ᱥᱩᱱᱟᱹᱨᱟᱢ ᱥᱚᱨᱮᱱ
 ᱥᱩᱱᱟᱹᱨᱟᱢ ᱥᱚᱨᱮᱱ | |
| ᱳᱰᱤᱥᱟ ᱵᱤᱫᱷᱟᱱᱥᱚᱵᱷᱟ ᱨᱤᱱᱤᱡ ᱥᱚᱦᱮᱛ | |
| ᱟᱹᱢᱟᱹᱞᱤ ᱨᱮ ᱑᱙᱗᱗ – ᱑᱙᱘᱐ | |
| ᱢᱟᱬᱟᱝ ᱟᱹᱢᱟᱹᱞᱤᱭᱟᱹ | ᱥᱟᱥᱤᱵᱷᱩᱥᱚᱱ ᱢᱟᱨᱟᱱᱰᱤ |
| ᱛᱟᱭᱚᱢ ᱟᱹᱢᱟᱹᱞᱤᱭᱟᱹ | ᱨᱟᱢᱪᱚᱸᱫᱽᱨᱚ ᱦᱟᱸᱥᱫᱟᱜ |
| ᱵᱟᱪᱷᱱᱟᱣ ᱮᱞᱟᱠᱟ | ᱵᱚᱦᱚᱲᱫᱟ |
| ᱟᱹᱢᱟᱹᱞᱤ ᱨᱮ ᱑᱙᱖᱑ – ᱑᱙᱗᱑ | |
| ᱢᱟᱬᱟᱝ ᱟᱹᱢᱟᱹᱞᱤᱭᱟᱹ | ᱥᱩᱨᱮᱱᱫᱨᱚ ᱢᱳᱦᱚᱱ ᱦᱮᱢᱵᱨᱚᱢ |
| ᱛᱟᱭᱚᱢ ᱟᱹᱢᱟᱹᱞᱤᱭᱟᱹ | ᱥᱟᱥᱤᱵᱷᱩᱥᱚᱱ ᱢᱟᱨᱟᱱᱰᱤ |
| ᱵᱟᱪᱷᱱᱟᱣ ᱮᱞᱟᱠᱟ | ᱵᱚᱦᱚᱲᱫᱟ |
| ᱟᱹᱢᱟᱹᱞᱤ ᱨᱮ ᱑᱙᱕᱑ – ᱑᱙᱕᱗ | |
| ᱢᱟᱬᱟᱝ ᱟᱹᱢᱟᱹᱞᱤᱭᱟᱹ | ᱚᱯᱷᱤᱥ ᱛᱷᱟᱯᱚᱱ |
| ᱛᱟᱭᱚᱢ ᱟᱹᱢᱟᱹᱞᱤᱭᱟᱹ | ᱥᱩᱨᱮᱱᱫᱨᱚ ᱢᱳᱦᱚᱱ ᱦᱮᱢᱵᱨᱚᱢ |
| ᱵᱟᱪᱷᱱᱟᱣ ᱮᱞᱟᱠᱟ | ᱵᱚᱦᱚᱲᱫᱟ |
| ᱳᱰᱤᱥᱟ ᱯᱚᱱᱚᱛ ᱢᱚᱱᱛᱨᱤ | |
| ᱟᱹᱢᱟᱹᱞᱤ ᱨᱮ ᱒᱐ ᱯᱷᱮᱵᱽᱨᱩᱣᱟᱨᱤ ᱑᱙᱕᱒ – ᱑᱙ ᱚᱠᱴᱚᱵᱚᱨ ᱑᱙᱕᱖ | |
| ᱥᱤᱨᱟᱹ ᱢᱚᱱᱛᱨᱤ | ᱱᱟᱵᱚᱠᱨᱩᱥᱱᱟ ᱪᱚᱣᱫᱷᱩᱨᱤ |
| ᱢᱚᱱᱛᱨᱤ | ᱟᱹᱫᱤᱵᱟᱹᱥᱤ ᱟᱨ ᱟᱹᱛᱩ ᱫᱤᱥᱚᱢ ᱨᱮᱱᱟᱜ ᱵᱷᱟᱹᱞᱟᱹᱭ, ᱵᱮᱯᱟᱨ, ᱠᱟᱹᱢᱤᱭᱟᱹ |
| ᱯᱟᱨᱥᱚᱱᱟᱞ ᱵᱤᱵᱚᱨᱚᱱ | |
| ᱡᱟᱱᱟᱢ | ᱔ ᱯᱷᱮᱵᱽᱨᱩᱣᱟᱨᱤ ᱑᱙᱑᱘ ᱦᱮᱥᱮᱞᱟ, ᱵᱚᱦᱚᱲᱫᱟ, ᱵᱷᱚᱸᱡᱽ ᱫᱤᱥᱚᱢ, ᱵᱨᱤᱴᱤᱥ ᱥᱤᱧᱚᱛ (ᱱᱤᱛᱚᱜ ᱫᱚ ᱢᱚᱭᱩᱨᱵᱷᱚᱸᱡᱽ ᱦᱚᱱᱚᱛ, ᱳᱰᱤᱥᱟ) |
| ᱜᱩᱨ | ᱑᱙ ᱡᱩᱞᱟᱭ ᱑᱙᱘᱘ (ᱩᱢᱮᱨ ᱗᱐ ᱥᱮᱨᱢᱟ) |
| ᱨᱟᱡᱽᱟᱹᱨᱤ ᱫᱚᱞ | ᱡᱚᱱᱛᱟ ᱯᱟᱨᱴᱤ |
| ᱮᱴᱟᱜ ᱨᱟᱡᱽᱟᱹᱨᱤ ᱥᱟᱹᱜᱟᱹᱭ | ᱩᱲᱤᱥᱟ ᱡᱟᱱᱟ ᱠᱚᱝᱜᱽᱨᱮᱥ, ᱥᱤᱧᱚᱛᱤᱭᱟᱹ ᱡᱟᱹᱛᱤᱭᱟᱹᱨᱤ ᱠᱚᱝᱜᱽᱨᱮᱥ |
| ᱡᱤᱭᱚᱱ ᱥᱚᱦᱮᱫ | ᱥᱚᱱᱟ ᱥᱚᱨᱮᱱ |
| ᱦᱚᱯᱚᱱ | ᱑ |
| ᱥᱮᱪᱮᱫ | ᱵᱤ.ᱮ, ᱮᱞ.ᱮᱞ.ᱵᱤ. |
