ᱠᱟ.ᱢᱨᱩ ᱜᱩᱨᱩ

ᱠᱟ.ᱢᱨᱩ ᱜᱩᱨᱩ ᱫᱚ ᱠᱟ:ᱭᱩᱨ ᱪᱮᱬᱮ ᱨᱩᱯᱛᱮ ᱠᱟᱺᱣᱨᱤ ᱠᱟᱢᱨᱩᱯ ᱫᱤᱥᱚᱢ ᱠᱷᱚᱱ ᱮ ᱩᱰᱟ.ᱣ ᱦᱮᱡ ᱞᱮᱱᱟ ᱾ ᱚᱱᱟ ᱠᱟᱺᱣᱨᱤ ᱠᱟᱢᱨᱩᱯ ᱫᱤᱥᱚᱢ ᱨᱮ ᱠᱟᱺᱣᱨᱤᱼᱠᱟ.ᱴᱷᱤ ᱢᱮᱱᱛᱮ ᱢᱤᱫ ᱵᱚᱸᱜᱟᱦᱟᱜ ᱛᱷᱟᱱ ᱢᱮᱱᱟᱜᱼᱟ ᱟ.ᱰᱤ ᱥᱮᱫᱟᱭ ᱠᱷᱚᱱ ᱾ ᱚᱡᱷᱟ ᱥᱚᱠᱷᱟ ᱜᱩᱨᱩ ᱠᱚᱣᱟᱜ ᱠᱟ.ᱦᱱᱤᱨᱮ ᱢᱮᱱᱟᱜᱼᱟ ᱠᱟᱛᱷᱟᱡ ᱱᱚᱶᱟ ᱫᱷᱟ.ᱨᱛᱤ ᱨᱮ ᱠᱟᱺᱣᱨᱤᱼᱠᱟ.ᱴᱷᱤ ᱵᱚᱸᱜᱟᱭ ᱚᱯᱮᱞ ᱮᱱ ᱠᱷᱟᱱ ᱵᱟ.ᱲᱤᱡ ᱠᱚᱣᱟᱜ ᱵᱤᱨᱫᱟ.ᱯ ᱟ.ᱰᱤ ᱜᱮ ᱯᱟᱥᱱᱟᱣ ᱮᱱᱟ ᱜᱚᱴᱟ ᱫᱤᱥᱚᱢ ᱾ ᱠᱟ.ᱦᱱᱤ ᱨᱮ ᱢᱮᱱᱟᱜᱼᱟ ᱠᱟᱛᱷᱟᱡ ᱢᱟ.ᱱᱢᱤ ᱠᱚ ᱱᱩᱠᱩ ᱵᱟ.ᱲᱤᱡ ᱵᱚ.ᱜᱟ ᱴᱷᱮᱱ ᱠᱷᱚᱱ ᱫᱩᱜ ᱞᱟ.ᱜᱤᱫ ᱛᱮ ᱫᱷᱚᱨᱢᱚ ᱥᱮᱨᱢᱟ ᱯᱩᱨᱤ ᱠᱷᱚᱱ ᱫᱷᱟ.ᱨᱛᱤ ᱯᱩᱨᱤ ᱛᱮ ᱨᱟᱱ ᱢᱩᱨᱜᱟ.ᱱ ᱮ ᱟᱲᱟᱜ ᱜᱚᱫ ᱠᱟᱫᱼᱟ ᱾ ᱥᱟᱱᱟᱢ ᱚᱡᱷᱟ ᱠᱚ ᱡᱚᱴᱟᱣ ᱠᱟᱛᱮ ᱚᱱᱟ ᱨᱟᱱ ᱠᱚ ᱥᱟᱵ ᱫᱚᱦᱚᱭᱟ ᱢᱮᱱᱛᱮᱭ ᱢᱮᱛᱟᱫ ᱠᱚᱣᱟ ᱾ ᱦᱚᱨ ᱛᱮ ᱨᱟᱱ ᱢᱩᱨᱜᱟ.ᱱ ᱤᱸᱜᱤ ᱦᱮᱡ ᱮᱱᱟ ᱾ ᱵᱟ.