ᱵᱷᱮᱲᱟᱢᱟᱨᱟ ᱩᱯᱚᱡᱮᱞᱟ

ᱵᱷᱮᱲᱟᱢᱟᱨᱟ ᱩᱯᱚᱡᱮᱞᱟ ᱫᱚ ᱵᱟᱝᱞᱟᱫᱮᱥ ᱨᱮ ᱢᱮᱱᱟᱜ ᱠᱩᱥᱴᱤᱭᱟ ᱦᱚᱱᱚᱛ ᱨᱮᱱᱟᱜ ᱢᱤᱫᱴᱟᱝ ᱯᱚᱨᱥᱟᱥᱚᱱᱤᱠ ᱮᱞᱟᱠᱟ ᱠᱟᱱᱟ᱾

ᱱᱟᱜᱟᱢ

ᱵᱷᱮᱲᱟᱢᱟᱨᱟ ᱩᱯᱚᱡᱮᱞᱟ ᱨᱮᱱᱟᱜ ᱩᱛᱟᱹᱨ ᱯᱩᱨᱩᱵᱽ ᱫᱚ ᱯᱚᱫᱫᱟ ᱜᱟᱰᱟ, ᱯᱩᱨᱩᱵᱽ ᱫᱟᱹᱠᱷᱤᱱ ᱫᱚ ᱢᱤᱨᱯᱩᱨ ᱩᱯᱚᱡᱮᱞᱟ, ᱯᱩᱨᱩᱵᱽ ᱫᱚ ᱫᱳᱣᱞᱚᱫᱯᱩᱨ ᱩᱯᱚᱡᱮᱞᱟ ᱟᱨ ᱯᱩᱪᱷᱤᱢ ᱫᱚ ᱠᱩᱥᱴᱤᱭᱟ ᱥᱚᱫᱚᱨ ᱩᱯᱚᱡᱮᱞᱟ ᱢᱮᱱᱟᱜ-ᱟ᱾ ᱱᱤᱭᱟᱹ ᱨᱮᱱᱟᱜ ᱡᱚᱠᱷᱟ ᱫᱚ ᱑᱕᱓.᱗᱒ ᱵᱚᱨᱜᱚ ᱠᱤᱞᱳᱢᱤᱴᱟᱨ᱾

ᱧᱩᱛᱩᱢ ᱠᱟᱛᱷᱟ

ᱵᱷᱮᱲᱟᱢᱟᱨᱟ ᱧᱩᱛᱩᱢ ᱨᱮᱱᱟᱜ ᱢᱟᱱᱮ ᱫᱚ ᱵᱟᱰᱟᱭᱟᱠᱟᱱᱟ᱾ ᱤᱠᱷᱟᱹᱱ ᱟᱸᱡᱚᱢᱚᱜ ᱠᱟᱱᱟ ᱦᱚᱲ ᱠᱚᱴᱷᱮᱱ ᱱᱤᱭᱟᱹ ᱩᱯᱚᱡᱮᱞᱟ ᱨᱮ ᱥᱮᱫᱟᱭ ᱫᱚ ᱟᱹᱰᱤ ᱜᱮ ᱵᱷᱤᱰᱤ ᱠᱚ ᱟᱹᱥᱩᱞᱮᱜ ᱠᱚ ᱛᱟᱦᱮᱱᱟ᱾ ᱩᱱ ᱠᱷᱚᱡᱽ ᱱᱤᱭᱟᱹ ᱩᱯᱚᱡᱮᱞᱟ ᱨᱮᱱᱟᱜ ᱧᱩᱛᱩᱢ ᱫᱚ ᱵᱷᱮᱲᱟᱢᱟᱨᱟ ᱦᱩᱭᱟᱠᱟᱱᱟ᱾

