ᱯᱨᱚᱛᱤᱵᱷᱟ ᱯᱟᱴᱤᱞ

ᱣᱤᱠᱤᱯᱤᱰᱤᱭᱟ, ᱨᱟᱲᱟ ᱜᱮᱭᱟᱱ ᱯᱩᱛᱷᱤ ᱠᱷᱚᱱ
ᱯᱨᱚᱛᱤᱵᱷᱟ ᱯᱟᱴᱤᱞ

ᱯᱨᱚᱛᱤᱵᱷᱟ ᱫᱮᱵᱤᱥᱤᱝ ᱯᱟᱴᱤᱞ ᱫᱚ ᱯᱷᱩᱨᱜᱟᱹᱞ ᱵᱷᱟᱨᱚᱛ ᱨᱮᱱᱤᱡ ᱯᱩᱭᱞᱩ ᱛᱤᱨᱞᱟᱹ ᱫᱤᱥᱚᱢ ᱜᱚᱢᱠᱮ ᱠᱟᱱᱟᱭ ᱾ ᱩᱱᱤ ᱫᱚ ᱢᱚᱦᱟᱨᱟᱥᱴᱨᱚ ᱯᱚᱱᱚᱛ ᱨᱮᱭᱟᱜ ᱡᱚᱞᱜᱟᱶ ᱡᱤᱞᱟ ᱨᱮᱭᱟᱜ ᱱᱚᱱᱫᱚᱜᱟᱶ ᱟᱹᱛᱩ ᱨᱮ ᱡᱟᱱᱟᱢ ᱞᱮᱱᱟ ᱾ ᱟᱡ ᱵᱟᱵᱟ ᱱᱟᱨᱟᱭᱚᱱ ᱯᱟᱹᱜᱞᱩ ᱨᱟᱶ ᱫᱚ ᱢᱤᱫ ᱢᱟᱨᱟᱴᱷᱟᱭ ᱛᱟᱦᱮᱸ ᱠᱟᱱᱟ ᱾ ᱩᱱᱤ ᱫᱚ ᱱᱟᱱᱟ ᱥᱟᱦᱮᱵ ᱢᱮᱱᱛᱮ ᱡᱚᱛᱚ ᱦᱚᱲ ᱠᱚ ᱵᱟᱰᱟᱭ ᱮᱭᱟ ᱾ ᱯᱨᱚᱛᱤᱵᱷᱟ ᱫᱚ ᱟᱠᱚ ᱜᱷᱟᱨᱚᱸᱡᱽ ᱨᱮᱱᱟᱝ ᱮᱭᱟᱭ ᱜᱚᱴᱟᱝ ᱜᱤᱫᱽᱨᱟᱹ ᱠᱷᱚᱱᱟᱝ ᱢᱤᱫᱴᱟᱝ ᱥᱩᱢᱩᱝ ᱛᱤᱨᱞᱟᱹᱭ ᱛᱟᱦᱮᱸ ᱠᱟᱱᱟ ᱾

