ᱥᱟᱨᱡᱚᱢ ᱵᱤᱨ

ᱣᱤᱠᱤᱯᱤᱰᱤᱭᱟ, ᱨᱟᱲᱟ ᱜᱮᱭᱟᱱ ᱯᱩᱛᱷᱤ ᱠᱷᱚᱱ

ᱥᱟᱨᱡᱚᱢ ᱵᱤᱨ ᱫᱚ ᱞᱟᱥᱟᱬᱦᱮᱫ ᱵᱤᱨ ᱠᱟᱱᱟ ᱾ ᱫᱷᱟᱹᱨᱛᱤ ᱨᱮᱱᱟᱜ ᱥᱤᱧᱚᱛ ᱫᱤᱥᱚᱢ ᱨᱮ ᱵᱟᱹᱲᱛᱤ ᱫᱚ ᱢᱮᱱᱟᱜ-ᱟ ᱾ ᱱᱚᱶᱟ ᱵᱤᱨ ᱨᱮ ᱫᱷᱟᱹᱨᱛᱤ ᱨᱤᱱ ᱡᱟᱹᱱᱤ ᱠᱚ ᱵᱟᱹᱲᱛᱤ ᱱᱟᱭᱠᱟᱹᱨ ᱠᱚ ᱧᱟᱢᱟ ᱾ ᱵᱚᱝᱜᱟ ᱵᱳᱨᱳ ᱠᱚᱣᱟᱜ ᱛᱟᱦᱮᱱ ᱟᱨ ᱟᱬᱜᱚ ᱨᱟᱠᱟᱵ ᱴᱷᱟᱶ ᱠᱟᱱᱟ ᱾ ᱥᱟᱨᱪᱟ ᱥᱚᱱᱚᱛ ᱵᱩᱴᱟᱹ ᱠᱟᱱᱟ ᱾

ᱥᱮᱨᱮᱧ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱫᱟᱨᱮ ᱢᱟ ᱫᱟᱨᱮ ᱦᱳ ᱥᱟᱨᱡᱚᱢ ᱫᱟᱨᱮ ,ᱵᱤᱨ ᱢᱟ ᱵᱤᱨ ᱦᱳ ᱥᱟᱨᱡᱚᱢ ᱵᱤᱨ ᱾ ᱫᱟᱨᱮ ᱠᱮᱫ-ᱟᱢ ᱥᱟᱨ ᱛᱮ ᱥᱟᱨᱡᱚᱢ ᱫᱟᱨᱮ , ᱵᱤ~ᱨ ᱮᱱᱟᱢ ᱥᱟᱨ ᱛᱮ ᱥᱟᱹᱨᱤᱡᱚᱝ ᱵᱤᱨ ᱾

ᱜᱚᱲᱦᱚᱱ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱥᱟᱨᱡᱚᱢ ᱵᱤᱨ ᱨᱮ ᱫᱚ ᱥᱟᱨᱡᱚᱢ ᱫᱟᱨᱮ ᱫᱟᱹᱨᱤᱭᱟᱹ ᱢᱮᱱᱟᱜ-ᱟ ᱾ ᱥᱟᱨᱡᱚᱱ ᱫᱟᱨᱮ ᱠᱚ ᱫᱚ ᱩᱥᱩᱞ ᱩᱥᱩᱞ ᱫᱟᱨᱮᱜ-ᱟ ᱾ ᱚᱱᱟ ᱠᱚᱫᱚ ᱵᱟᱹᱲᱛᱤ ᱵᱟᱝ ᱰᱟᱹᱨᱩᱜ-ᱟ ᱾ ᱥᱟᱨᱡᱚᱢ ᱵᱤᱨ ᱨᱮᱱᱟᱜ ᱥᱟᱨᱡᱚᱢ ᱫᱟᱨᱮ ᱠᱚᱫᱚ ᱥᱩᱨ ᱥᱩᱨ ᱜᱮ ᱛᱟᱦᱮᱸᱱᱟ ᱾ ᱥᱟᱨᱡᱚᱢ ᱫᱟᱨᱮ ᱞᱟᱛᱟᱨ ᱨᱮ ᱟᱨ ᱥᱩᱨ ᱠᱚᱨᱮ ᱮᱴᱟᱜ ᱫᱟᱨᱮ ᱠᱚᱦᱚᱸ ᱱᱟᱯᱟᱭ ᱛᱮᱜᱮ ᱦᱟᱨᱟᱜ-ᱟ ᱾ ᱥᱟᱨᱡᱚᱢ ᱫᱟᱨᱮ ᱫᱚ ᱵᱟᱝ ᱪᱤᱠᱟᱹᱬᱟ ᱾ ᱵᱟᱠᱞᱟᱜ ᱫᱚ ᱫᱟᱹᱨᱭᱟ ᱜᱮᱭᱟ ᱾ ᱥᱟᱠᱟᱢ ᱫᱚ ᱟᱹᱰᱤ ᱪᱚᱨᱚᱠᱟ ᱾ ᱰᱷᱟᱞᱠᱟ ᱰᱷᱟᱞᱠᱟ ᱥᱟᱠᱟᱢᱚᱜ-ᱟ ᱾