ᱚᱛᱱᱚ ᱥᱮ ᱵᱷᱳᱣᱜᱚᱞᱤᱠ

ᱱᱤᱭᱟᱹ ᱩᱯᱚᱡᱮᱞᱟ ᱨᱮᱱᱟᱜ ᱦᱟᱥᱟ ᱠᱚ ᱜᱚᱵᱮᱥᱚᱱᱟ ᱠᱟᱛᱮᱜ ᱧᱮᱞᱚᱜ ᱠᱟᱱᱟ ᱱᱮᱸᱰᱮ ᱱᱟᱜ ᱦᱟᱥᱟ ᱫᱚ ᱜᱤᱛᱤᱞ ᱠᱚᱠᱟᱣ ᱜᱮᱭᱟ, ᱦᱟᱥᱟ ᱫᱟᱹᱨᱤᱭᱟᱹ ᱜᱮᱭᱟ, ᱞᱚᱥᱚᱫ, ᱵᱟᱹᱞᱟᱠᱟᱹ ᱦᱟᱥᱟ ᱜᱮᱭᱟ, ᱟᱨ ᱛᱷᱚᱲᱟ ᱡᱟᱜᱟ ᱠᱚ ᱢᱮᱱᱟᱜ-ᱟ ᱚᱱᱟ ᱟᱨᱟᱜ ᱦᱟᱥᱟ ᱠᱟᱱᱟ᱾ ᱱᱤᱭᱟᱹ ᱩᱯᱚᱡᱮᱞᱟ ᱨᱮ ᱡᱚᱛᱚ ᱠᱚ ᱢᱤᱞᱟᱹᱣ ᱠᱟᱛᱮᱜ ᱟᱵᱟᱫ ᱠᱚ ᱞᱟᱹᱜᱤᱫ ᱫᱚ ᱟᱹᱰᱤ ᱜᱮ ᱡᱚᱡᱽ-ᱟ᱾

ᱱᱟᱸᱭ ᱱᱟᱞᱟᱠᱚ

ᱯᱚᱫᱫᱟ ᱜᱟᱰᱟ ᱫᱚ ᱵᱷᱮᱲᱟᱢᱟᱨᱟ ᱩᱯᱚᱡᱮᱞᱟ ᱛᱟᱞᱟ ᱛᱮ ᱥᱮᱱ ᱟᱠᱟᱱᱟ᱾ ᱟᱨ ᱱᱤᱭᱟᱹ ᱩᱯᱚᱡᱮᱞᱟ ᱨᱮᱫᱚ ᱒ ᱜᱚᱴᱟᱝ ᱜᱟᱰᱟ ᱢᱮᱱᱟᱜ ᱟᱠᱟᱫᱟ᱾ ᱚᱱᱟ ᱠᱤᱱ ᱫᱚ ᱦᱩᱭᱩᱜ ᱠᱟᱱᱟ, ᱯᱚᱫᱫᱟ ᱜᱟᱰᱟ, ᱟᱨ ᱦᱤᱥᱱᱟ ᱠᱷᱟᱧᱪᱟ ᱜᱟᱰᱟ᱾ ᱱᱤᱭᱟᱹ ᱜᱟᱰᱟ ᱨᱮᱱᱟᱜ ᱜᱤᱛᱤᱞ ᱟᱨ ᱱᱚᱸᱰᱮᱱ ᱠᱚ ᱦᱟᱠᱩ ᱫᱚ ᱟᱹᱰᱤ ᱫᱟᱢᱟᱱ ᱯᱨᱚᱠᱨᱤᱛᱤ ᱥᱚᱢᱯᱚᱫᱽ ᱠᱟᱱᱟ᱾

