ᱯᱚᱨᱤᱢᱚᱞ ᱦᱮᱢᱵᱽᱨᱚᱢ
ᱯᱚᱨᱤᱢᱚᱞ ᱦᱮᱢᱵᱽᱨᱚᱢ, (ᱢᱟᱨᱥᱟᱞ ᱦᱮᱢᱵᱽᱨᱚᱢ ᱵᱟᱦᱟᱱᱟ ᱧᱩᱛᱩᱢ ᱛᱮᱦᱚᱸᱭ ᱵᱟᱲᱟᱭᱚᱜᱼᱟ) ᱫᱚ ᱱᱟᱦᱟᱜ ᱥᱟᱱᱛᱟᱲᱤ ᱥᱟᱶᱦᱮᱫ ᱱᱟᱝ ᱨᱮᱱ ᱢᱤᱫ ᱧᱩᱛᱩᱢᱟᱱ ᱚᱱᱚᱞᱤᱭᱟᱹ, ᱚᱱᱚᱲᱦᱤᱭᱟᱹ ᱠᱟᱱᱟᱭ᱾
ᱡᱤᱭᱚᱱ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱢᱟᱨᱥᱟᱞ ᱦᱮᱢᱵᱽᱨᱚᱢ ᱜᱳᱢᱠᱮ ᱫᱚ ᱑᱙᱕᱗ ᱥᱮᱨᱢᱟ ᱨᱮᱭᱟᱜ ᱯᱷᱮᱵᱽᱨᱩᱣᱟᱨᱤ ᱪᱟᱸᱫᱳ ᱨᱮᱭ ᱡᱟᱱᱟᱢ ᱞᱮᱱᱟ ᱾ ᱯᱚᱨᱤᱢᱚᱞ ᱦᱮᱢᱵᱽᱨᱚᱢ ᱜᱳᱢᱠᱮ ᱫᱚ ᱯᱚᱥᱪᱷᱤᱢᱵᱚᱝᱜᱚ ᱯᱚᱱᱚᱛ ᱨᱮᱱᱟᱜ ᱵᱟᱹᱠᱩᱲᱟ ᱡᱤᱞᱟᱹ ᱨᱮᱱᱟᱜ ᱥᱟᱨᱮᱝᱜᱟ ᱥᱩᱨ ᱪᱳᱭᱛᱟᱲᱟ ᱰᱟᱠᱚᱲᱟᱜ ᱟᱣᱛᱟ ᱨᱮᱣᱟᱜ ᱥᱟᱸᱠᱟᱨᱤᱭᱟᱹ ᱟᱹᱛᱩ ᱨᱮ ᱾ ᱢᱟᱨᱥᱟᱞ ᱦᱮᱢᱵᱽᱨᱚᱢ ᱫᱚ ᱵᱟᱦᱟᱱᱟ ᱧᱩᱛᱩᱢ ᱠᱟᱱ ᱛᱟᱭᱟ ᱾ ᱥᱟᱱᱛᱟᱲᱤ ᱯᱟᱹᱨᱥᱤ ᱥᱟᱶᱦᱮᱫ ᱦᱟᱨᱟ ᱵᱩᱨᱩ ᱨᱮ ᱱᱩᱭ ᱜᱳᱢᱠᱮ ᱫᱚ ᱵᱟᱱᱟᱨ ᱧᱩᱛᱩᱢ ᱛᱮᱠᱚ ᱩᱨᱩᱢᱮᱭᱟ ᱾ ᱟᱯᱟᱛ ᱧᱩᱛᱩᱢ ᱫᱚ ᱛᱟᱦᱮᱸ ᱠᱟᱱ ᱛᱟᱭᱟ ᱵᱟᱫᱚᱞ ᱪᱚᱸᱫᱽᱨᱚ ᱦᱮᱢᱵᱽᱨᱚᱢ ᱾ ᱮᱸᱜᱟᱛ ᱧᱩᱛᱩᱢ ᱫᱚ ᱛᱟᱦᱮᱸ ᱠᱟᱱ ᱛᱟᱭᱟ ᱯᱟᱱᱢᱟᱱᱤ ᱦᱮᱢᱵᱽᱨᱚᱢ ᱾
ᱚᱞᱚᱜ ᱯᱚᱲᱦᱚᱱ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱯᱚᱨᱤᱢᱚᱞ ᱦᱮᱢᱵᱽᱨᱚᱢ ᱜᱚᱢᱠᱮᱭᱟᱜ ᱚᱞᱚᱜ ᱯᱚᱲᱦᱚᱱ ᱫᱚ ᱮᱛᱚᱦᱚᱵᱚᱜ ᱠᱟᱱᱟ ᱥᱟᱸᱠᱟᱨᱤᱭᱟᱹ ᱤᱛᱩᱱ ᱟᱥᱲᱟ ᱨᱮ ᱾ ᱚᱱᱟ ᱛᱟᱭᱚᱢ ᱟᱠᱚ ᱟᱹᱛᱩ ᱥᱩᱨ ᱫᱷᱟᱱᱟᱲᱟ ᱵᱤᱠᱨᱚᱢᱯᱩᱨ ᱥᱮᱢᱟᱯᱨᱚᱥᱟᱫᱽ ᱢᱮᱢᱳᱨᱤᱭᱟᱞ ᱩᱥᱩᱞ ᱵᱤᱨᱫᱟᱹᱜᱟᱲ ᱨᱮ ᱢᱚᱲᱮ ᱪᱟᱱᱟᱪ ᱠᱷᱚᱱ ᱟᱨᱮ ᱪᱟᱱᱟᱪ ᱦᱟᱹᱵᱤᱡ ᱮ ᱯᱟᱲᱦᱟᱣ ᱞᱮᱱᱟ ᱾ ᱡᱩᱣᱟᱹᱱ ᱚᱠᱛᱚ ᱨᱮ ᱥᱟᱱᱟᱢ ᱥᱟᱱᱛᱟᱲ ᱠᱚᱲᱟ ᱠᱩᱲᱤ ᱵᱤᱯᱚᱫᱽ ᱰᱟᱦᱟᱨ ᱛᱮᱠᱚ ᱰᱟᱦᱨᱟᱣᱜ-ᱟ᱾ ᱚᱱᱟ ᱠᱷᱚᱱ ᱵᱟᱧᱪᱟᱣᱜ ᱞᱟᱹᱜᱤᱫ ᱟᱡ ᱵᱟᱵᱟ ᱩᱱᱤ ᱫᱚ ᱡᱷᱟᱲᱜᱽᱨᱟᱢ ᱨᱮᱱᱟᱜ ᱠᱩᱢᱩᱫᱽ ᱠᱩᱢᱟᱹᱨᱤ ᱤᱱᱥᱴᱤᱴᱤᱭᱩᱥᱚᱱ ᱨᱮᱭ ᱵᱷᱩᱨᱛᱤ ᱠᱮᱫᱮᱭᱟ ᱾ ᱚᱸᱰᱮ ᱠᱷᱚᱱ ᱜᱮ ᱱᱩᱭ ᱜᱚᱢᱠᱮ ᱫᱚ ᱑᱙᱗᱕ ᱥᱮᱨᱢᱟ ᱨᱮ ᱥᱟᱬᱮᱥ ᱵᱤᱵᱷᱟᱜᱽ ᱛᱮ ᱦᱟᱭᱟᱨ ᱥᱮᱠᱮᱱᱰᱟᱨᱤ ᱯᱟᱥ ᱠᱮᱫᱟᱭ ᱟᱨ ᱚᱱᱟ ᱛᱟᱭᱚᱢ ᱰᱟᱠᱛᱟᱨ ᱵᱮᱱᱟᱜ ᱟᱸᱥ ᱛᱮ ᱦᱟᱣᱲᱟ ᱨᱮᱱᱟᱜ ᱩᱞᱩᱵᱮᱲᱤᱭᱟ ᱠᱚᱞᱮᱡᱽ ᱨᱮ ᱥᱟᱬᱮᱥ ᱵᱤᱵᱷᱟᱜᱽ ᱨᱮᱭ ᱵᱷᱩᱨᱛᱤᱭᱮᱱᱟ ᱾ ᱚᱱᱟ ᱠᱚᱞᱮᱡᱽ ᱨᱮᱱ ᱚᱫᱽᱫᱷᱟᱯᱚᱠ ᱰᱚᱠᱴᱚᱨ ᱥᱩᱦᱨᱤᱫᱽ ᱠᱩᱢᱟᱨ ᱵᱷᱳᱭᱢᱤᱠ ᱟᱜ ᱯᱚᱨᱟᱢᱚᱨᱥᱚ ᱞᱮᱠᱟᱛᱮ ᱥᱟᱬᱮᱥ ᱵᱤᱵᱷᱟᱜᱽ ᱵᱟᱹᱜᱤ ᱠᱟᱛᱮ ᱚᱱᱟ ᱠᱚᱞᱮᱡᱽ ᱨᱮᱜᱮ ᱠᱚᱞᱟ ᱵᱤᱵᱷᱟᱜᱽ ᱨᱮᱭᱟᱜ ᱵᱟᱝᱞᱟ ᱚᱱᱟᱨᱥ ᱛᱮᱭ ᱵᱷᱩᱨᱛᱤᱭᱮᱱᱟ ᱾ ᱑᱙᱗᱘ ᱥᱮᱨᱢᱟ ᱨᱮ ᱚᱱᱟ ᱠᱚᱞᱮᱡᱽ ᱠᱷᱚᱱ ᱵᱟᱝᱞᱟ ᱚᱱᱟᱨᱥ ᱛᱮ ᱵᱤ.