ᱥᱣᱟᱢᱤ ᱵᱤᱵᱮᱠᱟᱱᱚᱱᱫᱚ

ᱣᱤᱠᱤᱯᱤᱰᱤᱭᱟ, ᱨᱟᱲᱟ ᱜᱮᱭᱟᱱ ᱯᱩᱛᱷᱤ ᱠᱷᱚᱱ
ᱥᱣᱟᱢᱤ ᱵᱤᱵᱮᱠᱟᱱᱚᱱᱫᱚ

ᱥᱣᱟᱢᱤ ᱵᱤᱵᱮᱠᱟᱱᱚᱱᱫᱚ

ᱫᱷᱟ.ᱨᱛᱤ ᱨᱮ ᱛᱤᱱ ᱡᱚᱦᱚᱜ ᱫᱷᱚᱨᱚᱢ ᱢᱟᱞᱚᱴᱚᱜ ᱚᱠᱛᱚ ᱥᱮᱴᱮᱨᱚᱜᱼᱟ, ᱢᱩᱨᱩᱠ ᱵᱩᱫᱷᱤ ᱟᱨ ᱵᱟ.ᱲᱤᱡ ᱵᱮᱵᱷᱟᱨ ᱛᱮ ᱢᱟ.ᱱᱢᱤ ᱥᱟᱶᱛᱟ ᱨᱮ ᱥᱚᱱᱚᱛ ᱛᱟᱲᱟᱢ ᱰᱟᱦᱟᱨ ᱠᱚ ᱵᱟ.ᱲᱤᱡᱟ, ᱩᱱ ᱵᱮᱲᱟᱨᱮ ᱢᱟᱦᱟᱱ ᱢᱟ.ᱱᱢᱤ ᱥᱟᱶᱛᱟ ᱨᱮᱠᱚ ᱚᱯᱮᱞᱚᱜᱼᱟ ᱾ ᱢᱟ.ᱱᱢᱤ ᱥᱟᱶᱛᱟ ᱨᱮ ᱱᱟᱶᱟ ᱥᱮᱦᱮᱫ ᱧᱮᱞ ᱦᱚᱪᱚ ᱠᱟᱛᱮ ᱫᱷᱚᱨᱚᱢ ᱠᱚ ᱛᱷᱟᱯᱚᱱ ᱨᱩᱣᱟ.ᱲᱟ ᱾ ᱪᱮᱸᱜᱷᱟᱜ ᱨᱮᱭᱟᱜ ᱱᱟᱶᱟ ᱟᱸᱥ ᱪᱷᱟᱨᱟᱣ ᱠᱟᱛᱮ ᱥᱟᱶᱛᱟ ᱨᱮ ᱥᱟ.ᱱᱛᱤ, ᱥᱚᱱᱚᱛ ᱟᱨ ᱥᱤᱯᱤᱵᱤᱞ ᱨᱮᱭᱟᱜ ᱦᱚᱭᱼᱦᱤᱥᱤᱫ ᱠᱚ ᱦᱟᱞᱟᱭ ᱦᱚᱪᱚᱭᱟ ᱾ ᱥᱣᱟᱢᱤ ᱵᱤᱵᱮᱠᱟᱱᱚᱱᱫᱚ ᱦᱚᱸ ᱱᱚᱝᱠᱟᱱᱤᱡ ᱜᱮ ᱢᱤᱫ ᱥᱮᱬᱟᱛ ᱢᱟ.ᱱᱢᱤ ᱠᱟᱱᱟᱭ ᱾

ᱡᱟᱱᱟᱢ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱵᱤᱵᱮᱠᱟᱱᱚᱱᱫᱚ ᱫᱚ ᱑᱘᱖᱓ ᱥᱟᱞᱮᱨᱮ ᱡᱟᱱᱩᱣᱟᱨᱤ ᱑᱒ ᱢᱟᱺᱦᱤᱛ ᱦᱤᱞᱚᱜ ᱠᱚᱞᱠᱟᱛᱟ ᱨᱮᱭᱟᱜ ᱮᱛᱚᱢ ᱯᱟᱦᱴᱟ ᱨᱮ ᱢᱮᱱᱟᱜ ᱥᱤᱢᱩᱲᱤᱭᱟ. ᱟ.ᱛᱩᱨᱮᱭ ᱡᱟᱱᱟᱢ ᱞᱮᱱᱟ ᱾ ᱜᱤᱫᱽᱨᱟ. ᱨᱮᱫᱚ ᱩᱱᱤ ᱱᱚᱨᱮᱸᱫᱨᱚ ᱱᱟᱛᱷ ᱧᱩᱛᱩᱢ ᱛᱮ ᱩᱯᱨᱩᱢ ᱛᱟᱦᱮᱸ ᱠᱟᱱ ᱛᱟᱭᱟ ᱾ ᱟᱡᱤᱡ ᱡᱟᱱᱟᱢ ᱵᱟᱵᱟᱦᱟᱜ ᱧᱩᱛᱩᱢ ᱫᱚ ᱵᱤᱥᱣᱚᱱᱟᱛᱷ ᱫᱳᱛ ᱟᱨ ᱟᱨ ᱟᱭᱳᱣᱟᱛ ᱧᱩᱛᱩᱢ ᱫᱚ ᱢᱟ.ᱱᱤᱡ ᱵᱷᱩᱵᱚᱱᱮᱥᱣᱚᱨᱤ ᱫᱳᱛ ᱛᱟᱦᱮᱸ ᱠᱟᱱᱟ ᱾