ᱯᱚᱨᱥᱟᱥᱚᱱᱤᱠ ᱮᱞᱟᱠᱟᱠᱚ

᱕᱙ ᱜᱚᱴᱟᱝ ᱢᱳᱣᱡᱟ ᱟᱨ ᱗᱗ ᱜᱚᱴᱟᱝ ᱟᱛᱚ ᱠᱚ ᱱᱤᱭᱟᱹ ᱛᱮ ᱱᱤᱭᱟᱹ ᱩᱯᱚᱡᱮᱞᱟ ᱫᱚ ᱦᱩᱭᱟᱠᱟᱱᱟ᱾ ᱵᱷᱮᱲᱟᱢᱟᱨᱟ ᱩᱯᱚᱡᱮᱞᱟ ᱨᱮ ᱖ ᱜᱚᱴᱟᱝ ᱤᱭᱩᱱᱤᱭᱚᱱ ᱠᱚ ᱢᱮᱱᱟᱜ-ᱟ᱾ ᱚᱱᱟ ᱫᱚ ᱦᱩᱭᱩᱜ ᱠᱟᱱᱟ,

• ᱪᱟᱸᱫᱜᱽᱨᱟᱢ
• ᱡᱩᱱᱤᱭᱟᱫᱚᱦᱚ
• ᱫᱷᱚᱨᱚᱢᱯᱩᱨ
• ᱵᱟᱦᱤᱨᱪᱚᱨ
• ᱵᱟᱦᱟᱫᱩᱨᱯᱩᱨ
• ᱢᱳᱠᱟᱨᱤᱢᱯᱩᱨ

ᱦᱚᱲ ᱮᱞ

᱒᱐᱐᱑ ᱥᱮᱨᱢᱟ ᱨᱮᱱᱟᱜ ᱦᱚᱲ ᱞᱮᱠᱷᱟ ᱨᱮ ᱵᱟᱲᱟᱭ ᱟᱠᱟᱱᱟ ᱵᱷᱮᱲᱟᱢᱟᱨᱟ ᱩᱯᱚᱡᱮᱞᱟ ᱨᱮ ᱑,᱗᱕,᱔᱘᱐ ᱜᱚᱴᱟᱝ ᱦᱚᱲ ᱢᱮᱱᱟᱜ ᱠᱚᱣᱟ᱾ ᱚᱱᱟ ᱛᱟᱞᱟ ᱨᱮ ᱠᱚᱲᱟ ᱙᱐,᱗᱐᱐ ᱜᱚᱴᱟᱝ, ᱟᱨ ᱠᱩᱲᱤ ᱘᱔,᱗᱘᱐ ᱜᱚᱴᱟᱝ᱾

ᱥᱮᱪᱮᱫ

ᱥᱮᱪᱮᱫ ᱞᱟᱹᱜᱤᱫ ᱛᱮ ᱵᱷᱮᱲᱟᱢᱟᱨᱟ ᱩᱯᱚᱡᱮᱞᱟ ᱨᱮᱱ ᱦᱚᱲ ᱠᱩᱥᱴᱤᱭᱟ ᱦᱚᱱᱚᱛ ᱨᱮᱱ ᱮᱴᱟᱜ ᱡᱟᱜᱟ ᱠᱷᱚᱱ ᱫᱚ ᱱᱟᱥᱮ ᱠᱚ ᱞᱟᱦᱟ ᱡᱚᱸᱜ ᱜᱮᱭᱟ᱾ ᱱᱚᱸᱰᱮ ᱢᱮᱱᱟᱜ-ᱟ ᱕᱐ ᱜᱚᱴᱟᱝ ᱯᱨᱟᱛᱷᱚᱢᱤᱠ ᱤᱥᱠᱩᱞ, ᱟᱨᱦᱚᱸ ᱢᱮᱱᱟᱜ-ᱟ ᱠᱩᱥᱴᱤᱭᱟ ᱨᱮᱱᱟᱜ ᱧᱩᱛᱩᱢᱟᱱ ᱯᱟᱭᱞᱚᱴ ᱦᱟᱭ ᱤᱥᱠᱩᱞ, ᱡᱟᱦᱟᱸ ᱫᱚ ᱑᱙᱑᱘ ᱥᱮᱨᱢᱟ ᱨᱮᱠᱚ ᱵᱮᱱᱟᱣ ᱟᱠᱟᱫᱟ᱾

