ᱪᱟᱸᱫᱩ ᱵᱚᱝᱜᱟ

ᱣᱤᱠᱤᱯᱤᱰᱤᱭᱟ, ᱨᱟᱲᱟ ᱜᱮᱭᱟᱱ ᱯᱩᱛᱷᱤ ᱠᱷᱚᱱ

ᱪᱟᱸᱫᱩ ᱵᱚᱝᱜᱟ(ᱦᱩᱰᱤᱧ ᱠᱟᱹᱦᱱᱤ)


ᱪᱟᱸᱫᱩ ᱵᱚᱝᱜᱟ ᱫᱚ ᱟᱰᱤ ᱱᱟᱯᱟᱭ ᱦᱚᱲ ᱠᱟᱱᱟᱭ,ᱵᱟᱰᱟᱭ ᱠᱮᱫᱟᱢ ᱫᱟᱹᱭ! ᱤᱧᱟᱜ ᱛᱤ ᱨᱮ ᱚᱱᱠᱟᱱ ᱫᱟᱲᱮ ᱛᱟᱦᱮᱸ ᱞᱮᱱᱠᱷᱟᱱ ᱪᱟᱸᱫᱩ ᱵᱚᱝᱜᱟ ᱜᱮ ᱱᱚᱵᱮᱞ,ᱚᱨᱡᱩᱱ ᱫᱟᱫᱟ ᱥᱟᱦᱮᱵ ᱮᱢᱟᱱ ᱮᱢᱟᱱ ᱫᱟᱢᱟᱱ ᱥᱤᱨᱯᱟᱹ ᱢᱤᱫᱽ ᱫᱷᱟᱣ ᱛᱮ ᱡᱚᱛᱚ ᱮᱢ ᱠᱮᱭᱟ|"

"ᱟᱢ ᱫᱚ ᱚᱠᱚᱭ ᱠᱟᱱᱟᱢ ᱜᱚᱢᱠᱮ? ᱧᱮᱞ ᱵᱟᱹᱱᱩᱜ ᱧᱟᱯᱟᱢ ᱵᱟᱹᱱᱩᱜᱹᱹᱹᱹᱹᱹᱹᱪᱟᱸᱫᱩ ᱵᱚᱝᱜᱟ ᱟᱜ ᱱᱮᱦᱟᱛ ᱧᱩᱛᱩᱢ ᱧᱩᱢ ᱠᱟᱛᱮ ᱵᱚᱞᱚᱱ ᱠᱟᱱᱫᱚ!"

"ᱪᱟᱸᱫᱩ ᱵᱚᱝᱜᱟ ᱟᱜ ᱧᱩᱛᱩᱢ ᱟᱡᱚᱢ ᱞᱮᱠᱷᱟᱱ ᱜᱮ ᱛᱤᱦᱤᱧ ᱜᱟᱯᱟ ᱦᱚᱲ ᱠᱚᱡᱷᱩᱢᱞᱟᱹᱣ ᱦᱤᱡᱩᱜ ᱠᱟᱱᱟ! ᱱᱚᱣᱟ ᱜᱮ ᱠᱚ ᱢᱮᱛᱟᱜ ᱠᱟᱱᱟ ᱥᱚᱫᱚᱨ ᱱᱟᱦᱟᱜ|"

"ᱡᱟᱦᱟᱸᱱᱟᱜ ᱟᱹᱠᱷᱨᱤᱧ ᱞᱟᱹᱜᱤᱛ ᱮᱢ ᱦᱮᱡᱽᱟᱠᱟᱱᱟ ᱥᱮ ᱪᱮᱫ? ᱮᱱ ᱛᱮ ᱠᱷᱟᱱ ᱦᱤᱡᱩᱜ ᱢᱮ| ᱠᱟᱹᱢᱤ ᱠᱚ ᱡᱚᱛᱚ ᱛᱟᱨᱟᱞ ᱵᱟᱥᱟᱞ ᱟᱠᱟᱱᱟ ᱥᱟᱢᱴᱟᱣ ᱦᱚᱭᱚᱜ ᱛᱤᱧᱟ|

"ᱪᱮᱫ ᱟᱠᱷᱚᱨᱤᱧ ᱴᱟᱹᱠᱨᱤᱧ ᱦᱚ ᱤᱧ ᱫᱚ ᱵᱟᱹᱧ ᱦᱮᱡ ᱟᱠᱟᱱᱟ| ᱪᱟᱸᱫᱩ ᱟᱜ ᱱᱮᱦᱚᱨ ᱛᱮ ᱟᱯᱮ ᱥᱟᱣ ᱛᱮ ᱧᱟᱯᱟᱢ ᱤᱧ ᱦᱮᱡᱽ ᱟᱠᱟᱱᱟ|"

"ᱯᱩᱴᱠᱟᱹ ᱟᱡ ᱟᱯᱟᱛ ᱫᱚ ᱚᱲᱟᱜ ᱨᱮ ᱵᱟᱹᱱᱩᱭᱟ, ᱫᱤᱞ ᱫᱟᱲᱮᱢ ᱧᱟᱢ ᱠᱮᱫᱟ ᱵᱟᱝ ᱥᱮ?"

"ᱵᱤᱴᱟᱹᱭ ᱜᱚᱢᱠᱮ ᱵᱟᱹᱱᱩᱭᱟ?"

"ᱟᱢ ᱩᱱᱤᱢ ᱪᱤᱱᱦᱟᱹ ᱯᱮ ᱜᱮᱭᱟ ᱥᱮ ᱪᱮᱫ? ᱛᱷᱚᱠᱲᱮ ᱛᱷᱚᱠᱲᱮ!

ᱟᱢ ᱥᱟᱣ ᱛᱮ ᱵᱮ ᱵᱟᱹᱲᱤᱡ ᱤᱧ ᱵᱮᱣᱦᱟᱨ ᱠᱮᱫᱟ! ᱤᱠᱟᱹ ᱠᱟᱧ ᱢᱮ ᱢᱟᱨᱟᱝ ᱫᱟ! ᱵᱚᱞᱚᱱ ᱢᱮ,ᱫᱩᱲᱩᱵ ᱢᱮ ᱫᱮᱞᱟ| ᱮ ᱵᱤᱴᱤ ᱤᱱᱟᱹ ᱜᱮ ᱚᱞᱚᱜ ᱢᱮ| ᱢᱟᱨᱟᱝ ᱫᱟ ᱯᱮᱴᱮᱨ ᱢᱟᱹᱪᱤ ᱥᱩᱨ ᱟᱭ ᱢᱮ|

"ᱵᱟᱹᱭᱡᱟᱱ ᱯᱩᱴᱠᱟᱹ ᱫᱚ ᱵᱟᱹᱧ ᱪᱤᱱᱦᱟᱹᱯ ᱠᱟᱫᱮᱭᱟ| ᱠᱷᱟᱹᱞᱤ ᱧᱩᱛᱩᱢ ᱟᱨ ᱯᱟᱹᱨᱥᱤ ᱢᱚᱛᱚ ᱜᱮᱧ ᱵᱟᱰᱟᱭᱟ| ᱟᱨ,ᱩᱱᱤ ᱥᱟᱣ ᱧᱟᱯᱟᱢ ᱧᱟᱯᱟᱢ ᱛᱮ ᱧᱟᱯᱟᱢ ᱜᱮ ᱵᱟᱝ ᱦᱩᱭ ᱞᱮᱱᱟ|"

