ᱠᱟᱨᱟᱢ ᱵᱤᱱᱛᱤ

ᱣᱤᱠᱤᱯᱤᱰᱤᱭᱟ ᱠᱷᱚᱱ
Jump to navigation Jump to search

ᱠᱟᱨᱟᱢ ᱵᱤᱱᱛᱤ

ᱠᱟᱨᱟᱢ ᱵᱤᱱᱛᱤ ᱫᱚ ᱵᱟᱨ ᱞᱮᱠᱟᱛᱮ ᱦᱟ.ᱴᱤᱧ ᱜᱟᱱᱚᱜᱼᱟ ᱾ ᱢᱤᱫ ᱫᱚ ᱵᱚᱸᱜᱟ ᱠᱟᱨᱟᱢ ᱟᱨ ᱫᱚᱥᱟᱨ ᱫᱚ ᱵᱩᱰᱷᱤ ᱠᱟᱨᱟᱢ ᱾ ᱠᱟᱨᱟᱢ ᱫᱚ ᱥᱚᱦᱨᱟᱭ ᱵᱚᱸᱜᱟ ᱠᱩᱱᱟᱹᱢᱤ ᱟᱨ ᱟᱜᱷᱟᱬ ᱵᱚᱸᱜᱟ ᱠᱩᱱᱟᱹᱢᱤ ᱠᱚᱨᱮ ᱠᱚ ᱵᱚᱸᱜᱟᱭᱟ ᱾ ᱠᱟᱨᱟᱢ ᱵᱤᱱᱛᱤ ᱫᱚ ᱟ.ᱰᱤ ᱦᱚᱲ ᱟ.ᱰᱤ ᱞᱮᱠᱟ ᱠᱚ ᱵᱤᱱᱛᱤᱭᱟ ᱾ ᱢᱟᱨᱮ ᱦᱟᱯᱲᱟᱢ ᱠᱚᱠᱚ ᱨᱚᱲ ᱟᱠᱟᱜᱼᱟ ᱵᱟᱝ ᱢᱟ " ᱟ.ᱰᱤ ᱯᱟ.ᱦᱤᱞ ᱨᱮ ᱯᱤᱞᱪᱩ ᱟᱭᱳ ᱵᱟᱵᱟ ᱨᱤᱱ ᱟ.ᱰᱤ ᱜᱚᱴᱟᱝ ᱜᱟᱬᱟ ᱠᱚ ᱢᱟ.ᱫᱽᱨᱮ ᱵᱟᱵᱽᱱᱟ ᱟᱨ ᱵᱟ.ᱵᱽᱱᱤ ᱧᱩᱛᱩᱢᱟᱱ ᱢᱤᱫ ᱠᱚᱲᱟ ᱟᱨ ᱠᱩᱲᱤ ᱜᱤᱜᱽᱨᱟ. ᱠᱤᱱ ᱛᱟᱦᱮᱸ ᱠᱟᱱᱟ ᱾ ᱩᱱᱠᱤᱱ ᱠᱤᱱ ᱡᱩᱨᱤ ᱡᱚᱛᱟ ᱮᱱ ᱛᱟᱭᱚᱢ ᱜᱤᱫᱽᱨᱟ. ᱜᱟᱬᱟ ᱟᱱ ᱠᱷᱟᱱ ᱠᱤᱱ ᱟ.ᱰᱤ ᱡᱩᱨ ᱠᱤᱱ ᱠᱤᱥᱟ.ᱬ ᱮᱱᱟ ᱾ ᱚᱲᱟᱜ ᱨᱮᱭᱟᱜ ᱠᱟᱢ ᱠᱟᱡᱽ ᱞᱟ.ᱜᱤᱫ ᱠᱚᱲᱟ ᱫᱚ ᱞᱚᱥᱚ ᱟᱨ ᱠᱩᱲᱤ ᱫᱚ ᱵᱟᱥᱚ ᱧᱩᱛᱩᱢ ᱜᱩᱛᱤ ᱟᱨ ᱠᱟ.ᱲᱢᱤ ᱠᱤᱱ ᱫᱚᱦᱚ ᱟᱱᱟ ᱾ ᱩᱱᱠᱤᱱ ᱜᱩᱛᱤ ᱠᱟ.ᱲᱢᱤ ᱦᱟᱨᱟ ᱡᱩᱦᱩ ᱠᱟᱛᱮ ᱟ.ᱠᱤᱱ ᱟ.ᱠᱤᱱ ᱛᱟᱞᱟᱨᱮ ᱡᱩᱣᱟ.ᱱ ᱵᱟ.ᱠᱤᱱ ᱥᱟᱸᱵᱽᱲᱟᱣ ᱞᱮᱫ ᱠᱷᱟᱱ ᱵᱟ.ᱭᱼᱵᱟ.ᱭᱛᱮ ᱥᱟ.ᱜᱟ.ᱭ ᱛᱟ.ᱠᱤᱱ ᱥᱩᱨ ᱤᱫᱤ ᱮᱱᱟ ᱾ ᱡᱟᱦᱟᱸ ᱠᱷᱟ.