ᱥᱟᱣᱱᱟ ᱢᱩᱨᱢᱩ

ᱣᱤᱠᱤᱯᱤᱰᱤᱭᱟ, ᱨᱟᱲᱟ ᱜᱮᱭᱟᱱ ᱯᱩᱛᱷᱤ ᱠᱷᱚᱱ

ᱥᱟᱣᱱᱟ ᱢᱩᱨᱢᱩ :-ᱥᱟᱣᱱᱟ ᱢᱩᱨᱢᱩ ᱫᱚ ᱵᱷᱚᱸᱡᱽ ᱫᱤᱥᱚᱢ ᱵᱟᱵᱚᱱᱜᱷᱟ.ᱴᱤ ᱥᱚᱵᱽᱰᱤᱵᱤᱡᱚᱱ ᱨᱮ ᱢᱮᱱᱟᱜ ᱠᱟᱫᱩᱣᱟᱬᱤ ᱟ.ᱛᱩᱨᱮ ᱢᱮᱱᱟᱜ ᱢᱤᱫ ᱢᱩᱨᱢᱩ ᱵᱟ.ᱠᱷᱩᱞ ᱨᱮᱭ ᱡᱟᱱᱟᱢ ᱞᱮᱱᱟ ᱾ ᱱᱚᱶᱟ ᱢᱟᱸᱦᱟ ᱛᱟᱦᱮᱸ ᱠᱟᱱᱟ ᱤᱸ. ᱢᱟ. ᱑᱒. ᱑᱑. ᱑᱘᱙᱖ ᱦᱤᱛ ᱾ ᱡᱟᱱᱟᱢ ᱵᱟᱵᱟᱣᱟᱜ ᱧᱩᱛᱩᱢ ᱫᱚ ᱢᱩᱪᱤᱨᱟᱢ ᱢᱩᱨᱢᱩ ᱟᱨ ᱡᱟᱱᱟᱢ ᱟᱭᱳᱣᱟᱜ ᱧᱩᱛᱩᱢ ᱫᱚ ᱯᱟᱨᱵᱚᱛᱤ ᱢᱩᱨᱢᱩ ᱛᱟᱦᱮᱸ ᱠᱟᱱᱟ ᱾ ᱡᱟᱱᱟᱢ ᱵᱟᱵᱟ ᱫᱚ ᱢᱤᱫ ᱚᱞᱚᱜ ᱯᱟᱲᱦᱟᱣᱜ ᱦᱚᱲ ᱜᱮᱭ ᱛᱟᱦᱮᱸ ᱠᱟᱱ ᱛᱮ ᱯᱟ.ᱴᱷᱣᱟ. ᱦᱟᱲᱟᱢ ᱢᱮᱱᱛᱮ ᱦᱚᱸᱠᱚ ᱢᱮᱛᱟᱭ ᱛᱟᱦᱮᱸᱫ ᱾ ᱪᱟᱥ ᱵᱟᱥ ᱠᱟ.ᱢᱤ ᱟᱨ ᱨᱟᱱ ᱢᱩᱨᱜᱟ.ᱱ ᱛᱮᱜᱮ ᱫᱤᱱ ᱫᱚᱭ ᱠᱷᱮᱢᱟᱣ ᱞᱮᱫᱼᱟ ᱾ ᱥᱟᱣᱱᱟ ᱢᱩᱨᱢᱩ ᱨᱤᱱ ᱫᱚ ᱯᱮ ᱵᱚᱭᱦᱟ ᱠᱚᱲᱟ ᱟᱨ ᱯᱮ ᱵᱚᱭᱦᱟ ᱫᱚ ᱠᱩᱲᱤ ᱠᱚ ᱛᱟᱦᱮᱸ ᱠᱟᱱᱟ ᱾ ᱥᱟᱣᱱᱟ ᱢᱩᱨᱢᱩ ᱫᱚ ᱢᱩᱪᱤᱨᱟᱢ ᱤᱡ ᱢᱟᱨᱟᱝ ᱦᱚᱯᱚᱱ ᱮ ᱛᱟᱦᱮᱸ ᱠᱟᱱᱟ ᱾

