ᱥᱚᱝᱠᱚᱨ ᱫᱚᱭᱟᱞ ᱥᱚᱨᱢᱟ
ᱰᱨ. ᱥᱚᱝᱠᱚᱨ ᱫᱚᱭᱟᱞ ᱥᱚᱨᱢᱟ (᱑᱙ ᱚᱜᱚᱥᱴ ᱑᱙᱑᱘ - ᱒᱖ ᱰᱤᱥᱮᱢᱵᱚᱨ ᱑᱙᱙᱙) ᱫᱚ ᱥᱤᱧᱚᱛ ᱨᱤᱱᱤᱡ ᱙ ᱟᱹᱱᱤᱡ ᱫᱤᱥᱚᱢ ᱜᱚᱢᱠᱮᱭ ᱛᱟᱦᱮᱸ ᱠᱟᱱᱟ ᱾ ᱱᱩᱭᱟᱜ ᱠᱟᱹᱢᱤᱠᱛᱚ ᱫᱚ ᱒᱕ ᱡᱩᱞᱟᱭ ᱑᱙᱙᱒ ᱠᱷᱚᱱ ᱒᱕ ᱡᱩᱞᱟᱭ ᱑᱙᱙᱗ ᱦᱟᱹᱵᱤᱡ ᱛᱟᱦᱮᱸ ᱠᱟᱱᱟ ᱾ ᱫᱤᱥᱚᱢ ᱜᱚᱢᱠᱮ ᱵᱮᱱᱟᱣᱜ ᱞᱟᱦᱟᱨᱮ ᱟᱡ ᱫᱚ ᱥᱤᱧᱚᱛ ᱨᱤᱱᱤᱡ ᱘ ᱟᱹᱱᱤᱡ ᱡᱚᱜᱚ ᱫᱤᱥᱚᱢ ᱜᱚᱢᱠᱮ ᱦᱚᱸᱭ ᱛᱟᱦᱮᱸ ᱠᱟᱱᱟ ᱾ ᱟᱡ ᱵᱷᱚᱯᱟᱲ ᱯᱚᱱᱚᱛ ᱨᱤᱱᱤᱡ ᱥᱤᱨᱟᱹ ᱢᱚᱱᱛᱨᱤ (᱑᱙᱕᱒ - ᱑᱙᱕᱖) ᱦᱟᱹᱵᱤᱡ ᱮ ᱛᱟᱦᱮᱸ ᱠᱟᱱᱟ ᱥᱟᱶᱛᱮ ᱢᱚᱫᱷᱭᱚ ᱯᱨᱚᱫᱮᱥ ᱯᱚᱱᱚᱛ ᱨᱮ ᱠᱮᱵᱤᱱᱮᱴ ᱛᱷᱚᱠ ᱨᱤᱱᱤᱡ ᱢᱚᱱᱛᱨᱤ ᱞᱮᱠᱟᱛᱮ ᱟᱡ ᱫᱚ ᱥᱮᱪᱮᱫ, ᱠᱟᱱᱩᱱ, ᱡᱚᱛᱚ ᱞᱮᱠᱟᱹᱱ ᱵᱟᱹᱭᱠᱟᱹᱢᱤ, ᱠᱟᱹᱨᱜᱟᱲ ᱥᱟᱶᱛᱮ ᱵᱟᱹᱱᱤᱡ ᱢᱚᱱᱛᱨᱤᱥᱟᱲᱟ ᱨᱮᱱᱟᱜ ᱠᱟᱹᱢᱤ ᱠᱚᱭ ᱥᱟᱸᱵᱽᱲᱟᱣ ᱞᱮᱫ ᱛᱟᱦᱮᱸᱫ ᱾ ᱛᱟᱞᱢᱟ ᱥᱚᱨᱠᱟᱨ ᱨᱮᱫᱚ ᱟᱡ ᱫᱚ ᱠᱚᱢᱩᱱᱤᱠᱮᱥᱚᱱ ᱢᱚᱱᱛᱨᱤ ᱞᱮᱠᱟᱛᱮ (᱑᱙᱗᱔ - ᱑᱙᱗᱗) ᱦᱟᱹᱵᱤᱡ ᱛᱷᱟᱱᱚᱛᱵᱷᱟᱨ ᱮ ᱥᱟᱸᱵᱽᱲᱟᱣ ᱟᱠᱟᱫᱼᱟ ᱾ ᱱᱤᱭᱟᱹ ᱚᱠᱛᱚ ᱨᱮ ᱥᱤᱧᱚᱛᱤᱭᱟᱹ ᱡᱟᱹᱛᱤᱭᱟᱹᱨᱤ ᱠᱚᱸᱜᱽᱨᱮᱥ ᱨᱤᱱᱤᱡ ᱯᱟᱨᱥᱮᱛ (᱑᱙᱗᱒ - ᱑᱙᱗᱔) ᱦᱟᱹᱵᱤᱡ ᱦᱚᱸᱭ ᱛᱟᱦᱮᱸ ᱟᱠᱟᱱᱟ ᱾