ᱜᱤᱫᱽᱨᱟ. ᱚᱠᱛᱚ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱜᱤᱫᱽᱨᱟ. ᱚᱠᱛᱚ ᱨᱮᱫᱚ ᱱᱚᱨᱮᱫᱨᱚ ᱟ.ᱰᱤ ᱜᱮ ᱦᱟ.ᱲᱩᱣᱟ.ᱭ ᱛᱟᱦᱮᱸ ᱠᱟᱱᱟ ᱾ ᱠᱟ.ᱴᱤᱡ ᱪᱩᱞᱩᱜ ᱠᱟᱛᱷᱟᱨᱮ ᱩᱱᱤ ᱟ.ᱰᱤ ᱵᱟ.ᱲᱛᱤ ᱨᱟ.ᱜᱤ ᱠᱟᱛᱮ ᱚᱲᱟᱜ ᱨᱮᱭᱟᱜ ᱡᱤᱱᱤᱥ ᱯᱚᱛᱚᱨ ᱠᱚᱨ ᱨᱟ.ᱯᱩᱫ ᱠᱷᱤᱛᱤ ᱪᱟᱵᱟᱭᱮᱫ ᱛᱟᱦᱮᱸᱱ ᱾ ᱤᱱᱟ. ᱚᱠᱛᱚ ᱨᱮ ᱟᱡ ᱟᱭᱳ ᱫᱚ ᱥᱤᱵᱚᱣᱟᱜ ᱧᱩᱛᱩᱢ ᱮ ᱵᱟᱠᱷᱮᱬ ᱛᱟᱦᱮᱸᱱ ᱾ ᱥᱤᱵᱚᱣᱟᱜ ᱧᱩᱛᱩᱢ ᱟᱸᱡᱚᱢ ᱠᱟᱛᱮ ᱱᱚᱨᱮᱸᱫᱽᱨᱚ ᱟ.ᱰᱤ ᱵᱮᱲᱟ ᱨᱮᱜᱮᱭ ᱱᱮᱢᱚᱸᱥ ᱜᱚᱫᱚᱜ ᱛᱟᱦᱮᱸᱱ ᱾ ᱵᱟ.ᱭᱼᱵᱟ.ᱭ ᱛᱮ ᱥᱤᱵᱚ ᱪᱮᱛᱟᱱ ᱨᱮ ᱠᱚᱲᱟ ᱜᱤᱫᱽᱨᱟ. ᱱᱚᱨᱮᱱᱫᱨᱚᱣᱟᱜ ᱯᱟ.ᱛᱤᱭᱟ.ᱣ ᱵᱟ.ᱲᱛᱤ ᱤᱫᱤᱭᱮᱱᱟ ᱾

ᱥᱮᱪᱮᱫ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱱᱚᱨᱮᱱᱫᱨᱚᱣᱟᱜ ᱮᱛᱚᱦᱚᱵ ᱥᱮᱪᱮᱫ ᱫᱚ ᱩᱱᱤ ᱞᱟ.ᱜᱤᱫ ᱢᱤᱫ ᱚᱲᱟᱜ ᱢᱟᱪᱮᱛ ᱜᱮᱠᱚ ᱡᱚᱜᱟᱲ ᱠᱮᱫᱮᱭᱟ ᱾ ᱤᱠᱷᱟ.ᱱ ᱦᱟ.ᱲᱩᱣᱟ. ᱟᱨ ᱚᱡᱽ ᱛᱮᱭ ᱯᱮᱨᱮᱡ ᱟᱠᱟᱱ ᱱᱚᱨᱮᱱᱫᱽᱨᱚ ᱥᱮᱪᱮᱫ ᱮᱢᱟᱦᱟᱭ ᱞᱟ.ᱜᱤᱫ ᱩᱱᱤ ᱯᱩᱭᱞᱩ ᱫᱚ ᱵᱟᱭ ᱫᱟᱲᱮᱭᱟᱫᱼᱟ ᱾ ᱡᱟᱦᱟᱸ ᱞᱮᱠᱟᱛᱮ ᱮᱛᱚᱦᱚᱵ ᱥᱮᱪᱮᱫ ᱯᱩᱨᱟ.ᱣ ᱠᱟᱛᱮ ᱩᱱᱤ ᱵᱤᱫᱽᱭᱟᱥᱟᱜᱚᱨ ᱫᱟᱨᱟᱭ ᱛᱮ ᱵᱮᱨᱮᱫ ᱞᱮᱱ ᱢᱮᱴᱨᱚᱯᱚᱞᱤᱴᱟᱱ ᱟᱥᱲᱟᱭ ᱜᱚᱭᱚᱱ ᱮᱱᱟ ᱾ ᱱᱚᱶᱟ ᱟᱥᱲᱟ ᱨᱮ ᱩᱱᱤ ᱱᱟᱯᱟᱭ ᱵᱮᱵᱷᱟᱨ ᱥᱚᱫᱚᱨ ᱠᱟᱛᱮ ᱢᱟᱪᱮᱛ ᱟᱨ ᱪᱮᱛᱮᱫᱤᱭᱟ. ᱠᱚᱴᱷᱮᱱ ᱱᱟᱯᱟᱭ ᱧᱩᱛᱩᱢ ᱮ ᱟᱨᱡᱟᱣ ᱠᱮᱜᱼᱟ ᱾

᱑᱘᱘᱐ ᱥᱟᱞᱮᱨᱮ ᱱᱚᱨᱮᱱᱫᱨᱚ ᱵᱷᱤᱥᱮᱞᱮᱫᱚᱜ ᱵᱤᱱᱤᱰ ᱨᱮ ᱯᱩᱭᱞᱩ ᱴᱷᱟᱶ ᱟᱢᱮᱴ ᱠᱟᱛᱮ ᱯᱨᱮᱥᱤᱰᱮᱱᱥᱤ ᱵᱤᱨᱫᱟ.ᱜᱟᱲ ᱨᱮᱭ ᱯᱟᱲᱦᱟᱣ ᱮᱱᱟ ᱾ ᱤᱱᱟ. ᱛᱟᱭᱚᱢ ᱩᱱᱤ ᱡᱮᱱᱮᱨᱟᱞ ᱟᱥᱮᱢᱵᱞᱤ ᱤᱸᱥᱴᱤᱪᱩᱥᱚᱱ ᱨᱮ ᱧᱩᱛᱩᱢ ᱮ ᱚᱞ ᱠᱮᱫ ᱛᱟᱭᱟ ᱾ ᱑᱘᱘᱒ ᱨᱮ ᱩᱱᱤ ᱮᱯ. ᱮ. ᱟᱨ ᱑᱘᱘᱔ ᱨᱮ ᱩᱱᱤ ᱵᱤ. ᱮ. ᱭ ᱥᱟ.ᱛ ᱠᱮᱜᱼᱟ ᱾ ᱩᱱᱤ ᱵᱤ. ᱮᱞ. ᱯᱟᱲᱦᱟᱣᱜ ᱞᱟ.ᱜᱤᱫ ᱮ ᱮᱛᱚᱦᱚᱵ ᱞᱮᱜᱼᱟ ᱤᱠᱷᱟ.ᱱ ᱵᱤᱱᱤᱰ ᱫᱚ ᱵᱟᱭ ᱮᱢ ᱞᱮᱜᱼᱟ ᱾