ᱛᱤᱨ ᱟ.ᱰᱤ ᱫᱤᱱ ᱚᱱᱠᱟ ᱵᱟ.ᱠᱤᱱ ᱛᱟᱦᱮᱸ ᱫᱟᱲᱮ ᱟᱫ ᱛᱮ ᱩᱠᱩ ᱠᱩᱸᱵᱽᱲᱩ ᱛᱮ ᱫᱩᱯᱞᱟ.ᱲ ᱠᱤᱱ ᱪᱟᱯᱟᱞ ᱮᱱᱟ ᱾ ᱟᱨ ᱛᱤᱨᱤ ᱯᱩᱨᱩᱥ ᱞᱮᱠᱟ ᱡᱚᱯᱚᱨ ᱡᱚᱞᱮ ᱠᱟ.ᱢᱤ ᱠᱚᱠᱤᱱ ᱦᱟ.ᱡᱩᱜ ᱥᱮᱱᱚᱜᱼᱟ ᱾ ᱟᱫᱚ ᱱᱚᱶᱟ ᱠᱚ ᱧᱮᱞ ᱠᱟᱛᱮ ᱟ.ᱠᱤᱱᱟᱜ ᱫᱟ.ᱦᱱᱟ. ᱛᱮᱜᱮ ᱠᱤᱥᱟ.ᱬ ᱫᱚᱭ ᱵᱟᱯᱞᱟ ᱠᱟᱫ ᱠᱤᱱᱟ ᱾

ᱠᱚᱭ ᱠᱟᱛᱮ ᱟ.ᱥᱩᱞᱚᱜ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱟ.ᱰᱤ ᱥᱮᱨᱢᱟ ᱯᱟᱨᱚᱢ ᱮᱱ ᱨᱮᱦᱚᱸ ᱞᱚᱥᱚ ᱟᱨ ᱵᱟᱥᱚ ᱨᱤᱱ ᱜᱤᱫᱽᱨᱟ. ᱯᱤᱫᱽᱨᱟ. ᱜᱮ ᱵᱟᱝ ᱠᱚ ᱦᱩᱭ ᱞᱮᱱᱟ ᱾ ᱢᱮᱱᱮᱛ ᱟ.ᱠᱤᱱᱟᱜ ᱠᱚᱯᱟᱲ ᱨᱮ ᱜᱤᱫᱽᱨᱟ. ᱯᱤᱫᱽᱨᱟ. ᱞᱟ.ᱜᱤᱫ ᱥᱩᱠ ᱜᱮ ᱵᱟᱝ ᱛᱟᱦᱮᱸ ᱠᱟᱱᱟ ᱾ ᱛᱟᱭᱚᱢ ᱫᱚᱠᱤᱱ ᱦᱟᱲᱟᱢ ᱵᱩᱰᱷᱤ ᱤᱫᱤ ᱮᱱᱟ ᱾ ᱛᱟᱭᱚᱢ ᱫᱚ ᱵᱟᱵᱽᱱᱟ ᱦᱟᱲᱟᱢ ᱚᱲᱟᱜ ᱨᱮ ᱜᱩᱛᱤ ᱠᱟ.ᱲᱢᱤᱜ ᱫᱚ ᱠᱤᱱ ᱵᱟ.ᱜᱤ ᱠᱮᱜᱼᱟ ᱾ ᱞᱚᱥᱚ ᱦᱟᱲᱟᱢ ᱢᱤᱫ ᱛᱷᱩᱞᱤ ᱜᱚᱜ ᱠᱟᱛᱮ ᱫᱤᱱᱟ.ᱢ ᱦᱤᱞᱚᱜ ᱪᱟ.ᱭᱜᱟᱲ, ᱪᱟᱢᱯᱟ ᱜᱟᱲ ᱚᱲᱟᱜᱼᱚᱲᱟᱜ ᱪᱟᱣᱞᱮ ᱠᱚᱠᱚᱭ ᱮ ᱥᱮᱱᱚᱜᱼᱟ ᱾ ᱟᱨ ᱨᱩᱲᱟ.ᱲ ᱚᱠᱛᱮ ᱵᱟᱵᱽᱱᱟ, ᱵᱟ.ᱵᱽᱱᱤ ᱛᱤᱠᱤᱱᱟᱜ ᱵᱟᱦᱟ ᱵᱟᱸᱫᱮᱞᱟ ᱨᱮ ᱠᱚᱭ ᱟ.ᱜᱩ ᱪᱟᱣᱞᱮ ᱫᱟᱠᱟ ᱠᱟᱛᱮ ᱠᱤᱱ ᱡᱚᱢᱟ ᱾