ᱥᱮᱪᱮᱫ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱡᱚᱞᱜᱟᱶ ᱨᱮ ᱢᱮᱱᱟᱜ ᱥᱚᱨᱠᱟᱨᱤ ᱠᱩᱲᱤ ᱜᱤᱫᱽᱨᱟᱹ ᱠᱚᱶᱟᱜ ᱟᱥᱲᱟ ᱨᱮ ᱟᱡᱟᱜ ᱮᱛᱚᱦᱚᱵ ᱥᱮᱪᱮᱫ ᱫᱚ ᱮᱦᱚᱵ ᱞᱮᱱᱟ ᱾ ᱚᱱᱟ ᱛᱟᱭᱚᱢ ᱥᱩᱨ ᱨᱮ ᱢᱮᱱᱟᱜ ᱢᱤᱫᱴᱟᱝ ᱤᱝᱞᱤᱥ ᱢᱤᱰᱤᱭᱚᱢ ᱟᱥᱲᱟ ᱨᱮ ᱧᱩᱛᱩᱢ ᱮ ᱚᱞ ᱞᱮᱜ-ᱟ ᱾ ᱩᱱ ᱡᱷᱚᱜ ᱩᱱᱤ ᱫᱚ ᱟᱹᱰᱤ ᱠᱚ ᱞᱟᱱᱫᱟ ᱵᱚᱛᱚᱡ ᱮ ᱠᱟᱱ ᱛᱟᱦᱮᱸᱫ, ᱪᱮᱫᱟᱜ ᱪᱮ ᱩᱱᱡᱷᱚᱜ ᱦᱚᱸ ᱠᱩᱲᱤ ᱦᱚᱯᱚᱱ ᱫᱚ ᱚᱲᱟᱜ ᱠᱷᱚᱱ ᱵᱟᱦᱨᱮ ᱛᱮ ᱵᱤᱥᱛᱤ ᱵᱟᱠᱚ ᱚᱰᱚᱠ ᱚᱰᱚ ᱟᱠᱚ ᱠᱟᱱ ᱛᱟᱦᱮᱸᱫ ᱾ ᱩᱱᱤ ᱜᱮᱞ ᱪᱟᱱᱚᱪ ᱮ ᱯᱟᱥ ᱠᱮᱫ ᱛᱟᱭᱚᱢ ᱚᱱᱰᱮᱱᱟᱜ ᱢᱚᱞᱡᱤ ᱡᱚᱭᱴᱷᱟ ᱵᱤᱨᱫᱟᱹᱜᱟᱲ ᱠᱷᱚᱱ ᱥᱚᱱᱮᱨ ᱫᱷᱟᱯ ᱮᱯᱟᱥ ᱞᱮᱜ-ᱟ ᱾ ᱚᱱᱟ ᱛᱟᱭᱚᱢ ᱵᱚᱢᱵᱮ ᱨᱮᱭᱟᱜ ᱥᱚᱨᱠᱟᱨᱤ ᱟᱹᱭᱤᱱ ᱠᱚᱞᱮᱡᱽ ᱨᱮ ᱧᱩᱛᱩᱢ ᱮ ᱚᱞ ᱠᱮᱜ-ᱟ ᱾ ᱚᱱᱰᱮ ᱚᱞᱚᱜ ᱥᱚᱢᱚᱭ ᱜᱮ ᱩᱥᱟ ᱵᱷᱚᱶᱢᱤᱠ, ᱵᱚᱥᱚᱱᱛᱚ ᱨᱟᱶ ᱱᱟᱭᱮᱠ, ᱟᱨ ᱢᱚᱫᱷᱩᱠᱚᱨ ᱨᱟᱶ ᱪᱚᱶᱫᱷᱩᱨᱤ ᱮᱢᱟᱱ ᱥᱟᱶᱛᱟ ᱥᱩᱥᱟᱹᱨᱤᱭᱟᱹ, ᱨᱟᱡᱽᱱᱤᱛᱤᱭᱟᱹ ᱥᱟᱶ ᱮ ᱪᱤᱱᱦᱟᱹᱯ ᱞᱮᱱᱟ ᱾ ᱩᱱᱠᱩ ᱜᱮ ᱟᱡ ᱨᱟᱡᱽ ᱱᱤᱛᱤ ᱛᱮᱠᱚ ᱟᱹᱜᱩ ᱞᱮᱫᱮᱭᱟ ᱾