ᱲᱤᱡ ᱵᱚᱸᱜᱟ ᱦᱚᱸ ᱦᱚᱨ ᱨᱮᱜᱮ ᱞᱟᱛᱟᱨ ᱥᱮᱫ ᱨᱮᱠᱚ ᱛᱟᱬᱟᱜ ᱟᱠᱟᱱ ᱛᱟᱦᱮᱸᱱ ᱾ ᱛᱤᱱ ᱡᱚᱦᱚᱜ ᱨᱟᱱ ᱢᱩᱨᱜᱟ.ᱱ ᱠᱚ ᱵᱟᱨᱟᱦᱤ ᱵᱟᱵᱮᱨ ᱞᱮᱠᱟ ᱛᱤᱸᱡᱟ.ᱣ ᱠᱟᱛᱮ ᱟᱬᱜᱚ ᱦᱮᱡ ᱮᱱᱟ, ᱩᱱ ᱡᱚᱦᱚᱜ ᱚᱡᱷᱟ ᱠᱚᱫᱚ ᱚᱱᱟ ᱫᱚ ᱵᱤᱧ ᱞᱮᱠᱟ ᱠᱚ ᱧᱮᱞ ᱠᱮᱫ ᱛᱮ ᱟ.ᱰᱤ ᱡᱩᱨ ᱠᱚ ᱵᱚᱨᱚᱣᱟᱫᱼᱟ ᱾ ᱥᱟᱵ ᱵᱟᱲᱟᱭ ᱞᱟ.ᱜᱤᱫ ᱢᱮᱱ ᱵᱟᱲᱟᱭ ᱛᱮᱜᱮ ᱚᱱᱟ ᱠᱚᱫᱚ ᱡᱚᱛᱚ ᱞᱟᱛᱟᱨ ᱥᱮᱫ ᱯᱟᱨᱚᱢ ᱤᱫᱤᱭᱮᱱᱟ ᱾ ᱞᱟᱛᱟᱨ ᱥᱮᱫ ᱨᱮᱫᱚ ᱵᱟ.ᱲᱤᱡ ᱵᱚᱸᱜᱟ ᱠᱚ ᱡᱚᱛᱚ ᱨᱟᱱ ᱠᱚ ᱥᱟᱵ ᱫᱚᱦᱚ ᱠᱮᱜᱼᱟ ᱾ ᱚᱡᱷᱟ ᱠᱚᱫᱚ ᱢᱤᱫᱴᱟ.ᱝ ᱥᱩᱢᱩᱝ ᱜᱮ ᱨᱮᱦᱮᱫ ᱨᱟᱱ ᱠᱚ ᱥᱟᱵ ᱞᱮᱜᱼᱟ ᱾ᱚᱱᱟᱛᱮ ᱩᱱ ᱡᱚᱦᱚᱜ ᱠᱷᱚᱱ ᱜᱮ ᱚᱡᱷᱟ ᱠᱚᱣᱟᱜ ᱜᱩᱱ ᱠᱷᱚᱱ ᱵᱟ.ᱲᱤᱡ ᱵᱚᱸᱜᱟᱦᱟᱜ ᱜᱩᱱ ᱜᱮ ᱵᱟ.ᱲᱛᱤ ᱮᱱᱟ ᱢᱮᱱᱛᱮ ᱯᱟ.ᱛᱭᱟ.ᱣ ᱛᱟᱦᱮᱸ ᱮᱱᱟ ᱾ ᱚᱱᱟ ᱠᱟᱺᱣᱨᱤ ᱠᱟᱢᱨᱩᱯ ᱫᱤᱥᱚᱢ ᱨᱮᱜᱮ ᱠᱟ.ᱢᱨᱩ ᱜᱩᱨᱩ ᱫᱚ ᱢᱤᱫ ᱚᱡᱷᱟᱭ ᱛᱟᱦᱮᱸ ᱠᱟᱱᱟ ᱾

ᱠᱟᱺᱭᱩᱨ ᱠᱷᱚᱱ ᱢᱟ.ᱱᱢᱤ