ᱥᱮᱪᱮᱫ ᱮᱛᱚᱦᱚᱵ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱥᱟᱣᱱᱟ ᱢᱩᱨᱢᱩ ᱫᱚ ᱟᱠᱚ ᱟ.ᱛᱩ ᱥᱩᱨ ᱜᱟᱺᱵᱷᱟ.ᱨᱤᱭᱟ. U. P. ᱟᱥᱲᱟ ᱨᱮᱜᱮ ᱠᱚ ᱵᱷᱩᱨᱛᱤ ᱠᱟᱫᱮᱭᱟ ᱾᱾[᱑] ᱜᱩᱨᱩ ᱜᱚᱢᱠᱮ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱦᱚᱸ ᱛᱟᱭᱚᱢ ᱫᱚ ᱟᱡ ᱵᱟᱵᱟ ᱟᱡ ᱦᱚᱸ ᱚᱸᱰᱮ ᱜᱮᱭ ᱵᱷᱩᱨᱛᱤ ᱠᱟᱫᱮᱭᱟ ᱾ ᱥᱟᱣᱱᱟ ᱢᱩᱨᱢᱩ ᱯᱩᱱ ᱪᱟᱱᱚᱪ ᱨᱮᱭ ᱚᱞᱚᱜ ᱠᱟᱱ ᱡᱚᱦᱚᱜ ᱫᱚ ᱜᱩᱨᱩ ᱜᱚᱢᱠᱮ ᱫᱚ ᱯᱩᱭᱞᱩ ᱪᱟᱱᱚᱪ ᱨᱮᱠᱚ ᱵᱷᱩᱨᱛᱤ ᱠᱟᱫᱮᱭᱟ ᱾ ᱥᱟᱣᱱᱟ ᱢᱩᱨᱢᱩ ᱫᱚ ᱜᱩᱨᱩ ᱜᱚᱢᱠᱮ ᱴᱷᱮᱱ ᱮ ᱢᱟᱢᱚ ᱚᱪᱚᱜ ᱠᱟᱱ ᱛᱟᱦᱮᱸᱱ ᱾ ᱱᱚᱝᱠᱟᱛᱮ ᱥᱟᱣᱱᱟ ᱢᱩᱨᱢᱩ ᱫᱚ ᱑᱙᱑᱔ ᱥᱟᱞᱮᱨᱮ ᱢᱚᱬᱮ ᱪᱟᱱᱚᱪ ᱮ ᱥᱟ.ᱛ ᱠᱮᱜᱼᱟ ᱾ ᱤᱱᱟ. ᱛᱟᱭᱚᱢ ᱥᱟᱣᱱᱟ ᱢᱩᱨᱢᱩ ᱫᱚ ᱵᱚᱦᱚᱲᱫᱟ ᱢᱟᱭᱱᱚᱨ ᱟᱥᱲᱟ ᱨᱮᱭ ᱵᱷᱤᱥᱮᱞᱮᱫ ᱮᱱᱟ ᱾ ᱛᱟᱭᱚᱢ ᱫᱚ ᱜᱩᱨᱩ ᱜᱚᱢᱠᱮ ᱦᱚᱸ ᱚᱸᱰᱮ ᱜᱮᱠᱚ ᱤᱫᱤ ᱚᱴᱚ ᱠᱟᱫᱮᱭᱟ ᱟᱨ ᱥᱟᱣᱱᱟ ᱢᱩᱨᱢᱩᱣᱟᱜ ᱦᱤᱨᱞᱟ. ᱨᱮᱠᱚ ᱵᱟ.ᱜᱤ ᱟᱫᱮᱭᱟ ᱾ ᱚᱠᱟ ᱨᱮᱦᱚᱸ ᱛᱟᱦᱮᱸᱱ ᱴᱷᱟᱶ ᱵᱟᱠᱚ ᱧᱟᱢ ᱞᱮᱫ ᱠᱷᱟᱱ ᱵᱚᱦᱚᱲᱫᱟ ᱨᱤᱱᱤᱡ ᱚᱱᱚᱱᱛᱚ ᱢᱟᱺᱡᱷᱤᱭᱟᱜ ᱵᱟᱱᱟ ᱰᱩᱸᱜᱽᱨᱤ ᱨᱮ ᱢᱤᱫ ᱰᱮᱨᱟ ᱠᱚ ᱵᱮᱱᱟᱣ ᱠᱮᱫᱼᱟ ᱾ ᱟᱨ ᱚᱱᱟ ᱰᱮᱨᱟ ᱫᱚ ᱪᱩᱱᱩ ᱰᱮᱨᱟ ᱢᱮᱱᱛᱮ ᱠᱚ ᱢᱮᱛᱟᱫᱼᱟ ᱾ ᱱᱚᱝᱠᱟᱛᱮ ᱑᱙᱑᱗ ᱥᱟᱞᱮᱨᱮ ᱥᱟᱣᱱᱟ ᱢᱩᱨᱢᱩ ᱫᱚ ᱢᱟᱸᱭᱱᱚᱨ ᱮ ᱯᱩᱨᱟ.ᱣ ᱥᱟ.ᱛ ᱠᱮᱜᱼᱟ ᱾

ᱪᱟ.ᱠᱨᱤ ᱟᱨ ᱡᱩᱨᱤᱡᱚᱛᱟ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱢᱟᱭᱱᱚᱨ ᱥᱟ.ᱛ ᱛᱟᱭᱚᱢ ᱥᱟᱣᱱᱟ ᱢᱩᱨᱢᱩ ᱫᱚ ᱠᱷᱚᱨᱚᱪ ᱠᱚ ᱵᱟᱝ ᱫᱟᱲᱮᱛᱮ ᱚᱞ ᱯᱟᱲᱦᱟᱣ ᱫᱚ ᱵᱟᱭ ᱞᱟᱦᱟ ᱫᱟᱲᱮᱭᱟᱫᱼᱟ ᱾ ᱨᱮᱸᱜᱮᱡ ᱡᱟᱞᱟᱛᱮ ᱱᱟᱞᱦᱟ ᱟ.ᱥᱩᱞᱚᱜ ᱜᱮᱭ ᱨᱤᱠᱟ. ᱠᱮᱫᱼᱟ ᱾ ᱮᱛᱚᱦᱚᱵ ᱫᱚ ᱡᱟᱢᱥᱮᱫᱽᱯᱩᱨ ᱴᱟᱴᱟ ᱠᱚᱢᱯᱟᱱᱤ ᱨᱮᱭᱟᱜ ᱢᱤᱫ ᱢᱮᱬᱦᱮᱫ ᱜᱚᱫᱟᱢ ᱨᱮ ᱫᱟᱨᱣᱟᱱ ᱞᱮᱠᱟᱭ ᱠᱟ.ᱢᱤ ᱠᱮᱫᱼᱟ ᱾ ᱚᱸᱰᱮ ᱵᱟᱨ ᱥᱮᱨᱢᱟ ᱠᱟ.ᱢᱤ ᱠᱟᱛᱮ ᱚᱲᱟᱜ ᱛᱮᱭ ᱨᱩᱣᱟ.ᱱ ᱦᱮᱡ ᱮᱱᱟ ᱾ ᱚᱱᱟ ᱥᱮᱨᱢᱟ ᱜᱮ ᱟᱡᱤᱡ ᱡᱟᱱᱟᱢ ᱵᱟᱵᱟ ᱫᱚᱭ ᱵᱚᱸᱜᱟ ᱫᱤᱥᱚᱢ ᱮᱱᱟ ᱾ ᱤᱱᱟ. ᱚᱠᱛᱚᱨᱮ ᱟᱡ ᱨᱤᱱ ᱵᱚᱭᱦᱟ ᱠᱚ ᱱᱟᱵᱟᱞᱚᱠ ᱜᱮᱠᱚ ᱛᱟᱦᱮᱸ ᱠᱟᱱᱟ ᱾ ᱵᱟᱵᱟᱣᱟᱜ ᱡᱟᱦᱟᱸ ᱟᱺᱜᱤᱵᱷᱟᱨ ᱛᱟᱦᱮᱸ ᱠᱟᱱᱟ ᱚᱱᱟ ᱡᱚᱛᱚ ᱟᱡ ᱪᱮᱛᱟᱱ ᱨᱮ ᱧᱩᱨ ᱮᱱᱟ ᱾

