ᱟᱫᱤᱛ-ᱛᱚ ᱢᱤᱛᱨᱚ (ᱥᱟᱱᱛᱟᱲᱤ)

ᱣᱤᱠᱤᱯᱤᱰᱤᱭᱟ, ᱨᱟᱲᱟ ᱜᱮᱭᱟᱱ ᱯᱩᱛᱷᱤ ᱠᱷᱚᱱ

ᱟᱫᱤᱛᱭᱚ ᱢᱤᱛᱨᱚ "ᱥᱟᱱᱛᱟᱲᱤ"

ᱥᱟᱱᱛᱟᱲᱤ ᱥᱟᱶᱦᱮᱫ ᱵᱟᱹᱠᱷᱩᱞ ᱨᱤᱱᱤᱡ ᱧᱩᱛᱩᱢᱟᱱ ᱚᱱᱚᱞᱤᱭᱟᱹ ᱟᱫᱤᱛᱭᱚ ᱢᱤᱛᱨᱚ ᱥᱟᱱᱛᱟᱲᱤᱭᱟᱜ ᱥᱟᱹᱨᱤ ᱧᱩᱛᱩᱢ ᱫᱚ ᱢᱚᱜᱚᱱ ᱦᱮᱸᱵᱽᱨᱚᱢ ᱾ ᱘ ᱢᱮ ᱑᱙᱒᱕ ᱥᱟᱞᱮᱨᱮ ᱟᱹᱛᱩ ᱯᱤᱸᱰᱟᱹᱨᱦᱟᱴ, ᱡᱤᱞᱞᱟ ᱜᱳᱰ-ᱰᱟ, ᱡᱷᱟᱨᱠᱷᱚᱸᱰ ᱯᱚᱱᱚᱛ ᱨᱮᱭ ᱡᱟᱱᱟᱢ ᱞᱮᱱᱟ ᱾ ᱟᱡ ᱵᱟᱵᱟᱣᱟᱜ ᱧᱩᱛᱩᱢ ᱫᱚ ᱠᱷᱟᱹᱯᱩ ᱦᱮᱸᱵᱽᱨᱚᱢ ᱟᱨ ᱮᱸᱜᱟᱛ ᱟᱜ ᱧᱩᱛᱩᱢ ᱫᱚ ᱠᱟᱸᱫᱚᱱᱤ ᱦᱮᱸᱵᱽᱨᱚᱢ ᱛᱟᱦᱮᱸ ᱠᱟᱱᱟ ᱾

