) ᱮ ᱛᱟᱦᱮᱸ ᱠᱟᱱᱟ᱾ ᱥᱟᱱᱛᱟᱲ ᱥᱟᱶᱛᱟ ᱨᱮᱭᱟᱜ ᱞᱟᱭ–ᱞᱟᱠᱪᱟᱨ ᱮᱢᱟᱱ ᱠᱚ ᱩᱛᱷᱱᱟᱹᱣ ᱞᱟᱹᱜᱤᱫ ᱑᱙᱘᱒ ᱥᱮᱨᱢᱟ ᱨᱮ ᱢᱟᱨᱟᱝ ᱵᱩᱨᱩ ᱟᱥᱨᱚᱢ ᱮ ᱛᱷᱟᱯᱚᱱ ᱞᱮᱫᱟ᱾ ᱦᱩᱜᱽᱞᱤ ᱡᱤᱞᱟᱹ ᱥᱟᱦᱤᱛᱛᱚ ᱯᱚᱨᱤᱥᱚᱫ ᱦᱚᱛᱮᱛᱮ ᱩᱰᱩᱠᱚᱜ ᱛᱚᱯᱚᱞ ᱯᱟᱛᱷᱟᱢ ᱨᱮᱱᱤᱡ ᱢᱤᱫ ᱥᱚᱦᱮᱫ ᱞᱮᱠᱟᱛᱮ ᱦᱚᱸᱭ ᱛᱟᱦᱮᱸ ᱠᱟᱱᱟ᱾ ᱱᱤᱛᱚᱜ ᱫᱚ ᱟᱹᱫᱤᱢ-ᱟᱲᱟᱝ ᱯᱟᱛᱷᱟᱢ ᱨᱮᱱᱤᱡ ᱥᱟᱥᱟᱯᱲᱟᱣᱤᱡ ᱠᱟᱱᱟᱭ᱾

ᱢᱟᱹᱱ ᱟᱨ ᱥᱤᱨᱯᱷᱟᱹ

ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱜᱟᱶᱛᱟ ᱯᱟᱦᱴᱟ ᱠᱷᱚᱱ ᱒᱐᱐᱓ ᱥᱮᱨᱢᱟ ᱨᱮ "ᱢᱟᱹᱡᱷᱤ ᱨᱟᱢᱫᱟᱥ ᱴᱩᱰᱩ ᱥᱤᱨᱯᱷᱟᱹᱭ ᱧᱟᱢ ᱟᱠᱟᱫᱼᱟ᱾ ᱠᱳᱞᱠᱟᱛᱟ ᱤᱭᱩᱛ ᱮᱥᱳᱥᱤᱭᱮᱥᱚᱱ, ᱦᱩᱜᱽᱞᱤ ᱡᱤᱞᱟᱹ ᱥᱟᱱᱛᱟᱞᱤ ᱥᱟᱦᱤᱛᱛᱚ ᱯᱚᱨᱤᱥᱚᱫ ᱠᱷᱚᱱ ᱚᱱᱚᱞᱤᱭᱟᱹ ᱞᱮᱠᱟᱛᱮ ᱥᱟᱨᱦᱟᱣ ᱮ ᱧᱟᱢ ᱟᱠᱟᱫᱼᱟ᱾