ᱯᱟᱲᱦᱟᱣ ᱨᱮ ᱱᱤᱥᱟ.[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱜᱤᱫᱽᱨᱟ.ᱠᱷᱚᱱ ᱜᱮ ᱱᱚᱨᱮᱱᱫᱨᱚ ᱚᱞ ᱯᱟᱲᱦᱟᱣ ᱨᱮ ᱟ.ᱰᱤ ᱡᱩᱨ ᱢᱚᱱᱮ ᱛᱟᱦᱮᱸ ᱠᱟᱱ ᱛᱟᱭᱟ ᱾ ᱥᱮᱪᱮᱫ ᱧᱟᱢᱚᱜ ᱞᱮᱠᱟᱱ ᱯᱚᱛᱚᱵ ᱠᱚ ᱩᱰᱤᱭ ᱯᱟᱲᱦᱟᱣ ᱛᱟᱦᱮᱸᱱ ᱾ ᱯᱚᱛᱚᱵ ᱯᱟᱲᱦᱟᱣ ᱠᱟᱛᱮ ᱵᱟ.ᱲᱛᱤ ᱠᱷᱚᱱ ᱵᱟ.ᱲᱛᱤ ᱵᱟᱰᱟᱭ ᱞᱟ.ᱜᱤᱫ ᱨᱤᱠᱟ. ᱛᱟᱦᱮᱸ ᱠᱟᱱ ᱛᱟᱭᱟ ᱾ ᱩᱭᱦᱟ.ᱨ ᱫᱟᱲᱮ ᱩᱱᱤᱭᱟᱜ ᱮᱴᱟᱜ ᱜᱤᱫᱽᱨᱟ. ᱠᱷᱚᱱ ᱫᱚ ᱵᱷᱮᱜᱟᱨ ᱜᱮ ᱛᱟᱦᱮᱸ ᱠᱟᱱᱟ ᱾ ᱯᱚᱛᱚᱵ ᱯᱩᱛᱷᱤ ᱥᱟᱶᱛᱮ ᱫᱟᱢᱟᱱ ᱜᱟᱢᱟᱢ ᱯᱩᱛᱷᱤ ᱠᱚᱦᱚᱸ ᱩᱱᱤᱭ ᱯᱟᱲᱦᱟᱣ ᱛᱟᱦᱮᱸᱱ ᱾ ᱩᱱᱤ ᱡᱟᱦᱟᱸ ᱜᱮ ᱢᱤᱫ ᱫᱷᱟᱣ ᱮ ᱯᱟᱲᱦᱟᱣ ᱛᱟᱦᱮᱸᱫ ᱚᱱᱟ ᱡᱤᱭᱚᱱ ᱥᱟᱨᱟᱭ ᱩᱭᱦᱟ.ᱨ ᱫᱚᱦᱚᱭ ᱛᱟᱦᱮᱸᱫ ᱾ ᱜᱮᱭᱟᱱ ᱟᱨᱡᱟᱣ ᱞᱟ.ᱜᱤᱫ ᱩᱱᱤ ᱥᱟᱶᱦᱮᱫ, ᱱᱟᱜᱟᱢ, ᱥᱟᱱᱟᱥ, ᱟᱨ ᱥᱟᱬᱮᱥ ᱯᱚᱛᱚᱵ ᱮᱢᱟᱱ ᱮ ᱯᱟᱲᱦᱟᱣ ᱛᱟᱦᱮᱸᱫ ᱾ ᱱᱚᱶᱟ ᱯᱚᱛᱚᱵ ᱯᱟᱲᱦᱟᱣ ᱨᱮᱭᱟᱜ ᱱᱤᱥᱟ. ᱩᱱᱤ ᱡᱚᱛᱚ ᱠᱷᱚᱱ ᱥᱩᱠ ᱮ ᱮᱢᱟᱭ ᱛᱟᱦᱮᱸᱱ ᱾