ᱠᱤᱠᱤᱲ ᱵᱤᱧ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱚᱱᱠᱟᱜᱮ ᱢᱤᱫ ᱫᱤᱱ ᱞᱚᱥᱚ ᱦᱟᱲᱟᱢ ᱫᱚ ᱥᱮᱛᱟᱜ ᱠᱷᱚᱱ ᱟ.ᱭᱩᱵ ᱫᱷᱟ.ᱵᱤᱡ ᱚᱲᱟᱜᱼᱚᱲᱟᱜ ᱠᱚᱭ ᱟᱠᱟᱭ ᱛᱟᱦᱮᱸ ᱮᱱ ᱨᱮᱦᱚᱸ ᱚᱠᱚᱭ ᱦᱚᱸ ᱢᱤᱫ ᱪᱩᱯᱩᱫ ᱜᱟᱱ ᱪᱟᱣᱞᱮ ᱦᱚᱸ ᱠᱚᱭ ᱵᱟᱠᱚ ᱮᱢᱟ ᱫᱮᱭᱟ ᱾ ᱠᱟᱺᱦᱤᱥ ᱛᱮ ᱚᱲᱟᱜ ᱮ ᱨᱩᱣᱟ.ᱲ ᱠᱟᱱᱟ ᱾ ᱡᱟᱣ ᱞᱮᱠᱟ ᱜᱮ ᱚᱱᱟ ᱵᱟᱦᱟ ᱵᱟᱸᱫᱮᱞᱟ ᱨᱮ ᱫᱟᱜ ᱟᱸᱡᱽᱞᱮ ᱨᱟᱠᱟᱵ ᱠᱟᱛᱮᱭ ᱧᱩ ᱛᱟᱨᱟᱭᱟ ᱢᱮᱱᱛᱮ ᱧᱮᱞ ᱠᱤᱱᱟᱭ ᱵᱟᱨᱮᱭᱟ ᱠᱤᱠᱤᱲ ᱵᱤᱧ ᱛᱤᱡᱩ ᱾ ᱟᱨᱮᱡ ᱜᱤᱰᱤ ᱠᱟᱛᱮ ᱟᱨ ᱦᱚᱸ ᱟᱸᱡᱽᱞᱮ ᱨᱟᱠᱟᱵ ᱠᱮᱜ ᱟᱭ ᱟᱨ ᱦᱚᱸ ᱩᱱᱞᱤᱱ ᱠᱤᱠᱤᱲ ᱵᱤᱧ ᱜᱮ ᱠᱤᱱ ᱪᱟᱯᱮ ᱟᱠᱟᱱᱟ ᱾ ᱨᱟ.ᱜᱤ ᱛᱮ ᱯᱚᱨᱟᱭᱱᱤ ᱥᱟᱠᱟᱢ ᱦᱮᱴᱮᱡ ᱠᱟᱛᱮ ᱯᱚᱴᱚᱢ ᱠᱮᱫ ᱠᱤᱱ ᱛᱮ ᱛᱷᱩᱞᱤ ᱨᱮ ᱥᱟᱸᱵᱟᱣ ᱠᱟᱛᱮ ᱚᱲᱟᱜ ᱮ ᱦᱮᱡ ᱥᱮᱴᱮᱨ ᱮᱱᱟ ᱾ ᱛᱷᱩᱞᱤ ᱫᱚ ᱚᱲᱟᱜ ᱯᱤᱸᱰᱟ. ᱨᱮᱭ ᱫᱚᱦᱚ ᱠᱮᱫ ᱛᱮ ᱵᱩᱰᱷᱤ ᱛᱟᱭ ᱥᱟᱱᱟᱢ ᱜᱷᱚᱴᱚᱱ ᱮ ᱞᱟ.ᱭ ᱟᱫᱮᱭᱟ ᱾ ᱵᱩᱰᱷᱤ ᱛᱟᱭ ᱫᱚ ᱚᱱᱟ ᱛᱷᱩᱞᱤ ᱯᱤᱸᱰᱟ. ᱨᱮᱜᱮ ᱴᱩᱠᱩᱡ ᱛᱮᱭ ᱦᱟ.ᱨᱩᱵ ᱮᱥᱮᱫ ᱠᱮᱫ ᱛᱮ ᱜᱟᱯᱟ ᱥᱮᱛᱟᱜ ᱮ ᱧᱮᱞᱟ ᱢᱮᱱᱛᱮᱭ ᱢᱮᱱ ᱠᱮᱜᱼᱟ ᱾ ᱟᱫᱚ ᱴᱩᱠᱩᱡ ᱪᱟᱣᱞᱮ ᱫᱟᱠᱟ ᱠᱮᱫ ᱛᱮ ᱡᱚᱢ ᱠᱟᱛᱮ ᱠᱤᱱ ᱡᱟ.ᱯᱤᱫ ᱠᱮᱜᱼᱟ ᱾

