ᱢᱟᱜ ᱢᱚᱬᱮ
ᱡᱟᱦᱮᱨ ᱵᱚᱸᱜᱟ ᱥᱟᱱᱛᱟᱲ ᱦᱚᱯᱚᱱ, ᱠᱷᱮᱨᱣᱟᱲ ᱡᱟᱹᱛᱤᱭᱟᱜ ᱵᱚᱸᱜᱟ ᱵᱳᱨᱳ ᱫᱮᱵᱟ ᱥᱮᱵᱟ ᱨᱮᱱᱟᱜ ᱢᱤᱫ ᱢᱟᱨᱟᱝ ᱯᱚᱨᱚᱵᱽ ᱢᱟᱜ ᱢᱚᱬᱮ ᱾ ᱡᱟᱦᱟᱸ ᱫᱚ ᱵᱟᱦᱟ ᱵᱚᱸᱜᱟ, ᱵᱟᱦᱟ ᱯᱚᱨᱚᱵᱽ ᱨᱮ ᱨᱚᱲ ᱫᱚᱦᱚ ᱛᱟᱦᱮᱱᱟ ᱵᱚᱸᱜᱟ ᱵᱳᱨᱳ ᱠᱚ ᱴᱷᱮᱱ ᱾ ᱢᱟᱜ ᱢᱚᱬᱮ ᱫᱚ ᱥᱮᱨᱢᱟ ᱥᱮᱨᱢᱟ ᱵᱟᱝ ᱦᱩᱭ ᱠᱟᱛᱮ, ᱵᱟᱨ ᱥᱮᱨᱢᱟ ᱛᱟᱭᱚᱢ ᱯᱮ ᱥᱮᱨᱢᱟ ᱨᱮ ᱡᱟᱹᱥᱛᱤ ᱜᱟᱱ ᱠᱚ ᱢᱟᱱᱟᱣ ᱵᱟᱛᱟᱣ ᱜᱮᱭᱟ, ᱫᱮᱥ ᱫᱤᱥᱚᱢ ᱨᱤᱱ ᱠᱷᱮᱨᱣᱟᱲ ᱡᱟᱹᱛᱤ ᱾ ᱵᱟᱦᱟ ᱵᱚᱸᱜᱟ ᱵᱟᱦᱟ ᱯᱚᱨᱚᱵᱽ ᱱᱮᱸᱰᱟ ᱜᱚᱴᱟ ᱫᱤᱱ ᱨᱮ ᱚᱱᱟ ᱟᱹᱛᱩ ᱨᱤᱱ ᱦᱚᱲ ᱠᱚ ᱜᱚᱡ ᱜᱩᱨ ᱮᱢᱟᱱ ᱞᱮᱱᱠᱷᱟᱱ, ᱟᱨ ᱵᱟᱝᱠᱷᱟᱱ ᱚᱱᱟ ᱢᱩᱣᱡᱷᱟᱹ ᱟᱹᱛᱩ ᱨᱮ ᱟᱭᱳ ᱨᱩᱣᱟᱹ ᱠᱚ ᱵᱚᱞᱚ ᱮᱢᱟᱱ ᱞᱮᱱᱠᱷᱟᱱ - ᱵᱟᱦᱟ ᱵᱚᱸᱜᱟ ᱨᱮ ᱵᱟᱠᱚ ᱵᱟᱦᱟ ᱯᱚᱨᱚᱵᱚᱜᱼᱟ ᱾ ᱩᱱ ᱨᱮ ᱟᱹᱛᱩ ᱢᱚᱬᱮ ᱦᱚᱲ ᱟᱨ ᱵᱟᱝᱠᱷᱟᱱ ᱟᱹᱛᱩ ᱥᱚᱞᱚ ᱟᱱᱟ ᱟᱛᱮ ᱡᱟᱦᱮᱨ ᱛᱷᱟᱱ ᱨᱮ ᱵᱚᱸᱜᱟ ᱵᱩᱨᱩ ᱴᱷᱮᱱ ᱱᱟᱭᱠᱮ ᱵᱟᱵᱟ ᱥᱩᱱᱩᱢ ᱥᱤᱸᱫᱩᱨ ᱟᱬᱜᱚ ᱟᱭ, ᱟᱨ ᱱᱟᱭᱠᱮ ᱵᱟᱵᱟ ᱥᱟᱶ ᱥᱟᱱᱟᱢ ᱠᱚᱜᱮ ᱟᱠᱚᱣᱟᱜ ᱨᱮᱸᱜᱮᱡ ᱨᱟᱵᱟᱝ, ᱥᱩᱠ ᱫᱩᱠ ᱥᱚᱫᱚᱨ ᱠᱟᱛᱮᱜ ᱠᱚ ᱱᱮᱦᱚᱨᱚᱜᱼᱟ ᱾ ᱱᱮᱦᱚᱨ ᱫᱚ-- ᱢᱟᱨᱟᱝ ᱵᱩᱨᱩ, ᱡᱟᱦᱮᱨ ᱟᱭᱳ, ᱢᱚᱬᱮ ᱠᱚ ᱛᱩᱨᱩᱭ ᱠᱚ ᱟᱨ ᱜᱚᱨᱟᱢ -- ᱧᱩᱢ ᱠᱟᱛᱮ, "ᱱᱤᱭᱟᱹ ᱫᱷᱟᱣ ᱫᱚ ᱟᱹᱛᱩ ᱨᱮ ᱟᱭᱳ ᱨᱩᱣᱟᱹ ᱵᱚᱞᱚᱣ ᱟᱠᱟᱱ ᱠᱷᱟᱹᱛᱤᱨ ᱵᱟᱝ ᱞᱮ ᱥᱟᱹᱛ ᱥᱟᱯᱲᱟᱣ ᱫᱟᱲᱮᱭᱟᱠᱟᱫᱟ, ᱥᱮ ᱵᱟᱝ ᱞᱮ ᱨᱟᱹᱥᱠᱟᱹ ᱚᱪᱚ ᱞᱮᱫ ᱯᱮᱭᱟ, ᱚᱱᱟ ᱠᱷᱟᱹᱛᱤᱨ ᱫᱟᱨᱟᱭ ᱠᱟᱱ ᱡᱷᱮᱴ ᱵᱚᱸᱜᱟ ᱩᱢᱩᱜ ᱢᱟᱹᱦᱤᱛ ᱦᱤᱞᱚᱜ ᱟᱨᱦᱚᱸ ᱡᱟᱠ ᱡᱚᱢᱚᱠ, ᱟᱨᱦᱚᱸ ᱵᱷᱟᱜᱮ ᱥᱟᱹᱛ ᱥᱟᱯᱲᱟᱣ ᱠᱟᱛᱮ, ᱥᱟᱸᱜᱮ ᱫᱟᱲᱮ ᱟᱛᱮᱞᱮ ᱨᱟᱹᱥᱠᱟᱹ ᱚᱪᱚ ᱯᱮᱭᱟ ᱾ ᱟᱫᱚ ᱚᱱᱟ ᱱᱮᱸᱰᱟ ᱜᱚᱴᱟ ᱫᱤᱱ ᱦᱤᱞᱳᱜ ᱦᱟᱲᱟᱢ ᱛᱷᱟᱱ (ᱜᱚᱥᱟᱬᱮ) ᱟᱨ ᱡᱟᱦᱮᱨ ᱛᱷᱟᱱ ᱰᱟᱺᱜᱽᱣᱟᱹ ᱠᱚᱲᱟ ᱨᱮᱸᱜᱮᱡ ᱛᱮ ᱛᱟᱦᱮᱸ ᱠᱟᱛᱮ ᱠᱚ ᱫᱟᱵ ᱟ, ᱟᱨ ᱠᱚ ᱩᱢᱩᱜᱼᱟ ᱾ ᱚᱱᱟ ᱛᱟᱭᱚᱢ ᱫᱤᱱ ᱦᱤᱞᱚᱜ ᱫᱚ ᱵᱚᱸᱜᱟ ᱟᱠᱚ, ᱚᱱᱟ ᱛᱟᱭᱚᱢ ᱫᱤᱱ ᱫᱚ ᱡᱟᱞᱮ ᱾