ᱫᱷᱚᱨᱚᱢ ᱛᱚᱞᱟᱥ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱟᱡ ᱟᱭᱳ ᱥᱤᱵᱚᱭ ᱵᱚᱸᱜᱟ ᱵᱳᱨᱳᱣᱟᱭ ᱛᱟᱦᱮᱸᱱ ᱾ ᱟᱭᱳᱣᱟᱜ ᱫᱷᱚᱨᱚᱢ ᱪᱮᱛᱟᱱ ᱨᱮ ᱱᱩᱱᱟ.ᱝ ᱯᱟ.ᱛᱤᱭᱟ.ᱣ ᱜᱮ ᱦᱚᱯᱚᱱ ᱱᱚᱨᱮᱱᱫᱨᱚ ᱦᱚᱸ ᱫᱷᱚᱨᱚᱢ ᱯᱟᱱᱛᱮ ᱞᱟ.ᱜᱤᱫ ᱮ ᱵᱚᱲᱦᱮ ᱦᱚᱪᱚ ᱞᱮᱫᱮᱭᱟ ᱾ ᱟᱡ ᱛᱮ ᱟ.ᱰᱤ ᱜᱟᱺᱦᱤᱨ ᱫᱷᱟ.ᱵᱤᱡ ᱯᱟᱸᱡᱟ ᱠᱟᱛᱮ ᱥᱟ.ᱨᱤ ᱴᱷᱟᱶᱨᱮ ᱟ.ᱣᱨᱤᱭ ᱥᱮᱴᱮᱨᱚᱜ ᱵᱷᱩᱨ ᱩᱱᱤ ᱪᱮᱫ ᱠᱟᱛᱷᱟ ᱨᱮᱦᱚᱸ ᱯᱟ.ᱛᱤᱭᱟ.ᱣ ᱵᱟᱭ ᱫᱚᱦᱚᱭᱮᱫ ᱛᱟᱦᱮᱸᱱ ᱾ ᱩᱱᱤ ᱠᱮᱥᱚᱵᱽᱪᱚᱸᱫᱨᱚ ᱥᱮᱱᱟ ᱴᱷᱮᱱ ᱠᱷᱚᱱ ᱥᱨᱤᱨᱟᱢ ᱠᱨᱩᱥᱱᱚ ᱯᱚᱨᱚᱢ ᱦᱚᱝᱥᱚ ᱤᱫᱤ ᱠᱟᱛᱮᱭ ᱟᱸᱡᱚᱢ ᱞᱮᱫ ᱛᱮ ᱩᱱᱤ ᱥᱟᱞᱟᱜ ᱧᱟᱯᱟᱢᱚᱜ ᱞᱟ.ᱜᱤᱫ ᱮ ᱴᱚᱦᱚᱞ ᱵᱤᱠᱚᱞᱚᱜ ᱠᱟᱱ ᱛᱟᱦᱮᱸᱱ ᱾ ᱩᱱ ᱡᱚᱦᱚᱜ ᱟᱡᱟᱜ ᱵᱚᱭᱚᱥ ᱫᱚ ᱢᱚᱴᱷᱮ ᱜᱮᱞ ᱤᱨᱟ.ᱞ ᱥᱮᱨᱢᱟ ᱛᱟᱦᱮᱸ ᱠᱟᱱᱟ ᱾ ᱩᱱᱤ ᱮᱯᱷ. ᱮ. ᱵᱤᱱᱤᱰ ᱞᱟ.ᱜᱤᱫ ᱮ ᱥᱟᱯᱲᱟᱣᱜ ᱠᱟᱱ ᱛᱟᱦᱮᱸᱱ ᱾ ᱨᱟᱢ ᱠᱨᱩᱥᱱᱚ ᱥᱟᱞᱟᱜ ᱯᱩᱭᱞᱩ ᱧᱮᱯᱮᱞ ᱨᱮᱜᱮ ᱩᱱᱤ ᱩᱱᱤ ᱥᱮᱫ ᱟ.ᱰᱤ ᱡᱩᱨ ᱮ ᱴᱟᱱᱟᱣ ᱮᱱᱟ ᱾ ᱨᱟᱢ ᱠᱨᱩᱥᱱᱚᱣᱟᱜ ᱱᱮᱶᱛᱟ ᱧᱟᱢ ᱠᱟᱛᱮ ᱱᱚᱨᱮᱱᱫᱨᱚ ᱩᱱᱤ ᱫᱚᱠᱷᱤᱬᱮᱥᱣᱚᱨ ᱠᱟᱲᱤ ᱢᱩᱫᱽᱨᱤ ᱨᱮᱭ ᱧᱟᱯᱟᱢ ᱠᱮᱫᱮᱭᱟ ᱾ ᱥᱟ.ᱫᱷᱩ ᱨᱟᱢ ᱠᱨᱩᱥᱱᱚ ᱫᱚ ᱱᱚᱨᱮᱱᱫᱨᱚ ᱟᱡᱤᱡ ᱞᱟ.ᱠᱛᱤᱜ ᱞᱮᱠᱟᱱ ᱪᱮᱛᱮᱫᱤᱭᱟ.ᱢᱟᱱᱟᱣ ᱠᱟᱛᱮᱭ ᱟᱯᱱᱟᱨ ᱠᱮᱫᱮᱭᱟ ᱾ ᱟᱡᱟᱜ ᱢᱚᱱᱮᱨᱮ ᱱᱚᱝᱠᱟᱱ ᱩᱭᱦᱟ.ᱨ ᱡᱟᱱᱟᱢ ᱮᱱᱟ ᱡᱮ ᱱᱚᱧᱮᱱᱫᱨᱚ ᱫᱟᱨᱟᱭ ᱛᱮ ᱢᱤᱫ ᱱᱟᱯᱟᱭ ᱠᱟ.ᱢᱤ ᱛᱚᱨᱟᱣ ᱦᱩᱭ ᱫᱟᱲᱮᱭᱟᱜᱼᱟ ᱾

ᱱᱤᱭᱟ. ᱛᱟᱭᱚᱢ ᱱᱚᱨᱮᱱᱫᱨᱚ ᱥᱚᱱᱭᱟᱥᱤ ᱨᱩᱯ ᱮ ᱟᱯᱱᱟᱨ ᱠᱮᱜᱼᱟ ᱾ ᱤᱠᱷᱟ.ᱱ ᱜᱩᱨᱩᱣᱟᱜ ᱦᱚᱸ ᱡᱚᱛᱚ ᱠᱟᱛᱷᱟ ᱢᱮᱫ ᱡᱟ.ᱯᱤᱫ ᱠᱟᱛᱮ ᱵᱟᱭ ᱟᱯᱱᱟᱨ ᱫᱟᱲᱮᱭᱟᱜ ᱠᱟᱱ ᱛᱟᱦᱮᱸᱱ ᱾ ᱥᱟ.ᱨᱤ ᱛᱮᱫ ᱱᱤᱡᱮ ᱟ.ᱣᱨᱤᱭ ᱟ.ᱭᱠᱟ.ᱣ ᱧᱟᱢ ᱵᱷᱩᱨ ᱥᱮ ᱟᱡᱟᱜ ᱢᱮᱫ ᱛᱮ ᱟ.ᱣᱨᱤᱭ ᱧᱮᱞ ᱵᱷᱩᱨ ᱜᱩᱨᱩᱣᱟᱜ ᱠᱟᱛᱷᱟ ᱦᱚᱸ ᱵᱟᱭ ᱯᱟ.ᱛᱤᱭᱟ.ᱣ ᱟᱜ ᱠᱟᱱ ᱛᱟᱦᱮᱸᱱ ᱾ ᱩᱱᱤ ᱴᱷᱟ.ᱣᱠᱟ. ᱥᱟᱺᱦᱤᱡ ᱛᱮᱞᱟ ᱟ.ᱣᱨᱤᱭ ᱧᱟᱢ ᱵᱷᱩᱨ ᱜᱩᱨᱩ ᱠᱩᱞᱤ ᱟᱠᱟᱭ ᱛᱟᱦᱮᱸᱱ ᱠᱟᱱ ᱛᱟᱦᱮᱸᱫ ᱾ ᱩᱱᱠᱩ ᱥᱟᱞᱟᱜ ᱮ ᱡᱩᱠᱛᱤ ᱛᱟᱦᱮᱸᱫ ᱾ ᱱᱚᱝᱠᱟ ᱛᱮ ᱩᱱᱤ ᱵᱟ.ᱭᱼᱵᱟ.ᱭ ᱛᱮ ᱜᱩᱨᱩᱭᱤᱡ ᱟ.ᱰᱤ ᱱᱤᱡᱚᱨ ᱮ ᱦᱩᱭ ᱤᱫᱤᱭᱮᱱᱟ ᱾