| ᱠᱟᱹᱢᱤ | ᱪᱟᱥ ᱠᱟᱹᱢᱤᱭᱟᱹ, ᱨᱟᱡᱽᱟᱹᱨᱤᱭᱟᱹ |
ᱥᱩᱱᱟᱹᱨᱟᱢ ᱥᱚᱨᱮᱱ
ᱵᱷᱚᱸᱡᱽ ᱫᱤᱥᱚᱢ ᱵᱟᱵᱚᱱᱜᱷᱟᱹᱴᱤ ᱥᱚᱵᱽᱰᱤᱵᱤᱡᱚᱱ ᱨᱮᱱᱟᱜ ᱦᱟᱴ ᱵᱟᱫᱽᱲᱟ ᱡᱟᱯᱟᱜ ᱠᱟᱹᱱᱦᱩ ᱱᱟᱹᱭ ᱰᱷᱤᱯᱨᱮ ᱫᱟᱢᱠᱚᱢ ᱦᱮᱥᱞᱟ ᱟᱹᱛᱩ ᱢᱮᱱᱟᱜᱼᱟ ᱾ ᱚᱱᱟ ᱟᱹᱛᱩ ᱨᱮᱜᱮ ᱵᱷᱚᱸᱡᱽ ᱵᱤᱨ ᱥᱩᱱᱟᱹᱨᱟᱢ ᱥᱚᱨᱮᱱ ᱫᱚ ᱢᱤᱫ ᱥᱚᱨᱮᱱ ᱵᱟᱹᱠᱷᱩᱞ ᱨᱮ ᱢᱟ ᱔/᱒/᱑᱙᱑᱘ ᱦᱤᱛ ᱚᱛᱮ ᱢᱟᱦᱟᱸ ᱦᱤᱞᱚᱜ ᱛᱟᱨᱟᱥᱤᱧ ᱚᱠᱛᱚᱭ ᱡᱟᱱᱟᱢ ᱞᱮᱱᱟ ᱾ ᱟᱯᱟᱛ ᱧᱩᱛᱩᱢ ᱫᱚ ᱢᱟᱹᱱ ᱪᱟᱹᱢᱯᱟᱹᱭ ᱨᱟᱢ ᱥᱚᱨᱮᱱ ᱟᱨ ᱮᱸᱜᱟᱛ ᱧᱩᱛᱩᱢ ᱫᱚ ᱫᱩᱨᱜᱤ ᱥᱚᱨᱮᱱ ᱾ ᱢᱟᱢᱚ ᱟᱹᱛᱩ ᱫᱚ ᱨᱟᱸᱜᱟᱢᱟᱹᱴᱤᱭᱟᱹ ᱢᱟᱹᱨᱰᱤ ᱯᱟᱹᱨᱤᱥ ᱚᱲᱟᱜ ᱨᱮ ᱾ ᱜᱚᱢᱠᱮ ᱥᱩᱱᱟᱹᱨᱟᱢ ᱥᱚᱨᱮᱱ ᱛᱮᱠᱚ ᱫᱚ ᱛᱩᱨᱩᱭ ᱦᱚᱲ ᱠᱚᱲᱟ ᱟᱨ ᱯᱩᱱ ᱦᱚᱲ ᱢᱤᱥᱨᱟ ᱠᱚ ᱛᱟᱦᱮᱸ ᱠᱟᱱᱟ ᱾ ᱪᱟᱹᱢᱯᱟᱹᱭ ᱨᱟᱢ ᱥᱚᱨᱮᱱ ᱨᱤᱱ ᱑᱑ ᱜᱚᱴᱟᱝ ᱜᱤᱫᱽᱨᱟᱹ ᱠᱷᱚᱱ ᱥᱩᱱᱟᱹᱨᱟᱢ ᱥᱚᱨᱮᱱ ᱫᱚ ᱡᱚᱛᱚ ᱠᱷᱚᱱ ᱢᱟᱨᱟᱝ ᱦᱚᱯᱚᱱ ᱮ ᱛᱟᱦᱮᱸ ᱠᱟᱱᱟ ᱾
ᱜᱤᱫᱽᱨᱟᱹ ᱚᱠᱛᱚ ᱠᱟᱛᱷᱟ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱟᱥᱟᱲ ᱵᱚᱸᱜᱟ ᱛᱟᱦᱮᱸ ᱠᱟᱱᱟ ᱜᱚᱴᱟᱯᱟᱲᱟ ᱜᱮ ᱪᱟᱹᱥᱤ ᱠᱚ ᱵᱟᱹᱫᱽᱨᱮ ᱦᱮᱲᱦᱮᱫ ᱪᱷᱤᱲᱭᱟᱹᱣ ᱠᱟᱹᱢᱤ ᱠᱚ ᱥᱟᱹᱨᱫᱤ ᱟᱠᱟᱜᱼᱟ ᱾ ᱪᱟᱹᱢᱯᱟᱹᱭ ᱥᱚᱨᱮᱱ ᱛᱮᱠᱚ ᱦᱚᱸ ᱟᱠᱚᱣᱟᱜ ᱵᱟᱹᱫᱽᱨᱮ ᱢᱩᱞᱤᱭᱟᱹ ᱟᱛᱮ ᱠᱚ ᱦᱮᱲᱦᱮᱫ ᱦᱚᱪᱚ ᱮᱫ ᱠᱚᱣᱟ ᱾ ᱥᱟᱶᱛᱮ ᱟᱠᱚ ᱚᱲᱟᱜ ᱦᱚᱲ ᱦᱚᱸᱠᱚ ᱠᱟᱹᱢᱤ ᱠᱟᱱ ᱛᱟᱦᱮᱸᱫ ᱾ ᱪᱟᱹᱢᱯᱟᱹᱭ ᱵᱟᱹᱦᱩ ᱦᱚᱸ ᱵᱟᱹᱫᱽ ᱨᱮ ᱠᱟᱹᱢᱤ ᱞᱟᱹᱜᱤᱫ ᱮ ᱦᱚᱨᱚᱵᱚᱨᱚᱜ ᱠᱟᱱ ᱛᱮ ᱵᱟᱞᱮ ᱜᱤᱫᱽᱨᱟᱹ ᱛᱟᱭ ᱵᱟᱹᱫᱽ ᱟᱲᱮᱨᱮ ᱢᱮᱱᱟᱜ ᱠᱟᱹᱣᱦᱟᱹ ᱫᱟᱨᱮ ᱠᱚ ᱥᱩᱨ ᱨᱮ ᱠᱟᱲᱠᱮ ᱦᱮᱸᱥᱟᱜ ᱫᱟᱨᱮ ᱵᱩᱴᱟᱹᱨᱮᱭ ᱜᱤᱛᱤᱡ ᱠᱟᱫᱮᱭᱟ ᱟᱨ ᱟᱡ ᱫᱚ ᱦᱮᱲᱦᱮᱫ ᱮ ᱪᱷᱩᱴᱟᱹᱣ ᱮᱱᱟ ᱾ ᱱᱟᱥᱮ ᱜᱷᱟᱹᱲᱤᱠ ᱛᱟᱭᱚᱢ ᱵᱮᱲᱟ ᱦᱚᱸᱭ ᱨᱟᱠᱟᱵ ᱤᱫᱤᱭᱮᱱᱟ ᱟᱨ ᱫᱟᱨᱮ ᱩᱢᱩᱞ ᱦᱚᱸ ᱥᱟᱦᱟ ᱮᱱᱟ ᱾ ᱥᱮᱸᱜᱮᱞ ᱞᱮᱠᱟᱱ ᱥᱤᱛᱩᱝ ᱫᱚ ᱜᱤᱛᱤᱡ ᱟᱠᱟᱫᱮ ᱵᱟᱞᱚᱠ ᱪᱮᱛᱟᱱ ᱨᱮ ᱨᱟᱠᱟᱵ ᱮᱱᱟ ᱾ ᱮᱱ ᱦᱚᱸ ᱟᱡ ᱟᱭᱳ ᱫᱚ ᱵᱟᱭ ᱛᱷᱤᱛ ᱡᱚᱝ ᱠᱟᱱᱟ ᱾ ᱦᱮᱲᱦᱮᱫ ᱨᱮ ᱚᱱᱠᱟᱭ ᱞᱟᱵᱟᱫᱷᱤᱭᱟᱹᱣ ᱟᱠᱟᱱᱟ ᱫᱚ ᱜᱤᱫᱽᱨᱟᱹ ᱡᱟᱠ ᱮ ᱰᱷᱤᱞᱟᱹᱣ ᱟᱠᱟ ᱫᱮᱭᱟ ᱾ ᱚᱠᱟ ᱞᱮᱠᱟ ᱨᱮᱪᱚ ᱦᱮᱲᱦᱮᱫ ᱠᱷᱚᱱ ᱜᱮ ᱢᱤᱫᱴᱟᱹᱝ ᱵᱩᱰᱷᱤᱭᱟᱜ ᱢᱮᱫ ᱫᱚ ᱜᱤᱫᱽᱨᱟᱹ ᱪᱮᱛᱟᱱ ᱨᱮ ᱛᱟᱹᱠᱤᱡ ᱮᱱᱟ ᱟᱨ ᱟᱹᱰᱤ ᱦᱟᱦᱟᱲᱟ ᱜᱷᱚᱴᱚᱱ ᱮ ᱧᱮᱞ ᱟᱱᱟ ᱾ ᱜᱤᱛᱤᱡ ᱟᱠᱟ ᱫᱮᱠᱚ ᱵᱟᱞᱮ ᱜᱤᱫᱽᱨᱟᱹ ᱫᱚ ᱢᱤᱫᱴᱟᱹᱝ ᱟᱹᱰᱤ ᱢᱟᱨᱟᱝ ᱵᱤᱧ ᱮ ᱩᱢᱩᱞ ᱟᱠᱟᱫᱮᱭᱟ ᱾ ᱥᱚᱸᱜᱮ ᱜᱮ ᱩᱱᱤ ᱵᱤᱧ ᱫᱚ ᱚᱠᱟ ᱜᱟᱡᱟᱲ ᱥᱮᱫ ᱪᱚᱭ ᱞᱮᱧ ᱵᱚᱞᱚ ᱮᱱᱟ ᱾ ᱧᱮᱞ ᱟᱫ ᱠᱮᱫᱮᱭᱟ ᱠᱚ ᱾ ᱟᱡ ᱟᱭᱳ ᱫᱚ ᱵᱚᱛᱚᱨ ᱛᱮᱭ ᱨᱟᱜ ᱡᱚᱝ ᱠᱟᱱᱟ ᱾ ᱛᱟᱭᱚᱢ ᱜᱤᱫᱽᱨᱟᱹ ᱛᱟᱭ ᱮ ᱧᱮᱞᱮᱭᱟ, ᱱᱟᱯᱟᱭ ᱜᱮᱭᱟᱭ ᱾ ᱩᱱ ᱡᱚᱦᱚᱜ ᱩᱱᱤ ᱵᱩᱰᱷᱤᱭ ᱢᱮᱱ ᱠᱮᱜᱼᱟ ᱱᱩᱭ ᱫᱚᱱᱟ ᱵᱤᱧ ᱫᱚᱭ ᱵᱟᱝ ᱠᱟᱱᱟ ᱵᱚᱸᱜᱟ ᱠᱟᱱ ᱜᱮᱭᱟᱭ ᱯᱟᱞᱮ ᱾ ᱠᱷᱤᱛᱤ ᱞᱟᱹᱜᱤᱫ ᱫᱚ ᱵᱟᱝᱼᱟ ᱱᱟᱯᱟᱭ ᱞᱟᱹᱜᱤᱫ ᱜᱮ ᱯᱟᱞᱮ ᱾ ᱫᱩ ᱨᱮᱦᱚᱸ ᱱᱩᱭ ᱜᱤᱫᱽᱨᱟᱹ ᱫᱚ ᱢᱤᱫ ᱫᱤᱱ ᱦᱤᱞᱚᱜ ᱟᱹᱰᱤ ᱢᱟᱨᱟᱝ ᱦᱚᱲ ᱜᱮᱭ ᱵᱮᱱᱟᱣᱜᱼᱟ ᱾
ᱱᱩᱭ ᱵᱟᱞᱚᱠ ᱜᱮ ᱦᱟᱨᱟ ᱡᱩᱣᱟᱹᱱ ᱠᱟᱛᱮ ᱵᱷᱚᱸᱡᱽ ᱵᱤᱨ ᱢᱮᱱᱛᱮᱭ ᱵᱤᱠᱱᱟᱹᱣ ᱮᱱᱟ ᱾ ᱫᱤᱥᱚᱢ ᱫᱩᱞᱟᱹᱲᱤᱭᱟᱹ ᱟᱨ ᱦᱩᱞᱜᱟᱹᱨᱤᱭᱟᱹ ᱢᱮᱱᱛᱮ ᱦᱚᱸᱭ ᱦᱩᱭ ᱞᱮᱱᱟ ᱾