"ᱟᱢ ᱯᱩᱴᱠᱟᱹ ᱟᱡ ᱟᱯᱟᱛ ᱟᱜ ᱧᱩᱛᱩᱢ ᱮᱢ ᱧᱩᱢ ᱠᱮᱫᱟ ᱢᱟᱱᱮ ᱮᱠᱟᱞ ᱯᱮᱲᱟ ᱜᱮ| ᱦᱟᱹᱱᱤ ᱛᱚᱯᱩᱴᱠᱟᱹ ᱯᱮᱴᱮᱨ ᱢᱟᱹᱪᱤᱭ ᱵᱷᱮᱨ ᱵᱷᱮᱨᱟᱣ ᱮᱫ ᱠᱟᱱ|ᱟᱢ ᱛᱷᱤᱨ ᱧᱚᱜ ᱛᱮ ᱫᱩᱲᱩᱵ ᱢᱮ| ᱤᱧ ᱞᱚᱞᱚ ᱫᱟᱜ ᱠᱚᱧ ᱟᱹᱜᱩᱭᱮᱫ ᱠᱟᱱᱟ| ᱯᱩᱴᱠᱟᱹ ᱟᱯᱟᱛ ᱞᱟᱹᱜᱛᱤ ᱟᱱᱟᱠ ᱠᱟᱹᱢᱤ ᱨᱮ ᱵᱟᱦᱮᱨ ᱛᱮ ᱪᱟᱞᱟᱣ ᱟᱠᱟᱱᱟ| ᱛᱤᱨᱮᱭ ᱨᱩᱣᱟᱹᱲᱟ ᱵᱟᱰᱟᱭ ᱵᱟᱹᱱᱩᱜ-ᱟ| ᱥᱮᱛᱟᱜ ᱛᱚᱨᱟ ᱵᱩᱜᱱᱟᱹ ᱛᱮ ᱞᱚᱞᱚ ᱫᱟᱜ ᱵᱟᱹᱧ ᱧᱩ ᱞᱮᱠᱷᱟᱱ ᱡᱟᱹᱯᱤᱫ ᱜᱮ ᱵᱟᱝ ᱪᱟᱵᱟᱝ-ᱟ| ᱟᱢᱟᱜ ᱦᱮᱲᱮᱢ ᱴᱮᱲᱮᱢ ᱵᱟᱨᱮᱛᱮ ᱪᱮᱫ ᱯᱚᱨᱵᱮᱞᱮᱢ ᱵᱟᱱᱩᱜ-ᱟ ᱛᱚ?"

"ᱫᱷᱩᱨᱮᱫ! ᱚᱱᱟ ᱡᱚᱛᱚ ᱮᱥᱮᱞ ᱢᱚᱴᱟ ᱦᱟᱨᱛᱟ ᱠᱚᱣᱟᱜ ᱨᱩᱣᱟᱹ ᱠᱟᱱᱟ| ᱤᱧ ᱫᱚ ᱥᱤᱭᱚᱜ ᱦᱚᱲ| ᱱᱚᱜ-ᱚᱭ ᱥᱤᱛᱩᱝ ᱡᱟᱹᱯᱩᱫ ᱤᱧ ᱥᱤ ᱠᱮᱫᱟ,ᱵᱟᱨ ᱤᱥᱤ ᱵᱷᱟᱹᱨᱭᱟ ᱜᱟᱹᱪᱷᱤᱧ ᱛᱩᱫᱽ ᱠᱮᱫᱟ ᱟᱨ ᱜᱮᱢᱮᱨ ᱠᱮᱫᱟᱹᱹᱹᱹᱹᱹᱹᱹ"

ᱟᱞᱮ ᱫᱚ ᱥᱤᱭᱚᱜ ᱦᱚᱲ ᱫᱚ ᱵᱟᱢ ᱠᱟᱱᱟ ᱞᱮ, ᱢᱮᱱᱠᱷᱟᱱ ᱟᱞᱮ ᱠᱷᱟᱴᱟᱣ ᱡᱟᱲᱟᱣ ᱩᱛᱟᱹᱨᱚᱜ ᱟᱞ| ᱪᱟᱥ ᱵᱟᱥ ᱠᱤ ᱢᱚᱪᱟ ᱠᱟᱛᱷᱟ ᱠᱟᱱᱟ? ᱥᱤᱭᱚᱜ ᱡᱟᱵᱚᱴ ,ᱜᱟᱹᱪᱷᱤ ᱜᱮᱢᱮᱨ,ᱦᱩᱲᱩ ᱨᱚᱦᱚᱭ,ᱡᱚᱨᱟ ᱮᱢ ᱮᱢᱟᱱ ᱠᱚ ᱠᱚᱨᱟᱣ ᱛᱮᱜᱮ ᱡᱤᱣᱭᱤ ᱟᱝᱜᱨᱟ ᱩᱛᱟᱹᱨᱚᱜ-ᱟ|"

"ᱫᱤᱱᱟᱹᱢ ᱞᱮᱠᱟᱱ ᱠᱟᱹᱢᱤ ᱦᱚᱲ ᱵᱟᱢ ᱫᱚᱦᱚ ᱟᱠᱟᱫ ᱠᱚᱣᱟ?"

ᱥᱤᱭᱚᱜ ,ᱪᱟᱥᱵᱟᱥ ᱠᱟᱹᱢᱤ ᱫᱚ ᱟᱯᱱᱟᱨ ᱦᱚᱯᱚᱱ ᱜᱤᱫᱽᱨᱟᱹ ᱞᱮᱠᱟ| ᱩᱱᱤ ᱟᱯᱱᱟᱨ ᱞᱮᱠᱟᱛᱮ ᱛᱮᱭᱟᱴᱮ ᱦᱚᱭᱚᱜ-ᱟ|ᱮᱱ ᱠᱷᱟᱱ ᱛᱚ ᱟᱞᱮ ᱫᱚ ᱢᱟᱨᱟᱝ ᱪᱟᱹᱥᱤ ᱵᱟᱝ ᱠᱟᱱᱟ ᱞᱮ ᱡᱮ ᱦᱚᱲ ᱞᱟᱜᱟᱣ ᱠᱟᱛᱮ ᱠᱚᱨᱟᱣ ᱦᱚᱪᱚ ᱠᱚᱣᱟ|

"ᱯᱩᱴᱠᱟᱹ ᱥᱤᱭᱚᱜ ᱠᱟᱢᱤ ᱨᱮ ᱵᱟᱢ ᱞᱟᱜᱟᱣ ᱠᱟᱫᱮᱭᱟ?"

"ᱵᱟᱝ ᱜᱮ ,ᱢᱟᱨᱟᱝ ᱫᱟ ᱩᱱᱤ ᱫᱚᱭ ᱚᱞᱚᱜ ᱠᱟᱱᱟ| ᱜᱟᱯᱟᱠᱷᱚᱱ ᱢᱮᱴᱨᱤᱠ ᱵᱤᱰᱟᱹᱣ ᱮᱛᱚᱦᱚᱵᱚᱜ ᱠᱟᱱᱟ| ᱟᱢ ᱯᱩᱴᱠᱟ ᱵᱟᱨᱮᱛᱮ ᱠᱟᱜᱚᱡ ᱨᱮ ᱧᱮᱞ ᱠᱟᱛᱮᱢ ᱦᱮᱡ ᱟᱠᱟᱱᱟ ᱵᱟᱝ ᱥᱮ?"