ᱮ. ᱯᱟᱥ ᱠᱮᱫᱟᱭ ᱾ ᱑᱙᱘᱐ ᱥᱮᱨᱢᱟ ᱨᱮ ᱠᱳᱞᱠᱟᱛᱟ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱠᱷᱚᱱ ᱵᱟᱝᱞᱟ ᱥᱟᱛᱟᱢ ᱛᱮ ᱮᱢᱮ.ᱮ. ᱯᱟᱥ ᱟᱠᱟᱫ-ᱟᱭ ᱾
ᱠᱟᱹᱢᱤ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱯᱚᱨᱤᱢᱚᱞ ᱦᱮᱢᱵᱽᱨᱚᱢ ᱜᱚᱢᱠᱮᱭᱟᱜ ᱠᱟᱹᱢᱤ ᱡᱤᱭᱚᱱ ᱫᱚ ᱮᱛᱚᱦᱚᱵᱚᱜ ᱠᱟᱱ ᱛᱟᱭᱟ ᱤᱱᱰᱤᱭᱟᱱ ᱵᱮᱝᱠ ᱨᱮ ᱾ ᱚᱱᱟ ᱛᱟᱭᱚᱢ ᱩᱛᱛᱚᱨ ᱪᱚᱵᱵᱤᱥᱯᱚᱨᱜᱚᱱᱟ ᱡᱤᱞᱟᱹ ᱨᱮᱱᱟᱜ ᱤᱪᱪᱷᱟᱯᱩᱨ ᱱᱚᱨᱛᱞᱮᱱᱰ ᱵᱤᱨᱫᱟᱹᱜᱟᱲ ᱨᱮ ᱢᱟᱪᱮᱫ ᱞᱮᱠᱟᱛᱮᱭ ᱵᱟᱦᱟᱞ ᱞᱮᱱᱟᱣ᱾ ᱠᱚᱭᱮᱠ ᱥᱮᱨᱢᱟ ᱢᱟᱪᱮᱫ ᱞᱮᱠᱟᱛᱮ ᱠᱟᱹᱢᱤ ᱛᱟᱭᱚᱢ ᱵᱷᱟᱨᱚᱛᱤᱭᱚ ᱥᱴᱮᱴ ᱵᱮᱝᱠ ᱨᱮ ᱠᱟᱹᱢᱤᱭ ᱡᱳᱜᱽᱫᱟᱱ ᱠᱮᱫᱟ ᱾ ᱵᱮᱝᱠ ᱨᱮ ᱵᱟᱨ ᱥᱮᱨᱢᱟ ᱠᱟᱹᱢᱤ ᱛᱟᱭᱚᱢ ᱵᱷᱟᱨᱚᱛ ᱥᱚᱨᱠᱟᱨᱟᱜ ᱚᱞ ᱤᱱᱰᱤᱭᱟ ᱨᱮᱰᱤᱭᱳ ᱯᱨᱳᱜᱽᱨᱟᱢ ᱮᱠᱥᱤᱠᱤᱭᱩᱴᱤᱵᱽ ᱯᱚᱫᱽ ᱨᱮ ᱠᱟᱹᱢᱤ ᱞᱮᱠᱟᱛᱮᱭ ᱡᱳᱜᱽᱫᱟᱱ ᱮᱫᱟ ᱑᱙᱘᱙ ᱥᱟᱹᱦᱤᱛ ᱨᱮᱱᱟᱜ ᱓ ᱡᱩᱞᱟᱹᱭ ᱨᱮ ᱾ ᱡᱷᱟᱨᱠᱷᱚᱸᱰ ᱨᱮᱱᱟᱜ ᱡᱟᱢᱥᱮᱫᱽᱯᱩᱨ ᱟᱨ ᱪᱟᱭᱵᱟᱥᱟ ᱟᱠᱟᱥᱵᱟᱹᱱᱤ ᱥᱮᱱᱴᱟᱨ ᱨᱮᱭ ᱠᱟᱹᱢᱤ ᱛᱟᱦᱮᱸᱫ ᱾ ᱛᱟᱭᱚᱢ ᱫᱟᱨᱟᱢ ᱠᱳᱞᱠᱟᱛᱟ ᱟᱠᱟᱥᱵᱟᱹᱱᱤ ᱨᱮᱭ ᱩᱪᱟᱹᱲᱮᱱᱟ ᱾ ᱚᱸᱰᱮ ᱟᱹᱰᱤ ᱥᱮᱨᱢᱟᱭ ᱠᱟᱹᱢᱤ ᱟᱠᱟᱫᱟ ᱥᱟᱱᱛᱟᱲᱤ ᱟᱠᱷᱲᱟ ᱨᱮ ᱾