ᱥᱮᱪᱮᱫ ᱮᱛᱚᱦᱚᱵ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱥᱤᱧᱚᱛ ᱫᱤᱥᱚᱢ ᱩᱱ ᱚᱠᱛᱚ ᱫᱚ ᱵᱨᱤᱴᱤᱥ ᱠᱚᱣᱟᱜ ᱜᱚᱵᱚᱞ ᱨᱮ ᱛᱟᱦᱮᱸ ᱠᱟᱱᱟ ᱾ ᱤᱛᱩᱱ ᱟᱥᱲᱟ ᱠᱚᱨᱮ ᱦᱚᱸ ᱟᱵᱚ ᱯᱟᱹᱨᱥᱤ ᱪᱤᱠᱤ ᱠᱚᱛᱮ ᱫᱚ ᱪᱮᱫ ᱥᱮᱪᱮᱫ ᱦᱚᱸ ᱵᱟᱝ ᱛᱟᱦᱮᱸ ᱠᱟᱱᱟ ᱾ ᱵᱷᱚᱸᱡᱽ ᱫᱤᱥᱚᱢ ᱨᱮᱫᱚ ᱟᱥᱲᱟ ᱠᱚ ᱟᱹᱰᱤ ᱢᱟᱦᱨᱚᱜᱽ ᱜᱮ ᱛᱟᱦᱮᱸ ᱠᱟᱱᱟ ᱚᱱᱟ ᱦᱚᱸ ᱩᱰᱤᱭᱟᱹ ᱪᱤᱠᱤ ᱛᱮ ᱛᱟᱦᱮᱸ ᱠᱟᱱᱟ ᱾ ᱫᱟᱢᱠᱚᱢ ᱦᱮᱸᱥᱞᱟ ᱠᱷᱚᱱ ᱫᱚ ᱮᱭᱟᱭ ᱠᱤ.ᱢᱤ. ᱥᱟᱺᱜᱤᱧ ᱨᱮ ᱞᱟ.ᱣᱡᱚᱲᱟ L.P. School ᱛᱟᱦᱮᱸ ᱠᱟᱱᱟ ᱾[᱑] ᱚᱸᱰᱮ ᱜᱮ ᱢᱟᱨᱟᱝ ᱜᱚᱢᱠᱮ ᱥᱩᱱᱟᱹᱨᱟᱢ ᱥᱚᱨᱮᱱ ᱫᱚ ᱚᱞᱚᱜ ᱮ ᱮᱛᱚᱦᱚᱵ ᱞᱮᱫᱼᱟ ᱾ ᱩᱱ ᱫᱚ ᱑᱙᱒᱗ ᱥᱟᱞᱮ ᱛᱟᱦᱮᱸ ᱠᱟᱱᱟ ᱾ ᱢᱟᱲᱟᱝ ᱢᱟᱲᱟᱝ ᱢᱟᱪᱮᱛᱟᱜ ᱨᱚᱲ ᱪᱮᱫ ᱦᱚᱸ ᱵᱟᱭ ᱵᱩᱡᱷᱟᱹᱣ ᱫᱟᱲᱮᱭᱟᱫᱼᱟ ᱾ ᱩᱰᱤᱭᱟᱹ ᱪᱤᱠᱤ ᱛᱮ ᱚᱞᱚᱜ ᱟᱹᱰᱤ ᱟᱸᱴ ᱮ ᱵᱩᱡᱷᱟᱹᱣ ᱠᱮᱫᱼᱟ ᱾ ᱚᱠᱛᱚ ᱨᱮᱱᱟᱜ ᱪᱟᱨᱠᱷᱟ ᱟᱹᱪᱩᱨᱚᱜ ᱥᱟᱶᱛᱮ ᱚᱞᱚᱜ ᱦᱚᱸᱭ ᱥᱮᱬᱟ ᱤᱫᱤ ᱠᱮᱫᱼᱟ ᱾ ᱑᱙᱒᱙ ᱥᱟᱞᱮᱨᱮ ᱞᱟᱹᱣᱡᱚᱲᱟ ᱤᱛᱩᱱ ᱟᱥᱲᱟ ᱠᱷᱚᱱ ᱚᱞᱚᱜ ᱮ ᱥᱟᱹᱛ ᱠᱮᱫᱼᱟ ᱾ ᱛᱟᱭᱚᱢ ᱞᱟᱛᱟᱨ ᱟᱨ ᱪᱮᱛᱟᱱ ᱪᱟᱱᱚᱪ ᱫᱚ ᱵᱚᱦᱚᱲᱫᱟ ᱨᱮ ᱑᱙᱓᱓ ᱥᱟᱞᱮ ᱨᱮᱭ ᱥᱟᱹᱛ ᱠᱮᱫᱼᱟ ᱾ ᱛᱟᱭᱚᱢ ᱪᱮᱛᱟᱱ ᱥᱮᱫ ᱯᱟᱲᱦᱟᱣᱜ ᱞᱟᱹᱜᱤᱫ ᱫᱚ ᱟᱡ ᱵᱟᱵᱟ ᱵᱟᱹᱨᱯᱟᱫᱟ ᱛᱮᱭ ᱵᱷᱮᱡᱟ ᱠᱮᱫᱮᱭᱟ ᱾ ᱩᱱ ᱡᱚᱦᱚᱜ ᱫᱚ ᱟᱡ ᱵᱟᱵᱟ ᱪᱟᱹᱢᱯᱟᱹᱭ ᱥᱚᱨᱮᱱ ᱵᱟ.ᱨᱯᱟᱫᱟ ᱨᱮᱜᱮ ᱯᱩᱞᱤᱥ ᱨᱟᱭᱴᱚᱨ ᱞᱮᱠᱟᱭ ᱠᱟᱹᱢᱤ ᱠᱟᱱ ᱛᱟᱦᱮᱸᱫ ᱾
ᱵᱷᱚᱸᱡᱽ ᱫᱤᱥᱚᱢ ᱨᱮᱭᱟᱜ ᱫᱚ ᱢᱤᱫᱴᱟᱹᱝ ᱥᱩᱢᱩᱝ ᱜᱮ ᱩᱱᱩᱥᱩᱞ ᱟᱥᱲᱟ ᱛᱟᱦᱮᱸ ᱠᱟᱱᱟ ᱾ ᱚᱱᱟ ᱫᱚ ᱵᱟᱹᱨᱯᱟᱫᱟ ᱩᱱᱩᱥᱩᱞ ᱟᱥᱲᱟ ᱢᱮᱱᱛᱮ ᱧᱩᱛᱩᱢ ᱞᱮᱱᱟ ᱾ ᱚᱱᱟ ᱤᱛᱩᱱ ᱟᱥᱲᱟ ᱱᱮᱛᱟᱨ ᱫᱚ ᱵᱷᱚᱸᱡᱽ ᱫᱤᱥᱚᱢ ᱨᱟᱡᱟ ᱩᱱᱩᱭᱦᱟ.ᱨ ᱞᱮᱠᱟᱛᱮ M. K. C. High School ᱧᱩᱢ ᱟᱹᱨᱩ ᱮᱱᱟ ᱢᱮᱱᱮᱛ ᱢᱟᱦᱟᱨᱟᱡᱟ ᱠᱨᱩᱥᱱᱚ ᱪᱚᱸᱫᱽᱨᱚ ᱩᱱᱩᱥᱩᱞ ᱟᱥᱲᱟ ᱾ ᱚᱸᱰᱮ ᱜᱮ ᱜᱚᱢᱠᱮ ᱥᱩᱱᱟᱹᱨᱟᱢ ᱥᱚᱨᱮᱱ ᱜᱚᱢᱠᱮ ᱦᱚᱸ ᱑᱙᱓᱗ ᱥᱟᱞᱮᱨᱮ ᱛᱟᱱᱟᱞᱟ ᱫᱚᱭ ᱥᱟᱹᱛ ᱠᱮᱜᱼᱟ ᱾
