ᱚᱵᱷᱤᱰ

ᱣᱤᱠᱤᱯᱤᱰᱤᱭᱟ ᱠᱷᱚᱱ
Jump to navigation Jump to search
Ovid


ᱚᱵᱷᱤᱰ

ᱚᱵᱷᱤᱰ (ᱚᱵᱷᱤᱰ; ᱒᱐ ᱢᱟᱨᱪ ᱔᱓ ᱵᱤᱥᱤ ᱼ ᱑᱗/᱑᱘ ) ᱨᱳᱢᱟᱱ ᱚᱱᱚᱬᱦᱤᱭᱟ.ᱭ ᱛᱟᱦᱮᱸ ᱠᱟᱱᱟ ᱾ ᱩᱱᱤᱭᱟᱜ ᱡᱟᱱᱟᱢ ᱫᱚ ᱚᱜᱚᱥᱛᱚᱥ ᱟᱜ ᱨᱟᱡᱽᱠᱟᱲ ᱨᱮ ᱦᱩᱭ ᱞᱮᱱᱟ ᱾ ᱱᱩᱭᱟᱜ ᱯᱩᱨᱟ. ᱧᱩᱛᱩᱢ ᱫᱚ ᱚᱵᱷᱤᱰᱤᱭᱩᱥ ᱱᱟᱥᱳ (Publius Ovidius Naso) (Classical Latin: [ˈpʊ.blɪ.ʊs ɔˈwɪ.dɪ.ʊs ˈnaː.soː]) ᱛᱟᱦᱮᱸ ᱠᱟᱱᱟ ᱾