ᱠᱟᱺᱭᱩᱨ ᱪᱮᱬᱮ ᱨᱩᱯ ᱛᱮ ᱩᱰᱟ.ᱣ ᱦᱮᱡ ᱠᱟᱛᱮ ᱩᱱᱤ ᱫᱚ ᱠᱷᱮᱨᱣᱟᱲ ᱢᱩᱞᱩᱠ ᱨᱮᱭ ᱢᱟᱸᱰᱨᱟᱣ ᱟ.ᱪᱩᱨᱮᱱᱟ ᱾ ᱟ.ᱪᱩᱨᱼᱟ.ᱪᱩᱨ ᱛᱮ ᱢᱤᱫ ᱫᱤᱱ ᱫᱚ ᱠᱟ.ᱲᱢᱤ ᱠᱩᱲᱤ ᱧᱮᱞᱛᱮ ᱩᱱᱤ ᱴᱷᱮᱱ ᱢᱮᱫ ᱰᱷᱟᱝ ᱮᱱ ᱛᱟᱭᱟ ᱾ ᱩᱱᱤᱭᱟᱜ ᱢᱚᱱᱮᱨᱮ ᱯᱟᱯ ᱵᱚᱞᱚᱭᱮᱱ ᱠᱷᱟᱱ ᱢᱟᱨᱟᱝ ᱵᱳᱨᱳᱼᱣᱟᱜ ᱥᱨᱟᱯ ᱛᱮ ᱦᱚᱲᱢᱚ ᱤᱞ ᱠᱚ ᱪᱷᱟᱪᱠᱟᱜ ᱪᱟᱵᱟ ᱮᱱ ᱛᱟᱭᱟ ᱾ ᱟᱫᱚ ᱵᱟᱭ ᱩᱰᱟ.ᱣ ᱫᱟᱲᱮᱭᱟᱫ ᱛᱮ ᱢᱟ.ᱱᱢᱤ ᱨᱩᱯ ᱨᱮᱭ ᱯᱟᱞᱴᱟᱣ ᱮᱱᱟ ᱾ ᱚᱠᱚᱭ ᱠᱤᱥᱟ.ᱬ ᱚᱲᱟᱜ ᱨᱮ ᱩᱱᱤ ᱠᱟ.ᱲᱢᱤ ᱠᱩᱲᱤᱭ ᱛᱟᱦᱮᱸ ᱠᱟᱱᱟ, ᱩᱱᱤ ᱚᱲᱟᱜ ᱨᱮ ᱠᱚᱭᱼᱠᱚᱭ ᱛᱮᱭ ᱥᱮᱴᱮᱨ ᱮᱱᱟ ᱾ ᱩᱱᱤ ᱠᱤᱥᱟ.ᱬ ᱦᱚᱲ ᱱᱩᱭᱟᱜ ᱦᱟᱞᱟᱠ ᱧᱮᱞᱛᱮ ᱢᱮᱛᱟᱭ ᱠᱟᱱᱟᱭ, "ᱮᱛᱮ ᱦᱳ ! "ᱱᱚᱝᱠᱟ ᱫᱚ ᱛᱤᱱᱟ.ᱝ ᱫᱤᱱ ᱮᱢ ᱠᱚᱭ ᱵᱟᱲᱟᱭᱟ, ᱤᱧᱟᱜ ᱚᱲᱟᱜ ᱨᱮ ᱜᱩᱛᱤ ᱞᱮᱠᱟ ᱛᱟᱦᱮᱸᱱ ᱢᱮ ᱾" ᱠᱟ.ᱢᱨᱩ ᱜᱩᱨᱩ ᱢᱮᱱ ᱠᱮᱜᱼᱟᱭ, " ᱦᱚᱭ ᱛᱚᱵᱮ ᱾" ᱟᱫᱚ ᱜᱩᱛᱤ ᱮᱱᱟᱭ ᱟᱨ ᱛᱟᱭᱚᱢ ᱛᱮ ᱩᱱᱤ ᱠᱟ.ᱲᱢᱤ ᱠᱩᱲᱤ ᱥᱤᱞᱟᱜ ᱮ ᱧᱟᱯᱟᱢ ᱮᱱᱟ ᱾