ᱚᱱᱟᱛᱮ ᱟᱡ ᱵᱟᱵᱟ ᱫᱚ ᱜᱤᱫᱽᱨᱟ. ᱠᱚ ᱚᱞ ᱯᱟᱲᱦᱟᱣ ᱚᱪᱚ ᱠᱚ ᱞᱟ.ᱜᱤᱫ ᱢᱚᱦᱟᱡᱚᱱ ᱴᱷᱮᱱ ᱡᱟᱦᱟᱸ ᱫᱷᱟ.ᱨᱛᱤ ᱮ ᱛᱟᱦᱮᱸ ᱠᱟᱱᱟ, ᱚᱱᱟ ᱫᱚ ᱢᱟᱨᱟᱝ ᱦᱚᱯᱚᱱ ᱞᱮᱠᱟᱛᱮ ᱥᱟᱣᱱᱟ ᱢᱩᱨᱢᱩ ᱜᱮᱭ ᱦᱟᱞᱟ ᱫᱩᱜ ᱠᱮᱫ ᱠᱚᱣᱟ ᱾ ᱤᱱᱟ. ᱛᱟᱭᱚᱢ ᱥᱮᱴᱮᱞᱢᱮᱸᱴ ᱠᱟ.ᱢᱤ ᱨᱮᱭ ᱠᱷᱚᱸᱡᱟ ᱮᱱᱟ ᱾ ᱑᱙᱒᱐ ᱥᱟᱞᱮᱨᱮ ᱜᱷᱟᱴ ᱠᱩᱢᱰᱟ.ᱥᱚᱲ ᱟ.ᱛᱩ ᱪᱟᱰᱨᱟ ᱦᱮᱸᱵᱽᱨᱚᱢ ᱦᱚᱯᱚᱱ ᱮᱨᱟ ᱞᱩᱠᱷᱤ ᱥᱟᱞᱟᱜ ᱮ ᱡᱩᱨᱤᱡᱚᱛᱟ ᱮᱱᱟ ᱾ ᱑᱙᱒᱓ ᱥᱟᱞᱮᱨᱮ ᱥᱮᱴᱮᱞᱢᱮᱸᱴ ᱠᱟ.ᱢᱤ ᱯᱩᱨᱟ.ᱣ ᱠᱟᱛᱮ ᱜᱟᱺᱵᱷᱟ.ᱨᱤᱭᱟ. ᱟᱥᱲᱟᱨᱮ ᱢᱟᱪᱮᱛ ᱞᱮᱠᱟᱭ ᱛᱟᱦᱮᱸ ᱮᱱᱟ ᱾ ᱚᱸᱰᱮ ᱠᱷᱚᱱ ᱥᱟᱣᱱᱟ ᱢᱩᱨᱢᱩ ᱫᱚ ᱵᱟ.ᱨᱯᱟᱫᱟ ᱜᱩᱨᱩ ᱪᱮᱢᱮᱫᱚᱜ ᱠᱚ ᱵᱷᱮᱡᱟ ᱠᱮᱫᱮᱭᱟ ᱾ ᱤᱸ. ᱢᱟ. ᱑᱙᱒᱔ ᱦᱤᱛ ᱦᱤᱞᱚᱜ ᱡᱚᱛᱚᱣᱟᱜ ᱜᱷᱮᱸᱴ ᱢᱚᱸᱴ ᱠᱟᱛᱮ ᱵᱟ.ᱨᱯᱟᱫᱟ ᱜᱩᱨᱩ ᱪᱮᱢᱮᱫᱚᱜ ᱞᱟ.ᱜᱤᱫ ᱵᱚᱰᱤᱝ ᱦᱚᱥᱴᱮᱞ ᱮ ᱪᱟᱞᱟᱣ ᱮᱱᱟ ᱾

