ᱛᱚᱱᱚᱲ
ᱚᱠᱟ ᱟᱹᱲᱟᱹ ᱛᱮ ᱟᱹᱭᱟᱹᱛ ᱨᱮᱭᱟᱜ ᱠᱟᱱᱣᱟ ᱟᱨ ᱜᱩᱱᱩᱱ ᱯᱟᱹᱨᱤᱥ ᱟᱹᱲᱟᱹ ᱠᱚ ᱨᱮᱭᱟᱜ ᱫᱟᱲᱮ ᱛᱮᱫ , ᱥᱟᱰᱮ ᱛᱮᱫ ᱵᱟᱝᱠᱷᱟᱱ ᱢᱷᱟᱶ ᱮᱢᱟᱱ ᱨᱮᱭᱟᱜ, ᱜᱩᱱ ᱫᱷᱚᱨᱚᱢ, ᱪᱩᱨᱤᱛ ᱨᱮᱭᱟᱜ ᱛᱚᱲ ᱯᱷᱚᱴᱮᱞᱚᱜ ᱼ ᱟ ᱾ ᱚᱱᱠᱟᱱ ᱟᱹᱲᱟᱹ ᱫᱚ ᱛᱚᱱᱚᱲ ᱯᱟᱹᱨᱤᱥ ᱟᱹᱲᱟᱹ ᱠᱚ ᱢᱮᱛᱟᱜ-ᱟ ᱾ ᱟᱵᱚ ᱱᱚᱝᱠᱟ ᱵᱚᱱ ᱨᱚᱲᱟ - (᱑) ᱞᱚᱜᱚᱱ ᱦᱤᱡᱩᱜ ᱢᱮ ᱾ (᱒) ᱩᱱᱤ ᱵᱟᱹᱭ ᱵᱟᱹᱭ ᱛᱮ ᱛᱟᱲᱟᱢ ᱟᱠᱟᱫᱟ ᱾ (᱓) ᱫᱟᱜ ᱨᱤᱸᱡᱤ ᱨᱤᱸᱡᱤ ᱞᱤᱜᱤᱱ ᱠᱟᱱᱟ ᱾ (᱔) ᱵᱤᱨ ᱠᱟᱰᱟ ᱧᱮᱞ ᱛᱮ ᱨᱤᱴᱟᱹᱢ ᱯᱟᱴᱮᱢ ᱫᱟᱲ ᱠᱮᱫᱟ ᱾ (᱕)ᱠᱮᱱᱮᱞ ᱫᱟᱜ ᱞᱮᱜᱮᱢ ᱞᱮᱜᱮᱢ ᱟᱛᱩᱹᱜ ᱠᱟᱱᱟ ᱾ (᱖) ᱯᱷᱟᱹᱜᱩᱱ ᱵᱚᱸᱜᱟ ᱫᱚ ᱦᱤᱸᱥᱤᱫ ᱦᱤᱸᱥᱤᱫ ᱮ ᱦᱚᱭᱟ ᱾ ᱱᱚᱣᱟ ᱠᱚ ᱟᱹᱭᱟᱹᱛ ᱨᱮ ᱛᱩᱱᱠᱷᱤ ᱞᱮᱠᱷᱟᱱ ᱧᱮᱞᱚᱜ ᱟ ᱡᱮ ᱠᱟᱱᱣᱟ ᱟᱨ ᱜᱩᱱᱩᱱ ᱯᱟᱹᱨᱤᱥ ᱟᱹᱲᱟᱹ ᱦᱟᱜ ᱪᱩᱨᱤᱛ ᱟᱨ ᱜᱩᱱ ᱫᱷᱚᱨᱚᱢ ᱛᱮᱫ ᱯᱟᱥᱱᱟᱣ ᱞᱟᱹᱜᱤᱫ ᱟᱹᱲᱟᱹ ᱞᱟᱜᱟᱛ ᱟᱠᱟᱱᱟ ᱾ ᱡᱮᱞᱮᱠᱟ- ᱯᱳᱭᱞᱩ ᱟᱹᱭᱟᱹᱛ ᱨᱮᱭᱟᱜ `ᱞᱚᱜᱚᱱ ᱛᱮᱫᱚ ᱦᱤᱡᱩᱜ ᱨᱮᱭᱟᱜ ᱪᱩᱨᱤᱛ ᱯᱟᱥᱱᱟᱣ ᱟᱠᱟᱱᱟ ᱾ ᱚᱱᱟ ᱜᱮ ᱵᱟᱹᱭ ᱵᱟᱹᱭ ᱛᱮ , ᱨᱤᱸᱡᱤ ᱨᱤᱸᱡᱤ, ᱞᱮᱜᱮᱢ ᱞᱮᱜᱮᱢ , ᱨᱤᱴᱟᱹᱢ ᱯᱟᱴᱮᱢ, ᱦᱤᱸᱥᱤᱫ ᱦᱤᱸᱥᱤᱫ ᱮᱢᱟᱱ ᱟᱹᱲᱟᱹ ᱠᱚ ᱛᱮ ᱠᱟᱱᱣᱟ ᱨᱮᱭᱟᱜ ᱪᱩᱨᱤᱛ ᱯᱟᱥᱱᱟᱣ ᱟᱠᱟᱱᱟ ᱾ ᱚᱱᱟ ᱛᱮ ᱱᱚᱣᱟ ᱠᱚ ᱟᱹᱲᱟᱹ ᱫᱚ ᱛᱚᱱᱚᱲ ᱯᱟᱹᱨᱤᱥ ᱟᱹᱲᱟᱹ ᱠᱟᱱᱟ᱾
ᱛᱚᱱᱚᱲ ᱯᱟᱡᱟ ᱨᱮᱭᱟᱜ ᱦᱚᱨᱟ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
ᱟᱹᱭᱟᱹᱛ ᱨᱮ ᱛᱚᱱᱚᱲ ᱯᱟᱹᱨᱤᱥ ᱟᱹᱲᱟᱹ ᱠᱚ ᱢᱮᱱᱟᱜ ᱟ ᱥᱮ ᱵᱟᱝ ᱟᱨ ᱢᱮᱱᱟᱜ ᱠᱷᱟᱱ , ᱚᱠᱟ ᱫᱚ ᱛᱚᱱᱚᱲ ᱠᱟᱱᱟ ᱾ ᱚᱱᱟ ᱯᱟᱸᱡᱟ ᱧᱟᱢ ᱨᱮᱭᱟᱜ ᱦᱚᱨᱟ ᱢᱮᱱᱟᱜ- ᱟ ᱾ ᱟᱹᱭᱟᱹᱛ ᱨᱮᱭᱟᱜ ᱠᱟᱱᱣᱟ ᱟᱨ ᱜᱩᱱᱩᱱ ᱯᱟᱹᱨᱤᱥ "ᱡᱩᱫᱤ ᱪᱮᱫ" ᱠᱟᱛᱷᱟ ᱛᱮ ᱠᱩᱞᱤ ᱠᱟᱛᱮ ᱡᱟᱦᱟ ᱛᱮᱞᱟ ᱧᱟᱢᱚᱜᱟ, ᱚᱱᱟ ᱜᱮ ᱛᱚᱱᱚᱲ ᱫᱚ ᱦᱩᱭᱩᱜ- ᱟ ᱾ ᱡᱮᱞᱮᱠᱟ- ᱪᱮᱫ ᱞᱮᱠᱟᱢ ᱦᱤᱡᱩᱜ- ᱟ ? ᱛᱮᱞᱟ ᱫᱚ - ᱞᱚᱜᱚᱱ ᱮᱢ ᱦᱤᱡᱩᱜ ᱟ ᱾ ᱟᱨ ᱦᱚ ᱞᱟᱹᱭ ᱜᱟᱱᱚᱜ ᱟ , ᱪᱮᱫ ᱞᱮᱠᱟ ᱦᱚᱭ ᱮᱫᱟ - ᱛᱮᱞᱟ ᱫᱚ - ᱦᱤᱸᱥᱤᱫ ᱦᱤᱸᱥᱤᱫ ᱮ ᱦᱚᱭ ᱮᱫᱟ ᱾ ᱟᱨᱦᱚᱸ ᱜᱩᱱᱩᱱ ᱯᱟᱹᱨᱤᱥ ᱟᱹᱲᱟᱹ ᱦᱚ ᱠᱩᱠᱞᱤ ᱛᱮ ᱠᱩᱞᱤ ᱠᱟᱛᱮ ᱡᱟᱦᱟ ᱛᱮᱞᱟ ᱧᱟᱢᱚᱜᱟ , ᱡᱮᱞᱮᱠᱟ- (᱑) ᱵᱟᱦᱟ ᱫᱚ ᱟᱹᱰᱤ ᱱᱟᱯᱟᱭ ᱠᱩᱲᱤ ᱜᱤᱫᱽᱨᱟᱹ ᱠᱟᱱᱟᱭ ᱾ ᱱᱚᱰᱮ ᱵᱟᱦᱟ ᱫᱚ ᱪᱮᱫ ᱞᱮᱠᱟᱱ ᱟ , ᱛᱮᱞᱟ ᱨᱮ - ᱛᱮᱞᱟ ᱨᱮ ᱞᱟᱹᱭ ᱜᱟᱱᱚᱜ ᱟ ᱱᱟᱯᱟᱭ ᱜᱮᱭᱟᱭ ᱾ ᱱᱚᱰᱮ ᱱᱟᱯᱟᱭ ᱫᱚ ᱜᱩᱱᱩᱱ ᱯᱟᱹᱨᱤᱥ ᱟᱹᱲᱟᱹ ᱠᱟᱱᱟ᱾ ᱟᱨᱦᱚ ᱜᱩᱱᱩᱱ ᱯᱟᱹᱨᱤᱥ ᱟᱹᱲᱟᱹ ᱡᱩᱫᱤ ᱵᱚᱱ ᱠᱩᱞᱤᱭᱟᱹ ᱡᱮ " ᱪᱮᱫ ᱞᱮᱠᱟᱭ ᱱᱟᱯᱟᱭ ᱟ " - ᱛᱮᱞᱟ ᱨᱮ ᱞᱟᱹᱭ ᱜᱟᱱᱚᱜ-ᱟ , ᱟᱹᱰᱤ ᱱᱟᱯᱟᱟ ᱾ ᱱᱚᱰᱮ ᱟᱹᱰᱤ ᱟᱹᱲᱟᱹ ᱫᱚ ᱛᱚᱱᱚᱲ ᱯᱟᱹᱨᱤᱥ ᱟᱹᱲᱟᱹ ᱠᱟᱱᱟ᱾ ᱟᱨᱦᱚ ᱛᱚᱱᱚᱲ ᱯᱟᱹᱨᱤᱥ ᱟᱹᱲᱟᱹ ᱠᱚ ᱦᱩᱭᱩᱜ ᱠᱟᱱᱟ- ᱠᱷᱟᱴ ᱠᱷᱟᱴ , ᱠᱷᱟᱜ ᱠᱷᱟᱜ , ᱠᱷᱩᱡ ᱠᱷᱩᱡ , ᱢᱤᱞᱩᱝ ᱥᱩᱰᱩᱝ , ᱨᱤᱵᱚ ᱨᱚᱵᱚ, ᱪᱷᱤᱨ ᱪᱷᱚᱨ, ᱡᱷᱤᱨᱚ ᱡᱷᱚᱨᱚ, ᱠᱮᱹᱦᱮᱨ ᱠᱮᱹᱦᱮᱨ, ᱦᱩᱫᱽ ᱦᱩᱫᱽ , ᱥᱮᱛᱟᱜ ᱥᱮᱛᱟᱜ , ᱱᱤᱛ , ᱫᱷᱤᱱᱟᱹᱱ, ᱮᱢᱟᱱ ᱠᱚ ᱾ ᱫᱟᱹᱭᱠᱟᱹ- ᱛᱚᱱᱚᱲ ᱠᱚ ᱟᱹᱭᱟᱹᱛ ᱨᱮ ᱞᱟᱜᱟᱛ ᱠᱟᱛᱮ ᱵᱚᱱ ᱧᱮᱞ ᱟ ᱾ (᱑) ᱵᱟᱵᱩᱭ ᱮᱱᱮᱡ ᱫᱟᱢᱟᱠ ᱫᱟᱢᱟᱠ ᱾ (᱒) ᱦᱟᱫᱟᱨ ᱦᱟᱫᱟᱨ ᱮ ᱦᱚᱭ ᱮᱫᱟ ᱾ (᱓) ᱵᱟᱵᱩ ᱚᱞᱚᱜ ᱮᱢ ᱥᱮᱬᱟᱭ ᱠᱷᱟᱱ ᱢᱤᱫ ᱢᱚᱱᱮ ᱛᱮ ᱚᱞᱚᱜ ᱢᱮ ᱾ (᱔) ᱢᱟᱹᱭ ᱫᱚ ᱱᱮᱜ -ᱮ ᱪᱟᱪᱳ ᱰᱤᱰᱤᱭ ᱪᱟᱪᱳᱜ ᱠᱟᱱᱟ ᱾ (᱕) ᱪᱮᱛᱟᱱᱨᱮ ᱥᱤᱸᱧ ᱪᱟᱸᱫᱚᱭ ᱡᱩᱞᱤᱜ ᱠᱟᱱᱟ ᱾ (᱖) ᱜᱤᱫᱽᱨᱟᱹ ᱟᱹᱰᱤ ᱡᱩᱨᱮ ᱨᱟᱜ ᱮᱫᱟ ᱾ (᱗) ᱟᱥᱟᱲ ᱥᱟᱱ ᱫᱤᱱ ᱫᱚ ᱜᱷᱟᱹᱲᱤ ᱡᱷᱤᱲᱤᱠ ᱡᱷᱤᱲᱤᱠ ᱟᱨ ᱡᱷᱚᱢᱚᱨ ᱡᱷᱚᱢᱚᱨ ᱮ ᱫᱟᱜ ᱮᱫᱟ ᱾
Adverb : An adverb is word used for qualifying the meaning of a verb , an adjective or others adverb.
ᱵᱤᱱᱤᱰ ᱠᱟᱛᱮ ᱵᱚᱱ ᱧᱮᱞᱟ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
(᱑) ᱟᱞᱮ ᱟᱹᱭᱩᱵ ᱟᱹᱭᱩᱵ ᱯᱮᱲᱟ ᱴᱷᱮᱱ ᱞᱮᱱ ᱥᱮᱴᱮᱨᱮᱱᱟ ᱾ ᱱᱚᱣᱟ ᱟᱹᱭᱟᱹᱛ ᱨᱮ ᱥᱮᱴᱮᱨᱮᱱᱟ ᱫᱚ ᱠᱟᱱᱣᱟ ᱠᱟᱱᱟ ᱾ ᱛᱤᱥ ᱨᱮᱞᱮ ᱥᱮᱴᱮᱨᱮᱱᱟ ? ᱛᱮᱞᱟ ᱺ ᱟᱞᱮ ᱫᱚ ᱟᱭᱩᱵ ᱟᱭᱩᱵ ᱞᱮᱱ ᱥᱮᱴᱮᱨᱮᱱᱟ ᱾ ᱱᱚᱰᱮ ᱟᱹᱭᱩᱵ ᱟᱹᱭᱩᱵ ᱟᱹᱲᱟᱹ ᱫᱚ ᱥᱮᱴᱮᱨ ᱠᱟᱱᱣᱟ ᱜᱷᱚᱴᱟᱜ ᱨᱮᱭᱟᱜ ᱚᱠᱛᱚ ᱵᱩᱡᱷᱟᱹᱣᱟᱜ ᱠᱟᱱᱟ᱾ ᱚᱱᱟ ᱛᱮ ᱟᱹᱭᱩᱵ ᱟᱹᱭᱩᱵ ᱫᱚ ᱛᱚᱱᱚᱲ ᱯᱟᱹᱨᱤᱥ ᱟᱹᱲᱟᱹ ᱠᱟᱱᱟ ᱾