ᱩᱱᱤ ᱫᱚ ᱜᱟ.ᱭ ᱠᱚ ᱢᱮᱨᱚᱢ ᱠᱚᱭ ᱜᱩᱯᱤᱭᱟ ᱾ ᱟ.ᱭᱩᱵ ᱡᱚᱦᱚᱜ ᱫᱚ ᱜᱚᱲᱟ ᱫᱩᱣᱟ.ᱨ ᱨᱮ ᱥᱮᱸᱜᱮᱞ ᱡᱩᱞ ᱠᱟᱛᱮ ᱵᱤᱧ ᱠᱚᱨ ᱨᱟᱯᱟᱜ ᱡᱚᱢ ᱠᱚᱣᱟ ᱾ ᱱᱚᱝᱠᱟ ᱛᱮ ᱢᱤᱫ ᱫᱤᱱ ᱫᱚ ᱦᱚᱲ ᱠᱚ ᱧᱮᱞ ᱠᱮᱫᱮᱭᱟ ᱾ ᱟᱫᱚ ᱠᱚ ᱠᱩᱞᱤ ᱠᱮᱫᱮᱭᱟ, " ᱮᱛᱮ ᱦᱳ ! ᱵᱤᱧ ᱫᱚ ᱪᱮᱫᱟᱜ ᱮᱢ ᱡᱚᱢ ᱮᱫ ᱠᱚᱣᱟ ?" ᱠᱟ.ᱢᱨᱩ ᱜᱩᱨᱩᱭ ᱢᱮᱱ ᱠᱮᱜᱼᱟ, " ᱱᱩᱠᱩ ᱫᱚ ᱵᱤᱧ ᱫᱚᱠᱚ ᱵᱟᱝ ᱠᱟᱱᱟ ᱾ ᱱᱩᱠᱩ ᱢᱟ ᱤᱧ ᱨᱤᱱ ᱦᱟ.ᱠᱩ ᱠᱟᱴᱠᱚᱢ ᱾ ᱵᱤᱧ ᱫᱚᱠᱚ ᱵᱷᱮᱜᱟᱨ ᱜᱮᱭᱟ, ᱦᱟᱯᱮᱱᱟᱜ ᱢᱤᱫ ᱫᱤᱱ ᱤᱧ ᱧᱮᱞ ᱦᱚᱪᱚ ᱯᱮᱭᱟ ᱾

ᱠᱟ.ᱢᱨᱩ ᱜᱩᱨᱩ ᱫᱚ ᱵᱟ.ᱫᱽ ᱠᱚᱛᱮ ᱥᱤᱭᱩᱜ ᱦᱚᱸᱭ ᱥᱮᱱᱚᱜ ᱜᱮᱭᱟ ᱾ ᱵᱩᱸᱫᱤ ᱥᱮᱸᱜᱮᱞ ᱮ ᱤᱫᱤ ᱛᱟᱨᱟ ᱠᱟᱜᱼᱟ ᱾ ᱵᱤᱧ ᱠᱚᱭ ᱧᱟᱢ ᱠᱚᱠᱷᱟᱱ ᱨᱟᱯᱟᱜ ᱡᱚᱢ ᱠᱚᱣᱟᱭ ᱾ ᱡᱟᱦᱟᱸᱭ ᱜᱮ ᱥᱮᱸᱜᱮᱞ ᱠᱟ ᱠᱚᱭᱮ ᱠᱷᱟᱱ ᱢᱮᱛᱟ ᱠᱚᱣᱟᱭ, "ᱚᱸᱰᱮ ᱜᱮ ᱛᱟᱦᱮᱸᱱ ᱢᱮ, ᱥᱮᱸᱜᱮᱞ ᱜᱤᱧ ᱵᱷᱮᱡᱟ ᱜᱚᱫ ᱠᱟᱜ ᱠᱟᱱᱟ ᱾ ᱥᱟᱵ ᱜᱚᱫ ᱢᱮ ᱞᱟᱜᱮ, ᱵᱟᱝ ᱠᱷᱟᱱ ᱫᱚ ᱵᱤᱧ ᱮ ᱯᱟᱞᱴᱟᱣᱜᱼᱟ ᱾" ᱚᱱᱠᱟ ᱜᱮ ᱢᱤᱫ ᱫᱤᱱ ᱫᱚ ᱢᱤᱫ ᱦᱚᱲ ᱥᱮᱸᱜᱮᱞ ᱮ ᱮᱢᱟᱭ ᱠᱟᱱ ᱡᱚᱦᱚᱜ, ᱩᱱᱤ ᱦᱚᱲ ᱞᱟᱜᱮ ᱵᱟᱭ ᱥᱟᱵ ᱧᱟᱢ ᱞᱮᱫ ᱠᱷᱟᱱ ᱚᱱᱟ ᱥᱮᱸᱜᱮᱞ ᱫᱚ ᱵᱤᱧ ᱯᱟᱞᱴᱟᱣ ᱮᱱᱛᱮ ᱩᱱᱤ ᱦᱚᱲ ᱮ ᱡᱚᱢᱮ ᱠᱟᱱ ᱛᱟᱦᱮᱸᱫ ᱾ ᱠᱟ.