ᱟᱨ ᱵᱟᱦᱟ ᱯᱚᱨᱚᱵᱽ ᱠᱟᱛᱮ ᱦᱚᱸ, ᱡᱟᱦᱟᱸ ᱥᱮᱨᱢᱟ ᱨᱮ ᱵᱚᱸᱜᱟ ᱵᱩᱨᱩ ᱵᱟᱝ ᱠᱚ ᱟᱬᱜᱚ ᱞᱮᱱᱠᱷᱟᱱ, ᱥᱮ ᱡᱟᱠ ᱡᱚᱢᱚᱠ ᱧᱚᱜ ᱵᱟᱦᱟ ᱯᱚᱨᱚᱵᱽ ᱵᱟᱝ ᱦᱩᱭ ᱞᱮᱱ ᱠᱷᱟᱱ, ᱥᱮ ᱵᱟᱨ ᱥᱮᱨᱢᱟ ᱯᱩᱨᱟᱹᱣ ᱞᱮᱱᱠᱷᱟᱱ ᱦᱚᱸ ᱠᱚ ᱨᱚᱲ ᱫᱚᱦᱚᱭᱟ ᱵᱚᱸᱜᱟ ᱵᱩᱨᱩ ᱴᱷᱮᱱ ᱢᱟᱜ ᱢᱚᱲᱮ ᱞᱟᱹᱜᱤᱫ ᱾ ᱢᱟᱜ ᱢᱚᱲᱮ ᱨᱮᱫᱚ ᱦᱚᱯᱚᱱ ᱮᱨᱟ, ᱢᱤᱥᱨᱟ ᱥᱟᱱᱟᱢ ᱠᱚᱜᱮ ᱠᱚ ᱠᱷᱚᱡᱽ ᱠᱚᱜᱮᱭᱟ ᱾ ᱟᱨ ᱦᱚᱯᱚᱱ ᱮᱨᱟ, ᱢᱤᱥᱨᱟ ᱡᱟᱶᱟᱭ ᱠᱚᱜᱮ ᱛᱚ ᱢᱟᱜ ᱢᱚᱲᱮ ᱵᱚᱸᱜᱟ ᱵᱳᱨᱳ ᱫᱮᱵᱟ ᱥᱮᱵᱟ ᱯᱚᱨᱚᱵᱽ ᱠᱚ ᱥᱟᱹᱠᱷᱤ ᱥᱚᱵᱷᱟᱭᱟ ᱾ ᱟᱨ ᱥᱟᱱᱛᱟᱲ ᱦᱚᱯᱚᱱ ᱠᱷᱮᱨᱣᱟᱲ ᱡᱟᱹᱛᱤᱭᱟᱜ ᱯᱟᱹᱛᱭᱟᱹᱣ, ᱢᱟᱜ ᱢᱚᱲᱮ ᱞᱮᱱᱠᱷᱟᱱ ᱵᱚᱸᱜᱟ ᱵᱳᱨᱳ ᱠᱚ ᱨᱟᱹᱥᱠᱟᱹᱜᱼᱟ ᱾ ᱟᱨ ᱵᱚᱸᱜᱟ ᱵᱳᱨᱳ ᱠᱚ ᱨᱟᱹᱥᱠᱟᱹ ᱞᱮᱱᱠᱷᱟᱱ ᱨᱟᱹᱥᱠᱟᱹ ᱛᱮ ᱥᱮᱨᱢᱟ ᱡᱟᱹᱲᱤ ᱫᱟᱜ ᱞᱚᱜᱚᱱ ᱥᱟᱹᱦᱤᱸᱡ ᱠᱚ ᱡᱟᱹᱲᱤ ᱟᱬᱜᱚᱭᱟ ᱾ ᱟᱨ ᱥᱮᱨᱢᱟ ᱡᱟᱹᱲᱤ/ᱫᱟᱜ ᱟᱬᱜᱚ ᱞᱮᱱᱠᱷᱟᱱ ᱞᱚᱞᱚ ᱟᱠᱟᱱ ᱵᱟᱹᱫᱽ ᱦᱟᱥᱟ ᱫᱷᱩᱲᱤ ᱫᱷᱟᱹᱨᱛᱤ ᱨᱟᱲᱮᱡ ᱠᱟᱛᱮᱜ ᱟᱨᱡᱟᱣ ᱞᱟᱹᱜᱤᱫ ᱠᱷᱮᱨᱣᱟᱲ ᱦᱚᱯᱚᱱ ᱠᱚ ᱥᱟᱹᱛ ᱥᱟᱯᱲᱟᱜᱼᱟ ᱾