ᱛᱟᱞᱟ ᱧᱤᱸᱫᱟ. ᱚᱠᱛᱚ ᱠᱤᱠᱤᱲ ᱵᱤᱧ ᱫᱚ ᱢᱟᱱᱣᱟ ᱦᱚᱯᱚᱱ ᱨᱮᱠᱤᱱ ᱯᱟᱞᱴᱟᱣ ᱮᱱᱟ ᱟᱨ ᱚᱶᱟᱼᱚᱶᱟ ᱠᱤᱱ ᱨᱟᱜ ᱟᱸᱫᱚᱲ ᱠᱮᱜᱼᱟ ᱾ ᱨᱟᱜ ᱟᱸᱡᱚᱢ ᱛᱮ ᱦᱟᱲᱟᱢ ᱵᱩᱰᱷᱤ ᱠᱤᱱ ᱪᱚᱢᱠᱟᱣ ᱵᱮᱨᱮᱫ ᱮᱱᱟ ᱾ ᱟ.ᱰᱤ ᱨᱟ.ᱥᱠᱟ. ᱟᱨ ᱦᱟᱦᱟᱲᱟ ᱥᱟᱛᱞᱟᱜ ᱠᱤᱱ ᱦᱚᱵᱚᱨ ᱨᱟᱠᱟᱵ ᱠᱮᱫ ᱠᱤᱱᱟ ᱾ ᱟ.ᱰᱤ ᱫᱩᱞᱟ.ᱲ ᱛᱮ ᱠᱤᱱ ᱦᱟᱨᱟ ᱵᱩᱨᱩ ᱠᱮᱫ ᱠᱤᱱᱟ ᱾ ᱩᱱᱠᱤᱱ ᱵᱟᱞᱚᱠ ᱫᱚ ᱫᱷᱚᱨᱢᱚ ᱵᱟᱵᱟ ᱜᱮᱭ ᱮᱢ ᱟᱠᱟᱫ ᱠᱤᱱᱟ ᱩᱭᱦᱟ.ᱨ ᱠᱟᱛᱮ ᱧᱩᱛᱩᱢ ᱫᱚ ᱫᱷᱟ.ᱨᱢᱩ ᱟᱨ ᱠᱟ.ᱨᱢᱩ ᱠᱤᱱ ᱛᱷᱩᱢ ᱟᱫ ᱠᱤᱱᱟ ᱾ ᱢᱮᱨᱚᱢ ᱜᱩᱯᱤ ᱞᱮᱠᱟ ᱠᱤᱱ ᱦᱟᱨᱟ ᱮᱱ ᱠᱷᱟᱱ ᱵᱟᱵᱽᱱᱟ, ᱵᱟ.ᱵᱽᱱᱤ ᱚᱲᱟᱜ ᱨᱮ ᱢᱮᱨᱚᱢ ᱜᱩᱯᱤ ᱠᱤᱱ ᱟ.ᱪᱩ ᱮᱱᱟ ᱾

ᱵᱚᱸᱜᱟ ᱠᱚᱣᱟᱜ ᱠᱟᱨᱟᱢ ᱵᱚᱸᱜᱟ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱢᱤᱫ ᱫᱤᱱ ᱦᱤᱞᱚᱜ ᱫᱚ ᱵᱚᱸᱜᱟ ᱵᱳᱨᱳ ᱠᱚ ᱠᱟᱨᱟᱢ ᱵᱚᱸᱜᱟ ᱨᱮ ᱵᱷᱮᱞᱟᱝ ᱡᱟᱝ ᱵᱟᱦᱟ ᱞᱟᱜᱟᱣ ᱞᱟ.ᱜᱤᱫ ᱚᱱᱟ ᱯᱟᱱᱛᱮ ᱫᱷᱟ.ᱨᱛᱤ ᱯᱩᱨᱤ ᱛᱮᱠᱚ ᱦᱮᱡ ᱮᱱᱟ ᱾ ᱯᱟᱸᱛᱮᱼᱯᱟᱸᱛᱮ ᱛᱮ ᱵᱟᱠᱚ ᱧᱟᱢ ᱫᱟᱲᱮᱭᱟᱫ ᱠᱷᱟᱱ ᱠᱟ.ᱨᱢᱩ ᱟᱨ ᱫᱷᱟ.ᱨᱢᱩ ᱛᱤᱠᱤᱱ ᱠᱤᱱ ᱧᱟᱢ ᱟᱫ ᱠᱚᱣᱟ ᱾ ᱟᱫᱚ ᱵᱚᱸᱜᱟ ᱠᱚᱣᱟᱜ ᱠᱟᱨᱟᱢ ᱵᱚᱸᱜᱟ ᱟᱨ ᱮᱱᱮᱡ ᱧᱮᱧᱮᱞ ᱟᱠᱚᱣᱟᱜ ᱥᱟᱜᱟᱲ ᱛᱮᱠᱤᱱ ᱪᱟᱞᱟᱣ ᱛᱟᱨᱟ ᱮᱱᱟ ᱾ ᱜᱟ.