ᱢᱨᱩ ᱜᱩᱨᱩ ᱧᱮᱞ ᱧᱟᱢ ᱠᱮᱫᱮ ᱛᱮ ᱫᱩᱜ ᱠᱟᱫᱮᱭᱮᱭ ᱾ ᱟᱨ ᱢᱤᱫ ᱫᱤᱱ ᱫᱚ ᱚᱱᱠᱟ ᱜᱮ ᱟᱨ ᱢᱤᱫ ᱦᱚᱲ ᱟᱬᱜᱚᱢ ᱮ ᱮᱢᱟᱭ ᱠᱟᱱ ᱡᱚᱦᱚᱜ ᱩᱱᱤ ᱦᱚᱲ ᱫᱚ ᱞᱚᱜᱚᱱ ᱵᱟᱭ ᱥᱟᱵ ᱞᱮᱫ ᱠᱷᱟᱱ ᱟᱬᱜᱚᱢ ᱫᱚ ᱵᱤᱧ ᱯᱟᱞᱴᱟᱣ ᱠᱟᱛᱮ ᱩᱱᱤ ᱦᱚᱲ ᱮ ᱩᱫ ᱠᱮᱫᱮᱭᱟ ᱾ ᱥᱩᱨ ᱨᱮᱠᱚ ᱛᱟᱦᱮᱸ ᱠᱟᱱ ᱦᱚᱲ ᱠᱚ ᱫᱟ.ᱲ ᱥᱮᱴᱮᱨ ᱠᱟᱛᱮ ᱩᱱᱤ ᱵᱤᱧ ᱯᱮ ᱴᱷᱮᱱ ᱠᱚ ᱢᱟᱜ ᱠᱷᱟᱺᱰᱤᱡ ᱠᱮᱫᱮᱭᱟ ᱾ ᱠᱷᱟᱱ ᱜᱮ ᱩᱱᱤ ᱦᱚᱲ ᱮ ᱩᱰᱩᱠ ᱨᱩᱣᱟ.ᱲ ᱮᱱᱟ ᱾ ᱢᱮᱱᱠᱷᱟᱱ ᱚᱪᱮᱛ ᱨᱮᱜᱮ ᱢᱮᱱᱟᱭᱟ ᱾ ᱚᱱᱟᱛᱮ ᱫᱟ.ᱲ ᱥᱮᱱ ᱠᱟᱛᱮ ᱚᱲᱟᱜᱨᱮ ᱱᱚᱶᱟ ᱠᱟᱛᱷᱟ ᱠᱤᱥᱟ.ᱬ ᱠᱚ ᱞᱟ.ᱭ ᱟᱫᱮᱭᱟ ᱾ ᱠᱟ.ᱢᱨᱩ ᱜᱩᱨᱩ ᱦᱚᱸᱠᱚ ᱥᱟᱵ ᱤᱫᱤ ᱠᱮᱫᱮᱭᱟ ᱠᱤᱥᱟ.ᱬ ᱴᱷᱮᱱ ᱾ ᱠᱤᱥᱟ.ᱬ ᱮ ᱠᱩᱞᱤ ᱠᱮᱫᱮᱭᱟ, " ᱮᱛᱮ ᱦᱳ ! ᱱᱚᱶᱟ ᱫᱚ ᱪᱮᱫ ᱵᱤᱨᱫᱟ.ᱯ ᱛᱟᱢ ?" ᱞᱚᱜᱚᱱ ᱩᱱᱤ ᱦᱚᱲ ᱵᱟᱧᱪᱟᱣ ᱠᱟᱭ ᱢᱮ, ᱵᱟᱝᱠᱷᱟᱱ ᱵᱮᱥ ᱫᱚ ᱵᱟᱝ ᱦᱩᱭᱩᱜᱼᱟ ᱾ ᱮᱱᱠᱷᱟᱱ ᱵᱟ.