ᱢᱟᱦᱟᱵᱷᱟᱨᱚᱛ

ᱣᱤᱠᱤᱯᱤᱰᱤᱭᱟ, ᱨᱟᱲᱟ ᱜᱮᱭᱟᱱ ᱯᱩᱛᱷᱤ ᱠᱷᱚᱱ

ᱢᱟᱦᱟᱵᱷᱟᱨᱚᱛ ᱫᱚ ᱦᱤᱱᱫᱩ ᱠᱚᱣᱟᱜ ᱢᱤᱱ ᱫᱟᱢᱟᱱ ᱫᱷᱚᱨᱚᱢᱯᱩᱛᱷᱤ ᱠᱟᱱᱟ ᱾ ᱡᱟᱦᱟᱸ ᱫᱚ ᱠᱷᱟᱹᱞᱤ ᱩᱭᱦᱟᱹᱨ ᱦᱟᱹᱴᱤᱧ ᱨᱮᱜᱮ ᱦᱟᱹᱡᱩᱜᱼᱟ ᱾ ᱢᱤ-ᱢᱤᱫ ᱫᱷᱟᱣ ᱫᱚ "ᱵᱷᱟᱨᱚᱛ" ᱢᱮᱱᱛᱮ ᱢᱮᱛᱟᱦᱟᱜ ᱱᱚᱶᱟ ᱫᱷᱚᱨᱚᱢᱯᱩᱛᱷᱤ ᱫᱚ ᱵᱷᱟᱨᱚᱛ ᱨᱮᱭᱟᱜ ᱫᱷᱚᱨᱚᱢᱤᱭᱟᱹ, ᱢᱟᱨᱮ ᱠᱟᱛᱷᱟ, ᱱᱟᱜᱟᱢᱤᱭᱟᱹ, ᱟᱨ ᱥᱟᱱᱟᱥᱤᱭᱟᱹ ᱯᱩᱛᱷᱤ ᱠᱟᱱᱟ ᱾ ᱡᱮᱜᱮᱛ ᱨᱮᱭᱟᱜ ᱡᱚᱛᱚ ᱠᱷᱚᱱ ᱡᱤᱞᱤᱧ ᱥᱟᱱᱟᱶᱦᱮᱫ ᱯᱩᱛᱷᱤ ᱦᱤᱱᱫᱩ ᱫᱷᱚᱨᱚᱢ ᱟᱜ ᱡᱚᱛᱚ ᱠᱷᱚᱱ ᱢᱟᱨᱟᱝ ᱯᱩᱛᱷᱤ ᱠᱷᱚᱱ ᱢᱤᱫᱴᱟᱹᱝ ᱠᱟᱱᱟ ᱾ ᱱᱚᱣᱟ ᱯᱩᱛᱷᱤ ᱫᱚ ᱦᱤᱱᱫᱩ ᱫᱷᱚᱨᱚᱢ ᱨᱮ ᱯᱚᱧᱪᱚᱢ ᱵᱮᱫᱽ ᱢᱮᱱᱛᱮ ᱢᱟᱱᱟᱣ ᱵᱟᱛᱟᱣ ᱢᱮᱱᱟᱜᱼᱟ ᱾ ᱡᱩᱫᱤ ᱦᱚᱸ ᱱᱚᱣᱟ ᱥᱟᱱᱟᱶᱦᱮᱫ ᱨᱮᱭᱟᱜ ᱡᱚᱛᱚ ᱠᱷᱚᱱ ᱥᱚᱨᱮᱥ ᱥᱤᱨᱡᱚᱱ ᱠᱷᱚᱱ ᱢᱤᱫᱴᱟᱹᱜ ᱢᱟᱱᱟᱣ ᱵᱟᱛᱟᱣ ᱦᱩᱭᱩᱜ ᱠᱟᱱᱟ ᱾ ᱤᱠᱷᱟᱹ ᱛᱮᱦᱮᱧ ᱫᱚ ᱱᱚᱣᱟ ᱯᱩᱛᱷᱤ ᱫᱚ ᱡᱚᱛᱚ ᱵᱷᱟᱨᱚᱛᱤᱭᱟᱹ ᱠᱚ ᱞᱟᱹᱜᱤᱫ ᱱᱟᱯᱟᱭ ᱡᱤᱭᱚᱱ ᱨᱮᱭᱟᱜ ᱢᱤᱫ ᱰᱟᱦᱟᱨ ᱠᱟᱱᱟ ᱾ ᱱᱚᱣᱟ ᱥᱤᱨᱡᱚᱱ ᱫᱚ ᱯᱟᱹᱦᱤᱞ ᱵᱷᱟᱨᱚᱛ ᱱᱟᱜᱟᱢ ᱨᱮᱭᱟᱜ ᱢᱤᱫ ᱜᱟᱛᱷᱟ ᱠᱟᱱᱟ ᱾ ᱱᱚᱣᱟ ᱨᱮᱜᱮ ᱦᱤᱱᱫᱩ ᱫᱷᱚᱨᱚᱢ ᱨᱮᱭᱟᱜ ᱥᱚᱱᱚᱛ ᱯᱩᱛᱷᱤ "ᱵᱷᱟᱜᱽᱵᱚᱛᱜᱤᱛᱟ" ᱴᱷᱟᱶ ᱮ ᱦᱟᱛᱟᱣᱟ ᱾ ᱯᱩᱨᱟᱹ ᱢᱟᱦᱟᱵᱷᱟᱨᱚᱛ ᱨᱮ ᱥᱩᱨ ᱥᱩᱯᱩᱨ ᱑᱑᱐,᱐᱐᱐ ᱦᱟᱹᱴᱤᱧ ᱢᱮᱱᱟᱜᱼᱟ ᱾ ᱡᱟᱦᱟᱸ ᱜᱨᱤᱠ ᱚᱱᱚᱬᱦᱮ ᱤᱞᱤᱭᱚᱰ ᱟᱨ ᱚᱰᱤᱥᱮᱭ ᱠᱷᱚᱱ ᱞᱟᱹᱴᱩᱨᱮ ᱜᱮᱞ ᱜᱟᱵᱟᱬ ᱢᱟᱨᱟᱝᱟ ᱾