ᱰᱤ ᱪᱮᱛᱟᱱ ᱠᱷᱚᱱ ᱜᱮ ᱟᱠᱚᱣᱟᱜ ᱵᱚᱸᱜᱟ ᱵᱳᱨᱳ ᱱᱮᱢᱟᱪᱟᱨ ᱫᱚ ᱠᱤᱱ ᱧᱮᱞ ᱡᱚᱝ ᱠᱟᱱᱟ ᱾ ᱨᱩ~ ᱟᱨ ᱫᱚᱱ ᱮᱱᱮᱡ ᱠᱚ ᱟ.ᱰᱤ ᱵᱷᱚᱲᱚᱠ ᱠᱤᱱ ᱧᱮᱞ ᱠᱮᱫ ᱠᱚᱛᱮ ᱫᱚᱢᱮ ᱠᱤᱱ ᱞᱟᱸᱫᱟ ᱠᱮᱜᱼᱟ ᱾ ᱵᱚᱸᱜᱟ ᱠᱚᱭᱤᱡ ᱨᱟᱡᱟᱭ ᱵᱟᱰᱟᱭ ᱠᱮᱫ ᱠᱷᱟᱱ ᱠᱚ ᱟ.ᱜᱩ ᱨᱩᱣᱟ.ᱲ ᱦᱚᱴᱚ ᱠᱟᱫ ᱠᱤᱱᱟ ᱫᱷᱟ.ᱨᱛᱤ ᱯᱩᱨᱤ ᱛᱮ ᱾

ᱠᱟ.ᱨᱢᱩ ᱫᱷᱟ.ᱨᱢᱩ ᱛᱤᱠᱤᱱ ᱠᱟᱨᱟᱢ ᱵᱤᱫ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱠᱟ.ᱨᱢᱩ ᱟᱨ ᱫᱷᱟ.ᱨᱢᱩ ᱛᱤᱠᱤᱱ ᱫᱤᱱᱟ.ᱢ ᱜᱮ ᱢᱮᱨᱚᱢ ᱠᱤᱱ ᱜᱩᱯᱤᱭᱟ ᱟᱨ ᱵᱚᱸᱜᱟ ᱠᱚ ᱞᱮᱠᱟ ᱠᱟᱨᱟᱢ ᱠᱤᱱ ᱵᱤᱫᱟ ᱟᱨ ᱠᱤᱱ ᱮᱱᱮᱡᱼᱟ ᱾ ᱟ.ᱞᱤᱱᱟᱜ ᱫᱚᱱ ᱮᱱᱮᱡ ᱧᱮᱞᱛᱮ ᱢᱮᱨᱚᱢ ᱠᱚᱫᱚ ᱟ.ᱛᱤᱧ ᱰᱷᱤᱞᱟ.ᱣ ᱠᱟᱛᱮ ᱟ.ᱠᱤᱱ ᱜᱮᱠᱚ ᱠᱚᱭᱚᱜ ᱠᱟ.ᱠᱤᱱᱟ ᱾ ᱵᱟ.ᱭᱼᱵᱟ.ᱭ ᱛᱮ ᱡᱚᱛᱚ ᱢᱮᱨᱚᱢ ᱠᱚ ᱢᱚᱨᱟ ᱪᱟᱵᱟ ᱮᱱᱟ ᱾

ᱫᱤᱱᱟ.ᱢ ᱜᱮ ᱚᱱᱠᱟ ᱜᱮ ᱠᱤᱱ ᱠᱷᱮᱢᱟᱣ ᱠᱮᱜᱼᱟ ᱫᱤᱱ ᱫᱚ ᱾ ᱟᱫᱚ ᱢᱤᱫ ᱫᱤᱱ ᱫᱚ ᱠᱤᱱ ᱥᱟᱵ ᱦᱚᱪᱚ ᱮᱱᱟ ᱠᱤᱥᱟ.ᱬ ᱴᱷᱮᱱ ᱟᱫᱚ ᱚᱱᱟ ᱠᱟᱨᱟᱢ ᱰᱟ.ᱨ ᱫᱚ ᱟᱺᱭᱴᱷᱟ. ᱛᱤ ᱛᱮ ᱨᱟᱪᱟᱜ ᱛᱩᱫ ᱠᱟᱛᱮ ᱮᱭᱟᱭ ᱱᱟᱺᱭ ᱯᱟᱨᱚᱢ ᱮ ᱪᱟᱯᱟᱫ ᱜᱤᱰᱤ ᱠᱟᱫᱼᱟ ᱾ ᱛᱟᱭᱚᱢ ᱢᱮᱨᱚᱢ ᱜᱩᱯᱤ ᱠᱷᱚᱱ ᱫᱚ ᱠᱤᱱ ᱪᱩᱰᱟ.