ᱡᱟᱱᱟᱢ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱱᱩᱭᱟᱜ ᱡᱟᱱᱟᱢ ᱫᱚ ᱥᱩᱞᱢᱳ ᱧᱩᱛᱩᱢᱟᱱ ᱱᱟᱜᱟᱨ ᱨᱮ ᱦᱩᱭ ᱞᱮᱱᱟ ᱾ ᱠᱟᱱᱩᱱ ᱪᱮᱛᱟᱱ ᱨᱮ ᱥᱮᱪᱮᱫ ᱮ ᱟᱨᱡᱟᱣ ᱞᱮᱜᱼᱟ ᱟᱨ ᱨᱳᱢ ᱛᱮᱭ ᱨᱚᱲ ᱞᱮᱜᱼᱟ ᱾ ᱚᱨᱮᱞᱤᱭᱩᱥ ᱯᱷᱩᱥᱯᱩᱥ ᱟᱨ ᱯᱳᱨᱠᱤᱭᱩᱥ ᱞᱟᱛᱨᱳ ᱫᱚ ᱱᱩᱭ ᱨᱤᱱ ᱜᱩᱨᱩ ᱠᱤᱱ ᱛᱟᱦᱮᱸ ᱠᱟᱱᱟ ᱾ ᱡᱩᱫᱤ ᱦᱚᱸ ᱱᱩᱭ ᱟᱡ ᱵᱟᱵᱟ ᱱᱩᱭ ᱫᱚ ᱩᱠᱤᱞ ᱵᱮᱱᱟᱣ ᱥᱟᱱᱟ ᱞᱮᱫᱮᱭᱟ ᱮᱱ ᱦᱚᱸ ᱱᱩᱭ ᱫᱚ ᱟᱡᱟᱜ ᱨᱤᱫᱟ.ᱭ ᱮᱛᱚᱦᱚᱵ ᱠᱷᱚᱱ ᱜᱮ ᱚᱱᱚᱬᱦᱮ ᱴᱷᱮᱱ ᱮ ᱟᱞᱟᱭ ᱦᱩᱭ ᱟᱠᱟᱫ ᱛᱟᱦᱮᱸᱫ ᱾ ᱛᱤᱱᱟ.ᱜ ᱚᱠᱛᱚ ᱫᱷᱟ.ᱵᱤᱡ ᱫᱚ ᱱᱩᱭ ᱟᱡ ᱵᱟᱵᱟ ᱦᱟᱜ ᱩᱱᱩᱫᱩᱜ ᱢᱟᱱᱟᱣ ᱠᱟᱛᱮ ᱟᱡᱟᱜ ᱥᱮᱪᱮᱫ ᱯᱩᱨᱟ.ᱣ ᱞᱟ.ᱜᱤᱫ ᱮᱛᱷᱮᱱᱥ ᱨᱮᱭ ᱛᱟᱦᱮᱸ ᱮᱱᱟ ᱾ ᱤᱠᱷᱟ.ᱱ ᱤᱱᱟ. ᱛᱟᱭᱚᱢ ᱱᱩᱭ ᱫᱚ ᱥᱤᱥᱞᱤ ᱟᱨ ᱦᱩᱰᱤᱧ ᱮᱥᱤᱭᱟᱭ ᱥᱟᱸᱜᱷᱟᱨ ᱠᱮᱜᱼᱟ ᱾[1] ᱡᱩᱣᱟ.ᱱ ᱚᱠᱛᱚ ᱨᱮᱜᱮ ᱵᱟᱵᱟᱦᱟᱜ ᱜᱩᱨ ᱛᱟᱭᱚᱢ ᱱᱩᱭ ᱫᱚ ᱨᱳᱢ ᱱᱟᱜᱟᱨ ᱨᱮ ᱟᱡ ᱛᱮᱫ ᱫᱚ ᱚᱱᱚᱬᱦᱮ ᱟᱨ ᱫᱩᱞᱟ.ᱲ ᱮ ᱟᱞᱟᱭ ᱠᱟᱫᱼᱟ ᱾ ᱦᱟᱯᱲᱟᱢ ᱠᱚᱣᱟᱜ ᱫᱷᱚᱱ ᱥᱚᱢᱯᱚᱛᱤ ᱠᱷᱟ.ᱛᱤᱨ ᱴᱟᱠᱟ ᱠᱟ.ᱣᱰᱤ ᱨᱮᱭᱟᱜ ᱪᱤᱱᱛᱟ. ᱠᱷᱚᱱ ᱫᱚ ᱥᱟᱺᱜᱤᱧ ᱨᱮᱭ ᱛᱟᱦᱮᱸ ᱠᱟᱱᱟ ᱾ ᱱᱩᱭ ᱫᱚ ᱯᱮ ᱫᱷᱟᱣ ᱮ ᱵᱟᱯᱞᱟ ᱮᱱᱟ ᱟᱨ ᱫᱚᱥᱟᱨ ᱮᱨᱟ ᱠᱷᱚᱱ ᱱᱩᱭᱤᱡ ᱫᱚ ᱢᱤᱫᱴᱟ.ᱝ ᱜᱮ ᱠᱩᱲᱤ ᱜᱤᱫᱽᱨᱟ. ᱦᱩᱭ ᱞᱮᱱᱟ ᱾[2]