"ᱡᱚᱛᱷᱟᱛ ᱠᱟᱛᱷᱟᱢ ᱥᱟᱵ ᱟᱠᱟᱫᱟ ᱫᱟᱹᱭ|ᱠᱟᱜᱚᱡ ᱨᱮ ᱯᱩᱴᱠᱟᱹ ᱟᱜ ᱧᱩᱛᱩᱢ ᱵᱟᱨᱮᱛᱮ ᱚᱞ ᱧᱮᱞ ᱠᱟᱛᱮ ᱜᱮ ᱟᱯᱟᱛ ᱵᱤᱴᱟᱹᱭ ᱟᱜ ᱧᱩᱛᱩᱢ ᱤᱧ ᱵᱟᱰᱟᱭ ᱠᱮᱫᱟ|"

"ᱟᱞᱮ ᱟᱛᱚ ᱡᱷᱚᱸᱲᱮ ᱧᱩᱛᱩᱢᱟᱱ ᱠᱚᱲᱟ ᱵᱮᱨᱦᱟᱢᱯᱩᱨ ᱱᱟᱜᱟᱨ ᱨᱮ ᱠᱟᱜᱚᱡ ᱨᱮᱭ ᱪᱟᱹᱠᱨᱤ ᱠᱟᱱᱟ| ᱩᱱᱤ ᱞᱟᱦᱟ ᱯᱩᱴᱠᱟᱹ ᱟᱯᱟᱛ ᱥᱟᱣ ᱠᱟᱛᱷᱟ ᱴᱟᱛᱷᱟ ᱜᱟᱯᱟᱞ ᱢᱟᱨᱟᱣ ᱠᱟᱛᱮᱭ ᱪᱟᱞᱟᱣ ᱮᱱᱟ| ᱛᱟᱭᱚᱢ ᱛᱮ ᱧᱮᱞ ᱠᱟᱛᱮ ᱵᱟᱰᱟᱭ ᱠᱮᱫᱟ| ᱯᱩᱴᱠᱟᱹ ᱟᱜ ᱵᱤᱰᱟᱹᱣ ᱮᱢ ᱚᱲᱟᱜ ᱫᱚ ᱦᱩᱫᱩᱲ ᱦᱩᱫᱩᱲ ᱵᱤᱨᱫᱟᱹᱜᱟᱲ ᱨᱮ| ᱚᱱᱟ ᱱᱚᱰᱮ ᱠᱷᱚᱱ ᱵᱟᱨ ᱜᱮᱞ ᱠᱤᱢᱤ| ᱚᱱᱟ ᱥᱩᱨ ᱥᱩᱯᱩᱨ ᱦᱚᱲ ᱫᱚ ᱠᱚᱨᱩᱱᱟ ᱵᱚᱛᱚᱨ ᱛᱮ ᱚᱠᱚᱭ ᱦᱚ ᱚᱲᱟᱜ ᱵᱷᱟᱲᱟ ᱵᱟᱝ ᱠᱚ ᱮᱢᱟ ᱠᱚ ᱠᱟᱱᱟ| ᱟᱨ ᱱᱚᱛᱮ ᱵᱟᱥ ,ᱴᱮᱨᱮᱱ,ᱴᱚᱴᱚ ᱪᱮᱫ ᱦᱚ ᱵᱟᱝ ᱪᱟᱞᱟᱜ ᱠᱟᱱᱟ| ᱯᱩᱴᱠᱟᱹ ᱢᱤᱫ ᱥᱟᱭᱠᱤᱞ ᱮ ᱧᱟᱢ ᱞᱮᱫᱟ ᱜᱚᱨᱢᱮᱱ ᱠᱷᱚᱱ | ᱚᱱᱟ ᱦᱚ ᱵᱟᱨ ᱢᱟᱦᱟ ᱢᱟᱲᱟᱝ ᱠᱩᱢᱵᱚᱲᱩ ᱟᱠᱟᱱᱟ|"

"ᱮᱸ ᱦᱮᱸ! ᱥᱟᱹᱨᱤ ᱥᱮ?"

"ᱠᱩᱢᱵᱚᱲᱩ ᱵᱟᱝ ᱦᱚᱭ ᱞᱮᱱ ᱠᱷᱟᱱ ᱨᱮᱦᱚᱸ ᱞᱟᱵ ᱜᱮ ᱵᱟᱝ|ᱯᱩᱴᱠᱟᱹ ᱟᱯᱟᱛ ᱤᱱᱵᱚᱨᱚ ᱫᱷᱚᱠᱚᱨ ᱯᱚᱠᱚᱨ| ᱰᱟᱵᱚᱞ ᱟᱛᱮ ᱥᱟᱹᱠᱤᱞ ᱛᱮ ᱪᱟᱞᱟᱣ ᱚᱠᱛᱮ ᱡᱟᱦᱟᱸ ᱛᱟᱦᱟᱸ ᱦᱚᱭ ᱞᱮᱱᱠᱷᱟᱱᱜᱮ ᱱᱚᱭᱟᱱ ᱡᱩᱞᱤ ᱨᱮ ᱮᱜᱟ ᱦᱚᱱ ᱞᱤᱧ ᱧᱩᱨ ᱠᱚᱜ-ᱟ|"

"ᱠᱟᱛᱷᱟ ᱫᱚ ᱥᱟᱹᱨᱤ ᱜᱮ|"

" ᱪᱮᱠᱟ ᱞᱮᱠᱟᱛᱮ ᱯᱩᱴᱠᱟᱹ ᱵᱤᱰᱟᱹᱣ ᱮᱢᱚᱜ ᱮ ᱪᱟᱞᱟᱜ-ᱟ-ᱱᱚᱣᱟ ᱞᱟᱹᱜᱚᱫ ᱛᱮ ᱟᱯᱟᱛᱟᱜ ᱡᱟᱹᱯᱤᱛ ᱜᱮ ᱵᱟᱝ ᱦᱤᱡᱩᱜ ᱠᱟᱱᱟ| ᱯᱩᱴᱠᱟᱹ ᱟᱜ ᱦᱚᱨ ᱠᱷᱟᱴᱚ ᱞᱟᱹᱜᱤᱛ ᱛᱮ ᱥᱤᱢ ᱨᱟᱜ ᱨᱮ ᱚᱰᱚᱠ ᱟᱠᱟᱱᱟ| ᱱᱤᱛᱚ ᱦᱚ ᱵᱟᱭ ᱨᱩᱣᱟᱹᱲ ᱟᱠᱟᱱᱟ| ᱪᱮᱫ ᱪᱚ ᱦᱩᱭᱩᱜ|"

"ᱚᱱᱟ ᱠᱷᱟᱹᱛᱤᱨ ᱛᱮ ᱟᱯᱮ ᱚᱲᱟᱜ ᱵᱚᱞᱚᱱ ᱢᱟᱲᱟᱝ ᱨᱮ ᱪᱟᱸᱫᱩ ᱵᱚᱝᱜᱟ ᱟᱜ ᱧᱩᱛᱩ ᱧᱩᱢ ᱦᱚᱭᱮᱱᱟ| ᱡᱟᱦᱟᱸᱭ ᱨᱮᱱ ᱚᱠᱚᱭ ᱦᱚ ᱵᱟᱹᱱᱩᱭ, ᱩᱱᱤ ᱨᱮᱱ ᱪᱟᱸᱫᱩ ᱵᱚᱝᱜᱟ ᱢᱮᱱᱟᱭ| ᱱᱩᱱᱟᱹᱜ ᱞᱟᱹᱜᱛᱤ ᱟᱱᱟᱜ ᱦᱚᱲ ᱵᱟᱝ ᱠᱚ ᱧᱟᱢᱚᱜ ᱠᱟᱱᱟ| ᱚᱱᱟᱛᱮ ᱪᱟᱸᱫᱩ ᱵᱚᱝᱜᱟ ᱱᱚᱵᱮᱞ,ᱚᱨᱡᱩᱱ,ᱫᱟᱫᱟ ᱥᱟᱦᱮᱵ ᱮᱢᱟᱱ ᱥᱤᱨᱯᱟᱹ ᱮᱢ ᱠᱟᱛᱮ ᱦᱚᱸ ᱵᱟᱝ ᱯᱩᱨᱟᱹᱣ-ᱟ|"

"ᱜᱷᱟᱣ ᱨᱮ ᱵᱩᱞᱩᱝ ᱟᱞᱚᱢ ᱮᱨᱟᱜ-ᱟ ᱥᱮ| ᱱᱚᱜ-ᱚᱭ ᱞᱚᱞᱚ ᱫᱟᱜ|"

"ᱢᱤᱫᱴᱟᱝ ᱠᱟᱛᱷᱟᱧ ᱠᱩᱞᱤ ᱢᱮᱭᱟ ?