ᱚᱞᱚᱜ ᱯᱟᱲᱷᱟᱣ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱮᱛᱚᱦᱚᱵ ᱥᱮᱪᱮᱫ ᱫᱚ ᱫᱮᱣᱫᱟᱬ ᱩᱱᱩᱥᱩᱞ ᱟᱥᱲᱟ ᱨᱮᱭ ᱮᱛᱚᱦᱚᱵ ᱞᱮᱫᱼᱟ ᱾ ᱟᱨ ᱪᱮᱛᱟᱱ ᱥᱮᱪᱮᱫ ᱫᱚ ᱜᱩᱨᱩᱠᱩᱞ ᱢᱟᱨᱟᱝ ᱵᱤᱨᱫᱟᱹᱜᱟᱲ ᱚᱡᱚᱫᱷᱭᱟ (ᱩᱛᱚᱨ ᱯᱨᱚᱫᱮᱥ) ᱠᱷᱚᱱ ᱥᱚᱸᱥᱠᱨᱩᱛ ᱟᱨ ᱦᱤᱱᱫᱤ ᱛᱮ ᱥᱮᱪᱮᱫ ᱮ ᱟᱢᱮᱴ ᱞᱮᱫᱼᱟ ᱾ ᱤᱱᱟᱹ ᱚᱠᱛᱚ ᱨᱮᱜᱮ ᱟᱨᱡᱚ ᱥᱚᱢᱟᱡᱽ ᱨᱤᱱ ᱟᱹᱭᱩᱨᱤᱭᱟᱹ ᱑᱐᱘ ᱥᱣᱟᱢᱤ ᱥᱤᱵᱟᱱᱚᱱᱫᱚ ᱛᱤᱨᱛᱷᱚᱯᱤᱛᱨᱟᱹᱦᱟᱴ ᱫᱮᱣᱫᱟᱬ ᱥᱟᱸᱜᱷᱟᱨ ᱮ ᱦᱮᱡ ᱞᱮᱱᱟ ᱾ ᱥᱨᱤ ᱥᱣᱟᱢᱤ ᱡᱤᱭᱟᱜ ᱢᱮᱱᱛᱮ ᱢᱚᱜᱚᱱ ᱦᱮᱸᱵᱽᱨᱚᱢ ᱫᱚ ᱟᱡ ᱨᱤᱱ ᱯᱩᱱᱭᱟᱹ ᱢᱚᱬᱮ ᱜᱚᱴᱟᱝ ᱜᱟᱛᱮ ᱠᱚ ᱥᱟᱶᱛᱮ ᱟᱡᱚᱫᱷᱭᱟ ᱛᱮᱭ ᱥᱮᱱ ᱮᱱᱟ ᱾ ᱵᱤᱨᱫᱟᱹᱯ ᱥᱚᱸᱥᱠᱟᱨ ᱨᱮᱭᱟᱜ ᱟᱹᱠᱤᱞ ᱦᱟᱹᱨ ᱡᱚᱝ ᱮ ᱫᱷᱩᱨᱟᱹᱣ ᱮᱱᱟ ᱾ ᱠᱟᱛᱷᱟᱡ ᱚᱸᱰᱮ ᱜᱮ ᱩᱱᱤᱭᱟᱜ ᱧᱩᱛᱩᱢ ᱫᱚ ᱢᱚᱜᱚᱱ ᱦᱮᱸᱵᱽᱨᱚᱢ ᱠᱷᱚᱱ ᱟᱫᱤᱛᱭᱚ ᱢᱤᱛᱨᱚ ᱛᱮᱠᱚ ᱵᱚᱫᱚᱞ ᱠᱮᱫ ᱛᱟᱭᱟ ᱾

ᱠᱟᱢᱠᱟᱡᱽ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱚᱡᱳᱫᱷᱭᱟ ᱠᱷᱚᱱ ᱥᱚᱸᱥᱠᱨᱩᱛ ᱟᱨ ᱦᱤᱸᱫᱤ ᱛᱮ ᱟᱹᱠᱤᱞ ᱦᱟᱹᱨ ᱥᱟᱹᱛ ᱠᱟᱛᱮ ᱚᱲᱟᱜ ᱛᱮ ᱦᱮᱡ ᱨᱩᱣᱟᱹᱲ ᱠᱟᱛᱮ ᱡᱤᱭᱚᱱ ᱠᱷᱟᱸᱰᱟᱣ ᱞᱟᱹᱜᱤᱫ ᱱᱟᱥᱮ ᱫᱤᱱ ᱫᱚ ᱨᱚᱜᱷᱩᱱᱟᱛᱷᱯᱩᱨ ᱟᱥᱲᱟ (ᱜᱳᱰ-ᱰᱟ) ᱨᱮ ᱢᱟᱪᱮᱛ ᱞᱮᱠᱟᱭ ᱠᱟᱹᱢᱤ ᱞᱮᱫ-ᱟ ᱾ ᱤᱱᱟᱹ ᱛᱟᱭᱚᱢ ᱥᱟᱱᱛᱟᱲ ᱯᱟᱦᱟᱰᱤᱭᱟᱹ ᱥᱮᱵᱟ ᱢᱚᱱᱰᱚᱲ, ᱫᱮᱣᱜᱷᱚᱨ ᱟᱨ ᱟᱹᱫᱤᱢ ᱡᱟᱹᱛᱤ ᱥᱮᱵᱟ ᱥᱚᱝᱜᱷᱚ ᱨᱮᱭᱟᱜ ᱥᱚᱸᱥᱛᱷᱟ ᱠᱚᱨᱮ ᱦᱚᱸ ᱱᱟᱥᱮ ᱫᱤᱱ ᱫᱚᱭ ᱠᱟᱹᱢᱤ ᱞᱮᱫ-ᱟ ᱾ ᱤᱱᱟᱹ ᱛᱟᱭᱚᱢ ᱢᱩᱪᱟᱹᱫ ᱩᱛᱟᱹᱨ ᱫᱚ ᱥᱮᱨᱢᱟ ᱟᱲᱟᱝ ᱨᱟᱹᱧᱪᱤ ᱥᱴᱩᱰᱤᱭᱳ ᱨᱮ ᱜᱨᱟᱢᱤᱱ ᱚᱯᱷᱤᱥ ᱨᱮ ᱩᱫᱽᱜᱷᱚᱥᱚᱠ ᱞᱮᱠᱟᱛᱮᱭ ᱠᱟᱹᱢᱤ ᱞᱮᱫ-ᱟ ᱾