ᱚᱞᱼᱵᱮᱞ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

᱑᱔ ᱵᱤᱥᱤ ᱨᱮ ᱱᱩᱭᱟᱜ ᱯᱩᱭᱞᱩ ᱜᱟᱞᱟᱝ ᱜᱟᱵᱟᱱ ᱫᱚ "ᱚᱢᱳᱨᱮᱥ" ᱵᱮᱱᱟᱣ ᱮᱱᱟ ᱾ ᱱᱚᱣᱟᱨᱮ ᱫᱚ ᱩᱱᱤ ᱢᱤᱫ ᱢᱚᱱ ᱜᱟᱵᱟᱱ ᱫᱩᱞᱟ.ᱲᱤᱭᱟ. ᱠᱳᱨᱤᱱᱱ ᱞᱟ.ᱜᱤᱫ ᱟᱡᱟᱜ ᱨᱤᱫᱟ.ᱭ ᱨᱮᱭᱟᱜ ᱫᱩᱞᱟ.ᱲ ᱦᱩᱫᱤᱥ ᱚᱱᱚᱬᱦᱮ ᱨᱮᱭᱟᱜ ᱨᱩᱯ ᱮ ᱪᱟᱞ ᱟᱠᱟᱣᱟᱫᱼᱟ ᱾ ᱯᱩᱭᱞᱩ ᱫᱚ ᱱᱚᱣᱟ ᱨᱮᱭᱟᱜ ᱢᱚᱬᱮ ᱦᱟ.ᱴᱤᱧ ᱯᱚᱛᱚᱵ ᱛᱟᱦᱮᱸ ᱠᱟᱱᱟ ᱾ ᱤᱠᱷᱟ.ᱱ ᱫᱩᱥᱨᱟ. ᱫᱷᱟᱣ ᱫᱚ ᱯᱚᱛᱚᱵ ᱨᱮᱭᱟᱜ ᱦᱟ.ᱴᱤᱧ ᱠᱷᱟᱴᱚ ᱠᱟᱛᱮ ᱯᱮᱭᱟ ᱨᱮ ᱫᱚᱦᱚ ᱦᱩᱭ ᱮᱱᱟ ᱾ ᱵᱮᱱᱟᱣ ᱛᱟᱭᱚᱢ ᱠᱷᱚᱱ ᱜᱮ ᱱᱚᱣᱟ ᱯᱚᱛᱚᱵ ᱨᱤᱱᱤᱡ ᱚᱱᱚᱞᱤᱭᱟ. ᱦᱟᱜ ᱧᱩᱛᱩᱢ ᱯᱩᱨᱟ. ᱨᱳᱢ ᱨᱮ ᱯᱟᱥᱱᱟᱣ ᱮᱱᱟ ᱾ ᱱᱚᱣᱟ ᱚᱠᱛᱚ ᱨᱮᱭᱟᱜ ᱥᱩᱨᱥᱩᱯᱩᱨ ᱨᱮᱜᱮ "ᱢᱤᱰᱤᱭᱟ" ᱧᱩᱛᱩᱢᱟᱱ ᱴᱨᱮᱡᱮᱰᱤ ᱦᱚᱸᱭ ᱜᱟᱞᱟᱝ ᱜᱟᱵᱟᱱ ᱠᱮᱜᱼᱟ ᱾ ᱤᱠᱷᱟ.ᱱ ᱛᱮᱦᱮᱧ ᱜᱟᱯᱟ ᱱᱚᱣᱟ ᱜᱟᱭᱟᱱ ᱨᱮᱭᱟᱜ ᱫᱚ ᱛᱤᱱᱟ.