ᱚᱵᱷᱟᱜᱤᱭᱟᱹ

ᱚᱵᱷᱟᱜᱤᱭᱟᱹ (ᱚᱱᱚᱞᱤᱭᱟᱹ-ᱜᱚᱨᱟᱪᱟᱸᱫᱽ ᱴᱩᱰᱩ)

                         

 

“ ᱢᱟᱸᱭᱟᱢ ᱠᱩᱸᱰᱤᱨᱮ ᱢᱤᱫ ᱴᱷᱚᱯ ᱢᱟᱸᱭᱟᱢ,

ᱥᱟᱨᱮᱡ ᱢᱮᱱᱟᱜ ᱠᱷᱟᱱ ᱦᱟᱯᱲᱟᱢ ᱠᱚᱣᱟᱜ ;

ᱫᱤᱞ ᱟᱨ ᱫᱟᱲᱮᱛᱮᱢ ᱯᱩᱨᱚᱱ ᱜᱮᱭᱟ,

ᱟᱯᱱᱟᱨ ᱞᱟᱹᱭᱚᱜ ᱠᱚ ᱥᱚᱲᱟ ᱥᱟᱱᱛᱟᱞ ᱾

ᱥᱮᱫᱟᱭ ᱦᱟᱯᱲᱟᱢ ᱠᱚᱨᱮ ᱜᱚᱨᱚᱵᱽ ᱠᱚ ᱢᱮ,

ᱵᱩᱫ ᱟᱨ ᱫᱟᱲᱟᱛᱮᱠᱚ ᱨᱮᱦᱮᱛ ᱠᱮᱫᱟ;

ᱠᱟᱡᱟᱠ ᱫᱷᱟᱹᱨᱛᱤᱮ ᱵᱤᱱ ᱰᱤᱜᱟᱹᱣᱜ ᱟᱠᱚ,

ᱥᱟᱱᱛᱟᱞ ᱯᱟᱹᱨᱥᱤ ᱟᱨ ᱡᱟᱹᱛ ᱥᱟᱱᱛᱟᱞ ᱾

ᱦᱟᱯᱲᱟᱢ ᱠᱚᱣᱟᱜ ᱫᱚ ᱥᱚᱨᱮᱱ ᱫᱤᱱ,

ᱱᱚᱠᱚ ᱜᱮ ᱨᱟᱡᱽ-ᱨᱟᱯᱟᱡᱽ ᱯᱳᱨᱡᱟ ᱱᱟᱠᱚ ;

ᱡᱟᱹᱛ ᱡᱟᱝ ᱨᱚᱦᱚᱭ ᱠᱟᱛᱮᱜ ᱯᱟᱹᱨᱥᱤ ᱯᱚᱦᱟ,

ᱡᱚᱛᱚ ᱠᱚᱛᱮ ᱡᱚᱛᱚᱱ ᱛᱮᱠᱚ ᱫᱟᱨᱮ ᱠᱮᱫᱟ ᱾

ᱢᱟᱸᱭᱟᱢ ᱠᱩᱸᱰᱤᱨᱮ ᱢᱤᱫ ᱴᱷᱚᱯ ᱢᱟᱸᱭᱟᱢ,

ᱥᱟᱨᱮᱡ ᱢᱮᱱᱟᱜ ᱠᱷᱟᱱ ᱦᱟᱯᱲᱟᱢ ᱠᱚᱣᱟᱜ,

ᱫᱤᱞ ᱟᱨ ᱫᱟᱲᱮᱛᱮᱢ ᱯᱩᱨᱚᱱ ᱜᱮᱭᱟ,

ᱥᱟᱱᱛᱟᱞ ᱥᱟᱱᱛᱟᱞᱤ ᱡᱚᱛᱚᱱ ᱞᱟᱹᱜᱤᱫ ᱾

ᱳ ᱦᱟᱭ.! ᱚᱵᱷᱟᱜᱤᱭᱟᱹ ᱡᱟᱹᱛ ᱵᱟᱹᱫᱤ,

ᱯᱚᱨ ᱯᱟᱹᱨᱥᱤ ᱴᱟᱹᱢᱱᱤ ᱴᱟᱝᱜᱟ ᱛᱤᱨᱮ ;

ᱞᱟ-ᱭᱮᱫᱟᱢ ᱢᱟᱜ-ᱮᱫᱟᱢ ᱠᱩᱢᱟᱸᱭᱟᱜᱮ,

ᱥᱟᱱᱛᱟᱞ ᱥᱟᱱᱛᱟᱹᱞᱤ ᱠᱟᱹᱪᱤ ᱠᱟᱰᱞᱟᱹᱜ ᱾

ᱯᱚᱨᱡᱟᱹᱛ ᱯᱟᱹᱨᱥᱤ ᱪᱚᱝ ᱞᱟᱦᱨᱟ ᱠᱟᱱᱟ,

ᱱᱚᱴᱟᱝ ᱞᱮᱱ ᱠᱷᱟᱱ ᱳᱱᱟᱭ ᱦᱟᱞᱮᱰᱟᱞᱮᱜ ;

ᱱᱤᱡ-ᱟᱜ ᱱᱤᱦᱟᱹᱛ ᱠᱟᱛᱮᱢ ᱪᱤᱸᱜᱟᱣᱮᱱᱟ ᱾

ᱱᱮᱴᱟᱜ ᱠᱚ ᱴᱷᱮᱱ ᱦᱚᱢ ᱱᱤᱥᱲᱟᱣ ᱮᱱᱟ,

ᱦᱟᱭ !  ᱦᱟᱯᱲᱟᱢ ᱠᱚᱨᱮᱱ ᱵᱮᱢᱟᱱᱚᱛᱤᱪ,

ᱱᱤᱡ ᱡᱟᱹᱛ ᱱᱤᱜᱦᱟᱛᱤᱪ ᱯᱚᱨᱡᱟᱹᱛᱤᱪ ;

ᱦᱟᱯᱲᱟᱢ ᱠᱚᱣᱟᱜ ᱡᱟᱝ ᱪᱮᱴᱮᱨ ᱧᱩᱨ-ᱟᱢᱟ,

ᱥᱟᱱᱛᱟᱞ ᱥᱟᱱᱛᱟᱞᱤ ᱨᱮᱱ ᱥᱟᱱᱛᱟᱞ ᱵᱟᱫᱤ ᱾᱾

”