ᱵᱟᱯᱞᱟ ᱡᱤᱭᱚᱱ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

1960 ᱥᱟᱞ ᱨᱮ ᱠᱩᱲᱤ ᱡᱟᱶᱟᱭᱚᱜ ᱨᱮᱭᱟᱜ ᱩᱢᱮᱨ ᱫᱚ ᱑᱘ ᱠᱷᱚᱱ ᱑᱙ ᱵᱚᱪᱷᱚᱨ ᱛᱟᱦᱮᱸ ᱠᱟᱱ ᱨᱮᱦᱚᱸ ᱩᱱᱤ ᱫᱚ ᱤᱱᱟᱹᱜ ᱵᱚᱭᱚᱥ ᱨᱮ ᱵᱟᱝ ᱡᱟᱶᱟᱭ ᱠᱟᱛᱮ ᱛᱤᱸᱜᱩ ᱠᱮᱴᱮᱡᱚᱜ ᱮ ᱨᱤᱠᱟᱹ ᱞᱮᱜ-ᱟ ᱾ ᱑᱙᱖᱕ ᱥᱟᱞ ᱡᱚᱞᱟᱭ ᱪᱟᱸᱫᱚ ᱗ ᱢᱟᱹᱦᱤᱛ ᱦᱤᱞᱚᱜ ᱫᱮᱵᱤ ᱥᱤᱝ ᱨᱟᱢ ᱥᱤᱝ ᱥᱮᱠᱷᱟᱶᱚᱛ ᱯᱟᱴᱤᱞ ᱥᱟᱶ ᱟᱡᱟᱜ ᱵᱟᱯᱞᱟ ᱦᱩᱭ ᱮᱱᱟ ᱾ ᱩᱱᱡᱷᱚᱜ ᱫᱚ ᱟᱡᱟᱜ ᱩᱢᱮᱨ ᱓᱑ ᱥᱟᱞ ᱦᱩᱭ ᱞᱮᱱᱟ ᱾ ᱫᱮᱵᱤᱥᱤᱝ ᱫᱚ ᱨᱟᱡᱚᱥᱛᱷᱟᱱ ᱯᱚᱱᱚᱛ ᱨᱮᱱᱤᱡ ᱮ ᱛᱟᱦᱮᱸ ᱠᱟᱱᱟ ᱟᱨ ᱨᱚᱥᱟᱭᱚᱱ ᱥᱟᱬᱮᱥ ᱨᱮ ᱰᱚᱠᱴᱚᱨᱮᱴ ᱮ ᱧᱟᱢ ᱞᱮᱫ ᱛᱟᱦᱮᱸᱫ ᱾ ᱛᱟᱭᱚᱢ ᱛᱮ ᱩᱱᱤ ᱯᱨᱚᱛᱤᱵᱷᱟ ᱞᱟᱹᱜᱤᱫ ᱟᱹᱰᱤ ᱜᱟᱱ ᱮ ᱠᱟᱹᱢᱤ ᱟᱠᱟᱰᱟ ᱾ ᱵᱟᱯᱞᱟ ᱛᱟᱭᱚᱢ ᱯᱨᱚᱛᱤᱵᱷᱟ ᱨᱟᱡᱽᱱᱤᱛᱤ ᱨᱮ ᱡᱚᱯᱚᱲᱟᱶ ᱮ ᱛᱟᱦᱮᱸ ᱮᱱᱟ, ᱟᱡ ᱡᱟᱶᱟᱭ ᱫᱚ ᱱᱚᱶᱟ ᱨᱮ ᱛᱤᱥ ᱦᱚᱸ ᱵᱟᱫᱷᱟ ᱞᱮᱠᱟ ᱵᱟᱭ ᱛᱤᱸᱜᱩ ᱟᱠᱟᱱᱟ ᱾ ᱟᱡ ᱟᱨ ᱟᱡ ᱡᱟᱶᱟᱭ ᱢᱮᱥᱟ ᱠᱟᱛᱮ ᱟᱹᱰᱤ ᱜᱟᱱ ᱞᱟᱦᱟᱱᱛᱤ ᱨᱮᱭᱟᱜ ᱠᱤᱱ ᱠᱟᱹᱢᱤ ᱞᱮᱜ-ᱟ ᱾ ᱥᱮᱬᱟ ᱦᱚᱲ ᱢᱟᱹᱱ ᱮᱢᱟ ᱠᱚ ᱟᱨ ᱦᱩᱰᱤᱧ ᱠᱚ ᱫᱩᱞᱟᱹᱲ ᱮᱢᱟ ᱠᱚ ᱫᱚ ᱟᱡᱟᱜ ᱥᱟᱫᱷᱟᱨᱚᱱ ᱪᱩᱨᱤᱛ ᱛᱟᱦᱮᱸ ᱠᱟᱱᱟ ᱾

ᱨᱟᱡᱽᱱᱤᱛᱤ ᱡᱤᱭᱚᱱ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱫᱤᱥᱚᱢ ᱜᱚᱢᱠᱮ ᱞᱮᱠᱟ ᱵᱟᱪᱷᱚᱱ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