ᱮᱛᱚᱦᱚᱵ ᱡᱤᱭᱚᱱ ᱟᱨ ᱥᱮᱪᱮᱫ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱰᱨᱹ ᱥᱚᱨᱢᱟ ᱫᱚ ᱥᱮᱸᱴ ᱡᱚᱱᱥ ᱵᱤᱨᱫᱟᱹᱜᱟᱲ ᱟᱜᱽᱨᱟ, ᱟᱜᱽᱨᱟ ᱵᱤᱨᱫᱟᱹᱜᱟᱲ, ᱤᱞᱟᱦᱟᱵᱟᱫᱽ ᱡᱮᱜᱮᱛ ᱵᱤᱨᱫᱟᱹᱜᱟᱲ, ᱞᱚᱠᱷᱱᱚᱣ ᱡᱮᱜᱮᱛ ᱵᱤᱨᱫᱟᱹᱜᱟᱲ, ᱯᱷᱤᱛᱡᱚᱣᱤᱞᱤᱭᱚᱢ ᱵᱤᱨᱫᱟᱹᱜᱟᱲ, ᱠᱮᱸᱵᱽᱨᱤᱡᱽ ᱡᱮᱜᱮᱛ ᱵᱤᱨᱫᱟᱹᱜᱟᱲ, ᱞᱤᱝᱠᱳᱱ ᱤᱱ ᱥᱟᱶᱛᱮ ᱦᱟᱨᱵᱚᱨᱰ ᱞᱚ ᱟᱥᱲᱟ ᱠᱷᱚᱱ ᱥᱮᱪᱮᱫ ᱮ ᱟᱢᱮᱴ ᱞᱮᱫᱼᱟ ᱾ ᱱᱩᱭ ᱫᱚ ᱦᱤᱱᱫᱤ, ᱤᱝᱞᱤᱥ, ᱥᱟᱸᱥᱠᱨᱤᱴ ᱥᱟᱶᱦᱮᱫ ᱨᱮ ᱮᱢ.ᱮ. ᱨᱮᱱᱟᱜ ᱰᱤᱜᱽᱨᱤ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮ ᱯᱩᱭᱞᱩ ᱴᱷᱟᱶ ᱥᱟᱶᱛᱮᱭ ᱟᱢᱮᱴ ᱟᱠᱟᱫᱼᱟ ᱾ ᱟᱡ ᱫᱚ ᱮᱞ.ᱮᱞ.ᱮᱢ. ᱨᱮᱱᱟᱜ ᱰᱤᱜᱽᱨᱤ ᱦᱚᱸ ᱞᱚᱠᱷᱱᱚᱣ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱠᱷᱚᱱ ᱯᱩᱭᱞᱩ ᱴᱷᱟᱶ ᱥᱟᱶᱛᱮᱭ ᱟᱢᱮᱴ ᱟᱠᱟᱫᱼᱟ, ᱠᱟᱱᱩᱱ ᱨᱮ ᱯᱤ.ᱦᱮᱪ.