ᱚᱞ-ᱵᱮᱞ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱟᱫᱤᱛᱭᱚ ᱢᱤᱛᱨᱚ ᱥᱟᱱᱛᱟᱲᱤᱭᱟᱜ ᱯᱟᱹᱦᱤᱞ ᱚᱱᱚᱬᱦᱮ ᱫᱚ ᱛᱚᱯᱟᱜ ᱡᱤᱣᱤ , ᱱᱚᱶᱟ ᱫᱚ ᱙ ᱮᱯᱨᱤᱞ ᱑᱙᱔᱘ ᱥᱟᱞᱮᱨᱮ ᱵᱤᱦᱟᱨ ᱥᱚᱨᱠᱟᱨᱟᱜ ᱪᱟᱸᱫᱚᱠᱤᱭᱟᱹ ᱯᱟᱛᱷᱟᱢ ᱦᱚᱲ ᱥᱚᱢᱵᱟᱫᱽ ᱨᱮ ᱪᱷᱟᱯᱟ ᱥᱚᱫᱚᱨ ᱞᱮᱱᱟ ᱾ ᱤᱱᱟᱹ ᱛᱟᱭᱚᱢ ᱛᱮᱜᱮ ᱥᱟᱶᱦᱮᱫ ᱵᱟᱜᱟᱱ ᱨᱮ ᱟᱫᱤᱛᱭᱚ ᱢᱤᱛᱨᱚ ᱫᱚ ᱥᱟᱱᱛᱟᱲᱤ ᱢᱮᱱᱛᱮᱭ ᱵᱟᱰᱟᱭ ᱚᱪᱚ ᱮᱱᱟ ᱾ ᱛᱚᱯᱟᱜ ᱡᱤᱣᱤ ᱚᱱᱚᱬᱦᱮ ᱛᱟᱭ ᱪᱷᱟᱯᱟ ᱥᱚᱫᱚᱨ ᱮᱱ ᱛᱟᱭ ᱛᱟᱭᱚᱢ ᱟᱡᱟᱜ ᱢᱚᱱᱮ ᱫᱚ ᱥᱟᱱᱛᱟᱲᱤ ᱥᱟᱶᱦᱮᱫ ᱚᱞ-ᱛᱚᱞ ᱨᱮ ᱟᱨ ᱦᱚᱸ ᱜᱟᱹᱰᱭᱟᱹᱣ ᱮᱱ ᱛᱟᱭᱟ ᱾ ᱟᱨ ᱧᱮᱞ-ᱧᱮᱞ ᱛᱮᱜᱮ ᱚᱼᱦᱤᱥᱟᱹᱵᱽ ᱚᱱᱚᱬᱦᱮ, ᱠᱟᱹᱦᱱᱤ ᱠᱚᱞ ᱚᱞ-ᱛᱚᱞ ᱠᱮᱫ-ᱟ ᱾ ᱥᱟᱱᱛᱟᱲᱤ ᱥᱟᱶ-ᱥᱟᱶᱛᱮ ᱦᱤᱱᱫᱤ ᱨᱮᱦᱚᱸ ᱧᱩᱛᱩᱢᱟᱱ ᱚᱱᱚᱬᱦᱤᱭᱟᱹ ᱢᱮᱱᱛᱮᱭ ᱧᱩᱢ ᱦᱟᱞᱟᱝ ᱮᱱᱟ ᱾ ᱦᱤᱱᱫᱤ ᱛᱮᱦᱚᱸ ᱟᱭᱢᱟ ᱚᱱᱚᱬᱦᱮ, ᱠᱟᱹᱦᱱᱤ ᱠᱚᱭ ᱚᱞ-ᱛᱚᱞ ᱟᱠᱟᱫ-ᱟ ᱾

ᱯᱚᱛᱚᱵ ᱯᱩᱛᱷᱤ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱟᱫᱤᱛᱭᱚ ᱢᱤᱛᱨᱚ ᱥᱟᱱᱛᱟᱲᱤᱭᱟᱜ ᱯᱚᱛᱚᱵ ᱯᱩᱛᱷᱤ ᱠᱚᱫᱚ ᱦᱩᱭᱩᱜ ᱠᱟᱱᱟ, ᱑. ᱜᱚᱥᱚ ᱵᱟᱦᱟ, ᱒. ᱥᱟᱜᱟᱫ ᱥᱤᱠᱤᱲ ᱓. ᱢᱟᱱᱚᱛᱟᱱ ᱴᱷᱚᱠᱚᱨ ᱯᱟᱲᱟ, ᱔. ᱨᱳᱦᱚᱛᱟᱥ ᱨᱟᱱᱤ, ᱕. ᱢᱟᱨᱟᱝ ᱢᱟᱱᱣᱟ, ᱖. ᱧᱩᱛ ᱟᱨ ᱢᱟᱨᱥᱟᱞ, ᱗. ᱱᱟᱦᱟᱜ ᱚᱱᱚᱬᱦᱮ ᱠᱚ, ᱘. ᱱᱟᱦᱟᱜ ᱠᱟᱹᱦᱱᱤ ᱠᱚ ᱾ ᱦᱤᱱᱫᱤ ᱛᱮᱭᱟᱜ ᱯᱩᱛᱷᱤ ᱠᱚᱫᱚ ᱦᱩᱭᱩᱜ ᱠᱟᱱ ᱛᱟᱭᱟ, ᱙. ᱡᱚᱝᱜᱚᱞ ᱠᱤ ᱡᱭᱳᱛᱤ (ᱛᱩᱢᱟᱹᱞ ᱚᱱᱚᱬᱦᱮ), ᱑᱐. ᱥᱚᱵᱽᱨᱤ (ᱠᱷᱚᱱᱰᱚ ᱠᱟᱵᱭᱚ), ᱑᱑. ᱵᱳᱫ-ᱫᱷᱚᱢ ᱜᱚᱪ-ᱪᱷᱟᱢᱤ (ᱠᱷᱚᱱᱰᱚ ᱠᱟᱵᱭᱚ) ᱾

ᱟᱫᱤᱛᱭᱚ ᱢᱤᱛᱨᱚ ᱥᱟᱱᱛᱟᱲᱤ ᱫᱚ ᱱᱟᱦᱟᱜ ᱥᱟᱶᱦᱮᱫᱤᱭᱟᱹ ᱵᱟᱹᱠᱷᱩᱞ ᱨᱮ ᱢᱤᱫ ᱠᱷᱟᱢ ᱠᱷᱩᱱᱴᱤ ᱜᱮ ᱾ ᱮᱴᱟᱜ ᱥᱟᱶᱦᱮᱫᱤᱭᱟᱹ ᱠᱚ ᱛᱟᱞᱟᱨᱮ ᱯᱟᱱᱛᱮ ᱛᱟᱞᱟᱜ ᱦᱚᱲ ᱠᱟᱱ ᱜᱮᱭᱟᱭ ᱾ ᱟᱡᱟᱜ ᱟᱸᱥ ᱛᱟᱦᱮᱸ ᱠᱟᱱᱟ, ᱫᱤᱥᱚᱢ ᱦᱚᱲ ᱠᱚ ᱟᱡᱟᱜ ᱚᱞ-ᱵᱮᱞ ᱛᱮᱭ ᱩᱫᱽᱜᱟᱹᱣ ᱠᱚᱣᱟ ᱾