ᱨᱮᱵᱷᱮᱱᱥᱟ ᱵᱤᱨᱫᱟᱹᱜᱟᱲ ᱠᱚᱴᱚᱠ ᱨᱮ ᱚᱞᱚᱜ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱵᱟ.ᱨᱯᱟᱫᱟ ᱩᱱᱩᱥᱩᱞ ᱟᱥᱲᱟ ᱨᱮ ᱛᱟᱱᱟᱞᱟ ᱥᱟᱹᱛ ᱠᱟᱛᱮ ᱪᱮᱛᱟᱱ ᱥᱮᱫ ᱯᱟᱲᱦᱟᱣᱜ ᱞᱟᱹᱜᱤᱫ ᱮ ᱢᱚᱱᱮ ᱠᱮᱫᱼᱟ ᱾ ᱵᱷᱚᱸᱡᱽ ᱫᱤᱥᱚᱢ ᱨᱮ ᱩᱱ ᱡᱚᱦᱚᱜ ᱫᱚ ᱵᱤᱨᱫᱟᱹᱜᱟᱲ ᱜᱮ ᱵᱟᱝ ᱛᱟᱦᱮᱸ ᱠᱟᱱᱟ ᱾ ᱚᱱᱟᱛᱮ ᱨᱮᱵᱷᱮᱱᱥᱟ ᱵᱤᱨᱫᱟᱹᱜᱟᱲ ᱠᱚᱴᱚᱠ ᱨᱮᱭ ᱵᱚᱥᱞᱚᱛ ᱮᱱᱟ ᱾ ᱪᱮᱫᱮᱛ ᱰᱮᱨᱟ (Hostel) ᱨᱮ ᱛᱟᱦᱮᱸ ᱠᱟᱛᱮᱭ ᱚᱞ ᱯᱟᱲᱦᱟᱣ ᱠᱮᱫᱼᱟ ᱾ ᱚᱱᱟ ᱫᱚ ᱑᱙᱓᱘ ᱥᱟᱞᱮᱨᱮ ᱛᱟᱦᱮᱸ ᱠᱟᱱᱟ ᱾
ᱚᱸᱰᱮ ᱢᱤᱫ ᱫᱷᱟᱣ ᱛᱮ ᱚᱞᱚᱜ ᱡᱚᱴᱟᱣ ᱫᱚ ᱦᱟᱹᱛᱤᱵᱷᱟᱹᱨᱤ ᱟᱹᱛᱩ ᱨᱤᱱᱤᱡ ᱫᱩᱵᱽᱨᱟᱡᱽ ᱥᱚᱶ ᱮ ᱛᱟᱦᱮᱸ ᱠᱟᱱᱟ ᱾ ᱴᱷᱤᱠ ᱚᱱᱟ ᱥᱮᱨᱢᱟ ᱜᱮ ᱛᱟᱨᱬᱟ ᱟᱹᱛᱩ (ᱵᱷᱚᱸᱡᱽ) ᱥᱩᱱᱫᱚᱨ ᱢᱳᱦᱚᱱ ᱦᱮᱸᱵᱽᱨᱚᱢ ᱜᱚᱢᱠᱮ ᱦᱚᱸ I. Sc. ᱚᱞᱚᱜ ᱠᱟᱱ ᱛᱟᱦᱮᱸᱫ ᱾ ᱵᱟᱱᱟ ᱦᱚᱲ ᱚᱸᱰᱮ ᱠᱤᱱ ᱠᱩᱯᱩᱞᱤ ᱧᱟᱯᱟᱢ ᱮᱱᱟ ᱾ ᱩᱱ ᱡᱚᱦᱚᱜ ᱠᱷᱚᱱ ᱜᱮ ᱡᱟᱹᱛᱤ ᱥᱟᱶᱛᱟ ᱨᱮᱭᱟᱜ ᱠᱟᱛᱷᱟ ᱫᱚ ᱠᱤᱱ ᱩᱨᱦᱟᱹᱨ ᱵᱟᱲᱟᱭ ᱛᱟᱦᱮᱸᱫ ᱾
ᱡᱩᱨᱤ ᱡᱚᱛᱟ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱜᱚᱢᱠᱮ ᱥᱩᱱᱟᱹᱨᱟᱢ ᱥᱚᱨᱮᱱ ᱫᱚ ᱑᱙᱔᱓ ᱥᱟᱞᱮᱨᱮ ᱢᱚᱫᱷᱩ ᱥᱩᱫᱚᱱ Law Collage, ᱠᱚᱴᱚᱠ ᱨᱮᱭ ᱚᱞᱚᱜ ᱠᱟᱱ ᱡᱚᱦᱚᱜ ᱜᱮ ᱵᱟᱹᱥᱤᱯᱤᱴᱷᱟᱹ ᱡᱟᱯᱟᱜ ᱯᱚᱰᱟᱰᱤᱦᱟᱹ ᱟᱹᱛᱩ ᱨᱤᱱᱤᱡ ᱥᱚᱱᱟ ᱴᱩᱰᱩ ᱧᱩᱛᱩᱢ ᱟᱹᱱᱤᱡ ᱢᱤᱫ ᱠᱩᱲᱤ ᱥᱟᱶ ᱮ ᱵᱟᱯᱞᱟ ᱞᱮᱱᱟ ᱾ ᱩᱱ ᱫᱚ ᱥᱩᱱᱟᱹᱨᱟᱢ ᱥᱚᱨᱮᱱ ᱟᱜ ᱩᱢᱮᱨ ᱫᱚ ᱒᱕ ᱥᱮᱨᱢᱟ ᱦᱩᱭ ᱞᱮᱱ ᱛᱟᱦᱮᱸᱫ ᱾ ᱥᱚᱱᱟ ᱴᱩᱰᱩ ᱟᱡ ᱵᱟᱵᱟ ᱛᱮᱠᱚ ᱫᱚ ᱚᱠᱟ ᱞᱮᱠᱟ ᱪᱚ ᱵᱷᱚᱸᱡᱽ ᱨᱟᱡᱟ ᱥᱟᱞᱟᱜ ᱯᱷᱩᱞ ᱯᱮᱲᱟ ᱠᱚ ᱛᱟᱦᱮᱸ ᱠᱟᱱᱟ ᱾