ᱦᱤᱱᱫᱩᱣᱟᱜ ᱢᱟᱱᱟᱣ ᱵᱟᱛᱟᱣ, ᱢᱟᱨᱮ ᱠᱟᱛᱷᱟ ᱥᱟᱹᱠᱷᱭᱟᱹᱛ ᱟᱨ ᱱᱤᱡᱮ ᱢᱟᱦᱟᱵᱷᱟᱨᱚᱛ ᱞᱮᱠᱟᱛᱮ ᱱᱚᱣᱟ ᱯᱩᱛᱷᱤ ᱨᱤᱱᱤᱡ ᱚᱱᱚᱞᱤᱭᱟᱹ ᱫᱚ ᱵᱮᱫᱽᱵᱭᱟᱥ ᱜᱮᱠᱚ ᱢᱟᱱᱟᱣ ᱵᱟᱛᱟᱣ ᱮᱭᱟ ᱾ ᱱᱚᱣᱟ ᱯᱩᱛᱷᱤ ᱨᱤᱱᱤᱡ ᱚᱱᱚᱞᱤᱭᱟᱹ ᱵᱮᱫᱽᱵᱭᱟᱥ ᱱᱚᱣᱟ ᱯᱩᱛᱷᱤ ᱨᱮ ᱱᱭᱟᱭ, ᱥᱮᱪᱮᱫ, ᱛᱤᱠᱪᱷᱟᱹ, ᱡᱭᱚᱛᱤᱥ, ᱵᱩᱫᱷᱤᱱᱤᱛᱤ, ᱡᱚᱜᱟ-ᱟᱹᱨᱤ, ᱠᱟᱹᱣᱰᱤ-ᱟᱹᱨᱤ, ᱵᱟᱹᱥᱛᱩ-ᱟᱹᱨᱤ, ᱵᱟᱰᱚᱦᱤ-ᱟᱹᱨᱤ, ᱠᱟᱹᱢᱤ-ᱟᱹᱨᱤ, ᱟᱨ ᱫᱷᱚᱨᱚᱢ-ᱟᱹᱨᱤ ᱦᱚᱸ ᱯᱟᱥᱱᱟᱣ ᱠᱟᱛᱮ ᱜᱟᱞᱟᱝ ᱜᱟᱵᱟᱱ ᱵᱤᱥᱲᱤ ᱟᱠᱟᱱᱟ ᱾

ᱯᱩᱛᱷᱤ ᱚᱞ ᱨᱮᱭᱟᱜ ᱱᱟᱜᱟᱢ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱵᱮᱫᱽᱵᱭᱟᱥ ᱢᱟᱦᱟᱵᱷᱟᱨᱚᱛ ᱯᱩᱨᱟᱹ ᱚᱞ-ᱛᱚᱞ ᱞᱟᱹᱜᱤᱫ ᱛᱮ ᱓ ᱥᱮᱨᱢᱟ ᱞᱟᱜᱟᱣ ᱟᱫᱮ ᱛᱟᱦᱮᱸᱫ ᱾ ᱱᱚᱣᱟ ᱨᱮᱭᱟᱜ ᱮᱛᱮᱫ ᱫᱚ ᱱᱚᱣᱟ ᱦᱩᱭ ᱫᱟᱲᱮᱭᱟᱜᱼᱟ ᱩᱱ ᱚᱠᱛᱚ ᱨᱮ ᱚᱱᱚᱞ ᱞᱤᱯᱤ ᱨᱮᱭᱟᱜ ᱩᱱᱟᱹᱜ ᱩᱛᱱᱟᱹᱣ ᱵᱟᱝ ᱦᱩᱭ ᱟᱠᱟᱱ ᱛᱟᱦᱮᱸᱫ ᱾ ᱩᱱ ᱚᱠᱛᱚ ᱨᱮᱫᱚ ᱢᱩᱱᱤ ᱨᱩᱥᱤ ᱠᱚ ᱦᱚᱛᱮᱛᱮ ᱫᱷᱚᱨᱚᱢ ᱠᱟᱛᱷᱟ ᱠᱚᱫᱚ ᱡᱩᱜᱽ ᱡᱩᱜᱽ ᱨᱮᱭᱟᱜ ᱞᱟᱠᱪᱟᱨ ᱠᱚᱫᱚ ᱢᱚᱱᱮ ᱢᱚᱪᱟ ᱨᱮᱜᱮ ᱩᱭᱦᱟᱹᱨ ᱠᱟᱛᱮ ᱠᱚ ᱵᱟᱧᱪᱟᱣ ᱫᱚᱦᱚᱭᱮᱫ ᱛᱟᱦᱮᱸᱫ ᱾ ᱩᱱ ᱚᱠᱛᱚ ᱨᱮᱫᱚ ᱨᱤᱥᱤ ᱠᱚᱣᱟᱜ ᱯᱟᱹᱨᱥᱤ ᱫᱚ ᱥᱚᱸᱥᱠᱨᱩᱛ ᱛᱟᱦᱮᱸ ᱠᱟᱱᱟ ᱾ ᱱᱚᱝᱠᱟ ᱜᱮ ᱨᱩᱥᱤ ᱠᱚ ᱦᱚᱛᱮᱛᱮ ᱫᱷᱚᱨᱚᱢ ᱥᱟᱶᱦᱮᱫ ᱠᱚᱫᱚ ᱯᱩᱨᱟᱹ ᱢᱚᱱᱮ ᱢᱚᱪᱟ ᱨᱮᱜᱮ ᱩᱭᱦᱟᱹᱨ ᱫᱚᱦᱚ ᱠᱟᱛᱮ ᱡᱩᱜᱽ ᱛᱟᱭᱚᱢ ᱡᱩᱜᱽ ᱥᱟᱭ ᱥᱟᱭ ᱥᱮᱨᱢᱟ ᱫᱷᱟᱹᱵᱤᱡ ᱩᱭᱦᱟᱹᱨ ᱫᱚᱦᱚ ᱦᱩᱭ ᱞᱮᱱᱟ ᱾