ᱵᱷᱚᱠᱛᱤ ᱵᱤᱱᱤᱰ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱱᱚᱨᱮᱱᱫᱨᱚᱣᱟᱜ ᱚᱱᱛᱚᱨ ᱥᱚᱱᱚᱛ ᱟᱨ ᱜᱩᱨᱩ ᱪᱮᱛᱟᱱ ᱜᱚᱨᱚᱡᱽ ᱵᱟᱰᱟᱭ ᱞᱟ.ᱜᱤᱫ ᱜᱩᱨᱩ ᱨᱟᱢ ᱠᱨᱩᱥᱱᱚ ᱫᱚ ᱢᱤᱫ ᱫᱤᱱ ᱦᱤᱞᱚᱜ ᱩᱱᱤᱭᱟᱜ ᱵᱤᱱᱤᱰ ᱮ ᱦᱟᱛᱟᱣ ᱠᱮᱜᱼᱟ ᱾ ᱡᱩᱜᱽᱼᱡᱩᱜᱽ ᱠᱷᱚᱱ ᱦᱮᱡ ᱟ.ᱜᱩ ᱟᱠᱟᱱ ᱪᱮᱛᱮᱫᱤᱭᱟ.ᱠᱚ ᱵᱤᱱᱤᱰ ᱨᱮᱭᱟᱜ ᱢᱤᱫ ᱛᱚᱦᱚᱨ ᱾ ᱨᱟᱢᱠᱨᱩᱥᱱᱚ ᱢᱤᱫ ᱪᱟᱸᱫᱚ ᱫᱷᱟ.ᱵᱤᱡ ᱱᱚᱨᱮᱱᱫᱨᱚ ᱥᱟᱞᱟᱜ ᱵᱟᱝ ᱨᱚᱯᱚᱲ ᱠᱟᱛᱮ ᱱᱮᱢᱚᱸᱥ ᱮ ᱛᱟᱦᱮᱸᱭᱮᱱᱟ ᱾ ᱱᱚᱨᱮᱱᱫᱨᱚ ᱫᱤᱱ ᱦᱤᱞᱚᱜ ᱩᱱᱤ ᱥᱟᱶ ᱧᱟᱯᱟᱢ ᱞᱟ.ᱜᱤᱫ ᱮ ᱦᱟ.ᱡᱩᱜᱼᱟ ᱾ ᱤᱱᱟ. ᱛᱟᱭᱚᱢ ᱜᱩᱨᱩ ᱫᱚ ᱱᱚᱨᱮᱱᱫᱨᱚ ᱥᱟᱢᱟᱝ ᱨᱮ ᱮᱴᱟᱜ ᱦᱚᱲ ᱥᱟᱞᱟᱜ ᱮ ᱨᱚᱯᱚᱲᱟ ᱾ ᱤᱠᱷᱟ.ᱱ ᱟᱡ ᱥᱮᱫ ᱫᱚ ᱱᱟᱥᱮ ᱦᱚᱸ ᱵᱟᱭ ᱫᱷᱮᱭᱟᱱ ᱞᱮᱜᱼᱟ ᱾ ᱢᱩᱪᱟ.ᱫᱨᱮ ᱩᱱᱤ ᱥᱩᱨ ᱦᱚᱦᱚ ᱠᱟᱛᱮᱭ ᱢᱮᱛᱟ ᱫᱮᱭᱟ, ' ᱱᱚᱨᱮᱱᱫᱨᱚ, ᱤᱧ ᱟᱢ ᱥᱟᱞᱟᱜ ᱵᱟ.ᱧ ᱨᱚᱲ ᱠᱟᱱ ᱨᱮᱦᱚᱸ ᱟᱢ ᱱᱚᱸᱰᱮ ᱪᱮᱫᱟᱜ ᱮᱢ ᱦᱟ.ᱡᱩᱜ ᱠᱟᱱᱟ ᱾ ' ᱱᱚᱨᱮᱱᱫᱨᱚ ᱟ.ᱰᱤ ᱩᱥᱟ.ᱨᱟ ᱜᱮ ᱛᱮᱞᱟᱭ ᱨᱩᱣᱟ.ᱲ ᱠᱮᱜᱼᱟ, "ᱟ.ᱵᱤᱱ ᱥᱟᱞᱟᱜ ᱧᱟᱯᱟᱢᱚᱜ ᱜᱮ ᱤᱧᱟᱜ ᱡᱚᱛᱚ ᱠᱷᱚᱱ ᱢᱟᱨᱟᱝ ᱠᱚᱯᱟᱲ ᱫᱚ ᱾ ᱜᱟᱞᱢᱟᱨᱟᱣᱜ ᱞᱟ.ᱜᱤᱫ ᱫᱚ ᱤᱧ ᱫᱚ ᱵᱟ.ᱧ ᱦᱟ.ᱡᱩᱜ ᱠᱟᱱᱟ ᱾ "