2007 ᱥᱟᱞ ᱡᱩᱞᱟᱭ ᱒᱕ ᱢᱟᱹᱦᱤᱛ ᱦᱤᱞᱚᱜ ᱯᱨᱚᱛᱤᱵᱷᱟ ᱯᱟᱴᱤᱞ ᱫᱚ ᱖᱓ ᱥᱮᱨᱢᱟ ᱩᱢᱮᱨ ᱨᱮ ᱵᱷᱟᱨᱚᱛ ᱨᱮᱱᱤᱡ ᱯᱩᱭᱞᱩ ᱛᱤᱨᱞᱟᱹ ᱫᱤᱥᱚᱢ ᱜᱚᱢᱠᱮ ᱞᱮᱠᱟ ᱛᱮ ᱠᱤᱨᱟᱹᱭ ᱦᱟᱛᱟᱶ ᱠᱮᱜ-ᱟ ᱾ ᱩᱱᱡᱷᱚᱜᱤᱡ ᱫᱤᱥᱚᱢ ᱜᱚᱢᱠᱮ ᱰᱚᱠᱴᱚᱨ ᱚᱵᱽᱫᱩᱞ ᱠᱟᱞᱟᱢ ᱴᱷᱮᱱ ᱠᱷᱚᱱ ᱵᱷᱟᱹᱨᱭᱟᱹᱭ ᱦᱟᱛᱟᱶ ᱠᱮᱜ-ᱟ ᱾ ᱢᱟᱹᱱ ᱥᱟᱶᱛᱮ ᱩᱱᱤ ᱫᱚ ᱨᱟᱥᱴᱨᱚᱯᱚᱛᱤ ᱵᱷᱚᱵᱚᱱ ᱛᱮᱠᱚ ᱫᱟᱨᱟᱢ ᱤᱫᱤ ᱠᱮᱫᱮᱭᱟ ᱾ ᱱᱤᱡᱮᱨᱟᱜ ᱡᱤᱛᱠᱟᱹᱨ ᱠᱷᱟᱹᱛᱤᱨ ᱩᱱᱤ ᱫᱤᱥᱚᱢ ᱦᱚᱲ ᱥᱟᱨᱦᱟᱶ ᱮ ᱪᱟᱞᱟᱫ ᱠᱚᱶᱟ ᱾ ᱟᱡᱟᱜ ᱠᱟᱹᱢᱤ ᱚᱠᱛᱚ ᱨᱮ ᱩᱱᱤ ᱨᱮᱝᱜᱮᱡ ᱥᱟᱦᱟ ᱟᱨ ᱛᱤᱨᱞᱟᱹ ᱠᱚᱶᱟᱜ ᱨᱟᱱᱟᱠᱟᱵ ᱵᱟᱵᱚᱛ ᱟᱰᱤ ᱜᱟᱱ ᱠᱟᱹᱢᱤ ᱦᱚᱨᱟᱭ ᱮᱛᱚᱦᱚᱵ ᱞᱮᱜ-ᱟ ᱾ ᱫᱤᱥᱚᱢ ᱨᱮᱭᱟᱜ ᱥᱤᱢᱟᱹ ᱥᱩᱨᱚᱠᱷᱭᱟ, ᱯᱷᱟᱹᱫᱽ ᱠᱚᱶᱟᱜ ᱨᱟᱱᱟᱠᱟᱵ,ᱥᱤᱥᱩ ᱥᱨᱚᱢᱤᱠ ᱟᱨ ᱵᱟᱞᱮ ᱵᱟᱯᱞᱟ ᱪᱟᱵᱟᱭ ᱩᱱᱤ ᱡᱚᱡᱚᱱᱟᱭ ᱮᱦᱚᱵ ᱞᱮᱜ-ᱟ ᱾ ᱫᱤᱥᱚᱢ ᱨᱮᱱᱤᱡ ᱯᱚᱭᱞᱩ ᱛᱤᱨᱞᱟᱹ ᱫᱤᱥᱚᱢ ᱜᱚᱢᱠᱮ ᱞᱮᱠᱟ ᱛᱮ ᱩᱱᱤ ᱡᱟᱦᱟᱸᱭ ᱠᱚ ᱨᱚᱲᱮ ᱠᱟᱱ ᱟᱨ ᱠᱚ ᱵᱤᱨᱩᱫ ᱮ ᱠᱟᱱ ᱛᱟᱦᱮᱸᱫ ᱩᱱᱠᱩ ᱟᱡᱟᱜ ᱠᱟᱹᱢᱤ ᱧᱮᱞ ᱛᱮ ᱠᱚ ᱛᱷᱤᱨ ᱮᱱᱟ ᱾ ᱫᱤᱥᱚᱢ ᱜᱚᱢᱠᱮ ᱞᱮᱠᱟᱛᱮ ᱟᱡᱟᱜ ᱕ ᱥᱮᱨᱢᱟ ᱵᱷᱟᱹᱜᱤ ᱞᱮᱠᱟ ᱠᱟᱹᱢᱤ ᱯᱩᱨᱟᱹᱶ ᱛᱟᱭᱚᱢ ᱩᱱᱤ ᱒᱐᱑᱒ ᱥᱟᱞ ᱨᱮ ᱫᱤᱥᱚᱢ ᱜᱚᱢᱠᱮ ᱯᱚᱫᱽ ᱠᱷᱚᱱ ᱡᱤᱨᱟᱹᱶ ᱮ ᱦᱟᱛᱟᱶ ᱠᱮᱜ-ᱟ ᱾

ᱟᱨᱦᱚᱸ ᱧᱮᱞ ᱢᱮ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]

ᱥᱟᱹᱠᱷᱭᱟᱹᱛ[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]