ᱤᱠᱷᱟᱹᱱ ᱛᱤᱱ ᱡᱚᱦᱚᱜ ᱵᱟᱹᱭ ᱵᱟᱹᱭ ᱛᱮ ᱚᱠᱛᱚ ᱨᱮᱭᱟᱜ ᱚᱨᱥᱚᱝ ᱛᱮ ᱵᱚᱭᱫᱤᱠ ᱡᱸᱜᱽ ᱨᱮᱭᱟᱜ ᱢᱩᱪᱟᱹᱫ ᱥᱟᱶ ᱛᱮᱜᱮ ᱨᱩᱥᱤ ᱠᱚᱣᱟᱜ ᱵᱚᱭᱫᱤᱠ ᱥᱟᱶᱦᱮᱫ ᱩᱭᱦᱟᱹᱨ ᱫᱚᱦᱚᱭ ᱨᱮᱭᱟᱜ ᱛᱚᱦᱚᱨ ᱢᱟᱞᱚᱴ ᱮᱱᱟ ᱩᱱ ᱠᱷᱚᱱ ᱵᱚᱭᱫᱤᱠ ᱥᱟᱶᱦᱮᱫ ᱫᱚ ᱯᱟᱹᱱᱰᱩ ᱪᱤᱠᱤ ᱛᱮ ᱚᱞ ᱠᱟᱛᱮ ᱵᱟᱧᱪᱟᱣ ᱫᱚᱦᱚᱭ ᱞᱟᱹᱜᱤᱫ ᱵᱮᱵᱷᱟᱨ ᱦᱩᱭ ᱮᱱᱟ ᱾ ᱱᱚᱶᱟ ᱫᱚ ᱡᱚᱛᱚ ᱦᱚᱲ ᱜᱮᱠᱚ ᱢᱟᱱᱟᱣ ᱵᱟᱛᱟᱣᱟ ᱡᱮ ᱢᱟᱦᱟᱵᱷᱟᱨᱚᱛ ᱨᱮᱭᱟᱜ ᱱᱤᱛᱚᱜᱟᱜ ᱨᱩᱯ ᱫᱚ ᱛᱤᱱᱟᱹᱝ ᱮᱴᱠᱮᱴᱚᱬᱮ ᱯᱟᱨᱚᱢ ᱠᱟᱛᱮ ᱵᱮᱱᱟᱣ ᱦᱩᱭ ᱟᱠᱟᱱᱟ ᱾