ᱜᱷᱟᱨᱚᱸᱡᱽ ᱡᱤᱭᱚᱱ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

᱑᱘᱘᱔ ᱥᱟᱞᱮᱨᱮ ᱟᱡ ᱵᱟᱵᱟᱦᱟᱜ ᱡᱤᱣᱤᱵᱟ.ᱛᱤ ᱤᱬᱤᱡ ᱮᱱᱟ ᱾ ᱡᱟᱦᱟᱸ ᱠᱷᱟ.ᱛᱤᱨ ᱜᱷᱟᱨᱚᱸᱡᱽ ᱨᱮᱭᱟᱜ ᱡᱚᱛᱚ ᱟᱺᱜᱤᱵᱷᱟᱨ ᱟᱡ ᱪᱮᱛᱟᱱ ᱨᱮ ᱞᱟᱫᱮ ᱮᱱᱟ ᱾ ᱟᱡ ᱵᱟᱵᱟ ᱟ.ᱰᱤ ᱫᱟᱭᱟᱱ ᱦᱚᱲ ᱮ ᱛᱟᱦᱮᱸ ᱠᱟᱱ ᱠᱷᱟ.ᱛᱤᱨ ᱟᱡᱟᱜ ᱥᱚᱢᱯᱚᱛᱤ ᱫᱚᱭ ᱫᱟᱱ ᱪᱟᱵᱟ ᱟᱠᱟᱫ ᱛᱟᱦᱮᱸᱱ ᱾ ᱟᱡ ᱵᱚᱸᱜᱟ ᱠᱟᱛᱮ ᱩᱱᱠᱩ ᱨᱮᱸᱜᱮᱡ ᱱᱟᱪᱟᱨ ᱥᱟᱢᱟᱝ ᱛᱮ ᱦᱩᱭ ᱟᱫ ᱠᱚᱣᱟ ᱾ ᱱᱤᱛᱚᱜ ᱱᱚᱨᱮᱱᱫᱨᱚ ᱪᱟ.ᱠᱨᱤ ᱦᱚᱸ ᱵᱟᱭ ᱧᱟᱢ ᱟᱠᱟᱫ ᱛᱟᱦᱮᱸᱱ ᱾ ᱥᱚᱝᱥᱟᱨ ᱡᱚᱧᱡᱟᱲ ᱠᱷᱚᱱ ᱥᱟᱦᱟ ᱞᱮᱱ ᱱᱚᱨᱮᱱᱫᱨᱚ ᱪᱮᱛᱟᱱ ᱨᱮ ᱱᱤᱛᱚᱜ ᱡᱮᱛᱮ ᱞᱮᱠᱟᱱ ᱟᱺᱜᱤᱵᱷᱟᱨ ᱞᱟᱫᱮ ᱟᱠᱟᱱ ᱛᱟᱦᱮᱸᱱ ᱾ ᱱᱟᱪᱟᱨ ᱛᱮ ᱜᱷᱮᱨᱟᱣ ᱮᱥᱮᱫ ᱟᱠᱟᱱ ᱜᱷᱟᱨᱚᱸᱡᱽ ᱢᱤᱫ ᱪᱩᱯᱩᱫ ᱡᱚᱢᱟᱜ ᱮᱢᱟ ᱠᱚ ᱞᱟ.ᱜᱤᱫ ᱦᱟᱱᱟ ᱱᱷᱟᱶᱟ ᱩᱭᱦᱟ.ᱨ ᱟᱠᱟᱭ ᱛᱟᱦᱮᱸ ᱮᱱᱟ ᱾ ᱪᱟ.ᱠᱨᱤ ᱞᱟ.ᱜᱤᱫ ᱦᱟ.ᱱᱤ ᱱᱷᱟ.ᱭ ᱫᱩᱣᱟ.ᱨ ᱮ ᱥᱮᱱ ᱮᱱᱟ ᱾ ᱤᱠᱷᱟ.ᱱ ᱜᱚᱴᱟ ᱯᱟᱲᱟ ᱠᱷᱚᱱ ᱜᱮ ᱩᱱᱤᱭᱟᱜ ᱟᱸᱥ ᱨᱟ.ᱯᱩᱫ ᱟᱠᱟ ᱜᱮ ᱛᱟᱦᱮᱸ ᱮᱱᱟ ᱾

ᱟᱺᱜᱤᱵᱷᱟᱨ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱱᱚᱝᱠᱟᱱ ᱚᱠᱛᱚᱨᱮ ᱯᱮᱲᱟ ᱯᱟ.ᱦᱬᱟ. ᱠᱚᱦᱚᱸ ᱥᱟᱺᱜᱤᱧ ᱥᱟᱦᱟᱜ ᱠᱚ ᱞᱟᱦᱟᱭᱮᱱᱟ ᱾ ᱠᱷᱟ.ᱞᱤ ᱱᱤᱱᱟ.ᱝ ᱥᱩᱢᱩᱝ ᱫᱚ ᱵᱟᱝ ᱜᱮ, ᱟᱡ ᱵᱟᱵᱟᱦᱟᱜ ᱦᱚᱠ ᱵᱟᱜᱽ ᱥᱚᱢᱯᱚᱛᱤ ᱠᱷᱚᱱ ᱦᱚᱸ ᱵᱮᱼᱫᱚᱠᱷᱚᱞ ᱞᱟ.ᱜᱤᱫ ᱠᱚ ᱪᱷᱩᱴᱟ.ᱣ ᱮᱱᱟ ᱾

ᱜᱷᱟᱨᱚᱸᱡᱽ ᱨᱤᱱ ᱦᱚᱲ ᱟ.ᱰᱤ ᱚᱠᱛᱚ ᱨᱮᱜᱮ ᱨᱮᱸᱜᱮᱡ ᱛᱮᱛᱟᱝ ᱛᱮ ᱫᱤᱱ ᱠᱚ ᱠᱷᱮᱢᱟᱣ ᱠᱮᱜᱼᱟ ᱾ ᱱᱚᱨᱮᱱᱫᱨᱚ ᱦᱚᱸ ᱡᱚᱢᱟᱜ ᱵᱟᱝ ᱧᱟᱢ ᱠᱟᱛᱮᱭ ᱞᱤᱪᱟ.ᱲ ᱪᱟᱵᱟ ᱟᱠᱟᱱᱟ ᱾ ᱫᱩᱠ, ᱠᱟᱺᱦᱤᱥ, ᱚᱵᱷᱟᱵᱽ ᱟᱨ ᱟᱱᱟᱴ ᱛᱟᱞᱟ ᱨᱮᱦᱚᱸ ᱩᱱᱤ ᱛᱤᱥ ᱦᱚᱸ ᱢᱚᱱᱮ ᱵᱟᱭ ᱨᱟ.ᱯᱩᱫ ᱦᱚᱪᱚ ᱠᱟᱣᱟᱫ ᱛᱟᱭᱟ ᱾