ᱨ ᱮᱱᱟ ᱟᱨ ᱦᱚᱲ ᱚᱲᱟᱜ ᱠᱚᱨᱮ ᱜᱮ ᱠᱤᱱ ᱠᱟ.ᱢᱤ ᱵᱟᱲᱟ ᱠᱮᱜᱼᱟ ᱾ ᱠᱩᱲᱟ.ᱭ ᱞᱟ.ᱜᱤᱫ ᱠᱷᱟᱱ ᱟ.ᱠᱤᱱ ᱵᱤᱫᱟ.ᱞ ᱫᱚ ᱥᱚᱝ ᱪᱟᱵᱟᱜᱼᱟ ᱾ ᱫᱤᱱᱟ.ᱢ ᱜᱮ ᱱᱚᱝᱠᱟ ᱠᱷᱟᱱ ᱨᱚᱦᱚᱭ ᱦᱳᱲᱳ ᱛᱩᱫ ᱜᱤᱰᱤ ᱠᱤᱱ ᱪᱷᱩᱴᱟ.ᱣ ᱮᱱᱟ ᱾ ᱟᱫᱚ ᱫᱷᱚᱨᱢᱚ ᱜᱮ ᱦᱟᱲᱟᱢ ᱪᱤᱱᱛᱮ ᱚᱯᱮᱞ ᱠᱟᱛᱮ ᱢᱮᱛᱟ ᱠᱤᱱ ᱠᱟᱱᱟᱭ, " ᱟ.ᱰᱤ ᱵᱟ.ᱲᱤᱡ ᱵᱤᱱ ᱠᱟ.ᱢᱤ ᱠᱟᱱᱟ ᱾" ᱟᱨ ᱮ ᱞᱟ.ᱭ ᱟᱫ ᱠᱤᱱᱟ, ᱠᱟᱨᱟᱢ ᱜᱳᱥᱟᱸᱭ ᱵᱟ.ᱵᱤᱱ ᱧᱟᱢ ᱟ.ᱜᱩ ᱮ ᱵᱷᱩᱨ ᱱᱚᱝᱠᱟ ᱜᱮ ᱟ.ᱵᱤᱱᱟᱜ ᱫᱚᱥᱟ ᱫᱚ ᱦᱩᱭᱩᱜᱼᱟ ᱾ ᱟᱫᱚ ᱥᱚᱜ ᱞᱩᱵᱩᱜ ᱟᱨ ᱵᱩᱰᱭᱟ. ᱜᱚᱜ ᱠᱟᱛᱮ ᱠᱟᱨᱟᱢ ᱜᱳᱥᱟᱸᱭ ᱯᱟᱸᱛᱮ ᱠᱤᱱ ᱩᱰᱩᱠ ᱮᱱᱟ ᱾ ᱟ.ᱰᱤ ᱥᱟᱺᱜᱤᱧ ᱪᱟᱞᱟᱣ ᱮᱱ ᱛᱟᱭᱚᱢ ᱢᱤᱫ ᱵᱟᱸᱫᱮᱞᱟ ᱨᱮ ᱥᱚᱜ ᱞᱩᱵᱩᱜ ᱥᱤᱯᱤ ᱠᱟᱛᱮ ᱠᱤᱱ ᱡᱚᱢᱟ ᱢᱮᱱᱛᱮ ᱟᱫᱚ ᱫᱟᱜ ᱟᱸᱡᱽᱞᱮ ᱨᱟᱠᱟᱵ ᱠᱟᱛᱮ ᱠᱤᱱ ᱧᱮᱞᱟ ᱫᱚ ᱫᱟᱜ ᱨᱮ ᱠᱤᱠᱤᱲ ᱵᱤᱧ ᱠᱚ ᱪᱟᱯᱮ ᱟᱠᱟᱱᱟ ᱢᱮᱱᱛᱮ ᱠᱤᱱ ᱧᱮᱞ ᱠᱮᱫ ᱠᱚᱣᱟ ᱾

ᱪᱟᱞᱟᱣ ᱪᱟᱞᱟᱣ ᱛᱮ ᱜᱟ.ᱭ ᱵᱤᱛᱠᱤᱞ ᱠᱤᱱ ᱧᱟᱢ ᱠᱮᱫ ᱠᱚᱣᱟ ᱾ ᱩᱱᱠᱩ ᱴᱷᱮᱱ ᱠᱷᱚᱱ ᱛᱳᱣᱟ ᱫᱩᱦᱟᱺᱣ ᱠᱟᱛᱮ ᱠᱤᱱ ᱧᱩᱭᱟ ᱢᱮᱱᱛᱮ, ᱩᱱᱠᱩ ᱴᱷᱮᱱ ᱦᱚᱸ ᱠᱤᱱ ᱯᱷᱟᱸᱫᱟ ᱚᱪᱚ ᱮᱱᱟ ᱾ ᱮᱱᱠᱷᱟᱱ ᱜᱮ ᱟᱨ ᱦᱚᱸ ᱨᱟᱨᱟᱜ ᱠᱤᱱ ᱪᱷᱩᱴᱟ.