ᱫᱽ ᱛᱮ ᱥᱮᱱ ᱠᱟᱛᱮ ᱠᱟ.ᱢᱨᱩ ᱜᱩᱨᱩ ᱩᱱᱤ ᱦᱚᱲ ᱮ ᱵᱟᱧᱪᱟᱣ ᱠᱮᱫᱮᱭᱟ ᱾ ᱩᱱᱤ ᱵᱤᱧ ᱦᱚᱸ ᱢᱟᱱᱛᱟᱨ ᱛᱮᱜᱮ ᱡᱚᱲᱟᱣ ᱨᱩᱣᱟ.ᱲ ᱠᱮᱫᱮᱭᱟᱭ ᱾ ᱫᱟᱜ ᱞᱤᱸᱜᱤᱱ ᱴᱷᱮᱱ ᱵᱤᱧ ᱠᱚ ᱛᱚᱞ ᱠᱮᱫᱮ ᱛᱟᱭᱚᱢ ᱩᱱᱤ ᱵᱤᱧ ᱫᱚ ᱠᱟ.ᱢᱨᱩ ᱜᱩᱨᱩ ᱢᱟᱱᱛᱟᱨ ᱫᱟᱨᱟᱭ ᱛᱮᱭ ᱚᱴᱟᱝ ᱜᱚᱫ ᱠᱟᱫᱮᱭᱟ ᱾ ᱩᱱᱤ ᱫᱚ ᱠᱟᱺᱣᱨᱤ ᱠᱟᱢᱨᱩᱯ ᱫᱤᱥᱚᱢᱨᱮ ᱟᱬᱜᱚᱢ ᱵᱮᱱᱟᱣ ᱠᱟᱛᱮᱭ ᱧᱩᱨ ᱨᱩᱣᱟ.ᱲ ᱮᱱᱟ ᱾ ᱤᱱᱟ. ᱛᱟᱭᱚᱢ ᱠᱤᱥᱟ.ᱬ ᱫᱚ ᱠᱟ.ᱢᱨᱩ ᱜᱩᱨᱩᱭ ᱠᱩᱞᱩᱭᱮ ᱠᱟᱱᱟ, " ᱮᱛᱮ ᱦᱳ ! ᱟᱢ ᱫᱚᱢ ᱚᱠᱚᱭ ᱠᱟᱱᱟ ? ᱞᱟ.ᱭ ᱚᱰᱚᱠᱚᱜ ᱢᱮ, ᱵᱟᱝ ᱠᱷᱟᱱ ᱤᱧᱟᱜ ᱚᱲᱟᱜ ᱨᱮ ᱵᱟ.ᱧ ᱛᱟᱦᱮᱸ ᱦᱚᱪᱚ ᱟᱢᱟ ᱾

ᱠᱟ.ᱢᱨᱩ ᱜᱩᱨᱩᱣᱟᱜ ᱥᱟ.ᱨᱤ ᱛᱮᱫ

ᱤᱧ ᱫᱚ ᱠᱟᱺᱣᱨᱤ ᱠᱟᱢᱨᱩᱯ ᱫᱤᱥᱚᱢ ᱠᱷᱚᱱ ᱪᱮᱬᱮ ᱨᱩᱯ ᱛᱤᱧ ᱦᱮᱡ ᱞᱮᱱᱟ ᱾ ᱱᱚᱶᱟ ᱫᱤᱥᱚᱢᱨᱮ ᱢᱤᱫ ᱠᱟ.ᱲᱢᱤ ᱠᱩᱲᱤ ᱧᱮᱞᱛᱮ ᱢᱚᱱᱮᱨᱮ ᱯᱟᱯ ᱵᱚᱞᱚ ᱟ.ᱫᱤᱧ ᱠᱷᱟᱱ ᱤᱞ ᱠᱚ ᱪᱷᱟᱪᱠᱟᱜ ᱪᱟᱵᱟ ᱮᱱ ᱛᱤᱧᱟ ᱾ ᱠᱷᱟᱱ ᱜᱮ ᱵᱟ.ᱧ ᱩᱰᱟ.ᱣ ᱫᱟᱲᱮᱭᱟᱫ ᱠᱷᱟᱱ ᱦᱚᱲ ᱨᱤᱧ ᱯᱟᱞᱴᱟᱣ ᱮᱱᱟ ᱾ ᱠᱟᱺᱣᱨᱤ ᱫᱤᱥᱚᱢ ᱨᱮ ᱪᱩᱸᱰᱤ ᱜᱩᱨᱩᱭ ᱚᱯᱮᱞ ᱟᱠᱟᱱᱟ ᱾ ᱤᱧ ᱫᱚ ᱩᱱᱤᱭᱤᱡ ᱪᱮᱞᱟ ᱠᱟ.ᱱᱟ.ᱧ ᱾ ᱤᱧ ᱫᱚ ᱩᱱᱠᱩ ᱪᱩᱸᱰᱤ ᱵᱚᱸᱜᱟ ᱠᱚ ᱜᱤᱧ ᱫᱮᱵᱟᱼᱥᱮᱵᱟ ᱠᱚᱣᱟ ᱾

ᱩᱱᱤᱭᱟᱜ ᱥᱟ.ᱨᱤ ᱠᱟᱛᱷᱟ ᱠᱚ ᱵᱟᱰᱟᱭ ᱠᱮᱫ ᱛᱟᱭᱚᱢ, ᱠᱷᱮᱨᱣᱟᱲ ᱦᱚᱯᱚᱱ ᱠᱚ ᱟ.ᱰᱤ ᱡᱩᱨ ᱟᱡ ᱨᱤᱱ ᱪᱮᱞᱟ ᱠᱚ ᱵᱮᱱᱟᱣ ᱮᱱᱟ ᱾ ᱠᱟ.ᱢᱨᱩ ᱜᱩᱨᱩ ᱪᱮᱞᱟ ᱠᱚᱲᱟ ᱠᱚ ᱠᱟᱺᱭᱩᱨ ᱫᱤᱥᱚᱢ ᱛᱮᱭ ᱤᱫᱤ ᱯᱟᱨᱚᱢ ᱠᱚᱣᱟ ᱢᱮᱱᱛᱮᱭ ᱨᱤᱠᱟ. ᱞᱮᱜᱼᱟ ᱾ ᱤᱠᱷᱟ.ᱱ ᱪᱮᱞᱟ ᱠᱚᱲᱟ ᱠᱚ ᱵᱟᱠᱚ ᱨᱮᱵᱮᱱ ᱞᱮᱱᱟ ᱾ ᱟ.ᱰᱤ ᱥᱮᱨᱢᱟᱭ ᱛᱟᱦᱮᱸᱭᱮᱱ ᱛᱟᱭᱚᱢ ᱠᱟ.ᱢᱨᱩ ᱜᱩᱨᱩ ᱫᱚ ᱠᱟᱺᱣᱨᱤ ᱠᱟᱢᱨᱩᱯ ᱫᱤᱥᱚᱢ ᱛᱮ ᱨᱩᱣᱟ.ᱲ ᱥᱟᱱᱟ ᱠᱮᱫᱮᱭᱟ ᱾ ᱠᱷᱟᱱ ᱜᱮ ᱡᱚᱛᱚ ᱪᱮᱞᱟ ᱠᱚᱲᱟ ᱠᱚ ᱦᱚᱦᱚ ᱡᱟᱣᱨᱟ ᱠᱟᱛᱮ ᱢᱮᱛᱟ ᱠᱚ ᱠᱟᱱᱟᱭ, " ᱫᱮᱞᱟ ᱵᱚᱱ ᱵᱩᱨᱩᱛᱮ, ᱛᱮᱦᱮᱧ ᱫᱚ ᱥᱟ.ᱨᱤ ᱵᱤᱧ ᱤᱧ ᱧᱮᱞ ᱦᱚᱪᱚ ᱯᱮᱭᱟ ᱾" ᱵᱩᱨᱩ ᱛᱮ ᱥᱮᱱ ᱠᱟᱛᱮ ᱵᱟᱨᱮᱭᱟ ᱪᱟᱸᱫᱟᱱ ᱠᱟᱴ ᱯᱮ ᱢᱚᱠᱟ ᱠᱟᱛᱮ ᱠᱷᱟᱺᱰᱤᱭᱟ ᱠᱟᱛᱮ ᱜᱚᱡᱟᱜ ᱞᱮᱠᱟ ᱵᱮᱱᱟᱣ ᱨᱮᱭᱟᱜ ᱮ ᱢᱮᱛᱟᱫ ᱠᱚᱣᱟ ᱾ ᱟᱨ ᱜᱮᱞ ᱵᱟᱨ ᱜᱚᱴᱟᱝ ᱵᱟᱝ ᱨᱟᱯᱟᱜ ᱠᱩᱝᱠᱟ.