ᱝ ᱜᱟᱱ ᱥᱟᱦᱴᱟ ᱜᱮ ᱧᱮᱞ ᱧᱟᱢᱚᱜ ᱠᱟᱱᱟ ᱾ ᱤᱱᱟ. ᱛᱟᱭᱚᱢ ᱩᱱᱤ ᱵᱤᱨᱟᱝᱜᱳᱱᱟᱳ ᱠᱚᱣᱟᱜ ᱫᱩᱞᱟ.ᱲ ᱥᱟᱠᱟᱢ ᱮ ᱚᱞᱼᱛᱚᱞ ᱠᱮᱜᱼᱟ ᱡᱟᱦᱟᱸ ᱨᱮᱭᱟᱜ ᱯᱟᱨᱥᱟᱞ ᱫᱚ "ᱦᱟᱨᱟᱭᱤᱫᱮᱥ" ᱧᱩᱛᱩᱢ ᱛᱮ ᱩᱪᱷᱟ.ᱱ ᱮᱱᱟ ᱾ ᱡᱚᱛᱚ ᱥᱟᱠᱟᱢ ᱨᱮᱭᱟᱜ ᱜᱩᱸᱴ ᱫᱚ ᱒᱑ ᱜᱟᱴᱟᱝᱼᱟ ᱾ ᱤᱠᱷᱟ.ᱱ ᱢᱩᱬ ᱞᱮᱠᱟ ᱛᱮᱫᱚ ᱱᱚᱣᱟ ᱥᱟᱠᱟᱢ ᱨᱮᱭᱟᱜ ᱮᱞᱮᱞ ᱫᱚ ᱱᱚᱣᱟ ᱠᱷᱚᱱ ᱵᱟ.ᱲᱛᱤ ᱜᱮ ᱛᱟᱦᱮᱸ ᱠᱟᱱᱟ ᱾ ᱵᱚᱸᱜᱤᱭ ᱚᱱᱚᱬᱦᱤᱭᱟ. ᱢᱟᱭᱠᱮᱞ ᱢᱚᱫᱷᱩᱥᱩᱫᱚᱱ ᱫᱚᱛ ᱫᱚ ᱱᱚᱣᱟ ᱜᱟᱞᱟᱝ ᱜᱟᱵᱟᱱ ᱧᱮᱞ ᱠᱟᱛᱮ ᱵᱤᱨᱟᱝᱜᱚᱱᱟ ᱧᱩᱛᱩᱢᱟᱱ ᱯᱩᱛᱷᱤᱭ ᱚᱞᱼᱛᱚᱞ ᱠᱮᱜᱼᱟ ᱾ ᱚᱵᱷᱤᱰ ᱤᱡ ᱡᱚᱴᱟᱣ ᱟᱣᱞᱩᱥ ᱥᱟᱵᱤᱱᱩᱥ ᱫᱚ ᱱᱚᱣᱟ ᱥᱟᱠᱟᱢ ᱨᱮᱭᱟᱜ ᱞᱟ.ᱱᱟ.ᱭ ᱚᱞ ᱮ ᱮᱛᱚᱦᱚᱵ ᱞᱮᱜᱼᱟ ᱾ᱥᱟᱵᱤᱱᱩᱥ ᱟᱜ ᱦᱚᱸ ᱯᱮᱭᱟ ᱥᱟᱠᱟᱢ ᱧᱟᱢᱚᱜᱼᱟ ᱾ ᱒ ᱵᱤᱥᱤ ᱨᱮ ᱚᱵᱷᱤᱰ ᱟᱜ ᱫᱩᱞᱟ.ᱲ ᱥᱟ.ᱜᱟ.ᱭ ᱡᱚᱛᱚ ᱠᱷᱚᱱ ᱱᱟᱯᱟᱭ ᱜᱟᱞᱟᱝ ᱜᱟᱵᱟᱱ 'ᱟᱨᱥ ᱚᱢᱟᱛᱳᱨᱤᱭᱟ' (ᱫᱩᱞᱟ.ᱲ ᱨᱤᱱᱤᱡ ᱵᱟᱰᱚᱦᱤ) ᱠᱟᱱᱟ ᱾