ᱚᱱᱟ ᱚᱠᱛᱚ ᱨᱮᱜᱮ ᱜᱩᱨᱩ ᱜᱚᱢᱠᱮ ᱦᱚᱸ ᱵᱟ.ᱨᱯᱟᱫᱟ ᱩᱱᱩᱥᱩᱞ ᱟᱥᱲᱟ ᱨᱮᱭ ᱯᱟᱲᱦᱟᱣᱜ ᱠᱟᱱ ᱛᱟᱦᱮᱸᱱ ᱾ ᱵᱟᱥᱟ ᱰᱮᱨᱟ ᱥᱩᱯᱩᱨᱼᱥᱩᱯᱩᱨ ᱜᱮ ᱛᱟ.ᱠᱤᱱ ᱠᱷᱟ.ᱛᱤᱨ ᱢᱤᱫ ᱫᱤᱱ ᱫᱚ ᱟᱪᱠᱟ ᱜᱮ ᱵᱟᱥᱟ ᱰᱮᱨᱟ ᱥᱩᱨ ᱨᱮ ᱧᱟᱯᱟᱢ ᱠᱟᱛᱮ ᱟ.ᱰᱤ ᱜᱟᱱ ᱠᱤᱱ ᱨᱚᱯᱚᱲ ᱢᱤᱫ ᱮᱱᱟ ᱾ ᱚᱸᱰᱮ ᱛᱟᱦᱮᱸᱱ ᱛᱩᱞᱩᱡ ᱜᱮ ᱜᱩᱨᱩ ᱜᱚᱢᱠᱮ ᱛᱤᱱ ᱡᱚᱦᱚᱜ ᱚᱞ ᱪᱤᱠᱤᱭ ᱳᱰᱳᱠ ᱠᱮᱫᱼᱟ, ᱚᱱᱟᱨᱮ ᱥᱟᱣᱱᱟ ᱢᱩᱨᱢᱩ ᱦᱚᱸ ᱟ.ᱰᱤᱜᱟᱱ ᱜᱚᱲᱚ ᱥᱚᱦᱚᱫ ᱮ ᱛᱟᱦᱮᱸ ᱠᱟᱱᱟ ᱾

ᱜᱩᱨᱩ ᱪᱮᱢᱮᱫᱚᱜ ᱥᱟ.ᱛ ᱠᱟᱛᱮ ᱥᱟᱣᱱᱟ ᱢᱩᱨᱢᱩ ᱫᱚ ᱜᱟᱺᱵᱷᱟ.ᱨᱤᱭᱟ. ᱟᱥᱲᱟ ᱛᱮᱭ ᱨᱩᱣᱟ.ᱲ ᱦᱮᱡ ᱮᱱᱟ ᱾ ᱢᱤᱫ ᱥᱮᱨᱢᱟ ᱛᱟᱭᱚᱢ ᱠᱷᱟᱱ ᱜᱮ ᱑᱙᱒᱖ ᱥᱟᱞᱮᱨᱮ ᱵᱚᱰᱟᱢᱛᱟ.ᱲᱤᱭᱟ. ᱟᱥᱲᱟ ᱛᱮᱠᱚ ᱵᱚᱫᱚᱞ ᱠᱮᱫᱮᱭᱟ ᱾ ᱚᱸᱰᱮᱱ ᱠᱚ ᱦᱚᱲ ᱭᱩ. ᱯᱤ. ᱟᱥᱲᱟ ᱠᱚ ᱠᱷᱚᱡᱚᱜ ᱠᱟᱱ ᱛᱟᱦᱮᱸᱱ ᱾ ᱤᱱᱟ. ᱚᱠᱛᱚᱨᱮ ᱰᱟᱠᱛᱚᱨ ᱯᱤ. ᱠᱮ. ᱥᱮᱱ ᱟᱨ ᱫᱮᱣᱟᱱ ᱵᱚᱰᱟᱢᱛᱟ.ᱲᱤᱭᱟ. ᱠᱤᱱ ᱥᱮᱱ ᱞᱮᱱᱟ ᱾ ᱩᱱ ᱡᱚᱦᱚᱜ ᱥᱟᱣᱱᱟ ᱢᱩᱨᱢᱩ ᱩᱱᱠᱤᱱ ᱮ ᱱᱮᱦᱚᱨ ᱡᱚᱦᱟᱨ ᱠᱮᱫ ᱠᱤᱱᱟ ᱟᱨ ᱥᱚᱨᱠᱟᱨᱤ ᱰᱟᱠ ᱵᱟᱸᱜᱽᱞᱟ ᱟᱥᱲᱟ ᱞᱮᱠᱟ ᱠᱚ ᱵᱮᱵᱷᱟᱨ ᱠᱮᱜᱼᱟ ᱾ ᱚᱱᱟ ᱥᱟᱶᱛᱮ ᱞᱩᱜᱽᱲᱤ ᱛᱮᱧ ᱟᱨ ᱠᱟᱴ ᱠᱟ.ᱢᱤ ᱦᱚᱸᱠᱚ ᱮᱛᱚᱦᱚᱵ ᱠᱮᱫᱼᱟ ᱾ ᱪᱮᱢᱮᱧᱡᱩᱲᱤ ᱫᱮᱥ ᱢᱤᱫᱩᱱ ᱨᱮᱦᱚᱸ ᱥᱟᱣᱱᱟ ᱢᱩᱨᱢᱩ ᱫᱚᱭ ᱥᱮᱞᱮᱫ ᱛᱟᱦᱮᱸ ᱜᱮᱭᱟ ᱾