ᱡᱚᱛᱚ ᱴᱷᱟᱶ ᱨᱮᱜᱮ ᱢᱤᱫ ᱥᱤᱢᱟ. ᱛᱟᱦᱮᱸᱱᱟ ᱾ ᱱᱚᱨᱮᱱᱫᱨᱚᱣᱟᱜ ᱜᱷᱟᱨᱚᱸᱡᱽ ᱨᱮᱭᱟᱜ ᱮᱴᱠᱮᱴᱚᱬᱮ ᱛᱤᱱ ᱡᱚᱦᱚᱜ ᱥᱤᱢᱟ.ᱭ ᱯᱟᱨᱚᱢ ᱠᱮᱜᱼᱟ, ᱩᱱ ᱡᱚᱦᱚᱜ ᱩᱱᱤ ᱟᱡᱟᱜ ᱤᱪᱪᱷᱟ. ᱵᱤᱨᱩᱫᱷ ᱨᱮ ᱪᱟᱞᱟᱣ ᱠᱟᱛᱮ ᱨᱟᱢ ᱠᱨᱩᱥᱱᱚ ᱴᱷᱮᱱ ᱥᱚᱦᱚᱫ ᱞᱟ.ᱜᱤᱫ ᱮ ᱠᱷᱚᱡᱽ ᱠᱮᱜᱼᱟ ᱾ ᱜᱩᱨᱩ ᱢᱩᱫᱽᱨᱤ ᱨᱮ ᱟᱭᱳ ᱥᱟᱶ ᱧᱟᱯᱟᱢ ᱠᱟᱛᱮ ᱟᱡᱟᱜ ᱠᱷᱚᱡᱽ ᱞᱟ.ᱭ ᱞᱟ.ᱜᱤᱫ ᱦᱚᱨ ᱮ ᱩᱫᱩᱜ ᱟᱫᱮᱭᱟ ᱾ ᱢᱩᱫᱽᱨᱤ ᱨᱮ ᱟᱭᱳᱣᱟᱜ ᱡᱤᱣᱤᱫ ᱢᱩᱨᱛᱤ ᱥᱟᱶ ᱧᱟᱯᱟᱢ ᱠᱟᱛᱮ ᱟ.ᱰᱤ ᱡᱩᱨ ᱮ ᱠᱟᱺᱦᱤᱥ ᱮᱱᱟ ᱾ ᱩᱱᱤ ᱥᱟᱢᱟᱝ ᱨᱮ ᱟᱡᱟᱜ ᱠᱷᱚᱡᱽ ᱵᱟᱭ ᱥᱚᱫᱚᱨ ᱫᱟᱲᱮᱭᱟᱫᱼᱟ ᱾ ᱡᱟᱦᱟᱸ ᱛᱤᱱ ᱫᱷᱟᱣ ᱜᱮ ᱟᱭᱳ ᱥᱩᱨ ᱟᱡᱟᱜ ᱢᱚᱱᱮ ᱠᱟᱛᱷᱟ ᱞᱟ.ᱭ ᱞᱟ.ᱜᱤᱫ ᱮ ᱥᱮᱱ ᱟᱠᱟᱱᱟ ᱩᱱ ᱫᱷᱟᱣ ᱜᱮ ᱵᱟᱝ ᱥᱟᱦᱟᱥ ᱫᱟᱲᱮ ᱠᱟᱛᱮᱭ ᱨᱩᱣᱟ.ᱲ ᱥᱮᱱ ᱟᱠᱟᱱᱟ ᱾ ᱜᱩᱨᱩᱣᱟᱜ ᱟ.ᱥᱤᱥ ᱧᱟᱢ ᱠᱟᱛᱮ ᱩᱱᱤ ᱟᱡᱟᱜ ᱜᱷᱟᱨᱚᱸᱡᱽ ᱮ ᱡᱚᱜᱟᱣ ᱨᱩᱣᱟ.ᱲ ᱫᱟᱲᱮ ᱠᱟᱣᱟᱫᱼᱟ ᱾ ᱱᱚᱨᱮᱱᱫᱨᱚ ᱟᱴᱚᱨᱱᱤ ᱚᱯᱷᱤᱥ ᱥᱟᱶ ᱡᱩᱲᱟ.ᱭ ᱠᱟᱛᱮ ᱱᱟᱥᱮ ᱴᱟᱠᱟ ᱠᱟ.ᱣᱰᱤᱭ ᱡᱚᱜᱟᱲ ᱫᱟᱲᱮ ᱠᱟᱣᱟᱫᱼᱟ ᱾ ᱱᱤᱭᱟ. ᱛᱟᱭᱚᱢ ᱩᱱᱤ ᱵᱤᱫᱽᱭᱟ ᱥᱟᱜᱚᱨᱟᱜ ᱟᱥᱲᱟ ᱨᱮ ᱢᱟᱪᱮᱛ ᱠᱟ.ᱢᱤᱭ ᱮᱛᱚᱦᱚᱵ ᱠᱮᱜᱼᱟ ᱾

ᱱᱚᱨᱮᱱᱫᱨᱚ ᱠᱷᱚᱱ ᱵᱤᱵᱮᱠᱟᱱᱚᱱᱫᱚ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱱᱚᱨᱮᱱᱫᱨᱚ ᱮᱴᱟᱜ ᱦᱚᱲ ᱥᱟᱶ ᱵᱚᱨᱟᱦ ᱱᱚᱜᱚᱨ ᱟᱥᱨᱚᱢ ᱨᱮ ᱧᱟᱯᱟᱢ ᱠᱟᱛᱮ ᱟᱠᱚᱣᱟᱜ ᱦᱚᱨᱚᱜ ᱞᱩᱜᱽᱲᱤ ᱵᱚᱫᱚᱞ ᱠᱟᱛᱮ ᱥᱚᱸᱱᱭᱟᱥ ᱞᱩᱜᱽᱲᱤ ᱛᱮᱠᱚ ᱯᱟᱞᱟᱴ ᱮᱱᱟ ᱾ ᱱᱤᱭᱟ. ᱛᱟᱭᱚᱢ ᱩᱱᱤ ᱥᱣᱟᱢᱤ ᱵᱤᱵᱮᱠᱟᱱᱚᱱᱫᱚ ᱧᱩᱛᱩᱢ ᱛᱮᱭ ᱵᱤᱠᱱᱟ.ᱣ ᱮᱱᱟ ᱾