ᱩᱯᱨᱩᱢ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱟᱹᱰᱤ ᱞᱮᱠᱟᱱ ᱧᱩᱛᱩᱢ ᱱᱚᱶᱟ ᱢᱟᱦᱟᱱ ᱯᱩᱛᱷᱤ ᱫᱚ "ᱡᱚᱭ ᱥᱚᱝᱦᱤᱛᱟ", "ᱵᱷᱟᱨᱚᱛ" ᱟᱨ "ᱢᱟᱦᱟᱵᱷᱟᱨᱚᱛ" ᱱᱚᱣᱟ ᱯᱮᱭᱟ ᱧᱩᱛᱩᱢ ᱛᱮ ᱜᱩᱱᱢᱟᱹᱱ ᱢᱮᱱᱟᱜᱼᱟ ᱾ ᱥᱟᱹᱨᱤ ᱛᱮ ᱵᱮᱫᱽᱵᱭᱟᱥ ᱫᱚ ᱡᱚᱛᱚ ᱠᱷᱚᱱ ᱢᱟᱬᱟᱝ ᱨᱮ ᱑,᱐᱐,᱐᱐᱐ ᱥᱞᱚᱠᱚ ᱨᱮᱭᱟᱜ ᱚᱨᱡᱚ ᱨᱮᱭᱟᱜ "ᱵᱷᱟᱨᱚᱛ" ᱧᱩᱛᱩᱢᱟᱱ ᱯᱩᱛᱷᱤ ᱫᱚᱭ ᱜᱟᱞᱟᱝ ᱜᱟᱵᱟᱱ ᱞᱮᱜᱼᱟ ᱾ ᱱᱚᱣᱟᱨᱮ ᱩᱱᱤ ᱫᱚ ᱵᱷᱟᱨᱚᱛ ᱵᱚᱨᱥᱚ ᱨᱮᱭᱟᱜ ᱪᱩᱨᱤᱛ ᱥᱟᱶ-ᱥᱟᱶ ᱛᱮ ᱮᱴᱟᱜ ᱠᱚᱜ ᱟᱹᱰᱤᱜᱟᱱ ᱢᱟᱦᱟᱱ ᱨᱩᱥᱤ, ᱪᱚᱸᱫᱽᱨᱚᱵᱚᱝᱥᱤ, ᱥᱩᱨᱭᱟᱵᱚᱝᱥᱤ ᱨᱟᱡᱟ ᱠᱚᱣᱟᱜ ᱠᱷᱟᱴᱚ ᱠᱟᱹᱦᱱᱤ ᱥᱟᱶᱛᱮ ᱟᱹᱰᱤᱜᱟᱱ ᱮᱴᱟᱝ ᱫᱷᱚᱨᱚᱢᱤᱭᱟᱹ ᱠᱟᱹᱦᱱᱤ ᱠᱚᱦᱚᱸᱭ ᱥᱮᱞᱮᱫ ᱞᱮᱜᱼᱟ ᱾ ᱤᱱᱟᱹ ᱛᱟᱭᱚᱢ ᱵᱭᱟᱥ ᱫᱚ ᱒᱔,᱐᱐᱐ ᱥᱞᱚᱠᱚ ᱨᱮᱭᱟᱜ ᱵᱤᱱᱟᱹ ᱮᱴᱟᱜ ᱨᱩᱥᱤ, ᱪᱚᱸᱫᱽᱨᱚᱵᱚᱝᱥᱤ, ᱥᱩᱨᱭᱟᱵᱚᱝᱥᱤ ᱨᱟᱡᱟ ᱠᱚᱣᱟᱜ ᱠᱷᱟᱴᱚ ᱠᱟᱹᱦᱱᱤ ᱠᱷᱟᱹᱞᱤ ᱵᱷᱟᱨᱚᱛᱤᱭᱟᱹ ᱠᱚ ᱩᱨᱩᱢ ᱠᱟᱛᱮ ᱵᱷᱟᱨᱚᱛ ᱯᱩᱛᱷᱤᱭ ᱵᱮᱱᱟᱣ ᱠᱮᱜᱼᱟ ᱾ ᱱᱚᱣᱟ ᱵᱟᱱᱟᱨ ᱚᱞ-ᱛᱚᱞ ᱨᱮ ᱫᱷᱚᱨᱢ ᱚᱫᱷᱚᱨᱢ ᱴᱷᱮᱱ ᱡᱤᱛᱠᱟᱹᱨᱚᱜ ᱨᱮᱭᱟᱜ ᱮᱛᱮᱫ ᱠᱷᱟᱹᱛᱤᱨ ᱱᱩᱭ ᱫᱚ 'ᱡᱚᱭ' ᱢᱮᱱᱛᱮ ᱦᱚᱸᱠᱚ ᱢᱮᱛᱟ ᱫᱮᱭᱟ ᱾ ᱢᱟᱦᱟᱵᱷᱟᱨᱚᱛ ᱨᱮ ᱢᱤᱫ ᱠᱟᱛᱷᱟ ᱢᱮᱱᱟᱜᱼᱟ ᱡᱮ ᱛᱤᱱ ᱡᱚᱦᱚᱜ ᱫᱮᱵᱽ ᱜᱩᱱ ᱠᱚ ᱯᱟᱹᱞᱤ ᱨᱮᱭᱟᱜ ᱢᱤᱫ ᱫᱷᱟᱨᱮ ᱨᱮ ᱯᱩᱱᱭᱟᱹ ᱵᱮᱫᱚᱸ ᱠᱚ ᱫᱚᱦᱚ ᱠᱮᱜᱼᱟ ᱟᱨ ᱫᱚᱥᱟᱨ ᱯᱟᱦᱴᱟ ᱨᱮᱫᱚ ᱵᱷᱟᱨᱚᱛ ᱯᱩᱛᱷᱤ ᱠᱚ ᱫᱚᱦᱚ ᱠᱮᱜᱼᱟ ᱮᱱᱠᱷᱟᱱ ᱵᱷᱟᱨᱚᱛ ᱯᱩᱛᱷᱤ ᱫᱚ ᱡᱚᱛᱚ ᱵᱮᱫᱚ ᱛᱩᱞᱟᱹᱡᱚᱠᱷᱟᱨᱮ ᱡᱚᱛᱚ ᱠᱷᱚᱱ ᱵᱟᱹᱲᱛᱤ ᱦᱟᱢᱟᱞ ᱩᱯᱨᱩᱢ ᱮ ᱮᱢ ᱠᱮᱜᱼᱟ ᱾ ᱡᱟᱦᱟᱸ ᱠᱷᱟᱹᱛᱤᱨ ᱵᱷᱟᱨᱚᱛ ᱯᱩᱛᱷᱤ ᱨᱮᱭᱟᱜ ᱱᱚᱶᱟ ᱫᱟᱢᱟᱱ ᱦᱟᱢᱟᱞ ᱧᱮᱞ ᱠᱟᱛᱮ ᱫᱮᱵᱽᱜᱩᱱ ᱟᱨ ᱨᱩᱥᱤ ᱠᱚ ᱱᱚᱣᱟ ᱫᱚ "ᱢᱟᱦᱟᱵᱷᱟᱨᱚᱛ" ᱧᱩᱛᱩᱢ ᱠᱚ ᱪᱟᱞᱟᱫᱼᱟ ᱟᱨ ᱱᱚᱣᱟ ᱠᱟᱛᱷᱟ ᱠᱷᱟᱹᱛᱤᱨ ᱜᱮ ᱢᱟᱹᱱᱢᱤ ᱠᱚ ᱴᱷᱮᱱ ᱱᱚᱣᱟ ᱯᱩᱛᱷᱤ ᱫᱚ 'ᱢᱟᱦᱟᱵᱷᱟᱨᱚᱛ' ᱧᱩᱛᱩᱢ ᱛᱮᱜᱮ ᱡᱚᱛᱚ ᱠᱷᱚᱱ ᱵᱟᱹᱲᱛᱤ ᱜᱩᱱ ᱢᱟᱹᱱ ᱮ ᱟᱢᱮᱴ ᱠᱮᱜᱼᱟ ᱾