ᱵᱟᱹᱲᱤᱡ ᱵᱟᱢ ᱢᱚᱱᱮᱭᱟ ᱛᱚ?"

"ᱤᱧ ᱟᱯᱟᱛᱟᱜ ᱫᱚ ᱱᱟᱜᱟᱨ ᱨᱮᱱ ᱮᱛᱟᱝ ᱦᱟᱨᱛᱟ ᱦᱚᱲ ᱞᱮᱠᱟᱱᱟᱜ ᱪᱟᱹᱴᱤ ᱪᱟᱹᱴᱤ ᱠᱟᱛᱷᱟ ᱫᱚ ᱵᱟᱱᱩᱜ ᱛᱟᱭᱟ| ᱡᱟᱦᱟᱸ ᱨᱚᱲ ᱨᱮᱱᱟᱜ ᱢᱚᱪᱟ ᱢᱚᱪᱟ ᱨᱚᱲ-ᱟ| ᱪᱮ ᱢᱮᱱᱟ|"

"ᱟᱢ ᱨᱮᱱ ᱜᱤᱫᱽᱨᱟᱹ ᱟᱜ ᱧᱩᱛᱩᱢ ᱫᱚ ᱟᱹᱰᱤ ᱞᱚᱵᱷᱟᱣ ᱞᱮᱠᱟ! ᱯᱩᱴᱠᱟᱹ ᱯᱟᱣᱨᱤᱭᱟ|

"ᱟᱞᱮ ᱱᱚᱛᱮ ᱫᱚ ᱟᱹᱰᱤ ᱱᱟᱯᱟᱭ ᱱᱟᱯᱭ ᱯᱟᱨᱤᱥ ᱛᱟᱠᱚ| ᱢᱟᱨᱰᱤ,ᱢᱩᱨᱢᱩ,ᱦᱮᱢᱨᱚᱢ,ᱠᱤᱥᱠᱩ,ᱴᱩᱰᱩ,ᱵᱟᱥᱠᱭ ᱮᱢᱟᱱ ᱠᱚᱹᱹᱹᱹᱹᱹᱹᱹᱹᱹ| ᱢᱮᱠᱷᱟᱱ ᱟᱢᱟᱜ ᱯᱟᱨᱤᱥ ᱫᱚ ᱵᱟᱝ ᱤᱧ ᱵᱟᱰᱟᱭᱟ ᱛᱚ| ᱟᱢ ᱚᱠᱟ ᱠᱷᱚᱱᱮᱢ ᱦᱮᱡ ᱟᱠᱟᱱᱟ? ᱧᱮᱞ ᱛᱮ ᱫᱚ ᱱᱟᱜᱟᱨ ᱨᱮᱱ ᱦᱚᱲ ᱞᱮᱠᱟᱹᱹᱹᱹ?"

"ᱤᱧᱟᱜ ᱧᱩᱛᱩᱢ ᱫᱚ ᱵᱷᱚᱸᱫᱚᱲ ᱢᱩᱨᱢᱩ| ᱚᱲᱟᱜ ᱫᱚ ᱵᱮᱨᱦᱟᱢᱯᱩᱨ ᱱᱟᱜᱟᱨ ᱨᱮᱱᱟᱜ ᱡᱟᱹᱞᱤ ᱵᱟᱜᱟᱱ ᱴᱚᱴᱷᱟ ᱨᱮ|"

" ᱮ ᱯᱩᱴᱠᱟᱹ ᱢᱚᱱ ᱞᱟᱜᱟᱣ ᱚᱞᱚᱜ ᱢᱮ, ᱟᱯᱟᱛ ᱛᱩᱞ ᱦᱚᱲᱟᱜ ᱧᱩᱛᱩᱢ ᱟᱸᱡᱚᱢ ᱠᱟᱛᱮ ᱯᱚᱠᱚᱜ ᱨᱚᱴᱮ ᱞᱮᱠᱟ ᱟᱞᱚᱢ ᱞᱟᱸᱫᱟᱭᱟ! ᱯᱟᱦᱟ ᱛᱮ ᱫᱚ ᱱᱚᱝᱠᱟᱱ ᱧᱩᱛᱩᱢ ᱜᱮ ᱛᱟᱦᱮᱸ ᱠᱟᱱᱟ| "

"ᱳ ᱦᱳ ᱩᱱᱤ ᱫᱚ ᱟᱞᱚᱢ ᱨᱚᱦᱮᱫᱮᱭᱟ| ᱜᱤᱫᱽᱨᱟᱹ ᱜᱮᱭᱟᱭ|"

"ᱜᱤᱫᱽᱨᱟᱹ ᱥᱮ ᱜᱟᱹᱫᱤ! ᱪᱚᱨᱴᱷᱟ ᱨᱮᱱᱟᱜ ᱢᱩᱪᱟᱹᱰ ᱵᱟᱹᱱᱩᱜ! ᱜᱷᱟᱸᱨᱚᱧᱡ ᱨᱮ ᱟᱨ ᱚᱠᱚᱭ ᱠᱚ ᱢᱮᱱᱟᱜ ᱠᱚᱣᱟ?"

"ᱤᱧ ᱮᱨᱟ ᱱᱤᱥᱩᱱ ᱟᱨ ᱢᱟᱹᱭ ᱴᱩᱢᱤ| ᱢᱟᱹᱭ ᱫᱚ ᱱᱚᱵᱚᱫᱚᱭ ᱨᱮ ᱚᱞᱚᱜ ᱠᱟᱱᱟ|"

"ᱧᱩᱛᱩᱢ ᱫᱚ ᱱᱤᱨᱟᱹᱭ ᱜᱮ! ᱢᱮᱱᱠᱷᱟᱱ ᱱᱚᱣᱟ ᱵᱤᱨᱫᱟᱹᱜᱟᱲ ᱫᱚ ᱚᱠᱟᱨᱮ?"