ᱠᱨᱤᱥᱤᱠᱚ

ᱱᱤᱭᱟᱹ ᱩᱯᱚᱡᱮᱞᱟ ᱨᱮ ᱟᱹᱰᱤ ᱜᱮ ᱠᱨᱤᱥᱤ ᱟᱵᱟᱫ ᱢᱮᱱᱟᱜ-ᱟ᱾ ᱟᱨ ᱱᱚᱸᱰᱮ ᱱᱟᱜ ᱯᱨᱚᱫᱷᱟᱱ ᱟᱵᱟᱫ ᱠᱚᱫᱚ ᱦᱩᱭᱩᱜ ᱠᱟᱱᱟ ᱯᱟᱴ, ᱟᱹᱠᱷ, ᱛᱟᱢᱟᱠ, ᱦᱩᱲᱩ ᱜᱩᱦᱩᱢ᱾ ᱚᱱᱟᱠᱚ ᱵᱮᱜᱚᱨ ᱦᱚᱸ ᱟᱨᱦᱚᱸ ᱢᱮᱱᱟᱜ-ᱟ ᱡᱚᱸᱰᱨᱟ, ᱦᱚᱲᱮᱜ ᱫᱟᱹᱞ, ᱢᱟᱹᱥᱨᱤ ᱫᱟᱹᱞ, ᱛᱩᱲᱤ, ᱟᱨᱦᱚᱸ ᱮᱢᱟᱱ ᱛᱮᱭᱟᱜ ᱟᱲᱟᱝ ᱥᱟᱠᱟᱢᱠᱚ᱾ ᱯᱟᱱ ᱟᱵᱟᱫ ᱨᱮᱦᱚᱸ ᱤᱠᱷᱟᱹᱱ ᱟᱹᱰᱤ ᱜᱮ ᱧᱩᱛᱩᱢ ᱢᱮᱱᱟᱜ-ᱟ᱾

ᱦᱮᱡᱩᱜ ᱥᱮᱱᱚᱜ ᱰᱟᱦᱟᱨ ᱠᱚ

ᱵᱷᱮᱲᱟᱢᱟᱨᱟ ᱩᱯᱚᱡᱮᱞᱟ ᱜᱚᱴᱟ ᱫᱤᱥᱟᱹᱢ ᱥᱟᱶ ᱥᱚᱲᱚᱠ ᱰᱟᱦᱟᱨ ᱛᱮ ᱥᱮᱞᱮᱫ ᱢᱮᱱᱟᱜ ᱠᱚᱣᱟ᱾ ᱟᱨᱦᱚᱸ ᱡᱤᱞᱤᱧ ᱜᱟᱰᱤ ᱨᱮᱞ ᱮᱥᱴᱮᱥᱚᱱ ᱦᱚᱸ ᱢᱮᱱᱟᱜ-ᱟ᱾

ᱧᱮᱞᱚᱜ ᱡᱟᱜᱟᱠᱚ

• ᱦᱟᱨᱰᱤᱧ ᱵᱨᱤᱡᱽ
• ᱞᱟᱞᱚᱱ ᱥᱟᱦ ᱥᱮᱛᱩ
• ᱛᱤᱱ ᱜᱚᱢᱵᱩᱡᱽ ᱢᱚᱥᱡᱤᱫᱽ, ᱫᱷᱚᱨᱚᱢᱯᱩᱨ ᱤᱭᱩᱱᱤᱭᱚᱱ

ᱟᱨᱦᱚᱸ ᱧᱮᱞ

• ᱠᱷᱩᱞᱱᱟ ᱠᱷᱚᱸᱰ
• ᱠᱩᱥᱴᱤᱭᱟ ᱦᱚᱱᱚᱛ
• ᱵᱟᱝᱞᱟᱫᱮᱥ ᱨᱮᱱᱟᱜ ᱩᱯᱚᱡᱮᱞᱟᱠᱚ