ᱜᱩᱱ ᱛᱮᱫ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱥᱟᱨᱡᱚᱢ ᱵᱤᱨ ᱨᱮᱱᱟᱜ ᱜᱩᱱ ᱫᱚ ᱟᱹᱰᱤ ᱜᱮ ᱦᱟᱢᱟᱞᱟ ᱾ ᱫᱟᱨᱮ ᱠᱷᱚᱱ ᱚᱰᱚᱠᱚᱜ ᱠᱟᱱ ᱦᱚᱭ ᱛᱮᱢᱟ ᱫᱷᱟᱹᱨᱛᱤ ᱥᱚᱸᱫᱷᱟᱬᱟᱭ ᱾ ᱡᱟᱦᱟᱸ ᱥᱚᱸᱫᱷᱟᱬ ᱛᱮ ᱵᱚᱝᱜᱟ ᱠᱚᱠᱚ ᱜᱩᱨᱞᱟᱣ ᱥᱮᱴᱮᱨᱚᱜ-ᱟ ᱾ ᱥᱟᱨᱡᱚᱢ ᱨᱟᱥᱟ ᱫᱚ ᱨᱟᱱ ᱨᱮ ᱜᱟᱱᱚᱜ-ᱟ ᱾ ᱥᱟᱨᱡᱚᱢ ᱡᱮᱨ ᱛᱮᱫ ᱫᱚ ᱫᱷᱩᱬᱟᱹ ᱠᱚ ᱢᱮᱛᱟᱜ-ᱟ ᱾ ᱚᱱᱟ ᱟᱛᱟᱨ ᱞᱮᱠᱷᱟᱱ ᱵᱟᱹᱲᱤᱡᱟᱜ ᱥᱟᱦᱟᱜ-ᱟᱨ ᱵᱚᱝᱜᱟ ᱠᱚ ᱥᱩᱨᱩᱜ-ᱟ ᱾ ᱵᱟᱞᱮ ᱵᱟᱠᱞᱟᱜ ᱫᱚ ᱵᱟᱵᱮᱨ ᱥᱩᱛᱟᱹᱢ ᱞᱮᱠᱟᱭ ᱠᱟᱹᱢᱤᱭᱟ,ᱫᱮᱥ ᱜᱤᱨᱟᱹ ᱥᱮᱸᱫᱽᱨᱟ ᱜᱤᱨᱟᱹ ᱠᱚ ᱠᱚ ᱛᱚᱞᱟ ᱾ ᱵᱟᱠᱞᱟᱜ ᱛᱮᱫ ᱫᱚ ᱥᱟᱦᱟᱱ ᱜᱟᱱᱚᱜ-ᱟ ᱾ ᱚᱲᱟᱜ ᱪᱩᱞᱦᱟᱹ ᱠᱚᱨᱮ ᱴᱷᱮᱠᱟᱣ ᱞᱮᱠᱷᱟᱱ ᱚᱲᱟᱜ ᱡᱟᱠᱟᱛ ᱯᱟᱨᱪᱟᱜ-ᱟ ᱾ ᱥᱮᱫᱟᱭ ᱦᱚᱲ ᱠᱚ ᱥᱟᱨᱡᱚᱢ ᱵᱟᱠᱞᱟᱜ ᱨᱮ ᱡᱤᱞ ᱯᱚᱴᱚᱢ ᱠᱟᱛᱮ ᱠᱚ ᱨᱟᱯᱟᱜᱟ ᱾ ᱚᱱᱟ ᱡᱤᱞ ᱡᱚᱢ ᱞᱮᱠᱷᱟᱱ ᱨᱟᱱ ᱞᱮᱠᱟᱭ ᱠᱟᱹᱢᱤᱭᱟᱸ ᱾ ᱥᱟᱠᱟᱢ ᱛᱮᱫ ᱢᱟ ᱯᱟᱛᱲᱟ,ᱯᱷᱩᱲᱩᱜ,ᱪᱩᱠᱛᱤ,ᱵᱷᱟᱹᱱᱛᱩᱡ,ᱠᱷᱟᱞᱟᱜ,ᱥᱟᱨᱛᱟᱞ,ᱪᱩᱠᱬᱩᱡ,ᱨᱮᱫ,ᱯᱩᱸᱜᱤ, ᱮᱢᱟᱱ ᱜᱟᱱᱚᱜ-ᱟ ᱾ ᱵᱚᱝᱜᱟ ᱵᱳᱨᱳ ᱠᱟᱹᱢᱤ ᱨᱮᱫᱚ ᱥᱟᱨᱡᱚᱢ ᱥᱟᱠᱟᱢ ᱜᱮ ᱞᱟᱜᱟᱣᱜ-ᱟ ᱾ ᱡᱚᱲ ᱥᱤᱨ ᱥᱟᱠᱟᱢ ᱫᱚ ᱵᱟᱯᱞᱟ ᱡᱚᱠᱷᱟᱜ ᱞᱟᱜᱟᱣᱜ-ᱟ ᱾ ᱡᱚᱲ ᱥᱤᱨ ᱥᱟᱠᱟᱢ ᱵᱟᱯᱞᱟ ᱨᱮ ᱞᱟᱜᱟᱣ ᱞᱮᱠᱷᱟᱱ ᱡᱚᱲ ᱵᱟᱹᱠᱤᱱ ᱵᱤᱡᱚᱲᱚ-ᱟ ᱾ ᱠᱩᱲᱤ ᱜᱤᱫᱨᱟᱹ ᱠᱚᱲᱟ ᱜᱤᱫᱽᱨᱟᱹ ᱵᱟᱨᱟᱠ ᱛᱮᱠᱚ ᱡᱟᱱᱟᱢᱚᱜ-ᱟ ᱾ ᱱᱚᱶᱟ ᱢᱤᱫᱴᱟᱹᱝ ᱥᱟᱨᱡᱚᱢ ᱫᱟᱨᱮ ᱨᱮᱱᱟᱜ ᱟᱹᱰᱤ ᱢᱟᱨᱟᱝ ᱛᱷᱩᱢ ᱠᱟᱱᱟ ᱾ ᱢᱟᱨᱟᱝ ᱵᱳᱨᱳ ᱡᱟᱦᱮᱨ ᱟᱭᱳᱣᱟᱜ ᱛᱷᱩᱢ ᱠᱟᱱᱟ ᱾ ᱫᱟᱨᱮ ᱛᱮᱫ ᱫᱚ ᱠᱷᱩᱱᱴᱤ,ᱯᱟᱹᱲ,ᱥᱮᱱᱮᱨ,ᱢᱩᱫᱷᱩᱱ,ᱠᱟᱢᱵᱽᱲᱟ,ᱠᱚᱞᱠᱟᱸᱰ,ᱪᱟᱨᱮᱡ ᱵᱟᱛᱟ,ᱜᱷᱩᱲᱭᱟ,ᱩᱨᱟᱹ,ᱥᱤᱞᱯᱤᱧ,ᱵᱚᱸᱫᱷᱚ,ᱩᱪᱤ,ᱢᱟᱹᱪᱤ,ᱥᱟᱜᱟᱲ,ᱦᱩᱫᱟᱹᱲ,ᱟᱨᱟᱬ,ᱤᱥᱤ,ᱱᱟᱦᱮᱞ,ᱠᱟᱬᱵᱟ,ᱟᱬᱜᱚᱢ,ᱢᱟᱨᱟᱬ,ᱡᱩᱣᱟ,ᱰᱟᱸᱰᱚᱢ,ᱦᱟᱯᱟ,ᱯᱟᱭᱬᱟ,ᱰᱷᱤᱝᱠᱤ,ᱥᱟᱸᱵᱷᱮ,ᱠᱟᱸᱰᱤ,ᱫᱤᱱᱟᱢ ᱫᱟᱹᱛᱟᱹᱱᱤ ᱮᱢᱟᱱ ᱠᱚᱨᱮ ᱞᱟᱜᱟᱣᱜ-ᱟ ᱾ ᱵᱟᱦᱟ ᱫᱚ ᱵᱚᱝᱜᱟᱨᱮ ᱞᱟᱜᱟᱣᱜ-ᱟ ᱾ ᱯᱩᱭᱞᱩ ᱫᱚ ᱥᱟᱨᱡᱚᱢ ᱵᱟᱦᱟ ᱜᱮᱵᱚ ᱵᱚᱝᱜᱟᱭᱟ ᱾ ᱮᱱ ᱮᱱᱟᱝ ᱱᱟᱶᱟ ᱵᱟᱦᱟ ᱱᱟᱶᱟ ᱥᱟᱠᱟᱢ ᱡᱚᱢ ᱜᱟᱱᱚᱜ-ᱟ ᱾ ᱡᱚ ᱫᱚ ᱵᱚ ᱡᱚᱢᱟ ᱛᱤᱠᱤ ᱠᱟᱛᱮ ᱞᱟᱴᱷᱮ ᱠᱟᱛᱮ ᱾ ᱨᱟᱱ ᱦᱚᱸᱠᱚ ᱨᱟᱱ ᱜᱮᱭᱟ ᱾

ᱥᱟ.ᱠᱷᱭᱟ.ᱛ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]