ᱡᱤᱛᱠᱟ.ᱨ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

"ᱫᱩᱞᱟ.ᱲ ᱨᱮᱭᱟᱜ ᱵᱟᱰᱚᱦᱤ ᱨᱮ" ᱚᱵᱷᱤᱰᱟᱜ ᱜᱮᱭᱟᱱ ᱟᱡᱟᱜ ᱡᱤᱛᱠᱟ.ᱨ ᱨᱮᱭᱟᱜ ᱞᱟᱯᱷᱟᱝ ᱴᱷᱟᱶᱨᱮ ᱥᱮᱴᱮᱨ ᱦᱩᱭ ᱞᱮᱱᱟ ᱾ ᱱᱤᱛᱚᱜ ᱩᱱᱤ ᱵᱟᱨᱭᱟ ᱢᱟᱦᱟᱱ ᱜᱟᱞᱟᱝ ᱜᱟᱵᱟᱱ ᱮ ᱩᱪᱷᱟ.ᱱ ᱠᱮᱜᱼᱟ ᱯᱩᱭᱞᱩᱣᱟᱜ ᱧᱩᱛᱩᱢ ᱫᱚ ᱢᱮᱴᱟᱢᱚᱨᱯᱷᱳᱥᱮᱥ ᱟᱨ ᱫᱚᱥᱟᱨᱟᱜ ᱫᱚ ᱠᱷᱟᱥᱛᱟᱥᱤ ᱾ ᱭᱩᱱᱟᱱ ᱟᱨ ᱨᱳᱢ ᱵᱟᱱᱟᱨ ᱜᱮ ᱨᱟᱥᱴᱨᱳ ᱨᱮ ᱱᱚᱝᱠᱟᱱ ᱢᱟᱨᱮ ᱠᱟᱛᱷᱟ ᱧᱟᱢᱚᱜᱼᱟ ᱡᱟᱦᱟᱸ ᱨᱮ ᱟ.ᱰᱤᱜᱟᱱ ᱡᱤᱱᱤᱥ ᱟᱨ ᱢᱟ.ᱱᱢᱤᱭᱟᱜ ᱟ.ᱨᱩᱯᱷᱮᱨᱟᱣ ᱨᱮᱭᱟᱜ ᱵᱤᱥᱲᱤ ᱧᱟᱢᱚᱜᱼᱟ ᱾ ᱚᱵᱷᱤᱰ ᱫᱚ ᱟ.ᱰᱤᱜᱟᱱ ᱠᱟᱛᱷᱟ ᱠᱟ.ᱦᱱᱤ ᱠᱚ ᱑᱕ ᱜᱚᱴᱟᱝ ᱯᱚᱛᱚᱵ ᱨᱮ ᱢᱤᱫ ᱦᱟᱯᱲᱟᱜ ᱟᱨ ᱵᱟᱰᱚᱦᱤ ᱯᱮᱨᱮᱡ ᱯᱩᱛᱷᱤ ᱨᱮ ᱨᱩᱯ ᱮ ᱥᱚᱫᱚᱨ ᱞᱮᱜᱼᱟ ᱾ ᱱᱚᱶᱟ ᱦᱟ.ᱴᱤᱧ ᱫᱚ ᱭᱩᱨᱳᱯ ᱨᱮᱭᱟᱜ ᱵᱟᱰᱚᱦᱤ ᱟᱨ ᱥᱟᱶᱦᱮᱫ ᱨᱮᱭᱟᱜ ᱯᱚᱨᱢᱟᱱ ᱮ ᱮᱢ ᱠᱮᱜᱼᱟ ᱾ ᱯᱟ.ᱦᱤᱞ ᱡᱮᱜᱮᱛ ᱨᱮᱭᱟᱜ ᱢᱟᱨᱮ ᱠᱟᱛᱷᱟ ᱴᱷᱮᱱ ᱩᱯᱨᱩᱢᱚᱜ ᱞᱟ.ᱜᱤᱫ ᱱᱚᱶᱟ ᱮᱠᱞᱟ ᱜᱟᱞᱟᱝ ᱜᱟᱵᱟᱱ ᱜᱮ ᱟ.ᱰᱤ ᱰᱷᱮᱨᱟ ᱾