ᱚᱞ ᱥᱚᱢᱤᱛᱤ ᱵᱮᱨᱮᱫ ᱨᱮ ᱥᱮᱞᱮᱫ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱚᱞ ᱪᱤᱠᱤ ᱞᱟᱦᱟ ᱚᱪᱚᱭ ᱞᱟᱹᱜᱤᱫ ᱜᱩᱨᱩ ᱜᱚᱢᱠᱮ ᱟᱨ ᱫᱤᱥᱚᱢ ᱜᱚᱲᱚᱢ ᱦᱟᱲᱟᱢ ᱥᱟᱣᱱᱟ ᱢᱩᱨᱢᱩ ᱛᱤᱠᱤᱱ ᱥᱟᱶ ᱵᱷᱩᱛᱲᱤ ᱟᱹᱛᱩ ᱢᱟᱹᱱ ᱥᱚᱢᱨᱟ ᱪᱚᱨᱚᱬ ᱴᱩᱰᱩ ᱥᱟᱶ ᱜᱟᱯᱟᱞ ᱢᱟᱨᱟᱣ ᱠᱟᱛᱮ ᱵᱚᱰᱟᱢ ᱛᱟᱹᱲᱤᱭᱟᱹ ᱨᱮ ᱢᱤᱫᱩᱱ ᱠᱚ ᱦᱚᱦᱚ ᱞᱮᱫᱼᱟ ᱾ ᱚᱱᱟ ᱥᱮᱨᱢᱟ ᱫᱚ ᱛᱟᱦᱮᱸ ᱠᱟᱱᱟ ᱑᱙᱓᱙ ᱥᱟᱞᱮ ᱾ ᱚᱱᱟ ᱢᱤᱫᱩᱱ ᱨᱮ ᱥᱚᱢᱨᱟ ᱪᱚᱨᱚᱬ ᱴᱩᱰᱩ ᱜᱮ ᱯᱟᱨᱥᱮᱛ ᱫᱚᱭ ᱛᱟᱦᱮᱸ ᱠᱟᱱᱟ ᱾ ᱢᱤᱫᱩᱱ ᱨᱮ ᱔᱐᱐᱐ ᱜᱟᱱ ᱦᱚᱲ ᱠᱚ ᱦᱮᱡ ᱡᱟᱣᱨᱟ ᱞᱮᱱᱟ ᱾ ᱟᱨ "ᱚᱞ ᱥᱚᱢᱤᱛᱤ" ᱢᱮᱱᱛᱮ ᱢᱤᱫ ᱜᱟᱶᱛᱟ ᱠᱚ ᱵᱮᱨᱮᱫ ᱞᱮᱫᱼᱟ ᱾ ᱚᱱᱟᱨᱮ ᱢᱩᱬᱩᱛ ᱠᱟᱹᱢᱤᱭᱟᱹ ᱠᱚ ᱛᱟᱦᱮᱸ ᱠᱟᱱᱟ -- ᱯᱟᱨᱥᱮᱛ ᱺ ᱢᱟᱹᱱ ᱥᱚᱢᱨᱟ ᱪᱚᱨᱚᱬ ᱢᱟᱹᱡᱷᱤ (ᱵᱷᱚᱸᱡᱽ) ᱾ ᱜᱚᱢᱠᱮ ᱥᱩᱱᱟᱨᱟᱢ ᱥᱚᱨᱮᱱ ᱟᱨ ᱛᱟᱨᱬᱟ ᱟᱹᱛᱩ ᱨᱤᱱᱤᱡ ᱢᱟᱹᱱ ᱥᱩᱱᱫᱚᱨ ᱢᱳᱦᱚᱱ ᱦᱮᱸᱵᱽᱨᱚᱢ ᱫᱚ ᱥᱚᱦᱮᱛ ᱮ ᱛᱟᱦᱮᱸ ᱠᱟᱱᱟ ᱾ ᱚᱱᱟ ᱢᱤᱫᱩᱜ ᱫᱚ ᱚᱞ ᱪᱤᱠᱤ ᱪᱟᱞᱟᱣ ᱞᱟ.ᱜᱤᱫ ᱟᱹᱭᱫᱟᱹᱨᱤ ᱦᱟᱛᱟᱣ ᱵᱟᱠᱷᱨᱟ ᱵᱟᱹᱨᱯᱟᱫᱟ ᱢᱟᱦᱟᱨᱟᱡᱟ ᱴᱷᱮᱱ ᱫᱟᱹᱵᱤ ᱥᱟᱠᱟᱢ ᱮᱢ ᱨᱮᱭᱟᱜ ᱠᱚ ᱴᱷᱟᱹᱣᱠᱟᱹ ᱠᱮᱫᱼᱟ ᱾ ᱫᱟᱹᱵᱤ ᱥᱟᱠᱟᱢ ᱵᱮᱱᱟᱣ ᱨᱮ ᱜᱚᱢᱠᱮ ᱥᱩᱱᱟ.ᱨᱟᱢ ᱥᱚᱨᱮᱱ ᱟᱨ ᱥᱩᱱᱫᱚᱨ ᱢᱚᱦᱚᱱ ᱜᱚᱢᱠᱮ ᱛᱤᱠᱤᱱ ᱠᱚ ᱵᱚᱨᱟᱛ ᱠᱮᱫ ᱠᱤᱱᱟ ᱾ ᱚᱞ ᱠᱟᱛᱮ "ᱚᱞ ᱥᱚᱢᱤᱛᱤ" ᱯᱟᱨᱥᱮᱛ ᱴᱷᱮᱱ ᱠᱤᱱ ᱫᱟᱠᱷᱳᱞ ᱠᱮᱫᱼᱟ ᱾ ᱯᱟᱨᱥᱮᱛ ᱜᱚᱢᱠᱮ ᱫᱚ ᱫᱤᱥᱚᱢ ᱦᱚᱲ ᱠᱚ ᱴᱷᱮᱱ ᱠᱷᱚᱱ ᱥᱩᱦᱤ ᱦᱟᱛᱟᱣ ᱚᱪᱚᱭ ᱞᱟᱹᱜᱤᱫ ᱛᱮ ᱴᱮᱱᱴᱚ ᱯᱩᱥᱤ ᱟᱹᱛᱩ (ᱵᱷᱚᱸᱡᱽ) ᱨᱤᱱᱤᱡ ᱢᱟᱥᱟᱝ ᱢᱟᱹᱡᱷᱤ ᱵᱷᱟᱨᱟᱭ ᱮᱢᱟᱫ ᱫᱮᱭᱟ ᱾ ᱥᱩᱦᱤ ᱵᱟᱲᱟ ᱚᱪᱚ ᱠᱟᱛᱮ ᱯᱟᱨᱥᱮᱛ ᱜᱚᱢᱠᱮ ᱴᱷᱮᱱ ᱮ ᱫᱟᱠᱷᱳᱞ ᱨᱩᱣᱟᱹᱲ ᱠᱟᱫᱼᱟ ᱾ ᱱᱮᱸᱰᱟ ᱢᱟᱦᱟᱨᱮ ᱢᱟᱦᱟᱨᱟᱡᱟ ᱴᱷᱮᱱ ᱫᱟᱹᱵᱤ ᱥᱟᱠᱟᱢ ᱫᱟᱠᱷᱳᱞ ᱡᱚᱦᱚᱜ ᱜᱚᱢᱠᱮ ᱥᱩᱱᱟᱹᱨᱟᱢ ᱥᱚᱨᱮᱱ ᱦᱚᱸᱭ ᱢᱮᱥᱟ ᱞᱮᱱ ᱜᱮ ᱛᱟᱦᱮᱸᱫ ᱾ ᱪᱮᱫᱟᱜ ᱥᱮ ᱟᱡ ᱫᱚ ᱵᱟᱹᱨᱯᱟᱫᱟ ᱨᱮ ᱚᱞᱚᱜ ᱡᱚᱦᱚᱜ ᱢᱟᱦᱟᱨᱟᱡᱟ ᱦᱚᱯᱚᱱ ᱥᱟᱞᱟᱜ ᱡᱚᱴᱟᱣ ᱮ ᱛᱟᱦᱮᱸ ᱠᱟᱱᱟ ᱾ ᱚᱱᱟᱛᱮ ᱡᱚᱛᱚ ᱜᱮᱠᱚ ᱫᱤᱞ ᱵᱷᱚᱨᱥᱟ ᱞᱮᱫᱼᱟ ᱾
ᱵᱷᱚᱸᱡᱽ ᱢᱟᱨᱟᱝ ᱜᱚᱢᱠᱮ ᱟᱨ ᱨᱟᱡᱽ ᱟᱹᱨᱤ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]᱑᱙᱕᱒ ᱥᱟᱞᱮ ᱥᱚᱨᱠᱟᱨᱟᱜ ᱯᱩᱞᱭᱩ ᱵᱟᱪᱷᱚᱱ ᱨᱮ ᱟᱹᱫᱤᱵᱟᱹᱥᱤ ᱜᱚᱢᱠᱮ ᱠᱷᱚᱱ ᱚᱠᱚᱭ ᱮ ᱮᱢ. ᱮᱞ. ᱮ. ᱮᱱᱟ, ᱚᱠᱚᱭ ᱫᱚᱭ ᱮᱢ. ᱯᱤ. ᱮᱱᱟ ᱟᱨ ᱚᱠᱚᱭ ᱫᱚᱭ ᱢᱚᱱᱛᱨᱤ ᱮᱱᱟ ᱾ ᱡᱤᱛᱠᱟᱹᱨ ᱟᱠᱟᱱ ᱜᱚᱢᱠᱮ ᱢᱟᱹᱫᱽ ᱠᱷᱚᱱ ᱵᱷᱚᱸᱡᱽ ᱢᱟᱨᱟᱝ ᱜᱚᱢᱠᱮ ᱫᱚ ᱳᱰᱤᱥᱟ ᱯᱚᱱᱚᱛ ᱥᱤᱨᱟᱹ ᱫᱮᱣᱟᱱ ᱱᱚᱵᱚ ᱠᱨᱩᱥᱱᱚ ᱪᱚᱣᱫᱷᱚᱨᱤᱭᱟᱜ ᱫᱮᱣᱟᱱ ᱦᱩᱫᱟᱹᱨᱮ ᱯᱩᱭᱞᱩ ᱟᱹᱫᱤᱵᱟᱹᱥᱤ ᱵᱷᱟᱹᱞᱟᱹᱭ ᱢᱚᱱᱛᱨᱤᱭ ᱵᱟᱪᱷᱚᱱ ᱞᱮᱱᱟ ᱾[᱒] ᱟᱹᱠᱤᱱ ᱛᱟᱦᱮᱸᱱ ᱚᱠᱛᱚ ᱦᱤᱡᱩᱜ ᱥᱮᱱᱚᱜ ᱦᱚᱨ ᱰᱟᱦᱟᱨ, ᱟᱹᱛᱩ ᱟᱹᱛᱩ ᱤᱛᱩᱱ ᱟᱥᱲᱟ, ᱟᱥᱨᱚᱢ ᱮ ᱵᱮᱱᱟᱣ ᱚᱪᱚ ᱠᱮᱫᱼᱟ ᱾ ᱚᱱᱟ ᱥᱟᱶᱛᱮ ᱟᱹᱛᱩ ᱟᱹᱛᱩ ᱠᱩᱸᱭ, ᱟᱦᱟᱨ, ᱯᱩᱠᱷᱨᱤ ᱮ ᱵᱟᱹᱭ ᱟᱫ ᱵᱚᱱᱟ ᱾
| ᱵᱟᱪᱷᱚᱱ | ᱫᱚᱨᱵᱟᱨ | ᱢᱟᱰᱮᱨ | ᱫᱚᱲ | ᱵᱷᱩᱴ | % | ᱚᱨᱡᱚ | |
|---|---|---|---|---|---|---|---|
| ᱑᱙᱗᱗ | ᱳᱰᱤᱥᱟ ᱵᱤᱫᱷᱟᱱᱥᱚᱵᱷᱟ | ᱵᱚᱦᱚᱲᱫᱟ | JP | ᱑᱑,᱓᱒᱑ | ᱕᱙.᱑᱙ | Won | |
| ᱑᱙᱗᱔ | JKP | ᱔,᱙᱘᱐ | ᱑᱙.᱙᱖ | Lost | |||
| ᱑᱙᱖᱗ | OJC | ᱑᱐,᱙᱔᱗ | ᱕᱒.᱗᱔ | Won | |||
| ᱑᱙᱖᱑ | INC | ᱑᱐,᱖᱐᱒ | ᱕᱓.᱐᱔ | Won | |||