ᱰᱤ. ᱨᱮᱱᱟᱜ ᱰᱤᱜᱽᱨᱤ ᱠᱮᱸᱵᱽᱨᱤᱡᱽ ᱠᱷᱚᱱ ᱮ ᱟᱢᱮᱴ ᱟᱠᱟᱫᱼᱟ, ᱟᱡ ᱫᱚ ᱞᱚᱠᱷᱱᱚᱣ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱠᱷᱚᱱ ᱥᱟᱶᱛᱟ ᱥᱩᱥᱟᱹᱨ ᱨᱮ ᱪᱚᱠᱨᱚᱵᱚᱨᱛᱤ ᱥᱚᱱᱟ ᱦᱤᱥᱤᱨ ᱦᱚᱸᱭ ᱟᱢᱮᱴ ᱞᱮᱫ ᱛᱟᱦᱮᱸᱫ ᱾ ᱱᱩᱭ ᱫᱚ ᱞᱚᱠᱷᱱᱚᱣ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱥᱟᱶᱛᱮ ᱠᱮᱸᱵᱽᱨᱤᱡᱽ ᱨᱮ ᱠᱟᱱᱩᱱ ᱨᱮᱱᱟᱜ ᱥᱮᱪᱮᱫ ᱮᱢ ᱠᱟᱹᱢᱤ ᱦᱚᱸᱭ ᱛᱚᱨᱟᱣ ᱟᱠᱟᱫᱼᱟ, ᱠᱮᱸᱵᱽᱨᱤᱡᱽ ᱨᱮ ᱛᱟᱦᱮᱸᱱ ᱚᱠᱛᱚ ᱨᱮ ᱟᱡ ᱫᱚ ᱴᱮᱜᱳᱨ ᱥᱳᱥᱟᱭᱤᱴᱤ ᱥᱟᱶᱛᱮ ᱠᱮᱸᱵᱽᱨᱤᱡᱽ ᱢᱚᱡᱽᱞᱤᱥ ᱨᱤᱱᱤᱡ ᱡᱟᱭᱨᱮᱛ ᱞᱮᱠᱟᱛᱮ ᱦᱚᱸᱭ ᱛᱟᱦᱮᱸ ᱟᱠᱟᱱᱟ, ᱟᱡ ᱫᱚ ᱞᱤᱝᱠᱳᱱ ᱤᱱ ᱠᱷᱚᱱ ᱵᱮᱨᱤᱥᱴᱚᱨ ᱮᱴ ᱞᱚ ᱨᱮᱱᱟᱜ ᱰᱤᱜᱽᱨᱤ ᱦᱚᱸᱭ ᱦᱟᱛᱟᱣ ᱟᱠᱟᱫᱼᱟ ᱾ ᱟᱡ ᱫᱚ ᱚᱸᱰᱮ ᱢᱟᱱᱚᱛᱟᱱ ᱵᱮᱸᱪᱚᱨ ᱥᱟᱶᱛᱮ ᱢᱟᱥᱴᱚᱨ ᱠᱚ ᱵᱟᱪᱷᱚᱱ ᱞᱮᱫᱮ ᱛᱟᱦᱮᱸᱫ ᱾ ᱟᱡ ᱫᱚ ᱯᱷᱤᱛᱡᱚᱣᱤᱞᱤᱭᱚᱢ ᱵᱤᱨᱫᱟᱹᱜᱟᱲ ᱨᱮ ᱢᱟᱱᱚᱛᱟᱱ ᱯᱷᱮᱞᱳᱭ ᱛᱟᱦᱮᱸ ᱟᱠᱟᱱᱟ ᱾ ᱠᱮᱸᱵᱽᱨᱤᱡᱽ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱫᱚ ᱟᱡ ᱢᱟᱱᱚᱛᱟᱱ ᱰᱚᱠᱴᱚᱨ ᱳᱯᱷ ᱞᱚ ᱨᱮᱱᱟᱜ ᱰᱤᱜᱽᱨᱤ ᱮᱢ ᱠᱟᱛᱮ ᱠᱚ ᱢᱟᱹᱱ ᱦᱟᱞᱟᱝ ᱟᱠᱟᱫᱮᱭᱟ ᱾ ᱟᱡᱟᱜ ᱵᱟᱯᱞᱟ ᱫᱚ ᱵᱤᱢᱞᱟ ᱥᱚᱨᱢᱟ ᱥᱟᱶ ᱦᱩᱭ ᱞᱮᱱ ᱛᱟᱦᱮᱸᱫ ᱾