"ᱵᱮᱨᱦᱟᱢᱯᱩᱨ ᱱᱟᱜᱟᱨ ᱨᱮ|"

"ᱟᱨ ᱱᱚᱣᱟ ᱞᱚᱠᱰᱟᱩᱱ ᱞᱟᱜᱟᱣ ᱮᱱ ᱠᱷᱟᱱ ᱧᱟᱯᱟᱢ ᱜᱮ ᱵᱟᱝ ᱦᱚᱭ ᱞᱮᱱᱟ|"

"ᱞᱚᱠ ᱰᱟᱩᱱ ᱨᱮᱱᱟᱜ ᱜᱟᱞᱢᱟᱨᱟᱣ ᱱᱟᱯᱟᱭ ᱵᱟᱝ ᱵᱩᱡᱷᱟᱹᱜ-ᱟ ᱢᱟᱨᱟᱝ ᱫᱟ| ᱡᱟᱸ ᱛᱟᱦᱮᱸ ᱠᱟᱱᱟ ᱟᱨ ᱪᱮᱫ ᱦᱚᱭᱮᱱᱟ| ᱡᱟᱦᱟᱸ ᱵᱚᱱ ᱵᱷᱟᱹᱵᱤᱛ ᱠᱟᱜ ᱛᱟᱦᱮᱸᱱᱟ ᱢᱚᱪᱟ ᱨᱮ ᱟᱸᱪᱟᱨ ᱞᱟᱜᱟᱣ ᱠᱟᱛᱮ ᱫᱟᱸᱲᱟᱱ ᱵᱚᱱ? ᱵᱷᱟᱹᱵᱤᱛ ᱠᱟᱜ ᱵᱚᱱ ᱡᱮ ᱜᱚᱨᱢᱮᱱ ᱮ ᱦᱩᱠᱩᱢᱟ,ᱡᱮ ᱚᱲᱟᱜ ᱠᱷᱚᱱ ᱵᱟᱝ ᱚᱰᱚᱠ ᱦᱚᱭᱚᱜ-ᱟ-ᱟᱨ ᱚᱱᱟ ᱦᱩᱠᱩᱢ ᱟᱵᱚ ᱵᱚᱱ ᱢᱟᱱᱟᱣ ᱵᱟᱛᱟᱣ-ᱟ? ᱫᱩᱠᱟᱱ,ᱤᱥᱠᱩᱞ,ᱠᱚᱞᱮᱡ ᱵᱚᱱᱫᱚ ᱛᱟᱦᱮᱸᱱᱟ ᱚᱱᱟ ᱵᱚᱱ ᱵᱷᱟᱹᱵᱤᱛ ᱠᱟᱜ ᱛᱟᱦᱮᱸ? ᱜᱚᱢᱮᱱ ᱢᱤᱫᱽ ᱨᱮᱨᱮᱧ ᱛᱤᱡᱩ ᱩᱫᱩᱜ ᱠᱟᱛᱮ ᱟᱵᱚᱭ ᱵᱚᱛᱚᱨ ᱦᱚᱪᱚ ᱠᱮᱫ ᱵᱚᱱᱟ ᱟᱨ ᱟᱵᱚ ᱫᱤᱥᱚᱢ ᱮ ᱟᱹᱠᱷᱨᱤᱧ ᱮᱫ ᱠᱟᱱᱟ!"

"ᱛᱤᱱᱟᱹᱜ ᱟᱹᱨᱤ ᱡᱮ ᱵᱚᱱ ᱢᱟᱱᱟᱣ ᱵᱟᱛᱟᱣ ᱮᱫ ᱠᱟᱱᱟ ᱫᱟᱹᱭ! ᱞᱟᱹᱭ ᱞᱮᱠᱷᱟᱱ ᱜᱮ ᱢᱚᱦᱟᱵᱷᱟᱨᱟᱛ! ᱤᱧ ᱨᱮᱱ ᱜᱚᱢᱠᱮ ᱠᱟᱹᱨᱠᱷᱟᱱᱟ ᱨᱮ ᱠᱩᱞᱩᱯ ᱠᱟᱛᱮ ᱢᱮᱱ ᱠᱮᱫᱟ,ᱡᱚᱛᱚ ᱞᱮᱠᱟᱱᱟᱜ ᱠᱟᱹᱢᱤ ᱠᱚ ᱞᱚᱠ ᱰᱟᱣᱱ ᱠᱷᱟᱹᱛᱤᱨ ᱛᱮ ᱵᱚᱱᱫᱚ ᱟᱠᱟᱱᱟ| ᱟᱯᱮ ᱚᱲᱟᱜ ᱪᱟᱞᱟᱜ ᱯᱮ, ᱞᱚᱠ ᱰᱟᱩᱱ ᱨᱟᱠᱟᱵ ᱞᱮᱱᱠᱷᱟᱱ ᱜᱮ ᱨᱩᱣᱟᱹᱲ ᱟᱯᱮ ᱱᱟᱦᱟᱜ|"

"ᱜᱚᱢᱠᱮ ᱫᱚ ᱢᱮᱱ ᱠᱟᱛᱮᱭ ᱨᱤᱦᱟᱹᱭ ᱦᱟᱛᱟᱣ ᱠᱮᱫᱟ|"

"ᱥᱟᱹᱨᱤ ᱠᱟᱛᱷᱟ ᱠᱟᱱᱟ ᱫᱟᱹᱭ| ᱱᱚᱛᱮ ᱤᱧᱟᱜ ᱦᱟᱞᱚᱛ ᱵᱷᱟᱹᱵᱤᱛ ᱢᱮ| ᱟᱨᱡᱟᱣ ᱢᱮᱱᱛᱮ ᱞᱮᱠᱷᱟ ᱡᱟᱹᱱᱤᱡ ᱠᱟᱹᱣᱰᱤ| ᱴᱮᱨᱮᱱ ᱵᱟᱝ ᱪᱟᱞᱟᱣ ᱞᱟᱱᱠᱷᱟᱱ ᱫᱚ ᱥᱟᱫᱚᱢ ᱵᱤᱞᱤ ᱵᱚᱱ ᱧᱟᱢᱟ| ᱵᱟᱥ,ᱞᱚᱨᱤ ᱴᱤᱨᱟᱠ,ᱴᱤᱢᱯᱩ-ᱪᱮᱫ ᱦᱚ ᱵᱟᱝ ᱪᱟᱞᱟᱜ ᱠᱟᱱᱟ| ᱢᱤᱫᱴᱟᱝ ᱜᱮ ᱨᱤᱦᱟᱹᱭ|ᱴᱷᱟᱹᱣᱠᱟᱹ ᱠᱮᱫᱟᱧ ᱛᱟᱲᱟᱢ ᱛᱟᱲᱟᱢ ᱛᱮ ᱚᱲᱟᱜ ᱵᱚᱱ ᱨᱩᱣᱟᱹᱲᱟ| ᱵᱟᱦᱨᱮ ᱵᱤᱫᱟᱹᱥ ᱨᱮ ᱮᱠᱞᱟ ᱮᱠᱞᱟ ᱵᱟᱝ ᱜᱚᱡᱽ ᱠᱟᱛᱮ ᱚᱲᱟᱜ ᱨᱮ ᱜᱤᱫᱟᱹᱨ-ᱯᱤᱫᱟᱹᱨ ᱟᱨ ᱮᱨᱟ-ᱩᱨᱩ ᱥᱟᱣ ᱜᱚᱡᱚᱜ ᱫᱚ ᱡᱚᱛᱚ ᱠᱷᱚᱱ ᱱᱟᱯᱟᱭ ᱜᱮᱭᱟ| ᱵᱟᱨ ᱥᱟᱭ ᱠᱤᱢᱤ ᱰᱟᱦᱟᱨ ᱟᱡᱛᱮ ᱯᱨᱚᱢᱚᱜ-ᱟ| ᱢᱟᱨᱟᱝ ᱵᱩᱨᱩ ᱴᱷᱮᱱ ᱱᱮᱦᱚᱨ ᱠᱟᱛᱮ ᱴᱩᱢᱤᱱ ᱥᱟᱣ ᱛᱮ ᱦᱚᱨ ᱠᱷᱟᱴᱚ ᱞᱟᱹᱜᱤᱛ ᱞᱤᱧ ᱚᱰᱚᱠ ᱮᱱᱟ|"

"ᱪᱟᱸᱫᱩ ᱵᱚᱝᱜᱟ?"

"ᱢᱮᱱᱟᱭᱟ ᱫᱟᱹᱭ | ᱢᱮᱱᱟᱭᱟ| ᱢᱟᱱᱟᱣ ᱞᱮᱱᱠᱷᱟᱱ ᱜᱮ ᱢᱮᱱᱟᱭᱟ,ᱵᱟᱝ ᱮᱢ ᱢᱟᱱᱟᱣᱮ ᱨᱮᱦᱚᱸ ᱢᱮᱱᱟᱭᱟ| ᱠᱷᱟᱹᱞᱤ ᱰᱷᱮᱭᱟᱱ ᱛᱮ ᱯᱟᱧᱡᱟ ᱧᱟᱢᱮ ᱦᱚᱭᱚᱜ-ᱟ| ᱤᱧ ᱧᱟᱢ ᱟᱠᱟᱫᱤᱭᱟ ᱢᱮᱱᱛᱮᱧ ᱵᱟᱰᱟᱭᱟ| ᱚᱱᱟ ᱠᱟᱷᱟ ᱞᱟᱹᱭ ᱞᱟᱹᱜᱤᱛ ᱛᱮ ᱛᱚᱱᱩᱱᱟᱹᱜ ᱥᱟᱹᱜᱤᱧ ᱤᱧ ᱧᱤᱨ ᱦᱮᱡᱽ ᱟᱠᱟᱱᱟ|"

"ᱮ ᱯᱩᱴᱠᱟᱹ| ᱚᱞᱰᱟᱹᱜ ᱞᱮᱠᱟ ᱟᱞᱚᱢ ᱵᱮᱝᱜᱮᱫᱟ| ᱚᱞᱚᱜ ᱵᱚᱸᱫᱚᱭ ᱢᱮ ᱱᱟᱦᱟᱜ ᱟᱢ ᱵᱟᱵᱟᱭ ᱦᱮᱡ ᱮᱱᱟ ᱢᱮᱱᱛᱮ! ᱦᱚᱭ ᱫᱟᱫᱟ, ᱟᱢ ᱞᱟᱹᱭ ᱢᱮ|"

"ᱢᱮᱱ ᱨᱮᱱᱟᱜ ᱟᱨ ᱪᱮᱫ ᱢᱮᱱᱟᱜ-ᱟ? ᱛᱩᱨᱩᱭ ᱱᱟᱢᱵᱟᱨ ᱰᱟᱦᱟᱨ ᱛᱟᱞᱟᱛᱮ,ᱢᱟᱹᱭ ᱥᱟᱣ ᱛᱮ ᱫᱟᱲᱟᱢ ᱞᱟᱜᱟᱣ ᱮᱱᱟ|"

"ᱚᱱᱟ ᱟᱨ ᱵᱟᱝ ᱞᱟᱹᱭ ᱦᱚᱭᱚᱜ-ᱟ| ᱧᱮᱱᱮᱞᱚᱢ ᱨᱮᱱ ᱦᱚᱲ ᱠᱚ ᱚᱱᱟ ᱩᱫᱩᱜ ᱠᱟᱛᱮ ᱜᱮ ᱠᱚ ᱠᱤᱥᱟᱹᱲ ᱩᱛᱟᱹᱨ ᱮᱱᱟ|"

" ᱚᱱ ᱠᱚ ᱡᱟ ᱠᱚ ᱩᱫᱩ ᱮᱰ ᱠᱟᱱᱟ ,ᱟᱨ ᱠᱷᱚᱵᱚᱨ ᱨᱮ ᱚᱱᱟ ᱠᱷᱚᱱ ᱥᱟᱹᱨᱤ ᱠᱟᱛᱷᱟ ᱵᱟᱦᱨᱮ ᱛᱟᱦᱮᱸᱱᱟ ᱫᱟᱹᱭ|"

"ᱤᱧ ᱧᱮᱱᱮᱞᱚᱢ ᱨᱮ ᱥᱤᱨᱤᱭᱟᱞ ᱤᱧ ᱧᱮᱞᱟ |ᱱᱚᱣᱟ ᱠᱷᱚᱱ ᱦᱟᱱᱟ ᱪᱮᱱᱮᱞ ᱯᱷᱟᱨᱟᱠ ᱵᱟᱝ ᱛᱟᱦᱮᱸᱱᱟ| ᱟᱯᱮᱭᱟᱜ ᱠᱟᱛᱷᱟ ᱞᱟᱹᱭ ᱢᱮ |"

" ᱟᱞᱮ ᱥᱟᱣ ᱛᱮ ᱟᱭᱢᱟ ᱦᱚᱲ ᱠᱚ ᱛᱟᱲᱟᱢ ᱮᱫ ᱠᱟᱱ ᱛᱟᱦᱮᱸ| ᱯᱩᱭᱞᱩ ᱯᱩᱭᱞᱩ ᱫᱚ ᱥᱚᱲᱮ ᱥᱚᱲᱮ ᱵᱷᱟᱵ ᱛᱟᱦᱮᱸ ᱠᱟᱱᱟ| ᱠᱷᱟᱹᱲᱩᱜ ᱠᱷᱟᱹᱲᱩᱜ ᱮ ᱛᱟᱲᱟᱢ ᱮᱫ ᱠᱟᱱ ᱢᱟᱹᱭ ,ᱚᱱᱟ ᱛᱮ ᱞᱤᱧ ᱛᱟᱭᱚᱢ ᱟᱠᱟᱱ ᱛᱟᱦᱮᱸ| ᱤᱧ ᱟᱨ ᱢᱟᱹᱭ ᱟᱯᱮ ᱚᱲᱟᱜ ᱥᱟᱢᱟᱝ ᱨᱮ ᱞᱤᱧ ᱥᱮᱴᱮᱨ ᱮᱱᱟ | ᱥᱩᱨ ᱥᱩᱯᱩᱨ ᱚᱠᱚᱭ ᱦᱚ ᱵᱟᱹᱱᱩᱜ ᱠᱚᱣᱟ| ᱟᱨ ᱢᱚᱪᱟ ᱨᱮ ᱟᱲᱟᱝ ᱜᱮ ᱵᱟᱹᱱᱩᱜ ᱟᱱ| ᱵᱟᱰᱟᱭᱟᱭ ᱨᱮᱝᱜᱮᱡ ᱚᱲᱟᱜ ᱮ ᱡᱟᱱᱟᱢ ᱟᱠᱟᱱᱟ ᱠᱚᱥᱴᱚ ᱥᱟᱦᱟᱣ ᱦᱚᱭᱚᱜ ᱜᱮᱭᱟ|"

"ᱚ ᱦᱟᱭ ᱨᱮ!"