ᱢᱟᱦᱟᱵᱷᱟᱨᱚᱛ ᱨᱮᱭᱟᱜ ᱠᱷᱟᱴᱚ ᱠᱟᱛᱷᱟ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

"ᱯᱩᱨᱟᱬ" (ᱢᱟᱨᱮ ᱠᱟᱛᱷᱟ) ᱞᱮᱠᱟᱛᱮ ᱵᱨᱚᱦᱢᱟ ᱠᱷᱚᱱ ᱚᱛᱨᱤ, ᱚᱛᱨᱤ ᱠᱷᱚᱱ ᱪᱚᱸᱫᱽᱨᱚᱢᱟ, ᱪᱚᱸᱫᱽᱨᱚᱢᱟ ᱠᱷᱚᱱ ᱵᱩᱫᱷ ᱟᱨ ᱵᱩᱫᱷ ᱠᱷᱚᱱ ᱤᱞᱚ ᱱᱚᱱᱫᱚᱱ ᱯᱩᱨᱩᱵᱟ ᱦᱟᱜ ᱡᱟᱱᱟᱢ ᱦᱩᱭ ᱮᱱᱟ ᱾ ᱩᱱᱤ ᱠᱷᱚᱱ ᱟᱭᱩ, ᱟᱭᱩ ᱠᱷᱚᱱ ᱨᱟᱡᱟ ᱱᱚᱦᱩᱥ, ᱟᱨ ᱱᱚᱦᱩᱥ ᱠᱷᱚᱱ ᱭᱚᱭᱟᱛᱤ ᱭ ᱡᱟᱱᱟᱢ ᱮᱱᱟ ᱾ ᱭᱚᱭᱟᱛᱤ ᱠᱷᱚᱱ ᱯᱩᱨᱩ ᱭ ᱦᱩᱭ ᱮᱱᱟ ᱾ ᱯᱩᱨᱩᱣᱟᱜ ᱵᱚᱝᱥᱚ ᱨᱮ ᱵᱷᱚᱨᱚᱛ ᱟᱨ ᱵᱷᱚᱨᱚᱛᱟᱭ ᱜᱷᱟᱨᱚᱸᱡᱽ ᱨᱮ ᱨᱟᱡᱟ ᱠᱩᱨᱩᱭ ᱦᱩᱭ ᱮᱱᱟ ᱾ ᱠᱩᱨᱩᱣᱟᱜ ᱵᱚᱝᱥᱚ ᱨᱮ ᱨᱟᱡᱟ ᱥᱟᱱᱛᱚᱱᱩ ᱭ ᱦᱩᱭ ᱮᱱᱟ ᱾ ᱥᱟᱱᱛᱚᱱᱩ ᱠᱷᱚᱱ ᱜᱚᱝᱜᱟ ᱦᱚᱯᱚᱱ ᱵᱷᱤᱥᱢᱚ ᱭ ᱦᱩᱭ ᱮᱱᱟ ᱾ ᱥᱟᱱᱛᱚᱱᱩ ᱨᱤᱱ ᱥᱚᱛᱭᱚᱵᱚᱛᱤᱭᱟᱜ ᱟᱭᱳ ᱠᱚᱞᱮ ᱠᱷᱚᱱ ᱪᱤᱛᱨᱟᱜᱚᱸᱫᱽ ᱟᱨ ᱵᱤᱪᱤᱛᱨᱚᱵᱤᱨᱡᱽ ᱠᱤᱱ ᱡᱟᱱᱟᱢ ᱮᱱᱟ ᱾ ᱪᱤᱛᱨᱟᱜᱚᱸᱫᱷ ᱜᱚᱸᱫᱷᱚᱨᱵᱷᱚ ᱦᱚᱛᱮᱛᱮᱭ ᱜᱚᱡ ᱦᱚᱪᱚᱭᱮᱱᱟ ᱟᱨ ᱨᱟᱡᱟ ᱵᱤᱪᱤᱛᱨᱚᱵᱤᱨᱡᱽ ᱦᱚᱸᱭ ᱵᱚᱸᱜᱟ ᱫᱤᱥᱚᱢ ᱮᱱᱟ ᱾ ᱩᱱ ᱡᱚᱦᱚᱜ ᱥᱚᱛᱭᱚᱵᱚᱛᱤᱭᱟᱜ ᱵᱷᱮᱡᱟ ᱛᱮᱜᱮ ᱵᱭᱟᱥ ᱫᱚ ᱱᱤᱭᱳᱜᱽ ᱦᱚᱛᱮᱛᱮ ᱚᱢᱵᱤᱠᱟᱦᱟᱜ ᱟᱭᱳ ᱠᱚᱞᱮ ᱠᱷᱚᱱ ᱫᱷᱨᱩᱛᱚᱨᱟᱥᱴᱨᱚ ᱟᱨ ᱚᱢᱵᱟᱞᱤᱠᱟ ᱦᱟᱜ ᱟᱭᱳ ᱠᱚᱞᱮ ᱠᱷᱚᱱ ᱯᱟᱱᱰᱩ ᱭ ᱡᱟᱱᱟᱢ ᱮᱱᱟ ᱾ ᱫᱷᱨᱩᱛᱚᱨᱟᱥᱴᱨᱚ ᱫᱚ ᱜᱟᱸᱫᱷᱟᱨᱤ ᱦᱚᱛᱮᱛᱮ ᱥᱟᱭ ᱦᱚᱯᱚᱱ ᱮ ᱡᱟᱱᱟᱢ ᱠᱮᱫ ᱠᱚᱣᱟ, ᱡᱟᱦᱟᱸᱨᱮ ᱫᱩᱨᱡᱚᱫᱷᱚᱱ ᱡᱚᱛᱚ ᱠᱷᱚᱱ ᱢᱟᱨᱟᱝ ᱦᱚᱯᱚᱱ ᱮ ᱛᱟᱦᱮᱸ ᱠᱟᱱᱟ ᱾ ᱟᱨ ᱯᱟᱱᱰᱩ ᱨᱤᱱ ᱡᱩᱫᱷᱤᱥᱴᱤᱨ, ᱵᱷᱤᱢ, ᱚᱨᱡᱩᱱ, ᱱᱚᱠᱩᱞ ᱟᱨ ᱥᱚᱦᱫᱮᱵᱽ ᱢᱚᱬᱮ ᱦᱚᱯᱚᱱ ᱠᱚ ᱛᱟᱦᱮᱸ ᱠᱟᱱᱟ ᱾ ᱫᱷᱨᱩᱛᱚᱨᱟᱥᱴᱨᱚ ᱫᱚ ᱡᱟᱱᱟᱢ ᱠᱷᱚᱱ ᱜᱮ ᱠᱟᱬᱟᱭ ᱛᱟᱦᱮᱸ ᱠᱟᱱᱟ ᱾ ᱡᱟᱦᱟᱸ ᱠᱷᱟᱹᱛᱤᱨ ᱩᱱᱤᱭᱟᱜ ᱴᱷᱟᱶᱨᱮ ᱯᱟᱱᱰᱩ ᱨᱟᱡᱟ ᱠᱚ ᱵᱮᱱᱟᱣ ᱠᱮᱫᱮᱭᱟ ᱾ ᱢᱤᱫ ᱫᱷᱟᱣ ᱵᱤᱨ ᱨᱮ ᱥᱮᱸᱫᱽᱨᱟ ᱮᱱᱮᱡ ᱚᱠᱛᱚ ᱨᱮ ᱯᱟᱱᱰᱩᱣᱟᱜ ᱥᱟᱨ ᱛᱮ ᱢᱤᱫ ᱫᱩᱯᱩᱞᱟᱹᱲ ᱫᱟᱨᱦᱟ ᱨᱮᱠᱤᱱ ᱩᱱᱩᱢ ᱟᱫ ᱟᱠᱟᱱ ᱡᱤᱞ ᱡᱟᱱᱣᱟ ᱨᱩᱯ ᱨᱮ ᱨᱩᱥᱤᱭ ᱛᱮᱨᱟᱝ ᱜᱚᱡ ᱮᱱᱟ ᱾ ᱩᱱᱤ ᱨᱩᱥᱤ ᱦᱚᱛᱮᱛᱮ ᱯᱟᱱᱰᱩ ᱚᱵᱷᱤᱥᱟᱯ ᱮ ᱮᱢ ᱦᱚᱪᱚ ᱮᱱᱟ ᱫᱚ, 'ᱱᱤᱛᱚᱜ ᱫᱚ ᱡᱟᱦᱟᱸ ᱛᱤᱥ ᱜᱮ ᱟᱢ ᱟᱢᱤᱡ ᱮᱨᱟ ᱥᱟᱶ ᱮᱢ ᱫᱩᱯᱩᱞᱟᱹᱲᱟ, ᱩᱱ ᱡᱚᱦᱚᱜ ᱜᱮ ᱟᱢᱟᱜ ᱡᱤᱣᱤ ᱩᱰᱩᱠᱚᱜᱼᱟ ᱾' ᱯᱟᱱᱰᱩ ᱟᱹᱰᱤ ᱵᱟᱹᱲᱛᱤ ᱠᱟᱺᱦᱤᱥ ᱠᱟᱛᱮ ᱟᱡ ᱨᱤᱱ ᱮᱨᱟ ᱠᱚ ᱥᱟᱶ ᱛᱤᱥ ᱦᱚᱸ ᱫᱩᱞᱟᱹᱱ ᱥᱟᱹᱜᱟᱹᱭ ᱵᱟᱭ ᱫᱚᱦᱚ ᱞᱮᱜᱼᱟ ᱾ ᱟᱨ ᱫᱷᱨᱩᱛᱚᱨᱟᱥᱴᱨᱚ ᱟᱡᱟᱜ ᱨᱟᱡᱟ ᱟᱺᱜᱤᱵᱷᱟᱨ ᱪᱟᱞ ᱦᱚᱴᱚ ᱠᱟᱛᱮ ᱟᱡ ᱨᱤᱱ ᱮᱨᱟ ᱥᱟᱶ ᱵᱤᱨ ᱵᱟᱥᱟ ᱡᱤᱭᱚᱱ ᱠᱚ ᱠᱷᱟᱸᱰᱟᱣ ᱠᱮᱜᱼᱟ ᱾


ᱟᱨ ᱦᱚᱸ ᱧᱮᱞ ᱢᱮ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

https://en.m.wikipedia.org/wiki/Kali_Yuga

https://en.m.wikipedia.org/wiki/Characters_in_the_Mahabharata

ᱥᱟᱹᱠᱷᱭᱟᱹᱛ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

https://en.m.wikipedia.org/wiki/Random_House_Webster%27s_Unabridged_Dictionary

http://www.oxforddictionaries.com/definition/english/Mahabharata Archived ᱒᱐᱑᱖-᱐᱗-᱒᱙ at the Wayback Machine.

https://books.google.com/books?id=zB4n3MVozbUC&pg=PA1755&dq=itihasa

ᱵᱟᱦᱨᱮ ᱡᱚᱱᱚᱲ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

https://web.archive.org/web/20101107222102/http://www.sub.uni-goettingen.de/ebene_1/fiindolo/gretil/1_sanskr/2_epic/mbh/sas/mahabharata.htm

http://www.holybooks.com/mahabharata-all-volumes-in-12-pdf-files/

http://www.brown.edu/Departments/Sanskrit_in_Classics_at_Brown/Mahabharata/MBh2Biblio.html#Poona