ᱥᱟᱠᱟᱢ ᱪᱮᱬᱮ ᱟᱨ ᱦᱟᱹᱛᱤ
ᱢᱤᱫᱴᱟᱝ ᱫᱟᱨᱮ ᱨᱮ ᱵᱟᱨᱭᱟ ᱥᱟᱠᱟᱢ ᱪᱮᱬᱮ ᱦᱚᱯᱚᱱ ᱞᱮᱫ ᱠᱚᱣᱟᱠᱤᱱ᱾ ᱢᱤᱫ ᱫᱷᱟᱣ ᱢᱤᱫᱴᱟᱝ ᱫᱟᱱᱛᱟ ᱦᱟᱹᱛᱤ ᱦᱮᱡ ᱠᱟᱛᱮ ᱚᱱᱟ ᱫᱟᱨᱮᱨᱮ ᱜᱟᱥᱮᱨᱚᱜ ᱮ ᱮᱦᱚᱵ ᱠᱮᱫᱼᱟ᱾ ᱮᱱᱠᱷᱟᱱ ᱫᱟᱨᱮ ᱢᱟ ᱦᱤᱞᱟᱹᱣ ᱮᱱᱟ᱾ ᱥᱟᱠᱟᱢ ᱪᱮᱬᱮᱭᱟᱜ ᱛᱩᱠᱟᱹᱢᱟ ᱱᱮ ᱧᱩᱨᱩᱜ ᱱᱮ ᱵᱟᱝ᱾ ᱥᱟᱠᱟᱢ ᱪᱮᱬᱮᱠᱤᱱ ᱟᱹᱰᱤᱜᱟᱱ ᱠᱤᱱ ᱵᱚᱛᱚᱨ ᱟᱠᱟᱱᱟ᱾ ᱚᱸᱰᱮ ᱦᱟᱹᱛᱤ ᱟᱨᱦᱚᱸ ᱜᱟᱥᱮᱨᱚᱜ ᱧᱮᱞ ᱠᱟᱛᱮ ᱦᱟᱸᱜ ᱟᱫᱮᱭᱟᱠᱤᱱ-ᱦᱟᱹᱛᱤ ᱨᱟᱡᱽ! ᱫᱟᱭᱟᱜ ᱢᱮ ᱜᱤᱫᱟᱹᱨ ᱠᱚ ᱧᱩᱨᱩᱜ ᱛᱟᱹᱞᱤᱧᱟ ᱾ ᱫᱟᱱᱛᱟ ᱦᱟᱹᱛᱤ ᱪᱮᱬᱮᱭᱟᱜ ᱠᱟᱛᱷᱟ ᱵᱟᱝ ᱟᱸᱡᱚᱢ ᱠᱟᱛᱮ ᱟᱯᱮ ᱥᱟᱠᱟᱢ ᱪᱮᱬᱮᱭᱟᱜ ᱡᱤᱣᱤᱫ ᱠᱟᱛᱮ ᱦᱚᱸ ᱪᱮᱫ ᱯᱚᱲᱦᱚ,ᱭ ᱢᱮᱛᱟᱫ ᱠᱤᱱᱟ᱾ ᱤᱧᱫᱚᱧ ᱜᱟᱥᱮᱨᱚᱜ ᱜᱮᱭᱟᱢᱮᱱ ᱠᱟᱛᱮ ᱛᱟᱹᱦᱩᱸᱭ ᱜᱟᱥᱟᱣ ᱮᱱᱟ ᱟᱨ ᱛᱩᱠᱟᱹᱭ ᱞᱮᱫᱟ ᱞᱟᱹᱛᱤᱧ ᱚᱪᱚ ᱠᱮᱫᱟ᱾ ᱛᱩᱠᱟᱹᱭ ᱧᱩᱨ ᱟᱠᱟᱱ ᱠᱷᱟᱱ ᱦᱚᱯᱚᱱ ᱠᱚ ᱜᱚᱡ ᱜᱤᱰᱤᱜ-ᱟ᱾ ᱦᱟᱹᱛᱤᱭᱟᱜ ᱴᱮᱱᱰᱚᱥ ᱧᱮᱞ ᱠᱟᱛᱮ ᱮᱫᱽᱨᱮ ᱭᱟᱠᱟᱱᱟ ᱠᱤᱱ ᱥᱟᱠᱟᱢ ᱪᱮᱬᱮ ᱟᱨᱠᱤᱱ ᱢᱮᱛᱟ ᱦᱟᱫᱮᱭᱟ-"ᱦᱟᱹᱛᱤ ! ᱠᱟᱛᱷᱟ ᱟᱸᱡᱚᱢ ᱢᱮ ᱟᱨ ᱫᱟᱨᱮ ᱟᱞᱚᱢ ᱦᱤᱞᱟᱹᱣᱟ ᱵᱟᱝᱠᱷᱟᱱ ᱟᱢ ᱦᱚᱸᱞᱤᱧ ᱦᱤᱞᱟᱹᱣ ᱜᱚᱫ ᱴᱟᱢᱟ ᱾" ᱥᱟᱠᱟᱢ ᱪᱮᱬᱮᱭᱟᱜ ᱱᱚᱝᱠᱟᱱ ᱠᱟᱛᱷᱟ ᱞᱟᱸᱫᱟᱛᱮᱭ ᱚᱴᱟᱹᱝ ᱞᱮᱜᱟ ᱦᱟᱹᱛᱤ ᱾ ᱮᱱᱠᱷᱟᱱ ᱥᱟᱠᱟᱢ ᱪᱮᱬᱮᱠᱤᱱ ᱢᱤᱫ ᱫᱷᱟᱣ ᱛᱮ ᱦᱩᱸᱭ ᱢᱮᱱᱛᱮ ᱵᱟᱱᱟᱨ ᱞᱩᱛᱩᱨ ᱨᱮ ᱩᱰᱟᱹᱣ ᱵᱚᱞᱚ ᱠᱟᱛᱮ ᱠᱤᱱ ᱯᱷᱟᱫᱽ ᱯᱷᱟᱫᱟᱣᱮᱱᱟ ᱾ ᱦᱟᱹᱠᱩ ᱛᱮ ᱦᱟᱹᱛᱤ ᱤᱠᱲᱩᱢ ᱚᱵᱚᱨ ᱩᱛᱟᱹᱨ ᱞᱮᱱᱟᱭ ᱟᱨ ᱚᱸᱰᱮ ᱠᱷᱚᱱ ᱯᱤᱲᱟᱹᱢᱯᱟᱴ ᱮ ᱫᱟᱹᱲ ᱞᱮᱫᱟ ᱾ ᱦᱚᱲᱮᱢ ᱦᱤᱰᱤᱧ ᱨᱮᱦᱚᱸ ᱢᱚᱱᱮᱨᱮ ᱫᱤᱞ ᱫᱟᱲᱮ ᱛᱟᱦᱮᱸᱱ ᱠᱷᱟᱱ ᱥᱮᱬᱟ ᱦᱚᱲ ᱦᱚᱸᱢ ᱦᱟᱨᱟᱣ ᱫᱟᱲᱮ ᱭᱟᱠᱚᱣᱟ ᱾ ᱥᱟᱠᱟᱢ ᱪᱮᱬᱮ ᱚᱱᱠᱟᱜᱮ ᱦᱟᱹᱛᱤ ᱠᱷᱚᱱ ᱦᱚᱯᱚᱱ ᱠᱤᱱ ᱵᱟᱧᱪᱟᱣᱜ ᱞᱮᱫ ᱠᱚᱣᱟ ᱫᱤᱞ ᱫᱟᱲᱮ ᱠᱷᱟᱹᱛᱤᱨ᱾