ᱜᱩᱨᱩ ᱜᱚᱢᱠᱮᱭ ᱵᱮᱱᱟᱣ ᱡᱩᱛ ᱟᱠᱟᱫ ᱚᱞ ᱪᱤᱠᱤ ᱫᱤᱥᱚᱢ ᱦᱚᱲ ᱥᱟᱢᱟᱝ ᱨᱮ ᱥᱚᱫᱚᱨ ᱞᱟ.ᱜᱤᱫ ᱢᱮᱬᱦᱮᱫ, ᱥᱤᱥᱟ, ᱟᱨ ᱯᱤᱛᱚᱞ ᱨᱮᱭᱟᱜ ᱪᱷᱟᱯᱟ ᱠᱚᱲ ᱠᱤᱱ ᱵᱮᱱᱟᱣ ᱠᱮᱫᱼᱟ ᱾ ᱚᱱᱟᱛᱮ ᱜᱩᱨᱩ ᱜᱚᱢᱠᱮ ᱟᱨ ᱥᱟᱣᱱᱟ ᱢᱩᱨᱢᱩ ᱫᱚ ᱑᱙᱓᱘ ᱥᱟᱞ ᱪᱟ.ᱛ ᱵᱚᱸᱜᱟᱨᱮ ᱵᱟ.ᱨᱯᱟᱫᱟ ᱨᱟᱡᱽ ᱥᱚᱨᱠᱟᱨ ᱩᱫᱮᱞᱟ ᱨᱮᱠᱤᱱ ᱥᱚᱫᱚᱨ ᱠᱮᱫᱼᱟ ᱾ ᱚᱱᱟ ᱛᱟᱭᱚᱢ ᱑᱙᱓᱙ ᱥᱟᱞᱮᱨᱮ ᱵᱚᱰᱟᱢᱛᱟ.ᱲᱤᱭᱟ. ᱟ.ᱛᱩᱨᱮ ᱚᱞ ᱥᱚᱢᱤᱛᱤ ᱩᱛᱱᱟ.ᱣ ᱞᱟ.ᱜᱤᱫ ᱢᱤᱫᱩᱱ ᱨᱮᱦᱚᱸ ᱥᱟᱣᱱᱟ ᱢᱩᱨᱢᱩ ᱫᱚᱭ ᱥᱮᱞᱮᱫ ᱞᱮᱱ ᱜᱮᱭᱟ ᱾ ᱚᱱᱟ ᱢᱤᱫᱩᱱ ᱨᱮ ᱥᱚᱦᱮᱫ ᱞᱮᱠᱟ ᱦᱚᱸᱭ ᱛᱟᱦᱮᱸ ᱠᱟᱱᱟ ᱾ ᱥᱚᱨᱠᱟᱨ ᱴᱷᱮᱱ ᱚᱞ ᱥᱚᱢᱤᱛᱤ ᱦᱚᱛᱮᱛᱮ ᱯᱩᱭᱞᱩ ᱟᱨᱫᱟᱥ ᱥᱟᱠᱟᱢ ᱮᱢᱚᱜ ᱡᱚᱦᱚᱜ ᱦᱚᱸ ᱥᱟᱣᱱᱟ ᱢᱩᱨᱢᱩ ᱫᱚ ᱥᱮᱞᱮᱫᱚᱜ ᱞᱟ.ᱜᱤᱫ ᱵᱟᱭ ᱯᱟ.ᱪᱷᱞᱟ. ᱞᱮᱱᱟ ᱾ ᱚᱱᱟ ᱛᱟᱭᱚᱢ ᱰᱟᱦᱟᱨᱰᱤ ᱢᱤᱫᱩᱱ ᱚᱞ ᱪᱤᱠᱤ ᱦᱚᱛᱮᱛᱮ ᱫᱮᱣᱟᱱ ᱥᱟᱦᱮᱵ ᱥᱟᱶ ᱜᱟᱞᱚᱪ ᱨᱮ ᱥᱮᱞᱮᱫ ᱮ ᱛᱟᱦᱮᱸ ᱠᱟᱱᱟ ᱾ ᱥᱟᱣᱱᱟ ᱢᱩᱨᱢᱩ ᱫᱚ ᱥᱟᱶᱛᱟ ᱠᱟ.ᱢᱤ ᱠᱷᱟ.ᱛᱤᱨ ᱪᱟ.ᱠᱨᱤ ᱦᱚᱸᱭ ᱵᱟ.ᱜᱤᱭᱟᱫ ᱛᱟᱦᱮᱸᱱ ᱾ ᱤᱠᱷᱟ.ᱱ ᱥᱚᱨᱠᱟᱨ ᱪᱟ.ᱠᱨᱤ ᱛᱩᱞᱩᱡ ᱜᱮ ᱥᱟᱶᱛᱟ ᱠᱟ.ᱢᱤ ᱫᱚᱭ ᱪᱷᱩᱴᱟ.ᱣ ᱞᱮᱱᱟ ᱾ ᱑᱙᱔᱐ ᱥᱟᱞᱮᱨᱮ ᱵᱚᱰᱟᱢᱛᱟ.ᱲᱤᱭᱟ. ᱟᱥᱲᱟ ᱠᱷᱚᱱ ᱥᱟᱨᱶᱰᱟ ᱯᱤᱲ ᱥᱚᱨᱜᱚᱰᱟ ᱟᱥᱲᱟ ᱛᱮ ᱟᱨ ᱚᱸᱰᱮ ᱵᱟᱨ ᱥᱮᱨᱢᱟ ᱛᱟᱦᱮᱸ ᱠᱟᱛᱮ ᱠᱚ ᱩᱪᱟ.ᱲ ᱠᱮᱫᱮᱭᱟ ᱛᱤᱨᱤᱝ ᱟᱥᱲᱟ ᱛᱮ ᱾ ᱩᱱ ᱫᱚ ᱜᱩᱨᱩ ᱜᱚᱢᱠᱮ ᱦᱚᱸ ᱨᱟᱭᱨᱚᱝᱯᱩᱨ ᱩᱱᱩᱥᱩᱞ ᱟᱥᱲᱟ ᱛᱮᱠᱚ ᱵᱩᱫᱽᱞᱤ ᱠᱮᱫᱮᱭᱟ ᱢᱟᱨᱟᱝ ᱢᱟᱪᱮᱛ ᱞᱮᱠᱟᱛᱮ ᱾ ᱚᱱᱟᱛᱮ ᱛᱟᱭᱚᱢ ᱫᱚ ᱵᱟ.ᱠᱤᱱ ᱧᱟᱯᱟᱢ ᱫᱟᱲᱮᱭᱟᱫᱼᱟ ᱾ ᱡᱟᱦᱟᱸ ᱠᱷᱟ.ᱛᱤᱨ ᱥᱟᱶᱛᱟ ᱠᱟ.ᱢᱤᱨᱮ ᱡᱟᱸᱜᱮ ᱫᱟᱨᱟᱢ ᱦᱮᱡ ᱮᱱ ᱠᱷᱟᱱ ᱵᱟᱱᱟ ᱦᱚᱲ ᱑᱙᱔᱖ ᱥᱟᱞᱮᱨᱮ ᱥᱚᱨᱠᱟᱨ ᱪᱟ.ᱠᱨᱤ ᱫᱚ ᱠᱤᱱ ᱵᱟ.ᱜᱤ ᱩᱛᱟ.ᱨᱟᱫᱼᱟ ᱾ ᱤᱱᱟ. ᱛᱟᱭᱚᱢ ᱟ.ᱫᱤᱵᱟ.ᱥᱤ ᱢᱚᱦᱟᱥᱚᱵᱷᱟ ᱨᱮᱠᱤᱱ ᱥᱮᱞᱮᱫ ᱮᱱᱟ ᱾ ᱚᱱᱟ ᱥᱚᱵᱷᱟᱨᱮ ᱥᱚᱦᱮᱫ ᱵᱷᱤᱛᱨᱤ ᱠᱷᱚᱱ ᱫᱚ ᱥᱟᱣᱱᱟ ᱢᱩᱨᱢᱩ ᱜᱮ ᱡᱷᱚᱛᱚ ᱦᱚᱲ ᱠᱷᱚᱱ ᱯᱩᱨᱩᱫᱷᱩᱞ ᱜᱚᱢᱠᱮ ᱞᱮᱠᱟᱛᱮᱭ ᱛᱟᱦᱮᱸ ᱠᱟᱱᱟ ᱾ ᱑᱙᱔᱖ ᱥᱟᱞᱮ ᱨᱮ ᱫᱚ ᱕᱐ ᱵᱚᱪᱷᱚᱨ ᱩᱢᱮᱨ ᱛᱟᱦᱮᱸ ᱠᱟᱱ ᱛᱟᱭᱟ ᱾ ᱚᱱᱟᱛᱮ ᱩᱱᱤ ᱫᱚ ᱟ.ᱫᱤᱵᱟ.ᱥᱤ ᱢᱚᱦᱟᱥᱚᱵᱷᱟ ᱠᱷᱚᱱ ᱜᱮ ᱥᱟᱶᱛᱟ ᱯᱩᱨᱩᱫᱷᱩᱞ ᱢᱮᱱᱛᱮ ᱠᱚ ᱢᱮᱛᱟ ᱫᱮᱭᱟ ᱾ᱥᱟ.ᱜᱟ.ᱭ ᱨᱮᱫᱚ ᱜᱩᱨᱩ ᱜᱚᱢᱠᱮ ᱴᱷᱮᱱ ᱫᱚᱭ ᱢᱟᱢᱚ ᱚᱪᱚᱜ ᱠᱷᱟ.ᱛᱤᱨ ᱫᱤᱥᱚᱢ ᱜᱚᱲᱚᱢ ᱦᱟᱲᱟᱢ ᱢᱮᱱᱛᱮ ᱡᱚᱭᱯᱟᱞ ᱥᱤᱝ ᱮ ᱵᱤᱠᱱᱟ.ᱣ ᱠᱮᱫᱮᱭᱟ ᱾