ᱢᱩᱪᱟᱹᱫ ᱡᱤᱭᱚᱱ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱟᱫᱤᱛᱭᱚ ᱢᱤᱛᱨᱚ ᱥᱟᱱᱛᱟᱲᱤ ᱫᱚ ᱩᱱ ᱚᱠᱛᱚ ᱨᱤᱱᱤᱡ ᱟᱹᱰᱤ ᱜᱮ ᱰᱟᱸᱴᱢᱚᱸᱴ ᱥᱟᱶᱦᱮᱫᱤᱭᱟᱹᱭ ᱛᱟᱦᱮᱸ ᱠᱟᱱᱟ ᱾ ᱥᱟᱱᱛᱟᱲᱤ, ᱦᱤᱱᱫᱤ ᱨᱤᱱᱤᱡ ᱜᱟᱹᱠᱷᱩᱞ ᱚᱱᱚᱞᱤᱭᱟᱹ ᱥᱟᱶᱦᱮᱫᱤᱭᱟᱹ ᱥᱟᱶ-ᱥᱟᱶᱛᱮ ᱩᱨᱟᱹᱝ, ᱢᱩᱱᱰᱟᱹᱨᱤ, ᱦᱳ, ᱠᱷᱟᱰᱭᱟ, ᱱᱟᱜᱽᱯᱩᱨᱤ, ᱯᱚᱧᱪᱚ ᱯᱚᱨᱜᱚᱱᱤᱭᱟᱹ ᱯᱟᱹᱨᱥᱤ ᱵᱟᱰᱟᱭᱤᱡ ᱦᱚᱸᱭ ᱛᱟᱦᱮᱸ ᱠᱟᱱᱟ ᱾ ᱫᱮᱣᱜᱷᱚᱨ ᱠᱷᱚᱱ ᱩᱪᱷᱟᱹᱱᱚᱜ ᱠᱟᱱ ᱛᱟᱦᱮᱸᱱ ᱯᱨᱚᱠᱟᱥ ᱦᱤᱱᱫᱤ ᱦᱟᱯᱛᱟᱠᱤᱭᱟᱹ ᱯᱟᱛᱷᱟᱢ ᱜᱨᱟᱢ ᱱᱤᱨᱢᱟᱬ ᱟᱨ ᱟᱹᱫᱤᱵᱟᱹᱥᱤ , ᱨᱟᱹᱧᱪᱤ ᱠᱷᱚᱱ ᱩᱪᱷᱟᱹᱱᱚᱜ ᱠᱟᱱ ᱛᱟᱦᱮᱸᱱ ᱵᱤᱦᱟᱨ ᱥᱚᱨᱠᱟᱨᱟᱜ ᱦᱤᱱᱫᱤ ᱯᱟᱛᱷᱟᱢ ᱨᱤᱱᱤᱡ ᱥᱟᱯᱲᱮᱛ ᱦᱚᱸ ᱢᱤᱫ ᱚᱠᱛᱚ ᱫᱚᱭ ᱛᱟᱦᱮᱸ ᱠᱟᱱᱟ ᱾ ᱟᱫᱤᱛᱭᱚ ᱢᱤᱛᱨᱚ ᱫᱚ ᱨᱟᱹᱧᱪᱤ ᱨᱮᱭ ᱠᱟᱹᱢᱤ ᱠᱟᱱ ᱚᱠᱛᱚ ᱨᱮᱜᱮ ᱚᱸᱰᱮᱱᱟᱜ ᱤᱸᱫᱽᱨᱚᱯᱩᱨᱤ ᱤᱞᱟᱠᱟ ᱨᱮ ᱵᱟᱹᱠᱷᱩᱞ ᱫᱚᱭ ᱵᱮᱱᱟᱣ ᱟᱠᱟᱫ ᱛᱟᱦᱮᱸᱫ ᱾ ᱢᱮᱱᱠᱷᱟᱱ ᱡᱤᱭᱚᱱ ᱨᱮᱭᱟᱜ ᱢᱩᱪᱟᱹᱫ ᱚᱠᱛᱚ ᱠᱚᱨᱮ ᱫᱚ ᱡᱟᱱᱟᱢ ᱴᱷᱟᱶ ᱯᱤᱸᱰᱟᱹᱨᱦᱟᱴ ᱨᱮᱜᱮ ᱮᱠᱟᱥᱤᱸᱜᱟᱹ ᱠᱟᱛᱮ ᱫᱚᱭ ᱛᱟᱦᱮᱸᱱ ᱠᱟᱱ ᱛᱟᱦᱮᱸᱫ ᱾ ᱩᱱᱤ ᱫᱚ ᱡᱤᱭᱚᱱ ᱨᱮᱭᱟᱜ ᱢᱩᱪᱟᱹᱫ ᱫᱤᱱ ᱠᱚᱨᱮ ᱫᱚ ᱟᱹᱰᱤ ᱦᱟᱨᱠᱮᱛ ᱛᱮ ᱡᱤᱭᱚᱱ ᱮ ᱠᱷᱟᱸᱰᱟᱣ ᱮᱫ ᱛᱟᱦᱮᱸᱫ ᱾ ᱚᱠᱚᱭ ᱦᱚᱸ ᱩᱱᱤᱭᱟᱜ ᱠᱷᱚᱡᱽ ᱠᱷᱚᱵᱚᱨ ᱜᱮ ᱵᱟᱠᱚ ᱫᱚᱦᱚ ᱞᱮᱫ ᱛᱟᱭᱟ ᱾ ᱛᱤᱱᱨᱮ ᱡᱤᱭᱚᱱ ᱨᱤᱱᱤᱡ ᱵᱮᱲᱟᱭ ᱦᱟᱺᱥᱩᱨᱚᱜ ᱞᱟᱹᱜᱤᱫᱚᱜ ᱠᱟᱱ ᱛᱟᱦᱮᱸᱱ ᱩᱱ ᱚᱠᱛᱚ ᱡᱷᱟᱨᱠᱷᱚᱸᱰ ᱵᱤᱫᱷᱟᱱ ᱥᱚᱵᱷᱟ ᱨᱤᱱᱤᱡ ᱚᱫᱷᱭᱚᱠᱷᱭᱚ ᱤᱱᱫᱚᱨ ᱥᱤᱝ ᱱᱟᱢᱫᱷᱟᱨᱤᱭ ᱦᱤᱨᱤ ᱞᱮᱫᱮᱭᱟ ᱾ ᱩᱱ ᱫᱚ ᱟᱡᱟᱜ ᱚᱠᱛᱚ ᱟᱹᱰᱤ ᱜᱮ ᱵᱤᱞᱚᱢ ᱦᱩᱭ ᱟᱠᱟᱱ ᱛᱟᱦᱮᱸᱱ ᱾ ᱱᱚᱝᱠᱟ ᱛᱮ ᱟᱫᱤᱛᱭᱚ ᱢᱤᱛᱨᱚᱣᱟᱜ ᱡᱤᱣᱤᱵᱟᱹᱛᱤ ᱫᱚ ᱟᱵᱚ ᱛᱟᱞᱟ ᱠᱷᱚᱱ ᱡᱟᱭᱡᱩᱜᱽ ᱞᱟᱹᱜᱤᱫ ᱤᱬᱤᱡ ᱥᱟᱹᱨᱤ ᱮᱱᱟ ᱾

ᱥᱟᱹᱠᱷᱭᱟᱹᱛ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

http://www.allindiaaseca.org/books/aditya-mitra.html