ᱨᱮᱝᱜᱮᱡᱽ ᱦᱚᱲ ᱞᱟᱹᱜᱤᱛ ᱛᱮ ᱢᱮᱫ ᱫᱟᱜ ᱟᱞᱚᱢ ᱡᱚᱨᱚᱭᱟ ᱫᱟᱹᱭ| ᱨᱮᱝᱜᱮᱡᱽ ᱦᱚᱲ ᱨᱮᱱ ᱡᱟᱦᱟᱸ ᱵᱟᱭ ᱛᱟᱦᱮᱱ ᱪᱟᱸᱫᱩ ᱫᱚ ᱢᱟᱱᱟᱭᱟ| ᱱᱚᱵᱮᱞ ᱥᱤᱨᱯᱟᱹ ᱥᱟᱢᱵᱷᱟᱣ ᱢᱮᱱᱟᱜ ᱟᱠᱟᱫᱟ ᱪᱟᱸᱫᱩ ᱞᱟᱹᱜᱤᱫ| ᱢᱟᱹ ᱟᱜ ᱡᱟᱝᱜᱟ ᱨᱮ ᱞᱚᱥᱚᱫ ᱛᱷᱚᱠᱚᱨ ᱵᱚᱠᱚᱨ ᱢᱟᱭᱟᱝ ᱨᱮ ᱜᱮᱸᱫᱨᱮᱡ ᱮ ᱛᱚᱞᱟᱜ ᱠᱟᱱᱟ-ᱱᱮᱦᱟᱛ ᱜᱮ ᱪᱟᱸᱫᱩ ᱥᱟᱣ ᱧᱟᱯᱟᱢ ᱦᱚᱭᱮᱱᱟ|"

"ᱪᱮᱫ ᱞᱮᱠᱟ? ᱪᱮᱫ ᱞᱮᱠᱟ?"

"ᱧᱮᱞ ᱧᱟᱢᱮᱱᱟ, ᱪᱤᱠᱟᱹᱲ ᱯᱤᱸᱫᱟᱹ ᱨᱮ ᱡᱦᱟᱞᱠᱟᱣ ᱠᱟᱱᱟ ᱵᱟᱨ ᱪᱟᱠᱟ ᱪᱟᱸᱫᱩ| ᱵᱤᱴᱟᱹᱭ ᱵᱟᱹᱵᱩ ᱟᱜ ᱥᱟᱭᱠᱤᱞ!"

"ᱮ ᱯᱩᱴᱠᱟᱹ ᱨᱮ! ᱱᱩᱭ ᱧᱮᱞᱮᱢᱮ ! ᱩᱱ ᱩᱱᱤ ᱥᱟᱭᱠᱤᱞ ᱠᱩᱢᱵᱲᱩ! ᱛᱮᱝᱜᱚᱱ ᱢᱮ, ᱥᱮᱛᱟ ᱥᱟᱣ ᱛᱮ ᱞᱟᱠᱚᱵ ᱦᱚᱪᱚ ᱢᱮᱭᱟ| ᱯᱩᱴᱠᱟᱹ! ᱟᱨ ᱵᱟᱝ ᱚᱞᱚᱜ ᱦᱚᱭᱚᱜ ᱛᱟᱢᱟ! ᱢᱚᱲᱮ ᱢᱟᱹᱡᱷᱤ ᱦᱚᱦᱚ ᱟᱠᱚ ᱢᱮ| ᱦᱩᱲᱠᱟᱹ ᱵᱟᱝ ᱵᱟᱹᱭᱥᱟᱣ ᱟᱭ ᱠᱷᱟᱱ ᱵᱟᱭ ᱟᱹᱠᱤᱞᱚᱜ-ᱟ|"

"ᱫᱟᱭᱟᱠᱟᱛᱮ ᱫᱟᱹᱭ! ᱯᱩᱴᱠᱟᱹ ᱟᱜ ᱵᱤᱰᱟᱹᱣ ᱢᱟᱲᱟᱝ ᱫᱚ ᱟᱞᱚᱢ ᱦᱟᱞᱵᱟᱞᱚᱜ-ᱟ| ᱤᱧ ᱫᱚ ᱪᱤᱴᱷᱤ ᱚᱞ ᱠᱟᱛᱮ ᱤᱴᱟᱹ ᱛᱮ ᱯᱚᱴᱚᱢ ᱦᱚᱴᱚ ᱠᱟᱜ ᱛᱟᱦᱮᱱᱟ| ᱦᱟᱨᱠᱮᱛ ᱨᱮ ᱯᱟᱲᱟᱣ ᱠᱟᱛᱮ ᱥᱟᱭᱠᱤᱞ ᱤᱧ ᱤᱫᱤ ᱠᱮᱫᱟ, ᱦᱟᱨᱠᱮᱫ ᱢᱩᱪᱟᱹᱫ ᱞᱮᱱᱠᱷᱟᱱ ᱜᱮ ᱨᱩᱣᱟᱹᱲ ᱦᱚᱴᱚᱠᱟᱜ-ᱟ| ᱵᱟᱝ ᱤᱧ ᱚᱞ ᱟᱠᱟᱫᱟ ? ᱚᱱᱟ ᱠᱤᱨᱤᱭᱟ ᱠᱟᱛᱮ ᱞᱟᱹᱭ ᱢᱮ|"

"ᱠᱩᱢᱵᱲᱩ ᱟᱜ ᱢᱚᱪᱟ ᱨᱮ ᱪᱟᱸᱫᱩ ᱟᱜ ᱱᱮᱦᱚᱨ? ᱴᱮᱦᱮᱧ ᱤᱧᱟᱜ ᱠᱤ ᱜᱟᱯᱟ ᱤᱧᱟᱜ| ᱞᱚᱢᱯᱚᱴ ᱠᱟᱱᱟᱭᱮᱢ! ᱮ ᱯᱩᱴᱠᱟᱹ! ᱚᱞᱚᱜ ᱫᱩᱲᱩᱵ ᱢᱮ! ᱚᱠᱟᱛᱮ ᱦᱚ ᱵᱟᱝ ᱪᱟᱞᱟᱜ ᱦᱚᱭᱚᱜ ᱛᱟᱢᱟ|

"ᱵᱮᱜᱚᱨ ᱢᱮᱱᱛᱮ ᱡᱟᱦᱟᱸᱱᱟᱜ ᱜᱮ ᱦᱟᱛᱟᱣ ᱫᱚ ᱠᱩᱢᱵᱲᱩ ᱠᱚ ᱢᱮᱛᱟᱜ ᱠᱟᱱᱟ| ᱤᱧ ᱢᱟ ᱢᱮᱱ ᱠᱟᱛᱮ ᱜᱮ ᱦᱟᱛᱟᱣ ᱞᱮᱫ| ᱥᱟᱹᱨᱤ ᱥᱮ? ᱥᱟᱭᱠᱤᱞ ᱥᱟᱵ ᱠᱟᱛᱮ ᱫᱟᱹᱲ ᱚᱠᱛᱮ ᱵᱤᱴᱟᱹᱭ ᱜᱚᱢᱠᱮ ᱧᱮᱞ ᱞᱮᱫ ᱞᱤᱧᱟᱹ ᱛᱚ|"

" ᱚᱱᱟᱛᱮ ᱟᱢᱮᱢ ᱢᱮᱱ ᱞᱮᱫᱟ,ᱯᱩᱴᱠᱟᱹ ᱟᱡ ᱟᱯᱟᱛ ᱥᱟᱣ ᱧᱮᱯᱮᱞ ᱧᱮᱯᱮᱞ ᱛᱮ ᱵᱟᱝ ᱦᱚᱭ ᱞᱮᱱᱟ! ᱡᱟᱞᱪᱟᱴᱚᱯ ᱠᱩᱢᱵᱲᱩ ᱦᱚᱲ! ᱮᱭ ᱯᱩᱴᱠᱟᱹ! ᱫᱚᱢᱮᱢ ᱚᱞᱚᱜ ᱯᱟᱲᱦᱟᱣ ᱮᱱᱟ| ᱩᱥᱟᱹᱨᱟ ᱟᱨᱟᱝ ᱫᱟᱹᱦᱲᱤ ᱱᱟᱹᱞᱤᱲ ᱟᱠᱚ ᱢᱮ|"

"ᱫᱟᱭᱟᱠᱟᱛᱮ,ᱤᱧᱟᱜ ᱠᱟᱛᱷᱟ ᱟᱸᱡᱚᱢ ᱢᱮ|"

"ᱪᱮᱫᱟᱜ ᱮᱢ ᱦᱮᱡ ᱟᱠᱟᱱᱟ? ᱟᱨ ᱪᱮᱫ ᱮᱢ ᱠᱩᱢᱵᱲᱩᱭᱟ?"