ᱣ ᱮᱱᱟ ᱾ ᱟᱨ ᱜᱟ.ᱭ ᱵᱤᱛᱠᱤᱞ ᱠᱚ ᱫᱟ.ᱵᱤ ᱟᱫ ᱠᱤᱱᱟ ᱡᱮ ᱟᱞᱮᱭᱤᱡ ᱠᱤᱥᱟ.ᱬ ᱵᱟ.ᱱᱩᱜ ᱮᱭᱟ ᱾ ᱱᱚᱶᱟ ᱠᱟᱛᱷᱟ ᱠᱟᱨᱟᱢ ᱜᱳᱥᱟᱸᱭ ᱞᱟ.ᱭ ᱟᱭ ᱵᱤᱱ ᱾ ᱚᱱᱟ ᱛᱟᱭᱚᱢ ᱩᱸᱴ, ᱜᱟᱫᱷᱟ, ᱥᱟᱫᱚᱢ ᱮᱢᱟᱱ ᱠᱚ ᱠᱤᱱ ᱧᱟᱢ ᱤᱫᱤ ᱠᱮᱫ ᱠᱚᱣᱟ ᱾ ᱡᱚᱛᱚ ᱜᱮ ᱚᱱᱠᱟ ᱜᱮᱠᱚ ᱫᱟ.ᱞᱵᱤ ᱟᱫ ᱠᱤᱱᱟ ᱾ ᱪᱟᱞᱟᱣᱼᱪᱟᱞᱟᱣ ᱛᱮ ᱫᱚᱨᱭᱟ ᱠᱤᱱ ᱧᱟᱢ ᱠᱮᱜᱼᱟ ᱟᱫᱚ ᱠᱤᱱ ᱨᱟᱜ ᱡᱚᱝ ᱠᱟᱱᱟ ᱾ ᱟ.ᱠᱤᱱᱟᱜ ᱨᱟᱜ ᱟᱸᱡᱚᱢ ᱠᱟᱛᱮ ᱮᱭᱟᱭ ᱜᱚᱴᱟᱝ ᱱᱟᱺᱭᱨᱮ ᱵᱚᱣᱟᱲ, ᱤᱪᱟ.ᱜ, ᱠᱟᱴᱠᱚᱢ, ᱛᱟᱭᱟᱱ, ᱢᱟᱜᱟᱲ, ᱞᱮᱸᱰᱮᱫ, ᱦᱚᱨᱚ ᱮᱢᱟᱱ ᱠᱚ ᱫᱟᱭᱟ ᱮᱱᱛᱮ ᱠᱚ ᱯᱟᱨᱚᱢ ᱠᱟᱫ ᱠᱤᱱᱟ ᱾ ᱟᱨ ᱟᱠᱚᱣᱟᱜ ᱦᱚᱸ ᱫᱟ.ᱵᱤ ᱠᱤᱱ ᱤᱫᱤ ᱛᱟᱨᱟ ᱠᱮᱜᱼᱟ ᱾

ᱠᱟᱨᱟᱢ ᱜᱳᱥᱟᱸᱭ ᱟ.ᱜᱩ ᱨᱩᱣᱟ.ᱲ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱠᱟᱨᱟᱢ ᱜᱳᱥᱟᱸᱭ ᱴᱷᱮᱱ ᱫᱚ ᱵᱮᱜᱽᱱᱟ ᱵᱮᱜᱽᱱᱤ ᱪᱮᱬᱮ ᱟᱜ ᱯᱷᱟ.ᱠᱬᱟ.ᱜ ᱨᱮ ᱫᱮᱡ ᱠᱟᱛᱮ ᱠᱤᱱ ᱥᱮᱴᱮᱨ ᱮᱱᱟ ᱾ ᱟᱫᱚ ᱠᱟᱨᱟᱢ ᱜᱳᱥᱟᱸᱭ ᱠᱤᱱ ᱟ.ᱜᱩ ᱨᱩᱣᱟ.ᱲ ᱠᱮᱫᱮᱭᱟ ᱾ ᱦᱚᱨ ᱛᱮᱱ ᱠᱚᱣᱟᱜ ᱫᱟ.ᱵᱤ ᱦᱚᱸᱭ ᱞᱟ.ᱭ ᱨᱩᱣᱟ.ᱲ ᱟᱫ ᱠᱚᱣᱟ ᱾ ᱜᱚᱴᱟ ᱦᱚᱨ ᱜᱷᱚᱬᱟ ᱠᱟᱛᱮ ᱜᱮ ᱠᱤᱱ ᱟ.ᱜᱩ ᱠᱮᱫᱮᱭᱟ ᱾ ᱵᱟᱵᱽᱱᱟ ᱵᱟ.ᱵᱽᱱᱤ ᱟᱜ ᱵᱟᱦᱟ ᱵᱟᱸᱫᱮᱞᱟ ᱨᱮᱠᱚ ᱡᱤᱨᱟ.ᱣ ᱞᱮᱱ ᱚᱠᱛᱚ ᱨᱮ ᱠᱟᱨᱟᱢ ᱜᱳᱥᱟᱸᱭ ᱫᱚ ᱚᱛ ᱨᱮᱠᱤᱱ ᱫᱚᱦᱚ ᱞᱮᱫᱮᱭᱟ ᱾ ᱩᱱ ᱡᱚᱦᱚᱜ ᱠᱟᱨᱟᱢ ᱜᱳᱥᱟᱸᱭ ᱫᱚ ᱚᱸᱰᱮ ᱜᱮ ᱨᱮᱦᱮᱫ ᱟᱫᱮᱭᱟ ᱾ ᱟᱫᱚ ᱵᱟᱨᱭᱟ ᱛᱤ ᱠᱟ.ᱴᱩᱵ ᱥᱟᱢᱟᱜ ᱠᱟᱛᱮ ᱮᱢᱟ ᱟᱫ ᱠᱤᱱᱟᱭ ᱟᱨ ᱮ ᱢᱮᱛᱟ ᱟ.ᱠᱤᱱ ᱠᱟᱱᱟ, " ᱥᱚᱦᱨᱟᱭ ᱵᱚᱸᱜᱟ ᱠᱩᱱᱟᱹᱢᱤ ᱵᱟᱝᱠᱷᱟᱱ ᱟᱜᱷᱟᱬ ᱵᱚᱸᱜᱟ ᱠᱩᱱᱟᱹᱢᱤ ᱨᱮᱧ ᱪᱟᱞᱟᱜᱼᱟ ᱚᱲᱟᱜ ᱛᱮᱫᱚ ᱾ ᱤᱧᱟᱜ ᱠᱟᱛᱷᱟ ᱡᱟᱦᱟᱸᱭ ᱵᱟᱭ ᱟᱸᱡᱚᱢᱟ ᱛᱤᱠᱤ ᱦᱳᱲᱳ ᱛᱟᱭ ᱯᱚᱴᱠᱚᱡᱚᱜᱼᱟ, ᱞᱚᱞᱚ ᱢᱟᱺᱰᱤ ᱠᱚ ᱛᱤᱡᱩᱭ ᱛᱟᱭᱟ, ᱪᱩᱞᱦᱟ. ᱟᱨ ᱥᱟ.ᱲᱤᱢ ᱨᱮ ᱠᱟᱨᱟᱢ ᱫᱟᱨᱮᱜᱼᱟ ᱾ " ᱱᱚᱝᱠᱟ ᱢᱮᱱ ᱠᱟᱛᱮ ᱟᱫᱚᱭ ᱪᱷᱟᱱ ᱮᱱᱟ ᱾

ᱠᱟ.ᱨᱢᱩ ᱟᱨ ᱫᱷᱟ.ᱨᱢᱩ ᱚᱱᱟ ᱛᱤ ᱠᱟ.ᱴᱩᱵ ᱥᱟᱛᱮ ᱨᱮ ᱠᱤᱱ ᱨᱮᱵᱮᱫ ᱠᱟᱫᱼᱟ ᱾ ᱚᱱᱟ ᱜᱮ ᱠᱟᱨᱟᱢ ᱫᱟᱨᱮ ᱮᱱᱟ ᱾ ᱠᱟ.ᱨᱢᱩ ᱫᱷᱟ.ᱨᱢᱩ ᱠᱟᱨᱟᱢ ᱠᱤᱱ ᱵᱤᱫ ᱠᱮᱜᱼᱟ ᱾ ᱮᱱᱮᱡ ᱥᱮᱨᱮᱧ ᱠᱮᱜᱟ ᱠᱤᱱ ᱟᱨ ᱟ.ᱰᱤ ᱡᱩᱨ ᱠᱤᱱ ᱠᱤᱥᱟ.ᱬ ᱮᱱᱟ ᱾

ᱵᱟᱨᱦᱮ ᱡᱚᱱᱚᱲ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

https://www.abebooks.com/servlet/BookDetailsPL?bi=2453812202&searchurl=tn%3Dkaram%2Bbinti%26sortby%3D17