ᱟ.ᱫᱤᱵᱟ.ᱥᱤ ᱢᱚᱦᱟᱥᱚᱵᱷᱟ ᱨᱮᱱᱟᱜ ᱚᱯᱷᱤᱥ ᱵᱮᱨᱮᱫᱽ ᱞᱟ.ᱜᱤᱫ ᱠᱟᱫᱩᱣᱟᱬᱤ ᱟ.ᱛᱩ ᱥᱤᱢᱟ.ᱨᱮ ᱢᱮᱱᱟᱜ ᱢᱤᱫ ᱢᱟᱨᱟᱝ ᱴᱟᱺᱰᱤᱨᱮ ᱥᱤᱢᱟ. ᱫᱷᱤᱨᱤ ᱵᱤᱫ ᱠᱚ ᱪᱷᱩᱴᱟ.ᱣ ᱞᱮᱱ ᱚᱠᱛᱚᱨᱮ ᱥᱟᱣᱱᱟ ᱢᱩᱨᱢᱩ ᱫᱚ ᱢᱚᱬᱮ ᱜᱮᱞ ᱵᱟᱨ ᱥᱮᱨᱢᱟ ᱩᱢᱮᱨ ᱨᱮ ᱯᱩᱞᱤᱥ ᱥᱟᱵ ᱤᱫᱤ ᱠᱟᱛᱮ ᱡᱤᱦᱚᱞ ᱠᱷᱟᱱᱟ ᱨᱮᱠᱚ ᱥᱟᱸᱵᱟᱣ ᱠᱟᱫᱮᱭᱟ ᱾ ᱢᱚᱬᱮ ᱪᱟᱸᱫᱚ ᱜᱟᱱ ᱡᱤᱦᱚᱞ ᱨᱮ ᱫᱚᱦᱚ ᱠᱟᱛᱮ ᱠᱚ ᱟᱲᱟᱜ ᱠᱟᱫᱮᱭᱟ ᱾