ᱪᱤᱠᱟᱜᱳ ᱫᱷᱚᱨᱚᱢ ᱟᱠᱷᱲᱟ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱵᱤᱵᱮᱠᱟᱱᱚᱱᱫᱚ ᱠᱚᱱᱭᱟ ᱠᱩᱢᱟᱨᱤ ᱥᱩᱨ ᱨᱮᱭᱟᱜ ᱢᱤᱫ ᱰᱷᱤᱯ ᱨᱮ ᱛᱩᱯᱤᱥᱟ ᱠᱟᱛᱮ ᱫᱷᱤᱼᱢᱚᱱ ᱜᱮᱭᱟᱱ ᱮ ᱟᱢᱮᱴ ᱠᱮᱜᱼᱟ ᱾ ᱚᱸᱰᱮ ᱠᱷᱚᱱ ᱩᱱᱩᱫᱩᱜ ᱧᱟᱢ ᱠᱟᱛᱮ ᱟᱢᱮᱨᱤᱠᱟ ᱨᱮᱭᱟᱜ ᱪᱤᱠᱟᱜᱳ ᱵᱟᱡᱟᱨ ᱨᱮ ᱥᱟᱯᱲᱟᱣ ᱟᱠᱟᱱ ᱫᱷᱚᱨᱚᱢ ᱟᱠᱷᱲᱟᱨᱮ ᱥᱮᱞᱮᱫᱚᱜ ᱞᱟ.ᱜᱤᱫ ᱮ ᱩᱰᱩᱠ ᱮᱱᱟ ᱾ ᱤᱠᱷᱟ.ᱱ ᱥᱮᱱᱮᱞᱮᱫ ᱟᱨ ᱦᱚᱸ ᱯᱮᱼᱪᱟᱸᱫᱚ ᱥᱟᱨᱮᱡ ᱛᱟᱦᱮᱸ ᱠᱟᱱᱟ ᱾ ᱴᱟᱠᱟ ᱠᱟ.ᱣᱰᱤ ᱨᱮᱭᱟᱜ ᱟᱱᱟᱴ ᱛᱟᱞᱟ ᱨᱮᱦᱚᱸ ᱩᱱᱤ ᱛᱟᱺᱜᱤ ᱟᱠᱟᱭ ᱛᱟᱦᱮᱸ ᱮᱱᱟ ᱾ ᱰᱟᱠᱛᱚᱨ ᱨᱟᱭᱤᱴ ᱟᱨ ᱰᱟᱠᱛᱚᱨ ᱵᱭᱚᱨᱚᱡᱽ ᱟᱜ ᱜᱚᱲᱚ ᱥᱚᱦᱚᱫ ᱛᱮ ᱩᱱᱤ ᱫᱷᱚᱨᱚᱢ ᱟᱠᱷᱲᱟ ᱨᱮ ᱜᱟᱞᱚᱪ ᱮᱢ ᱞᱟ.ᱜᱤᱫ ᱫᱟᱣ ᱮ ᱧᱟᱢ ᱠᱮᱜᱼᱟ ᱾ ᱥᱣᱟᱢᱤ ᱛᱤᱱ ᱠᱚᱦᱚᱜ ᱜᱟᱞᱚᱪ ᱮᱢ ᱞᱟ.ᱜᱤᱫ ᱮ ᱩᱰᱩᱠ ᱮᱱᱟ ᱟᱡᱟᱜ ᱢᱮᱫᱦᱟ ᱨᱮ ᱨᱟ.ᱥᱠᱟ. ᱟᱨ ᱪᱩᱦᱩᱞ ᱛᱟᱦᱮᱸ ᱠᱟᱱᱟ ᱾ ᱡᱮᱜᱮᱛ ᱨᱮᱭᱟᱜ ᱢᱩᱲᱩᱛ ᱠᱷᱩᱱᱴᱤ ᱫᱚ ᱦᱩᱭᱩᱜ ᱠᱟᱱᱟ, ᱡᱮᱜᱮᱛ ᱫᱩᱞᱟ.ᱲ ᱟᱨ ᱡᱮᱜᱮᱛ ᱵᱚᱭᱦᱟ ᱥᱟ.ᱜᱟ.ᱭ ᱛᱷᱟᱯᱚᱱ ᱾ ᱵᱤᱵᱮᱠᱟᱱᱚᱱᱫᱚ ᱥᱮᱴᱮᱨ ᱟᱠᱟᱱ ᱧᱮᱧᱮᱞᱤᱭᱟ. ᱟᱨ ᱟᱸᱡᱚᱢᱤᱭᱟ. ᱠᱚ ᱴᱷᱮᱱ ᱵᱚᱭᱦᱟ ᱟᱨ ᱵᱩᱦᱤᱱ ᱥᱟ.ᱜᱟ.ᱭ ᱢᱮᱱ ᱠᱟᱛᱮ ᱫᱷᱚᱨᱚᱢ ᱨᱮᱭᱟᱜ ᱵᱤᱥᱲᱤᱭ ᱪᱷᱩᱴᱟ.ᱣ ᱮᱱᱟ ᱾ ᱟᱡᱟᱜ ᱜᱟᱞᱚᱪ ᱟᱸᱡᱚᱢ ᱠᱟᱛᱮ ᱛᱤ ᱛᱷᱟᱭᱚ ᱨᱮᱭᱟᱜ ᱥᱟᱰᱮ ᱛᱮ ᱜᱚᱴᱟᱯᱟᱲᱟ ᱛᱟᱨᱠᱚ ᱟᱸᱫᱚᱲ ᱮᱱᱟ ᱾

ᱱᱚᱝᱠᱟ ᱛᱮ ᱟᱡ ᱮ ᱛᱷᱟᱯᱚᱱ ᱟᱠᱟᱫ ᱵᱮᱞᱩᱨ ᱟᱴᱷᱣᱟᱨ ᱨᱮ ᱢᱩᱪᱟ.ᱫ ᱡᱤᱭᱚᱱ ᱮ ᱠᱷᱮᱢᱟᱣ ᱠᱮᱜᱼᱟ ᱾ ᱑᱙᱐᱒ ᱥᱟᱞᱮᱨᱮ ᱡᱩᱞᱟᱭ ᱔ ᱢᱟᱺᱦᱤᱛ ᱦᱤᱞᱚᱜ ᱟᱡᱟᱜ ᱡᱤᱣᱤᱵᱟ.ᱛᱤ ᱤᱬᱤᱡ ᱮᱱᱟ ᱾ ᱵᱤᱵᱮᱠᱟᱱᱚᱱᱫᱚ ᱫᱤᱥᱚᱢ ᱟᱨ ᱡᱮᱜᱮᱛ ᱥᱟᱸᱜᱷᱟᱨ ᱠᱟᱛᱮ ᱡᱟᱦᱟᱸ ᱱᱟᱯᱟᱭ ᱱᱟᱯᱟᱭ ᱠᱟᱛᱷᱟ ᱟᱨ ᱜᱟᱞᱚᱪ ᱮ ᱯᱟᱥᱱᱟᱣ ᱟᱠᱟᱜᱼᱟ, ᱚᱱᱟ ᱜᱮ ᱩᱱᱤ ᱫᱚ ᱡᱤᱭᱟ.ᱛ ᱠᱟᱛᱮᱭ ᱫᱚᱦᱚ ᱮᱭᱟ ᱾ ᱥᱟᱶᱛᱟ ᱨᱮ ᱡᱩᱣᱟ.ᱱ ᱠᱚ ᱞᱟ.ᱜᱤᱫ ᱢᱤᱫ ᱫᱟ.ᱭᱠᱟ. ᱞᱮᱠᱟᱭ ᱛᱟᱦᱮᱸ ᱫᱚᱦᱚ ᱮᱱᱟ ᱾

ᱵᱟᱨᱦᱮ ᱡᱚᱱᱚᱲ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

Works about Vivekananda via the Open Library


ᱥᱟᱹᱠᱷᱭᱟᱹᱛ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]