ᱜᱩᱨᱩᱪᱚᱨᱚᱱ ᱥᱚᱨᱮᱱ
| ᱜᱩᱨᱩᱪᱚᱨᱚᱱ ᱥᱚᱨᱮᱱ Gurucharan Soren | |
|---|---|
| ᱡᱟᱱᱟᱢ ᱧᱩᱛᱩᱢ ᱡᱟᱱᱟᱢ ᱢᱟᱹᱦᱤᱛ ᱟᱨ ᱡᱟᱱᱟᱢ ᱴᱷᱟᱶ | ᱡᱩᱱ ᱑᱓, ᱑᱙᱔᱔ ᱜᱩᱸᱰᱩᱨᱤᱭᱟᱹ, ᱢᱚᱭᱩᱨᱵᱷᱚᱸᱡᱽ, ᱳᱰᱤᱥᱟ |
| ᱫᱤᱥᱚᱢᱤᱭᱟᱹ | ᱥᱤᱧᱚᱛᱤᱭᱟᱹ |
| ᱧᱩᱢᱱᱟᱢ | ᱚᱱᱚᱬᱦᱤᱭᱟᱹ, ᱜᱩᱨᱩ ᱜᱚᱢᱠᱮ ᱨᱮᱱ ᱪᱮᱞᱟ |
| ᱧᱩᱢᱦᱟᱞᱟᱝ ᱠᱟᱹᱢᱤ |
|
ᱜᱩᱨᱩᱪᱚᱨᱚᱱ ᱥᱚᱨᱮᱱ ᱫᱚ ᱢᱤᱫ ᱧᱩᱛᱩᱢᱟᱱ ᱥᱟᱱᱛᱟᱲᱤ ᱚᱱᱚᱬᱦᱤᱭᱟᱹ ᱠᱟᱱᱟᱭ᱾ ᱱᱩᱭ ᱫᱚ ᱳᱰᱤᱥᱟ ᱯᱚᱱᱚᱛ ᱨᱮᱱᱟᱜ ᱢᱚᱭᱩᱨᱵᱷᱚᱸᱡᱽ ᱦᱚᱱᱚᱛ ᱨᱮᱱᱟᱜ ᱨᱟᱭᱨᱚᱝᱯᱩᱨ ᱥᱩᱨ ᱜᱩᱸᱰᱩᱨᱤᱭᱟᱹ ᱟᱹᱛᱩ ᱨᱮ ᱑᱓ ᱡᱩᱱ ᱑᱙᱔᱔ ᱥᱮᱨᱢᱟ ᱨᱮᱭ ᱡᱟᱱᱟᱢ ᱞᱮᱱᱟ᱾[᱑] ᱟᱯᱟᱛ ᱧᱩᱛᱩᱢ ᱫᱚ ᱨᱚᱛᱚᱱ ᱥᱚᱨᱮᱱ ᱟᱨ ᱟᱭᱳ ᱫᱚ ᱟᱨᱥᱩ ᱥᱚᱨᱮᱱ᱾
ᱚᱞᱚᱜ ᱯᱟᱲᱦᱟᱣ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
ᱜᱩᱨᱩᱪᱚᱨᱚᱱ ᱟᱜ ᱯᱟᱲᱦᱟᱜ ᱡᱤᱭᱚᱱ ᱫᱚ ᱟᱹᱛᱩ ᱨᱮᱭᱟᱜ ᱯᱨᱟᱭᱢᱟᱨᱤ ᱥᱠᱩᱞ ᱠᱷᱚᱱ ᱮᱦᱚᱵ ᱞᱮᱱᱟ᱾ ᱮᱛᱚᱦᱚᱵ ᱥᱮᱪᱮᱫ ᱛᱟᱭᱚᱢ ᱨᱟᱭᱨᱚᱝᱯᱩᱨ ᱦᱟᱭ ᱥᱠᱩᱞ ᱨᱮᱭ ᱵᱷᱩᱨᱛᱤ ᱞᱮᱱᱟ ᱟᱨ ᱑᱙᱖᱒ ᱥᱮᱨᱢᱟ ᱨᱮ ᱱᱚᱸᱰᱮ ᱠᱷᱚᱱ ᱢᱮᱴᱨᱤᱠ ᱮ ᱯᱟᱥ ᱞᱮᱫᱟ᱾ ᱑᱙᱖᱔ ᱥᱮᱨᱢᱟ ᱨᱮ ᱨᱟᱭᱨᱚᱝᱯᱩᱨ ᱠᱚᱞᱮᱡᱽ ᱠᱷᱚᱱ ᱯᱨᱤᱼᱭᱩᱱᱤᱵᱷᱟᱨᱥᱤᱴᱤ ᱠᱳᱨᱥ ᱮ ᱯᱟᱥ ᱞᱮᱫᱟ᱾