| ᱑᱙᱕᱗ | ᱓,᱙᱒᱘ | ᱒᱖.᱔᱒ | Lost | ||||
| ᱑᱙᱕᱑ | ᱑᱑,᱐᱑᱒ | ᱘᱖.᱗᱘ | Won | ||||
ᱥᱟᱹᱠᱷᱭᱟᱹᱛ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]- ↑ ᱵᱷᱚᱸᱡᱽ ᱵᱤᱻᱨ ᱥᱩᱱᱟᱹᱨᱟᱢ ᱥᱚᱨᱮᱱ (ᱯᱩᱭᱞᱩ ed.). ᱵᱟᱨᱤᱯᱚᱫᱟ: ᱦᱟᱸᱥ ᱦᱟᱹᱥᱞᱤ ᱯᱟᱨᱥᱟᱞᱮᱛ. ᱓᱐ ᱡᱩᱱ ᱒᱐᱑᱙. p. ᱓᱕. ISBN 978-81-940541-3-9.
{{cite book}}:|first1=missing|last1=(help); Check date values in:|date=(help) - ↑ http://www.odishahelpline.com/Profile-of-Sonaram-Soren-of-BAHALDA-constituency-648.html
ᱵᱟᱦᱨᱮ ᱡᱚᱱᱚᱲ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]- Articles with short description
- Short description is different from Wikidata
- CS1 errors: missing name
- CS1 errors: dates
- ᱑᱙᱑᱘ ᱨᱮ ᱡᱟᱱᱟᱢ ᱠᱚ
- ᱑᱙᱘᱘ ᱨᱮ ᱜᱩᱨ ᱠᱚ
- ᱥᱤᱧᱚᱛᱤᱭᱟᱹ ᱨᱟᱡᱽᱟᱹᱨᱤᱭᱟᱹ ᱠᱚ
- ᱥᱤᱧᱚᱛᱤᱭᱟᱹ ᱡᱟᱹᱛᱤᱭᱟᱹᱨᱤ ᱠᱚᱝᱜᱽᱨᱮᱥ ᱨᱤᱱ ᱨᱟᱡᱽᱟᱹᱨᱤᱭᱟᱹ ᱠᱚ
- ᱳᱰᱤᱥᱟ ᱨᱤᱱ ᱵᱤᱫᱷᱟᱭᱚᱠ ᱠᱚ ᱑᱙᱕᱒–᱑᱙᱕᱗
- ᱳᱰᱤᱥᱟ ᱨᱤᱱ ᱵᱤᱫᱷᱟᱭᱚᱠ ᱠᱚ ᱑᱙᱖᱑–᱑᱙᱖᱗
- ᱳᱰᱤᱥᱟ ᱨᱤᱱ ᱵᱤᱫᱷᱟᱭᱚᱠ ᱠᱚ ᱑᱙᱖᱗–᱑᱙᱗᱑
- ᱳᱰᱤᱥᱟ ᱨᱤᱱ ᱵᱤᱫᱷᱟᱭᱚᱠ ᱠᱚ ᱑᱙᱗᱗–᱑᱙᱘᱐
- ᱡᱚᱱᱛᱟ ᱯᱟᱨᱴᱤ ᱨᱤᱱ ᱨᱟᱡᱽᱟᱹᱨᱤᱭᱟᱹ ᱠᱚ
- ᱡᱚᱱᱛᱟ ᱯᱟᱨᱴᱤ
- ᱢᱚᱭᱩᱨᱵᱷᱚᱸᱡᱽ ᱦᱚᱱᱚᱛ ᱨᱤᱱ ᱦᱚᱲ
- ᱵᱨᱤᱴᱤᱥ ᱥᱤᱧᱚᱛ ᱨᱤᱱ ᱦᱚᱲ
- ᱳᱰᱤᱥᱟ ᱨᱤᱱ ᱦᱚᱲ
- ᱥᱟᱱᱛᱟᱲᱤ ᱦᱚᱲ
- ᱤᱱᱰᱤᱠ ᱣᱤᱠᱤ ᱤᱢᱯᱨᱩᱵᱷ-ᱟ-ᱛᱷᱚᱱ ᱒᱐᱒᱒