ᱨᱟᱡᱽᱟᱹᱨᱤ ᱮᱛᱚᱦᱚᱵ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]᱑᱙᱔᱐ ᱟᱱᱟᱜ ᱜᱮᱞᱟᱝ ᱨᱮ ᱥᱤᱧᱚᱛ ᱨᱮᱱᱟᱜ ᱯᱷᱩᱨᱜᱟᱹᱞ ᱦᱩᱞᱥᱟᱹᱭ ᱨᱮᱭ ᱥᱮᱞᱮᱫ ᱮᱱᱟ, ᱱᱚᱶᱟ ᱠᱷᱟᱹᱛᱤᱨ ᱩᱱᱤ ᱫᱚ ᱠᱚᱸᱜᱽᱨᱮᱥ ᱯᱟᱴᱤ ᱨᱤᱱᱤᱡ ᱥᱚᱦᱮᱫᱚᱜ ᱮ ᱦᱟᱛᱟᱣ ᱠᱮᱫᱼᱟ ᱾ ᱑᱙᱕᱒ ᱨᱮ ᱵᱷᱚᱯᱟᱲ ᱨᱤᱱᱤᱡ ᱥᱤᱨᱟᱹ ᱢᱚᱱᱛᱨᱤᱭ ᱵᱮᱱᱟᱣ ᱮᱱᱟ ᱾ ᱱᱚᱶᱟ ᱛᱷᱟᱱᱚᱛ ᱨᱮ ᱑᱙᱕᱖ ᱦᱟᱹᱵᱤᱡ ᱮ ᱛᱟᱦᱮᱸ ᱮᱱᱟ ᱛᱤᱱ ᱡᱚᱦᱚᱜ ᱵᱷᱚᱯᱟᱲ ᱫᱚ ᱮᱴᱟᱜ ᱯᱚᱱᱚᱛ ᱥᱟᱶ ᱢᱮᱥᱟ ᱠᱟᱛᱮ ᱢᱚᱫᱷᱭᱚ ᱯᱨᱚᱫᱮᱥ ᱨᱮᱱᱟᱜ ᱜᱚᱲᱦᱚᱱ ᱦᱩᱭ ᱮᱱᱟ ᱾
ᱪᱩᱦᱩᱞᱟᱱ ᱨᱟᱡᱽᱟᱹᱨᱤ ᱡᱤᱭᱚᱱ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]᱑᱙᱖᱐ ᱟᱱᱟᱜ ᱜᱮᱞᱟᱝ ᱨᱮ ᱟᱡ ᱫᱚ ᱤᱱᱫᱤᱨᱟ ᱜᱟᱱᱫᱷᱤ ᱟᱜ ᱠᱚᱸᱜᱽᱨᱮᱥ ᱯᱟᱴᱤ ᱨᱮᱱᱟᱜ ᱧᱮᱞ ᱡᱚᱛᱚᱱ ᱟᱢᱮᱴ ᱨᱮ ᱜᱚᱲᱚ ᱥᱚᱦᱚᱫ ᱮ ᱮᱢ ᱠᱮᱫᱼᱟ ᱾ ᱤᱱᱫᱤᱨᱟ ᱟᱜ ᱠᱮᱵᱤᱱᱮᱴ ᱨᱮ ᱩᱱᱤ ᱫᱚ ᱠᱚᱢᱩᱱᱤᱠᱮᱥᱚᱱ ᱢᱤᱱᱤᱥᱴᱚᱨ (᱑᱙᱗᱔ - ᱑᱙᱗᱗) ᱮ ᱛᱟᱦᱮᱸ ᱮᱱᱟ ᱾ ᱑᱙᱗᱑ ᱟᱨ ᱑᱙᱘᱐ ᱨᱮ ᱟᱡ ᱫᱚ ᱵᱷᱚᱯᱟᱲ ᱨᱮᱱᱟᱜ ᱞᱳᱠ ᱥᱚᱵᱷᱟ ᱢᱟᱹᱪᱤᱭ ᱡᱤᱛᱠᱟᱹᱨ ᱮᱱᱟ ᱾ ᱤᱱᱟᱹ ᱛᱟᱭᱚᱢ ᱩᱱᱤ ᱫᱚ ᱟᱹᱰᱤᱜᱟᱱ ᱡᱤᱣᱚᱯᱚᱞᱤᱴᱤᱠᱟᱞ ᱯᱳᱡᱤᱥᱚᱱ ᱨᱮᱭ ᱠᱟᱹᱢᱤ ᱠᱮᱫᱼᱟ ᱾ ᱑᱙᱘᱔ ᱨᱮ ᱟᱡ ᱫᱚ ᱨᱟᱡᱽᱯᱟᱞ ᱞᱮᱠᱟᱛᱮ ᱟᱱᱫᱷᱨᱚ ᱯᱨᱚᱫᱮᱥ ᱨᱮᱭ ᱥᱟᱹᱥᱮᱞᱮᱫᱚᱜ ᱚᱠᱛᱚ ᱨᱮ ᱫᱤᱞᱞᱤ ᱨᱮ ᱟᱡᱤᱡ ᱦᱚᱯᱚᱱ ᱮᱨᱟ ᱜᱤᱛᱟᱧᱡᱚᱞᱤ ᱟᱨ ᱡᱟᱶᱟᱭ ᱜᱚᱢᱠᱮ ᱞᱚᱞᱤᱛ ᱢᱟᱠᱚᱱ ᱟᱜ ᱡᱚᱵᱚᱨᱜᱚᱡ ᱫᱚ ᱥᱤᱠᱷ ᱮᱠᱥᱴᱨᱤᱢᱤᱥᱴ ᱦᱚᱛᱮᱛᱮ ᱦᱩᱭ ᱮᱱᱟ ᱾ ᱑᱙᱘᱕ ᱠᱷᱚᱱ ᱑᱙᱘᱖ ᱦᱟᱹᱵᱤᱡ ᱟᱡ ᱫᱚ ᱯᱚᱧᱡᱟᱵᱽ ᱨᱤᱱᱤᱡ ᱨᱟᱡᱽᱯᱟᱞ ᱞᱮᱠᱟᱛᱮᱭ ᱛᱟᱦᱮᱸ ᱮᱱᱟ ᱾ ᱢᱩᱪᱟᱹᱫ ᱨᱟᱡᱽᱯᱟᱞ ᱟᱺᱜᱤᱵᱷᱟᱨ ᱫᱚ ᱩᱱᱤ ᱑᱙᱘᱖ ᱠᱷᱚᱱ ᱑᱙᱘᱗ ᱦᱟᱹᱵᱤᱡ ᱢᱚᱦᱟᱨᱟᱥᱴᱨᱚ ᱨᱮᱭ ᱛᱚᱨᱟᱣ ᱠᱮᱫᱼᱟ ᱾ ᱱᱤᱭᱟᱹ ᱛᱟᱭᱚᱢ ᱟᱡ ᱫᱚ ᱡᱚᱜᱚ ᱫᱤᱥᱚᱢ ᱜᱚᱢᱠᱮ ᱟᱨ ᱨᱟᱡᱽᱡᱚᱥᱚᱵᱷᱟ ᱨᱤᱱᱤᱡ ᱥᱚᱵᱷᱟᱯᱚᱛᱤ ᱞᱮᱠᱟᱛᱮᱭ ᱵᱟᱪᱷᱚᱱ ᱮᱱᱟ ᱾ ᱱᱚᱶᱟ ᱛᱷᱟᱱᱚᱛ ᱨᱮᱫᱚ ᱟᱡ ᱑᱙᱙᱒ ᱨᱮ ᱫᱤᱥᱚᱢ ᱜᱚᱢᱠᱮ ᱵᱮᱱᱟᱣᱜ ᱦᱟᱹᱵᱤᱡ ᱮ ᱛᱟᱦᱮᱸ ᱮᱱᱟ ᱾