"ᱥᱟᱭᱠᱤᱞ ᱨᱩᱣᱟᱹᱲ ᱞᱟᱹᱜᱤᱛ ᱛᱮ ᱦᱮᱡ ᱟᱠᱟᱱᱟ|"

"ᱪᱮᱫ ᱞᱟᱹᱜᱤᱛ ᱮᱢ ᱦᱮᱡ ᱟᱠᱟᱱᱟ?"

"ᱥᱟᱭᱠᱤᱞ ᱨᱩᱣᱟᱹᱲ ᱞᱟᱜᱤᱫ ᱛᱮ| ᱯᱩᱴᱠᱟᱹ ᱵᱤᱰᱟᱹᱣ ᱤᱫᱤ ᱟᱹᱜᱩ ᱫᱟᱹᱭᱵᱷᱟᱨ ᱤᱧᱟᱜ| ᱚᱱᱟ ᱪᱟᱰᱟ ᱠᱟᱛᱮ ᱟᱞᱮ ᱫᱚ ᱥᱤᱭᱟᱜ ᱦᱚᱲ| ᱞᱚᱠᱰᱟᱩᱱ ᱱᱟᱜᱟᱨ ᱨᱮ ᱵᱟᱝ ᱠᱷᱟᱴᱟᱣ ᱠᱟᱛᱮ ᱦᱚᱲ ᱢᱚ ᱡᱚᱝ ᱩᱛᱟᱹᱨᱟᱠᱟᱱᱟ| ᱱᱤᱭᱚ ᱠᱚ ᱢᱟᱦᱟ ᱡᱚᱢᱟᱜ ᱮᱢ ᱮᱢᱟᱞᱤᱧᱟ|ᱮᱱᱛᱮ ᱠᱷᱟᱱ ᱦᱚᱭᱚᱜ-ᱟ|ᱜᱟᱹᱭ ᱜᱚᱲᱟ ᱨᱮᱧ ᱧᱩᱨ ᱛᱟᱦᱮᱱᱟ| ᱵᱤᱰᱟᱹᱣ ᱢᱩᱪᱟᱹᱫ ᱞᱮᱱᱠᱷᱟᱱ ᱜᱮ ᱪᱟᱞᱟᱣ ᱩᱛᱟᱹᱨᱚᱜ-ᱟ| ᱚ ᱫᱟᱹᱭ! ᱪᱮᱫᱟᱜ ᱮᱢ ᱨᱟᱜᱮᱫ ᱠᱟᱱᱟ?"

"ᱪᱮ ᱡᱚᱵᱚᱨᱟ ᱛᱮ ᱪᱚ ᱪᱩᱵᱟᱹᱜ ᱮᱱᱟ| ᱤᱧ ᱞᱟᱹᱜᱤᱫ ᱫᱚ ᱵᱟᱝ ᱵᱷᱟᱹᱵᱤᱛ ᱦᱚᱭᱚ-ᱟ| ᱤᱧ ᱞᱟᱹᱧ ᱢᱮ ᱯᱩᱴᱠᱟᱹ ᱟᱜ ᱵᱤᱰᱟᱹᱣ ᱢᱩᱪᱟᱹᱫ ᱞᱮᱱᱠᱷᱟᱱ ᱪᱮᱠᱟᱢ ᱨᱩᱣᱟᱲᱟ ᱚᱲᱟᱜ?"

" ᱛᱟᱲᱟᱢ ᱯᱟᱹᱨᱠᱟᱣ ᱟᱠᱟᱱᱟ ᱞᱮ| ᱟᱨ ᱟᱞᱮ ᱢᱟ ᱥᱤᱭᱚᱜ ᱦᱚᱲ|"

"ᱟᱢ ᱢᱟᱲᱟᱝ ᱫᱩᱲᱩᱵ ᱢᱮ| ᱵᱩᱜᱱᱟᱹ ᱨᱮ ᱵᱟᱨᱭᱟ ᱜᱟᱱ ᱪᱟᱣᱞᱮᱧ ᱞᱚᱦᱚᱫ ᱦᱚᱴᱚ ᱠᱟᱜ ᱜᱮ| ᱧᱤᱫᱟᱹ ᱪᱮᱫ ᱮᱢ ᱡᱚᱢᱟ ᱛᱮ? ᱫᱟᱠᱟ ᱥᱮ ᱯᱤᱴᱷᱟᱹ|"

" ᱯᱤᱴᱷᱟᱹ ᱱᱟᱠᱷᱟ ᱨᱮ| ᱥᱟᱭᱠᱤᱞ ᱫᱚ ᱡᱚᱛᱚᱱ ᱨᱮᱧ ᱫᱚᱦᱚ ᱟᱠᱟᱫ ᱛᱟᱦᱮᱸ ᱫᱟᱹᱭ| ᱟᱢ ᱧᱮᱞ ᱫᱟᱲᱮᱭᱟᱜ-ᱟ| ᱪᱟᱸᱫᱩ ᱫᱚ ᱩᱱᱤ ᱜᱮ ᱡᱟᱦᱟᱭ ᱥᱟᱭᱠᱤᱞᱮ ᱛᱮᱭᱟᱨ ᱞᱮᱫᱟ| ᱩᱱᱤ ᱱᱚᱵᱮᱞ,ᱟᱨᱡᱩᱱ,ᱫᱟᱫᱟ ᱥᱟᱦᱮᱵ ᱮᱢᱟᱱ ᱥᱤᱨᱯᱟᱹ ᱠᱚ ᱢᱤᱫᱽ ᱫᱷᱟᱣ ᱛᱮ ᱮᱢᱚᱜ ᱞᱟᱹᱜᱛᱤ ᱠᱟᱱᱟ|"

"ᱚᱠᱚᱭ ᱩᱱᱤ ᱪᱟᱸᱫᱩ ᱚᱠᱚᱭᱮ ᱵᱟᱰᱟᱭᱟ ! ᱮᱭ ᱯᱩᱴᱠᱟᱹ! ᱚᱞᱚᱜ ᱫᱩᱲᱩᱵ ᱢᱮ | ᱟᱢ ᱟᱯᱟᱛ ᱫᱚ ᱚᱠᱟ ᱞᱮᱠᱟ ᱠᱟᱹᱢᱤᱭᱟᱱ ᱦᱚᱲ ᱫᱚ ᱵᱟᱝ ᱠᱟᱱᱟᱭ| ᱱᱮᱦᱟᱛ ᱛᱮ ᱤᱧ ᱢᱤᱱᱟᱹᱧ ᱠᱟᱹᱫᱤᱧ ᱛᱮ ᱵᱟᱧᱪᱟᱣ ᱢᱮᱱᱟᱜ ᱢᱮᱭᱟ| ᱤᱧ ᱵᱟᱝ ᱛᱟᱦᱮᱸ ᱞᱮᱱᱠᱷᱟᱱ ᱟᱯᱮᱭᱟᱜ ᱫᱚ ᱪᱮᱫ ᱪᱚ ᱦᱚᱭᱚᱜᱹᱹᱹᱹᱹᱹᱹᱹᱹᱹ"