ᱦᱚᱱ ᱦᱚᱯᱚᱱ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱫᱤᱥᱚᱢ ᱜᱚᱲᱚᱢ ᱦᱟᱲᱟᱢ ᱟᱨ ᱵᱩᱰᱤ ᱟᱭᱳ ᱨᱤᱱ ᱢᱚᱬᱮ ᱦᱚᱲ ᱦᱚᱯᱚᱱ ᱟᱨ ᱯᱮ ᱦᱚᱲ ᱫᱚ ᱦᱚᱯᱚᱱ ᱮᱨᱟ ᱠᱚ ᱛᱟᱦᱮᱸ ᱠᱟᱱᱟ ᱾

ᱵᱚᱸᱜᱟ ᱫᱤᱥᱚᱢ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱢᱟ.ᱱᱢᱤ ᱡᱟᱱᱟᱢ ᱨᱮᱭᱟᱜ ᱠᱟ.ᱢᱤ ᱫᱚ ᱫᱤᱥᱚᱢ ᱜᱚᱲᱚᱢ ᱦᱟᱲᱟᱢ ᱫᱚ ᱟᱡ ᱞᱟ.ᱜᱤᱫ ᱫᱚᱭ ᱯᱩᱨᱟ.ᱣ ᱟᱠᱟᱫ ᱛᱟᱦᱮᱸᱱ ᱾ ᱞᱟᱸᱜᱟ ᱤᱫᱤᱭᱮᱱ ᱛᱟᱭᱚᱢ ᱦᱚᱸ ᱑᱙᱖᱔ ᱥᱟᱞᱮᱨᱮ ᱟ.ᱫᱤᱵᱟ.ᱥᱤ ᱥᱟᱶᱛᱟ ᱥᱮᱪᱮᱫ ᱞᱟᱠᱪᱟᱨ ᱥᱮᱢᱞᱮᱫ ᱨᱮ ᱥᱚᱦᱮᱛ ᱞᱮᱠᱟᱭ ᱛᱟᱦᱮᱸ ᱮᱱᱟ ᱾ ᱟᱡᱟᱜ ᱜᱚᱲᱚ ᱟᱨ ᱠᱩᱨᱩᱢᱩᱴᱩ ᱛᱮᱜᱮ ᱨᱟᱭᱨᱚᱝᱯᱩᱨ ᱨᱮ ᱢᱩᱲᱩᱛ ᱚᱯᱷᱤᱥ ᱵᱮᱱᱟᱣ ᱮᱱᱟ ᱾ ᱚᱱᱟ ᱠᱚ ᱧᱮᱞ ᱠᱟᱛᱮ ᱟ.ᱰᱤ ᱨᱟ.ᱥᱠᱟ. ᱢᱚᱱᱮ ᱡᱤᱣᱤ ᱨᱮᱭ ᱟ.ᱭᱠᱟ.ᱣ ᱠᱮᱜᱼᱟ ᱾

᱑᱙᱖᱗ ᱥᱟᱞᱮᱨᱮ ᱯᱷᱟ.ᱜᱩᱱ ᱵᱚᱸᱜᱟ ᱨᱮᱱᱟᱜ ᱥᱟᱜᱮᱱ ᱥᱟᱠᱟᱢ ᱥᱩᱸᱫᱚᱨ ᱢᱚᱦᱚᱱ ᱦᱮᱸᱵᱽᱨᱚᱢ ᱟᱜ ᱥᱟᱯᱲᱟᱣ ᱦᱚᱛᱮᱛᱮ ᱥᱟᱶᱛᱟ ᱨᱤᱱ ᱢᱤᱫ ᱯᱩᱨᱩᱫᱷᱩᱞ ᱧᱩᱛᱩᱢ ᱛᱮ ᱥᱟᱛᱟᱢ ᱛᱟᱦᱮᱸ ᱮᱱᱟ ᱾ ᱚᱱᱟ ᱫᱚ ᱥᱟᱣᱱᱟ ᱢᱩᱨᱢᱩᱣᱟᱜ ᱡᱤᱭᱚᱱ ᱪᱩᱨᱤᱛ ᱪᱮᱛᱟᱱ ᱨᱮᱜᱮ ᱠᱷᱟᱴᱚ ᱢᱟᱪᱷᱟᱛᱮ ᱚᱞᱼᱛᱚᱞ ᱞᱮᱱᱟ ᱾