ᱫᱮᱥ ᱵᱟᱦᱮᱨ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱛᱤᱱ ᱡᱚᱦᱚᱜ ᱚᱵᱷᱤᱰ ᱟᱞᱵᱟᱱᱟᱢᱟᱠ ᱰᱷᱤᱯ ᱨᱮᱭ ᱛᱟᱦᱮᱸ ᱠᱟᱱᱟ, ᱩᱱᱤᱭ ᱵᱟᱰᱟᱭ ᱧᱟᱢ ᱠᱮᱜᱼᱟ ᱫᱚ ᱵᱟᱝ ᱢᱟ ᱥᱚᱢᱨᱟᱴ ᱳᱜᱩᱥᱴᱚᱥ ᱫᱚ ᱩᱱᱤ ᱵᱟᱥᱟ ᱠᱷᱚᱱ ᱮ ᱚᱰᱚᱠ ᱜᱤᱰᱤ ᱠᱟᱫᱮᱭᱟ ᱾ ᱩᱱᱤᱭᱟᱜ ᱥᱚᱢᱯᱚᱛᱤ ᱫᱚ ᱵᱟᱭ ᱠᱩᱸᱵᱽᱲᱩ ᱟᱠᱟᱜᱼᱟ ᱾ ᱟᱨ ᱵᱟᱥᱟ ᱠᱷᱚᱱ ᱚᱰᱚᱠ ᱜᱤᱰᱤ ᱨᱮᱭᱟᱜ ᱦᱚᱸ ᱪᱮᱫ ᱮᱛᱮᱫ ᱦᱚᱸ ᱴᱷᱷᱟ.ᱣᱠᱟ. ᱵᱟᱝ ᱛᱟᱦᱮᱸ ᱠᱟᱱᱟ ᱾ ᱱᱚᱶᱟ ᱞᱮᱠᱟᱛᱮ ᱩᱱᱤ ᱫᱚ ᱟᱡᱟᱜ ᱢᱩᱪᱟ.ᱫ ᱡᱤᱭᱚᱱ ᱫᱚ ᱠᱨᱤᱥᱱᱟ ᱥᱟᱜᱚᱨ ᱠᱟᱛᱟᱨᱮ ᱢᱮᱱᱟᱜ 'ᱛᱳᱢᱤᱥ' ᱨᱮ ᱠᱷᱮᱢᱟᱣ ᱛᱮ ᱦᱩᱭ ᱟᱫᱮᱭᱟ ᱾ ᱱᱚᱣᱟ ᱱᱟᱜᱟᱨ ᱨᱮᱭᱟᱜ ᱥᱚᱥᱱᱚᱜ ᱫᱚ ᱵᱷᱮᱜᱟᱨ ᱜᱮ ᱛᱟᱦᱮᱸ ᱠᱟᱱᱟ ᱾ ᱱᱚᱣᱟ ᱚᱠᱛᱚ ᱨᱮᱭᱟᱜ ᱥᱩᱨᱥᱩᱯᱩᱨ ᱨᱮᱜᱮ ᱥᱚᱢᱨᱟᱴ ᱫᱚ ᱟᱡᱤᱡ ᱡᱟᱶᱟᱭ ᱜᱚᱝᱠᱮ ᱦᱚᱸᱭ ᱫᱮᱥ ᱵᱟᱦᱮᱨ ᱜᱤᱰᱤ ᱠᱟᱫᱮᱭᱟ ᱾ ᱡᱚᱛᱚ ᱦᱚᱲ ᱱᱩᱠᱤᱱᱟᱜ ᱫᱮᱥ ᱵᱟᱦᱮᱨ ᱨᱮᱭᱟᱜ ᱥᱟ.ᱜᱟ.ᱭ ᱠᱚ ᱡᱚᱲᱟᱣᱟ ᱤᱠᱷᱟ.ᱱ ᱥᱟ.ᱨᱤᱛᱮᱫ ᱫᱚ ᱚᱠᱚᱭ ᱦᱚᱸ ᱵᱟᱠᱚ ᱵᱟᱰᱟᱭ ᱧᱟᱢ ᱫᱟᱲᱮᱭᱟᱫᱼᱟ ᱾

ᱢᱩᱪᱟ.ᱫ ᱡᱤᱭᱚᱱ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

'ᱛᱳᱢᱤᱥ ' ᱨᱮ ᱚᱱᱚᱬᱦᱤᱭᱟ. ᱦᱟᱜ ᱡᱤᱭᱚᱱ ᱟ.ᱰᱤ ᱫᱩᱠᱷᱟ.ᱞᱤ ᱜᱮ ᱛᱟᱦᱮᱸ ᱠᱟᱱᱟ ᱾ ᱚᱸᱰᱮ ᱩᱱᱤ ᱡᱟᱦᱟᱸ ᱚᱱᱚᱬᱦᱮ ᱥᱟᱦᱴᱟᱭ ᱚᱞ ᱠᱮᱜᱼᱟ, ᱚᱱᱟᱨᱮ ᱟᱡᱟᱜ ᱫᱮᱥ ᱵᱟᱦᱮᱨ ᱛᱷᱩᱠᱟ.ᱢ ᱞᱟ.ᱜᱤᱫ ᱱᱮᱦᱚᱨ ᱵᱟᱝ ᱞᱟ.ᱞᱩᱜᱼᱟ ᱛᱤᱱᱟ. ᱜ ᱞᱟᱪᱷᱟ ᱨᱮ ᱛᱤᱱᱟ.ᱜ ᱫᱷᱟᱣ ᱟᱨ ᱛᱤᱱᱟ.ᱜ ᱨᱚᱠᱚᱢ ᱛᱮᱭ ᱚᱞ ᱞᱮᱜᱼᱟ ᱾ ᱤᱠᱷᱟ.ᱱ ᱚᱱᱟ ᱨᱮᱭᱟᱜ ᱚᱨᱡᱚ ᱪᱮᱫ ᱦᱚᱸ ᱵᱟᱝ ᱚᱰᱚᱠ ᱞᱮᱱᱟ ᱾ ᱚᱜᱚᱥᱛᱤ ᱛᱟᱭᱚᱢ ᱴᱤᱵᱚᱨᱤᱳᱥ ᱥᱚᱢᱨᱟᱴ ᱮ ᱵᱮᱱᱟᱣ ᱮᱱᱟ ᱾ ᱤᱠᱷᱟ.ᱱ ᱩᱱᱤ ᱦᱚᱸ ᱚᱵᱷᱤᱰ ᱟᱜ ᱢᱤᱫ ᱠᱟᱛᱷᱟ ᱦᱚᱸ ᱵᱟᱭ ᱟᱸᱡᱚᱢ ᱞᱮᱜᱼᱟ ᱾ ᱢᱩᱪᱟ.ᱫ ᱨᱮ ᱚᱸᱰᱮ ᱜᱮ ᱑᱗ ᱵᱟᱝ ᱑᱘ ᱵᱤᱥᱤ ᱨᱮ ᱟᱡᱟᱜ ᱡᱤᱭᱚᱱ ᱵᱟ.ᱛᱤ ᱦᱚᱸ ᱤᱬᱤᱡ ᱮᱱᱟ ᱾ ᱛᱳᱢᱤᱥ ᱠᱷᱚᱱ ᱩᱱᱤ ᱡᱟᱦᱟᱸ ᱚᱱᱚᱬᱦᱮ ᱞᱟᱪᱷᱟ ᱮ ᱚᱞ ᱞᱮᱜᱼᱟ ᱚᱱᱟ ᱨᱮᱭᱟᱜ ᱛᱩᱢᱟ.ᱞ ᱫᱚ "ᱛᱤᱥᱛᱤᱭᱟ" ᱢᱮᱱᱛᱮ ᱠᱚ ᱢᱮᱛᱟᱜᱼᱟ ᱾ ᱱᱚᱣᱟ ᱫᱚ ᱚᱵᱷᱤᱰ ᱟᱜ ᱦᱟᱯᱲᱟᱜ "ᱢᱮᱜᱷᱫᱩᱛ" ᱢᱮᱱᱛᱮ ᱦᱚᱸ ᱢᱮᱱ ᱜᱟᱱᱚᱜᱼᱟ ᱾ ᱱᱚᱣᱟ ᱞᱟᱪᱷᱟ ᱨᱮᱫᱚ ᱚᱱᱚᱬᱦᱤᱭᱟ. ᱦᱟᱜ ᱦᱟᱨᱠᱮᱛ ᱜᱟᱞᱟᱝ ᱜᱟᱵᱟᱱ ᱠᱟᱛᱮ ᱢᱮᱱᱟᱜᱼᱟ ᱾ ᱡᱟᱦᱟᱸ ᱞᱟᱪᱷᱟ ᱩᱱᱤ ᱟᱡ ᱨᱤᱱ ᱮᱨᱟ ᱟᱨ ᱜᱤᱫᱽᱨᱟ. ᱞᱟ.ᱜᱤᱫ ᱮ ᱚᱞ ᱟᱠᱟᱜᱼᱟ ᱾ ᱱᱚᱣᱟ ᱫᱟᱭᱟ ᱫᱩᱞᱟᱹᱲ ᱛᱮ ᱯᱮᱨᱮᱡ ᱥᱟᱨᱮᱲ ᱟᱠᱟᱱᱟ ᱾ ᱟᱨ ᱢᱤᱫ ᱞᱟᱪᱷᱟ ᱛᱩᱢᱟ.ᱞ ᱫᱚ 'Epistula Ax Potato' ᱢᱮᱱᱛᱮ ᱠᱚ ᱢᱮᱛᱟᱜᱼᱟ ᱾ ᱞᱟᱸᱜᱟ ᱚᱱᱚᱬᱦᱤᱭᱟ. ᱫᱚ "ᱤᱵᱤᱥ" ᱧᱩᱛᱩᱢᱟᱱ ᱢᱤᱫ ᱚᱵᱷᱤᱥᱟᱯ ᱦᱚᱸᱭ ᱚᱞ ᱟᱠᱟᱜᱼᱟ ᱾ ᱡᱟᱦᱟᱸᱨᱮ ᱩᱱᱤ ᱢᱤᱫ ᱵᱟᱝ ᱧᱩᱛᱩᱢ ᱵᱟ.ᱭᱨᱤ ᱚᱵᱷᱤᱥᱟᱯ ᱮ ᱮᱢᱟ ᱠᱟᱣᱟ ᱫᱮᱭᱟ ᱾ ᱱᱚᱣᱟ ᱥᱟᱶᱼᱥᱟᱶᱛᱮ ᱩᱱᱤ ᱟᱨ ᱵᱟᱨᱭᱟ ᱠᱷᱟᱴᱚ ᱯᱩᱛᱷᱤ ᱦᱟ.ᱠᱩ ᱟᱨ ᱚᱠᱷᱨᱳᱴ ᱪᱮᱛᱟᱱ ᱨᱮ Haliyutika 'and' Nook ᱧᱩᱛᱩᱢ ᱛᱮᱭ ᱚᱞ ᱞᱮᱜᱼᱟ ᱾ ᱚᱵᱷᱤᱰ ᱟᱜ ᱟ.ᱰᱤᱜᱟᱱ ᱚᱞᱼᱵᱮᱞ ᱫᱚ ᱛᱮᱦᱮᱧ ᱜᱟᱯᱟ ᱢᱟᱞᱚᱴ ᱩᱛᱟ.ᱨ ᱟᱠᱟᱱᱟ ᱾