ᱚᱱᱟ ᱛᱟᱭᱚᱢ ᱜᱷᱟᱨᱚᱸᱡᱽ ᱨᱮᱭᱟᱜ ᱠᱟᱹᱣᱰᱤ ᱟᱱᱟᱴ ᱠᱷᱟᱹᱛᱤᱨ ᱯᱟᱲᱦᱟᱜ ᱵᱟᱹᱜᱤ ᱦᱩᱭ ᱟᱫᱮᱭᱟ᱾
ᱠᱟᱹᱢᱤ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
ᱯᱩᱭᱞᱩ ᱮᱢ.ᱤ. ᱥᱠᱩᱞ ᱨᱮ ᱢᱟᱨᱟᱝ ᱢᱟᱪᱮᱫ ᱞᱮᱠᱟᱛᱮ ᱠᱟᱹᱢᱤᱭ ᱮᱦᱚᱵ ᱞᱮᱫᱟ᱾ ᱱᱚᱣᱟ ᱠᱟᱹᱢᱤ ᱛᱮ ᱢᱚᱱ ᱵᱟᱝ ᱯᱩᱨᱟᱹᱣ ᱞᱮᱱ ᱛᱟᱭ ᱛᱮ ᱢᱟᱪᱮᱫ ᱠᱟᱹᱢᱤ ᱵᱟᱹᱜᱤ ᱠᱟᱛᱮ ᱳᱰᱤᱥᱟ ᱥᱚᱨᱠᱟᱨ ᱟᱜ ᱰᱟᱠ ᱵᱤᱵᱷᱟᱜᱽ ᱨᱮ ᱠᱚᱨᱱᱤᱠ ᱦᱩᱫᱟᱹ ᱨᱮ ᱠᱟᱹᱢᱤᱭ ᱞᱟᱜᱟᱣ ᱮᱱᱟ᱾ ᱛᱟᱭᱚᱢ ᱛᱮ ᱚᱱᱟ ᱦᱚᱸ ᱵᱟᱹᱜᱤ ᱠᱟᱛᱮ ᱵᱤᱡᱽᱞᱤ ᱵᱤᱵᱷᱟᱜᱽ ᱨᱮᱭ ᱵᱚᱞᱚ ᱞᱮᱱᱟ᱾ ᱒᱐᱐᱔ ᱥᱮᱨᱢᱟ ᱨᱮ ᱡᱤᱨᱟᱹᱣ ᱮ ᱦᱟᱛᱟᱣ ᱠᱮᱫᱟ᱾
ᱥᱟᱶᱦᱮᱫ ᱪᱟᱨᱪᱟ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
ᱵᱟᱲᱟᱭ ᱟᱠᱟᱱᱟ, ᱯᱟᱹᱴᱷᱩᱣᱟᱹ ᱡᱤᱭᱚᱱ ᱠᱷᱚᱱ ᱜᱮ ᱥᱟᱶᱦᱮᱫ ᱪᱮᱛᱟᱱ ᱨᱮ ᱜᱚᱨᱚᱡᱽ ᱛᱟᱭ ᱛᱟᱸᱦᱮ ᱠᱟᱱᱟ᱾ ᱡᱩᱣᱟᱹᱱ ᱩᱢᱮᱨ ᱨᱮᱜᱮ 'ᱜᱩᱨᱩ ᱜᱚᱢᱠᱮ' ᱟᱜ ᱩᱫᱽᱜᱟᱹᱣ ᱛᱮ ᱟᱡᱟᱜ ᱥᱟᱶᱦᱮᱫ ᱪᱟᱨᱪᱟ ᱛᱚᱨᱟᱣ ᱨᱟᱠᱟᱵ ᱞᱮᱱᱟ᱾ ᱚᱱᱚᱬᱦᱤᱭᱟᱹ ᱜᱩᱨᱩᱪᱚᱨᱚᱱ ᱟᱜ ᱚᱱᱚᱬᱦᱮᱸ ᱨᱮ ᱪᱷᱟᱸᱫᱟ ᱨᱮᱭᱟᱜ ᱵᱮᱵᱷᱟᱨ ᱵᱟᱹᱲᱛᱤ ᱠᱟᱭᱛᱮ ᱧᱮᱞᱚᱜᱼᱟ᱾ ᱥᱟᱶᱛᱟ ᱟᱨ ᱥᱟᱪᱟᱨᱦᱮ ᱛᱟᱞᱟ ᱛᱮ ᱡᱤᱭᱚᱱ ᱨᱮᱭᱟᱜ ᱪᱤᱛᱟᱹᱨ ᱟᱹᱰᱤ ᱱᱟᱯᱟᱭ ᱥᱟᱺᱦᱤᱡ ᱟᱡᱟᱜ ᱚᱱᱚᱬᱦᱮᱸ ᱨᱮᱭ ᱥᱟᱵ ᱨᱟᱠᱟᱵ ᱟᱠᱟᱫᱟ᱾