ᱞ ᱴᱩᱠᱩᱡ, ᱜᱮᱞ ᱵᱟᱨ ᱜᱚᱴᱟᱝ ᱠᱟᱭᱨᱟ ᱯᱚᱦᱟ ᱾ " ᱚᱱᱟ ᱠᱚ ᱟ.ᱜᱩ ᱡᱟᱣᱨᱟ ᱠᱮᱫ ᱠᱷᱟᱱ ᱵᱩᱱᱩᱢ ᱫᱷᱟᱨᱮᱼᱫᱷᱟᱨᱮ ᱛᱮᱠᱚ ᱵᱤᱫ ᱟᱨ ᱫᱚᱦᱚ ᱯᱮᱨᱮᱡ ᱠᱮᱜᱼᱟ ᱾ ᱠᱟᱭᱨᱟ ᱯᱚᱦᱟ ᱟᱨ ᱢᱤᱫᱴᱟ.ᱝ ᱪᱟᱸᱫᱟᱱ ᱠᱟᱴ ᱜᱚᱡᱟᱜ ᱫᱚ ᱵᱩᱱᱩᱢ ᱥᱩᱨ ᱨᱮᱠᱚ ᱵᱤᱫ ᱠᱮᱜᱼᱟ ᱾ ᱪᱮᱞᱟ ᱠᱚᱲᱟ ᱠᱚ ᱯᱷᱟᱨᱟᱠ ᱧᱚᱜ ᱨᱮ ᱫᱩᱲᱩᱵ ᱨᱮᱭᱟᱜ ᱮ ᱢᱮᱛᱟᱫ ᱠᱚᱣᱟ ᱾ ᱟᱫᱚ ᱢᱟᱱᱛᱟᱨ ᱟᱨ ᱡᱷᱟ.ᱨᱱᱤᱭ ᱮᱭᱦᱚᱵ ᱠᱮᱜᱼᱟ ᱾ ᱡᱷᱟ.ᱨᱱᱤᱼᱡᱷᱟ.ᱨᱱᱤ ᱛᱮᱭ ᱵᱟ.ᱭ ᱪᱟᱵᱟ ᱮᱱᱠᱷᱟᱱ ᱢᱤᱫᱴᱟ.ᱝ ᱠᱟ.ᱨᱤ ᱱᱟ.ᱜᱤᱱ ᱵᱤᱧ ᱵᱚᱦᱚᱜ ᱥᱟᱲ ᱠᱟᱛᱮ ᱵᱩᱱᱩᱢ ᱠᱷᱚᱱ ᱮ ᱩᱰᱩᱠ ᱮᱱᱟ ᱾ ᱩᱱᱤᱭᱟᱜ ᱥᱟᱦᱮᱫ ᱛᱮ ᱠᱟ.ᱢᱨᱩ ᱜᱩᱨᱩ ᱦᱚᱸᱭ ᱚᱪᱮᱛ ᱮᱱᱟ ᱾ ᱤᱱᱟ. ᱛᱟᱭᱚᱢ ᱵᱤᱧ ᱦᱚᱸᱭ ᱪᱷᱟᱱ ᱮᱱᱟ ᱾ ᱚᱪᱮᱛ ᱠᱷᱚᱱ ᱵᱮᱨᱮᱫ ᱠᱟᱛᱮ ᱠᱟᱺᱭᱩᱨ ᱪᱮᱬᱮᱭ ᱯᱟᱞᱴᱟᱣ ᱮᱱᱛᱮ ᱠᱟᱢᱨᱩᱯ ᱫᱤᱥᱚᱢ ᱛᱮᱭ ᱩᱰᱟ.ᱣ ᱪᱟᱞᱟᱣ ᱮᱱᱟ ᱾ ᱪᱮᱞᱟ ᱠᱚᱫᱚ ᱚᱲᱟᱜ ᱛᱮᱠᱚ ᱨᱩᱣᱟ.ᱲ ᱮᱱᱟ ᱾