ᱫᱤᱥᱚᱢ ᱜᱚᱢᱠᱮᱭᱟᱜ ᱵᱟᱪᱷᱱᱟᱣ ᱫᱚ ᱩᱱᱤ ᱡᱚᱨᱡᱽ ᱥᱣᱮᱞ ᱦᱟᱨᱟᱣ ᱠᱟᱛᱮᱭ ᱡᱤᱛᱠᱟᱹᱨ ᱞᱮᱱ ᱛᱟᱦᱮᱸᱫ ᱾ ᱱᱚᱶᱟᱨᱮ ᱩᱱᱤ ᱫᱚ ᱖᱖% ᱢᱚᱛ ᱮ ᱧᱟᱢ ᱞᱮᱫ ᱛᱟᱦᱮᱸᱫ ᱾ ᱟᱡᱟᱜ ᱢᱩᱪᱟᱹᱫ ᱠᱟᱹᱢᱤ ᱥᱮᱨᱢᱟ ᱫᱚ ᱟᱡ ᱯᱮ ᱦᱚᱲ ᱢᱟᱨᱟᱝ ᱢᱚᱱᱛᱨᱤ ᱠᱚ ᱠᱤᱨᱭᱟᱹᱭ ᱦᱟᱛᱟᱣ ᱦᱚᱪᱚ ᱞᱮᱫ ᱠᱚᱣᱟ ᱾
ᱟᱡᱟᱨ ᱟᱨ ᱜᱩᱨ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱟᱡᱟᱜ ᱡᱤᱭᱚᱱ ᱨᱮᱱᱟᱜ ᱢᱩᱪᱟᱹᱫ ᱢᱚᱬᱮ ᱥᱮᱨᱢᱟ ᱫᱚ ᱟᱡ ᱟᱡᱟᱨ ᱨᱮᱭ ᱛᱟᱦᱮᱸ ᱮᱱᱟ, ᱙ ᱚᱠᱴᱚᱵᱚᱨ ᱑᱙᱙᱙ ᱫᱚ ᱟᱡ ᱨᱤᱫᱟᱹᱭ ᱟᱡᱟᱨ ᱠᱷᱟᱹᱛᱤᱨ ᱫᱤᱞᱞᱤ ᱨᱮᱱᱟᱜ ᱢᱤᱫ ᱦᱟᱥᱯᱟᱛᱟᱞ ᱨᱮ ᱠᱚ ᱵᱷᱩᱨᱛᱤ ᱠᱮᱫᱮᱭᱟ, ᱡᱟᱦᱟᱸᱨᱮ ᱩᱱᱤᱭᱟᱜ ᱡᱤᱣᱤᱵᱟᱹᱛᱤ ᱫᱚ ᱡᱟᱭᱡᱩᱜᱽ ᱞᱟᱹᱜᱤᱫ ᱤᱬᱤᱡ ᱥᱟᱹᱨᱤ ᱮᱱᱟ ᱾ ᱩᱱᱤᱭᱟᱜ ᱢᱟᱬᱜᱷᱟᱹᱴᱤ ᱫᱚ ᱠᱚᱨᱢᱚᱵᱷᱩᱢᱤ ᱨᱮ ᱵᱮᱱᱟᱣ ᱟᱠᱟᱱᱟ ᱾
ᱵᱟᱦᱨᱮ ᱡᱚᱱᱚᱲ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ] |
ᱣᱤᱠᱤᱢᱤᱰᱤᱭᱟ ᱠᱚᱢᱚᱱᱥ ᱨᱮ ᱥᱚᱝᱠᱚᱨ ᱫᱚᱭᱟᱞ ᱥᱚᱨᱢᱟ ᱵᱟᱵᱚᱛᱫᱽ ᱛᱮ ᱨᱮᱫ ᱢᱮᱱᱟᱜᱼᱟ ᱾. |
 |
ᱣᱤᱠᱤᱠᱩᱣᱚᱴ ᱨᱮ ᱥᱚᱝᱠᱚᱨ ᱫᱚᱭᱟᱞ ᱥᱚᱨᱢᱟ ᱥᱟᱶ ᱡᱚᱲᱟᱣᱟᱱᱟᱜ ᱠᱟᱛᱷᱟ ᱠᱚ ᱾ |
- Shankar Dayal Sharma at Encyclopaedia Britannica