ᱟᱨ ᱦᱚᱸ ᱧᱮᱞ ᱢᱮ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

https://en.m.wikipedia.org/wiki/Ars_amatoria https://en.m.wikipedia.org/wiki/Amores_(Ovid) https://en.m.wikipedia.org/wiki/Metamorphoses_(poem) https://en.m.wikipedia.org/wiki/Latin_literature https://en.m.wikipedia.org/wiki/Prosody_(Latin) https://en.m.wikipedia.org/wiki/Random_House_Webster%27s_Unabridged_Dictionary

ᱵᱟᱦᱨᱮ ᱡᱚᱱᱚᱲ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

https://en.m.wikipedia.org/wiki/Encyclop%C3%A6dia_Britannica http://etext.lib.virginia.edu/latin/ovid/notes.html https://en.m.wikipedia.org/wiki/Project_Gutenberg https://en.m.wikipedia.org/wiki/Internet_Archive https://en.m.wikipedia.org/wiki/LibriVox

ᱥᱟ.ᱠᱷᱭᱟ.ᱛ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

  1. Trist. 1.2.77
  2. cite book|last1=Hornblower|first1=Simon|last2=Spawforth|first2=Antony|last3=Eidinow|first3=Esther|title=The Oxford Companion to Classical Civilization|url=https://books.google.com/books?id=AIgdBAAAQBAJ%7Cyear=2014%7Cpublisher=Oxford University Press|isbn=978-0-19-870677-9 |page=562