ᱵᱟ.ᱭᱼᱵᱟ.ᱭ ᱛᱮ ᱦᱚᱲᱢᱚ ᱠᱚ ᱞᱟᱸᱜᱟ ᱤᱫᱤᱭᱮᱱ ᱠᱷᱟᱱ ᱚᱠᱟ ᱥᱮᱫ ᱦᱚᱸ ᱵᱟᱭ ᱫᱟᱬᱟ ᱫᱟᱲᱮᱭᱟᱫᱼᱟ ᱾ ᱢᱤᱫ ᱫᱤᱱ ᱦᱤᱞᱚᱜ ᱫᱚ ᱚᱲᱟᱜᱨᱮ ᱮᱠᱞᱟ ᱜᱮᱭ ᱛᱟᱦᱮᱸ ᱠᱟᱱ ᱵᱮᱲᱟᱨᱮ ᱟᱪᱠᱟ ᱜᱮ ᱦᱤᱡᱩᱜ ᱯᱮ, ᱦᱤᱡᱩᱜ ᱯᱮ ᱢᱮᱱᱛᱮᱭ ᱦᱚᱦᱚ ᱠᱮᱫᱼᱟ ᱾ ᱛᱟᱭᱚᱢ ᱫᱚ ᱥᱩᱨ ᱠᱚᱨᱮ ᱠᱚ ᱛᱟᱦᱮᱸ ᱠᱟᱱ ᱚᱲᱟᱜ ᱦᱚᱲ ᱠᱚᱠᱚ ᱦᱮᱡ ᱥᱩᱨ ᱮᱱ ᱠᱷᱟᱱ ᱢᱮᱛᱟ ᱠᱚ ᱠᱟᱱᱟᱭ, " ᱦᱤᱛᱟ.ᱞ ᱯᱚᱛᱚᱵ ᱟ.ᱜᱩ ᱟ.ᱧ ᱯᱮ ᱾" ᱦᱤᱛᱟ.ᱞ ᱯᱚᱛᱚᱵ ᱠᱚ ᱟ.ᱜᱩ ᱟᱫᱮ ᱠᱷᱟᱱ ᱵᱟᱝ ᱯᱟᱲᱦᱟᱣ ᱠᱟᱛᱮ ᱠᱚᱲᱟᱢ ᱨᱮᱭ ᱫᱚᱦᱚ ᱠᱮᱜᱼᱟ ᱾ ᱤᱱᱟ. ᱚᱠᱛᱚᱨᱮ ᱫᱟᱨᱮ ᱥᱟᱠᱟᱢ ᱦᱚᱸ ᱡᱟ.ᱯᱤᱫ ᱟᱠᱟᱫ ᱞᱮᱠᱟ ᱛᱷᱤᱨ ᱟᱠᱟᱱ ᱛᱟᱦᱮᱸᱱ ᱾ ᱦᱤᱛᱟ.ᱞ ᱯᱚᱛᱚᱵ ᱠᱚᱲᱟᱢ ᱨᱮᱭ ᱦᱟ.ᱲᱩᱵ ᱠᱮᱫ ᱠᱷᱟᱱ ᱜᱮ ᱟᱡᱟᱜ ᱡᱤᱣᱤᱵᱟ.ᱛᱤ ᱫᱚ ᱤᱬᱤᱡ ᱮᱱᱟ ᱾ ᱤᱱᱟ. ᱛᱟᱭᱚᱢ ᱟ.ᱰᱤ ᱩᱞᱟ.ᱴ ᱠᱟᱪᱟᱲ ᱮ ᱦᱚᱭ ᱫᱟᱜ ᱠᱮᱫᱼᱟ ᱾ ᱚᱱᱟ ᱫᱤᱱ ᱫᱚ ᱛᱟᱦᱮᱸ ᱠᱟᱱᱟ ᱤᱸ. ᱢᱟ. ᱑᱙. ᱔. ᱑᱙᱘᱑ ᱦᱤᱛ ᱵᱟ.ᱥᱭᱟ.ᱢ ᱑᱐/᱑᱑ ᱴᱟᱲᱟᱝ ᱚᱠᱛᱚ ᱞᱮᱠᱟ ᱾

ᱥᱟᱣᱱᱟ ᱢᱩᱨᱢᱩ ᱫᱚᱭ ᱵᱚᱸᱜᱟ ᱫᱤᱥᱚᱢ ᱮᱱ ᱨᱮᱦᱚᱸ ᱟᱡᱟᱜ ᱠᱟ.ᱢᱤ ᱫᱚ ᱟᱵᱚᱣᱟᱜ ᱢᱮᱫ ᱥᱟᱢᱟᱝᱨᱮ ᱟᱨ ᱟᱡᱟᱜ ᱡᱤᱭᱚᱱ ᱪᱩᱨᱤᱛ ᱫᱚ ᱟᱵᱚ ᱠᱚ ᱛᱟᱞᱟᱨᱮ ᱡᱟᱭᱡᱩᱜᱽ ᱡᱤᱣᱤᱫ ᱠᱟᱛᱮ ᱛᱟᱦᱮᱸ ᱫᱚᱦᱚᱜᱼᱟ ᱾

ᱥᱟᱹᱠᱷᱭᱟᱹᱛ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

  1. ᱥᱟᱣᱱᱟ ᱢᱩᱨᱢᱩ (ᱯᱩᱭᱞᱩ ed.). ᱵᱟᱨᱤᱯᱚᱫᱟ: ᱦᱟᱸᱥ ᱦᱟᱹᱥᱞᱤ ᱯᱟᱨᱥᱟᱞᱮᱛ. ᱓᱐ ᱡᱩᱱ ᱒᱐᱑᱙. p. ᱒᱑. ISBN 978-81-940541-3-9. {{cite book}}: |first1= missing |last1= (help); Check date values in: |date= (help)