ᱱᱚᱣᱟ ᱵᱮᱜᱚᱨ ᱦᱚᱸ ᱥᱟᱱᱛᱟᱲ ᱥᱟᱶᱛᱟ, ᱞᱟᱭ ᱞᱟᱠᱪᱟᱨ ᱟᱨ ᱫᱷᱚᱨᱚᱢ ᱵᱟᱵᱚᱛ ᱛᱮ ᱚᱱᱚᱞ ᱮ ᱚᱞ ᱟᱠᱟᱫᱟ᱾ ᱥᱟᱶᱛᱮ ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱟᱜ ᱡᱤᱭᱚᱱᱤ ᱦᱚᱸᱭ ᱚᱞ ᱟᱠᱟᱫᱟ᱾
ᱟᱡᱟᱜ ᱚᱞ ᱠᱚ 'ᱥᱟᱜᱮᱱ ᱥᱟᱠᱟᱢ', 'ᱠᱤᱭᱟᱹ ᱥᱤᱸᱫᱩᱨ' ᱟᱨ 'ᱥᱟᱶᱛᱟ ᱵᱟᱨᱛᱮ' ᱯᱟᱛᱷᱟᱢ ᱠᱚᱨᱮ ᱯᱟᱨᱥᱟᱞ ᱟᱠᱟᱱᱟ᱾
ᱵᱟᱹᱨᱤᱯᱚᱫᱟ ᱠᱷᱚᱱ ᱯᱟᱨᱥᱟᱞᱚᱜ ᱠᱟᱱ 'ᱵᱷᱚᱧᱡᱽ ᱟᱲᱟᱝ' ᱯᱟᱛᱷᱟᱢ ᱨᱮᱱ ᱥᱟᱥᱟᱯᱲᱟᱣᱤᱡ ᱞᱮᱠᱟᱛᱮᱭ ᱦᱚᱸᱭ ᱛᱟᱸᱦᱮ ᱠᱟᱱᱟ᱾
ᱯᱟᱨᱥᱟᱞ ᱟᱠᱟᱱ ᱯᱚᱛᱚᱵ ᱠᱚ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
- "ᱫᱮᱣᱟᱱ ᱢᱟᱰᱟ" (ᱚᱱᱚᱬᱦᱮᱸ) - ᱑᱙᱗᱘
- "ᱪᱟᱹᱭ ᱟᱠᱷᱲᱟ" (ᱚᱱᱚᱬᱦᱮᱸ) - ᱑᱙᱘᱒
ᱥᱤᱨᱯᱷᱟᱹ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮ ᱟᱡᱟᱜ ᱮᱱᱮᱢ ᱞᱟᱹᱜᱤᱫ ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱜᱟᱶᱛᱟ ᱯᱟᱦᱴᱟ ᱠᱷᱚᱱ ᱒᱐᱐᱑ ᱥᱮᱨᱢᱟ ᱨᱮ 'ᱥᱟᱹᱫᱷᱩ ᱨᱟᱢᱪᱟᱸᱫᱽ ᱩᱱᱩᱭᱦᱟᱹᱨ ᱥᱤᱨᱯᱷᱟᱹ' ᱠᱚ ᱪᱟᱞ ᱠᱟᱫᱮᱭᱟ᱾
ᱥᱟᱹᱠᱷᱭᱟᱹᱛ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]
- ↑ ᱯᱚᱨᱤᱢᱚᱞ ᱦᱮᱢᱵᱽᱨᱚᱢ. ᱥᱟᱶᱛᱟᱞᱤ ᱥᱟᱦᱤᱛᱛᱮᱨ ᱤᱛᱤᱦᱟᱥ. ᱱᱤᱨᱢᱚᱞ ᱵᱩᱠ ᱮᱡᱮᱱᱥᱤ. pp. ᱓᱐᱖.